కూర్మ స్తోత్రం

మునయః ఊచుః ।

నమస్తే కూర్మరూపాయ విష్ణవే పరమాత్మనే ।

నారాయణాయ విశ్వాయ వాసుదేవాయ తే నమః ॥ 1 ॥

నమో నమస్తే కృష్ణాయ గోవిందాయ నమో నమః ।

మాధవాయ నమస్తుభ్యం నమో యజ్ఞేశ్వరాయ చ ॥ 2 ॥

సహస్రశిరసే తుభ్యం సహస్రాక్షాయ తే నమః ।

నమః సహస్రహస్తాయ సహస్రచరణాయ చ ॥ 3 ॥

ఓం నమో జ్ఞానరూపాయ పరమాత్మస్వరూపిణే ।

ఆనందాయ నమస్తుభ్యం మాయాతీతాయ తే నమః ॥ 4 ॥

నమో గూఢశరీరాయ నిర్గుణాయ నమోఽస్తు తే ।

పురుషాయ పురాణాయ సత్తామాత్రస్వరూపిణే ॥ 5 ॥

నమః సాంఖ్యాయ యోగాయ కేవలాయ నమోఽస్తు తే ।

ధర్మజ్ఞానాధిగమ్యాయ నిష్కలాయ నమోఽస్తు తే ॥ 6 ॥

నమస్తే వ్యోమరూపాయ మహాయోగేశ్వరాయ చ ।

పరావరాణాం ప్రభవే వేదవేద్యాయ తే నమః ॥ 7 ॥

నమో బుద్ధాయ శుద్ధాయ నమో యుక్తాయ హేతవే ।

నమో నమో నమస్తుభ్యం మాయినే వేధసే నమః ॥ 8 ॥

నమోఽస్తు తే వరాహాయ నారసింహాయ తే నమః ।

వామనాయ నమస్తుభ్యం హృషీకేశాయ తే నమః ॥ 9 ॥

స్వర్గాపవర్గదాత్రే చ నమోఽప్రతిహతాత్మనే ।

నమో యోగాధిగమ్యాయ యోగినే యోగదాయినే ॥ 10 ॥

దేవానాం పతయే తుభ్యం దేవార్తిశమనాయ తే ।

భగవంస్త్వత్ప్రసాదేన సర్వసంసారనాశనం ॥ 11 ॥

అస్మాభిర్విదితం జ్ఞానం యజ్జ్ఞాత్వామృతమశ్నుతే ।

శ్రుతాస్తు వివిధా ధర్మా వంశా మన్వంతరాణి చ ॥ 12 ॥

సర్గశ్చ ప్రతిసర్గశ్చ బ్రహ్మాండస్యాస్య విస్తరః ।

త్వం హి సర్వజగత్సాక్షీ విశ్వో నారాయణః పరః ।

త్రాతుమర్హస్యనంతాత్మా త్వామేవ శరణం గతాః ॥ 13 ॥

ఇతి కూర్మపురాణే ఉత్తరభాగే షట్చత్వారింశోఽధ్యాయే మునిభిః కృతం శ్రీ కూర్మ స్తోత్రం ।

Recite with devotion and pure heart

Regular practice brings spiritual benefits