പരാനന്ദമയോ വിഷ്ണുർഹൃത്സ്ഥോ വേദ്യോപ്യതീന്ദ്രിയഃ । സദാ സമ്പൂജ്യതേ ഭക്തൈർഭഗവാൻ ഭക്തിഭാവനഃ ॥ 1 ॥ അചിന്ത്യസ്യ കുതോ ധ്യാനം കൂടസ്ഥാവാഹനം കുതഃ । ക്വാസനം വിശ്വസംസ്ഥസ്യ പാദ്യം പൂതാത്മനഃ കുതഃ ॥ 2 ॥ ക്വാനർഘോരുക്രമസ്യാർഘ്യം വിഷ്ണോരാചമനം കുതഃ । നിർമലസ്യ കുതഃ സ്നാനം ക്വ നിരാവരണേംബരം ॥ 3 ॥ സ്വസൂത്രസ്യ കുതഃ സൂത്രം നിർമലസ്യ ച ലേപനം । നിസ്തൃഷഃ സുമനോഭിഃ കിം കിമക്ലേദ്യസ്യ ധൂപതഃ ॥ 4 ॥ സ്വപ്രകാശസ്യ ദീപൈഃ കിം കിം ഭക്ഷ്യാദ്യൈർജഗദ്ഭൃതഃ । കിം ദേയം പരിതൃപ്തസ്യ വിരാജഃ ക്വ പ്രദക്ഷിണാഃ ॥ 5 ॥ കിമനന്തസ്യ നതിഭിഃ സ്തൗതി കോ വാഗഗോചരം । അന്തർബഹിഃ പ്രപൂർണസ്യ കഥമുദ്വാസനം ഭവേത് ॥ 6 ॥ സർവതോഽപീത്യസംഭാവ്യോ ഭാവ്യതേ ഭക്തിഭാവനഃ । സേവ്യസേവകഭാവേന ഭക്തൈർലീലാനൃവിഗ്രഹഃ ॥ 7 ॥ തവേശാതീന്ദ്രിയസ്യാപി പാരമ്പര്യാശ്രുതാം തനും । പ്രകല്പ്യാശ്മാദാവർചന്തി പ്രാർചയേഽർചാം മനോമയീം ॥ 8 ॥ കലസുശ്ലോകഗീതേന ഭഗവൻ ദത്ത ജാഗൃഹി । ഭക്തവത്സല സാമീപ്യം കുരു മേ മാനസാർചനേ ॥ 9 ॥ ശ്രീദത്തം ഖേചരീമുദ്രാമുദ്രിതം യോഗിസദ്ഗുരും । സിദ്ധാസനസ്ഥം ധ്യായേഽഭീവരപ്രദകരം ഹരിം ॥ 10 ॥ ദത്താത്രേയാഹ്വയാമ്യത്ര പരിവാരൈഃ സഹാർചനേ । ശ്രദ്ധാഭക്ത്യേശ്വരാഗച്ഛ ധ്യാതധാമ്നാഞ്ജസാ വിഭോ ॥ 11 ॥ സൗവർണം രത്നജഡിതം കല്പിതം ദേവതാമയം । രമ്യം സിംഹാസനം ദത്ത തത്രോപവിശ യന്ത്രിതേ ॥ 12 ॥ പാദ്യം ചന്ദനകർപൂരസുരഭി സ്വാദു വാരി തേ । ഗൃഹാണ കല്പിതം തേന ദത്താംഘ്രീ ക്ഷാലയാമി തേ ॥ 13 ॥ ഗന്ധാബ്ജതുലസീബില്വശമീപത്രാക്ഷതാന്വിതം । സാംബ്വർഘ്യം സ്വർണപാത്രേണ കല്പിതം ദത്ത ഗൃഹ്യതാം ॥ 14 ॥ സുസ്വാദ്വാചമനീയാംബു ഹൈമപാത്രേണ കല്പിതം । തുഭ്യമാചമ്യതാം ദത്ത മധുപർകം ഗൃഹാണ ച ॥ 15 ॥ പുഷ്പവാസിതസത്തൈലമംഗേഷ്വാലിപ്യ ദത്ത ഭോഃ । പഞ്ചാമൃതൈശ്ച ഗാംഗാദ്ഭിഃ സ്നാനം തേ കല്പയാമ്യഹം ॥ 16 ॥ ഭക്ത്യാ ദിഗംബരാചാന്ത ജലേദം ദത്ത കല്പിതം । കാഷായപരിധാനം തദ്ഗൃഹാണൈണേയചർമ ച ॥ 17 ॥ നാനാസൂത്രധരൈതേ തേ ബ്രഹ്മസൂത്രേ പ്രകല്പിതേ । ഗൃഹാണ ദൈവതമയേ ശ്രീദത്ത നവതന്തുകേ ॥ 18 ॥ ഭൂതിമൃത്സ്നാസുകസ്തൂരീകേശരാന്വിതചന്ദനം । രത്നാക്ഷതാഃ കല്പിതാസ്ത്വാമലങ്കുർവേഽഥ ദത്ത തൈഃ ॥ 19 ॥ സച്ഛമീബില്വതുലസീപത്രൈഃ സൗഗന്ധികൈഃ സുമൈഃ । മനസാ കല്പിതൈർനാനാവിധൈർദത്താർചയാമ്യഹം ॥ 20 ॥ ലാക്ഷാസിതാഭ്രശ്രീവാസശ്രീഖണ്ഡാഗരുഗുഗ്ഗുലൈഃ । യുക്തോഽഗ്നിയോജിതോ ധൂപോ ഹൃദാ സ്വീകുരു ദത്ത തം ॥ 21 ॥ സ്വർണപാത്രേ ഗോഘൃതാക്തവർതിപ്രജ്വാലിതം ഹൃദാ । ദീപം ദത്ത സകർപൂരം ഗൃഹാണ സ്വപ്രകാശക ॥ 22 ॥ സഷഡ്രസം ഷഡ്വിധാന്നം നൈവേദ്യം ഗവ്യസമ്യുതം । കല്പിതം ഹൈമപാത്രേ തേ ഭുങ്ക്ഷ്വ ദത്താംബ്വദഃ പിബ ॥ 23 ॥ പ്രക്ഷാല്യാസ്യം കരൗ ചാദ്ഭിർദത്താചമ്യ പ്രഗൃഹ്യതാം । താംബൂലം ദക്ഷിണാം ഹൈമീം കല്പിതാനി ഫലാനി ച ॥ 24 ॥ നീരാജ്യ രത്നദീപൈസ്ത്വാം പ്രണമ്യ മനസാ ച തേ । പരിതസ്ത്വത്കഥോദ്ഘാതൈഃ കുർവേ ദത്ത പ്രദക്ഷിണാഃ ॥ 25 ॥ മന്ത്രവന്നിഹിതോ മൂർധ്നി ദത്ത തേ കുസുമാഞ്ജലിഃ । കല്പ്യന്തേ മനസാ ഗീതവാദ്യനൃത്യോപചാരകാഃ ॥ 26 ॥ പ്രേര്യമാണപ്രേരകേണ ത്വയാ ദത്തേരിതേന തേ । കൃതേയം മനസാ പൂജാ ശ്രീമംസ്തുഷ്ടോ ഭവാനയാ ॥ 27 ॥ ദത്ത മാനസതല്പേ മേ സുഖനിദ്രാം രഹഃ കുരു । രമ്യേ വ്യായതഭക്ത്യാമതൂലികാഢ്യേ സുവീജിതേ ॥ 28 ॥ ഇതി ശ്രീവാസുദേവാനന്ദസരസ്വതീ വിരചിതം ശ്രീ ദത്ത മാനസപൂജാ ।