हैंహైHaindavamஹிહિં
📍
Font Size:
ವಾಮನ ಸ್ತೋತ್ರಂ – ಅದಿತಿ ಕೃತಂ
ಅದಿತಿರುವಾಚ ।
ನಮಸ್ತೇ ದೇವದೇವೇಶ ಸರ್ವವ್ಯಾಪಿನ್ ಜನಾರ್ದನ ।
ಸತ್ತ್ವಾದಿಗುಣಭೇದೇನ ಲೋಕವ್ಯಾಪಾರಕಾರಿಣೇ ॥ 1 ॥
ನಮಸ್ತೇ ಬಹುರೂಪಾಯ ಅರೂಪಾಯ ನಮೋ ನಮಃ ।
ಸರ್ವೈಕಾದ್ಭುತರೂಪಾಯ ನಿರ್ಗುಣಾಯ ಗುಣಾತ್ಮನೇ ॥ 2 ॥
ನಮಸ್ತೇ ಲೋಕನಾಥಾಯ ಪರಮಜ್ಞಾನರೂಪಿಣೇ ।
ಸದ್ಭಕ್ತಜನವಾತ್ಸಲ್ಯಶೀಲಿನೇ ಮಂಗಲಾತ್ಮನೇ ॥ 3 ॥
ಯಸ್ಯಾವತಾರರೂಪಾಣಿ ಹ್ಯರ್ಚಯಂತಿ ಮುನೀಶ್ವರಾಃ ।
ತಮಾದಿಪುರುಷಂ ದೇವಂ ನಮಾಮೀಷ್ಟಾರ್ಥಸಿದ್ಧಯೇ ॥ 4 ॥
ಯಂ ನ ಜಾನಂತಿ ಶ್ರುತಯೋ ಯಂ ನ ಜಾಯಂತಿ ಸೂರಯಃ ।
ತಂ ನಮಾಮಿ ಜಗದ್ಧೇತುಂ ಮಾಯಿನಂ ತಮಮಾಯಿನಂ ॥ 5 ॥
ಯಸ್ಯಾವಲೋಕನಂ ಚಿತ್ರಂ ಮಾಯೋಪದ್ರವವಾರಣಂ ।
ಜಗದ್ರೂಪಂ ಜಗತ್ಪಾಲಂ ತಂ ವಂದೇ ಪದ್ಮಜಾಧವಂ ॥ 6 ॥
ಯೋ ದೇವಸ್ತ್ಯಕ್ತಸಂಗಾನಾಂ ಶಾಂತಾನಾಂ ಕರುಣಾರ್ಣವಃ ।
ಕರೋತಿ ಹ್ಯಾತ್ಮನಾ ಸಂಗಂ ತಂ ವಂದೇ ಸಂಗವರ್ಜಿತಂ ॥ 7 ॥
ಯತ್ಪಾದಾಬ್ಜಜಲಕ್ಲಿನ್ನಸೇವಾರಂಜಿತಮಸ್ತಕಾಃ ।
ಅವಾಪುಃ ಪರಮಾಂ ಸಿದ್ಧಿಂ ತಂ ವಂದೇ ಸರ್ವವಂದಿತಂ ॥ 8 ॥
ಯಜ್ಞೇಶ್ವರಂ ಯಜ್ಞಭುಜಂ ಯಜ್ಞಕರ್ಮಸುನಿಷ್ಠಿತಂ ।
ನಮಾಮಿ ಯಜ್ಞಫಲದಂ ಯಜ್ಞಕರ್ಮಪ್ರಭೋದಕಂ ॥ 9 ॥
ಅಜಾಮಿಲೋಽಪಿ ಪಾಪಾತ್ಮಾ ಯನ್ನಾಮೋಚ್ಚಾರಣಾದನು ।
ಪ್ರಾಪ್ತವಾನ್ ಪರಮಂ ಧಾಮ ತಂ ವಂದೇ ಲೋಕಸಾಕ್ಷಿಣಂ ॥ 10 ॥
ಬ್ರಹ್ಮಾದ್ಯಾ ಅಪಿ ಯೇ ದೇವಾ ಯನ್ಮಾಯಾಪಾಶಯಂತ್ರಿತಾಃ ।
ನ ಜಾನಂತಿ ಪರಂ ಭಾವಂ ತಂ ವಂದೇ ಸರ್ವನಾಯಕಂ ॥ 11 ॥
ಹೃತ್ಪದ್ಮನಿಲಯೋಽಜ್ಞಾನಾಂ ದೂರಸ್ಥ ಇವ ಭಾತಿ ಯಃ ।
ಪ್ರಮಾಣಾತೀತಸದ್ಭಾವಂ ತಂ ವಂದೇ ಜ್ಞಾನಸಾಕ್ಷಿಣಂ ॥ 12 ॥
ಯನ್ಮುಖಾದ್ಬ್ರಾಹ್ಮಣೋ ಜಾತೋ ಬಾಹುಭ್ಯಾಂ ಕ್ಷತ್ರಿಯೋಽಜನಿ ।
ತಥೈವ ಊರುತೋ ವೈಶ್ಯಃ ಪದ್ಭ್ಯಾಂ ಶೂದ್ರೋ ಅಜಾಯತ ॥ 13 ॥
ಮನಸಶ್ಚಂದ್ರಮಾ ಜಾತೋ ಜಾತಃ ಸೂರ್ಯಶ್ಚ ಚಕ್ಷುಷಃ ।
ಮುಖಾದಿಂದ್ರಶ್ಚಾಽಗ್ನಿಶ್ಚ ಪ್ರಾಣಾದ್ವಾಯುರಜಾಯತ ॥ 14 ॥
ತ್ವಮಿಂದ್ರಃ ಪವನಃ ಸೋಮಸ್ತ್ವಮೀಶಾನಸ್ತ್ವಮಂತಕಃ ।
ತ್ವಮಗ್ನಿರ್ನಿರೃತಿಶ್ಚೈವ ವರುಣಸ್ತ್ವಂ ದಿವಾಕರಃ ॥ 15 ॥
ದೇವಾಶ್ಚ ಸ್ಥಾವರಾಶ್ಚೈವ ಪಿಶಾಚಾಶ್ಚೈವ ರಾಕ್ಷಸಾಃ ।
ಗಿರಯಃ ಸಿದ್ಧಗಂಧರ್ವಾ ನದ್ಯೋ ಭೂಮಿಶ್ಚ ಸಾಗರಾಃ ॥ 16 ॥
ತ್ವಮೇವ ಜಗತಾಮೀಶೋ ಯನ್ನಾಮಾಸ್ತಿ ಪರಾತ್ಪರಃ ।
ತ್ವದ್ರೂಪಮಖಿಲಂ ತಸ್ಮಾತ್ಪುತ್ರಾನ್ಮೇ ಪಾಹಿ ಶ್ರೀಹರೇ ॥ 17 ॥
ಇತಿ ಸ್ತುತ್ವಾ ದೇವಧಾತ್ರೀ ದೇವಂ ನತ್ವಾ ಪುನಃ ಪುನಃ ।
ಉವಾಚ ಪ್ರಾಂಜಲಿರ್ಭೂತ್ವಾ ಹರ್ಷಾಶ್ರುಕ್ಷಾಲಿತಸ್ತನೀ ॥ 18 ॥
ಅನುಗ್ರಾಹ್ಯಾಸ್ಮಿ ದೇವೇಶ ಹರೇ ಸರ್ವಾದಿಕಾರಣ ।
ಅಕಂಟಕಶ್ರಿಯಂ ದೇಹಿ ಮತ್ಸುತಾನಾಂ ದಿವೌಕಸಾಂ ॥ 19 ॥
ಅಂತರ್ಯಾಮಿನ್ ಜಗದ್ರೂಪ ಸರ್ವಭೂತ ಪರೇಶ್ವರ ।
ತವಾಜ್ಞಾತಂ ಕಿಮಸ್ತೀಹ ಕಿಂ ಮಾಂ ಮೋಹಯಸಿ ಪ್ರಭೋ ॥ 20 ॥
ತಥಾಪಿ ತವ ವಕ್ಷ್ಯಾಮಿ ಯನ್ಮೇ ಮನಸಿ ವರ್ತತೇ ।
ವೃಥಾಪುತ್ರಾಸ್ಮಿ ದೇವೇಶ ರಕ್ಷೋಭಿಃ ಪರಿಪೀಡಿತಾ ॥ 21 ॥
ಏತನ್ನ ಹಂತುಮಿಚ್ಛಾಮಿ ಮತ್ಸುತಾ ದಿತಿಜಾ ಯತಃ ।
ತಾನಹತ್ವಾ ಶ್ರಿಯಂ ದೇಹಿ ಮತ್ಸುತಾನಾಮುವಾಚ ಸಾ ॥ 22 ॥
ಇತ್ಯುಕ್ತೋ ದೇವದೇವಸ್ತು ಪುನಃ ಪ್ರೀತಿಮುಪಾಗತಃ ।
ಉವಾಚ ಹರ್ಷಯನ್ಸಾಧ್ವೀಂ ಕೃಪಯಾಽಭಿ ಪರಿಪ್ಲುತಃ ॥ 23 ॥
ಶ್ರೀ ಭಗವಾನುವಾಚ ।
ಪ್ರೀತೋಽಸ್ಮಿ ದೇವಿ ಭದ್ರಂ ತೇ ಭವಿಷ್ಯಾಮಿ ಸುತಸ್ತವ ।
ಯತಃ ಸಪತ್ನೀತನಯೇಷ್ವಪಿ ವಾತ್ಸಲ್ಯಶಾಲಿನೀ ॥ 24 ॥
ತ್ವಯಾ ಚ ಮೇ ಕೃತಂ ಸ್ತೋತ್ರಂ ಪಠಂತಿ ಭುವಿ ಮಾನವಾಃ ।
ತೇಷಾಂ ಪುತ್ರೋ ಧನಂ ಸಂಪನ್ನ ಹೀಯಂತೇ ಕದಾಚನ ।
ಅಂತೇ ಮತ್ಪದಮಾಪ್ನೋತಿ ಯದ್ವಿಷ್ಣೋಃ ಪರಮಂ ಶುಭಂ ॥ 25 ॥
ಇತಿ ಶ್ರೀಪದ್ಮಪುರಾಣೇ ಶ್ರೀ ವಾಮನ ಸ್ತೋತ್ರಂ ।
Recite with devotion and pure heart
Regular practice brings spiritual benefits