हैंహైHaindavamஹிહિં
📍
Font Size:
ബടുക ഭൈരവ സ്തവരാജഃ
കൈലാസശിഖരാസീനം ദേവദേവം ജഗദ്ഗുരും ।
ശങ്കരം പരിപപ്രച്ഛ പാർവതീ പരമേശ്വരം ॥ 1
ശ്രീപാർവത്യുവാച –
ഭഗവൻ സർവധർമജ്ഞ സർവശാസ്ത്രാഗമാദിഷു ।
ആപദുദ്ധാരണം മന്ത്രം സർവസിദ്ധിപ്രദം നൃണാം ॥ 2
സർവേഷാം ചൈവ ഭൂതാനാം ഹിതാർഥം വാഞ്ഛിതം മയാ ।
വിശേഷതസ്തു രാജ്ഞാം വൈ ശാന്തിപുഷ്ടിപ്രസാധനം ॥ 3
അംഗന്യാസ കരന്യാസ ബീജന്യാസ സമന്വിതം ।
വക്തുമർഹസി ദേവേശ മമ ഹർഷവിവർധനം ॥ 4
ശ്രീഭഗവാനുവാച –
ശൃണു ദേവി മഹാമന്ത്രമാപദുദ്ധാരഹേതുകം ।
സർവദുഃഖപ്രശമനം സർവശത്രുനിബർഹണം ॥ 5
അപസ്മാരാദിരോഗാണാം ജ്വരാദീനാം വിശേഷതഃ ।
നാശനം സ്മൃതിമാത്രേണ മന്ത്രരാജമിമം പ്രിയേ ॥ 6
ഗ്രഹരാജഭയാനാം ച നാശനം സുഖവർധനം ।
സ്നേഹാദ്വക്ഷ്യാമി തേ മന്ത്രം സർവസാരമിമം പ്രിയേ ॥ 7
സർവകാമാർഥദം മന്ത്രം രാജ്യഭോഗപ്രദം നൃണാം ।
പ്രണവം പൂർവമുച്ചാര്യ ദേവീ പ്രണവമുദ്ധരേത് ॥ 8
ബടുകായേതി വൈ പശ്ചാദാപദുദ്ധാരണായ ച ।
കുരു ദ്വയം തതഃ പശ്ചാദ്ബടുകായ പുനഃ ക്ഷിപേത് ॥ 9
ദേവീ പ്രണവമുദ്ധൃത്യ മന്ത്രരാജമിമം പ്രിയേ ।
മന്ത്രോദ്ധാരമിമം ദേവി ത്രൈലോക്യസ്യാപി ദുർലഭം ॥ 10
അപ്രകാശ്യമിമം മന്ത്രം സർവശക്തിസമന്വിതം ।
സ്മരണാദേവ മന്ത്രസ്യ ഭൂതപ്രേതപിശാചകാഃ ॥ 11
വിദ്രവന്തി ഭയാർതാ വൈ കാലരുദ്രാദിവ പ്രജാഃ ।
പഠേദ്വാ പാഠയേദ്വാപി പൂജയേദ്വാപി പുസ്തകം ॥ 12
നാഗ്നിചൗരഭയം വാപി ഗ്രഹരാജഭയം തഥാ ।
ന ച മാരീഭയം തസ്യ സർവത്ര സുഖവാൻ ഭവേത് ॥ 13
ആയുരാരോഗ്യമൈശ്വര്യം പുത്രപൗത്രാദിസമ്പദഃ ।
ഭവന്തി സതതം തസ്യ പുസ്തകസ്യാപി പൂജനാത് ॥ 14
ശ്രീപാർവത്യുവാച –
യ ഏഷ ഭൈരവോ നാമ ആപദുദ്ധാരകോ മതഃ ।
ത്വയാ ച കഥിതോ ദേവ ഭൈരവഃ കല്പ ഉത്തമഃ ॥ 15
തസ്യ നാമസഹസ്രാണി അയുതാന്യർബുദാനി ച ।
സാരമുദ്ധൃത്യ തേഷാം വൈ നാമാഷ്ടശതകം വദ ॥ 16
ശ്രീഭഗവാനുവാച –
യസ്തു സങ്കീർതയേദേതത് സർവദുഷ്ടനിബർഹണം ।
സർവാൻ കാമാനവാപ്നോതി സാധകഃ സിദ്ധിമേവ ച ॥ 17
ശൃണു ദേവി പ്രവക്ഷ്യാമി ഭൈരവസ്യ മഹാത്മനഃ ।
ആപദുദ്ധാരകസ്യേഹ നാമാഷ്ടശതമുത്തമം ॥ 18
സർവപാപഹരം പുണ്യം സർവാപദ്വിനിവാരകം ।
സർവകാമാർഥദം ദേവി സാധകാനാം സുഖാവഹം ॥ 19
ദേഹാംഗന്യസനം ചൈവ പൂർവം കുര്യാത് സമാഹിതഃ ।
ഭൈരവം മൂർധ്നി വിന്യസ്യ ലലാടേ ഭീമദർശനം ॥ 20
അക്ഷ്ണോർഭൂതാശ്രയം ന്യസ്യ വദനേ തീക്ഷ്ണദർശനം ।
ക്ഷേത്രപം കർണയോർമധ്യേ ക്ഷേത്രപാലം ഹൃദി ന്യസേത് ॥ 21
ക്ഷേത്രാഖ്യം നാഭിദേശേ ച കട്യാം സർവാഘനാശനം ।
ത്രിനേത്രമൂർവോർവിന്യസ്യ ജംഘയോ രക്തപാണികം ॥ 22
പാദയോർദേവദേവേശം സർവാംഗേ വടുകം ന്യസേത് ।
ഏവം ന്യാസവിധിം കൃത്വാ തദനന്തരമുത്തമം ॥ 23
നാമാഷ്ടശതകസ്യാപി ഛന്ദോഽനുഷ്ടുബുദാഹൃതം ।
ബൃഹദാരണ്യകോ നാമ ഋഷിശ്ച പരികീർതിതഃ ॥ 24
ദേവതാ കഥിതാ ചേഹ സദ്ഭിർവടുകഭൈരവഃ ।
ധർമാർഥകാമമോക്ഷേഷു വിനിയോഗഃ പ്രകീർതിതഃ ॥ 25
അഷ്ടോത്തരശതനാമ സ്തോത്രം –
ഓം ഭൈരവോ ഭൂതനാഥശ്ച ഭൂതാത്മാ ഭൂതഭാവനഃ ।
ക്ഷേത്രദഃ ക്ഷേത്രപാലശ്ച ക്ഷേത്രജ്ഞഃ ക്ഷത്രിയോ വിരാട് ॥ 26
ശ്മശാനവാസീ മാംസാശീ ഖർപരാശീ മഖാന്തകൃത് ।
രക്തപഃ പ്രാണപഃ സിദ്ധഃ സിദ്ധിദഃ സിദ്ധസേവിതഃ ॥ 27
കരാലഃ കാലശമനഃ കലാകാഷ്ഠാതനുഃ കവിഃ ।
ത്രിനേത്രോ ബഹുനേത്രശ്ച തഥാ പിംഗലലോചനഃ ॥ 28
ശൂലപാണിഃ ഖഡ്ഗപാണിഃ കങ്കാലീ ധൂമ്രലോചനഃ ।
അഭീരുർഭൈരവോ ഭീരുർഭൂതപോ യോഗിനീപതിഃ ॥ 29
ധനദോ ധനഹാരീ ച ധനപഃ പ്രതിഭാവവാൻ ।
നാഗഹാരോ നാഗകേശോ വ്യോമകേശഃ കപാലഭൃത് ॥ 30
കാലഃ കപാലമാലീ ച കമനീയഃ കലാനിധിഃ ।
ത്രിലോചനോ ജ്വലന്നേത്രസ്ത്രിശിഖീ ച ത്രിലോകപാത് ॥ 31
ത്രിവൃത്തനയനോ ഡിംഭഃ ശാന്തഃ ശാന്തജനപ്രിയഃ ।
വടുകോ വടുകേശശ്ച ഖട്വാംഗവരധാരകഃ ॥ 32
ഭൂതാധ്യക്ഷഃ പശുപതിർഭിക്ഷുകഃ പരിചാരകഃ ।
ധൂർതോ ദിഗംബരഃ സൗരിർഹരിണഃ പാണ്ഡുലോചനഃ ॥ 33
പ്രശാന്തഃ ശാന്തിദഃ ശുദ്ധഃ ശങ്കരപ്രിയബാന്ധവഃ ।
അഷ്ടമൂർതിർനിധീശശ്ച ജ്ഞാനചക്ഷുസ്തമോമയഃ ॥ 34
അഷ്ടാധാരഃ കലാധാരഃ സർപയുക്തഃ ശശീശിഖഃ ।
ഭൂധരോ ഭൂധരാധീശോ ഭൂപതിർഭൂധരാത്മകഃ ॥ 35
കങ്കാലധാരീ മുണ്ഡീ ച വ്യാലയജ്ഞോപവീതവാൻ ।
ജൃംഭണോ മോഹനഃ സ്തംഭീ മാരണഃ ക്ഷോഭണസ്തഥാ ॥ 36
ശുദ്ധനീലാഞ്ജനപ്രഖ്യദേഹോ മുണ്ഡവിഭൂഷിതഃ ।
ബലിഭുക് ബലിഭൂതാത്മാ കാമീ കാമപരാക്രമഃ ॥ 37
സർവാപത്താരകോ ദുർഗോ ദുഷ്ടഭൂതനിഷേവിതഃ ।
കാമീ കലാനിധിഃ കാന്തഃ കാമിനീവശകൃദ്വശീ ।
സർവസിദ്ധിപ്രദോ വൈദ്യഃ പ്രഭവിഷ്ണുഃ പ്രഭാവവാൻ ॥ 38
ഫലശ്രുതിഃ –
അഷ്ടോത്തരശതം നാമ ഭൈരവസ്യ മഹാത്മനഃ ।
മയാ തേ കഥിതം ദേവി രഹസ്യം സർവകാമികം ॥ 39
യ ഇദം പഠതി സ്തോത്രം നാമാഷ്ടശതമുത്തമം ।
ന തസ്യ ദുരിതം കിഞ്ചന്ന രോഗേഭ്യോ ഭയം തഥാ ।
ന ശത്രുഭ്യോ ഭയം കിഞ്ചിത് പ്രാപ്നോതി മാനവഃ ക്വചിത് ॥ 40
പാതകാനാം ഭയം നൈവ പഠേത് സ്തോത്രമനന്യധീഃ ।
മാരീഭയേ രാജഭയേ തഥാ ചൗരാഗ്നിജേ ഭയേ ॥ 41
ഔത്പാതികേ മഹാഘോരേ യഥാ ദുഃസ്വപ്നദർശനേ ।
ബന്ധനേ ച തഥാ ഘോരേ പഠേത് സ്തോത്രം സമാഹിതഃ ॥ 42
സർവേ പ്രശമനം യാന്തി ഭയാദ്ഭൈരവകീർതനാത് ।
ഏകാദശസഹസ്രം തു പുരശ്ചരണമുച്യതേ ॥ 43
ത്രിസന്ധ്യം യഃ പഠേദ്ദേവി സംവത്സരമതന്ദ്രിതഃ ।
സ സിദ്ധിം പ്രാപ്നുയാദിഷ്ടാം ദുർലഭമപി മാനുഷഃ ॥ 44
ഷണ്മാസാൻ ഭൂമികാമസ്തു സ ജപ്ത്വാ ലഭതേ മഹീം ।
രാജാ ശത്രുവിനാശായ ജപേന്മാസാഷ്ടകം പുനഃ ॥ 45
രാത്രൗ വാരത്രയം ചൈവ നാശയത്യേവ ശാത്രവാൻ ।
ജപേന്മാസത്രയം രാത്രൗ രാജാനം വശമാനയേത് ॥ 46
ധനാർഥീ ച സുതാർഥീ ച ദാരാർഥീ യസ്തു മാനവഃ ।
പഠേദ്വാരത്രയം യദ്വാ വാരമേകം തഥാ നിശി ॥ 47
ധനം പുത്രാംസ്തഥാ ദാരാൻ പ്രാപ്നുയാന്നാത്ര സംശയഃ ।
രോഗീ രോഗാത് പ്രമുച്യേത ബദ്ധോ മുച്യേത ബന്ധനാത് ॥ 48
ഭീതോ ഭയാത് പ്രമുച്യേത ദേവി സത്യം ന സംശയഃ ।
യാൻ യാൻ സമീ ഹതേ കാമാംസ്താംസ്താനാപ്നോതി നിശ്ചിതം ।
അപ്രകാശ്യമിദം ഗുഹ്യം ന ദേയം യസ്യ കസ്യചിത് ॥ 49
സത്കുലീനായ ശാന്തായ ഋജവേ ദംഭവർജിതേ ।
ദദ്യാത് സ്തോത്രമിദം പുണ്യം സർവകാമഫലപ്രദം ।
ധ്യാനം വക്ഷ്യാമി ദേവസ്യ യഥാ ധ്യാത്വാ പഠേന്നരഃ ॥ 50
ഓം ശുദ്ധസ്ഫടികസങ്കാശം സഹസ്രാദിത്യവർചസം ।
അഷ്ടബാഹും ത്രിനയനം ചതുർബാഹും ദ്വിബാഹുകം ॥ 51
ഭുജംഗമേഖലം ദേവമഗ്നിവർണശിരോരുഹം ।
ദിഗംബരം കുമാരീശം വടുകാഖ്യം മഹാബലം ॥ 52
ഖട്വാംഗമസിപാശം ച ശൂലം ചൈവ തഥാ പുനഃ ।
ഡമരും ച കപാലം ച വരദം ഭുജഗം തഥാ ॥ 53
നീലജീമൂതസങ്കാശം നീലാഞ്ജനചയപ്രഭം ।
ദംഷ്ട്രാകരാലവദനം നൂപുരാംഗദഭൂഷിതം ॥ 54
ആത്മവർണസമോപേതസാരമേയസമന്വിതം ।
ധ്യാത്വാ ജപേത് സുസംഹൃഷ്ടഃ സർവാൻ കാമാനവാപ്നുയാത് ॥ 55
ഏതച്ഛ്രുത്വാ തതോ ദേവീ നാമാഷ്ടശതമുത്തമം ।
ഭൈരവായ പ്രഹൃഷ്ടാഭൂത് സ്വയം ചൈവ മഹേശ്വരീ ॥ 56
ഇതി വിശ്വസാരോദ്ധാരതന്ത്രേ ആപദുദ്ധാരകല്പേ ഭൈരവ സ്തവരാജഃ സമാപ്തഃ ॥
Recite with devotion and pure heart
Regular practice brings spiritual benefits