ഹൈന്ദവം
हैंహై
ഹൈന്ദവം
ஹிહિં📍
Font Size:
അംബാ സ്തവഃ
യാമാമനന്തി മുനയഃ പ്രകൃതിം പുരാണീം
വിദ്യേതി യാം ശ്രുതിരഹസ്യവിദോ വദന്തി ।
താമർധപല്ലവിതശങ്കരരൂപമുദ്രാം
ദേവീമനന്യശരണഃ ശരണം പ്രപദ്യേ ॥ 1 ॥
അംബ സ്തവേഷു തവ താവദകർതൃകാണി
കുണ്ഠീഭവന്തി വചസാമപി ഗുംഭനാനി ।
ഡിംഭസ്യ മേ സ്തുതിരസാവസമഞ്ജസാപി
വാത്സല്യനിഘ്നഹൃദയാം ഭവതീം ധിനോതു ॥ 2 ॥
വ്യോമേതി ബിന്ദുരിതി നാദ ഇതീന്ദുലേഖാ-
-രൂപേതി വാഗ്ഭവതനൂരിതി മാതൃകേതി ।
നിഃസ്യന്ദമാനസുഖബോധസുധാസ്വരൂപാ
വിദ്യോതസേ മനസി ഭാഗ്യവതാം ജനാനാം ॥ 3 ॥
ആവിർഭവത്പുലകസന്തതിഭിഃ ശരീരൈ-
-ര്നിഃസ്യന്ദമാനസലിലൈർനയനൈശ്ച നിത്യം ।
വാഗ്ഭിശ്ച ഗദ്ഗദപദാഭിരുപാസതേ യേ
പാദൗ തവാംബ ഭുവനേഷു ത ഏവ ധന്യാഃ ॥ 4 ॥
വക്ത്രം യദുദ്യതമഭിഷ്ടുതയേ ഭവത്യാ-
-സ്തുഭ്യം നമോ യദപി ദേവി ശിരഃ കരോതി ।
ചേതശ്ച യത്ത്വയി പരായണമംബ താനി
കസ്യാപി കൈരപി ഭവന്തി തപോവിശേഷൈഃ ॥ 5 ॥
മൂലാലവാലകുഹരാദുദിതാ ഭവാനി
നിർഭിദ്യ ഷട്സരസിജാനി തടില്ലതേവ ।
ഭൂയോഽപി തത്ര വിശസി ധ്രുവമണ്ഡലേന്ദു-
-നിഃസ്യന്ദമാനപരമാമൃതതോയരൂപാ ॥ 6 ॥
ദഗ്ധം യദാ മദനമേകമനേകധാ തേ
മുഗ്ധഃ കടാക്ഷവിധിരങ്കുരയാഞ്ചകാര ।
ധത്തേ തദാപ്രഭൃതി ദേവി ലലാടനേത്രം
സത്യം ഹ്രിയൈവ മുകുലീകൃതമിന്ദുമൗലേഃ ॥ 7 ॥
അജ്ഞാതസംഭവമനാകലിതാന്വവായം
ഭിക്ഷും കപാലിനമവാസസമദ്വിതീയം ।
പൂർവം കരഗ്രഹണമംഗലതോ ഭവത്യാഃ
ശംഭും ക ഏവ ബുബുധേ ഗിരിരാജകന്യേ ॥ 8 ॥
ചർമാംബരം ച ശവഭസ്മവിലേപനം ച
ഭിക്ഷാടനം ച നടനം ച പരേതഭൂമൗ ।
വേതാലസംഹതിപരിഗ്രഹതാ ച ശംഭോഃ
ശോഭാം ബിഭർതി ഗിരിജേ തവ സാഹചര്യാത് ॥ 9 ॥
കല്പോപസംഹരണകേലിഷു പണ്ഡിതാനി
ചണ്ഡാനി ഖണ്ഡപരശോരപി താണ്ഡവാനി ।
ആലോകനേന തവ കോമലിതാനി മാത-
-ര്ലാസ്യാത്മനാ പരിണമന്തി ജഗദ്വിഭൂത്യൈ ॥ 10 ॥
ജന്തോരപശ്ചിമതനോഃ സതി കർമസാമ്യേ
നിഃശേഷപാശപടലച്ഛിദുരാ നിമേഷാത് ।
കല്യാണി ദേശികകടാക്ഷസമാശ്രയേണ
കാരുണ്യതോ ഭവതി ശാംഭവവേദദീക്ഷാ ॥ 11 ॥
മുക്താവിഭൂഷണവതീ നവവിദ്രുമാഭാ
യച്ചേതസി സ്ഫുരസി താരകിതേവ സന്ധ്യാ ।
ഏകഃ സ ഏവ ഭുവനത്രയസുന്ദരീണാം
കന്ദർപതാം വ്രജതി പഞ്ചശരീം വിനാപി ॥ 12 ॥
യേ ഭാവയന്ത്യമൃതവാഹിഭിരംശുജാലൈ-
-രാപ്യായമാനഭുവനാമമൃതേശ്വരീം ത്വാം ।
തേ ലംഘയന്തി നനു മാതരലംഘനീയാം
ബ്രഹ്മാദിഭിഃ സുരവരൈരപി കാലകക്ഷാം ॥ 13 ॥
യഃ സ്ഫാടികാക്ഷഗുണപുസ്തകകുണ്ഡികാഢ്യാം
വ്യാഖ്യാസമുദ്യതകരാം ശരദിന്ദുശുഭ്രാം ।
പദ്മാസനാം ച ഹൃദയേ ഭവതീമുപാസ്തേ
മാതഃ സ വിശ്വകവിതാർകികചക്രവർതീ ॥ 14 ॥
ബർഹാവതംസയുതബർബരകേശപാശാം
ഗുഞ്ജാവലീകൃതഘനസ്തനഹാരശോഭാം ।
ശ്യാമാം പ്രവാലവദനാം സുകുമാരഹസ്താം
ത്വാമേവ നൗമി ശബരീം ശബരസ്യ ജായാം ॥ 15 ॥
അർധേന കിം നവലതാലലിതേന മുഗ്ധേ
ക്രീതം വിഭോഃ പരുഷമർധമിദം ത്വയേതി ।
ആലീജനസ്യ പരിഹാസവചാംസി മന്യേ
മന്ദസ്മിതേന തവ ദേവി ജഡീ ഭവന്തി ॥ 16 ॥
ബ്രഹ്മാണ്ഡ ബുദ്ബുദകദംബകസങ്കുലോഽയം
മായോദധിർവിവിധദുഃഖതരംഗമാലഃ ।
ആശ്ചര്യമംബ ഝടിതി പ്രലയം പ്രയാതി
ത്വദ്ധ്യാനസന്തതിമഹാബഡബാമുഖാഗ്നൗ ॥ 17 ॥
ദാക്ഷായണീതി കുടിലേതി കുഹാരിണീതി
കാത്യായനീതി കമലേതി കലാവതീതി ।
ഏകാ സതീ ഭഗവതീ പരമാർഥതോഽപി
സന്ദൃശ്യസേ ബഹുവിധാ നനു നർതകീവ ॥ 18 ॥
ആനന്ദലക്ഷണമനാഹതനാമ്നി ദേശേ
നാദാത്മനാ പരിണതം തവ രൂപമീശേ ।
പ്രത്യങ്മുഖേന മനസാ പരിചീയമാനം
ശംസന്തി നേത്രസലിലൈഃ പുലകൈശ്ച ധന്യാഃ ॥ 19 ॥
ത്വം ചന്ദ്രികാ ശശിനി തിഗ്മരുചൗ രുചിസ്ത്വം
ത്വം ചേതനാസി പുരുഷേ പവനേ ബലം ത്വം ।
ത്വം സ്വാദുതാസി സലിലേ ശിഖിനി ത്വമൂഷ്മാ
നിഃസാരമേവ നിഖിലം ത്വദൃതേ യദി സ്യാത് ॥ 20 ॥
ജ്യോതീംഷി യദ്ദിവി ചരന്തി യദന്തരിക്ഷം
സൂതേ പയാംസി യദഹിർധരണീം ച ധത്തേ ।
യദ്വാതി വായുരനലോ യദുദർചിരാസ്തേ
തത്സർവമംബ തവ കേവലമാജ്ഞയൈവ ॥ 21 ॥
സങ്കോചമിച്ഛസി യദാ ഗിരിജേ തദാനീം
വാക്തർകയോസ്ത്വമസി ഭൂമിരനാമരൂപാ ।
യദ്വാ വികാസമുപയാസി യദാ തദാനീം
ത്വന്നാമരൂപഗണനാഃ സുകരാ ഭവന്തി ॥ 22 ॥
ഭോഗായ ദേവി ഭവതീം കൃതിനഃ പ്രണമ്യ
ഭ്രൂകിങ്കരീകൃതസരോജഗൃഹാഃ സഹസ്രം ।
ചിന്താമണിപ്രചയകല്പിതകേലിശൈലേ
കല്പദ്രുമോപവന ഏവ ചിരം രമന്തേ ॥ 23 ॥
ഹർതും ത്വമേവ ഭവസി ത്വദധീനമീശേ
സംസാരതാപമഖിലം ദയയാ പശൂനാം ।
വൈകർതനീ കിരണസംഹതിരേവ ശക്താ
ധർമം നിജം ശമയിതും നിജയൈവ വൃഷ്ട്യാ ॥ 24 ॥
ശക്തിഃ ശരീരമധിദൈവതമന്തരാത്മാ
ജ്ഞാനം ക്രിയാ കരണമാസനജാലമിച്ഛാ ।
ഐശ്വര്യമായതനമാവരണാനി ച ത്വം
കിം തന്ന യദ്ഭവസി ദേവി ശശാങ്കമൗലേഃ ॥ 25 ॥
ഭൂമൗ നിവൃത്തിരുദിതാ പയസി പ്രതിഷ്ഠാ
വിദ്യാഽനലേ മരുതി ശാന്തിരതീവകാന്തിഃ ।
വ്യോമ്നീതി യാഃ കില കലാഃ കലയന്തി വിശ്വം
താസാം ഹി ദൂരതരമംബ പദം ത്വദീയം ॥ 26 ॥
യാവത്പദം പദസരോജയുഗം ത്വദീയം
നാംഗീകരോതി ഹൃദയേഷു ജഗച്ഛരണ്യേ ।
താവദ്വികല്പജടിലാഃ കുടിലപ്രകാരാ-
-സ്തർകഗ്രഹാഃ സമയിനാം പ്രലയം ന യാന്തി ॥ 27 ॥
നിർദേവയാനപിതൃയാനവിഹാരമേകേ
കൃത്വാ മനഃ കരണമണ്ഡലസാർവഭൗമം ।
ധ്യാനേ നിവേശ്യ തവ കാരണപഞ്ചകസ്യ
പർവാണി പാർവതി നയന്തി നിജാസനത്വം ॥ 28 ॥
സ്ഥൂലാസു മൂർതിഷു മഹീപ്രമുഖാസു മൂർതേഃ
കസ്യാശ്ചനാപി തവ വൈഭവമംബ യസ്യാഃ ।
പത്യാ ഗിരാമപി ന ശക്യത ഏവ വക്തും
സാപി സ്തുതാ കില മയേതി തിതിക്ഷിതവ്യം ॥ 29 ॥
കാലാഗ്നികോടിരുചിമംബ ഷഡധ്വശുദ്ധൗ
ആപ്ലാവനേഷു ഭവതീമമൃതൗഘവൃഷ്ടിം ।
ശ്യാമാം ഘനസ്തനതടാം ശകലീകൃതാഘാം
ധ്യായന്ത ഏവ ജഗതാം ഗുരവോ ഭവന്തി ॥ 30 ॥
വിദ്യാം പരാം കതിചിദംബരമംബ കേചി-
-ദാനന്ദമേവ കതിചിത്കതിചിച്ച മായാം ।
ത്വാം വിശ്വമാഹുരപരേ വയമാമനാമഃ
സാക്ഷാദപാരകരുണാം ഗുരുമൂർതിമേവ ॥ 31 ॥
കുവലയദലനീലം ബർബരസ്നിഗ്ധകേശം
പൃഥുതരകുചഭാരാക്രാന്തകാന്താവലഗ്നം ।
കിമിഹ ബഹുഭിരുക്തൈസ്ത്വത്സ്വരൂപം പരം നഃ
സകലജനനി മാതഃ സന്തതം സന്നിധത്താം ॥ 32 ॥
ഇതി ശ്രീകാലിദാസ വിരചിത പഞ്ചസ്തവ്യാം ചതുർഥഃ അംബാസ്തവഃ ।
Recite with devotion and pure heart
Regular practice brings spiritual benefits