നമഃ ശിവാഭ്യാം നവയൌവനാഭ്യാം പരസ്പരാശ്ലിഷ്ടവപുര്ധരാഭ്യാമ് । നഗേംദ്രകന്യാവൃഷകേതനാഭ്യാം നമോ നമഃ ശംകരപാർവതീഭ്യാമ് ॥ 1 ॥ നമഃ ശിവാഭ്യാം സരസോത്സവാഭ്യാം നമസ്കൃതാഭീഷ്ടവരപ്രദാഭ്യാമ് । നാരായണേനാര്ചിതപാദുകാഭ്യാം നമോ നമഃ ശംകരപാർവതീഭ്യാമ് ॥ 2 ॥ നമഃ ശിവാഭ്യാം വൃഷവാഹനാഭ്യാം വിരിംചിവിഷ്ണ്വിംദ്രസുപൂജിതാഭ്യാമ് । വിഭൂതിപാടീരവിലേപനാഭ്യാം നമോ നമഃ ശംകരപാർവതീഭ്യാമ് ॥ 3 ॥ നമഃ ശിവാഭ്യാം ജഗദീശ്വരാഭ്യാം ജഗത്പതിഭ്യാം ജയവിഗ്രഹാഭ്യാമ് । ജംഭാരിമുഖ്യൈരഭിവംദിതാഭ്യാം നമോ നമഃ ശംകരപാർവതീഭ്യാമ് ॥ 4 ॥ നമഃ ശിവാഭ്യാം പരമൌഷധാഭ്യാം പംചാക്ഷരീപംജരരംജിതാഭ്യാമ് । പ്രപംചസൃഷ്ടിസ്ഥിതിസംഹൃതാഭ്യാം നമോ നമഃ ശംകരപാർവതീഭ്യാമ് ॥ 5 ॥ നമഃ ശിവാഭ്യാമതിസുംദരാഭ്യാം അത്യംതമാസക്തഹൃദംബുജാഭ്യാമ് । അശേഷലോകൈകഹിതംകരാഭ്യാം നമോ നമഃ ശംകരപാർവതീഭ്യാമ് ॥ 6 ॥ നമഃ ശിവാഭ്യാം കലിനാശനാഭ്യാം കംകാളകല്യാണവപുര്ധരാഭ്യാമ് । കൈലാസശൈലസ്ഥിതദേവതാഭ്യാം നമോ നമഃ ശംകരപാർവതീഭ്യാമ് ॥ 7 ॥ നമഃ ശിവാഭ്യാമശുഭാപഹാഭ്യാം അശേഷലോകൈകവിശേഷിതാഭ്യാമ് । അകുംഠിതാഭ്യാം സ്മൃതിസംഭൃതാഭ്യാം നമോ നമഃ ശംകരപാർവതീഭ്യാമ് ॥ 8 ॥ നമഃ ശിവാഭ്യാം രഥവാഹനാഭ്യാം രവീംദുവൈശ്വാനരലോചനാഭ്യാമ് । രാകാശശാംകാഭമുഖാംബുജാഭ്യാം നമോ നമഃ ശംകരപാർവതീഭ്യാമ് ॥ 9 ॥ നമഃ ശിവാഭ്യാം ജടിലംധരാഭ്യാം ജരാമൃതിഭ്യാം ച വിവര്ജിതാഭ്യാമ് । ജനാര്ദനാബ്ജോദ്ഭവപൂജിതാഭ്യാം നമോ നമഃ ശംകരപാർവതീഭ്യാമ് ॥ 10 ॥ നമഃ ശിവാഭ്യാം വിഷമേക്ഷണാഭ്യാം ബില്വച്ഛദാമല്ലികദാമഭൃദ്ഭ്യാമ് । ശോഭാവതീശാംതവതീശ്വരാഭ്യാം നമോ നമഃ ശംകരപാർവതീഭ്യാമ് ॥ 11 ॥ നമഃ ശിവാഭ്യാം പശുപാലകാഭ്യാം ജഗത്രയീരക്ഷണബദ്ധഹൃദ്ഭ്യാമ് । സമസ്തദേവാസുരപൂജിതാഭ്യാം നമോ നമഃ ശംകരപാർവതീഭ്യാമ് ॥ 12 ॥ സ്തോത്രം ത്രിസംധ്യം ശിവപാർവതീഭ്യാം ഭക്ത്യാ പഠേദ്ദ്വാദശകം നരോ യഃ । സ സർവസൌഭാഗ്യഫലാനി ഭുംക്തേ ശതായുരാംതേ ശിവലോകമേതി ॥ 13 ॥