घोर कष्टोद्धारण दत्त स्तोत्रम्

श्रीपाद श्रीवल्लभ त्वं सदैव

श्रीदत्तास्मान्पाहि देवाधिदेव ।

भावग्राह्य क्लेशहारिन् सुकीर्ते

घोरात्कष्टादुद्धरास्मान्नमस्ते ॥ 1 ॥

त्वं नो माता त्वं पिताऽऽप्तोऽधिपस्त्वं

त्राता योगक्षेमकृत्सद्गुरुस्त्वम् ।

त्वं सर्वस्वं नो प्रभो विश्वमूर्ते

घोरात्कष्टादुद्धरास्मान्नमस्ते ॥ 2 ॥

पापं तापं व्याधिमाधिं च दैन्यं

भीतिं क्लेशं त्वं हराशु त्वदन्यम् ।

त्रातारं नो वीक्ष्य ईशास्तजूर्ते

घोरात्कष्टादुद्धरास्मान्नमस्ते ॥ 3 ॥

नान्यस्त्राता नाऽपि दाता न भर्ता

त्वत्तो देव त्वं शरण्योऽकहर्ता ।

कुर्वात्रेयानुग्रहं पूर्णराते

घोरात्कष्टादुद्धरास्मान्नमस्ते ॥ 4 ॥

धर्मे प्रीतिं सन्मतिं देवभक्तिं

सत्सङ्गाप्तिं देहि भुक्तिं च मुक्तिम् ।

भावासक्तिं चाखिलानन्दमूर्ते

घोरात्कष्टादुद्धरास्मान्नमस्ते ॥ 5 ॥

श्लोकपञ्चकमेतद्यो लोकमङ्गलवर्धनम् ।

प्रपठेन्नियतो भक्त्या स श्रीदत्तप्रियो भवेत् ॥ 6 ॥

इति श्री मत्परमहंस परिव्राजकाचार्य श्रीमद्वासुदेवानन्दसरस्वति यति विरचितं घोर कष्टोद्धारण स्तोत्रम् ।

Recite with devotion and pure heart

Regular practice brings spiritual benefits