ಶ್ರೀಪಾರ್ವತ್ಯುವಾಚ – ದೇವದೇವ ಮಹಾದೇವ ಸರ್ವಶಾಸ್ತ್ರವಿಶಾರದ । ಕೃಪಾಂ ಕುರು ಜಗನ್ನಾಥ ಧರ್ಮಜ್ಞೋಸಿ ಮಹಾಮತೇ ॥ 1 ॥ ಭೈರವೀ ಯಾ ಪುರಾ ಪ್ರೋಕ್ತಾ ವಿದ್ಯಾ ತ್ರಿಪುರಪೂರ್ವಿಕಾ । ತಸ್ಯಾಸ್ತು ಕವಚಂ ದಿವ್ಯಂ ಮಹ್ಯಂ ಕಥಯ ತತ್ತ್ವತಃ ॥ 2 ॥ ತಸ್ಯಾಸ್ತು ವಚನಂ ಶ್ರುತ್ವಾ ಜಗಾದ ಜಗದೀಶ್ವರಃ । ಅದ್ಭುತಂ ಕವಚಂ ದೇವ್ಯಾ ಭೈರವ್ಯಾ ದಿವ್ಯರೂಪಿ ವೈ ॥ 3 ॥ ಈಶ್ವರ ಉವಾಚ – ಕಥಯಾಮಿ ಮಹಾವಿದ್ಯಾಕವಚಂ ಸರ್ವದುರ್ಲಭಂ । ಶೃಣುಷ್ವ ತ್ವಂ ಚ ವಿಧಿನಾ ಶ್ರುತ್ವಾ ಗೋಪ್ಯಂ ತವಾಪಿ ತತ್ ॥ 4 ॥ ಯಸ್ಯಾಃ ಪ್ರಸಾದಾತ್ಸಕಲಂ ಬಿಭರ್ಮಿ ಭುವನತ್ರಯಂ । ಯಸ್ಯಾಃ ಸರ್ವಂ ಸಮುತ್ಪನ್ನಂ ಯಸ್ಯಾಮದ್ಯಾಪಿ ತಿಷ್ಠತಿ ॥ 5 ॥ ಮಾತಾ ಪಿತಾ ಜಗದ್ಧನ್ಯಾ ಜಗದ್ಬ್ರಹ್ಮಸ್ವರೂಪಿಣೀ । ಸಿದ್ಧಿದಾತ್ರೀ ಚ ಸಿದ್ಧಾಸ್ಸ್ಯಾದಸಿದ್ಧಾ ದುಷ್ಟಜಂತುಷು ॥ 6 ॥ ಸರ್ವಭೂತಪ್ರಿಯಂಕರೀ ಸರ್ವಭೂತಸ್ವರೂಪಿಣೀ । ಕಕಾರೀ ಪಾತು ಮಾಂ ದೇವೀ ಕಾಮಿನೀ ಕಾಮದಾಯಿನೀ ॥ 7 ॥ ಏಕಾರೀ ಪಾತು ಮಾಂ ದೇವೀ ಮೂಲಾಧಾರಸ್ವರೂಪಿಣೀ । ಈಕಾರೀ ಪಾತು ಮಾಂ ದೇವೀ ಭೂರಿಸರ್ವಸುಖಪ್ರದಾ ॥ 8 ॥ ಲಕಾರೀ ಪಾತು ಮಾಂ ದೇವೀ ಇಂದ್ರಾಣೀವರವಲ್ಲಭಾ । ಹ್ರೀಂಕಾರೀ ಪಾತು ಮಾಂ ದೇವೀ ಸರ್ವದಾ ಶಂಭುಸುಂದರೀ ॥ 9 ॥ ಏತೈರ್ವರ್ಣೈರ್ಮಹಾಮಾಯಾ ಶಾಂಭವೀ ಪಾತು ಮಸ್ತಕಂ । ಕಕಾರೀ ಪಾತು ಮಾಂ ದೇವೀ ಶರ್ವಾಣೀ ಹರಗೇಹಿನೀ ॥ 10 ॥ ಮಕಾರೀ ಪಾತು ಮಾಂ ದೇವೀ ಸರ್ವಪಾಪಪ್ರಣಾಶಿನೀ । ಕಕಾರೀ ಪಾತು ಮಾಂ ದೇವೀ ಕಾಮರೂಪಧರಾ ಸದಾ ॥ 11 ॥ ಕಾಕಾರೀ ಪಾತು ಮಾಂ ದೇವೀ ಶಂಬರಾರಿಪ್ರಿಯಾ ಸದಾ । ಪಕಾರೀ ಪಾತು ಮಾಂ ದೇವೀ ಧರಾಧರಣಿರೂಪಧೃಕ್ ॥ 12 ॥ ಹ್ರೀಂಕಾರೀ ಪಾತು ಮಾಂ ದೇವೀ ಆಕಾರಾರ್ಧಶರೀರಿಣೀ । ಏತೈರ್ವರ್ಣೈರ್ಮಹಾಮಾಯಾ ಕಾಮರಾಹುಪ್ರಿಯಾಽವತು ॥ 13 ॥ ಮಕಾರಃ ಪಾತು ಮಾಂ ದೇವೀ ಸಾವಿತ್ರೀ ಸರ್ವದಾಯಿನೀ । ಕಕಾರಃ ಪಾತು ಸರ್ವತ್ರ ಕಲಾಂಬಾ ಸರ್ವರೂಪಿಣೀ ॥ 14 ॥ ಲಕಾರಃ ಪಾತು ಮಾಂ ದೇವೀ ಲಕ್ಷ್ಮೀಃ ಸರ್ವಸುಲಕ್ಷಣಾ । ಓಂ ಹ್ರೀಂ ಮಾಂ ಪಾತು ಸರ್ವತ್ರ ದೇವೀ ತ್ರಿಭುವನೇಶ್ವರೀ ॥ 15 ॥ ಏತೈರ್ವರ್ಣೈರ್ಮಹಾಮಾಯಾ ಪಾತು ಶಕ್ತಿಸ್ವರೂಪಿಣೀ । ವಾಗ್ಭವಾ ಮಸ್ತಕಂ ಪಾತು ವದನಂ ಕಾಮರಾಜಿತಾ ॥ 16 ॥ ಶಕ್ತಿಸ್ವರೂಪಿಣೀ ಪಾತು ಹೃದಯಂ ಯಂತ್ರಸಿದ್ಧಿದಾ । ಸುಂದರೀ ಸರ್ವದಾ ಪಾತು ಸುಂದರೀ ಪರಿರಕ್ಷತು ॥ 17 ॥ ರಕ್ತವರ್ಣಾ ಸದಾ ಪಾತು ಸುಂದರೀ ಸರ್ವದಾಯಿನೀ । ನಾನಾಲಂಕಾರಸಮ್ಯುಕ್ತಾ ಸುಂದರೀ ಪಾತು ಸರ್ವದಾ ॥ 18 ॥ ಸರ್ವಾಂಗಸುಂದರೀ ಪಾತು ಸರ್ವತ್ರ ಶಿವದಾಯಿನೀ । ಜಗದಾಹ್ಲಾದಜನನೀ ಶಂಭುರೂಪಾ ಚ ಮಾಂ ಸದಾ ॥ 19 ॥ ಸರ್ವಮಂತ್ರಮಯೀ ಪಾತು ಸರ್ವಸೌಭಾಗ್ಯದಾಯಿನೀ । ಸರ್ವಲಕ್ಷ್ಮೀಮಯೀ ದೇವೀ ಪರಮಾನಂದದಾಯಿನೀ ॥ 20 ॥ ಪಾತು ಮಾಂ ಸರ್ವದಾ ದೇವೀ ನಾನಾಶಂಖನಿಧಿಃ ಶಿವಾ । ಪಾತು ಪದ್ಮನಿಧಿರ್ದೇವೀ ಸರ್ವದಾ ಶಿವದಾಯಿನೀ ॥ 21 ॥ ಪಾತು ಮಾಂ ದಕ್ಷಿಣಾಮೂರ್ತಿ ಋಷಿಃ ಸರ್ವತ್ರ ಮಸ್ತಕೇ । ಪಂಕ್ತಿಶ್ಛಂದಃ ಸ್ವರೂಪಾ ತು ಮುಖೇ ಪಾತು ಸುರೇಶ್ವರೀ ॥ 22 ॥ ಗಂಧಾಷ್ಟಕಾತ್ಮಿಕಾ ಪಾತು ಹೃದಯಂ ಶಂಕರೀ ಸದಾ । ಸರ್ವಸಂಮೋಹಿನೀ ಪಾತು ಪಾತು ಸಂಕ್ಷೋಭಿಣೀ ಸದಾ ॥ 23 ॥ ಸರ್ವಸಿದ್ಧಿಪ್ರದಾ ಪಾತು ಸರ್ವಾಕರ್ಷಣಕಾರಿಣೀ । ಕ್ಷೋಭಿಣೀ ಸರ್ವದಾ ಪಾತು ವಶಿನೀ ಸರ್ವದಾವತು ॥ 24 ॥ ಆಕರ್ಷಿಣೀ ಸದಾ ಪಾತು ಸದಾ ಸಂಮೋಹಿನೀ ತಥಾ । ರತಿದೇವೀ ಸದಾ ಪಾತು ಭಗಾಂಗಾ ಸರ್ವದಾವತು ॥ 25 ॥ ಮಾಹೇಶ್ವರೀ ಸದಾ ಪಾತು ಕೌಮಾರೀ ಸರ್ವದಾವತು । ಸರ್ವಾಹ್ಲಾದನಕಾರೀ ಮಾಂ ಪಾತು ಸರ್ವವಶಂಕರೀ ॥ 26 ॥ ಕ್ಷೇಮಂಕರೀ ಸದಾ ಪಾತು ಸರ್ವಾಂಗಂ ಸುಂದರೀ ತಥಾ । ಸರ್ವಾಂಗಂ ಯುವತೀ ಸರ್ವಂ ಸರ್ವಸೌಭಾಗ್ಯದಾಯಿನೀ ॥ 27 ॥ ವಾಗ್ದೇವೀ ಸರ್ವದಾ ಪಾತು ವಾಣೀ ಮಾಂ ಸರ್ವದಾವತು । ವಶಿನೀ ಸರ್ವದಾ ಪಾತು ಮಹಾಸಿದ್ಧಿಪ್ರದಾವತು ॥ 28 ॥ ಸರ್ವವಿದ್ರಾವಿಣೀ ಪಾತು ಗಣನಾಥಾ ಸದಾವತು । ದುರ್ಗಾದೇವೀ ಸದಾ ಪಾತು ವಟುಕಃ ಸರ್ವದಾವತು ॥ 29 ॥ ಕ್ಷೇತ್ರಪಾಲಃ ಸದಾ ಪಾತು ಪಾತು ಚಾಶಾಂತಿದಾ । ಅನಂತಃ ಸರ್ವದಾ ಪಾತು ವರಾಹಃ ಸರ್ವದಾವತು ॥ 30 ॥ ಪೃಥಿವೀ ಸರ್ವದಾ ಪಾತು ಸ್ವರ್ಣಸಿಂಹಾಸನಸ್ತಥಾ । ರಕ್ತಾಮೃತಶ್ಚ ಸತತಂ ಪಾತು ಮಾಂ ಸರ್ವಕಾಲತಃ ॥ 31 ॥ ಸುಧಾರ್ಣವಃ ಸದಾ ಪಾತು ಕಲ್ಪವೃಕ್ಷಃ ಸದಾವತು । ಶ್ವೇತಚ್ಛತ್ರಂ ಸದಾ ಪಾತು ರತ್ನದೀಪಃ ಸದಾವತು ॥ 32 ॥ ಸತತಂ ನಂದನೋದ್ಯಾನಂ ಪಾತು ಮಾಂ ಸರ್ವಸಿದ್ಧಯೇ । ದಿಕ್ಪಾಲಾಃ ಸರ್ವದಾ ಪಾಂತು ದ್ವಂದ್ವೌಘಾಃ ಸಕಲಾಸ್ತಥಾ ॥ 33 ॥ ವಾಹನಾನಿ ಸದಾ ಪಾಂತು ಸರ್ವದಾಽಸ್ತ್ರಾಣಿ ಪಾಂತು ಮಾಂ । ಶಸ್ತ್ರಾಣಿ ಸರ್ವದಾ ಪಾಂತು ಯೋಗಿನ್ಯಃ ಪಾಂತು ಸರ್ವದಾ ॥ 34 ॥ ಸಿದ್ಧಾಃ ಪಾಂತು ಸದಾ ದೇವೀ ಸರ್ವಸಿದ್ಧಿಪ್ರದಾವತು । ಸರ್ವಾಂಗಸುಂದರೀ ದೇವೀ ಸರ್ವದಾವತು ಮಾಂ ತಥಾ ॥ 35 ॥ ಆನಂದರೂಪಿಣೀ ದೇವೀ ಚಿತ್ಸ್ವರೂಪಾ ಚಿದಾತ್ಮಿಕಾ । ಸರ್ವದಾ ಸುಂದರೀ ಪಾತು ಸುಂದರೀ ಭವಸುಂದರೀ ॥ 36 ॥ ಪೃಥಗ್ದೇವಾಲಯೇ ಘೋರೇ ಸಂಕಟೇ ದುರ್ಗಮೇ ಗಿರೌ । ಅರಣ್ಯೇ ಪ್ರಾಂತರೇ ವಾಽಪಿ ಪಾತು ಮಾಂ ಸುಂದರೀ ಸದಾ ॥ 37 ॥ ಇದಂ ಕವಚಮಿತ್ಯುಕ್ತಂ ಮಂತ್ರೋದ್ಧಾರಶ್ಚ ಪಾರ್ವತಿ । ಯಃ ಪಠೇತ್ಪ್ರಯತೋ ಭೂತ್ವಾ ತ್ರಿಸಂಧ್ಯಂ ನಿಯತಃ ಶುಚಿಃ ॥ 38 ॥ ತಸ್ಯ ಸರ್ವಾರ್ಥಸಿದ್ಧಿಃ ಸ್ಯಾದ್ಯದ್ಯನ್ಮನಸಿ ವರ್ತತೇ । ಗೋರೋಚನಾಕುಂಕುಮೇನ ರಕ್ತಚಂದನಕೇನ ವಾ ॥ 39 ॥ ಸ್ವಯಂಭೂಕುಸುಮೈಶ್ಶುಕ್ಲೈಃ ಭೂಮಿಪುತ್ರೇ ಶನೌ ಸುರೇ । ಶ್ಮಶಾನೇ ಪ್ರಾಂತರೇ ವಾಪಿ ಶೂನ್ಯಾಗಾರೇ ಶಿವಾಲಯೇ ॥ 40 ॥ ಸ್ವಶಕ್ತ್ಯಾ ಗುರುಣಾ ಯಂತ್ರಂ ಪೂಜಯಿತ್ವಾ ಕುಮಾರಿಕಾಂ । ತನ್ಮನುಂ ಪೂಜಯಿತ್ವಾ ಚ ಗುರುಪಂಕ್ತಿಂ ತಥೈವ ಚ ॥ 41 ॥ ದೇವ್ಯೈ ಬಲಿಂ ನಿವೇದ್ಯಾಥ ನರಮಾರ್ಜಾರಸೂಕರೈಃ । ನಕುಲೈರ್ಮಹಿಷೈರ್ಮೇಷೈಃ ಪೂಜಯಿತ್ವಾ ವಿಧಾನತಃ ॥ 42 ॥ ಧೃತ್ವಾ ಸುವರ್ಣಮಧ್ಯಸ್ಥಂ ಕಂಠೇ ವಾ ದಕ್ಷಿಣೇ ಭುಜೇ । ಸುತಿಥೌ ಶುಭನಕ್ಷತ್ರೇ ಸೂರ್ಯಸ್ಯೋದಯನೇ ತಥಾ ॥ 43 ॥ ಧಾರಯಿತ್ವಾ ಚ ಕವಚಂ ಸರ್ವಸಿದ್ಧಿಂ ಲಭೇನ್ನರಃ । ಕವಚಸ್ಯ ಚ ಮಾಹಾತ್ಮ್ಯಂ ನಾಹಂ ವರ್ಷಶತೈರಪಿ ॥ 44 ॥ ಶಕ್ನೋಮಿ ತು ಮಹೇಶಾನಿ ವಕ್ತುಂ ತಸ್ಯ ಫಲಂ ತು ಯತ್ । ನ ದುರ್ಭಿಕ್ಷಫಲಂ ತತ್ರ ನ ಶತ್ರೋಃ ಪೀಡನಂ ತಥಾ ॥ 45 ॥ ಸರ್ವವಿಘ್ನಪ್ರಶಮನಂ ಸರ್ವವ್ಯಾಧಿವಿನಾಶನಂ । ಸರ್ವರಕ್ಷಾಕರಂ ಜಂತೋಶ್ಚತುರ್ವರ್ಗಫಲಪ್ರದಂ ॥ 46 ॥ ಯತ್ರ ಕುತ್ರ ನ ವಕ್ತವ್ಯಂ ನ ದಾತವ್ಯಂ ಕದಾಚನ । ಮಂತ್ರಪ್ರಾಪ್ಯ ವಿಧಾನೇನ ಪೂಜಯೇತ್ಸತತಂ ಸುಧೀಃ ॥ 47 ॥ ತತ್ರಾಪಿ ದುರ್ಲಭಂ ಮನ್ಯೇ ಕವಚಂ ದೇವರೂಪಿಣಂ । ಗುರೋಃ ಪ್ರಸಾದಮಾಸಾದ್ಯ ವಿದ್ಯಾಂ ಪ್ರಾಪ್ಯ ಸುಗೋಪಿತಾಂ ॥ 48 ॥ ತತ್ರಾಪಿ ಕವಚಂ ದಿವ್ಯಂ ದುರ್ಲಭಂ ಭುವನತ್ರಯೇ । ಶ್ಲೋಕಂ ವಾ ಸ್ತವಮೇಕಂ ವಾ ಯಃ ಪಠೇತ್ಪ್ರಯತಃ ಶುಚಿಃ ॥ 49 ॥ ತಸ್ಯ ಸರ್ವಾರ್ಥಸಿದ್ಧಿಃ ಸ್ಯಾಚ್ಛಂಕರೇಣ ಪ್ರಭಾಷಿತಂ । ಗುರುರ್ದೇವೋ ಹರಃ ಸಾಕ್ಷಾತ್ಪತ್ನೀ ತಸ್ಯ ಚ ಪಾರ್ವತೀ ॥ 50 ॥ ಅಭೇದೇನ ಯಜೇದ್ಯಸ್ತು ತಸ್ಯ ಸಿದ್ಧಿರದೂರತಃ ॥ 51 ॥ ಇತಿ ಶ್ರೀ ರುದ್ರಯಾಮಲೇ ಭೈರವಭೈರವೀಸಂವಾದೇ ಶ್ರೀ ತ್ರಿಪುರಭೈರವೀ ಕವಚಂ ॥