हैंహైHaindavamஹிહિં
📍
Font Size:
ശ്രീ രാമ ഭുജംഗപ്രയാത സ്തോത്രം
വിശുദ്ധം പരം സച്ചിദാനന്ദരൂപം
ഗുണാധാരമാധാരഹീനം വരേണ്യം ।
മഹാന്തം വിഭാന്തം ഗുഹാന്തം ഗുണാന്തം
സുഖാന്തം സ്വയം ധാമ രാമം പ്രപദ്യേ ॥ 1 ॥
ശിവം നിത്യമേകം വിഭും താരകാഖ്യം
സുഖാകാരമാകാരശൂന്യം സുമാന്യം ।
മഹേശം കലേശം സുരേശം പരേശം
നരേശം നിരീശം മഹീശം പ്രപദ്യേ ॥ 2 ॥
യദാവർണയത്കർണമൂലേഽന്തകാലേ
ശിവോ രാമ രാമേതി രാമേതി കാശ്യാം ।
തദേകം പരം താരകബ്രഹ്മരൂപം
ഭജേഽഹം ഭജേഽഹം ഭജേഽഹം ഭജേഽഹം ॥ 3 ॥
മഹാരത്നപീഠേ ശുഭേ കല്പമൂലേ
സുഖാസീനമാദിത്യകോടിപ്രകാശം ।
സദാ ജാനകീലക്ഷ്മണോപേതമേകം
സദാ രാമചന്ദ്രം ഭജേഽഹം ഭജേഽഹം ॥ 4 ॥
ക്വണദ്രത്നമഞ്ജീരപാദാരവിന്ദം
ലസന്മേഖലാചാരുപീതാംബരാഢ്യം ।
മഹാരത്നഹാരോല്ലസത്കൗസ്തുഭാംഗം
നദച്ചഞ്ചരീമഞ്ജരീലോലമാലം ॥ 5 ॥
ലസച്ചന്ദ്രികാസ്മേരശോണാധരാഭം
സമുദ്യത്പതംഗേന്ദുകോടിപ്രകാശം ।
നമദ്ബ്രഹ്മരുദ്രാദികോടീരരത്ന
സ്ഫുരത്കാന്തിനീരാജനാരാധിതാംഘ്രിം ॥ 6 ॥
പുരഃ പ്രാഞ്ജലീനാഞ്ജനേയാദിഭക്താൻ
സ്വചിന്മുദ്രയാ ഭദ്രയാ ബോധയന്തം ।
ഭജേഽഹം ഭജേഽഹം സദാ രാമചന്ദ്രം
ത്വദന്യം ന മന്യേ ന മന്യേ ന മന്യേ ॥ 7 ॥
യദാ മത്സമീപം കൃതാന്തഃ സമേത്യ
പ്രചണ്ഡപ്രകോപൈർഭടൈർഭീഷയേന്മാം ।
തദാവിഷ്കരോഷി ത്വദീയം സ്വരൂപം
സദാപത്പ്രണാശം സകോദണ്ഡബാണം ॥ 8 ॥
നിജേ മാനസേ മന്ദിരേ സന്നിധേഹി
പ്രസീദ പ്രസീദ പ്രഭോ രാമചന്ദ്ര ।
സസൗമിത്രിണാ കൈകയീനന്ദനേന
സ്വശക്ത്യാനുഭക്ത്യാ ച സംസേവ്യമാന ॥ 9 ॥
സ്വഭക്താഗ്രഗണ്യൈഃ കപീശൈർമഹീശൈ-
-രനീകൈരനേകൈശ്ച രാമ പ്രസീദ ।
നമസ്തേ നമോഽസ്ത്വീശ രാമ പ്രസീദ
പ്രശാധി പ്രശാധി പ്രകാശം പ്രഭോ മാം ॥ 10 ॥
ത്വമേവാസി ദൈവം പരം മേ യദേകം
സുചൈതന്യമേതത്ത്വദന്യം ന മന്യേ ।
യതോഽഭൂദമേയം വിയദ്വായുതേജോ
ജലോർവ്യാദികാര്യം ചരം ചാചരം ച ॥ 11 ॥
നമഃ സച്ചിദാനന്ദരൂപായ തസ്മൈ
നമോ ദേവദേവായ രാമായ തുഭ്യം ।
നമോ ജാനകീജീവിതേശായ തുഭ്യം
നമഃ പുണ്ഡരീകായതാക്ഷായ തുഭ്യം ॥ 12 ॥
നമോ ഭക്തിയുക്താനുരക്തായ തുഭ്യം
നമഃ പുണ്യപുഞ്ജൈകലഭ്യായ തുഭ്യം ।
നമോ വേദവേദ്യായ ചാദ്യായ പുംസേ
നമഃ സുന്ദരായേന്ദിരാവല്ലഭായ ॥ 13 ॥
നമോ വിശ്വകർത്രേ നമോ വിശ്വഹർത്രേ
നമോ വിശ്വഭോക്ത്രേ നമോ വിശ്വമാത്രേ ।
നമോ വിശ്വനേത്രേ നമോ വിശ്വജേത്രേ
നമോ വിശ്വപിത്രേ നമോ വിശ്വമാത്രേ ॥ 14 ॥
നമസ്തേ നമസ്തേ സമസ്തപ്രപഞ്ച-
-പ്രഭോഗപ്രയോഗപ്രമാണപ്രവീണ ।
മദീയം മനസ്ത്വത്പദദ്വന്ദ്വസേവാം
വിധാതും പ്രവൃത്തം സുചൈതന്യസിദ്ധ്യൈ ॥ 15 ॥
ശിലാപി ത്വദംഘ്രിക്ഷമാസംഗിരേണു
പ്രസാദാദ്ധി ചൈതന്യമാധത്ത രാമ ।
നരസ്ത്വത്പദദ്വന്ദ്വസേവാവിധാനാ-
-ത്സുചൈതന്യമേതീതി കിം ചിത്രമത്ര ॥ 16 ॥
പവിത്രം ചരിത്രം വിചിത്രം ത്വദീയം
നരാ യേ സ്മരന്ത്യന്വഹം രാമചന്ദ്ര ।
ഭവന്തം ഭവാന്തം ഭരന്തം ഭജന്തോ
ലഭന്തേ കൃതാന്തം ന പശ്യന്ത്യതോഽന്തേ ॥ 17 ॥
സ പുണ്യഃ സ ഗണ്യഃ ശരണ്യോ മമായം
നരോ വേദ യോ ദേവചൂഡാമണിം ത്വാം ।
സദാകാരമേകം ചിദാനന്ദരൂപം
മനോവാഗഗമ്യം പരം ധാമ രാമ ॥ 18 ॥
പ്രചണ്ഡപ്രതാപപ്രഭാവാഭിഭൂത-
-പ്രഭൂതാരിവീര പ്രഭോ രാമചന്ദ്ര ।
ബലം തേ കഥം വർണ്യതേഽതീവ ബാല്യേ
യതോഽഖണ്ഡി ചണ്ഡീശകോദണ്ഡദണ്ഡം ॥ 19 ॥
ദശഗ്രീവമുഗ്രം സപുത്രം സമിത്രം
സരിദ്ദുർഗമധ്യസ്ഥരക്ഷോഗണേശം ।
ഭവന്തം വിനാ രാമ വീരോ നരോ വാ
സുരോ വാഽമരോ വാ ജയേത്കസ്ത്രിലോക്യാം ॥ 20 ॥
സദാ രാമ രാമേതി രാമാമൃതം തേ
സദാരാമമാനന്ദനിഷ്യന്ദകന്ദം ।
പിബന്തം നമന്തം സുദന്തം ഹസന്തം
ഹനൂമന്തമന്തർഭജേ തം നിതാന്തം ॥ 21 ॥
സദാ രാമ രാമേതി രാമാമൃതം തേ
സദാരാമമാനന്ദനിഷ്യന്ദകന്ദം ।
പിബന്നന്വഹം നന്വഹം നൈവ മൃത്യോ-
-ര്ബിഭേമി പ്രസാദാദസാദാത്തവൈവ ॥ 22 ॥
അസീതാസമേതൈരകോദണ്ഡഭൂഷൈ-
-രസൗമിത്രിവന്ദ്യൈരചണ്ഡപ്രതാപൈഃ ।
അലങ്കേശകാലൈരസുഗ്രീവമിത്രൈ-
-രരാമാഭിധേയൈരലം ദൈവതൈർനഃ ॥ 23 ॥
അവീരാസനസ്ഥൈരചിന്മുദ്രികാഢ്യൈ-
-രഭക്താഞ്ജനേയാദിതത്ത്വപ്രകാശൈഃ ।
അമന്ദാരമൂലൈരമന്ദാരമാലൈ-
-രരാമാഭിധേയൈരലം ദൈവതൈർനഃ ॥ 24 ॥
അസിന്ധുപ്രകോപൈരവന്ദ്യപ്രതാപൈ-
-രബന്ധുപ്രയാണൈരമന്ദസ്മിതാഢ്യൈഃ ।
അദണ്ഡപ്രവാസൈരഖണ്ഡപ്രബോധൈ-
-രരാമാഭിധേയൈരലം ദൈവതൈർനഃ ॥ 25 ॥
ഹരേ രാമ സീതാപതേ രാവണാരേ
ഖരാരേ മുരാരേഽസുരാരേ പരേതി ।
ലപന്തം നയന്തം സദാകാലമേവം
സമാലോകയാലോകയാശേഷബന്ധോ ॥ 26 ॥
നമസ്തേ സുമിത്രാസുപുത്രാഭിവന്ദ്യ
നമസ്തേ സദാ കൈകയീനന്ദനേഡ്യ ।
നമസ്തേ സദാ വാനരാധീശവന്ദ്യ
നമസ്തേ നമസ്തേ സദാ രാമചന്ദ്ര ॥ 27 ॥
പ്രസീദ പ്രസീദ പ്രചണ്ഡപ്രതാപ
പ്രസീദ പ്രസീദ പ്രചണ്ഡാരികാല ।
പ്രസീദ പ്രസീദ പ്രപന്നാനുകമ്പിൻ
പ്രസീദ പ്രസീദ പ്രഭോ രാമചന്ദ്ര ॥ 28 ॥
ഭുജംഗപ്രയാതം പരം വേദസാരം
മുദാ രാമചന്ദ്രസ്യ ഭക്ത്യാ ച നിത്യം ।
പഠൻസന്തതം ചിന്തയൻസ്വാന്തരംഗേ
സ ഏവ സ്വയം രാമചന്ദ്രഃ സ ധന്യഃ ॥ 29 ॥
ഇതി ശ്രീമച്ഛങ്കരാചാര്യ കൃതം ശ്രീ രാമ ഭുജംഗപ്രയാത സ്തോത്രം ।
Recite with devotion and pure heart
Regular practice brings spiritual benefits