ನಟೇಶ್ವರ ಭುಜಂಗ ಸ್ತುತಿಃ

ಲೋಕಾನಾಹೂಯ ಸರ್ವಾನ್ ಡಮರುಕನಿನದೈರ್ಘೋರಸಂಸಾರಮಗ್ನಾನ್

ದತ್ವಾಭೀತಿಂ ದಯಾಲುಃ ಪ್ರಣತಭಯಹರಂ ಕುಂಚಿತಂ ವಾಮಪಾದಂ ।

ಉದ್ಧೃತ್ಯೇದಂ ವಿಮುಕ್ತೇರಯನಮಿತಿ ಕರಾದ್ದರ್ಶಯನ್ ಪ್ರತ್ಯಯಾರ್ಥಂ

ಬಿಭ್ರದ್ವಹ್ನಿಂ ಸಭಾಯಾಂ ಕಲಯತಿ ನಟನಂ ಯಃ ಸ ಪಾಯಾನ್ನಟೇಶಃ ॥ 1 ॥

ದಿಗೀಶಾದಿ ವಂದ್ಯಂ ಗಿರೀಶಾನಚಾಪಂ

ಮುರಾರಾತಿ ಬಾಣಂ ಪುರತ್ರಾಸಹಾಸಂ ।

ಕರೀಂದ್ರಾದಿ ಚರ್ಮಾಂಬರಂ ವೇದವೇದ್ಯಂ

ಮಹೇಶಂ ಸಭೇಶಂ ಭಜೇಽಹಂ ನಟೇಶಂ ॥ 2 ॥

ಸಮಸ್ತೈಶ್ಚ ಭೂತೈಃ ಸದಾ ನಮ್ಯಮಾದ್ಯಂ

ಸಮಸ್ತೈಕಬಂಧುಂ ಮನೋದೂರಮೇಕಂ ।

ಅಪಸ್ಮಾರನಿಘ್ನಂ ಪರಂ ನಿರ್ವಿಕಾರಂ

ಮಹೇಶಂ ಸಭೇಶಂ ಭಜೇಽಹಂ ನಟೇಶಂ ॥ 3 ॥

ದಯಾಲುಂ ವರೇಣ್ಯಂ ರಮಾನಾಥವಂದ್ಯಂ

ಮಹಾನಂದಭೂತಂ ಸದಾನಂದನೃತ್ತಂ ।

ಸಭಾಮಧ್ಯವಾಸಂ ಚಿದಾಕಾಶರೂಪಂ

ಮಹೇಶಂ ಸಭೇಶಂ ಭಜೇಽಹಂ ನಟೇಶಂ ॥ 4 ॥

ಸಭಾನಾಥಮಾದ್ಯಂ ನಿಶಾನಾಥಭೂಷಂ

ಶಿವಾವಾಮಭಾಗಂ ಪದಾಂಭೋಜ ಲಾಸ್ಯಂ ।

ಕೃಪಾಪಾಂಗವೀಕ್ಷಂ ಹ್ಯುಮಾಪಾಂಗದೃಶ್ಯಂ

ಮಹೇಶಂ ಸಭೇಶಂ ಭಜೇಽಹಂ ನಟೇಶಂ ॥ 5 ॥

ದಿವಾನಾಥರಾತ್ರೀಶವೈಶ್ವಾನರಾಕ್ಷಂ

ಪ್ರಜಾನಾಥಪೂಜ್ಯಂ ಸದಾನಂದನೃತ್ತಂ ।

ಚಿದಾನಂದಗಾತ್ರಂ ಪರಾನಂದಸೌಧಂ

ಮಹೇಶಂ ಸಭೇಶಂ ಭಜೇಽಹಂ ನಟೇಶಂ ॥ 6 ॥

ಕರೇಕಾಹಲೀಕಂ ಪದೇಮೌಕ್ತಿಕಾಲಿಂ

ಗಲೇಕಾಲಕೂಟಂ ತಲೇಸರ್ವಮಂತ್ರಂ ।

ಮುಖೇ ಮಂದಹಾಸಂ ಭುಜೇ ನಾಗರಾಜಂ

ಮಹೇಶಂ ಸಭೇಶಂ ಭಜೇಽಹಂ ನಟೇಶಂ ॥ 7 ॥

ತ್ವದನ್ಯಂ ಶರಣ್ಯಂ ನ ಪಶ್ಯಾಮಿ ಶಂಭೋ

ಮದನ್ಯಃ ಪ್ರಪನ್ನೋಸ್ತಿ ಕಿಂತೇತಿದೀನಃ ।

ಮದರ್ಥೇಹ್ಯುಪೇಕ್ಷಾ ತವಾಸೀತ್ಕಿಮರ್ಥಂ

ಮಹೇಶಂ ಸಭೇಶಂ ಭಜೇಽಹಂ ನಟೇಶಂ ॥ 8 ॥

ಭವತ್ಪಾದಯುಗ್ಮಂ ಕರೇಣಾವಲಂಬೇ

ಸದಾ ನೃತ್ತಕಾರಿನ್ ಸಭಾಮಧ್ಯದೇಶೇ ।

ಸದಾ ಭಾವಯೇ ತ್ವಾಂ ತದಾ ದಾಸ್ಯಸೀಷ್ಟಂ

ಮಹೇಶಂ ಸಭೇಶಂ ಭಜೇಽಹಂ ನಟೇಶಂ ॥ 9 ॥

ಭೂಯಃ ಸ್ವಾಮಿನ್ ಜನಿರ್ಮೇ ಮರಣಮಪಿ ತಥಾ ಮಾಸ್ತು ಭೂಯಃ ಸುರಾಣಾಂ

ಸಾಮ್ರಾಜ್ಯಂ ತಚ್ಛ ತಾವತ್ಸುಖಲವರಹಿತಂ ದುಃಖದಂ ನಾರ್ಥಯೇ ತ್ವಾಂ ।

ಸಂತಾಪಘ್ನಂ ಪುರಾರೇ ಧುರಿ ಚ ತವಸಭಾ ಮಂದಿರೇ ಸರ್ವದಾ ತ್ವ-

-ನ್ನೃತ್ತಂ ಪಶ್ಯನ್ವಸೇಯಂ ಪ್ರಮಥಗಣವರೈಃ ಸಾಕಮೇತದ್ವಿಧೇಹಿ ॥ 10 ॥

ಇತಿ ಶ್ರೀ ಜ್ಞಾನಸಂಬಂಧ ಕೃತ ಶ್ರೀ ನಟೇಶ್ವರ ಭುಜಂಗ ಸ್ತುತಿಃ ।

Recite with devotion and pure heart

Regular practice brings spiritual benefits