हैंహైHaindavamஹிહિં
📍
Font Size:
ಅಷ್ಟಾಕ್ಷರ ಶ್ರೀರಾಮ ಮಂತ್ರ ಸ್ತೋತ್ರಂ
ಸ ಸರ್ವಂ ಸಿದ್ಧಿಮಾಸಾದ್ಯ ಹ್ಯಂತೇ ರಾಮಪದಂ ವ್ರಜೇತ್ ।
ಚಿಂತಯೇಚ್ಚೇತಸಾ ನಿತ್ಯಂ ಶ್ರೀರಾಮಃ ಶರಣಂ ಮಮ ॥ 1 ॥
ವಿಶ್ವಸ್ಯ ಚಾತ್ಮನೋ ನಿತ್ಯಂ ಪಾರತಂತ್ರ್ಯಂ ವಿಚಿಂತ್ಯ ಚ ।
ಚಿಂತಯೇಚ್ಚೇತಸಾ ನಿತ್ಯಂ ಶ್ರೀರಾಮಃ ಶರಣಂ ಮಮ ॥ 2 ॥
ಅಚಿಂತ್ಯೋಽಪಿ ಶರೀರಾದೇಃ ಸ್ವಾತಂತ್ರ್ಯೇಣೈವ ವಿದ್ಯತೇ ।
ಚಿಂತಯೇಚ್ಚೇತಸಾ ನಿತ್ಯಂ ಶ್ರೀರಾಮಃ ಶರಣಂ ಮಮ ॥ 3 ॥
ಆತ್ಮಾಧಾರಂ ಸ್ವತಂತ್ರಂ ಚ ಸರ್ವಶಕ್ತಿಂ ವಿಚಿಂತ್ಯ ಚ ।
ಚಿಂತಯೇಚ್ಚೇತಸಾ ನಿತ್ಯಂ ಶ್ರೀರಾಮಃ ಶರಣಂ ಮಮ ॥ 4 ॥
ನಿತ್ಯಾತ್ಮಗುಣಸಮ್ಯುಕ್ತೋ ನಿತ್ಯಾತ್ಮತನುಮಂಡಿತಃ ।
ನಿತ್ಯಾತ್ಮಕೇಲಿನಿರತಃ ಶ್ರೀರಾಮಃ ಶರಣಂ ಮಮ ॥ 5 ॥
ಗುಣಲೀಲಾಸ್ವರೂಪೈಶ್ಚ ಮಿತಿರ್ಯಸ್ಯ ನ ವಿದ್ಯತೇ ।
ಅತೋಽವಾಙ್ಮನಸಾ ವೇದ್ಯಃ ಶ್ರೀರಾಮಃ ಶರಣಂ ಮಮ ॥ 6 ॥
ಕರ್ತಾ ಸರ್ವಸ್ಯ ಜಗತೋ ಭರ್ತಾ ಸರ್ವಸ್ಯ ಸರ್ವಗಃ ।
ಆಹರ್ತಾ ಕಾರ್ಯ ಜಾತಸ್ಯ ಶ್ರೀರಾಮಃ ಶರಣಂ ಮಮ ॥ 7 ॥
ವಾಸುದೇವಾದಿಮೂರ್ತೀನಾಂ ಚತುರ್ಣಾಂ ಕಾರಣಂ ಪರಂ ।
ಚತುರ್ವಿಂಶತಿ ಮೂರ್ತೀನಾಂ ಶ್ರೀರಾಮಃ ಶರಣಂ ಮಮ ॥ 8 ॥
ನಿತ್ಯಮುಕ್ತಜನೈರ್ಜುಷ್ಟೋ ನಿವಿಷ್ಟಃ ಪರಮೇ ಪದೇ ।
ಪದಂ ಪರಮಭಕ್ತಾನಾಂ ಶ್ರೀರಾಮಃ ಶರಣಂ ಮಮ ॥ 9 ॥
ಮಹದಾದಿಸ್ವರೂಪೇಣ ಸಂಸ್ಥಿತಃ ಪ್ರಾಕೃತೇ ಪದೇ ।
ಬ್ರಹ್ಮಾದಿದೇವರೂಪೈಶ್ಚ ಶ್ರೀರಾಮಃ ಶರಣಂ ಮಮ ॥ 10 ॥
ಮನ್ವಾದಿನೃಪರೂಪೇಣ ಶ್ರುತಿಮಾರ್ಗಂ ಬಿಭರ್ತಿಯಃ ।
ಯಃ ಪ್ರಾಕೃತ ಸ್ವರೂಪೇಣ ಶ್ರೀರಾಮಃ ಶರಣಂ ಮಮ ॥ 11 ॥
ಋಷಿರೂಪೇಣ ಯೋ ದೇವೋ ವನ್ಯವೃತ್ತಿಮಪಾಲಯತ್ ।
ಯೋಽನ್ತರಾತ್ಮಾ ಚ ಸರ್ವೇಷಾಂ ಶ್ರೀರಾಮಃ ಶರಣಂ ಮಮ ॥ 12 ॥
ಯೋಽಸೌ ಸರ್ವತನುಃ ಸರ್ವಃ ಸರ್ವನಾಮಾ ಸನಾತನಃ ।
ಆಸ್ಥಿತಃ ಸರ್ವಭಾವೇಷು ಶ್ರೀರಾಮಃ ಶರಣಂ ಮಮ ॥ 13 ॥
ಬಹಿರ್ಮತ್ಸ್ಯಾದಿರೂಪೇಣ ಸದ್ಧರ್ಮಮನುಪಾಲಯನ್ ।
ಪರಿಪಾತಿ ಜನಾನ್ ದೀನಾನ್ ಶ್ರೀರಾಮಃ ಶರಣಂ ಮಮ ॥ 14 ॥
ಯಶ್ಚಾತ್ಮಾನಂ ಪೃಥಕ್ಕೃತ್ಯ ಭಾವೇನ ಪುರುಷೋತ್ತಮಃ ।
ಅರ್ಚಾಯಾಮಾಸ್ಥಿತೋ ದೇವಃ ಶ್ರೀರಾಮಃ ಶರಣಂ ಮಮ ॥ 15 ॥
ಅರ್ಚಾವತಾರ ರೂಪೇಣ ದರ್ಶನಸ್ಪರ್ಶನಾದಿಭಿಃ ।
ದೀನಾನುದ್ಧರತೇ ಯೋಽಸೌ ಶ್ರೀರಾಮಃ ಶರಣಂ ಮಮ ॥ 16 ॥
ಕೌಶಲ್ಯಾಶುಕ್ತಿಸಂಜಾತೋ ಜಾನಕೀಕಂಠಭೂಷಣಃ ।
ಮುಕ್ತಾಫಲಸಮೋ ಯೋಽಸೌ ಶ್ರೀರಾಮಃ ಶರಣಂ ಮಮ ॥ 17 ॥
ವಿಶ್ವಾಮಿತ್ರಮಖತ್ರಾತಾ ತಾಟಕಾಗತಿದಾಯಕಃ ।
ಅಹಲ್ಯಾಶಾಪಶಮನಃ ಶ್ರೀರಾಮಃ ಶರಣಂ ಮಮ ॥ 18 ॥
ಪಿನಾಕಭಂಜನಃ ಶ್ರೀಮಾನ್ ಜಾನಕೀಪ್ರೇಮಪಾಲಕಃ ।
ಜಾಮದಗ್ನ್ಯಪ್ರತಾಪಘ್ನಃ ಶ್ರೀರಾಮಃ ಶರಣಂ ಮಮ ॥ 19 ॥
ರಾಜ್ಯಾಭಿಷೇಕಸಂಹೃಷ್ಟಃ ಕೈಕೇಯೀ ವಚನಾತ್ಪುನಃ ।
ಪಿತೃದತ್ತವನಕ್ರೀಡಃ ಶ್ರೀರಾಮಃ ಶರಣಂ ಮಮ ॥ 20 ॥
ಜಟಾಚೀರಧರೋಧನ್ವೀ ಜಾನಕೀಲಕ್ಷ್ಮಣಾನ್ವಿತಃ ।
ಚಿತ್ರಕೂಟಕೃತಾವಾಸಃ ಶ್ರೀರಾಮಃ ಶರಣಂ ಮಮ ॥ 21 ॥
ಮಹಾಪಂಚವಟೀಲೀಲಾ ಸಂಜಾತಪರಮೋತ್ಸವಃ ।
ದಂಡಕಾರಣ್ಯಸಂಚಾರೀ ಶ್ರೀರಾಮಃ ಶರಣಂ ಮಮ ॥ 22 ॥
ಖರದೂಷಣವಿಚ್ಛೇದೀ ದುಷ್ಟರಾಕ್ಷಸಭಂಜನಃ ।
ಹೃತಶೂರ್ಪಣಖಾಶೋಭಃ ಶ್ರೀರಾಮಃ ಶರಣಂ ಮಮ ॥ 23 ॥
ಮಾಯಾಮೃಗವಿಭೇತ್ತಾ ಚ ಹೃತಸೀತಾನುತಾಪಕೃತ್ ।
ಜಾನಕೀವಿರಹಾಕ್ರೋಶೀ ಶ್ರೀರಾಮಃ ಶರಣಂ ಮಮ ॥ 24 ॥
ಲಕ್ಷ್ಮಣಾನುಚರೋಧನ್ವೀ ಲೋಕಯಾತ್ರಾವಿಡಂಬಕೃತ್ ।
ಪಂಪಾತೀರಕೃತಾನ್ವೇಷಃ ಶ್ರೀರಾಮಃ ಶರಣಂ ಮಮ ॥ 25 ॥
ಜಟಾಯುಗತಿ ದಾತಾ ಚ ಕಬಂಧಗತಿದಾಯಕಃ ।
ಹನುಮತ್ಕೃತಸಾಹಿತ್ಯ ಶ್ರೀರಾಮಃ ಶರಣಂ ಮಮ ॥ 26 ॥
ಸುಗ್ರೀವರಾಜ್ಯದಃ ಶ್ರೀಶೋ ವಾಲಿನಿಗ್ರಹಕಾರಕಃ ।
ಅಂಗದಾಶ್ವಾಸನಕರಃ ಶ್ರೀರಾಮಃ ಶರಣಂ ಮಮ ॥ 27 ॥
ಸೀತಾನ್ವೇಷಣನಿರ್ಮುಕ್ತಹನುಮತ್ಪ್ರಮುಖವ್ರಜಃ ।
ಮುದ್ರಾನಿವೇಶಿತಬಲಃ ಶ್ರೀರಾಮಃ ಶರಣಂ ಮಮ ॥ 28 ॥
ಹೇಲೋತ್ತರಿತಪಾಥೋಧಿರ್ಬಲನಿರ್ಧೂತರಾಕ್ಷಸಃ ।
ಲಂಕಾದಾಹಕರೋ ಧೀರಃ ಶ್ರೀರಾಮಃ ಶರಣಂ ಮಮ ॥ 29 ॥
ರೋಷಸಂಬದ್ಧಪಾಥೋಧಿರ್ಲಂಕಾಪ್ರಾಸಾದರೋಧಕಃ ।
ರಾವಣಾದಿಪ್ರಭೇತ್ತಾ ಚ ಶ್ರೀರಾಮಃ ಶರಣಂ ಮಮ ॥ 30 ॥
ಜಾನಕೀ ಜೀವನತ್ರಾತಾ ವಿಭೀಷಣಸಮೃದ್ಧಿದಃ ।
ಪುಷ್ಪಕಾರೋಹಣಾಸಕ್ತಃ ಶ್ರೀರಾಮಃ ಶರಣಂ ಮಮ ॥ 31 ॥
ರಾಜ್ಯಸಿಂಹಾಸನಾರೂಢಃ ಕೌಶಲ್ಯಾನಂದವರ್ಧನಃ ।
ನಾಮನಿರ್ಧೂತನಿರಯಃ ಶ್ರೀರಾಮಃ ಶರಣಂ ಮಮ ॥ 32 ॥
ಯಜ್ಞಕರ್ತಾ ಯಜ್ಞಭೋಕ್ತಾ ಯಜ್ಞಭರ್ತಾಮಹೇಶ್ವರಃ ।
ಅಯೋಧ್ಯಾಮುಕ್ತಿದಃ ಶಾಸ್ತಾ ಶ್ರೀರಾಮಃ ಶರಣಂ ಮಮ ॥ 33 ॥
ಪ್ರಪಠೇದ್ಯಃ ಶುಭಂ ಸ್ತೋತ್ರಂ ಮುಚ್ಯೇತ ಭವಬಂಧನಾತ್ ।
ಮಂತ್ರಶ್ಚಾಷ್ಟಾಕ್ಷರೋ ದೇವಃ ಶ್ರೀರಾಮಃ ಶರಣಂ ಮಮ ॥ 34 ॥
ಪ್ರಪನ್ನಃ ಸರ್ವಧರ್ಮೇಭ್ಯೋಃ ಮಾಮೇಕಂ ಶರಣಂ ಗತಃ ।
ಪಠೇನ್ನಿದಂ ಮಮ ಸ್ತೋತ್ರಂ ಮುಚ್ಯತೇ ಭವ ಬಂಧನಾತ್ ॥ 35 ॥
ಇತಿ ಬೃಹದ್ಬ್ರಹ್ಮಸಂಹಿತಾಂತರ್ಗತ ಅಷ್ಟಾಕ್ಷರ ಶ್ರೀರಾಮ ಮಂತ್ರ ಸ್ತೋತ್ರಂ ।
Recite with devotion and pure heart
Regular practice brings spiritual benefits