ಬ್ರಹ್ಮವಿಷ್ಣು ಊಚತುಃ । ನಮಾಮಿ ತ್ವಾಂ ವಿಶ್ವಕರ್ತ್ರೀಂ ಪರೇಶೀಂ ನಿತ್ಯಾಮಾದ್ಯಾಂ ಸತ್ಯವಿಜ್ಞಾನರೂಪಾಂ । ವಾಚಾತೀತಾಂ ನಿರ್ಗುಣಾಂ ಚಾತಿಸೂಕ್ಷ್ಮಾಂ ಜ್ಞಾನಾತೀತಾಂ ಶುದ್ಧವಿಜ್ಞಾನಗಮ್ಯಾಂ ॥ 1 ॥ ಪೂರ್ಣಾಂ ಶುದ್ಧಾಂ ವಿಶ್ವರೂಪಾಂ ಸುರೂಪಾಂ ದೇವೀಂ ವಂದ್ಯಾಂ ವಿಶ್ವವಂದ್ಯಾಮಪಿ ತ್ವಾಂ । ಸರ್ವಾಂತಃಸ್ಥಾಮುತ್ತಮಸ್ಥಾನಸಂಸ್ಥಾ- -ಮೀಡೇ ಕಾಲೀಂ ವಿಶ್ವಸಂಪಾಲಯಿತ್ರೀಂ ॥ 2 ॥ ಮಾಯಾತೀತಾಂ ಮಾಯಿನೀಂ ವಾಪಿ ಮಾಯಾಂ ಭೀಮಾಂ ಶ್ಯಾಮಾಂ ಭೀಮನೇತ್ರಾಂ ಸುರೇಶೀಂ । ವಿದ್ಯಾಂ ಸಿದ್ಧಾಂ ಸರ್ವಭೂತಾಶಯಸ್ಥಾ- -ಮೀಡೇ ಕಾಲೀಂ ವಿಶ್ವಸಂಹಾರಕರ್ತ್ರೀಂ ॥ 3 ॥ ನೋ ತೇ ರೂಪಂ ವೇತ್ತಿ ಶೀಲಂ ನ ಧಾಮ ನೋ ವಾ ಧ್ಯಾನಂ ನಾಪಿ ಮಂತ್ರಂ ಮಹೇಶಿ । ಸತ್ತಾರೂಪೇ ತ್ವಾಂ ಪ್ರಪದ್ಯೇ ಶರಣ್ಯೇ ವಿಶ್ವಾರಾಧ್ಯೇ ಸರ್ವಲೋಕೈಕಹೇತುಂ ॥ 4 ॥ ದ್ಯೌಸ್ತೇ ಶೀರ್ಷಂ ನಾಭಿದೇಶೋ ನಭಶ್ಚ ಚಕ್ಷೂಂಷಿ ತೇ ಚಂದ್ರಸೂರ್ಯಾನಲಾಸ್ತೇ । ಉನ್ಮೇಷಾಸ್ತೇ ಸುಪ್ರಬೋಧೋ ದಿವಾ ಚ ರಾತ್ರಿರ್ಮಾತಶ್ಚಕ್ಷುಷೋಸ್ತೇ ನಿಮೇಷಂ ॥ 5 ॥ ವಾಕ್ಯಂ ದೇವಾ ಭೂಮಿರೇಷಾ ನಿತಂಬಂ ಪಾದೌ ಗುಲ್ಫಂ ಜಾನುಜಂಘಸ್ತ್ವಧಸ್ತೇ । ಪ್ರೀತಿರ್ಧರ್ಮೋಽಧರ್ಮಕಾರ್ಯಂ ಹಿ ಕೋಪಃ ಸೃಷ್ಟಿರ್ಬೋಧಃ ಸಂಹೃತಿಸ್ತೇ ತು ನಿದ್ರಾ ॥ 6 ॥ ಅಗ್ನಿರ್ಜಿಹ್ವಾ ಬ್ರಾಹ್ಮಣಾಸ್ತೇ ಮುಖಾಬ್ಜಂ ಸಂಧ್ಯೇ ದ್ವೇ ತೇ ಭ್ರೂಯುಗಂ ವಿಶ್ವಮೂರ್ತಿಃ । ಶ್ವಾಸೋ ವಾಯುರ್ಬಾಹವೋ ಲೋಕಪಾಲಾಃ ಕ್ರೀಡಾ ಸೃಷ್ಟಿಃ ಸಂಸ್ಥಿತಿಃ ಸಂಹೃತಿಸ್ತೇ ॥ 7 ॥ ಏವಂಭೂತಾಂ ದೇವಿ ವಿಶ್ವಾತ್ಮಿಕಾಂ ತ್ವಾಂ ಕಾಲೀಂ ವಂದೇ ಬ್ರಹ್ಮವಿದ್ಯಾಸ್ವರೂಪಾಂ । ಮಾತಃ ಪೂರ್ಣೇ ಬ್ರಹ್ಮವಿಜ್ಞಾನಗಮ್ಯೇ ದುರ್ಗೇಽಪಾರೇ ಸಾರರೂಪೇ ಪ್ರಸೀದ ॥ 8 ॥ ಇತಿ ಶ್ರೀ ಮಹಾಭಾಗವತೇ ಮಹಾಪುರಾಣೇ ಬ್ರಹ್ಮವಿಷ್ಣುಕೃತಾ ಶ್ರೀ ಭದ್ರಕಾಲೀ ಸ್ತುತಿಃ ।