ഹൈന്ദവം
हैंహై
ഹൈന്ദവം
ஹிહિં📍
Font Size:
ഭുവനേശ്വരീ ഹൃദയം
ശ്രീദേവ്യുവാച –
ഭഗവൻ ബ്രൂഹി തത് സ്തോത്രം സർവകാമപ്രസാധനം ।
യസ്യ ശ്രവണമാത്രേണ നാന്യച്ഛ്രോതവ്യമിഷ്യതേ ॥ 1 ॥
യദി മേഽനുഗ്രഹഃ കാര്യഃ പ്രീതിശ്ചാപി മമോപരി ।
തദിദം കഥയ ബ്രഹ്മൻ വിമലം യന്മഹീതലേ ॥ 2 ॥
ഈശ്വര ഉവാച –
ശൃണു ദേവി പ്രവക്ഷ്യാമി സർവകാമപ്രസാധനം ।
ഹൃദയം ഭുവനേശ്വര്യാഃ സ്തോത്രമസ്തി യശോദയം ॥ 3 ॥
ഓം അസ്യ ശ്രീഭുവനേശ്വവരീഹൃദയസ്തോത്രമന്ത്രസ്യ ശക്തിഃ ഋഷിഃ – ഗായത്രീ ഛന്ദഃ – ശ്രീഭുവനേശ്വരീ ദേവതാ – ഹകാരോ ബീജം – ഈകാരശ്ശക്തിഃ – രേഫഃ കീലകം – സകല മനോവാഞ്ഛിതസിദ്ധ്യർഥേ ജപേ വിനിയോഗഃ ॥
കരന്യാസഃ –
ഓം ഹ്രീം അംഗുഷ്ഠാഭ്യാം നമഃ ।
ഓം ശ്രീം തർജനീഭ്യാം നമഃ ।
ഓം ഐം മധ്യമാഭ്യാം നമഃ ।
ഓം ഹ്രീം അനാമികാഭ്യാം നമഃ ।
ഓം ശ്രീം കനിഷ്ഠികാഭ്യാം നമഃ ।
ഓം ഐം കരതലകരപൃഷ്ഠാഭ്യാം നമഃ ।
അംഗന്യാസഃ –
ഓം ഹ്രീം ഹൃദയായ നമഃ ।
ഓം ശ്രീം ശിരസേ സ്വാഹാ ।
ഓം ഐം ശിഖായൈ വഷട് ।
ഓം ഹ്രീം കവചായ ഹും ।
ഓം ശ്രീം നേത്രത്രയായ വൗഷട് ।
ഓം ഐം അസ്ത്രായ ഫട് ।
ധ്യാനം –
ധ്യായേദ്ബ്രഹ്മാദികാനാം കൃതജനിജനനീം യോഗിനീം യോഗയോനിം
ദേവാനാം ജീവനായോജ്ജ്വലിതജയപരജ്യോതിരുഗ്രാംഗധാത്രീം ।
ശംഖം ചക്രം ച ബാണം ധനുരപി ദധതീം ദോശ്ചതുഷ്കാംബുജാതൗ
മായാമാദ്യാം വിശിഷ്ടാം ഭവ ഭവ ഭുവനാം ഭൂഭവാ ഭാരഭൂമിം ॥ 4 ॥
യദാജ്ഞയാ യോ ജഗദാദ്യശേഷം
സൃജത്യജഃ ശ്രീപതിരൗരസം വാ ।
ബിഭർതി സംഹന്തി ഭവസ്തദന്തേ
ഭജാമഹേ ശ്രീഭുവനേശ്വരീം താം ॥ 5 ॥
ജഗജ്ജനാനന്ദകരീം ജയാഖ്യാം
യശസ്വിനീം യന്ത്രസുയജ്ഞയോനിം ।
ജിതാമിതാമിത്രകൃതപ്രപഞ്ചാം
ഭജാമഹേ ശ്രീഭുവനേശ്വരീം താം ॥ 6 ॥
ഹരൗ പ്രസുപ്തേ ഭുവനത്രയാന്തേ-
പ്യനാരതന്നാഭിജപദ്മജന്മാ ।
വിധിസ്തതോഽന്ധേ വിദധാര യത്പദം
ഭജാമഹേ ശ്രീഭുവനേശ്വരീം താം ॥ 7 ॥
ന വിദ്യതേ ക്വാപി തു ജന്മ യസ്യാ
ന വാ സ്ഥിതിഃ സാന്തതികീഹ യസ്യാഃ ।
ന വാ നിരോധേഽഖിലകർമ യസ്യാ
ഭജാമഹേ ശ്രീഭുവനേശ്വരീം താം ॥ 8 ॥
കടാക്ഷമോക്ഷാചരണോഗ്രവിത്താ
നിവേശിതാർണാ കരുണാർദ്രചിത്താ ।
സുഭക്തയേരാതി സമീപ്സിതം യാ
ഭജാമഹേ ശ്രീഭുവനേശ്വരീം താം ॥ 9 ॥
യതോ ജഗജ്ജന്മ ബഭൂവ യോനേ-
സ്തദേവ മധ്യേ പ്രതിപാതി യാം വാ ।
തദത്തി യാന്തേഽഖിലമുഗ്രകാലി
ഭജാമഹേ ശ്രീഭുവനേശ്വരീം താം ॥ 10 ॥
സുഷുപ്തികാലേ ജനമധ്യയന്ത്യാ
യയാ ജനഃ സ്വപ്നമവൈതി കിഞ്ചിത് ।
പ്രബുധ്യതേ ജാഗ്രതി ജീവ ഏഷ
ഭജാമഹേ ശ്രീഭുവനേശ്വരീം താം ॥ 11 ॥
ദയാസ്ഫുരത്കോരകടാക്ഷലാഭാ-
ന്നകേത്ര യസ്യാഃ പ്രഭവന്തി സിദ്ധാഃ ।
കവിത്വമീശിത്വമപി സ്വതന്ത്രാ
ഭജാമഹേ ശ്രീഭുവനേശ്വരീം താം ॥ 12 ॥
ലസന്മുഖാംഭോരുഹമുത്സ്ഫുരന്തം
ഹൃദി പ്രണിധ്യായ ദിശി സ്ഫുരന്തഃ ।
യസ്യാഃ കൃപാർദ്രം പ്രവികാസയന്തി
ഭജാമഹേ ശ്രീഭുവനേശ്വരീം താം ॥ 13 ॥
യദാനുരാഗാനുഗതാലിചിത്രാ-
ശ്ചിരന്തനപ്രേമപരിപ്ലുതാംഗാഃ ।
സുനിർഭയാസ്സന്തി പ്രമുദ്യ യസ്യാഃ
ഭജാമഹേ ശ്രീഭുവനേശ്വരീം താം ॥ 14 ॥
ഹരിർവിരഞ്ചിർഹര ഈശിതാരഃ
പുരോഽവതിഷ്ഠന്തി പരംനതാംഗാഃ ।
യസ്യാസ്സമിച്ഛന്തി സദാനുകൂല്യം
ഭജാമഹേ ശ്രീഭുവനേശ്വരീം താം ॥ 15 ॥
മനും യദീയം ഹരമഗ്നിസംസ്ഥം
തതശ്ച വാമശ്രുതിചന്ദ്രസക്തം ।
ജപന്തി യേ സ്യുസ്സുരവന്ദിതാസ്തേ
ഭജാമഹേ ശ്രീഭുവനേശ്വരീം താം ॥ 16 ॥
പ്രസീദതു പ്രേമരസാർദ്രചിത്താ
സദാ ഹി സാ ശ്രീഭുവനേശ്വരീ മേ ।
കൃപാകടാക്ഷേണ കുബേരകല്പാ
ഭവന്തി യസ്യാഃ പദഭക്തിഭാജഃ ॥ 17 ॥
മുദാ സുപാഠ്യം ഭുവനേശ്വരീയം
സദാ സതാം സ്തോത്രമിദം സുസേവ്യം ।
സുഖപ്രദം സ്യാത്കലികല്മഷഘ്നം
സുശൃണ്വതാം സമ്പഠതാം പ്രശസ്യം ॥ 18 ॥
ഏതത്തു ഹൃദയം സ്തോത്രം പഠേദ്യസ്തു സമാഹിതഃ ।
ഭവേത്തസ്യേഷ്ടദാ ദേവീ പ്രസന്നാ ഭുവനേശ്വരീ ॥ 19 ॥
ദദാതി ധനമായുഷ്യം പുണ്യം പുണ്യമതിം തഥാ ।
നൈഷ്ഠികീം ദേവഭക്തിം ച ഗുരുഭക്തിം വിശേഷതഃ ॥ 20 ॥
പൂർണിമായാം ചതുർദശ്യാം കുജവാരേ വിശേഷതഃ ।
പഠനീയമിദം സ്തോത്രം ദേവസദ്മനി യത്നതഃ ॥ 21 ॥
യത്രകുത്രാപി പാഠേന സ്തോത്രസ്യാസ്യ ഫലം ഭവേത് ।
സർവസ്ഥാനേഷു ദേവേശ്യാഃ പൂതദേഹഃ സദാ പഠേത് ॥ 22 ॥
ഇതി നീലസരസ്വതീതന്ത്രേ ശ്രീ ഭുവനേശ്വരീപടലേ ശ്രീദേവീശ്വരസംവാദേ
ശ്രീഭുവനേശ്വരീ ഹൃദയസ്തോത്രം സമ്പൂർണം ॥
Recite with devotion and pure heart
Regular practice brings spiritual benefits