க்ருʼஷ்ணாவேணீபஞ்சக³ங்கா³யுதிஸ்த²ம்ʼ ஶ்ரீபாத³ம்ʼ ஶ்ரீவல்லப⁴ம்ʼ ப⁴க்தஹ்ருʼத்ஸ்த²ம் । த³த்தாத்ரேயம்ʼ பாது³காரூபிணம்ʼ தம்ʼ வந்தே³ வித்³யாம்ʼ ஶாலினீம்ʼ ஸங்க்³ருʼணந்தம் ॥ 1 ॥ உபேந்த்³ரவஜ்ராயுத⁴பூர்வதே³வை꞉ ஸபூர்வதே³வைர்முனிபி⁴ஶ்ச கீ³தம் । ந்ருʼஸிம்ʼஹஸஞ்ஜ்ஞம்ʼ நிக³மாக³மாத்³யம்ʼ க³மாக³மாத்³யந்தகரம்ʼ ப்ரபத்³யே ॥ 2 ॥ பரிஹ்ருʼதனதஜூர்தி꞉ ஸ்வீயகாமப்ரபூர்தி- -ர்ஹ்ருʼதநிஜப⁴ஜகார்தி꞉ ஸச்சிதா³னந்த³மூர்தி꞉ । ஸத³யஹ்ருʼத³யவர்தீ யோக³விச்சக்ரவர்தீ ஸ ஜயதி யதிராட் தி³ங்மாலினீ யஸ்ய கீர்தி꞉ ॥ 3 ॥ த்³ருதவிலம்பி³தகர்மவிசாரணா ப²லஸுஸித்³தி⁴ரதோ(அ)மரபா⁴க்³ஜன꞉ । அனுப⁴வத்யகமேவ தது³த்³த்⁴ருʼதௌ ஹரிரிஹாவிரபூ⁴த்பத³ரூப்யஸௌ ॥ 4 ॥ வித்³யுன்மாலாதுல்யா ஸம்பத்ப்ராங்மத்⁴யாந்தே(அ)ப்யஸ்யா ஆபத் । தத்தே தா⁴ர்யம்ʼ ஜ்யோதிர்நித்யம்ʼ த்⁴யானே மே(அ)ஸ்து ப்³ரஹ்மன் ஸத்யம் ॥ 5 ॥ த்ரித்³வாரம்ʼ தவ ப⁴வனம்ʼ ப³ஹுப்ரதீ³பம்ʼ விக்⁴னேஶாமரபதியோகி³னீமருஜ்ஜை꞉ । ஜாஹ்நவ்யாவ்ருʼதமபி⁴தோ(அ)ன்னபூர்ணயா ச ஸ்ம்ருʼத்வா மே ப⁴வதி மதி꞉ ப்ரஹர்ஷிணீயம் ॥ 6 ॥ ததிம்ʼ த்³விஜானாம்ʼ ஶிவஸோபஜாதிம்ʼ புஷ்ணாதி க்ருʼஷ்ணா(அ)த்ர விநஷ்டத்ருʼஷ்ணா । அவாக்ப்ரவாஹா(அ)னுமதாஶிவாஹா யா ஸா(அ)ஷ்டதீர்தா² ஸ்ம்ருʼதிமேது ஸார்தா² ॥ 7 ॥ கலௌ மலௌகா⁴ந்தகரம்ʼ கரஞ்ஜ- -புரே வரே ஜாதமகாமகாமம் । சராசராத்³யம்ʼ பு⁴வனாவனார்த²ம்ʼ க்ஷணே க்ஷணே ஸஜ்ஜனதானதாங்க்⁴ரிம் ॥ 8 ॥ பு⁴ஜங்க³ப்ரயாதாத்³கு³ணோத்தா²தி³வாஸ்மா- -த்³ப⁴வாத்³பீ⁴த ஆக³த்ய ந த்யக்துமிச்சே²த் । ந்ருʼஸிம்ʼஹஸ்ய வாட்யாம்ʼ ப்ரபோ⁴ ராஜதா⁴ன்யாம்ʼ ஸ யாயாத்ஸுத⁴ன்யாம்ʼ க³திம்ʼ லோகமான்யாம் ॥ 9 ॥ இதி ஶ்ரீவாஸுதே³வானந்த³ஸரஸ்வதீ விரசிதம்ʼ த³த்த பாது³காஷ்டகம் ।