ബ്രഹ്മോവാച ശൃണു വത്സ പ്രവക്ഷ്യാമി ആദ്യാസ്തോത്രം മഹാഫലം । യഃ പഠേത് സതതം ഭക്ത്യാ സ ഏവ വിഷ്ണുവല്ലഭഃ ॥ 1 ॥ മൃത്യുർവ്യാധിഭയം തസ്യ നാസ്തി കിഞ്ചിത് കലൗ യുഗേ । അപുത്രാ ലഭതേ പുത്രം ത്രിപക്ഷം ശ്രവണം യദി ॥ 2 ॥ ദ്വൗ മാസൗ ബന്ധനാന്മുക്തി വിപ്രവക്ത്രാത് ശ്രുതം യദി । മൃതവത്സാ ജീവവത്സാ ഷണ്മാസം ശ്രവണം യദി ॥ 3 ॥ നൗകായാം സങ്കടേ യുദ്ധേ പഠനാജ്ജയമാപ്നുയാത് । ലിഖിത്വാ സ്ഥാപയേദ്ഗേഹേ നാഗ്നിചൗരഭയം ക്വചിത് ॥ 4 ॥ രാജസ്ഥാനേ ജയീ നിത്യം പ്രസന്നാഃ സർവദേവതാ । ഓം ഹ്രീം । ബ്രഹ്മാണീ ബ്രഹ്മലോകേ ച വൈകുണ്ഠേ സർവമംഗലാ ॥ 5 ॥ ഇന്ദ്രാണീ അമരാവത്യാമംബികാ വരുണാലയേ । യമാലയേ കാലരൂപാ കുബേരഭവനേ ശുഭാ ॥ 6 ॥ മഹാനന്ദാഗ്നികോണേ ച വായവ്യാം മൃഗവാഹിനീ । നൈരൃത്യാം രക്തദന്താ ച ഐശാന്യാം ശൂലധാരിണീ ॥ 7 ॥ പാതാലേ വൈഷ്ണവീരൂപാ സിംഹലേ ദേവമോഹിനീ । സുരസാ ച മണിദ്വിപേ ലങ്കായാം ഭദ്രകാലികാ ॥ 8 ॥ രാമേശ്വരീ സേതുബന്ധേ വിമലാ പുരുഷോത്തമേ । വിരജാ ഔഡ്രദേശേ ച കാമാക്ഷ്യാ നീലപർവതേ ॥ 9 ॥ കാലികാ വംഗദേശേ ച അയോധ്യായാം മഹേശ്വരീ । വാരാണസ്യാമന്നപൂർണാ ഗയാക്ഷേത്രേ ഗയേശ്വരീ ॥ 10 ॥ കുരുക്ഷേത്രേ ഭദ്രകാലീ വ്രജേ കാത്യായനീ പരാ । ദ്വാരകായാം മഹാമായാ മഥുരായാം മഹേശ്വരീ ॥ 11 ॥ ക്ഷുധാ ത്വം സർവഭൂതാനാം വേലാ ത്വം സാഗരസ്യ ച । നവമീ ശുക്ലപക്ഷസ്യ കൃഷ്ണസ്യൈകാദശീ പരാ ॥ 12 ॥ ദക്ഷസാ ദുഹിതാ ദേവീ ദക്ഷയജ്ഞവിനാശിനീ । രാമസ്യ ജാനകീ ത്വം ഹി രാവണധ്വംസകാരിണീ ॥ 13 ॥ ചണ്ഡമുണ്ഡവധേ ദേവീ രക്തബീജവിനാശിനീ । നിശുംഭശുംഭമഥിനീ മധുകൈടഭഘാതിനീ ॥ 14 ॥ വിഷ്ണുഭക്തിപ്രദാ ദുർഗാ സുഖദാ മോക്ഷദാ സദാ । ആദ്യാസ്തവമിമം പുണ്യം യഃ പഠേത് സതതം നരഃ ॥ 15 ॥ സർവജ്വരഭയം ന സ്യാത് സർവവ്യാധിവിനാശനം । കോടിതീർഥഫലം തസ്യ ലഭതേ നാത്ര സംശയഃ ॥ 16 ॥ ജയാ മേ ചാഗ്രതഃ പാതു വിജയാ പാതു പൃഷ്ഠതഃ । നാരായണീ ശീർഷദേശേ സർവാംഗേ സിംഹവാഹിനീ ॥ 17 ॥ ശിവദൂതീ ഉഗ്രചണ്ഡാ പ്രത്യംഗേ പരമേശ്വരീ । വിശാലാക്ഷീ മഹാമായാ കൗമാരീ ശംഖിനീ ശിവാ ॥ 18 ॥ ചക്രിണീ ജയദാത്രീ ച രണമത്താ രണപ്രിയാ । ദുർഗാ ജയന്തീ കാലീ ച ഭദ്രകാലീ മഹോദരീ ॥ 19 ॥ നാരസിംഹീ ച വാരാഹീ സിദ്ധിദാത്രീ സുഖപ്രദാ । ഭയങ്കരീ മഹാരൗദ്രീ മഹാഭയവിനാശിനീ ॥ 20 ॥ ഇതി ശ്രീ ബ്രഹ്മയാമലേ ബ്രഹ്മനാരദസംവാദേ ശ്രീ ആദ്യാ സ്തോത്രം ॥