രാഘവേന്ദ്ര മംഗലാഷ്ടകം

ശ്രീമദ്രാമപാദാരവിന്ദമധുപഃ ശ്രീമധ്വവംശാധിപഃ

സച്ചിഷ്യോഡുഗണോഡുപഃ ശ്രിതജഗദ്ഗീർവാണസത്പാദപഃ ।

അത്യർഥം മനസാ കൃതാച്യുതജപഃ പാപാന്ധകാരാതപഃ

ശ്രീമത്സദ്ഗുരുരാഘവേന്ദ്രയതിരാട് കുര്യാദ്ധ്രുവം മംഗലം ॥ 1 ॥

കർമന്ദീന്ദ്രസുധീന്ദ്രസദ്ഗുരുകരാംഭോജോദ്ഭവഃ സന്തതം

പ്രാജ്യധ്യാനവശീകൃതാഖിലജഗദ്വാസ്തവ്യലക്ഷ്മീധവഃ ।

സച്ഛാസ്ത്രാദി വിദൂഷകാഖിലമൃഷാവാദീഭകണ്ഠീരവഃ

ശ്രീമത്സദ്ഗുരുരാഘവേന്ദ്രയതിരാട് കുര്യാദ്ധ്രുവം മംഗലം ॥ 2 ॥

സാലങ്കാരകകാവ്യനാടകകലാകാണാദപാതഞ്ജല-

ത്രയ്യർഥസ്മൃതിജൈമിനീയകവിതാസങ്കീതപാരംഗതഃ ।

വിപ്രക്ഷത്രവിഡംഘ്രിജാതമുഖരാനേകപ്രജാസേവിതഃ

ശ്രീമത്സദ്ഗുരുരാഘവേന്ദ്രയതിരാട് കുര്യാദ്ധ്രുവം മംഗലം ॥ 3 ॥

രംഗോത്തുംഗതരംഗമംഗലകര ശ്രീതുംഗഭദ്രാതട-

പ്രത്യക്സ്ഥദ്വിജപുംഗവാലയ ലസന്മന്ത്രാലയാഖ്യേ പുരേ ।

നവ്യേന്ദ്രോപലനീലഭവ്യകരസദ്വൃന്ദാവനാന്തർഗതഃ

ശ്രീമത്സദ്ഗുരുരാഘവേന്ദ്രയതിരാട് കുര്യാദ്ധ്രുവം മംഗലം ॥ 4 ॥

വിദ്വദ്രാജശിരഃകിരീടഖചിതാനർഘ്യോരുരത്നപ്രഭാ

രാഗാഘൗഘഹപാദുകാദ്വയചരഃ പദ്മാക്ഷമാലാധരഃ ।

ഭാസ്വദ്ദണ്ടകമണ്ഡലൂജ്ജ്വലകരോ രക്താംബരാഡംബരഃ

ശ്രീമത്സദ്ഗുരുരാഘവേന്ദ്രയതിരാട് കുര്യാദ്ധ്രുവം മംഗലം ॥ 5 ॥

യദ്വൃന്ദാവനസത്പ്രദക്ഷിണനമസ്കാരാഭിഷേകസ്തുതി-

ധ്യാനാരാധനമൃദ്വിലേപനമുഖാനേകോപചാരാൻ സദാ ।

കാരം കാരമഭിപ്രയാന്തി ചതുരോ ലോകാഃ പുമർഥാൻ സദാ

ശ്രീമത്സദ്ഗുരുരാഘവേന്ദ്രയതിരാട് കുര്യാദ്ധ്രുവം മംഗലം ॥ 6 ॥

വേദവ്യാസമുനീശമധ്വയതിരാട് ടീകാര്യവാക്യാമൃതം

ജ്ഞാത്വാഽദ്വൈതമതം ഹലാഹലസമം ത്യക്ത്വാ സമാഖ്യാപ്തയേ ।

സംഖ്യാവത്സുഖദാം ദശോപനിഷദാം വ്യാഖ്യാം സമാഖ്യന്മുദാ

ശ്രീമത്സദ്ഗുരുരാഘവേന്ദ്രയതിരാട് കുര്യാദ്ധ്രുവം മംഗലം ॥ 7 ॥

ശ്രീമദ്വൈഷ്ണവലോകജാലകഗുരുഃ ശ്രീമത്പരിവ്രാഡ്ഗുരുഃ

ശാസ്ത്രേ ദേവഗുരുഃ ശ്രിതാമരതരുഃ പ്രത്യൂഹഗോത്രസ്വരുഃ ।

ചേതോഽതീതശിരുസ്തഥാ ജിതവരുസ്സത്സൗഖ്യസമ്പത്കരുഃ

ശ്രീമത്സദ്ഗുരുരാഘവേന്ദ്രയതിരാട് കുര്യാദ്ധ്രുവം മംഗലം ॥ 8 ॥

യസ്സന്ധ്യാസ്വനിശം ഗുരോര്യതിപതേഃ സന്മംഗലസ്യാഷ്ടകം

സദ്യഃ പാപഹരം സ്വസേവി വിദുഷാം ഭക്ത്യൈതദാഭാഷിതം ।

ഭക്ത്യാ വക്തി സുസമ്പദം ശുഭപദം ദീർഘായുരാരോഗ്യകം

കീർതിം പുത്രകലത്രബാന്ധവസുഹൃന്മൂർതിഃ പ്രയാതി ധ്രുവം ॥

ഇതി ശ്രീമദപ്പണാചാര്യകൃതം രാഘവേന്ദ്രമംഗലാഷ്ടകം സമ്പൂർണം ।

Recite with devotion and pure heart

Regular practice brings spiritual benefits