हैंహైHaindavamஹிહિં
📍
Font Size:
దత్త నక్షత్రమాలికా
గోదావర్యా మహానద్యా ఉత్తరే సింహపర్వతే ।
సుపుణ్యే మాహురపురే సర్వతీర్థసమన్వితే ॥ 1 ॥
జజ్ఞేఽత్రేరనసూయాయాం ప్రదోషే బుధవాసరే ।
మార్గశీర్ష్యాం మహాయోగీ దత్తాత్రేయో దిగంబరః ॥ 2 ॥
మాలాం కుండీం చ డమరుం శూలం శంఖం సుదర్శనం ।
దధానః షడ్భుజైస్త్ర్యాత్మా యోగమార్గప్రవర్తకః ॥ 3 ॥
భస్మోద్ధూలితసర్వాంగో జటాజూటవిరాజితః ।
రుద్రాక్షభూషితతనుః శాంభవీముద్రయా యుతః ॥ 4 ॥
భక్తానుగ్రహకృన్నిత్యం పాపతాపార్తిభంజనః ।
బాలోన్మత్తపిశాచాభః స్మర్తృగామీ దయానిధిః ॥ 5 ॥
యస్యాస్తి మాహురే నిద్రా నివాసః సింహపర్వతే ।
ప్రాతః స్నానం చ గంగాయాం ధ్యానం గంధర్వపత్తనే ॥ 6 ॥
కురుక్షేత్రే చాచమనం ధూతపాపేశ్వరే తథా ।
విభూతిధారణం ప్రాతఃసంధ్యా చ కరహాటకే ॥ 7 ॥
కోలాపురేఽస్య భిక్షా చ పాంచాలేఽపి చ భోజనం ।
దినగో విఠ్ఠలపురే తుంగాపానం దినే దినే ॥ 8 ॥ [తిలకో]
పురాణశ్రవణం యస్య నరనారాయణాశ్రమే ।
విశ్రామో సరదే సాయంసంధ్యా పశ్చిమసాగరే ॥ 9 ॥ [రైవతే]
కార్తవీర్యార్జునాయాదాద్యోగర్ధిముభయీం ప్రభుః ।
స్వాత్మతత్త్వం చ యదవే బహుగుర్వాప్తముత్తమం ॥ 10 ॥
ఆన్వీక్షికీమలర్కాయ ప్రహ్లాదాయ తగీయతే । [చ ధీమతే]
ఆయూరాజాయ చ వరాన్ సాధ్యేభ్యో మోక్షసాధనం ॥ 11 ॥
మంత్రాంశ్చ విష్ణుదత్తాయ సోమకాంతాయ కర్మ చ ।
స ఏవావిరభూద్భూయః పూర్వార్ణవసమీపతః ॥ 12 ॥
భాద్రే మాసి సితే పక్షే చతుర్థ్యాం రాజవిప్రతః ।
సుమత్యాం ప్రాక్సింధుతీరే రమ్యే పీఠాపురే వరే ॥ 13 ॥
య ఆచారవ్యవహృతిప్రాయశ్చిత్తోపదేశకృత్ ।
నిజాగ్రజావంధపంగూ విలోక్య ప్రవ్రజన్ సుధీః ॥ 14 ॥
మాతాపిత్రోర్ముదే దృష్టిం గతిం తాభ్యాముపానయత్ ।
మహీం ప్రదక్షిణీకృత్య గోకర్ణే త్ర్యబ్దమావసన్ ॥ 15 ॥
తతః కృష్ణాతటం ప్రాప్య మర్తుకామాం సపుత్రకాం ।
నివర్త్య బ్రాహ్మణీం మందం ప్రదోషం వ్రతమాదిశత్ ॥ 16 ॥
తత్పుత్రం విబుధం కృత్వా తస్యా జన్మాంతరే ప్రభుః ।
పుత్రో భూత్వా నరహరినామకో దేశ ఉత్తరే ॥ 17 ॥
కాంచనే నగరేఽప్యంబామానయద్విపదో విభుః ।
మాసి పౌషే సితే పక్షే ద్వితీయాయాం శనేర్దినే ॥ 18 ॥
జాతమాత్రోఽపి చోంకారం పపాఠాథాపి మూకవత్ ।
సప్తాబ్దాన్ లీలయా స్థిత్వా నానాకౌతుకకృత్ ప్రభుః ॥ 19 ॥
ఉపనీతోఽపఠద్వేదాన్ సప్తమే వత్సరే స్వయం ।
ఆశ్వాస్య జననీం పుత్రద్వయదానేన బోధతః ॥ 20 ॥
కాశీం గత్వాఽష్టాంగయోగాభ్యాసీ కృష్ణసరస్వతీం ।
కృత్వా గురుం యతిర్భూత్వా వేదార్థాన్ సంప్రకాశ్య చ ॥ 21 ॥
లుప్తసన్న్యాసిధర్మం చ తేనే తుర్యాశ్రమం భువి ।
మేరుం ప్రదక్షిణీకృత్య శిష్యాన్ కృత్వాఽపి భూరిశః ॥ 22 ॥
పితృభ్యాం దర్శనం దత్వా ద్విజం శూలరుజార్దితం ।
కృత్వాఽనామయమాశ్వాస్య సాయన్ దేవం మహామతిం ॥ 23 ॥
అబ్దం స్థిత్వా వైద్యనాథక్షేత్రే కృష్ణాతటే తతః ।
భిల్లవాట్యాం చతుర్మాసాన్ విభుర్గత్వా తతోఽగ్రతః ॥ 24 ॥
నృసింహవాటికాక్షేత్రే ద్వాదశాబ్దాన్ వసన్ సుధీః ।
తత్ర స్థిత్వాఽపి గంధర్వపురమేత్యావసన్ మఠే ॥ 25 ॥
జీవయిత్వా మృతాన్ దుగ్ధ్వా వంధ్యాం చ మహిషీం హరిః ।
విశ్వరూపం దర్శయిత్వా యతయే విశ్వనాటకః ॥ 26 ॥
బహ్వీరమానుషీర్లీలాః కృత్వా గుప్తోఽపి తత్ర చ ।
య ఆస్తే భగవాన్ దత్తః సోఽస్మాన్ రక్షతు సర్వదా ॥ 27 ॥
యా సప్తవింశతిశ్లోకైః కృతా నక్షత్రమాలికా ।
తద్భక్తేభ్యోఽర్పితా భక్తాభిన్నశ్రీదత్తతుష్టయే ॥ 28 ॥
ద్వాదశ్యామాశ్వినే కృష్ణే శ్రీపాదస్యోత్సవో మహాన్ ।
మాఘే కృష్ణే ప్రతిపది నరసింహప్రభోస్తథా ॥ 29 ॥
ఇతి శ్రీ వాసుదేవానందసరస్వతీవిరచితా నక్షత్ర మాలికా సంపూర్ణా ।
Recite with devotion and pure heart
Regular practice brings spiritual benefits