अमला विश्ववन्द्या सा कमलाकरमालिनी । विमलाभ्रनिभा वोऽव्यात् कमला या सरस्वती ॥ 1 ॥ वार्णसंस्थाङ्गरूपा या स्वर्णरत्नविभूषिता । निर्णया भारति श्वेतवर्णा वोऽव्यात् सरस्वती ॥ 2 ॥ वरदाभयरुद्राक्षवरपुस्तकधारिणी । सरसा सा सरोजस्था सारा वोऽव्यात् सरास्वती ॥ 3 ॥ सुन्दरी सुमुखी पद्ममन्दिरा मधुरा च सा । कुन्दभासा सदा वोऽव्याद्वन्दिता या सरस्वती ॥ 4 ॥ रुद्राक्षलिपिता कुम्भमुद्राधृतकराम्बुजा । भद्रार्थदायिनी साव्याद्भद्राब्जाक्षी सरस्वती ॥ 5 ॥ रक्तकौशेयरत्नाढ्या व्यक्तभाषणभूषणा । भक्तहृत्पद्मसंस्था सा शक्ता वोऽव्यात् सरस्वती ॥ 6 ॥ चतुर्मुखस्य जाया या चतुर्वेदस्वरूपिणी । चतुर्भुजा च सा वोऽव्याच्चतुर्वर्गा सरस्वती ॥ 7 ॥ सर्वलोकप्रपूज्या या पर्वचन्द्रनिभानना । सर्वजिह्वाग्रसंस्था सा सदा वोऽव्यात् सरस्वती ॥ 8 ॥ सरस्वत्यष्टकं नित्यं सकृत् प्रातर्जपेन्नरः । अज्ञैर्विमुच्यते सोऽयं प्राज्ञैरिष्टश्च लभ्यते ॥ 9 ॥ इति श्री सरस्वत्यष्टकम् ॥