हैंహైHaindavamஹிહિં
📍
Font Size:
ശ്രീ രാമ ആപദുദ്ധാരക സ്തോത്രം
ആപദാമപഹർതാരം ദാതാരം സർവസമ്പദാം ।
ലോകാഭിരാമം ശ്രീരാമം ഭൂയോ ഭൂയോ നമാമ്യഹം ॥
നമഃ കോദണ്ഡഹസ്തായ സന്ധീകൃതശരായ ച ।
ദണ്ഡിതാഖിലദൈത്യായ രാമായാപന്നിവാരിണേ ॥ 1 ॥
ആപന്നജനരക്ഷൈകദീക്ഷായാമിതതേജസേ ।
നമോഽസ്തു വിഷ്ണവേ തുഭ്യം രാമായാപന്നിവാരിണേ ॥ 2 ॥
പദാംഭോജരജസ്സ്പർശപവിത്രമുനിയോഷിതേ ।
നമോഽസ്തു സീതാപതയേ രാമായാപന്നിവാരിണേ ॥ 3 ॥
ദാനവേന്ദ്രമഹാമത്തഗജപഞ്ചാസ്യരൂപിണേ ।
നമോഽസ്തു രഘുനാഥായ രാമായാപന്നിവാരിണേ ॥ 4 ॥
മഹിജാകുചസംലഗ്നകുങ്കുമാരുണവക്ഷസേ ।
നമഃ കല്യാണരൂപായ രാമായാപന്നിവാരിണേ ॥ 5 ॥
പദ്മസംഭവ ഭൂതേശ മുനിസംസ്തുതകീർതയേ ।
നമോ മാർതാണ്ഡവംശ്യായ രാമായാപന്നിവാരിണേ ॥ 6 ॥
ഹരത്യാർതിം ച ലോകാനാം യോ വാ മധുനിഷൂദനഃ ।
നമോഽസ്തു ഹരയേ തുഭ്യം രാമായാപന്നിവാരിണേ ॥ 7 ॥
താപകാരണസംസാരഗജസിംഹസ്വരൂപിണേ ।
നമോ വേദാന്തവേദ്യായ രാമായാപന്നിവാരിണേ ॥ 8 ॥
രംഗത്തരംഗജലധിഗർവഹൃച്ഛരധാരിണേ ।
നമഃ പ്രതാപരൂപായ രാമായാപന്നിവാരിണേ ॥ 9 ॥
ദാരോപഹിതചന്ദ്രാവതംസധ്യാതസ്വമൂർതയേ ।
നമഃ സത്യസ്വരൂപായ രാമായാപന്നിവാരിണേ ॥ 10 ॥
താരാനായകസങ്കാശവദനായ മഹൗജസേ ।
നമോഽസ്തു താടകാഹന്ത്രേ രാമായാപന്നിവാരിണേ ॥ 11 ॥
രമ്യസാനുലസച്ചിത്രകൂടാശ്രമവിഹാരിണേ ।
നമഃ സൗമിത്രിസേവ്യായ രാമായാപന്നിവാരിണേ ॥ 12 ॥
സർവദേവഹിതാസക്ത ദശാനനവിനാശിനേ ।
നമോഽസ്തു ദുഃഖധ്വംസായ രാമായാപന്നിവാരിണേ ॥ 13 ॥
രത്നസാനുനിവാസൈക വന്ദ്യപാദാംബുജായ ച ।
നമസ്ത്രൈലോക്യനാഥായ രാമായാപന്നിവാരിണേ ॥ 14 ॥
സംസാരബന്ധമോക്ഷൈകഹേതുധാമപ്രകാശിനേ ।
നമഃ കലുഷസംഹർത്രേ രാമായാപന്നിവാരിണേ ॥ 15 ॥
പവനാശുഗ സങ്ക്ഷിപ്ത മാരീചാദി സുരാരയേ ।
നമോ മഖപരിത്രാത്രേ രാമായാപന്നിവാരിണേ ॥ 16 ॥
ദാംഭികേതരഭക്തൗഘമഹദാനന്ദദായിനേ ।
നമഃ കമലനേത്രായ രാമായാപന്നിവാരിണേ ॥ 17 ॥
ലോകത്രയോദ്വേഗകര കുംഭകർണശിരശ്ഛിദേ ।
നമോ നീരദദേഹായ രാമായാപന്നിവാരിണേ ॥ 18 ॥
കാകാസുരൈകനയനഹരല്ലീലാസ്ത്രധാരിണേ ।
നമോ ഭക്തൈകവേദ്യായ രാമായാപന്നിവാരിണേ ॥ 19 ॥
ഭിക്ഷുരൂപസമാക്രാന്ത ബലിസർവൈകസമ്പദേ ।
നമോ വാമനരൂപായ രാമായാപന്നിവാരിണേ ॥ 20 ॥
രാജീവനേത്രസുസ്പന്ദ രുചിരാംഗസുരോചിഷേ ।
നമഃ കൈവല്യനിധയേ രാമായാപന്നിവാരിണേ ॥ 21 ॥
മന്ദമാരുതസംവീത മന്ദാരദ്രുമവാസിനേ ।
നമഃ പല്ലവപാദായ രാമായാപന്നിവാരിണേ ॥ 22 ॥
ശ്രീകണ്ഠചാപദലനധുരീണബലബാഹവേ ।
നമഃ സീതാനുഷക്തായ രാമായാപന്നിവാരിണേ ॥ 23 ॥
രാജരാജസുഹൃദ്യോഷാർചിത മംഗലമൂർതയേ ।
നമ ഇക്ഷ്വാകുവംശ്യായ രാമായാപന്നിവാരിണേ ॥ 24 ॥
മഞ്ജുലാദർശവിപ്രേക്ഷണോത്സുകൈകവിലാസിനേ ।
നമഃ പാലിതഭക്തായ രാമായാപന്നിവാരിണേ ॥ 25 ॥
ഭൂരിഭൂധര കോദണ്ഡമൂർതി ധ്യേയസ്വരൂപിണേ ।
നമോഽസ്തു തേജോനിധയേ രാമായാപന്നിവാരിണേ ॥ 26 ॥
യോഗീന്ദ്രഹൃത്സരോജാതമധുപായ മഹാത്മനേ ।
നമോ രാജാധിരാജായ രാമായാപന്നിവാരിണേ ॥ 27 ॥
ഭൂവരാഹസ്വരൂപായ നമോ ഭൂരിപ്രദായിനേ ।
നമോ ഹിരണ്യഗർഭായ രാമായാപന്നിവാരിണേ ॥ 28 ॥
യോഷാഞ്ജലിവിനിർമുക്ത ലാജാഞ്ചിതവപുഷ്മതേ ।
നമഃ സൗന്ദര്യനിധയേ രാമായാപന്നിവാരിണേ ॥ 29 ॥
നഖകോടിവിനിർഭിന്നദൈത്യാധിപതിവക്ഷസേ ।
നമോ നൃസിംഹരൂപായ രാമായാപന്നിവാരിണേ ॥ 30 ॥
മായാമാനുഷദേഹായ വേദോദ്ധരണഹേതവേ ।
നമോഽസ്തു മത്സ്യരൂപായ രാമായാപന്നിവാരിണേ ॥ 31 ॥
മിതിശൂന്യ മഹാദിവ്യമഹിമ്നേ മാനിതാത്മനേ ।
നമോ ബ്രഹ്മസ്വരൂപായ രാമായാപന്നിവാരിണേ ॥ 32 ॥
അഹങ്കാരേതരജന സ്വാന്തസൗധവിഹാരിണേ ।
നമോഽസ്തു ചിത്സ്വരൂപായ രാമായാപന്നിവാരിണേ ॥ 33 ॥
സീതാലക്ഷ്മണസംശോഭിപാർശ്വായ പരമാത്മനേ ।
നമഃ പട്ടാഭിഷിക്തായ രാമായാപന്നിവാരിണേ ॥ 34 ॥
അഗ്രതഃ പൃഷ്ഠതശ്ചൈവ പാർശ്വതശ്ച മഹാബലൗ ।
ആകർണപൂർണധന്വാനൗ രക്ഷേതാം രാമലക്ഷ്മണൗ ॥ 35 ॥
സന്നദ്ധഃ കവചീ ഖഡ്ഗീ ചാപബാണധരോ യുവാ ।
തിഷ്ഠന്മമാഗ്രതോ നിത്യം രാമഃ പാതു സലക്ഷ്മണഃ ॥ 36 ॥
ആപദാമപഹർതാരം ദാതാരം സർവസമ്പദാം ।
ലോകാഭിരാമം ശ്രീരാമം ഭൂയോ ഭൂയോ നമാമ്യഹം ॥
ഫലശ്രുതി
ഇമം സ്തവം ഭഗവതഃ പഠേദ്യഃ പ്രീതമാനസഃ ।
പ്രഭാതേ വാ പ്രദോഷേ വാ രാമസ്യ പരമാത്മനഃ ॥ 1 ॥
സ തു തീർത്വാ ഭവാംബോധിമാപദസ്സകലാനപി ।
രാമസായുജ്യമാപ്നോതി ദേവദേവപ്രസാദതഃ ॥ 2 ॥
കാരാഗൃഹാദിബാധാസു സമ്പ്രാപ്തേ ബഹുസങ്കടേ ।
ആപന്നിവാരകസ്തോത്രം പഠേദ്യസ്തു യഥാവിധിഃ ॥ 3 ॥
സംയോജ്യാനുഷ്ടുഭം മന്ത്രമനുശ്ലോകം സ്മരന്വിഭും ।
സപ്താഹാത്സർവബാധാഭ്യോ മുച്യതേ നാത്ര സംശയഃ ॥ 4 ॥
ദ്വാത്രിംശദ്വാരജപതഃ പ്രത്യഹം തു ദൃഢവ്രതഃ ।
വൈശാഖേ ഭാനുമാലോക്യ പ്രത്യഹം ശതസംഖ്യയാ ॥ 5 ॥
ധനവാൻ ധനദപ്രഖ്യസ്സ ഭവേന്നാത്ര സംശയഃ ।
ബഹുനാത്ര കിമുക്തേന യം യം കാമയതേ നരഃ ॥ 6 ॥
തം തം കാമമവാപ്നോതി സ്തോത്രേണാനേന മാനവഃ ।
യന്ത്രപൂജാവിധാനേന ജപഹോമാദിതർപണൈഃ ॥ 7 ॥
യസ്തു കുർവീത സഹസാ സർവാൻകാമാനവാപ്നുയാത് ।
ഇഹ ലോകേ സുഖീ ഭൂത്വാ പരേ മുക്തോ ഭവിഷ്യതി ॥ 8 ॥
Recite with devotion and pure heart
Regular practice brings spiritual benefits