ಕರ್ಪೂರಂ ಮಧ್ಯಮಾಂತ್ಯ ಸ್ವರಪರರಹಿತಂ ಸೇಂದುವಾಮಾಕ್ಷಿಯುಕ್ತಂ ಬೀಜಂ ತೇ ಮಾತರೇತತ್ತ್ರಿಪುರಹರವಧು ತ್ರಿಃಕೃತಂ ಯೇ ಜಪಂತಿ । ತೇಷಾಂ ಗದ್ಯಾನಿ ಪದ್ಯಾನಿ ಚ ಮುಖಕುಹರಾದುಲ್ಲಸಂತ್ಯೇವ ವಾಚಃ ಸ್ವಚ್ಛಂದಂ ಧ್ವಾಂತಧಾರಾಧರರುಚಿರುಚಿರೇ ಸರ್ವಸಿದ್ಧಿಂ ಗತಾನಾಂ ॥ 1 ॥ ಈಶಾನಃ ಸೇಂದುವಾಮಶ್ರವಣಪರಿಗತೋ ಬೀಜಮನ್ಯನ್ಮಹೇಶಿ ದ್ವಂದ್ವಂ ತೇ ಮಂದಚೇತಾ ಯದಿ ಜಪತಿ ಜನೋ ವಾರಮೇಕಂ ಕದಾಚಿತ್ । ಜಿತ್ವಾ ವಾಚಾಮಧೀಶಂ ಧನದಮಪಿ ಚಿರಂ ಮೋಹಯನ್ನಂಬುಜಾಕ್ಷಿ ವೃಂದಂ ಚಂದ್ರಾರ್ಧಚೂಡೇ ಪ್ರಭವತಿ ಸ ಮಹಾಘೋರಬಾಣಾವತಂಸೇ ॥ 2 ॥ ಈಶೋ ವೈಶ್ವಾನರಸ್ಥಃ ಶಶಧರವಿಲಸದ್ವಾಮನೇತ್ರೇಣ ಯುಕ್ತೋ ಬೀಜಂ ತೇ ದ್ವಂದ್ವಮನ್ಯದ್ವಿಗಲಿತಚಿಕುರೇ ಕಾಲಿಕೇ ಯೇ ಜಪಂತಿ । ದ್ವೇಷ್ಟಾರಂ ಘ್ನಂತಿ ತೇ ಚ ತ್ರಿಭುವನಮಪಿ ತೇ ವಶ್ಯಭಾವಂ ನಯಂತಿ ಸೃಕ್ಕದ್ವಂದ್ವಾಸ್ರಧಾರಾದ್ವಯಧರವದನೇ ದಕ್ಷಿಣೇ ಕಾಲಿಕೇತಿ ॥ 3 ॥ ಊರ್ಧ್ವೇ ವಾಮೇ ಕೃಪಾಣಂ ಕರಕಮಲತಲೇ ಛಿನ್ನಮುಂಡಂ ತಥೋಽಧಃ ಸವ್ಯೇಽಭೀತಿಂ ವರಂ ಚ ತ್ರಿಜಗದಘಹರೇ ದಕ್ಷಿಣೇ ಕಾಲಿಕೇ ಚ । ಜಪ್ತ್ವೈತನ್ನಾಮ ಯೇ ವಾ ತವ ವಿಮಲತನುಂ ಭಾವಯಂತ್ಯೇತದಂಬ ತೇಷಾಮಷ್ಟೌ ಕರಸ್ಥಾಃ ಪ್ರಕಟಿತರದನೇ ಸಿದ್ಧಯಸ್ತ್ರ್ಯಂಬಕಸ್ಯ ॥ 4 ॥ ವರ್ಗಾದ್ಯಂ ವಹ್ನಿಸಂಸ್ಥಂ ವಿಧುರತಿವಲಿತಂ ತತ್ತ್ರಯಂ ಕೂರ್ಚಯುಗ್ಮಂ ಲಜ್ಜಾದ್ವಂದ್ವಂ ಚ ಪಶ್ಚಾತ್ ಸ್ಮಿತಮುಖಿತದಧಷ್ಠದ್ವಯಮ್ಯೋಜಯಿತ್ವಾ । ಮಾತರ್ಯೇ ತ್ವಾಂ ಜಪಂತಿ ಸ್ಮರಹರಮಹಿಲೇ ಭಾವಯಂತಃ ಸ್ವರೂಪಂ ತೇ ಲಕ್ಷ್ಮೀಲಾಸ್ಯಲೀಲಾಕಮಲದಲದೃಶಃ ಕಾಮರೂಪಾ ಭವಂತಿ ॥ 5 ॥ ಪ್ರತ್ಯೇಕಂ ವಾ ದ್ವಯಂ ವಾ ತ್ರಯಮಪಿ ಚ ಪರಂ ಬೀಜಮತ್ಯಂತಗುಹ್ಯಂ ತ್ವನ್ನಾಮ್ನಾ ಯೋಜಯಿತ್ವಾ ಸಕಲಮಪಿ ಸದಾ ಭಾವಯಂತೋ ಜಪಂತಿ । ತೇಷಾಂ ನೇತ್ರಾರವಿಂದೇ ವಿಹರತಿ ಕಮಲಾ ವಕ್ತ್ರಶುಭ್ರಾಂಶುಬಿಂಬೇ ವಾಗ್ದೇವೀ ದೇವಿ ಮುಂಡಸ್ರಗತಿಶಯಲಸತ್ಕಂಠ ಪೀನಸ್ತನಾಢ್ಯೇ ॥ 6 ॥ ಗತಾಸೂನಾಂ ಬಾಹುಪ್ರಕರಕೃತಕಾಂಚೀಪರಿಲಸ- -ನ್ನಿತಂಬಾಂ ದಿಗ್ವಸ್ತ್ರಾಂ ತ್ರಿಭುವನವಿಧಾತ್ರೀಂ ತ್ರಿನಯನಾಂ । ಶ್ಮಶಾನಸ್ಥೇ ತಲ್ಪೇ ಶವಹೃದಿ ಮಹಾಕಾಲಸುರತ- -ಪ್ರಸಕ್ತಾಂ ತ್ವಾಂ ಧ್ಯಾಯನ್ ಜನನಿ ಜಡಚೇತಾ ಅಪಿ ಕವಿಃ ॥ 7 ॥ ಶಿವಾಭಿರ್ಘೋರಾಭಿಃ ಶವನಿವಹಮುಂಡಾಽಸ್ಥಿ ನಿಕರೈಃ ಪರಂ ಸಂಕೀರ್ಣಾಯಾಂ ಪ್ರಕಟಿತಚಿತಾಯಾಂ ಹರವಧೂಂ । ಪ್ರವಿಷ್ಟಾಂ ಸಂತುಷ್ಟಾಮುಪರಿಸುರತೇನಾತಿ ಯುವತೀ ಸದಾ ತ್ವಾಂ ಧ್ಯಾಯಂತಿ ಕ್ವಚಿದಪಿ ನ ತೇಷಾಂ ಪರಿಭವಃ ॥ 8 ॥ ವದಾಮಸ್ತೇ ಕಿಂ ವಾ ಜನನಿ ವಯಮುಚ್ಚೈರ್ಜಡಧಿಯೋ ನ ಧಾತಾ ನಾಪೀಶೋ ಹರಿರಪಿ ನ ತೇ ವೇತ್ತಿ ಪರಮಂ । ತಥಾಪಿ ತ್ವದ್ಭಕ್ತಿರ್ಮುಖರಯತಿ ಚಾಸ್ಮಾಕಮಸಿತೇ ತದೇತತ್ ಕ್ಷಂತವ್ಯಂ ನ ಖಲು ಪಶುರೋಷಃ ಸಮುಚಿತಃ ॥ 9 ॥ ಸಮಂತಾದಾಪೀನಸ್ತನಜಘನದೃಗ್ಯೌವನವತೀ ರತಾಸಕ್ತೋ ನಕ್ತಂ ಯದಿ ಜಪತಿ ಭಕ್ತಸ್ತವ ಮನುಂ । ವಿವಾಸಾಸ್ತ್ವಾಂ ಧ್ಯಾಯನ್ ಗಲಿತಚಿಕುರಸ್ತಸ್ಯ ವಶಗಾಃ ಸಮಸ್ತಾಃ ಸಿದ್ಧೌಘಾ ಭುವಿ ಚಿರತರಂ ಜೀವತಿ ಕವಿಃ ॥ 10 ॥ ಸಮಾಃ ಸ್ವಸ್ಥೀಭೂತಾಂ ಜಪತಿ ವಿಪರೀತಾಂ ಯದಿ ಸದಾ ವಿಚಿಂತ್ಯ ತ್ವಾಂ ಧ್ಯಾಯನ್ನತಿಶಯಮಹಾಕಾಲಸುರತಾಂ । ತದಾ ತಸ್ಯ ಕ್ಷೋಣೀತಲವಿಹರಮಾಣಸ್ಯ ವಿದುಷಃ ಕರಾಂಭೋಜೇ ವಶ್ಯಾ ಹರವಧು ಮಹಾಸಿದ್ಧಿ ನಿವಹಾಃ ॥ 11 ॥ ಪ್ರಸೂತೇ ಸಂಸಾರಂ ಜನನಿ ಜಗತೀಂ ಪಾಲಯತಿ ಚ ಸಮಸ್ತಂ ಕ್ಷಿತ್ಯಾದಿ ಪ್ರಲಯಸಮಯೇ ಸಂಹರತಿ ಚ । ಅತಸ್ತ್ವಾಂ ಧಾತಾಽಪಿ ತ್ರಿಭುವನಪತಿಃ ಶ್ರೀಪತಿರಪಿ ಮಹೇಶೋಽಪಿ ಪ್ರಾಯಃ ಸಕಲಮಪಿ ಕಿಂ ಸ್ತೌಮಿ ಭವತೀಂ ॥ 12 ॥ ಅನೇಕೇ ಸೇವಂತೇ ಭವದಧಿಕಗೀರ್ವಾಣನಿವಹಾನ್ ವಿಮೂಢಾಸ್ತೇ ಮಾತಃ ಕಿಮಪಿ ನ ಹಿ ಜಾನಂತಿ ಪರಮಂ । ಸಮಾರಾಧ್ಯಾಮಾದ್ಯಾಂ ಹರಿಹರವಿರಿಂಚ್ಯಾದಿವಿಬುಧೈಃ ಪ್ರಪನ್ನೋಽಸ್ಮಿ ಸ್ವೈರಂ ರತಿರಸಮಹಾನಂದನಿರತಾಂ ॥ 13 ॥ ಧರಿತ್ರೀ ಕೀಲಾಲಂ ಶುಚಿರಪಿ ಸಮೀರೋಽಪಿ ಗಗನಂ ತ್ವಮೇಕಾ ಕಲ್ಯಾಣೀ ಗಿರಿಶರಮಣೀ ಕಾಲಿ ಸಕಲಂ । ಸ್ತುತಿಃ ಕಾ ತೇ ಮಾತಸ್ತವ ಕರುಣಯಾ ಮಾಮಗತಿಕಂ ಪ್ರಸನ್ನಾ ತ್ವಂ ಭೂಯಾ ಭವಮನನುಭೂಯಾನ್ಮಮ ಜನುಃ ॥ 14 ॥ ಶ್ಮಶಾನಸ್ಥಃ ಸುಸ್ಥೋ ಗಲಿತಚಿಕುರೋ ದಿಕ್ಪಟಧರಃ ಸಹಸ್ರಂ ತ್ವರ್ಕಾಣಾಂ ನಿಜಗಲಿತವೀರ್ಯೇಣ ಕುಸುಮಂ । ಜಪಂಸ್ತ್ವತ್ ಪ್ರತ್ಯೇಕಂ ಮನುಮಪಿ ತವ ಧ್ಯಾನನಿರತೋ ಮಹಾಕಾಲಿ ಸ್ವೈರಂ ಸ ಭವತಿ ಧರಿತ್ರೀ ಪರಿವೃಢಃ ॥ 15 ॥ ಗೃಹೇ ಸಮ್ಮಾರ್ಜನ್ಯಾ ಪರಿಗಲಿತ ವೀರ್ಯಂ ಹಿ ಚಿಕುರಂ ಸಮೂಲಂ ಮಧ್ಯಾಹ್ನೇ ವಿತರತಿ ಚಿತಾಯಾಂ ಕುಜದಿನೇ । ಸಮುಚ್ಚಾರ್ಯ ಪ್ರೇಮ್ಣಾ ಮನುಮಪಿ ಸಕೃತ್ ಕಾಲಿ ಸತತಂ ಗಜಾರೂಢೋ ಯಾತಿ ಕ್ಷಿತಿಪರಿವೃಢಃ ಸತ್ಕವಿವರಃ ॥ 16 ॥ ಸುಪುಷ್ಪೈರಾಕೀರ್ಣಂ ಕುಸುಮಧನುಷೋಮಂದಿರಮಹೋ ಪುರೋ ಧ್ಯಾಯನ್ ಧ್ಯಾಯನ್ ಯದಿ ಜಪತಿ ಭಕ್ತಸ್ತವ ಮನುಂ । ಸಗಂಧರ್ವಶ್ರೇಣೀಪತಿರಪಿ ಕವಿತ್ವಾಮೃತನದೀ ನದೀನಃ ಪರ್ಯಂತೇ ಪರಮಪದಲೀನಃ ಪ್ರಭವತಿ ॥ 17 ॥ ತ್ರಿಪಂಚಾರೇ ಪೀಠೇ ಶವಶಿವಹೃದಿ ಸ್ಮೇರವದನಾಂ ಮಹಾಕಾಲೇನೋಚ್ಚೈರ್ಮದನರಸಲಾವಣ್ಯನಿರತಾಂ । ಸಮಾಸಕ್ತೋ ನಕ್ತಂ ಸ್ವಯಮಪಿ ರತಾನಂದನಿರತೋ ಜನೋ ಯೋ ಧ್ಯಾಯೇತ್ತ್ವಾಂ ಜನನಿ ಕಿಲ ಸಸ್ಯಾತ್ ಸ್ಮರಹರಃ ॥ 18 ॥ ಸಲೋಮಾಸ್ಥಿ ಸ್ವೈರಂ ಪಲಲಮಪಿ ಮಾರ್ಜಾರಮಸಿತೇ ಪರಂ ಚೌಷ್ಟ್ರಂ ಮೈಷಂ ನರಮಹಿಷಯೋಶ್ಛಾಗಮಪಿ ವಾ । ಬಲಿಂ ತೇ ಪೂಜಾಯಾಮಪಿ ವಿತರತಾಂ ಮರ್ತ್ಯವಸತಾಂ ಸತಾಂ ಸಿದ್ಧಿಃ ಸರ್ವಾ ಪ್ರತಿಪದಮಪೂರ್ವಾ ಪ್ರಭವತಿ ॥ 19 ॥ ವಶೀ ಲಕ್ಷಂ ಮಂತ್ರಂ ಪ್ರಜಪತಿ ಹವಿಷ್ಯಾಶನರತೋ ದಿವಾ ಮಾತರ್ಯುಷ್ಮಚ್ಚರಣಯುಗಲ ಧ್ಯಾನ ನಿಪುಣಃ । ಪರಂ ನಕ್ತಂ ನಗ್ನೋ ನಿಧುವನ ವಿನೋದೇನ ಚ ಮನುಂ ಜಪೇಲ್ಲಕ್ಷಂ ಸಮ್ಯಕ್ ಸ್ಮರಹರಸಮಾನಃ ಕ್ಷಿತಿತಲೇ ॥ 20 ॥ ಇದಂ ಸ್ತೋತ್ರಂ ಮಾತಸ್ತವ ಮನುಸಮುದ್ಧಾರಣ ಜನುಃ ಸ್ವರೂಪಾಖ್ಯಂ ಪಾದಾಂಬುಜಯುಗಲಪೂಜಾವಿಧಿಯುತಂ । ನಿಶಾರ್ಧೇ ವಾ ಪೂಜಾಸಮಯಮಧಿ ವಾ ಯಸ್ತು ಪಠತಿ ಪ್ರಲಾಪಸ್ತಸ್ಯಾಪಿ ಪ್ರಸರತಿ ಕವಿತ್ವಾಮೃತರಸಃ ॥ 21 ॥ ಕುರಂಗಾಕ್ಷೀಬೃಂದಂ ತಮನುಸರತಿ ಪ್ರೇಮತರಲಂ ವಶಸ್ತಸ್ಯ ಕ್ಷೋಣೀಪತಿರಪಿ ಕುಬೇರಪ್ರತಿನಿಧಿಃ । ರಿಪುಃ ಕಾರಾಗಾರಂ ಕಲಯತಿ ಚ ತಂ ಕೇಲಿಕಲಯಾ ಚಿರಂ ಜೀವನ್ಮುಕ್ತಃ ಸ ಭವತಿ ಚ ಭಕ್ತಃ ಪ್ರತಿಜನುಃ ॥ 22 ॥ ಇತಿ ಶ್ರೀ ಮಹಾಕಾಲವಿರಚಿತಂ ಶ್ರೀ ಕಾಲೀ ಕರ್ಪೂರ ಸ್ತೋತ್ರಂ ।