हैंహైHaindavamஹிહિં
📍
Font Size:
ബഗലാമുഖീ ഹൃദയം
ഓം അസ്യ ശ്രീബഗലാമുഖീഹൃദയമാലാമന്ത്രസ്യ നാരദഋഷിഃ ।
അനുഷ്ടുപ്ഛന്ദഃ ।
ശ്രീബഗലാമുഖീ ദേവതാ ।
ഹ്ലീം ബീജം ।
ക്ലീം ശക്തിഃ ।
ഐം കീലകം ।
ശ്രീബഗലാമുഖീപ്രസാദസിദ്ധ്യർഥേ ജപേ വിനിയോഗഃ ॥
അഥ ന്യാസഃ –
ഓം നാരദഋഷയേ നമഃ ശിരസി ।
ഓം അനുഷ്ടുപ് ഛന്ദസേ നമഃ മുഖേ ।
ഓം ശ്രീബഗലാമുഖീ ദേവതായൈ നമഃ ഹൃദയേ ।
ഓം ഹ്ലീം ബീജായ നമഃ ഗുഹ്യേ ।
ഓം ക്ലീം ശക്തയേ നമഃ പാദയോഃ ।
ഓം ഐം കീലകായ നമഃ സർവാംഗേ ।
കരന്യാസഃ –
ഓം ഹ്ലീം അംഗുഷ്ഠാഭ്യാം നമഃ ।
ഓം ക്ലീം തർജനീഭ്യാം നമഃ ।
ഓം ഐം മധ്യമാഭ്യാം നമഃ ।
ഓം ഹ്ലീം അനാമികാഭ്യാം നമഃ ।
ഓം ക്ലീം കനിഷ്ഠികാഭ്യാം നമഃ ।
ഓം ഐം കരതലകരപൃഷ്ഠാഭ്യാം നമഃ ।
അംഗന്യാസഃ –
ഓം ഹ്ലീം ഹൃദയായ നമഃ ।
ഓം ക്ലീം ശിരസേ സ്വാഹാ ।
ഓം ഐം ശിഖായൈ വഷട് ।
ഓം ഹ്ലീം കവചായ ഹും ।
ഓം ക്ലീം നേത്രത്രയായ വൗഷട് ।
ഓം ഐം അസ്ത്രായ ഫട് ।
ഓം ഹ്ലീം ക്ലീം ഐം ഭൂർഭുവസ്സുവരോമിതി ദിഗ്ബന്ധഃ ॥
ധ്യാനം –
പീതാംബരാം പീതമാല്യാം പീതാഭരണഭൂഷിതാം ।
പീതകഞ്ജപദദ്വന്ദ്വാം ബഗലാം ചിന്തയേഽനിശം ॥
ഇതി ധ്യാത്വാ പഞ്ചമുദ്രയാ സമ്പൂജ്യ ॥
പീതശംഖഗദാഹസ്തേ പീതചന്ദനചർചിതേ ।
ബഗലേ മേ വരം ദേഹി ശത്രുസംഘവിദാരിണീ ॥
സമ്പ്രാർഥ്യ –
ഓം ഹ്ലീം ക്ലീം ഐം ബഗലാമുഖ്യൈ ഗദാധാരിണ്യൈ പ്രേതാസനാധ്യാസിന്യൈ സ്വാഹാ ॥
ഇതി മന്ത്രം ജപിത്വാ പുനഃ പൂർവവദ്ധൃദയാദി ഷഡംഗന്യാസം കൃത്വാ
സ്തോത്രം പഠേത് ॥
കരന്യാസഃ –
ഓം ഹ്ലീം അംഗുഷ്ഠാഭ്യാം നമഃ ।
ഓം ക്ലീം തർജനീഭ്യാം നമഃ ।
ഓം ഐം മധ്യമാഭ്യാം നമഃ ।
ഓം ഹ്ലീം അനാമികാഭ്യാം നമഃ ।
ഓം ക്ലീം കനിഷ്ഠികാഭ്യാം നമഃ ।
ഓം ഐം കരതല കരപൃഷ്ഠാഭ്യാം നമഃ ।
അംഗന്യാസഃ –
ഓം ഹ്ലീം ഹൃദയായ നമഃ ।
ഓം ക്ലീം ശിരസേ സ്വാഹാ ।
ഓം ഐം ശിഖായൈ വഷട് ।
ഓം ഹ്ലീം കവചായ ഹും ।
ഓം ക്ലീം നേത്രത്രയായ വൗഷട് ।
ഓം ഐം അസ്ത്രായഫട് ।
ഓം ഹ്ലീം ക്ലീം ഐം ഭൂർഭുവസ്സുവരോമിതി ദിഗ്വിമോകഃ ॥
വന്ദേഽഹം ബഗലാം ദേവീം പീതഭൂഷണഭൂഷിതാം ।
തേജോരൂപമയീം ദേവീം പീതതേജസ്സ്വരൂപിണീം ॥ 1 ॥
ഗദാഭ്രമണാഭിന്നാഭ്രാം ഭ്രുകുടീഭീഷണാനനാം ।
ഭീഷയന്തീം ഭീമശത്രൂൻ ഭജേ ഭക്തസ്യ ഭവ്യദാം ॥ 2 ॥
പൂർണചന്ദ്രസമാനാസ്യാം പീതഗന്ധാനുലേപനാം ।
പീതാംബരപരീധാനാം പവിത്രാമാശ്രയാമ്യഹം ॥ 3 ॥
പാലയന്തീമനുപലം പ്രസമീക്ഷ്യാവനീതലേ ।
പീതാചാരരതാം ഭക്താം താം ഭവാനീം ഭജാമ്യഹം ॥ 4 ॥
പീതപദ്മപദദ്വന്ദ്വാം ചമ്പകാരണ്യവാസിനീം ।
പീതാവതംസാം പരമാം വന്ദേ പദ്മജവന്ദിതാം ॥ 5 ॥
ലസച്ചാരുസിഞ്ജത്സുമഞ്ജീരപാദാം
ചലത്സ്വർണകർണാവതംസാഞ്ചിതാസ്യാം ।
വലത്പീതചന്ദ്രാനനാം ചന്ദ്രവന്ദ്യാം
ഭജേ പദ്മജാദീഡ്യസത്പാദപദ്മാം ॥ 6 ॥
സുപീതാഭയാമാലയാ പൂതമന്ത്രം
പരം തേ ജപന്തോ ജയം സല്ലഭന്തേ ।
രണേ രാഗരോഷാപ്ലുതാനാം രിപൂണാം
വിവാദേ ബലാദ്വൈരകൃദ്ധാതമാതഃ ॥ 7 ॥
ഭരത്പീതഭാസ്വത്പ്രഭാഹസ്കരാഭാം
ഗദാഗഞ്ജിതാമിത്രഗർവാം ഗരിഷ്ഠാം ।
ഗരീയോ ഗുണാഗാര ഗാത്രാം ഗുണാഢ്യാം
ഗണേശാദിഗമ്യാം ശ്രയേ നിർഗുണാഢ്യാം ॥ 8 ॥
ജനാ യേ ജപന്ത്യുഗ്രബീജം ജഗത്സു
പരം പ്രത്യഹം തേ സ്മരന്തഃ സ്വരൂപം ।
ഭവേദ്വാദിനാം വാങ്മുഖസ്തംഭ ആദ്യേ
ജയോ ജായതേ ജല്പതാമാശു തേഷാം ॥ 9 ॥
തവ ധ്യാനനിഷ്ഠാ പ്രതിഷ്ഠാത്മപ്രജ്ഞാ-
വതാം പാദപദ്മാർചനേ പ്രേമയുക്താഃ ।
പ്രസന്നാ നൃപാഃ പ്രാകൃതാഃ പണ്ഡിതാ വാ
പുരാണാദിഗാധാസുതുല്യാ ഭവന്തി ॥ 10 ॥
നമാമസ്തേ മാതഃ കനകകമനീയാംഘ്രി ജലജം
ബലദ്വിദ്യുദ്വർണാം ഘനതിമിര വിധ്വംസ കരണം ।
ഭവാബ്ധൗ മഗ്നാത്മോത്തരണകരണം സർവശരണം
പ്രപന്നാനാം മാതർജഗതി ബഗലേ ദുഃഖദമനം ॥ 11 ॥
ജ്വലജ്ജ്യോത്സ്നാരത്നാകരമണിവിഷക്താങ്കഭവനം
സ്മരാമസ്തേ ധാമ സ്മരഹരഹരീന്ദ്രേന്ദു പ്രമുഖൈഃ ।
അഹോരാത്രം പ്രാതഃ പ്രണയനവനീയം സുവിശദം
പരം പീതാകാരം പരിചിതമണിദ്വീപവസനം ॥ 12 ॥
വദാമസ്തേ മാതഃ ശ്രുതിസുഖകരം നാമ ലലിതം
ലസന്മാത്രാവർണം ജഗതി ബഗലേതി പ്രചരിതം ।
ചലന്തസ്തിഷ്ഠന്തോ വയമുപവിശന്തോഽപി ശയനേ
ഭജാമോ യച്ഛ്രേയോ ദിവി ദുരവലഭ്യം ദിവിഷദാം ॥ 13 ॥
പദാർചായാം പ്രീതിഃ പ്രതിദിനമപൂർവാ പ്രഭവതു
യഥാ തേ പ്രാസന്ന്യം പ്രതിഫലമപേക്ഷ്യം പ്രണമതാം ।
അനല്പം തന്മാതർഭവതി ഭൃതഭക്ത്യാ ഭവതു നോ
ദിശാതഃ സദ്ഭക്തിം ഭുവി ഭഗവതാം ഭൂരി ഭവദാം ॥ 14 ॥
മമ സകലരിപൂണാം വാങ്മുഖേ സ്തംഭയാശു
ഭഗവതി രിപുജിഹ്വാം കീലയ പ്രസ്ഥതുല്യാം ।
വ്യവസിതഖലബുദ്ധിം നാശയാശു പ്രഗൽഭാം
മമ കുരു ബഹുകാര്യം സത്കൃപേഽമ്ബ പ്രസീദ ॥ 15 ॥
വ്രജതു മമ രിപൂണാം സദ്മനി പ്രേതസംസ്ഥാ
കരധൃതഗദയാ താൻ ഘാതയിത്വാശു രോഷാത് ।
സധന വസന ധാന്യം സദ്മ തേഷാം പ്രദഹ്യ
പുനരപി ബഗലാ സ്വസ്ഥാനമായാതു ശീഘ്രം ॥ 16 ॥
കരധൃതരിപു ജിഹ്വാപീഡന വ്യഗ്രഹസ്താം
പുനരപി ഗദയാ താംസ്താഡയന്തീം സുതന്ത്രാം ।
പ്രണതസുരഗണാനാം പാലികാം പീതവസ്ത്രാം
ബഹുബല ബഗലാം താം പീതവസ്ത്രാം നമാമഃ ॥ 17 ॥
ഹൃദയവചനകായൈഃ കുർവതാം ഭക്തിപുഞ്ജം
പ്രകടിത കരുണാർദ്രാം പ്രീണതീജല്പതീതി ।
ധനമഥ ബഹുധാന്യം പുത്രപൗത്രാദിവൃദ്ധിഃ
സകലമപി കിമേഭ്യോ ദേയമേവം ത്വവശ്യം ॥ 18 ॥
തവ ചരണസരോജം സർവദാ സേവ്യമാനം
ദ്രുഹിണഹരിഹരാദ്യൈർദേവബൃന്ദൈഃ ശരണ്യം ।
മൃദുലമപി ശരണം തേ ശർമദം സൂരിസേവ്യം
വയമിഹ കരവാമോ മാതരേതദ്വിധേയം ॥ 19 ॥
ബഗലാഹൃദയസ്തോത്രമിദം ഭക്തി സമന്വിതഃ ।
പഠേദ്യോ ബഗലാ തസ്യ പ്രസന്നാ പാഠതോ ഭവേത് ॥ 20 ॥
പീതാധ്യാനപരോ ഭക്തോ യഃ ശൃണോത്യവികല്പതഃ ।
നിഷ്കല്മഷോ ഭവേന്മർത്യോ മൃതോ മോക്ഷമവാപ്നുയാത് ॥ 21 ॥
ആശ്വിനസ്യ സിതേ പക്ഷേ മഹാഷ്ടമ്യാം ദിവാനിശം ।
യസ്ത്വിദം പഠതേ പ്രേമ്ണാ ബഗലാ പ്രീതിമേതി സഃ ॥ 22 ॥
ദേവ്യാലയേ പഠൻ മർത്യോ ബഗലാം ധ്യായതീശ്വരീം ।
പീതവസ്ത്രാവൃതോ യസ്തു തസ്യ നശ്യന്തി ശത്രവഃ ॥ 23 ॥
പീതാചാരരതോ നിത്യം പീതഭൂഷാം വിചിന്തയൻ ।
ബഗലായാഃ പഠേന്നിത്യം ഹൃദയസ്തോത്രമുത്തമം ॥ 24 ॥
ന കിഞ്ചിദ് ദുർലഭം തസ്യ ദൃശ്യതേ ജഗതീതലേ ।
ശത്രവോ ഗ്ലാനിമായാന്തി തസ്യ ദർശനമാത്രതഃ ॥ 25 ॥
ഇതി സിദ്ധേശ്വരതന്ത്രേ ഉത്തരഖണ്ഡേ ശ്രീ ബഗലാപടലേ ശ്രീബഗലാഹൃദയസ്തോത്രം ॥
Recite with devotion and pure heart
Regular practice brings spiritual benefits