సరస్వత్యష్టకం

అమలా విశ్వవంద్యా సా కమలాకరమాలినీ ।

విమలాభ్రనిభా వోఽవ్యాత్ కమలా యా సరస్వతీ ॥ 1 ॥

వార్ణసంస్థాంగరూపా యా స్వర్ణరత్నవిభూషితా ।

నిర్ణయా భారతి శ్వేతవర్ణా వోఽవ్యాత్ సరస్వతీ ॥ 2 ॥

వరదాభయరుద్రాక్షవరపుస్తకధారిణీ ।

సరసా సా సరోజస్థా సారా వోఽవ్యాత్ సరాస్వతీ ॥ 3 ॥

సుందరీ సుముఖీ పద్మమందిరా మధురా చ సా ।

కుందభాసా సదా వోఽవ్యాద్వందితా యా సరస్వతీ ॥ 4 ॥

రుద్రాక్షలిపితా కుంభముద్రాధృతకరాంబుజా ।

భద్రార్థదాయినీ సావ్యాద్భద్రాబ్జాక్షీ సరస్వతీ ॥ 5 ॥

రక్తకౌశేయరత్నాఢ్యా వ్యక్తభాషణభూషణా ।

భక్తహృత్పద్మసంస్థా సా శక్తా వోఽవ్యాత్ సరస్వతీ ॥ 6 ॥

చతుర్ముఖస్య జాయా యా చతుర్వేదస్వరూపిణీ ।

చతుర్భుజా చ సా వోఽవ్యాచ్చతుర్వర్గా సరస్వతీ ॥ 7 ॥

సర్వలోకప్రపూజ్యా యా పర్వచంద్రనిభాననా ।

సర్వజిహ్వాగ్రసంస్థా సా సదా వోఽవ్యాత్ సరస్వతీ ॥ 8 ॥

సరస్వత్యష్టకం నిత్యం సకృత్ ప్రాతర్జపేన్నరః ।

అజ్ఞైర్విముచ్యతే సోఽయం ప్రాజ్ఞైరిష్టశ్చ లభ్యతే ॥ 9 ॥

ఇతి శ్రీ సరస్వత్యష్టకం ॥

Recite with devotion and pure heart

Regular practice brings spiritual benefits