കാമാക്ഷീ സ്തോത്രം

കല്പാനോകഹപുഷ്പജാലവിലസന്നീലാലകാം മാതൃകാം

കാന്താം കഞ്ജദലേക്ഷണാം കലിമലപ്രധ്വംസിനീം കാലികാം ।

കാഞ്ചീനൂപുരഹാരദാമസുഭഗാം കാഞ്ചീപുരീനായികാം

കാമാക്ഷീം കരികുംഭസന്നിഭകുചാം വന്ദേ മഹേശപ്രിയാം ॥ 1 ॥

കാശാഭാം ശുകഭാസുരാം പ്രവിലസത്കോശാതകീ സന്നിഭാം

ചന്ദ്രാർകാനലലോചനാം സുരുചിരാലങ്കാരഭൂഷോജ്ജ്വലാം ।

ബ്രഹ്മശ്രീപതിവാസവാദിമുനിഭിഃ സംസേവിതാംഘ്രിദ്വയാം

കാമാക്ഷീം ഗജരാജമന്ദഗമനാം വന്ദേ മഹേശപ്രിയാം ॥ 2 ॥

ഐം ക്ലീം സൗരിതി യാം വദന്തി മുനയസ്തത്ത്വാർഥരൂപാം പരാം

വാചാമാദിമകാരണം ഹൃദി സദാ ധ്യായന്തി യാം യോഗിനഃ ।

ബാലാം ഫാലവിലോചനാം നവജപാവർണാം സുഷുമ്നാശ്രിതാം

കാമാക്ഷീം കലിതാവതംസസുഭഗാം വന്ദേ മഹേശപ്രിയാം ॥ 3 ॥

യത്പാദാംബുജരേണുലേശമനിശം ലബ്ധ്വാ വിധത്തേ വിധി-

-ര്വിശ്വം തത്പരിപാതി വിഷ്ണുരഖിലം യസ്യാഃ പ്രസാദാച്ചിരം ।

രുദ്രഃ സംഹരതി ക്ഷണാത്തദഖിലം യന്മായയാ മോഹിതഃ

കാമാക്ഷീമതിചിത്രചാരുചരിതാം വന്ദേ മഹേശപ്രിയാം ॥ 4 ॥

സൂക്ഷ്മാത്സൂക്ഷ്മതരാം സുലക്ഷിതതനും ക്ഷാന്താക്ഷരൈർലക്ഷിതാം

വീക്ഷാശിക്ഷിതരാക്ഷസാം ത്രിഭുവനക്ഷേമങ്കരീമക്ഷയാം ।

സാക്ഷാല്ലക്ഷണലക്ഷിതാക്ഷരമയീം ദാക്ഷായണീം സാക്ഷിണീം

കാമാക്ഷീം ശുഭലക്ഷണൈഃ സുലലിതാം വന്ദേ മഹേശപ്രിയാം ॥ 5 ॥

ഓങ്കാരാംഗണദീപികാമുപനിഷത്പ്രാസാദപാരാവതീം

ആമ്നായാംബുധിചന്ദ്രികാമഘതമഃപ്രധ്വംസഹംസപ്രഭാം ।

കാഞ്ചീപട്ടണപഞ്ജരാന്തരശുകീം കാരുണ്യകല്ലോലിനീം

കാമാക്ഷീം ശിവകാമരാജമഹിഷീം വന്ദേ മഹേശപ്രിയാം ॥ 6 ॥

ഹ്രീങ്കാരാത്മകവർണമാത്രപഠനാദൈന്ദ്രീം ശ്രിയം തന്വതീം

ചിന്മാത്രാം ഭുവനേശ്വരീമനുദിനം ഭിക്ഷാപ്രദാനക്ഷമാം ।

വിശ്വാഘൗഘനിവാരിണീം വിമലിനീം വിശ്വംഭരാം മാതൃകാം

കാമാക്ഷീം പരിപൂർണചന്ദ്രവദനാം വന്ദേ മഹേശപ്രിയാം ॥ 7 ॥

വാഗ്ദേവീതി ച യാം വദന്തി മുനയഃ ക്ഷീരാബ്ധികന്യേതി ച

ക്ഷോണീഭൃത്തനയേതി ച ശ്രുതിഗിരോ യാം ആമനന്തി സ്ഫുടം ।

ഏകാനേകഫലപ്രദാം ബഹുവിധാഽഽകാരാസ്തനൂസ്തന്വതീം

കാമാക്ഷീം സകലാർതിഭഞ്ജനപരാം വന്ദേ മഹേശപ്രിയാം ॥ 8 ॥

മായാമാദിമകാരണം ത്രിജഗതാമാരാധിതാംഘ്രിദ്വയാം

ആനന്ദാമൃതവാരിരാശിനിലയാം വിദ്യാം വിപശ്ചിദ്ധിയാം ।

മായാമാനുഷരൂപിണീം മണിലസന്മധ്യാം മഹാമാതൃകാം

കാമാക്ഷീം കരിരാജമന്ദഗമനാം വന്ദേ മഹേശപ്രിയാം ॥ 9 ॥

കാന്താ കാമദുഘാ കരീന്ദ്രഗമനാ കാമാരിവാമാങ്കഗാ

കല്യാണീ കലിതാവതാരസുഭഗാ കസ്തൂരികാചർചിതാ

കമ്പാതീരരസാലമൂലനിലയാ കാരുണ്യകല്ലോലിനീ

കല്യാണാനി കരോതു മേ ഭഗവതീ കാഞ്ചീപുരീദേവതാ ॥ 10 ॥

ഇതി ശ്രീ കാമാക്ഷീ സ്തോത്രം ।

Recite with devotion and pure heart

Regular practice brings spiritual benefits