godāvaryā mahānadyā uttare siṃhaparvate । supuṇye māhurapure sarvatīrthasamanvite ॥ 1 ॥ jajñe'treranasūyāyāṃ pradoṣe budhavāsare । mārgaśīrṣyāṃ mahāyogī dattātreyo digambaraḥ ॥ 2 ॥ mālāṃ kuṇḍīṃ ca ḍamaruṃ śūlaṃ śaṅkhaṃ sudarśanam । dadhānaḥ ṣaḍbhujaistryātmā yogamārgapravartakaḥ ॥ 3 ॥ bhasmoddhūlitasarvāṅgo jaṭājūṭavirājitaḥ । rudrākṣabhūṣitatanuḥ śāmbhavīmudrayā yutaḥ ॥ 4 ॥ bhaktānugrahakṛnnityaṃ pāpatāpārtibhañjanaḥ । bālonmattapiśācābhaḥ smartṛgāmī dayānidhiḥ ॥ 5 ॥ yasyāsti māhure nidrā nivāsaḥ siṃhaparvate । prātaḥ snānaṃ ca gaṅgāyāṃ dhyānam gandharvapattane ॥ 6 ॥ kurukṣetre cācamanaṃ dhūtapāpeśvare tathā । vibhūtidhāraṇaṃ prātaḥsandhyā ca karahāṭake ॥ 7 ॥ kolāpure'sya bhikṣā ca pāñcāle'pi ca bhojanam । dinago viṭhṭhalapure tuṅgāpānaṃ dine dine ॥ 8 ॥ [tilako] purāṇaśravaṇaṃ yasya naranārāyaṇāśrame । viśrāmo sarade sāyaṃsandhyā paścimasāgare ॥ 9 ॥ [raivate] kārtavīryārjunāyādādyogardhimubhayīṃ prabhuḥ । svātmatattvaṃ ca yadave bahugurvāptamuttamam ॥ 10 ॥ ānvīkṣikīmalarkāya prahlādāya tagīyate । [ca dhīmate] āyūrājāya ca varān sādhyebhyo mokṣasādhanam ॥ 11 ॥ mantrāṃśca viṣṇudattāya somakāntāya karma ca । sa evāvirabhūdbhūyaḥ pūrvārṇavasamīpataḥ ॥ 12 ॥ bhādre māsi site pakṣe caturthyāṃ rājaviprataḥ । sumatyāṃ prāksindhutīre ramye pīṭhāpure vare ॥ 13 ॥ ya ācāravyavahṛtiprāyaścittopadeśakṛt । nijāgrajāvandhapaṅgū vilokya pravrajan sudhīḥ ॥ 14 ॥ mātāpitrormude dṛṣṭiṃ gatiṃ tābhyāmupānayat । mahīṃ pradakṣiṇīkṛtya gokarṇe tryabdamāvasan ॥ 15 ॥ tataḥ kṛṣṇātaṭaṃ prāpya martukāmāṃ saputrakām । nivartya brāhmaṇīṃ mandaṃ pradoṣaṃ vratamādiśat ॥ 16 ॥ tatputraṃ vibudhaṃ kṛtvā tasyā janmāntare prabhuḥ । putro bhūtvā naraharināmako deśa uttare ॥ 17 ॥ kāñcane nagare'pyambāmānayadvipado vibhuḥ । māsi pauṣe site pakṣe dvitīyāyāṃ śanerdine ॥ 18 ॥ jātamātro'pi coṅkāraṃ papāṭhāthāpi mūkavat । saptābdān līlayā sthitvā nānākautukakṛt prabhuḥ ॥ 19 ॥ upanīto'paṭhadvedān saptame vatsare svayam । āśvāsya jananīṃ putradvayadānena bodhataḥ ॥ 20 ॥ kāśīṃ gatvā'ṣṭāṅgayogābhyāsī kṛṣṇasarasvatīm । kṛtvā guruṃ yatirbhūtvā vedārthān samprakāśya ca ॥ 21 ॥ luptasannyāsidharmaṃ ca tene turyāśramaṃ bhuvi । meruṃ pradakṣiṇīkṛtya śiṣyān kṛtvā'pi bhūriśaḥ ॥ 22 ॥ pitṛbhyāṃ darśanaṃ datvā dvijaṃ śūlarujārditam । kṛtvā'nāmayamāśvāsya sāyan devaṃ mahāmatim ॥ 23 ॥ abdaṃ sthitvā vaidyanāthakṣetre kṛṣṇātaṭe tataḥ । bhillavāṭyāṃ caturmāsān vibhurgatvā tato'grataḥ ॥ 24 ॥ nṛsiṃhavāṭikākṣetre dvādaśābdān vasan sudhīḥ । tatra sthitvā'pi gandharvapurametyāvasan maṭhe ॥ 25 ॥ jīvayitvā mṛtān dugdhvā vandhyāṃ ca mahiṣīṃ hariḥ । viśvarūpaṃ darśayitvā yataye viśvanāṭakaḥ ॥ 26 ॥ bahvīramānuṣīrlīlāḥ kṛtvā gupto'pi tatra ca । ya āste bhagavān dattaḥ so'smān rakṣatu sarvadā ॥ 27 ॥ yā saptaviṃśatiślokaiḥ kṛtā nakṣatramālikā । tadbhaktebhyo'rpitā bhaktābhinnaśrīdattatuṣṭaye ॥ 28 ॥ dvādaśyāmāśvine kṛṣṇe śrīpādasyotsavo mahān । māghe kṛṣṇe pratipadi narasiṃhaprabhostathā ॥ 29 ॥ iti śrī vāsudevānandasarasvatīviracitā nakṣatra mālikā sampūrṇā ।