అస్య శ్రీ పంచముఖహనుమన్మంత్రస్య బ్రహ్మా ఋషిః గాయత్రీఛందః పంచముఖవిరాట్ హనుమాన్ దేవతా హ్రీం బీజం శ్రీం శక్తిః క్రౌం కీలకం క్రూం కవచం క్రైం అస్త్రాయ ఫట్ ఇతి దిగ్బంధః । శ్రీ గరుడ ఉవాచ । అథ ధ్యానం ప్రవక్ష్యామి శృణు సర్వాంగసుందరి । యత్కృతం దేవదేవేన ధ్యానం హనుమతః ప్రియం ॥ 1 ॥ పంచవక్త్రం మహాభీమం త్రిపంచనయనైర్యుతం । బాహుభిర్దశభిర్యుక్తం సర్వకామార్థసిద్ధిదం ॥ 2 ॥ పూర్వం తు వానరం వక్త్రం కోటిసూర్యసమప్రభం । దంష్ట్రాకరాలవదనం భృకుటీకుటిలేక్షణం ॥ 3 ॥ అస్యైవ దక్షిణం వక్త్రం నారసింహం మహాద్భుతం । అత్యుగ్రతేజోవపుషం భీషణం భయనాశనం ॥ 4 ॥ పశ్చిమం గారుడం వక్త్రం వక్రతుండం మహాబలం । సర్వనాగప్రశమనం విషభూతాదికృంతనం ॥ 5 ॥ ఉత్తరం సౌకరం వక్త్రం కృష్ణం దీప్తం నభోపమం । పాతాలసింహవేతాలజ్వరరోగాదికృంతనం ॥ 6 ॥ ఊర్ధ్వం హయాననం ఘోరం దానవాంతకరం పరం । యేన వక్త్రేణ విప్రేంద్ర తారకాఖ్యం మహాసురం ॥ 7 ॥ జఘాన శరణం తత్స్యాత్సర్వశత్రుహరం పరం । ధ్యాత్వా పంచముఖం రుద్రం హనూమంతం దయానిధిం ॥ 8 ॥ ఖడ్గం త్రిశూలం ఖట్వాంగం పాశమంకుశపర్వతం । ముష్టిం కౌమోదకీం వృక్షం ధారయంతం కమండలుం ॥ 9 ॥ భిందిపాలం జ్ఞానముద్రాం దశభిర్మునిపుంగవం । ఏతాన్యాయుధజాలాని ధారయంతం భజామ్యహం ॥ 10 ॥ ప్రేతాసనోపవిష్టం తం సర్వాభరణభూషితం । దివ్యమాల్యాంబరధరం దివ్యగంధానులేపనం । సర్వాశ్చర్యమయం దేవం హనుమద్విశ్వతోముఖం ॥ 11 ॥ పంచాస్యమచ్యుతమనేకవిచిత్రవర్ణ- -వక్త్రం శశాంకశిఖరం కపిరాజవర్యం । పీతాంబరాదిముకుటైరుపశోభితాంగం పింగాక్షమాద్యమనిశం మనసా స్మరామి ॥ 12 ॥ మర్కటేశం మహోత్సాహం సర్వశత్రుహరం పరం । శత్రుం సంహర మాం రక్ష శ్రీమన్నాపదముద్ధర ॥ 13 ॥ హరిమర్కట మర్కట మంత్రమిదం పరిలిఖ్యతి లిఖ్యతి వామతలే । యది నశ్యతి నశ్యతి శత్రుకులం యది ముంచతి ముంచతి వామలతా ॥ 14 ॥ ఓం హరిమర్కటాయ స్వాహా । ఓం నమో భగవతే పంచవదనాయ పూర్వకపిముఖాయ సకలశత్రుసంహారకాయ స్వాహా । ఓం నమో భగవతే పంచవదనాయ దక్షిణముఖాయ కరాలవదనాయ నరసింహాయ సకలభూతప్రమథనాయ స్వాహా । ఓం నమో భగవతే పంచవదనాయ పశ్చిమముఖాయ గరుడాననాయ సకలవిషహరాయ స్వాహా । ఓం నమో భగవతే పంచవదనాయ ఉత్తరముఖాయ ఆదివరాహాయ సకలసంపత్కరాయ స్వాహా । ఓం నమో భగవతే పంచవదనాయ ఊర్ధ్వముఖాయ హయగ్రీవాయ సకలజనవశంకరాయ స్వాహా । ఓం అస్య శ్రీ పంచముఖహనుమన్మంత్రస్య శ్రీరామచంద్ర ఋషిః అనుష్టుప్ఛందః పంచముఖవీరహనుమాన్ దేవతా హనుమాన్ ఇతి బీజం వాయుపుత్ర ఇతి శక్తిః అంజనీసుత ఇతి కీలకం శ్రీరామదూతహనుమత్ప్రసాదసిద్ధ్యర్థే జపే వినియోగః । ఇతి ఋష్యాదికం విన్యసేత్ । అథ కరన్యాసః । ఓం అంజనీసుతాయ అంగుష్ఠాభ్యాం నమః । ఓం రుద్రమూర్తయే తర్జనీభ్యాం నమః । ఓం వాయుపుత్రాయ మధ్యమాభ్యాం నమః । ఓం అగ్నిగర్భాయ అనామికాభ్యాం నమః । ఓం రామదూతాయ కనిష్ఠికాభ్యాం నమః । ఓం పంచముఖహనుమతే కరతలకరపృష్ఠాభ్యాం నమః । అథ అంగన్యాసః । ఓం అంజనీసుతాయ హృదయాయ నమః । ఓం రుద్రమూర్తయే శిరసే స్వాహా । ఓం వాయుపుత్రాయ శిఖాయై వషట్ । ఓం అగ్నిగర్భాయ కవచాయ హుం । ఓం రామదూతాయ నేత్రత్రయాయ వౌషట్ । ఓం పంచముఖహనుమతే అస్త్రాయ ఫట్ । పంచముఖహనుమతే స్వాహా ఇతి దిగ్బంధః । అథ ధ్యానం । వందే వానరనారసింహఖగరాట్క్రోడాశ్వవక్త్రాన్వితం దివ్యాలంకరణం త్రిపంచనయనం దేదీప్యమానం రుచా । హస్తాబ్జైరసిఖేటపుస్తకసుధాకుంభాంకుశాద్రిం హలం ఖట్వాంగం ఫణిభూరుహం దశభుజం సర్వారివీరాపహం । అథ మంత్రః । ఓం శ్రీరామదూతాయ ఆంజనేయాయ వాయుపుత్రాయ మహాబలపరాక్రమాయ సీతాదుఃఖనివారణాయ లంకాదహనకారణాయ మహాబలప్రచండాయ ఫాల్గునసఖాయ కోలాహలసకలబ్రహ్మాండవిశ్వరూపాయ సప్తసముద్రనిర్లంఘనాయ పింగలనయనాయ అమితవిక్రమాయ సూర్యబింబఫలసేవనాయ దుష్టనివారణాయ దృష్టినిరాలంకృతాయ సంజీవినీసంజీవితాంగద-లక్ష్మణమహాకపిసైన్యప్రాణదాయ దశకంఠవిధ్వంసనాయ రామేష్టాయ మహాఫాల్గునసఖాయ సీతాసహితరామవరప్రదాయ షట్ప్రయోగాగమపంచముఖవీరహనుమన్మంత్రజపే వినియోగః । ఓం హరిమర్కటమర్కటాయ బంబంబంబంబం వౌషట్ స్వాహా । ఓం హరిమర్కటమర్కటాయ ఫంఫంఫంఫంఫం ఫట్ స్వాహా । ఓం హరిమర్కటమర్కటాయ ఖేంఖేంఖేంఖేంఖేం మారణాయ స్వాహా । ఓం హరిమర్కటమర్కటాయ లుంలుంలుంలుంలుం ఆకర్షితసకలసంపత్కరాయ స్వాహా । ఓం హరిమర్కటమర్కటాయ ధంధంధంధంధం శత్రుస్తంభనాయ స్వాహా । ఓం టంటంటంటంటం కూర్మమూర్తయే పంచముఖవీరహనుమతే పరయంత్ర పరతంత్రోచ్చాటనాయ స్వాహా । ఓం కంఖంగంఘంఙం చంఛంజంఝంఞం టంఠండంఢంణం తంథందంధన్నం పంఫంబంభమ్మం యంరంలంవం శంషంసంహం లంక్షం స్వాహా । ఇతి దిగ్బంధః । ఓం పూర్వకపిముఖాయ పంచముఖహనుమతే టంటంటంటంటం సకలశత్రుసంహరణాయ స్వాహా । ఓం దక్షిణముఖాయ పంచముఖహనుమతే కరాలవదనాయ నరసింహాయ ఓం హ్రాం హ్రీం హ్రూం హ్రైం హ్రౌం హ్రః సకలభూతప్రేతదమనాయ స్వాహా । ఓం పశ్చిమముఖాయ గరుడాననాయ పంచముఖహనుమతే మమ్మమ్మమ్మమ్మం సకలవిషహరాయ స్వాహా । ఓం ఉత్తరముఖాయ ఆదివరాహాయ లంలంలంలంలం నృసింహాయ నీలకంఠమూర్తయే పంచముఖహనుమతే స్వాహా । ఓం ఊర్ధ్వముఖాయ హయగ్రీవాయ రుంరుంరుంరుంరుం రుద్రమూర్తయే సకలప్రయోజననిర్వాహకాయ స్వాహా । ఓం అంజనీసుతాయ వాయుపుత్రాయ మహాబలాయ సీతాశోకనివారణాయ శ్రీరామచంద్రకృపాపాదుకాయ మహావీర్యప్రమథనాయ బ్రహ్మాండనాథాయ కామదాయ పంచముఖవీరహనుమతే స్వాహా । భూతప్రేతపిశాచబ్రహ్మరాక్షస శాకినీడాకిన్యంతరిక్షగ్రహ పరయంత్ర పరతంత్రోచ్చటనాయ స్వాహా । సకలప్రయోజననిర్వాహకాయ పంచముఖవీరహనుమతే శ్రీరామచంద్రవరప్రసాదాయ జంజంజంజంజం స్వాహా । ఇదం కవచం పఠిత్వా తు మహాకవచం పఠేన్నరః । ఏకవారం జపేత్ స్తోత్రం సర్వశత్రునివారణం ॥ 15 ॥ ద్వివారం తు పఠేన్నిత్యం పుత్రపౌత్రప్రవర్ధనం । త్రివారం చ పఠేన్నిత్యం సర్వసంపత్కరం శుభం ॥ 16 ॥ చతుర్వారం పఠేన్నిత్యం సర్వరోగనివారణం । పంచవారం పఠేన్నిత్యం సర్వలోకవశంకరం ॥ 17 ॥ షడ్వారం చ పఠేన్నిత్యం సర్వదేవవశంకరం । సప్తవారం పఠేన్నిత్యం సర్వసౌభాగ్యదాయకం ॥ 18 ॥ అష్టవారం పఠేన్నిత్యమిష్టకామార్థసిద్ధిదం । నవవారం పఠేన్నిత్యం రాజభోగమవాప్నుయాత్ ॥ 19 ॥ దశవారం పఠేన్నిత్యం త్రైలోక్యజ్ఞానదర్శనం । రుద్రావృత్తిం పఠేన్నిత్యం సర్వసిద్ధిర్భవేద్ధృవం ॥ 20 ॥ నిర్బలో రోగయుక్తశ్చ మహావ్యాధ్యాదిపీడితః । కవచస్మరణేనైవ మహాబలమవాప్నుయాత్ ॥ 21 ॥ ఇతి సుదర్శనసంహితాయాం శ్రీరామచంద్రసీతాప్రోక్తం శ్రీ పంచముఖహనుమత్కవచం ।