śrīdevyuvāca । bhagavan devadeveśa mantrārṇastavamuttamam । dakṣiṇāmūrtidevasya kṛpayā vada me prabho ॥ 1 ॥ śrīmahādeva uvāca । sādhu pṛṣṭaṃ mahādevi sarvalokahitāya te । vakṣyāmi paramaṃ guhyaṃ mantrārṇastavamuttamam ॥ 2 ॥ ṛṣiśchando devatāṅganyāsādikamanuttamam । mūlamantrapadasyāpi draṣṭavyaṃ sakalaṃ hi tat ॥ 3 ॥ dhyānam – bhasmavyāpāṇḍurāṅgaḥ śaśiśakaladharo jñānamudrākṣamālā- -vīṇāpustairvirājatkarakamaladharo yogapaṭṭābhirāmaḥ । vyākhyāpīṭhe niṣaṇṇe munivaranikaraiḥ sevyamānaḥ prasannaḥ savyālaḥ kṛttivāsāḥ satatamavatu no dakṣiṇāmūrtirīśaḥ ॥ 4 ॥ iti dhyātvā mahādevaṃ mantrārṇastavamuttamam । japet trisandhyaṃ niyato bhasmarudrākṣabhūṣitaḥ ॥ 5 ॥ stotram – om । oṅkārācalasiṃhendraḥ oṅkārodyānakokilaḥ । oṅkāranīḍaśukarāḍoṅkārāraṇyakuñjaraḥ ॥ 6 ॥ nagarājasutājānirnagarājanijālayaḥ । navamāṇikyamālāḍhyo navacandraśikhāmaṇiḥ ॥ 7 ॥ nanditāśeṣamaunīndro nandīśādimadeśikaḥ । mohānalasudhādhāro mohāmbujasudhākaraḥ ॥ 8 ॥ mohāndhakārataraṇirmohotpalanabhomaṇiḥ । bhaktajñānābdhiśītāṃśuḥ bhaktājñānatṛṇānalaḥ ॥ 9 ॥ bhaktāmbhojasahasrāṃśuḥ bhaktakekighanāghanaḥ । bhaktakairavarākenduḥ bhaktakokadivākaraḥ ॥ 10 ॥ gajānanādisampūjyo gajacarmojjvalākṛtiḥ । gaṅgādhavaladivyāṅgo gaṅgābhaṅgalasajjaṭaḥ ॥ 11 ॥ gaganāmbarasaṃvīto gaganāmuktamūrdhajaḥ । vadanābjajitaśrīśca vadanendusphuraddiśaḥ ॥ 12 ॥ varadānaikanipuṇo varavīṇojjvalatkaraḥ । vanavāsasamullāsī vanalīlaikalolupaḥ ॥ 13 ॥ tejaḥpuñjaghanākāro tejasāmavibhāsakaḥ । tejaḥprado vidheyānāṃ tejomayanijāśramaḥ ॥ 14 ॥ damitānaṅgasaṅgrāmo darahāsojjvalanmukhaḥ । dayārasasudhāsindhuḥ daridradhanaśevadhiḥ ॥ 15 ॥ kṣīrendusphaṭikākāraḥ kṣitīndramakuṭojjvalaḥ । kṣīropahārarasikaḥ kṣipraiśvaryaphalapradaḥ ॥ 16 ॥ nānābharaṇamuktāṅgo nārīsammohanākṛtiḥ । nādabrahmarasāsvādī nāgabhūṣaṇabhūṣitaḥ ॥ 17 ॥ mūrtininditakandarpo mūrtāmūrtajagadvapuḥ । mūkājñānatamobhānuḥ mūrtimatkalpapādapaḥ ॥ 18 ॥ taruṇādityasaṅkāśaḥ tantrīvādanatatparaḥ । tarumūlaikanilayaḥ taptajāmbūnadaprabhaḥ ॥ 19 ॥ tattvapustollasatpāṇiḥ tapanoḍupalocanaḥ । yamasannutasatkīrtiḥ yamasamyamasamyutaḥ ॥ 20 ॥ yatirūpadharo maunamunīndropāsyavigrahaḥ । mandārahāraruciro madanāyutasundaraḥ ॥ 21 ॥ mandasmitalasadvaktro madhurādharapallavaḥ । mañjīramañjupādābjo maṇipaṭṭolasatkaṭiḥ ॥ 22 ॥ hastāṅkuritacinmudro haṃsayogapaṭūttamaḥ । haṃsajapyākṣamālāḍhyo haṃsendrārādhyapādukaḥ ॥ 23 ॥ meruśṛṅgasamullāsī meghaśyāmamanoharaḥ । meghāṅkurālavālāgryo medhāpakvaphaladrumaḥ ॥ 24 ॥ dhārmikāntakṛtāvāso dharmamārgapravartakaḥ । dhāmatrayanijārāmo dharottamamahārathaḥ ॥ 25 ॥ prabodhodāradīpaśrīḥ prakāśitajagattrayaḥ । prajñācandraśilācandraḥ prajñāmaṇilasatkaraḥ ॥ 26 ॥ jñānihṛdbhāsamānātmā jñātṝṇāmavidūragaḥ । jñānāyādṛtadivyāṅgo jñātijātikulātigaḥ ॥ 27 ॥ prapannapārijātāgryaḥ praṇatārtyabdhibāḍabaḥ । pramāṇabhūto bhūtānāṃ prapañcahitakārakaḥ ॥ 28 ॥ yamisattamasaṃsevyo yakṣageyātmavaibhavaḥ । yajñādhidevatāmūrtiḥ yajamānavapurdharaḥ ॥ 29 ॥ chatrādhipadigīśaśca chatracāmarasevitaḥ । chandaḥ śāstrādinipuṇaśchalajātyādidūragaḥ ॥ 30 ॥ svābhāvikasukhaikātmā svānubhūtirasodadhiḥ । svārājyasampadadhyakṣaḥ svātmārāmamahāmatiḥ ॥ 31 ॥ hāṭakābhajaṭājūṭo hāsodastārimaṇḍalaḥ । hālāhalojjvalagalo hārāyitabhujaṅgamaḥ ॥ 32 ॥ iti śrī dakṣiṇāmūrti mantrārṇāṣṭottaraśatanāma stotram ।