athātaścākṣuṣīṁ paṭhita siddhavidyāṁ cakṣūrōgaharāṁ vyākhyāsyāmaḥ । yaccakṣūrōgāḥ sarvatō naśyanti । cakṣuṣī dīptirbhaviṣyatīti ॥ viniyōgaḥ – tasyāścākṣuṣīvidyāyāḥ ahirbudhnya r̥ṣiḥ । gāyatrī chandaḥ । sūryō dēvatā । cakṣūrōganivr̥ttayē japē viniyōgaḥ ॥ mantrāḥ- ōṁ cakṣuścakṣuścakṣustējaḥ sthirō bhava । māṁ pāhi pāhi । tvaritaṁ cakṣūrōgān śamaya śamaya । mama jātarūpaṁ tējō darśaya darśaya । yathāhaṁ andhō na syāṁ tathā kalpaya kalpaya । kalyāṇaṁ kuru kuru । yāni mama pūrvajanmōpārjitāni cakṣuḥ pratirōdhaka duṣkr̥tāni sarvāṇi nirmūlaya nirmūlaya । ōṁ namaḥ cakṣustējōdātrē divyāya bhāskarāya । ōṁ namaḥ karuṇākarāyā:’mr̥tāya । ōṁ namaḥ sūryāya । ōṁ namō bhagavatē sūryāyākṣitējasē namaḥ । khēcarāya namaḥ । mahatē namaḥ । rajasē namaḥ । tamasē namaḥ । asatō mā sadgamaya । tamasō mā jyōtirgamaya । mr̥tyōrmā amr̥taṁ gamaya । uṣṇō bhagavān śucirūpaḥ । haṁsō bhagavān śucirapratirūpaḥ । phalaśr̥tiḥ – ya imāṁ cakṣuṣmatīṁ vidyāṁ brāhmaṇō nityamadhītē na tasyākṣirōgō bhavati । na tasya kulē andhō bhavati । aṣṭau brāhmaṇān grāhayitvā vidyāsiddhirbhavati । sūryasmaraṇa – ōṁ viśvarūpaṁ ghr̥ṇinaṁ jātavēdasaṁ hiraṇmayaṁ puruṣaṁ jyōtīrūpaṁ tapantam । viśvasya yōniṁ pratapantamugraṁ puraḥ prajānāmudayatyēṣa sūryaḥ ॥ ōṁ namō bhagavatē ādityāya akṣitējasē ahōvāhinyahōvāhinī svāhā । ōṁ vayaḥ suparṇā upasēdurindraṁ priyamēdhā r̥ṣayō nādhamānāḥ । apadhvāntamūrṇūhi pūrdhi cakṣurmumugdhyasmānnidhayēva baddhān । puṇḍarīkākṣāya namaḥ । puṣkarēkṣaṇāya namaḥ । amalēkṣaṇāya namaḥ । kamalēkṣaṇāya namaḥ । viśvarūpāya namaḥ । mahāviṣṇavē namaḥ । pāṭhāntaraṁ – ōṁ namō bhagavatē ādityāya sūryāyāhōvāhinyahōvāhinī svāhā । iti cākṣuṣōpaniṣat ।