పార్వత్యువాచ । నమస్తేఽస్తు త్రయీనాథ పరమానందకారక । కవచం దక్షిణామూర్తేః కృపయా వద మే ప్రభో ॥ 1 ॥ ఈశ్వర ఉవాచ । వక్ష్యేఽహం దేవదేవేశి దక్షిణామూర్తిరవ్యయం । కవచం సర్వపాపఘ్నం వేదాంతజ్ఞానగోచరం ॥ 2 ॥ అణిమాది మహాసిద్ధివిధానచతురం శుభం । వేదశాస్త్రపురాణాని కవితా తర్క ఏవ చ ॥ 3 ॥ బహుధా దేవి జాయంతే కవచస్య ప్రభావతః । ఋషిర్బ్రహ్మా సముద్దిష్టశ్ఛందోఽనుష్టుబుదాహృతం ॥ 4 ॥ దేవతా దక్షిణామూర్తిః పరమాత్మా సదాశివః । బీజం వేదాదికం చైవ స్వాహా శక్తిరుదాహృతా । సర్వజ్ఞత్వేఽపి దేవేశి వినియోగం ప్రచక్షతే ॥ 5 ॥ ధ్యానం – అద్వంద్వనేత్రమమలేందుకలావతంసం హంసావలంబిత సమాన జటాకలాపం । ఆనీలకంఠముపకంఠమునిప్రవీరాన్ అధ్యాపయంతమవలోకయ లోకనాథం ॥ కవచం – ఓం । శిరో మే దక్షిణామూర్తిరవ్యాత్ ఫాలం మహేశ్వరః । దృశౌ పాతు మహాదేవః శ్రవణే చంద్రశేఖరః ॥ 1 ॥ కపోలౌ పాతు మే రుద్రో నాసాం పాతు జగద్గురుః । ముఖం గౌరీపతిః పాతు రసనాం వేదరూపధృత్ ॥ 2 ॥ దశనాం త్రిపురధ్వంసీ చోష్ఠం పన్నగభూషణః । అధరం పాతు విశ్వాత్మా హనూ పాతు జగన్మయః ॥ 3 ॥ చుబుకం దేవదేవస్తు పాతు కంఠం జటాధరః । స్కంధౌ మే పాతు శుద్ధాత్మా కరౌ పాతు యమాంతకః ॥ 4 ॥ కుచాగ్రం కరమధ్యం చ నఖరాన్ శంకరః స్వయం । హృన్మే పశుపతిః పాతు పార్శ్వే పరమపూరుషః ॥ 5 ॥ మధ్యమం పాతు శర్వో మే నాభిం నారాయణప్రియః । కటిం పాతు జగద్భర్తా సక్థినీ క్ష్చ మృడః స్వయం ॥ 6 ॥ కృత్తివాసాః స్వయం గుహ్యామూరూ పాతు పినాకధృత్ । జానునీ త్ర్యంబకః పాతు జంఘే పాతు సదాశివః ॥ 7 ॥ స్మరారిః పాతు మే పాదౌ పాతు సర్వాంగమీశ్వరః । ఇతీదం కవచం దేవి పరమానందదాయకం ॥ 8 ॥ జ్ఞానవాగర్థదం వీర్యమణిమాదివిభూతిదం । ఆయురారోగ్యమైశ్వర్యమపమృత్యుభయాపహం ॥ 9 ॥ ప్రాతః కాలే శుచిర్భూత్వా త్రివారం సర్వదా జపేత్ । నిత్యం పూజాసమాయుక్తః సంవత్సరమతంద్రితః ॥ 10 ॥ జపేత్ త్రిసంధ్యం యో విద్వాన్ వేదశాస్త్రార్థపారగః । గద్యపద్యైస్తథా చాపి నాటకాః స్వయమేవ హి । నిర్గచ్ఛంతి ముఖాంభోజాత్సత్యమేతన్న సంశయః ॥ 11 ॥ ఇతి రుద్రయామలే శ్రీ దక్షిణామూర్తి కవచం ॥