ധ്യാനം – ഗലദ്രക്തമുണ്ഡാവലീകണ്ഠമാലാ മഹാഘോരരാവാ സുദംഷ്ട്രാ കരാലാ । വിവസ്ത്രാ ശ്മശാനാലയാ മുക്തകേശീ മഹാകാലകാമാകുലാ കാലികേയം ॥ 1 ॥ ഭുജേവാമയുഗ്മേ ശിരോഽസിം ദധാനാ വരം ദക്ഷയുഗ്മേഽഭയം വൈ തഥൈവ । സുമധ്യാഽപി തുംഗസ്തനാ ഭാരനമ്രാ ലസദ്രക്തസൃക്കദ്വയാ സുസ്മിതാസ്യാ ॥ 2 ॥ ശവദ്വന്ദ്വകർണാവതംസാ സുകേശീ ലസത്പ്രേതപാണിം പ്രയുക്തൈകകാഞ്ചീ । ശവാകാരമഞ്ചാധിരൂഢാ ശിവാഭി- -ശ്ചതുർദിക്ഷുശബ്ദായമാനാഽഭിരേജേ ॥ 3 ॥ സ്തുതിഃ – വിരഞ്ച്യാദിദേവാസ്ത്രയസ്തേ ഗുണാസ്ത്രീൻ സമാരാധ്യ കാലീം പ്രധാനാ ബഭൂവുഃ । അനാദിം സുരാദിം മഖാദിം ഭവാദിം സ്വരൂപം ത്വദീയം ന വിന്ദന്തി ദേവാഃ ॥ 1 ॥ ജഗന്മോഹിനീയം തു വാഗ്വാദിനീയം സുഹൃത്പോഷിണീ ശത്രുസംഹാരണീയം । വചസ്തംഭനീയം കിമുച്ചാടനീയം സ്വരൂപം ത്വദീയം ന വിന്ദന്തി ദേവാഃ ॥ 2 ॥ ഇയം സ്വർഗദാത്രീ പുനഃ കല്പവല്ലീ മനോജാസ്തു കാമാൻ യഥാർഥം പ്രകുര്യാത് । തഥാ തേ കൃതാർഥാ ഭവന്തീതി നിത്യം സ്വരൂപം ത്വദീയം ന വിന്ദന്തി ദേവാഃ ॥ 3 ॥ സുരാപാനമത്താ സുഭക്താനുരക്താ ലസത്പൂതചിത്തേ സദാവിർഭവത്തേ । ജപധ്യാനപൂജാസുധാധൗതപങ്കാ സ്വരൂപം ത്വദീയം ന വിന്ദന്തി ദേവാഃ ॥ 4 ॥ ചിദാനന്ദകന്ദം ഹസന്മന്ദമന്ദം ശരച്ചന്ദ്രകോടിപ്രഭാപുഞ്ജബിംബം । മുനീനാം കവീനാം ഹൃദി ദ്യോതയന്തം സ്വരൂപം ത്വദീയം ന വിന്ദന്തി ദേവാഃ ॥ 5 ॥ മഹാമേഘകാലീ സുരക്താപി ശുഭ്രാ കദാചിദ്വിചിത്രാകൃതിര്യോഗമായാ । ന ബാലാ ന വൃദ്ധാ ന കാമാതുരാപി സ്വരൂപം ത്വദീയം ന വിന്ദന്തി ദേവാഃ ॥ 6 ॥ ക്ഷമസ്വാപരാധം മഹാഗുപ്തഭാവം മയാ ലോകമധ്യേ പ്രകാശീകൃതം യത് । തവ ധ്യാനപൂതേന ചാപല്യഭാവാത് സ്വരൂപം ത്വദീയം ന വിന്ദന്തി ദേവാഃ ॥ 7 ॥ യദി ധ്യാനയുക്തം പഠേദ്യോ മനുഷ്യ- -സ്തദാ സർവലോകേ വിശാലോ ഭവേച്ച । ഗൃഹേ ചാഷ്ടസിദ്ധിർമൃതേ ചാപി മുക്തിഃ സ്വരൂപം ത്വദീയം ന വിന്ദന്തി ദേവാഃ ॥ 8 ॥ ഇതി ശ്രീ മച്ഛങ്കരാചാര്യ വിരചിതം ശ്രീ കാലികാഷ്ടകം ॥