kavacaṃ śrī rāghavendrasya yatīndrasya mahātmanaḥ । vakṣyāmi guruvaryasya vāñchitārthapradāyakam ॥ 1 ॥ ṛṣirasyāppaṇācāryaḥ chando'nuṣṭup prakīrtitam । devatā śrīrāghavendra gururiṣṭārthasiddhaye ॥ 2 ॥ aṣṭottaraśataṃ japyaṃ bhaktiyuktena cetasā । udyatpradyotanadyota dharmakūrmāsane sthitam ॥ 3 ॥ khadyokhadyotanadyota dharmakūrmāsane sthitam । dhṛtakāṣāyavasanaṃ tulasīhāravakṣasam ॥ 4 ॥ dordaṇḍavilasaddaṇḍa kamaṇḍalavirājitam । abhayajñānamudrā'kṣamālālolakarāmbujam ॥ 5 ॥ yogīndravandyapādābjaṃ rāghavendra guruṃ bhaje । śiro rakṣatu me nityaṃ rāghavendro'khileṣṭadaḥ ॥ 6 ॥ pāpādripāṭane vajraḥ keśān rakṣatu me sadā । kṣamāsuragaṇādhīśo mukhaṃ rakṣatu me guruḥ ॥ 7 ॥ harisevālabdhasarvasampatphālaṃ mamāvatu । devasvabhāvo'vatu me dṛśau tattvapradarśakaḥ ॥ 8 ॥ iṣṭapradāne kalpadruḥ śrotre śrutyarthabodhakaḥ । bhavyasvarūpo me nāsāṃ jihvāṃ me'vatu bhavyakṛt ॥ 9 ॥ āsyaṃ rakṣatu me duḥkhatūlasaṅghāgnicaryakaḥ । sukhadhairyādisuguṇo bhruvau mama sadā'vatu ॥ 10 ॥ oṣṭhau rakṣatu me sarvagrahanigrahaśaktimān । upaplavodadhesseturdantān rakṣatu me sadā ॥ 11 ॥ nirastadoṣo me pātu kapolau sarvapālakaḥ । niravadyamahāveṣaḥ kaṇṭhaṃ me'vatu sarvadā ॥ 12 ॥ karṇamūle tu pratyarthimūkatvākaravāṅmama । paravādijaye pātu hastau sattattvavādakṛt ॥ 13 ॥ karau rakṣatu me vidvatparijñeyaviśeṣavān । vāgvaikharībhavyaśeṣajayī vakṣasthalaṃ mama ॥ 14 ॥ satīsantānasampattibhaktijñānādivṛddhikṛt । stanau rakṣatu me nityaṃ śarīrāvadyahānikṛt ॥ 15 ॥ puṇyavardhanapādābjābhiṣekajalasañcayaḥ । nābhiṃ rakṣatu me pārśvau dyunadītulyasadguṇaḥ ॥ 16 ॥ pṛṣṭhaṃ rakṣatu me nityaṃ tāpatrayavināśakṛt । kaṭiṃ me rakṣatu sadā vandyā satputradāyakaḥ ॥ 17 ॥ jaghanaṃ me'vatu sadā vyaṅgasvaṅgasamṛddhikṛt । guhyaṃ rakṣatu me pāpagrahāriṣṭavināśakṛt ॥ 18 ॥ bhaktāghavidhvaṃsakaranijamūrtipradarśakaḥ । mūrtimānpātu me romaṃ rāghavendro jagadguruḥ ॥ 19 ॥ sarvatantrasvatantro'sau jānunī me sadā'vatu । jaṅghe rakṣatu me nityaṃ śrīmadhvamatavardhanaḥ ॥ 20 ॥ vijayīndrakarābjotthasudhīndravaraputrakaḥ । gulphau śrīrāghavendro me yatirāṭ sarvadā'vatu ॥ । 21 ॥ pādau rakṣatu me sarvabhayahārī kṛpānidhiḥ । jñānabhaktisuputrāyuryaśaḥ śrīpuṇyavardhanaḥ ॥ 22 ॥ karapādāṅgulīḥ sarvā mamāvatu jagadguruḥ । prativādijayasvāntabhedacihnādaro guruḥ ॥ 23 ॥ nakhānavatu me sarvān sarvaśāstraviśāradaḥ । aparokṣīkṛtaśrīśaḥ prācyāṃ diśi sadā'vatu ॥ 24 ॥ sa dakṣiṇe cā'vatu māṃ samupekṣitabhāvajaḥ । apekṣitapradātā ca pratīcyāmavatu prabhuḥ ॥ 25 ॥ dayādākṣiṇyavairāgyavākpāṭavamukhāṅkitaḥ । sadodīcyāmavatu māṃ śāpānugrahaśaktimān ॥ 26 ॥ nikhilendriyadoṣaghno mahānugrahakṛdguruḥ । adhaścordhvaṃ cā'vatu māmaṣṭākṣaramanūditam ॥ 27 ॥ ātmātmīyāgharāśighno māṃ rakṣatu vidikṣu ca । caturṇāṃ ca pumarthānāṃ dātā prātaḥ sadā'vatu ॥ 28 ॥ saṅgrāme'vatu māṃ nityaṃ tattvavitsarvasaukhyakṛt । madhyāhne'gamyamahimā māṃ rakṣatu mahāyaśāḥ ॥ 29 ॥ mṛtapotaprāṇadātā sāyāhne māṃ sadā'vatu । vedisthapuruṣojjīvī niśīthe pātu māṃ guruḥ ॥ 30 ॥ vahnisthamālikoddhartā vahnitāpātsadā'vatu । samagraṭīkāvyākhyātā gururme viṣaye'vatu ॥ 31 ॥ kāntāre'vatu māṃ nityaṃ bhāṭṭa saṅgrahakṛdguruḥ । sudhāparimaloddhartā svacchandastu sadā'vatu ॥ 32 ॥ rājacoraviṣavyādhiyādovanyamṛgādibhiḥ । apasmārāpahartā naḥ śāstravitsarvadā'vatu ॥ 33 ॥ gatau sarvatra māṃ pātūpaniṣadarthakṛdguruḥ । ṛgvyākhyānakṛdācāryaḥ sthitau rakṣatu māṃ sadā ॥ 34 ॥ mantrālayanivāsī māṃ jāgratkāle sadā'vatu । nyāyamuktāvalīkartā svapne rakṣatu māṃ sadā ॥ 35 ॥ māṃ pātu candrikāvyākhyākartā suptau hi tattvakṛt । sutantradīpikākartā muktau rakṣatu māṃ guruḥ ॥ 36 ॥ gītārthasaṅgrahakaraḥ sadā rakṣatu māṃ guruḥ । śrīmadhvamatadugdhābdhicandro'vatu sadā'naghaḥ ॥ 37 ॥ iti śrīrāghavendrasya kavacaṃ pāpanāśanam । sarvavyādhiharaṃ sadyaḥ pāvanaṃ puṇyavardhanam ॥ 38 ॥ ya idaṃ paṭhate nityaṃ niyamena samāhitaḥ । adṛṣṭiḥ pūrṇadṛṣṭiḥ syādeḍamūko'pi vākpatiḥ ॥ 39 ॥ pūrṇāyuḥ pūrṇasampattibhaktijñānābhivṛddhikṛt । pītvā vāri naro yena kavacenābhimantritam ॥ 40 ॥ jahāti kukṣigān rogān guruvaryaprasādataḥ । pradakṣiṇanamaskārān gurorvṛndāvanasya yaḥ ॥ 41 ॥ karoti parayā bhaktyā tadetatkavacaṃ paṭhan । paṅguḥ kūṇiśca paugaṇḍaḥ pūrṇāṅgo jāyate dhruvam ॥ 42 ॥ śeṣāśca kuṣṭhapūrvāśca naśyantyāmayarāśayaḥ । aṣṭākṣareṇa mantreṇa stotreṇa kavacena ca ॥ 43 ॥ vṛndāvane sannihitamabhiṣicya yathāvidhi । yantre mantrākṣarāṇyaṣṭau vilikhyātra pratiṣṭhitam ॥ 44 ॥ ṣoḍaśairupacāraiśca sampūjya trijagadgurum । aṣṭottaraśatākhyābhirarcayetkusumādibhiḥ ॥ 45 ॥ phalaiśca vividhaireva gurorarcāṃ prakurvataḥ । nāmaśravaṇamātreṇa guruvaryaprasādataḥ ॥ 46 ॥ bhūtapretapiśācādyāḥ vidravanti diśo daśa । paṭhedetattrikaṃ nityaṃ gurorvṛndāvanāntike ॥ 47 ॥ dīpaṃ samyojya vidyāvān sabhāsu vijayī bhavet । rājacoramahāvyāghrasarpanakrādipīḍanāt ॥ 48 ॥ kavacasya prabhāveṇa bhayaṃ tasya na jāyate । somasūryoparāgādikāle vṛndāvanāntike ॥ 49 ॥ kavacāditrikaṃ puṇyamappaṇācāryadarśitam । japedyaḥ sa dhanaṃ putrān bhāryāṃ ca sumanoramām ॥ 50 ॥ jñānaṃ bhaktiṃ ca vairāgyaṃ bhuktiṃ muktiṃ ca śāśvatīm । samprāpya modate nityaṃ guruvaryaprasādataḥ ॥ 51 ॥ iti śrīmadappaṇācāryaviracitaṃ śrīrāghavendrakavacaṃ sampūrṇam ।