ಬ್ರಹ್ಮವಿಷ್ಣುಮಹೇಶಾ ಊಚುಃ – ಅಜಂ ನಿರ್ವಿಕಲ್ಪಂ ನಿರಾಕಾರಮೇಕಂ ನಿರಾನಂದಮದ್ವೈತಮಾನಂದಪೂರ್ಣಂ । ಪರಂ ನಿರ್ಗುಣಂ ನಿರ್ವಿಶೇಷಂ ನಿರೀಹಂ ಪರಬ್ರಹ್ಮರೂಪಂ ಗಣೇಶಂ ಭಜೇಮ ॥ 1 ॥ ಗುಣಾತೀತಮಾದ್ಯಂ ಚಿದಾನಂದರೂಪಂ ಚಿದಾಭಾಸಕಂ ಸರ್ವಗಂ ಜ್ಞಾನಗಮ್ಯಂ । ಮುನಿಧ್ಯೇಯಮಾಕಾಶರೂಪಂ ಪರೇಶಂ ಪರಬ್ರಹ್ಮರೂಪಂ ಗಣೇಶಂ ಭಜೇಮ ॥ 2 ॥ ಜಗತ್ಕಾರಣಂ ಕಾರಣಜ್ಞಾನರೂಪಂ ಸುರಾದಿಂ ಸುಖಾದಿಂ ಯುಗಾದಿಂ ಗಣೇಶಂ । ಜಗದ್ವ್ಯಾಪಿನಂ ವಿಶ್ವವಂದ್ಯಂ ಸುರೇಶಂ ಪರಬ್ರಹ್ಮರೂಪಂ ಗಣೇಶಂ ಭಜೇಮ ॥ 3 ॥ ರಜೋಯೋಗತೋ ಬ್ರಹ್ಮರೂಪಂ ಶ್ರುತಿಜ್ಞಂ ಸದಾ ಕಾರ್ಯಸಕ್ತಂ ಹೃದಾಚಿಂತ್ಯರೂಪಂ । ಜಗತ್ಕಾರಕಂ ಸರ್ವವಿದ್ಯಾನಿಧಾನಂ ಪರಬ್ರಹ್ಮರೂಪಂ ಗಣೇಶಂ ನತಾಸ್ಮಃ ॥ 4 ॥ ಸದಾ ಸತ್ತ್ವಯೋಗಂ ಮುದಾ ಕ್ರೀಡಮಾನಂ ಸುರಾರೀನ್ಹರಂತಂ ಜಗತ್ಪಾಲಯಂತಂ । ಅನೇಕಾವತಾರಂ ನಿಜಜ್ಞಾನಹಾರಂ ಸದಾ ವಿಷ್ಣುರೂಪಂ ಗಣೇಶಂ ನಮಾಮಃ ॥ 5 ॥ ತಮೋಯೋಗಿನಂ ರುದ್ರರೂಪಂ ತ್ರಿನೇತ್ರಂ ಜಗದ್ಧಾರಕಂ ತಾರಕಂ ಜ್ಞಾನಹೇತುಂ । ಅನೇಕಾಗಮೈಃ ಸ್ವಂ ಜನಂ ಬೋಧಯಂತಂ ಸದಾ ಶರ್ವರೂಪಂ ಗಣೇಶಂ ನಮಾಮಃ ॥ 6 ॥ ತಮಸ್ತೋಮಹಾರಂ ಜನಾಜ್ಞಾನಹಾರಂ ತ್ರಯೀವೇದಸಾರಂ ಪರಬ್ರಹ್ಮಪಾರಂ । ಮುನಿಜ್ಞಾನಕಾರಂ ವಿದೂರೇವಿಕಾರಂ ಸದಾ ಬ್ರಹ್ಮರೂಪಂ ಗಣೇಶಂ ನಮಾಮಃ ॥ 7 ॥ ನಿಜೈರೋಷಧೀಸ್ತರ್ಪಯಂತಂ ಕರೋದ್ಯೈಃ ಸರೌಘಾನ್ಕಲಾಭಿಃ ಸುಧಾಸ್ರಾವಿಣೀಭಿಃ । ದಿನೇಶಾಂಶು ಸಂತಾಪಹಾರಂ ದ್ವಿಜೇಶಂ ಶಶಾಂಕಸ್ವರೂಪಂ ಗಣೇಶಂ ನಮಾಮಃ ॥ 8 ॥ ಪ್ರಕಾಶಸ್ವರೂಪಂ ನಭೋವಾಯುರೂಪಂ ವಿಕಾರಾದಿಹೇತುಂ ಕಲಾಕಾಲಭೂತಂ । ಅನೇಕಕ್ರಿಯಾನೇಕಶಕ್ತಿಸ್ವರೂಪಂ ಸದಾ ಶಕ್ತಿರೂಪಂ ಗಣೇಶಂ ನಮಾಮಃ ॥ 9 ॥ ಪ್ರಧಾನಸ್ವರೂಪಂ ಮಹತ್ತತ್ತ್ವರೂಪಂ ಧರಾವಾರಿರೂಪಂ ದಿಗೀಶಾದಿರೂಪಂ । ಅಸತ್ಸತ್ಸ್ವರೂಪಂ ಜಗದ್ಧೇತುಭೂತಂ ಸದಾ ವಿಶ್ವರೂಪಂ ಗಣೇಶಂ ನತಾಸ್ಮಃ ॥ 10 ॥ ತ್ವದೀಯೇ ಮನಃ ಸ್ಥಾಪಯೇದಂಘ್ರಿಯುಗ್ಮೇ ಜನೋ ವಿಘ್ನಸಂಘಾನ್ನ ಪೀಡಾಂ ಲಭೇತ । ಲಸತ್ಸೂರ್ಯಬಿಂಬೇ ವಿಶಾಲೇ ಸ್ಥಿತೋಽಯಂ ಜನೋಧ್ವಾಂತ ಪೀಡಾಂ ಕಥಂ ವಾ ಲಭೇತ ॥ 11 ॥ ವಯಂ ಭ್ರಾಮಿತಾಃ ಸರ್ವಥಾಽಜ್ಞಾನಯೋಗಾ- -ದಲಬ್ಧಾ ತವಾಂಘ್ರಿಂ ಬಹೂನ್ವರ್ಷಪೂಗಾನ್ । ಇದಾನೀಮವಾಪ್ತಾಸ್ತವೈವ ಪ್ರಸಾದಾ- -ತ್ಪ್ರಪನ್ನಾನ್ಸದಾ ಪಾಹಿ ವಿಶ್ವಂಭರಾದ್ಯ ॥ 12 ॥ ಗಣೇಶ ಉವಾಚ – ಇದಂ ಯಃ ಪಠೇತ್ಪ್ರಾತರುತ್ಥಾಯ ಧೀಮಾನ್ ತ್ರಿಸಂಧ್ಯಂ ಸದಾ ಭಕ್ತಿಯುಕ್ತೋ ವಿಶುದ್ಧಃ । ಸಪುತ್ರಾನ್ ಶ್ರಿಯಂ ಸರ್ವಕಾಮಾನ್ ಲಭೇತ ಪರಬ್ರಹ್ಮರೂಪೋ ಭವೇದಂತಕಾಲೇ ॥ 13 ॥ ಇತಿ ಗಣೇಶಪುರಾಣೇ ಉಪಾಸನಾಖಂಡೇ ತ್ರಯೋದಶೋಽಧ್ಯಾಯೇ ಶ್ರೀಗಣಪತಿಸ್ತವಃ ।