కర్పూరం మధ్యమాంత్య స్వరపరరహితం సేందువామాక్షియుక్తం బీజం తే మాతరేతత్త్రిపురహరవధు త్రిఃకృతం యే జపంతి । తేషాం గద్యాని పద్యాని చ ముఖకుహరాదుల్లసంత్యేవ వాచః స్వచ్ఛందం ధ్వాంతధారాధరరుచిరుచిరే సర్వసిద్ధిం గతానాం ॥ 1 ॥ ఈశానః సేందువామశ్రవణపరిగతో బీజమన్యన్మహేశి ద్వంద్వం తే మందచేతా యది జపతి జనో వారమేకం కదాచిత్ । జిత్వా వాచామధీశం ధనదమపి చిరం మోహయన్నంబుజాక్షి వృందం చంద్రార్ధచూడే ప్రభవతి స మహాఘోరబాణావతంసే ॥ 2 ॥ ఈశో వైశ్వానరస్థః శశధరవిలసద్వామనేత్రేణ యుక్తో బీజం తే ద్వంద్వమన్యద్విగలితచికురే కాలికే యే జపంతి । ద్వేష్టారం ఘ్నంతి తే చ త్రిభువనమపి తే వశ్యభావం నయంతి సృక్కద్వంద్వాస్రధారాద్వయధరవదనే దక్షిణే కాలికేతి ॥ 3 ॥ ఊర్ధ్వే వామే కృపాణం కరకమలతలే ఛిన్నముండం తథోఽధః సవ్యేఽభీతిం వరం చ త్రిజగదఘహరే దక్షిణే కాలికే చ । జప్త్వైతన్నామ యే వా తవ విమలతనుం భావయంత్యేతదంబ తేషామష్టౌ కరస్థాః ప్రకటితరదనే సిద్ధయస్త్ర్యంబకస్య ॥ 4 ॥ వర్గాద్యం వహ్నిసంస్థం విధురతివలితం తత్త్రయం కూర్చయుగ్మం లజ్జాద్వంద్వం చ పశ్చాత్ స్మితముఖితదధష్ఠద్వయమ్యోజయిత్వా । మాతర్యే త్వాం జపంతి స్మరహరమహిలే భావయంతః స్వరూపం తే లక్ష్మీలాస్యలీలాకమలదలదృశః కామరూపా భవంతి ॥ 5 ॥ ప్రత్యేకం వా ద్వయం వా త్రయమపి చ పరం బీజమత్యంతగుహ్యం త్వన్నామ్నా యోజయిత్వా సకలమపి సదా భావయంతో జపంతి । తేషాం నేత్రారవిందే విహరతి కమలా వక్త్రశుభ్రాంశుబింబే వాగ్దేవీ దేవి ముండస్రగతిశయలసత్కంఠ పీనస్తనాఢ్యే ॥ 6 ॥ గతాసూనాం బాహుప్రకరకృతకాంచీపరిలస- -న్నితంబాం దిగ్వస్త్రాం త్రిభువనవిధాత్రీం త్రినయనాం । శ్మశానస్థే తల్పే శవహృది మహాకాలసురత- -ప్రసక్తాం త్వాం ధ్యాయన్ జనని జడచేతా అపి కవిః ॥ 7 ॥ శివాభిర్ఘోరాభిః శవనివహముండాఽస్థి నికరైః పరం సంకీర్ణాయాం ప్రకటితచితాయాం హరవధూం । ప్రవిష్టాం సంతుష్టాముపరిసురతేనాతి యువతీ సదా త్వాం ధ్యాయంతి క్వచిదపి న తేషాం పరిభవః ॥ 8 ॥ వదామస్తే కిం వా జనని వయముచ్చైర్జడధియో న ధాతా నాపీశో హరిరపి న తే వేత్తి పరమం । తథాపి త్వద్భక్తిర్ముఖరయతి చాస్మాకమసితే తదేతత్ క్షంతవ్యం న ఖలు పశురోషః సముచితః ॥ 9 ॥ సమంతాదాపీనస్తనజఘనదృగ్యౌవనవతీ రతాసక్తో నక్తం యది జపతి భక్తస్తవ మనుం । వివాసాస్త్వాం ధ్యాయన్ గలితచికురస్తస్య వశగాః సమస్తాః సిద్ధౌఘా భువి చిరతరం జీవతి కవిః ॥ 10 ॥ సమాః స్వస్థీభూతాం జపతి విపరీతాం యది సదా విచింత్య త్వాం ధ్యాయన్నతిశయమహాకాలసురతాం । తదా తస్య క్షోణీతలవిహరమాణస్య విదుషః కరాంభోజే వశ్యా హరవధు మహాసిద్ధి నివహాః ॥ 11 ॥ ప్రసూతే సంసారం జనని జగతీం పాలయతి చ సమస్తం క్షిత్యాది ప్రలయసమయే సంహరతి చ । అతస్త్వాం ధాతాఽపి త్రిభువనపతిః శ్రీపతిరపి మహేశోఽపి ప్రాయః సకలమపి కిం స్తౌమి భవతీం ॥ 12 ॥ అనేకే సేవంతే భవదధికగీర్వాణనివహాన్ విమూఢాస్తే మాతః కిమపి న హి జానంతి పరమం । సమారాధ్యామాద్యాం హరిహరవిరించ్యాదివిబుధైః ప్రపన్నోఽస్మి స్వైరం రతిరసమహానందనిరతాం ॥ 13 ॥ ధరిత్రీ కీలాలం శుచిరపి సమీరోఽపి గగనం త్వమేకా కల్యాణీ గిరిశరమణీ కాలి సకలం । స్తుతిః కా తే మాతస్తవ కరుణయా మామగతికం ప్రసన్నా త్వం భూయా భవమననుభూయాన్మమ జనుః ॥ 14 ॥ శ్మశానస్థః సుస్థో గలితచికురో దిక్పటధరః సహస్రం త్వర్కాణాం నిజగలితవీర్యేణ కుసుమం । జపంస్త్వత్ ప్రత్యేకం మనుమపి తవ ధ్యాననిరతో మహాకాలి స్వైరం స భవతి ధరిత్రీ పరివృఢః ॥ 15 ॥ గృహే సమ్మార్జన్యా పరిగలిత వీర్యం హి చికురం సమూలం మధ్యాహ్నే వితరతి చితాయాం కుజదినే । సముచ్చార్య ప్రేమ్ణా మనుమపి సకృత్ కాలి సతతం గజారూఢో యాతి క్షితిపరివృఢః సత్కవివరః ॥ 16 ॥ సుపుష్పైరాకీర్ణం కుసుమధనుషోమందిరమహో పురో ధ్యాయన్ ధ్యాయన్ యది జపతి భక్తస్తవ మనుం । సగంధర్వశ్రేణీపతిరపి కవిత్వామృతనదీ నదీనః పర్యంతే పరమపదలీనః ప్రభవతి ॥ 17 ॥ త్రిపంచారే పీఠే శవశివహృది స్మేరవదనాం మహాకాలేనోచ్చైర్మదనరసలావణ్యనిరతాం । సమాసక్తో నక్తం స్వయమపి రతానందనిరతో జనో యో ధ్యాయేత్త్వాం జనని కిల సస్యాత్ స్మరహరః ॥ 18 ॥ సలోమాస్థి స్వైరం పలలమపి మార్జారమసితే పరం చౌష్ట్రం మైషం నరమహిషయోశ్ఛాగమపి వా । బలిం తే పూజాయామపి వితరతాం మర్త్యవసతాం సతాం సిద్ధిః సర్వా ప్రతిపదమపూర్వా ప్రభవతి ॥ 19 ॥ వశీ లక్షం మంత్రం ప్రజపతి హవిష్యాశనరతో దివా మాతర్యుష్మచ్చరణయుగల ధ్యాన నిపుణః । పరం నక్తం నగ్నో నిధువన వినోదేన చ మనుం జపేల్లక్షం సమ్యక్ స్మరహరసమానః క్షితితలే ॥ 20 ॥ ఇదం స్తోత్రం మాతస్తవ మనుసముద్ధారణ జనుః స్వరూపాఖ్యం పాదాంబుజయుగలపూజావిధియుతం । నిశార్ధే వా పూజాసమయమధి వా యస్తు పఠతి ప్రలాపస్తస్యాపి ప్రసరతి కవిత్వామృతరసః ॥ 21 ॥ కురంగాక్షీబృందం తమనుసరతి ప్రేమతరలం వశస్తస్య క్షోణీపతిరపి కుబేరప్రతినిధిః । రిపుః కారాగారం కలయతి చ తం కేలికలయా చిరం జీవన్ముక్తః స భవతి చ భక్తః ప్రతిజనుః ॥ 22 ॥ ఇతి శ్రీ మహాకాలవిరచితం శ్రీ కాలీ కర్పూర స్తోత్రం ।