(తై।ఆ।1।0।0) ఓం భ॒ద్రం కర్ణే॑భిః శృణు॒యామ॑ దేవాః । భ॒ద్రం ప॑శ్యేమా॒క్షభి॒ర్యజ॑త్రాః । స్థి॒రైరంగై᳚స్తుష్టు॒వాగ్ంస॑స్త॒నూభి॑: । వ్యశే॑మ దే॒వహి॑తం॒ యదాయు॑: । స్వ॒స్తి న॒ ఇంద్రో॑ వృ॒ద్ధశ్ర॑వాః । స్వ॒స్తి న॑: పూ॒షా వి॒శ్వవే॑దాః । స్వ॒స్తి న॒స్తార్క్ష్యో॒ అరి॑ష్టనేమిః । స్వ॒స్తి నో॒ బృహ॒స్పతి॑ర్దధాతు ॥ ఓం శాంతి॒: శాంతి॒: శాంతి॑: ॥ 1-0-0 ఓం భ॒ద్రం కర్ణే॑భిః శృణు॒యామ॑ దేవాః । భ॒ద్రం ప॑శ్యేమా॒క్షభి॒ర్యజ॑త్రాః । స్థి॒రైరంగై᳚స్తుష్టు॒వాగ్ంస॑స్త॒నూభి॑: । వ్యశే॑మ దే॒వహి॑తం॒ యదాయు॑: । స్వ॒స్తి న॒ ఇంద్రో॑ వృ॒ద్ధశ్ర॑వాః । స్వ॒స్తి న॑: పూ॒షా వి॒శ్వవే॑దాః । స్వ॒స్తి న॒స్తార్క్ష్యో॒ అరి॑ష్టనేమిః । స్వ॒స్తి నో॒ బృహ॒స్పతి॑ర్దధాతు । ఆప॑మాపామ॒పః సర్వా᳚: । అ॒స్మాద॒స్మాది॒తోఽముత॑: ॥ 1 ॥ 1-1-1 అ॒గ్నిర్వా॒యుశ్చ॒ సూర్య॑శ్చ । స॒హ సం॑చరస్క॒రర్ద్ధి॑యా । వా॒య్వశ్వా॑ రశ్మి॒పత॑యః । మరీ᳚చ్యాత్మానో॒ అద్రు॑హః । దే॒వీర్భు॑వన॒సూవ॑రీః । పు॒త్ర॒వ॒త్వాయ॑ మే సుత । మహానామ్నీర్మ॑హామా॒నాః । మ॒హ॒సో మ॑హస॒స్స్వ॑: । దే॒వీః ప॑ర్జన్య॒సూవ॑రీః । పు॒త్ర॒వ॒త్వాయ॑ మే సుత ॥ 2 ॥ 1-1-2 అ॒పాశ్న్యు॑ష్ణిమ॒పా రక్ష॑: । అ॒పాశ్న్యు॑ష్ణిమ॒పారఘం᳚ । అపా᳚ఘ్రా॒మప॑ చా॒వర్తిం᳚ । అప॑దే॒వీరి॒తో హి॑త । వజ్రం॑ దే॒వీరజీ॑తాగ్శ్చ । భువ॑నం దేవ॒సూవ॑రీః । ఆ॒ది॒త్యానది॑తిం దే॒వీం । యోని॑నోర్ధ్వము॒దీష॑త । శి॒వాన॒శ్శంత॑మా భవంతు । ది॒వ్యా ఆప॒ ఓష॑ధయః । సు॒మృ॒డీ॒కా సర॑స్వతి । మా తే॒ వ్యో॑మ సం॒దృశి॑ ॥ 3 ॥ 1-1-3 స్మృతి॑: ప్ర॒త్యక్ష॑మైతి॒హ్యం᳚ । అను॑మానశ్చతుష్ట॒యం । ఏ॒తైరాది॑త్యమండలం । సర్వై॑రేవ॒ విధా᳚స్యతే । సూర్యో॒ మరీ॑చి॒మాద॑త్తే । సర్వస్మా᳚ద్భువ॑నాద॒ధి । తస్యాః పాకవి॑శేషే॒ణ । స్మృ॒తం కా॑లవి॒శేష॑ణం । న॒దీవ॒ ప్రభ॑వాత్కా॒చిత్ । అ॒క్షయ్యా᳚త్స్యంద॒తే య॑థా ॥ 4 ॥ 1-2-1 తాన్నద్యోఽభిస॑మాయం॒తి । సో॒రుస్సతీ॑ న ని॒వర్త॑తే । ఏ॒వన్నా॒నాస॑ముత్థా॒నాః । కా॒లాస్సం॑వత్స॒రగ్గ్ శ్రి॑తాః । అణుశశ్చ మ॑హశ॒శ్చ । సర్వే॑ సమవ॒యంత్రి॑తం । సతై᳚స్స॒ర్వైస్స॑మావి॒ష్టః । ఊ॒రుస్స॑న్న ని॒వర్త॑తే । అధిసంవత్స॑రం వి॒ద్యాత్ । తదేవ॑ లక్ష॒ణే ॥ 5 ॥ 1-2-2 అణుభిశ్చ మ॑హద్భి॒శ్చ । స॒మారూ॑ఢః ప్ర॒దృశ్య॑తే । సంవత్సరః ప్ర॑త్యక్షే॒ణ । నా॒ధిస॑త్వః ప్ర॒దృశ్య॑తే । ప॒టరో॑ విక్లి॑ధః పిం॒గః । ఏ॒తద్వ॑రుణ॒లక్ష॑ణం । యత్రైత॑దుప॒దృశ్య॑తే । స॒హస్రం॑ తత్ర॒ నీయ॑తే । ఏకగ్ంహి శిరో నా॑నా ము॒ఖే । కృ॒త్స్నం త॑దృతు॒లక్ష॑ణం ॥ 6 ॥ 1-2-3 ఉభయతస్సప్తేం᳚ద్రియా॒ణి । జ॒ల్పితం॑ త్వేవ॒ దిహ్య॑తే । శుక్లకృష్ణే సంవ॑త్సర॒స్య । దక్షిణవామ॑యోః పా॒ర్శ్వయోః । తస్యై॒షా భవ॑తి । శు॒క్రం తే॑ అ॒న్యద్య॑జ॒తం తే॑ అ॒న్యత్ । విషు॑రూపే॒ అహ॑నీ॒ ద్యౌరి॑వాసి । విశ్వా॒ హి మా॒యా అవ॑సి స్వధావః । భ॒ద్రా తే॑ పూషన్ని॒హ రా॒తిర॒స్త్వితి॑ । నాత్ర॒ భువ॑నం । న పూ॒షా । న ప॒శవ॑: । నాదిత్యస్సంవత్సర ఏవ ప్రత్యక్షేణ ప్రియత॑మం వి॒ద్యాత్ । ఏతద్వై సంవత్సరస్య ప్రియత॑మగ్ం రూ॒పం । యోఽస్య మహానర్థ ఉత్పత్స్యమా॑నో భ॒వతి । ఇదం పుణ్యం కు॑రుష్వే॒తి । తమాహర॑ణం ద॒ద్యాత్ ॥ 7 ॥ 1-2-4 సా॒కం॒జానాగ్ం॑ స॒ప్తథ॑మాహురేక॒జం । షడు॑ద్య॒మా ఋష॑యో దేవ॒జా ఇతి॑ । తేషా॑మి॒ష్టాని॒ విహి॑తాని ధామ॒శః । స్థా॒త్రే రే॑జంతే॒ వికృ॑తాని రూప॒శః । కో ను॑ మర్యా॒ అమి॑థితః । సఖా॒ సఖా॑యమబ్రవీత్ । జహా॑కో అ॒స్మదీ॑షతే । యస్తి॒త్యాజ॑ సఖి॒విద॒గ్ం॒ సఖా॑యం । న తస్య॑ వా॒చ్యపి॑ భా॒గో అ॑స్తి । యదీగ్ం॑ శృ॒ణోత్య॒లకగ్ం॑ శృణోతి ॥ 8 ॥ 1-3-1 న హి ప్ర॒వేద॑ సుకృ॒తస్య॒ పంథా॒మితి॑ । ఋ॒తురృ॑తునా ను॒ద్యమా॑నః । విన॑నాదా॒భిధా॑వః । షష్టిశ్చ త్రిగ్ంశ॑కా వ॒ల్గాః । శు॒క్లకృ॑ష్ణౌ చ॒ షాష్టి॑కౌ । సా॒రా॒గ॒వ॒స్త్రైర్జ॒రద॑క్షః । వ॒సం॒తో వసు॑భిస్స॒హ । సం॒వ॒త్స॒రస్య॑ సవి॒తుః । ప్రై॒ష॒కృత్ప్ర॑థ॒మః స్మృ॑తః । అ॒మూనా॒దయ॑తేత్య॒న్యాన్ ॥ 9 ॥ 1-3-2 అ॒మూగ్శ్చ॑ పరి॒రక్ష॑తః । ఏ॒తా వా॒చః ప్ర॑యుజ్యం॒తే । యత్రైత॑దుప॒దృశ్య॑తే । ఏ॒తదే॒వ వి॑జానీ॒యాత్ । ప్ర॒మాణం॑ కాల॒పర్య॑యే । వి॒శే॒ష॒ణం తు॑ వక్ష్యా॒మః । ఋ॒తూనాం᳚ తన్ని॒బోధ॑త । శుక్లవాసా॑ రుద్ర॒గణః । గ్రీ॒ష్మేణా॑ఽఽవర్త॒తే స॑హ । ని॒జహ॑న్పృథి॑వీగ్ం స॒ర్వాం ॥ 10 ॥ 1-3-3 జ్యో॒తిషా᳚ఽప్రతి॒ఖ్యేన॑ సః । వి॒శ్వ॒రూ॒పాణి॑ వాసా॒గ్ం॒సి । ఆ॒ది॒త్యానాం᳚ ని॒బోధ॑త । సంవత్సరీణం॑ కర్మ॒ఫలం । వర్షాభిర్ద॑దతా॒గ్ం॒ సహ । అదుఃఖో॑ దుఃఖచ॑క్షురి॒వ । తద్మా॑ పీత ఇవ॒ దృశ్య॑తే । శీతేనా᳚వ్యథ॑యన్ని॒వ । రు॒రుద॑క్ష ఇవ॒ దృశ్య॑తే । హ్లాదయతే᳚ జ్వల॑తశ్చై॒వ । శా॒మ్యత॑శ్చాస్య॒ చక్షు॑షీ । యా వై ప్రజా భ్ర॑గ్గ్శ్యం॒తే । సంవత్సరాత్తా భ్ర॑గ్గ్శ్యం॒తే । యా॒: ప్రతి॑తిష్ఠం॒తి । సంవత్సరే తాః ప్రతి॑తిష్ఠం॒తి । వ॒ర్షాభ్య॑ ఇత్య॒ర్థః ॥ 11 ॥ 1-3-4 అక్షి॑దు॒:ఖోత్థి॑తస్యై॒వ । వి॒ప్రస॑న్నే క॒నీని॑కే । ఆంక్తే చాద్గ॑ణం నా॒స్తి । ఋ॒భూణాం᳚ తన్ని॒బోధ॑త । క॒న॒కా॒భాని॑ వాసా॒గ్ం॒సి । అ॒హతా॑ని ని॒భోద॑త । అన్నమశ్నీత॑ మృజ్మీ॒త । అ॒హం వో॑ జీవ॒నప్ర॑దః । ఏ॒తా వా॒చః ప్ర॑యుజ్యం॒తే । శ॒రద్య॑త్రోప॒దృశ్య॑తే ॥ 12 ॥ 1-4-1 అభిధూన్వంతోఽభిఘ్నం॑త ఇ॒వ । వా॒తవం॑తో మ॒రుద్గ॑ణాః । అముతో జేతుమిషుము॑ఖమి॒వ । సన్నద్ధాస్సహ ద॑దృశే॒ హ । అపధ్వస్తైర్వస్తివ॑ర్ణైరి॒వ । వి॒శి॒ఖాస॑: కప॒ర్దినః । అక్రుద్ధస్య యోత్స్య॑మాన॒స్య । క్రు॒ద్ధస్యే॑వ॒ లోహి॑నీ । హేమతశ్చక్షు॑షీ వి॒ద్యాత్ । అ॒క్ష్ణయో᳚: క్షిప॒ణోరి॑వ ॥ 13 ॥ 1-4-2 దుర్భిక్షం దేవ॑లోకే॒షు । మ॒నూనా॑ముద॒కం గృ॑హే । ఏ॒తా వా॒చః ప్ర॑వదం॒తీః । వై॒ద్యుతో॑ యాంతి॒ శైశి॑రీః । తా అ॒గ్నిః పవ॑మానా॒ అన్వై᳚క్షత । ఇ॒హ జీ॑వి॒కామప॑రిపశ్యన్ । తస్యై॒షా భవ॑తి । ఇ॒హేహవ॑స్స్వత॒పసః । మరు॑త॒స్సూర్య॑త్వచః । శర్మ॑ స॒ప్రథా॒ ఆవృ॑ణే ॥ 14 ॥ 1-4-3 అతి॑తా॒మ్రాణి॑ వాసా॒గ్ం॒సి । అ॒ష్టివ॑జ్రిశ॒తఘ్ని॑ చ । విశ్వే దేవా విప్ర॑హరం॒తి । అ॒గ్నిజి॑హ్వా అ॒సశ్చ॑త । నైవ దేవో॑ న మ॒ర్త్యః । న రాజా వ॑రుణో॒ విభుః । నాగ్నిర్నేంద్రో న ప॑వమా॒నః । మా॒తృక్క॑చ్చన॒ విద్య॑తే । ది॒వ్యస్యైకా॒ ధను॑రార్త్నిః । పృ॒థి॒వ్యామప॑రా శ్రి॒తా ॥ 15 ॥ 1-5-1 తస్యేంద్రో వమ్రి॑రూపే॒ణ । ధ॒నుర్జ్యా॑మచ్ఛి॒నథ్స్వ॑యం । తదిం॑ద్ర॒ధను॑రిత్య॒జ్యం । అ॒భ్రవ॑ర్ణేషు॒ చక్ష॑తే । ఏతదేవ శమ్యోర్బార్హ॑స్పత్య॒స్య । ఏ॒తద్రు॑ద్రస్య॒ ధనుః । రు॒ద్రస్య॑ త్వేవ॒ ధను॑రార్త్నిః । శిర॒ ఉత్పి॑పేష । స ప్ర॑వ॒ర్గ్యో॑ఽభవత్ । తస్మా॒ద్యస్సప్ర॑వ॒ర్గ్యేణ॑ య॒జ్ఞేన॒ యజ॑తే । రు॒ద్రస్య॒ స శిర॒: ప్రతి॑దధాతి । నైనగ్ం॑ రు॒ద్ర ఆరు॑కో భవతి । య ఏ॒వం వేద॑ ॥ 16 ॥ 1-5-2 అ॒త్యూ॒ర్ధ్వా॒క్షోఽతి॑రశ్చాత్ । శిశి॑రః ప్ర॒దృశ్య॑తే । నైవ రూపం న॑ వాసా॒గ్ం॒సి । న చక్షు॑: ప్రతి॒దృశ్య॑తే । అ॒న్యోన్యం॒ తు న॑ హిగ్గ్ స్రా॒తః । స॒తస్త॑ద్దేవ॒లక్ష॑ణం । లోహితోఽక్ష్ణి శా॑రశీ॒ర్ష్ణిః । సూ॒ర్యస్యో॑దయ॒నం ప్ర॑తి । త్వం కరోషి॑న్యంజ॒లికాం । త్వం॒ కరో॑షి ని॒జాను॑కాం ॥ 17 ॥ 1-6-1 నిజానుకా మే᳚న్యంజ॒లికా । అమీ వాచముపాస॑తామి॒తి । తస్మై సర్వ ఋతవో॑ నమం॒తే । మర్యాదాకరత్వాత్ప్ర॑పురో॒ధాం । బ్రాహ్మణ॑ ఆప్నో॒తి । య ఏ॑వం వే॒ద । స ఖలు సంవత్సర ఏతైస్సేనానీ॑భిస్స॒హ । ఇంద్రాయ సర్వాన్కామాన॑భివ॒హతి । స ద్ర॒ప్సః । తస్యై॒షా భవ॑తి ॥ 18 ॥ 1-6-2 అవ॑ద్ర॒ప్సో అగ్ం॑శు॒మతీ॑మతిష్ఠత్ । ఇ॒యా॒నః కృ॒ష్ణో ద॒శభి॑: స॒హస్రై᳚: । ఆవ॒ర్తమింద్ర॒: శచ్యా॒ ధమం॑తం । ఉపస్నుహి తం నృమణామథ॑ద్రామి॒తి । ఏతయైవేంద్రః సలావృ॑క్యా స॒హ । అసురాన్ప॑రివృ॒శ్చతి । పృథి॑వ్య॒గ్ం॒శుమ॑తీ । తామ॒న్వవ॑స్థితః సంవత్స॒రో ది॒వం చ॑ । నైవం విదుషాఽఽచార్యాం᳚తేవా॒సినౌ । అన్యోన్యస్మై᳚ ద్రుహ్యా॒తాం । యో ద్రు॒హ్యతి । భ్రశ్యతే స్వ॑ర్గాల్లో॒కాత్ । ఇత్యృతుమం॑డలా॒ని । సూర్యమండలా᳚న్యాఖ్యా॒యికాః । అత ఊర్ధ్వగ్ం స॑నిర్వ॒చనాః ॥ 19 ॥ 1-6-3 ఆరోగో భ్రాజః పటర॑: పతం॒గః । స్వర్ణరో జ్యోతిషీమాన్॑ విభా॒సః । తే అస్మై సర్వే దివమా॑తపం॒తి । ఊర్జం దుహానా అనపస్ఫురం॑త ఇ॒తి । కశ్య॑పోఽష్ట॒మః । స మహామేరుం న॑ జహా॒తి । తస్యై॒షా భవ॑తి । యత్తే॒ శిల్పం॑ కశ్యప రోచ॒నావ॑త్ । ఇం॒ద్రి॒యావ॑త్పుష్క॒లం చి॒త్రభా॑ను । యస్మిం॒త్సూర్యా॒ అర్పి॑తాస్స॒ప్త సా॒కం ॥ 20 ॥ 1-7-1 తస్మిన్రాజానమధివిశ్రయే॑మమి॒తి । తే అస్మై సర్వే కశ్యపాజ్జ్యోతి॑ర్లభం॒తే । తాన్సోమః కశ్యపాదధి॑నిర్ద్ధ॒మతి । భ్రస్తాకర్మకృ॑దివై॒వం । ప్రాణో జీవానీంద్రియ॑జీవా॒ని । సప్త శీర్ష॑ణ్యాః ప్రా॒ణాః । సూర్యా ఇ॑త్యాచా॒ర్యాః । అపశ్యమహమేతాంత్సప్త సూ᳚ర్యాని॒తి । పంచకర్ణో॑ వాత్స్యా॒యనః । సప్తకర్ణ॑శ్చ ప్లా॒క్షిః ॥ 21 ॥ 1-7-2 [16*33] ఆనుశ్రవిక ఏవ నౌ కశ్య॑ప ఇ॒తి । ఉభౌ॑ వేద॒యితే । న హి శేకుమివ మహామే॑రుం గం॒తుం । అపశ్యమహమేతత్సూర్యమండలం పరివ॑ర్తమా॒నం । గా॒ర్గ్యః ప్రా॑ణత్రా॒తః । గచ్ఛంత మ॑హామే॒రుం । ఏకం॑ చాజ॒హతం । భ్రాజపటరపతం॑గా ని॒హనే । తిష్ఠన్నా॑తపం॒తి । తస్మా॑ది॒హ తప్త్రి॑తపాః ॥ 22 ॥ 1-7-3 అ॒ముత్రే॒తరే । తస్మా॑ది॒హాతప్త్రి॑తపాః । తేషా॑మేషా॒ భవ॑తి । స॒ప్త సూర్యా॒ దివ॒మను॒ప్రవి॑ష్టాః । తాన॒న్వేతి॑ ప॒థిభి॑ర్దక్షి॒ణావాన్॑ । తే అస్మై సర్వే ఘృతమా॑తపం॒తి । ఊర్జం దుహానా అనపస్ఫురం॑త ఇ॒తి । సప్తర్త్విజస్సూర్యా ఇ॑త్యాచా॒ర్యాః । తేషా॑మేషా॒ భవ॑తి । స॒ప్త దిశో॒ నానా॑సూర్యాః ॥ 23 ॥ 1-7-4 స॒ప్త హోతా॑ర ఋ॒త్విజ॑: । దేవా ఆదిత్యా॑ యే స॒ప్త । తేభిస్సోమాభీరక్ష॑ణ ఇ॒తి । తద॑ప్యామ్నా॒యః । దిగ్భ్రాజః ఋతూ᳚న్ కరో॒తి । ఏత॑యైవా॒వృతా సహస్రసూర్యతాయా ఇతి వై॑శంపా॒యనః । తస్యై॒షా భవ॑తి । యద్ద్యావ॑ ఇంద్ర తే శ॒తగ్ంశ॒తం భూమీ᳚: । ఉ॒త స్యుః । నత్వా॑ వజ్రిన్స॒హస్ర॒గ్ం॒ సూర్యా᳚: ॥ 24 ॥ 1-7-5 అనునజాతమష్ట రోద॑సీ ఇ॒తి । నానాలింగత్వాదృతూనాం నానా॑సూర్య॒త్వం । అష్టౌ తు వ్యవసి॑తా ఇ॒తి । సూర్యమండలాన్యష్టా॑త ఊ॒ర్ధ్వం । తేషా॑మేషా॒ భవ॑తి । చి॒త్రం దే॒వానా॒ముద॑గా॒దనీ॑కం । చక్షు॑ర్మి॒త్రస్య॒ వరు॑ణస్యా॒గ్నేః । ఆప్రా॒ ద్యావా॑పృథి॒వీ అం॒తరి॑క్షం । సూర్య ఆత్మా జగతస్తస్థు॑షశ్చే॒తి ॥ 25 ॥ 1-7-6 క్వేదమభ్ర॑న్నివి॒శతే । క్వాయగ్ం॑ సంవత్స॒రో మి॑థః । క్వాహః క్వేయందే॑వ రా॒త్రీ । క్వ మాసా ఋ॑తవ॒: శ్రితాః । అర్ధమాసా॑ ముహూ॒ర్తాః । నిమేషాస్తు॑టిభి॒స్సహ । క్వేమా ఆపో ని॑విశం॒తే । య॒దీతో॑ యాంతి॒ సంప్ర॑తి । కాలా అప్సు ని॑విశం॒తే । ఆ॒పస్సూర్యే॑ స॒మాహి॑తాః ॥ 26 ॥ 1-8-1 అభ్రా᳚ణ్య॒పః ప్ర॑పద్యం॒తే । వి॒ద్యుత్సూర్యే॑ స॒మాహి॑తా । అనవర్ణే ఇ॑మే భూ॒మీ । ఇ॒యం చా॑సౌ చ॒ రోద॑సీ । కిగ్గ్స్విదత్రాంత॑రా భూ॒తం । యే॒నేమే వి॑ధృతే॒ ఉభే । వి॒ష్ణునా॑ విధృ॑తే భూ॒మీ । ఇ॒తి వ॑త్సస్య॒ వేద॑నా । ఇరా॑వతీ ధేను॒మతీ॒ హి భూ॒తం । సూ॒య॒వ॒సినీ॒ మను॑షే దశ॒స్యే᳚ ॥ 27 ॥ 1-8-2 వ్య॑ష్టభ్నా॒ద్రోద॑సీ॒ విష్ణ॑వే॒తే । దా॒ధర్థ॑ పృథి॒వీమ॒భితో॑ మ॒యూఖై᳚: । కిం తద్విష్ణోర్బ॑లమా॒హుః । కా॒ దీప్తి॑: కిం ప॒రాయ॑ణం । ఏకో॑ య॒ద్ధార॑యద్దే॒వః । రే॒జతీ॑ రోద॒సీ ఉ॑భే । వాతాద్విష్ణోర్బ॑లమా॒హుః । అ॒క్షరా᳚ద్దీప్తి॒రుచ్య॑తే । త్రి॒పదా॒ద్ధార॑యద్దే॒వః । యద్విష్ణో॑రేక॒ముత్త॑మం ॥ 28 ॥ 1-8-3 అ॒గ్నయో॑ వాయ॑వశ్చై॒వ । ఏ॒తద॑స్య ప॒రాయ॑ణం । పృచ్ఛామి త్వా ప॑రం మృ॒త్యుం । అ॒వమం॑ మధ్య॒మంచ॑తుం । లో॒కంచ॒ పుణ్య॑పాపా॒నాం । ఏ॒తత్పృ॑చ్ఛామి॒ సంప్ర॑తి । అ॒ముమా॑హుః ప॑రం మృ॒త్యుం । ప॒వమా॑నం తు॒ మధ్య॑మం । అ॒గ్నిరే॒వావ॑మో మృ॒త్యుః । చం॒ద్రమా᳚శ్చతు॒రుచ్య॑తే ॥ 29 ॥ 1-8-4 అ॒నా॒భో॒గాః ప॑రం మృ॒త్యుం । పా॒పాస్స॑మ్యంతి॒ సర్వ॑దా । ఆభోగాస్త్వేవ॑ సమ్యం॒తి । య॒త్ర పు॑ణ్యకృ॒తో జ॑నాః । తతో॑ మ॒ధ్యమ॑మాయం॒తి । చ॒తుమ॑గ్నిం చ॒ సంప్ర॑తి । పృచ్ఛామి త్వా॑ పాప॒కృతః । య॒త్ర యా॑తయ॒తే య॑మః । త్వం నస్తద్బ్రహ్మ॑న్ ప్రబూ॒హి । య॒ది వే᳚త్థాఽస॒తో గృ॑హాన్ ॥ 30 ॥ 1-8-5 క॒శ్యపా॑దుది॑తాస్సూ॒ర్యాః । పా॒పాన్ని॑ర్ఘ్నంతి॒ సర్వ॑దా । రోదస్యోరంత॑ర్దేశే॒షు । తత్ర న్యస్యంతే॑ వాస॒వైః । తేఽశరీరాః ప్ర॑పద్యం॒తే । య॒థాఽపు॑ణ్యస్య॒ కర్మ॑ణః । అపా᳚ణ్య॒పాద॑కేశా॒సః । త॒త్ర తే॑ఽయోని॒జా జ॑నాః । మృత్వా పునర్మృత్యుమా॑పద్యం॒తే । అ॒ద్యమా॑నాస్స్వ॒కర్మ॑భిః ॥ 31 ॥ 1-8-6 ఆశాతికాః క్రిమ॑య ఇ॒వ । తతః పూయంతే॑ వాస॒వైః । అపై॑తం మృ॒త్యుం జ॑యతి । య ఏ॒వం వేద॑ । స ఖల్వైవం॑ విద్బ్రా॒హ్మణః । దీ॒ర్ఘశ్రు॑త్తమో॒ భవ॑తి । కశ్య॑ప॒స్యాతి॑థి॒స్సిద్ధగ॑మన॒స్సిద్ధాగ॑మనః । తస్యై॒షా భవ॑తి । ఆ యస్మిం᳚థ్స॒ప్త వా॑స॒వాః । రోహం॑తి పూ॒ర్వ్యా॑ రుహ॑: ॥ 32 ॥ 1-8-7 ఋషి॑ర్హ దీర్ఘ॒శ్రుత్త॑మః । ఇంద్రస్య ఘర్మో అతి॑థిరి॒తి । కశ్యపః పశ్య॑కో భ॒వతి । యత్సర్వం పరిపశ్యతీ॑తి సౌ॒క్ష్మ్యాత్ । అథాగ్నే॑రష్టపు॑రుష॒స్య । తస్యై॒షా భవ॑తి । అగ్నే॒ నయ॑ సు॒పథా॑ రా॒యే అ॒స్మాన్ । విశ్వా॑ని దేవ వ॒యునా॑ని వి॒ద్వాన్ । యు॒యో॒ధ్య॑స్మజ్జు॑హురా॒ణమేన॑: । భూయిష్ఠాంతే నమ ఉక్తిం వి॑ధేమే॒తి ॥ 33 ॥ 1-8-8 అగ్నిశ్చ జాత॑వేదా॒శ్చ । సహోజా అ॑జిరా॒ప్రభుః । వైశ్వానరో న॑ర్యాపా॒శ్చ । పం॒క్తిరా॑ధాశ్చ॒ సప్త॑మః విసర్పేవాఽష్ట॑మోఽగ్నీ॒నాం । ఏతేఽష్టౌ వసవః క్షి॑తా ఇ॒తి । యథర్త్వేవాగ్నేరర్చిర్వర్ణ॑విశే॒షాః । నీలార్చిశ్చ పీతకా᳚ర్చిశ్చే॒తి । అథ వాయోరేకాదశపురుషస్యైకాదశ॑స్త్రీక॒స్య । ప్రభ్రాజమానా వ్య॑వదా॒తాః ॥ 34 ॥ 1-9-1 యాశ్చ వాసు॑కివై॒ద్యుతాః । రజతాః పరు॑షాః శ్యా॒మాః । కపిలా అ॑తిలో॒హితాః । ఊర్ధ్వా అవప॑తంతా॒శ్చ । వైద్యుత ఇ॑త్యేకా॒దశ । నైనం వైద్యుతో॑ హిన॒స్తి । య ఏ॑వం వే॒ద । స హోవాచ వ్యాసః పా॑రాశ॒ర్యః । విద్యుద్వధమేవాహం మృత్యుమై᳚చ్ఛమి॒తి । న త్వకా॑మగ్ం హం॒తి ॥ 35 ॥ 1-9-2 య ఏ॑వం వే॒ద । అథ గం॑ధర్వ॒గణాః । స్వాన॒భ్రాట్ । అంఘా॑రి॒ర్బంభా॑రిః । హస్త॒స్సుహ॑స్తః । కృశా॑నుర్వి॒శ్వావ॑సుః । మూర్ధన్వాంథ్సూ᳚ర్యవ॒ర్చాః । కృతిరిత్యేకాదశ గం॑ధర్వ॒గణాః । దేవాశ్చ మ॑హాదే॒వాః । రశ్మయశ్చ దేవా॑ గర॒గిరః ॥ 36 ॥ 1-9-3 నైనం గరో॑ హిన॒స్తి । య ఏ॑వం వే॒ద । గౌ॒రీమి॑మాయ సలి॒లాని॒ తక్ష॑తీ । ఏక॑పదీ ద్వి॒పదీ॒ సా చతు॑ష్పదీ । అ॒ష్టాపదీ॒ నవ॑పదీ బభూ॒వుషీ᳚ । సహస్రాక్షరా పరమే వ్యో॑మన్ని॒తి । వాచో॑ విశే॒షణం । అథ నిగద॑వ్యాఖ్యా॒తాః । తాననుక్ర॑మిష్యా॒మః । వ॒రాహవ॑స్సవత॒పసః ॥ 37 ॥ 1-9-4 వి॒ద్యున్మ॑హసో॒ ధూప॑యః । శ్వాపయో గృహమేధా᳚శ్చేత్యే॒తే । యే॒ చేమేఽశి॑మివి॒ద్విషః । పర్జన్యాస్సప్త పృథివీమభివ॑ర్షం॒తి । వృష్టి॑భిరి॒తి । ఏతయైవ విభక్తివి॑పరీ॒తాః । స॒ప్తభి॒ర్వాతై॑రుదీ॒రితాః । అమూఀల్లోకానభివ॑ర్షం॒తి । తేషా॑మేషా॒ భవ॑తి । స॒మా॒నమే॒తదుద॑కం ॥ 38 ॥ 1-9-5 ఉ॒చ్చైత్య॑వ॒చాహ॑భిః । భూమిం॑ ప॒ర్జన్యా॒ జిన్వం॑తి । దివం జిన్వంత్యగ్న॑య ఇ॒తి । యదక్ష॑రం భూ॒తకృ॑తం । విశ్వే॑ దేవా ఉ॒పాస॑తే । మ॒హర్షి॑మస్య గో॒ప్తారం᳚ । జ॒మద॑గ్ని॒మకు॑ర్వత । జ॒మద॑గ్ని॒రాప్యా॑యతే । ఛందో॑భిశ్చతురుత్త॒రైః । రాజ్ఞ॒స్సోమ॑స్య తృ॒ప్తాస॑: ॥ 39 ॥ 1-9-6 బ్రహ్మ॑ణా వీ॒ర్యా॑వతా । శి॒వా న॑: ప్ర॒దిశో॒ దిశ॑: । తచ్ఛ॒మ్యోరావృ॑ణీమహే । గా॒తుం య॒జ్ఞాయ॑ । గా॒తుం య॒జ్ఞప॑తయే । దైవీ᳚స్వ॒స్తిర॑స్తు నః । స్వ॒స్తిర్మాను॑షేభ్యః । ఊ॒ర్ధ్వం జి॑గాతు భేష॒జం । శన్నో॑ అస్తు ద్వి॒పదే᳚ । శం చతు॑ష్పదే । సోమపా 3 అసోమపా 3 ఇతి నిగద॑వ్యాఖ్యా॒తాః ॥ 40 ॥ 1-9-7 స॒హ॒స్ర॒వృది॑యం భూ॒మిః । ప॒రం వ్యో॑మ స॒హస్ర॑వృత్ । అ॒శ్వినా॑ భుజ్యూ॑ నాస॒త్యా । వి॒శ్వస్య॑ జగ॒తస్ప॑తీ । జాయా భూమిః ప॑తిర్వ్యో॒మ । మి॒థునం॑తా అ॒తుర్య॑థుః । పుత్రో బృహస్ప॑తీ రు॒ద్రః । స॒రమా॑ ఇతి॑ స్త్రీపు॒మం । శు॒క్రం వా॑మ॒న్యద్య॑జ॒తం వా॑మ॒న్యత్ । విషు॑రూపే॒ అహ॑నీ॒ ద్యౌరి॑వ స్థః ॥ 41 ॥ 1-10-1 విశ్వా॒ హి మా॒యా అవ॑థః స్వధావంతౌ । భ॒ద్రా వాం᳚ పూషణావి॒హ రా॒తిర॑స్తు । వాసా᳚త్యౌ చి॒త్రౌ జగ॑తో ని॒ధానౌ᳚ । ద్యావా॑భూమీ చ॒రథ॑: స॒గ్ం॒ సఖా॑యౌ । తావ॒శ్వినా॑ రా॒సభా᳚శ్వా॒ హవం॑ మే । శు॒భ॒స్ప॒తీ॒ ఆ॒గతగ్ం॑ సూ॒ర్యయా॑ స॒హ । త్యుగ్రో॑హ భు॒జ్యుమ॑శ్వినోదమే॒ఘే । ర॒యిన్న కశ్చి॑న్మమృ॒వాం 2 అవా॑హాః । తమూ॑హథుర్నౌ॒భిరా᳚త్మ॒న్వతీ॑భిః । అం॒త॒రి॒క్ష॒ప్రుడ్భి॒రపో॑దకాభిః ॥ 42 ॥ 1-10-2 తి॒స్రః క్షప॒స్త్రిరహా॑ఽతి॒వ్రజ॑ద్భిః । నాస॑త్యా భు॒జ్యుమూ॑హథుః పతం॒గైః । స॒ము॒ద్రస్య॒ ధన్వ॑న్నా॒ర్ద్రస్య॑ పా॒రే । త్రి॒భీరథై᳚శ్శ॒తప॑ద్భి॒: షడ॑శ్వై॒: । స॒వి॒తారం॒ విత॑న్వంతం । అను॑బధ్నాతి శాంబ॒రః । ఆపపూరుషంబ॑రశ్చై॒వ । స॒వితా॑ఽరేప॒సో॑ భవత్ । త్యగ్ం సుతృప్తం వి॑దిత్వై॒వ । బ॒హుసో॑మ గి॒రం వ॑శీ ॥ 43 ॥ 1-10-3 అన్వేతి తుగ్రో వ॑క్రియాం॒తం । ఆయసూయాంత్సోమ॑తృప్సు॒షు । స సంగ్రామస్తమో᳚ద్యోఽత్యో॒తః । వాచో గాః పి॑పాతి॒ తత్ । స తద్గోభిస్స్త్వా᳚ఽత్యేత్య॒న్యే । ర॒క్షసా॑ఽనన్వి॒తాశ్చ॑ యే । అ॒న్వేతి॒ పరి॑వృత్యా॒ఽస్తః । ఏ॒వమే॒తౌ స్థో॑ అశ్వినా । తే ఏ॒తే ద్యు॑:పృథి॒వ్యోః । అహ॑రహ॒ర్గర్భం॑దధాథే ॥ 44 ॥ 1-10-4 తయో॑రే॒తౌ వ॒త్సావ॑హోరా॒త్రే । పృ॒థి॒వ్యా అహ॑: । ది॒వో రాత్రి॑: । తా అవి॑సృష్ఠౌ । దంప॑తీ ఏ॒వ భ॑వతః । తయో॑రే॒తౌ వ॒త్సౌ । అ॒గ్నిశ్చా॑దిత్య॒శ్చ॑ । రా॒త్రేర్వ॒త్సః । శ్వే॒త ఆ॑ది॒త్యః । అహ్నో॒ఽగ్నిః ॥ 45 ॥ 1-10-5 తా॒మ్రో అ॑రు॒ణః । తా అవి॑సృష్టౌ । దంప॑తీ ఏ॒వ భ॑వతః । తయో॑రే॒తౌ వ॒త్సౌ । వృ॒త్రశ్చ॑ వైద్యు॒తశ్చ॑ । అ॒గ్నేర్వృ॒త్రః । వై॒ద్యుత॑ ఆది॒త్యస్య॑ । తా అవి॑సృష్టౌ । దంప॑తీ ఏ॒వ భ॑వతః । తయో॑రే॒తౌ వ॒త్సౌ ॥ 46 ॥ 1-10-6 ఉ॒ష్మా చ॑ నీహా॒రశ్చ॑ । వృ॒త్రస్యో॒ష్మా । వై॒ద్యు॒తస్య॑ నీహా॒రః । తౌ తావే॒వ ప్రతి॑పద్యేతే । సేయగ్ం రాత్రీ॑ గ॒ర్భిణీ॑ పు॒త్రేణ॒ సంవ॑సతి । తస్యా॒ వా ఏ॒తదు॒ల్బణం᳚ । యద్రాత్రౌ॑ ర॒శ్మయ॑: । యథా॒ గోర్గ॒ర్భిణ్యా॑ ఉ॒ల్బణం᳚ । ఏ॒వమే॒తస్యా॑ ఉ॒ల్బణం᳚ । ప్రజయిష్ణుః ప్రజయా చ పశుభి॑శ్చ భ॒వతి । య ఏ॑వం వే॒ద । ఏతముద్యంతమపియం॑తం చే॒తి । ఆదిత్యః పుణ్య॑స్య వ॒త్సః । అథ పవి॑త్రాంగి॒రసః ॥ 47 ॥ 1-10-7 ప॒విత్ర॑వంత॒: పరి॒వాజ॒మాస॑తే । పి॒తైషాం᳚ ప్ర॒త్నో అ॒భిర॑క్షతి వ్ర॒తం । మ॒హస్స॑ముద్రం వరు॑ణస్తి॒రోద॑ధే । ధీరా॑ ఇచ్ఛేకు॒ర్ధరు॑ణేష్వా॒రభం᳚ । ప॒వి॑త్రం తే॒ విత॑తం॒ బ్రహ్మ॑ణ॒స్పతే᳚ । ప్రభు॒ర్గాత్రా॑ణి॒ పర్యే॑షి వి॒శ్వత॑: । అత॑ప్తతనూ॒ర్న తదా॒మో అ॑శ్నుతే । శృ॒తాస॒ ఇద్వహం॑త॒స్తత్సమా॑శత । బ్ర॒హ్మా దే॒వానాం᳚ । అస॑తస్స॒ద్యే తత॑క్షుః ॥ 48 ॥ 1-11-1 ఋష॑యస్స॒ప్తాత్రి॑శ్చ॒ యత్ । సర్వేఽత్రయో అ॑గస్త్య॒శ్చ । నక్ష॑త్రై॒శ్శంకృ॑తోఽవసన్ । అథ॑ సవితు॒: శ్యావాశ్వ॒స్యాఽవర్తి॑కామస్య । అ॒మీ య ఋక్షా॒ నిహి॑తాస ఉ॒చ్చా । నక్తం॒ దదృ॑శ్రే॒ కుహా॑చి॒ద్దివే॑యుః । అద॑బ్ధాని॒ వరు॑ణస్య వ్ర॒తాని॑ । వి॒చా॒కశ॑చ్చం॒ద్రమా॒ నక్ష॑త్రమేతి । తత్స॑వి॒తుర్వరే᳚ణ్యం । భర్గో॑ దే॒వస్య॑ ధీమహి ॥ 49 ॥ 1-11-2 ధియో॒ యో న॑: ప్రచో॒దయా᳚త్ । తత్స॑వి॒తుర్వృ॑ణీమహే । వ॒యందే॒వస్య॒ భోజ॑నం । శ్రేష్ఠగ్ం॑సర్వ॒ధాత॑మం । తురం॒ భగ॑స్య ధీమహి । అపా॑గూహత సవితా॒ తృభీన్॑ । సర్వాం᳚ది॒వో అంధ॑సః । నక్త॒న్యాన్య॑భవందృ॒శే । అస్థ్య॒స్థ్నా సంభ॑విష్యామః । నామ॒ నామై॒వ నా॒మ మే᳚ ॥ 50 ॥ 1-11-3 నపుగ్ంస॑కం॒ పుమా॒గ్ం॒స్త్ర్య॑స్మి । స్థావ॑రోఽస్మ్యథ॒ జంగ॑మః । య॒జేఽయక్షి॒ యష్టా॒హే చ॑ । మయా॑ భూ॒తాన్య॑యక్షత । ప॒శవో॑ మమ॑ భూతా॒ని । అనూబంధ్యోఽస్మ్య॑హం వి॒భుః । స్త్రియ॑స్స॒తీః । తా ఉ॑ మే పు॒గ్ం॒స ఆ॑హుః । పశ్య॑దక్ష॒ణ్వాన్నవిచే॑తదం॒ధః । క॒విర్యః పు॒త్రస్స ఇ॒మా చి॑కేత ॥ 51 ॥ 1-11-4 యస్తా వి॑జా॒నాథ్స॑వి॒తుః పి॒తా స॑త్ । అం॒ధో మణిమ॑విందత్ । తమ॑నంగులి॒రావ॑యత్ । అ॒గ్రీ॒వః ప్రత్య॑ముంచత్ । తమజి॑హ్వా అ॒సశ్చ॑త । ఊర్ధ్వమూలమ॑వాక్ఛా॒ఖం । వృ॒క్షం యో॑ వేద॒ సంప్ర॑తి । న స జాతు జన॑: శ్రద్ద॒ధ్యాత్ । మృ॒త్యుర్మా॑ మార॒యాది॑తిః । హసితగ్ం రుది॑తంగీ॒తం ॥ 52 ॥ 1-11-5 వీణా॑పణవ॒లాసి॑తం । మృ॒తంజీ॒వం చ॑ యత్కిం॒చిత్ । అం॒గాని॑ స్నేవ॒ విద్ధి॑ తత్ । అతృ॑ష్య॒గ్గ్॒స్తృష్య॑ ధ్యాయత్ । అ॒స్మాజ్జా॒తా మే॑ మిథూ॒ చరన్॑ । పుత్రో నిరృత్యా॑ వైదే॒హః । అ॒చేతా॑ యశ్చ॒ చేత॑నః । స॒ తం మణిమ॑విందత్ । సో॑ఽనంగులి॒రావ॑యత్ । సో॒ఽగ్రీ॒వః ప్రత్య॑ముంచత్ ॥ 53 ॥ 1-11-6 సోఽజి॑హ్వో అ॒సశ్చ॑త । నైతమృషిం విదిత్వా నగ॑రం ప్ర॒విశేత్ । య॑ది ప్ర॒విశేత్ । మి॒థౌ చరి॑త్వా ప్ర॒విశేత్ । తథ్సంభవ॑స్య వ్ర॒తం । ఆ॒తమ॑గ్నే ర॒థంతి॑ష్ఠ । ఏకా᳚శ్వమేక॒యోజ॑నం । ఏకచక్ర॑మేక॒ధురం । వా॒తధ్రా॑జిగ॒తిం వి॑భో । న॒ రి॒ష్యతి॑ న వ్య॒థతే ॥ 54 ॥ 1-11-7 నా॒స్యాక్షో॑ యాతు॒ సజ్జ॑తి । యచ్ఛ్వేతా᳚న్రోహి॑తాగ్ంశ్చా॒గ్నేః । ర॒థే యు॑క్త్వాఽధి॒తిష్ఠ॑తి । ఏకయా చ దశభిశ్చ॑ స్వభూ॒తే । ద్వాభ్యామిష్టయే విగ్ం॑శత్యా॒ చ । తిసృభిశ్చ వహసే త్రిగ్ం॑శతా॒ చ । నియుద్భిర్వాయవిహితా॑ విముం॒చ ॥ 55 ॥ 1-11-8 ఆత॑నుష్వ॒ ప్రత॑నుష్వ । ఉ॒ద్ధమాఽఽధ॑మ॒ సంధ॑మ । ఆదిత్యే చంద్ర॑వర్ణా॒నాం । గర్భ॒మాధే॑హి॒ యః పుమాన్॑ । ఇ॒తస్సి॒క్తగ్ం సూర్య॑గతం । చం॒ద్రమ॑సే॒ రసం॑కృధి । వారాదంజన॑యాగ్రే॒ఽగ్నిం । య ఏకో॑ రుద్ర॒ ఉచ్య॑తే । అ॒సం॒ఖ్యా॒తాస్స॑హస్రా॒ణి । స్మ॒ర్యతే॑ న చ॒ దృశ్య॑తే ॥ 56 ॥ 1-12-1 ఏ॒వమే॒తన్ని॑బోధత । ఆమం॒ద్రైరిం॑ద్ర॒ హరి॑భిః । యా॒హి మ॒యూర॑రోమభిః । మా త్వా కేచిన్నియేమురి॑న్న పా॒శినః । ద॒ధ॒న్వేవ॒ తా ఇ॑హి । మా మం॒ద్రైరిం॑ద్ర॒ హరి॑భిః । యా॒మి మ॒యూర॑రోమభిః । మా మా కేచిన్న్యేమురి॑న్న పా॒శినః । ని॒ధ॒న్వేవ॒ తాం 2 ఇ॑మి । అణుభిశ్చ మ॑హద్భి॒శ్చ ॥ 57 ॥ 1-12-2 ని॒ఘృష్వై॑రస॒మాయు॑తైః । కాలైర్హరిత్వ॑మాప॒న్నైః । ఇంద్రాయా॑హి స॒హస్ర॑యుక్ । అ॒గ్నిర్వి॒భ్రాష్టి॑వసనః । వా॒యుశ్శ్వేత॑సికద్రు॒కః । సం॒వ॒థ్స॒రో వి॑షూ॒వర్ణై॑: । నిత్యా॒స్తేఽనుచ॑రాస్త॒వ । సుబ్రహ్మణ్యోగ్ం సుబ్రహ్మణ్యోగ్ం సు॑బ్రహ్మ॒ణ్యోం । ఇంద్రాగచ్ఛ హరివ ఆగచ్ఛ మే॑ధాతి॒థేః । మేష వృషణశ్వ॑స్య మే॒నే ॥ 58 ॥ 1-12-3 గౌరావస్కందిన్నహల్యా॑యై జా॒ర । కౌశికబ్రాహ్మణ గౌతమ॑బ్రువా॒ణ । అ॒రు॒ణాశ్వా॑ ఇ॒హాగ॑తాః । వస॑వః పృథివి॒క్షిత॑: । అ॒ష్టౌ ది॒గ్వాస॑సో॒ఽగ్నయ॑: । అగ్నిశ్చ జాతవేదా᳚శ్చేత్యే॒తే । తామ్రాశ్వా᳚స్తామ్ర॒రథాః । తామ్రవర్ణా᳚స్తథా॒ఽసితాః । దండహస్తా᳚: ఖాద॒గ్దతః । ఇతో రుద్రా᳚: పరాం॒గతాః ॥ 59 ॥ 1-12-4 ఉక్తగ్గ్ స్థానం ప్రమాణంచ॑ పుర॒ ఇత । బృహ॒స్పతి॑శ్చ సవి॒తా చ॑ । వి॒శ్వరూ॑పైరి॒హాగ॑తాం । రథే॑నోదక॒వర్త్మ॑నా । అ॒ప్సుషా॑ ఇతి॒ తద్ద్వ॑యోః । ఉక్తో వేషో॑ వాసా॒గ్ం॒సి చ । కాలావయవానామిత॑: ప్రతీ॒చ్యా । వాసాత్యా॑ ఇత్య॒శ్వినోః । కోఽన్తరిక్షే శబ్దంక॑రోతీ॒తి । వాసిష్ఠౌ రౌహిణో మీమాగ్ం॑సాంచ॒క్రే । తస్యై॒షా భవ॑తి । వా॒శ్రేవ॑ వి॒ద్యుదితి॑ । బ్రహ్మ॑ణ ఉ॒దర॑ణమసి । బ్రహ్మ॑ణ ఉదీ॒రణ॑మసి । బ్రహ్మ॑ణ ఆ॒స్తర॑ణమసి । బ్రహ్మ॑ణ ఉప॒స్తర॑ణమసి ॥ 60 ॥ 1-12-5 అ॒ష్టయో॑నీమ॒ష్టపు॑త్రాం । అ॒ష్టప॑త్నీమి॒మాం మహీం᳚ । అ॒హం వేద॒ న మే॑ మృత్యుః । నచామృ॑త్యుర॒ఘాఽహ॑రత్ । అ॒ష్టయో᳚న్య॒ష్టపు॑త్రం । అ॒ష్టప॑ది॒దమం॒తరి॑క్షం । అ॒హం వేద॒ న మే॑ మృత్యుః । నచామృ॑త్యుర॒ఘాఽహ॑రత్ । అ॒ష్టయో॑నీమ॒ష్టపు॑త్రాం । అ॒ష్టప॑త్నీమ॒మూందివం᳚ ॥ 61 ॥ 1-13-1 అ॒హం వేద॒ న మే॑ మృత్యుః । నచామృ॑త్యుర॒ఘాఽఽహ॑రత్ । సు॒త్రామా॑ణం మ॒హీమూ॒షు । అది॑తి॒ర్ద్యౌరది॑తిరం॒తరి॑క్షం । అది॑తిర్మా॒తా స పి॒తా స పు॒త్రః । విశ్వే॑ దే॒వా అది॑తి॒: పంచ॒జనా᳚: । అది॑తిర్జా॒తమది॑తి॒ర్జని॑త్వం । అ॒ష్టౌ పు॒త్రాసో॒ అది॑తేః । యే జా॒తాస్త॒న్వ॑: పరి॑ । దే॒వాం 2 ఉప॑ప్రైత్స॒ప్తభి॑: ॥ 62 ॥ 1-13-2 ప॒రా॒ మా॒ర్తాం॒డమాస్య॑త్ । స॒ప్తభి॑: పు॒త్రైరది॑తిః । ఉప॒ప్రైత్పూ॒ర్వ్యం॑ యుగం᳚ । ప్ర॒జాయై॑ మృ॒త్యవే త॑త్ । ప॒రా॒ మా॒ర్తాం॒డమాభ॑ర॒దితి॑ । తాననుక్ర॑మిష్యా॒మః । మి॒త్రశ్చ॒ వరు॑ణశ్చ । ధా॒తా చా᳚ర్యా॒మా చ॑ । అగ్ంశ॑శ్చ॒ భగ॑శ్చ । ఇంద్రశ్చ వివస్వాగ్ం॑శ్చేత్యే॒తే । హి॒ర॒ణ్య॒గ॒ర్భో హ॒గ్ం॒సశ్శు॑చి॒షత్ । బ్రహ్మ॑జజ్ఞా॒నం తదిత్ప॒దమితి॑ । గ॒ర్భః ప్రా॑జాప॒త్యః । అథ॒ పురు॑షః స॒ప్తపురు॑షః ॥ 63 ॥ 1-13-3 యోఽసౌ॑ త॒పన్ను॒దేతి॑ । స సర్వే॑షాం భూ॒తానాం᳚ ప్రా॒ణానా॒దాయో॒దేతి॑ । మా మే᳚ ప్ర॒జయా॒ మా ప॑శూ॒నాం । మా మమ॑ ప్రా॒ణానా॒దాయోద॑గాః । అ॒సౌ యో᳚ఽస్త॒మేతి॑ । స సర్వే॑షాం భూ॒తానాం᳚ ప్రా॒ణానా॒దాయా॒స్తమేతి॑ । మా మే᳚ ప్ర॒జయా॒ మా ప॑శూ॒నాం । మా మమ॑ ప్రా॒ణానా॒దాయాఽస్తం॑గాః । అ॒సౌ య ఆ॒పూర్య॑తి । స సర్వే॑షాం భూ॒తానాం᳚ ప్రా॒ణైరా॒పూర్య॑తి ॥ 64 ॥ 1-14-1 మా మే᳚ ప్ర॒జయా॒ మా ప॑శూ॒నాం । మా మమ॑ ప్రా॒ణైరా॒పూరి॑ష్ఠాః । అ॒సౌ యో॑ఽప॒క్షీయ॑తి । స సర్వే॑షాం భూ॒తానాం᳚ ప్రా॒ణైరప॑క్షీయతి । మా మే᳚ ప్ర॒జయా॒ మా ప॑శూ॒నాం । మా మమ॑ ప్రా॒ణైరప॑క్షేష్ఠాః । అ॒మూని॒ నక్ష॑త్రాణి । సర్వే॑షాం భూ॒తానాం᳚ ప్రా॒ణైరప॑ప్రసర్పంతి॒ చోథ్స॑ర్పంతి చ । మా మే᳚ ప్ర॒జయా॒ మా ప॑శూ॒నాం । మా మమ॑ ప్రా॒ణైరప॑ప్రసృపత॒ మోథ్సృ॑పత ॥ 65 ॥ 1-14-2 ఇ॒మే మాసా᳚శ్చార్ధమా॒సాశ్చ॑ । సర్వే॑షాం భూ॒తానాం᳚ ప్రా॒ణైరప॑ప్రసర్పంతి॒ చోథ్స॑ర్పంతి చ । మా మే᳚ ప్ర॒జయా॒ మా ప॑శూ॒నాం । మా మమ॑ ప్రా॒ణైరప॑ప్రసృపత॒ మోథ్సృ॑పత । ఇ॒మ ఋ॒తవ॑: । సర్వే॑షాం భూ॒తానాం᳚ ప్రా॒ణైరప॑ప్రసర్పంతి॒ చోథ్స॑ర్పంతి చ । మా మే᳚ ప్ర॒జయా॒ మా ప॑శూ॒నాం । మా మమ॑ ప్రా॒ణైరప॑ప్రసృపత॒ మోథ్సృ॑పత । అ॒యగ్ం సం॑వథ్స॒రః । సర్వే॑షాం భూ॒తానాం᳚ ప్రా॒ణైరప॑ప్రసర్పతి॒ చోథ్స॑ర్పతి చ ॥ 66 ॥ 1-14-3 మా మే᳚ ప్ర॒జయా॒ మా ప॑శూ॒నాం । మా మమ॑ ప్రా॒ణైరప॑ప్రసృప॒ మోథ్సృ॑ప । ఇ॒దమహ॑: । సర్వే॑షాం భూ॒తానాం᳚ ప్రా॒ణైరప॑ప్రసర్పతి॒ చోథ్స॑ర్పతి చ । మా మే᳚ ప్ర॒జయా॒ మా ప॑శూ॒నాం । మా మమ॑ ప్రా॒ణైరప॑ప్రసృప॒ మోథ్సృ॑ప । ఇ॒యగ్ంరాత్రి॑: । సర్వే॑షాం భూ॒తానాం᳚ ప్రా॒ణైరప॑ప్రసర్పతి॒ చోథ్స॑ర్పతి చ । మా మే᳚ ప్ర॒జయా॒ మా ప॑శూ॒నాం । మా మమ॑ ప్రా॒ణైరప॑ప్రసృప॒ మోథ్సృ॑ప । ఓం భూర్భువ॒స్స్వ॑: । ఏతద్వో మిథునం మానో మిథు॑నగ్ం రీ॒ఢ్వం ॥ 67 ॥ 1-14-4 అథాదిత్యస్యాష్టపు॑రుష॒స్య । వసూనామాదిత్యానాగ్ స్థానే స్వతేజ॑సా భా॒ని । రుద్రాణామాదిత్యానాగ్ స్థానే స్వతేజ॑సా భా॒ని । ఆదిత్యానామాదిత్యానాగ్ స్థానే స్వతేజ॑సా భా॒ని । సతాగ్ం॑సత్యా॒నాం । ఆదిత్యానాగ్ స్థానే స్వతేజ॑సా భా॒ని । అభిధూన్వతా॑మభి॒ఘ్నతాం । వాతవ॑తాం మ॒రుతాం । ఆదిత్యానాగ్ స్థానే స్వతేజ॑సా భా॒ని । ఋభూణామాదిత్యానాగ్ స్థానే స్వతేజ॑సా భా॒ని । విశ్వేషాం᳚దేవా॒నాం । ఆదిత్యానాగ్ స్థానే స్వతేజ॑సా భా॒ని । సంవథ్సర॑స్య స॒వితుః । ఆదిత్యస్య స్థానే స్వతేజ॑సా భా॒ని । ఓం భూర్భువ॒స్స్వ॑: । రశ్మయో వో మిథునం మా నో మిథు॑నగ్ం రీ॒ఢ్వం ॥ 68 ॥ 1-15-1 ఆరోగస్య స్థానే స్వతేజ॑సా భా॒ని । భ్రాజస్య స్థానే స్వతేజ॑సా భా॒ని । పటరస్య స్థానే స్వతేజ॑సా భా॒ని । పతంగస్య స్థానే స్వతేజ॑సా భా॒ని । స్వర్ణరస్య స్థానే స్వతేజ॑సా భా॒ని । జ్యోతిషీమతస్య స్థానే స్వతేజ॑సా భా॒ని । విభాసస్య స్థానే స్వతేజ॑సా భా॒ని । కశ్యపస్య స్థానే స్వతేజ॑సా భా॒ని । ఓం భూర్భువ॒స్స్వ॑: । ఆపో వో మిథునం మా నో మిథు॑నగ్ం రీ॒ఢ్వం ॥ 69 ॥ 1-16-1 అథ వాయోరేకాదశపురుషస్యైకాదశ॑స్త్రీక॒స్య । ప్రభ్రాజమానానాగ్ం రుద్రాణాగ్ స్థానే స్వతేజ॑సా భా॒ని । వ్యవదాతానాగ్ం రుద్రాణాగ్ స్థానే స్వతేజ॑సా భా॒ని । వాసుకివైద్యుతానాగ్ం రుద్రాణాగ్ స్థానే స్వతేజ॑సా భా॒ని । రజతానాగ్ం రుద్రాణాగ్ స్థానే స్వతేజ॑సా భా॒ని । పరుషాణాగ్ం రుద్రాణాగ్ స్థానే స్వతేజ॑సా భా॒ని । శ్యామానాగ్ం రుద్రాణాగ్ స్థానే స్వతేజ॑సా భా॒ని । కపిలానాగ్ం రుద్రాణాగ్ స్థానే స్వతేజ॑సా భా॒ని । అతిలోహితానాగ్ం రుద్రాణాగ్ స్థానే స్వతేజ॑సా భా॒ని । ఊర్ధ్వానాగ్ం రుద్రాణాగ్ స్థానే స్వతేజ॑సా భా॒ని ॥ 70 ॥ 1-17-1 అవపతంతానాగ్ం రుద్రాణాగ్ స్థానే స్వతేజ॑సా భా॒ని । వైద్యుతానాగ్ం రుద్రాణాగ్ స్థానే స్వతేజ॑సా భా॒ని । ప్రభ్రాజమానీనాగ్ం రుద్రాణీనాగ్ స్థానే స్వతేజ॑సా భా॒ని । వ్యవదాతీనాగ్ం రుద్రాణీనాగ్ స్థానే స్వతేజ॑సా భా॒ని । వాసుకివైద్యుతీనాగ్ం రుద్రాణీనాగ్ స్థానే స్వతేజ॑సా భా॒ని । రజతానాగ్ం రుద్రాణీనాగ్ స్థానే స్వతేజ॑సా భా॒ని । పరుషాణాగ్ం రుద్రాణీనాగ్ స్థానే స్వతేజ॑సా భా॒ని । శ్యామానాగ్ం రుద్రాణీనాగ్ స్థానే స్వతేజ॑సా భా॒ని । కపిలానాగ్ం రుద్రాణీనాగ్ స్థానే స్వతేజ॑సా భా॒ని । అతిలోహితీనాగ్ం రుద్రాణీనాగ్ స్థానే స్వతేజ॑సా భా॒ని । ఊర్ధ్వానాగ్ం రుద్రాణీనాగ్ స్థానే స్వతేజ॑సా భా॒ని । అవపతంతీనాగ్ం రుద్రాణీనాగ్ స్థానే స్వతేజ॑సా భా॒ని । వైద్యుతీనాగ్ం రుద్రాణీనాగ్ స్థానే స్వతేజ॑సా భా॒ని । ఓం భూర్భువ॒స్స్వ॑: । రూపాణి వో మిథునం మా నో మిథు॑నగ్ం రీ॒ఢ్వం ॥ 71 ॥ 1-17-2 అథాగ్నే॑రష్టపు॑రుష॒స్య । అగ్నేః పూర్వదిశ్యస్య స్థానే స్వతేజ॑సా భా॒ని । జాతవేదస ఉపదిశ్యస్య స్థానే స్వతేజ॑సా భా॒ని । సహోజసో దక్షిణదిశ్యస్య స్థానే స్వతేజ॑సా భా॒ని । అజిరాప్రభవ ఉపదిశ్యస్య స్థానే స్వతేజ॑సా భా॒ని । వైశ్వానరస్యాపరదిశ్యస్య స్థానే స్వతేజ॑సా భా॒ని । నర్యాపస ఉపదిశ్యస్య స్థానే స్వతేజ॑సా భా॒ని । పంక్తిరాధస ఉదగ్దిశ్యస్య స్థానే స్వతేజ॑సా భా॒ని । విసర్పిణ ఉపదిశ్యస్య స్థానే స్వతేజ॑సా భా॒ని । ఓం భూర్భువ॒స్స్వ॑: । దిశో వో మిథునం మా నో మిథు॑నగ్ం రీ॒ఢ్వం ॥ 72 ॥ 1-18-1 దక్షిణపూర్వస్యాందిశి విస॑ర్పీ న॒రకః । తస్మాన్నః ప॑రిపా॒హి । దక్షిణాస్యాందిశ్యవిస॑ర్పీ న॒రకః । తస్మాన్నః ప॑రిపా॒హి । ఉత్తరపూర్వస్యాందిశి విషా॑దీ న॒రకః । తస్మాన్నః ప॑రిపా॒హి । ఉత్తరాపరస్యాందిశ్యవిషా॑దీ న॒రకః । తస్మాన్నః ప॑రిపా॒హి । ఆయస్మింథ్సప్త వాసవా ఇంద్రియాణి శతక్రత॑విత్యే॒తే ॥ 73 ॥ 1-19-1 ఇం॒ద్ర॒ఘో॒షా వో॒ వసు॑భిః పు॒రస్తా॒దుప॑దధతాం । మనో॑జవసో వః పి॒తృభి॑ర్దక్షిణ॒త ఉప॑దధతాం । ప్రచే॑తా వో రు॒ద్రైః ప॒శ్చాదుప॑దధతాం । వి॒శ్వక॑ర్మా వ ఆది॒త్యైరు॑త్తర॒త ఉప॑దధతాం । త్వష్టా॑ వో రూ॒పైరు॒పరి॑ష్టా॒దుప॑దధతాం । సంజ్ఞానం వః ప॑శ్చాది॒తి । ఆ॒ది॒త్యస్సర్వో॒ఽగ్నిః పృ॑థి॒వ్యాం । వా॒యురం॒తరి॑క్షే । సూర్యో॑ ది॒వి । చం॒ద్రమా॑ ది॒క్షు । నక్ష॑త్రాణి॒ స్వలో॒కే । ఏ॒వా హ్యే॑వ । ఏ॒వా హ్య॑గ్నే । ఏ॒వా హి వా॑యో । ఏ॒వా హీం᳚ద్ర । ఏ॒వా హి పూ॑షన్ । ఏ॒వా హి దే॑వాః ॥ 74 ॥ 1-20-1 ఆప॑మాపామ॒పః సర్వా᳚: । అ॒స్మాద॒స్మాది॒తోఽముత॑: । అ॒గ్నిర్వా॒యుశ్చ॒ సూర్య॑శ్చ । స॒హ సం॑చస్క॒రర్ద్ధి॑యా । వా॒య్వశ్వా॑ రశ్మి॒పత॑యః । మరీ᳚చ్యాత్మానో॒ అద్రు॑హః । దే॒వీర్భు॑వన॒సూవ॑రీః । పు॒త్ర॒వ॒త్త్వాయ॑ మే సుత । మహానామ్నీర్మ॑హామా॒నాః । మ॒హ॒సో మ॑హస॒స్స్వ॑: ॥ 75 ॥ 1-21-1 దే॒వీః ప॑ర్జన్య॒సూవ॑రీః । పు॒త్ర॒వ॒త్త్వాయ॑ మే సుత । అ॒పాఽశ్న్యు॑ష్ణిమ॒పారక్ష॑: । అ॒పాఽశ్న్యు॑ష్ణిమ॒పారఘం᳚ । అపా᳚ఘ్రా॒మప॑చా॒ఽవర్తిం᳚ । అప॑దే॒వీరి॒తో హి॑త । వజ్రం॑దే॒వీరజీ॑తాగ్ంశ్చ । భువ॑నందేవ॒సూవ॑రీః । ఆ॒ది॒త్యానది॑తిందే॒వీం । యోని॑నోర్ధ్వము॒దీష॑త ॥ 76 ॥ 1-21-2 భ॒ద్రం కర్ణే॑భిః శృణు॒యామ॑ దేవాః । భ॒ద్రం ప॑శ్యేమా॒క్షభి॒ర్యజ॑త్రాః । స్థి॒రైరంగై᳚స్తుష్టు॒వాగ్ం స॑స్త॒నూభి॑: । వ్యశే॑మ దే॒వహి॑తం॒ యదాయు॑: । స్వ॒స్తి న॒ ఇంద్రో॑ వృ॒ద్ధశ్ర॑వాః । స్వ॒స్తి న॑: పూ॒షా వి॒శ్వవే॑దాః । స్వ॒స్తి న॒స్తార్క్ష్యో॒ అరి॑ష్టనేమిః । స్వ॒స్తి నో॒ బృహ॒స్పతి॑ర్దధాతు ॥ కే॒తవో॒ అరు॑ణాసశ్చ । ఋ॒ష॒యో వాత॑రశ॒నాః । ప్ర॒తి॒ష్ఠాగ్ం శ॒తధా॑ హి । స॒మాహి॑తాసో సహస్ర॒ధాయ॑సం । శి॒వా న॒శ్శంత॑మా భవంతు । ది॒వ్యా ఆప॒ ఓష॑ధయః । సు॒మృ॒డీ॒కా సర॑స్వతి । మా తే॒ వ్యో॑మ సం॒దృశి॑ ॥ 77 ॥ 1-21-3 యో॑ఽపాం పుష్పం॒ వేద॑ । పుష్ప॑వాన్ ప్ర॒జావా᳚న్ పశు॒మాన్ భ॑వతి । చం॒ద్రమా॒ వా అ॒పాం పుష్పం᳚ । పుష్ప॑వాన్ ప్ర॒జావా᳚న్ పశు॒మాన్ భ॑వతి । య ఏ॒వం వేద॑ । యో॑ఽపామా॒యత॑నం॒ వేద॑ । ఆ॒యత॑నవాన్ భవతి । అ॒గ్నిర్వా అ॒పామా॒యత॑నం । ఆ॒యత॑నవాన్ భవతి । యో᳚ఽగ్నేరా॒యత॑నం॒ వేద॑ ॥ 78 ॥ 1-22-1 ఆ॒యత॑నవాన్ భవతి । ఆపో॒ వా అ॒గ్నేరా॒యత॑నం । ఆ॒యత॑నవాన్ భవతి । య ఏ॒వం వేద॑ । యో॑ఽపామా॒యత॑నం॒ వేద॑ । ఆ॒యత॑నవాన్ భవతి । వా॒యుర్వా అ॒పామా॒యత॑నం । ఆ॒యత॑నవాన్ భవతి । యో వా॒యోరా॒యత॑నం॒ వేద॑ । ఆ॒యత॑నవాన్ భవతి ॥ 79 ॥ 1-22-2 ఆపో॒ వై వా॒యోరా॒యత॑నం । ఆ॒యత॑నవాన్ భవతి । య ఏ॒వం వేద॑ । యో॑ఽపామా॒యత॑నం॒ వేద॑ । ఆ॒యత॑నవాన్ భవతి । అ॒సౌ వై తప॑న్న॒పామా॒యత॑నం । ఆ॒యత॑నవాన్ భవతి । యో॑ఽముష్య॒ తప॑త ఆ॒యత॑నం॒ వేద॑ । ఆ॒యత॑నవాన్ భవతి । ఆపో॒ వా అ॒ముష్య॒ తప॑త ఆ॒యత॑నం ॥ 80 ॥ 1-22-3 ఆ॒యత॑నవాన్ భవతి । య ఏ॒వం వేద॑ । యో॑ఽపామా॒యత॑నం॒ వేద॑ । ఆ॒యత॑నవాన్ భవతి । చం॒ద్రమా॒ వా అ॒పామా॒యత॑నం । ఆ॒యత॑నవాన్ భవతి । యశ్చం॒ద్రమ॑స ఆ॒యత॑నం॒ వేద॑ । ఆ॒యత॑నవాన్ భవతి । ఆపో॒ వై చం॒ద్రమ॑స ఆ॒యత॑నం। ఆ॒యత॑నవాన్ భవతి ॥ 81 ॥ 1-22-4 య ఏ॒వం వేద॑ । యో॑ఽపామా॒యత॑నం॒ వేద॑ । ఆ॒యత॑నవాన్ భవతి । నక్ష॑త్రాణి॒ వా అ॒పామా॒యత॑నం । ఆ॒యత॑నవాన్ భవతి । యో నక్ష॑త్రాణామా॒యత॑నం॒ వేద॑ । ఆ॒యత॑నవాన్ భవతి । ఆపో॒ వై నక్ష॑త్రాణామా॒యత॑నం । ఆ॒యత॑నవాన్ భవతి । య ఏ॒వం వేద॑ ॥ 82 ॥ 1-22-5 యో॑ఽపామా॒యత॑నం॒ వేద॑ । ఆ॒యత॑నవాన్ భవతి । ప॒ర్జన్యో॒ వా అ॒పామా॒యత॑నం । ఆ॒యత॑నవాన్ భవతి । యః ప॒ర్జన్య॑స్యా॒యత॑నం॒ వేద॑ । ఆ॒యత॑నవాన్ భవతి । ఆపో॒ వై ప॒ర్జన్య॑స్యా॒ఽఽయత॑నం । ఆ॒యత॑నవాన్ భవతి । య ఏ॒వం వేద॑ । యో॑ఽపామా॒యత॑నం॒ వేద॑ ॥ 83 ॥ 1-22-6 ఆ॒యత॑నవాన్ భవతి । సం॒వ॒థ్స॒రో వా అ॒పామా॒యత॑నం । ఆ॒యత॑నవాన్ భవతి । యస్సం॑వథ్స॒రస్యా॒యత॑నం॒ వేద॑ । ఆ॒యత॑నవాన్ భవతి । ఆపో॒ వై సం॑వథ్స॒రస్యా॒ఽఽయత॑నం । ఆ॒యత॑నవాన్ భవతి । య ఏ॒వం వేద॑ । యో᳚ఽప్సు నావం॒ ప్రతి॑ష్ఠితాం॒ వేద॑ । ప్రత్యే॒వ తి॑ష్ఠతి ॥ 84 ॥ 1-22-7 ఇ॒మే వై లో॒కా అ॒ప్సు ప్రతి॑ష్ఠితాః । తదే॒షాఽభ్యనూ᳚క్తా । అ॒పాగ్ం రస॒ముద॑యగ్ం సన్ । సూర్యే॑ శు॒క్రగ్ం స॒మాభృ॑తం । అ॒పాగ్ం రస॑స్య॒ యో రస॑: । తం వో॑ గృహ్ణామ్యుత్త॒మమితి॑ । ఇ॒మే వై లో॒కా అ॒పాగ్ం రస॑: । తే॑ఽముష్మి॑న్నాది॒త్యే స॒మాభృ॑తాః । జా॒ను॒ద॒ఘ్నీము॑త్తరవే॒దీంఖా॒త్వా । అ॒పాం పూ॑రయి॒త్వా గు॑ల్ఫద॒ఘ్నం ॥ 85 ॥ 1-22-8 పుష్కరపర్ణైః పుష్కరదండైః పుష్కరైశ్చ॑ సగ్గ్స్తీ॒ర్య । తస్మి॑న్విహా॒యసే । అ॒గ్నిం ప్ర॒ణీయో॑పసమా॒ధాయ॑ । బ్ర॒హ్మ॒వా॒దినో॑ వదంతి । కస్మా᳚త్ప్రణీ॒తేఽయమ॒గ్నిశ్చీ॒యతే᳚ । సాప్ర॑ణీ॒తేఽయమ॒ప్సు హ్యయం॑చీ॒యతే᳚ । అ॒సౌ భువ॑నే॒ఽప్యనా॑హితాగ్నిరే॒తాః । తమ॒భిత॑ ఏ॒తా అ॒బీష్ట॑కా॒ ఉప॑దధాతి । అ॒గ్ని॒హో॒త్రే ద॑ర్శపూర్ణమా॒సయో᳚: । ప॒శు॒బం॒ధే చా॑తుర్మా॒స్యేషు॑ ॥ 86 ॥ 1-22-9 అథో॑ ఆహుః । సర్వే॑షు యజ్ఞక్ర॒తుష్వితి॑ । ఏ॒తద్ధ॑ స్మ॒ వా ఆ॑హుశ్శండి॒లాః । కమ॒గ్నించి॑నుతే । స॒త్రి॒యమ॒గ్నించి॑న్వా॒నః । సం॒వ॒థ్స॒రం ప్ర॒త్యక్షే॑ణ । కమ॒గ్నించి॑నుతే । సా॒వి॒త్రమ॒గ్నించి॑న్వా॒నః । అ॒ముమా॑ది॒త్యం ప్ర॒త్యక్షే॑ణ । కమ॒గ్నించి॑నుతే ॥ 87 ॥ 1-22-10 నా॒చి॒కే॒తమ॒గ్నించి॑న్వా॒నః । ప్రా॒ణాన్ప్ర॒త్యక్షే॑ణ । కమ॒గ్నించి॑నుతే । చా॒తు॒ర్హో॒త్రి॒యమ॒గ్నించి॑న్వా॒నః । బ్రహ్మ॑ ప్ర॒త్యక్షే॑ణ । కమ॒గ్నించి॑నుతే । వై॒శ్వ॒సృ॒జమ॒గ్నించి॑న్వా॒నః । శరీ॑రం ప్ర॒త్యక్షే॑ణ । కమ॒గ్నించి॑నుతే । ఉ॒పా॒ను॒వా॒క్య॑మా॒శుమ॒గ్నించి॑న్వా॒నః ॥ 88 ॥ 1-22-11 ఇ॒మాఀల్లో॒కాన్ప్ర॒త్యక్షే॑ణ । కమ॒గ్నించి॑నుతే । ఇ॒మమా॑రుణకేతుకమ॒గ్నించి॑న్వా॒నః ఇతి॑ । య ఏ॒వాసౌ । ఇ॒తశ్చా॒ముత॑శ్చాఽవ్యతీపా॒తీ । తమితి॑ । యో᳚ఽగ్నేర్మి॑థూ॒యా వేద॑ । మి॒థు॒న॒వాన్భ॑వతి । ఆపో॒ వా అ॒గ్నేర్మి॑థూ॒యాః । మి॒థు॒న॒వాన్భ॑వతి । య ఏ॒వం వేద॑ ॥ 89 ॥ 1-22-12 ఆపో॒ వా ఇ॒దమా॑సంథ్సలి॒లమే॒వ । స ప్ర॒జాప॑తి॒రేక॑: పుష్కరప॒ర్ణే సమ॑భవత్ । తస్యాంత॒ర్మన॑సి కామ॒స్సమ॑వర్తత । ఇ॒దగ్ం సృ॑జేయ॒మితి॑ । తస్మా॒ద్యత్పురు॑షో॒ మన॑సాఽభి॒గచ్ఛ॑తి । తద్వా॒చా వ॑దతి । తత్కర్మ॑ణా కరోతి । తదే॒షాఽభ్యనూ᳚క్తా । కామ॒స్తదగ్రే॒ సమ॑వర్త॒తాధి॑ । మన॑సో॒ రేత॑: ప్రథ॒మం యదాసీ᳚త్ ॥ 90 ॥ 1-23-1 స॒తో బంధు॒మస॑తి॒ ని॑రవిందన్ । హృ॒ది ప్ర॒తీష్యా॑ క॒వయో॑ మనీ॒షేతి॑ । ఉపై॑నం॒తదుప॑నమతి । యత్కా॑మో॒ భవ॑తి । య ఏ॒వం వేద॑ । స తపో॑ఽతప్యత । స తప॑స్త॒ప్త్వా । శరీ॑రమధూనుత । తస్య॒ యన్మా॒గ్ం॒సమాసీ᳚త్ । తతో॑ఽరు॒ణాః కే॒తవో॒ వాత॑రశ॒నా ఋష॑య॒ ఉద॑తిష్ఠన్ ॥ 91 ॥ 1-23-2 యే నఖా᳚: । తే వై॑ఖాన॒సాః । యే వాలా᳚: । తే వా॑లఖి॒ల్యాః । యో రస॑: । సో॑ఽపాం । అం॒త॒ర॒తః కూ॒ర్మం భూ॒తగ్ం సర్పం॑తం । తమ॑బ్రవీత్ । మమ॒ వైత్వఙ్మా॒గ్ం॒సా । సమ॑భూత్ ॥ 92 ॥ 1-23-3 నేత్య॑బ్రవీత్ । పూర్వ॑మే॒వాహమి॒హాస॒మితి॑ । తత్పురు॑షస్య పురుష॒త్వం । స స॒హస్ర॑శీర్షా॒ పురు॑షః । స॒హ॒స్రా॒క్షస్స॒హస్ర॑పాత్ । భూ॒త్వోద॑తిష్ఠత్ । తమ॑బ్రవీత్ । త్వం వై పూర్వగ్ం॑ సమ॑భూః । త్వమి॒దం పూర్వ॑: కురు॒ష్వేతి॑ । స ఇ॒త ఆ॒దాయాప॑: ॥ 93 ॥ 1-23-4 అం॒జ॒లినా॑ పు॒రస్తా॑దు॒పాద॑ధాత్ । ఏ॒వాహ్యే॒వేతి॑ । తత॑ ఆది॒త్య ఉద॑తిష్ఠత్ । సా ప్రాచీ॒ దిక్ । అథా॑రు॒ణః కే॒తుర్ద॑క్షిణ॒త ఉ॒పాద॑ధాత్ । ఏ॒వాహ్యగ్న॒ ఇతి॑ । తతో॒ వా అ॒గ్నిరుద॑తిష్ఠత్ । సా ద॑క్షి॒ణా దిక్ । అథా॑రు॒ణః కే॒తుః ప॒శ్చాదు॒పాద॑ధాత్ । ఏ॒వాహి వాయో॒ ఇతి॑ ॥ 94 ॥ 1-23-5 తతో॑ వా॒యురుద॑తిష్ఠత్ । సా ప్ర॒తీచీ॒ దిక్ । అథా॑రు॒ణః కే॒తురు॑త్తర॒త ఉ॒పాద॑ధాత్ । ఏ॒వాహీంద్రేతి॑ । తతో॒ వా ఇంద్ర॒ ఉద॑తిష్ఠత్ । సోదీ॑చీ॒ దిక్ । అథా॑రు॒ణః కే॒తుర్మధ్య॑ ఉ॒పాద॑ధాత్ । ఏ॒వాహి పూష॒న్నితి॑ । తతో॒ వై పూ॒షోద॑తిష్ఠత్ । సేయందిక్ ॥ 95 ॥ 1-23-6 అథా॑రు॒ణః కే॒తురు॒పరి॑ష్టాదు॒పాద॑ధాత్ । ఏ॒వాహి దే॒వా ఇతి॑ । తతో॑ దేవమను॒ష్యాః పి॒తర॑: । గం॒ధ॒ర్వా॒ప్స॒రస॒శ్చోద॑తిష్ఠన్ । సోర్ధ్వా దిక్ । యా వి॒ప్రుషో॑ వి॒పరా॑పతన్ । తాభ్యోఽసు॑రా॒ రక్షాగ్ం॑సి పిశా॒చాశ్చోద॑తిష్ఠన్ । తస్మా॒త్తే పరా॑భవన్ । వి॒ప్రుడ్భ్యో॒ హి తే సమ॑భవన్ । తదే॒షాఽభ్యనూ᳚క్తా ॥ 96 ॥ 1-23-7 ఆపో॑ హ॒ యద్బృ॑హ॒తీర్గర్భా॒మాయన్॑ । దక్షం॒దధా॑నా జ॒నయం॑తీస్స్వయం॒భుం । తత॑ ఇ॒మేఽద్ధ్యసృ॑జ్యంత॒ సర్గా᳚: । అద్భ్యో॒ వా ఇ॒దగ్ం సమ॑భూత్ । తస్మా॑ది॒దగ్ం సర్వం॒ బ్రహ్మ॑ స్వయం॒భ్వితి॑ । తస్మా॑ది॒దగ్ం సర్వ॒గ్ం॒ శిథి॑లమి॒వాద్ధ్రువ॑మివాభవత్ । ప్ర॒జాప॑తి॒ర్వావ తత్ । ఆ॒త్మనా॒త్మానం॑ వి॒ధాయ॑ । తదే॒వాను॒ప్రావి॑శత్ । తదే॒షాఽభ్యనూ᳚క్తా ॥ 97 ॥ 1-23-8 వి॒ధాయ॑ లో॒కాన్వి॒ధాయ॑ భూ॒తాని॑ । వి॒ధాయ॒ సర్వా᳚: ప్ర॒దిశో॒ దిశ॑శ్చ । ప్ర॒జాప॑తిః ప్రథమ॒జా ఋ॒తస్య॑ । ఆ॒త్మనా॒త్మాన॑మ॒భిసంవి॑వే॒శేతి॑ । సర్వ॑మే॒వేదమా॒ప్త్వా । సర్వ॑మవ॒రుద్ధ్య॑ । తదే॒వాను॒ప్రవి॑శతి । య ఏ॒వం వేద॑ ॥ 98 ॥ 1-23-9 చతు॑ష్టయ్య॒ ఆపో॑ గృహ్ణాతి । చ॒త్వారి॒ వా అ॒పాగ్ం రూ॒పాణి॑ । మేఘో॑ వి॒ద్యుత్ । స్త॒న॒యి॒త్నుర్వృ॒ష్టిః । తాన్యే॒వావ॑రుంధే । ఆ॒తప॑తి॒ వర్ష్యా॑ గృహ్ణాతి । తాః పు॒రస్తా॒దుప॑దధాతి । ఏ॒తా వై బ్ర॑హ్మవర్చ॒స్యా ఆప॑: । ము॒ఖ॒త ఏ॒వ బ్ర॑హ్మవర్చ॒సమవ॑రుంధే । తస్మా᳚న్ముఖ॒తో బ్ర॑హ్మవర్చ॒సిత॑రః ॥ 99 ॥ 1-24-1 కూప్యా॑ గృహ్ణాతి । తా ద॑క్షిణ॒త ఉప॑దధాతి । ఏ॒తా వై తే॑జ॒స్వినీ॒రాప॑: । తేజ॑ ఏ॒వాస్య॑ దక్షిణ॒తో ద॑ధాతి । తస్మా॒ద్దక్షి॒ణోఽర్ధ॑స్తేజ॒స్విత॑రః । స్థా॒వ॒రా గృ॑హ్ణాతి । తాః ప॒శ్చాదుప॑దధాతి । ప్రతి॑ష్ఠితా॒ వై స్థా॑వ॒రాః । ప॒శ్చాదే॒వ ప్రతి॑తిష్ఠతి । వహం॑తీర్గృహ్ణాతి ॥ 100 ॥ 1-24-2 తా ఉ॑త్తర॒త ఉప॑దధాతి । ఓజ॑సా॒ వా ఏ॒తా వహం॑తీరి॒వోద్గ॑తీరి॒వ ఆకూజ॑తీరి॒వ ధావం॑తీః । ఓజ॑ ఏ॒వాస్యో᳚త్తర॒తో ద॑ధాతి । తస్మా॒దుత్త॒రోఽర్ధ॑ ఓజ॒స్విత॑రః । సం॒భా॒ర్యా గృ॑హ్ణాతి । తా మధ్య॒ ఉప॑దధాతి । ఇ॒యం వై సం॑భా॒ర్యాః । అ॒స్యామే॒వ ప్రతి॑తిష్ఠతి । ప॒ల్వ॒ల్యా గృ॑హ్ణాతి । తా ఉ॒పరి॑ష్టాదు॒పాద॑ధాతి ॥ 101 ॥ 1-24-3 అ॒సౌ వై ప॑ల్వ॒ల్యాః । అ॒ముష్యా॑మే॒వ ప్రతి॑తిష్ఠతి । ది॒క్షూప॑దధాతి । ది॒క్షు వా ఆప॑: । అన్నం॒ వా ఆప॑: । అ॒ద్భ్యో వా అన్నం॑జాయతే । యదే॒వాద్భ్యోఽన్నం॒జాయ॑తే । తదవ॑రుంధే । తం వా ఏ॒తమ॑రు॒ణాః కే॒తవో॒ వాత॑రశ॒నా ఋష॑యోఽచిన్వన్ । తస్మా॑దారుణకే॒తుక॑: ॥ 102 ॥ 1-24-4 తదే॒షాఽభ్యనూ᳚క్తా । కే॒తవో॒ అరు॑ణాసశ్చ । ఋ॒ష॒యో వాత॑రశ॒నాః । ప్ర॒తి॒ష్ఠాగ్ం శ॒తధా॑హి । స॒మాహి॑తాసో సహస్ర॒ధాయ॑స॒మితి॑ । శ॒తశ॑శ్చై॒వ స॒హస్ర॑శశ్చ॒ ప్రతి॑తిష్ఠతి । య ఏ॒తమ॒గ్నించి॑నుతే । య ఉ॑చైనమే॒వం వేద॑ ॥ 103 ॥ 1-24-5 జా॒ను॒ద॒ఘ్నీము॑త్తరవే॒దీంఖా॒త్వా । అ॒పాం పూ॑రయతి । అ॒పాగ్ం స॑ర్వ॒త్వాయ॑ । పు॒ష్క॒ర॒ప॒ర్ణగ్ం రు॒క్మం పురు॑ష॒మిత్యుప॑దధాతి । తపో॒ వై పు॑ష్కరప॒ర్ణం । స॒త్యగ్ం రు॒క్మః । అ॒మృతం॒ పురు॑షః । ఏ॒తావ॒ద్వావా᳚స్తి । యావ॑దే॒తత్ । యావ॑దే॒వాస్తి॑ ॥ 104 ॥ 1-25-1 తదవ॑రుంధే । కూ॒ర్మముప॑దధాతి । అ॒పామే॒వ మేధ॒మవ॑రుంధే । అథో᳚ స్వ॒ర్గస్య॑ లో॒కస్య॒ సమ॑ష్ట్యై । ఆప॑మాపామ॒పస్సర్వా᳚: । అ॒స్మాద॒స్మాది॒తోఽముత॑: । అ॒గ్నిర్వా॒యుశ్చ॒ సూర్య॑శ్చ । స॒హసం॑చస్క॒రర్ద్ధి॑యా॒ ఇతి॑ । వా॒య్వశ్వా॑ రశ్మి॒పత॑యః । లో॒కం పృ॑ణచ్ఛి॒ద్రం పృ॑ణ ॥ 105 ॥ 1-25-2 యాస్తి॒స్రః ప॑రమ॒జాః । ఇం॒ద్ర॒ఘో॒షా వో॒ వసు॑భిరే॒వాహ్యే॒వేతి॑ । పంచ॒చిత॑య॒ ఉపద॑ధాతి । పాంక్తో॒ఽగ్నిః । యావ॑నే॒వాగ్నిః । తంచి॑నుతే । లో॒కంపృ॑ణయా ద్వి॒తీయా॒ముప॑దధాతి । పంచ॑పదా॒ వై వి॒రాట్ । తస్యా॒ వా ఇ॒యం పాద॑: । అం॒తరి॑క్షం॒ పాద॑: । ద్యౌః పాద॑: । దిశ॒: పాద॑: । ప॒రోర॑జా॒: పాద॑: । వి॒రాజ్యే॒వ ప్రతి॑తిష్ఠతి । య ఏ॒తమ॒గ్నించి॑ను॒తే । య ఉ॑చైనమే॒వం వేద॑ ॥ 106 ॥ 1-25-3 అ॒గ్నిం ప్ర॒ణీయో॑పసమా॒ధాయ॑ । తమ॒భిత॑ ఏ॒తా అ॒బీష్ట॑కా॒ ఉప॑దధాతి । అ॒గ్ని॒హో॒త్రే ద॑ర్శపూర్ణమా॒సయో᳚: । ప॒శు॒బం॒ధే చా॑తుర్మా॒స్యేషు॑ । అథో॑ ఆహుః । సర్వే॑షు యజ్ఞక్ర॒తుష్వితి॑ । అథ॑ హస్మాహారు॒ణస్స్వా॑యం॒భువ॑: । సా॒వి॒త్రః సర్వో॒ఽగ్నిరిత్యన॑నుషంగం మన్యామహే । నానా॒ వా ఏ॒తేషాం᳚ వీ॒ర్యా॑ణి । కమ॒గ్నించి॑నుతే ॥ 107 ॥ 1-26-1 స॒త్రి॒యమ॒గ్నించి॑న్వా॒నః । కమ॒గ్నించి॑నుతే । సా॒వి॒త్రమ॒గ్నించి॑న్వా॒నః । కమ॒గ్నించి॑నుతే । నా॒చి॒కే॒తమ॒గ్నించి॑న్వా॒నః । కమ॒గ్నించి॑నుతే । చా॒తు॒ర్హో॒త్రి॒యమ॒గ్నించి॑న్వా॒నః । కమ॒గ్నించి॑నుతే । వై॒శ్వ॒సృ॒జమ॒గ్నించి॑న్వా॒నః । కమ॒గ్నించి॑నుతే ॥ 108 ॥ 1-26-2 ఉ॒పా॒ను॒వా॒క్య॑మా॒శుమ॒గ్నించి॑న్వా॒నః । కమ॒గ్నించి॑నుతే । ఇ॒మమా॑రుణకేతుకమ॒గ్నించి॑న్వా॒న ఇతి॑ । వృషా॒ వా అ॒గ్నిః । వృషా॑ణో॒ సగ్గ్స్ఫా॑లయేత్ । హ॒న్యేతా᳚స్య య॒జ్ఞః । తస్మా॒న్నాను॒షజ్య॑: । సోత్త॑రవే॒దిషు॑ క్ర॒తుషు॑ చిన్వీత । ఉ॒త్త॒ర॒వే॒ద్యాగ్ం హ్య॑గ్నిశ్చీ॒యతే᳚ । ప్ర॒జాకా॑మశ్చిన్వీత ॥ 109 ॥ 1-26-3 ప్రా॒జా॒ప॒త్యో వా ఏ॒షో᳚ఽగ్నిః । ప్రా॒జా॒ప॒త్యాః ప్ర॒జాః । ప్ర॒జావా᳚న్భవతి । య ఏ॒వం వేద॑ । ప॒శుకా॑మశ్చిన్వీత । సం॒జ్ఞానం॒ వా ఏ॒తత్ప॑శూ॒నాం । యదాప॑: । ప॒శూ॒నామే॒వ సం॒జ్ఞానే॒ఽగ్నించి॑నుతే । ప॒శు॒మాన్భ॑వతి । య ఏ॒వం వేద॑ ॥ 110 ॥ 1-26-4 వృష్టి॑కామశ్చిన్వీత । ఆపో॒ వై వృష్టి॑: । ప॒ర్జన్యో॒ వర్షు॑కో భవతి । య ఏ॒వం వేద॑ । ఆ॒మ॒యా॒వీ చి॑న్వీత । ఆపో॒ వై భే॑ష॒జం । భే॒ష॒జమే॒వాస్మై॑ కరోతి । సర్వ॒మాయు॑రేతి । అ॒భి॒చరగ్గ్॑శ్చిన్వీత । వజ్రో॒ వా ఆప॑: ॥ 111 ॥ 1-26-5 వజ్ర॑మే॒వ భ్రాతృ॑వ్యేభ్య॒: ప్రహ॑రతి । స్తృ॒ణు॒త ఏ॑నం । తేజ॑స్కామో॒ యశ॑స్కామః । బ్ర॒హ్మ॒వ॒ర్చ॒సకా॑మస్స్వ॒ర్గకా॑మశ్చిన్వీత । ఏ॒తావ॒ద్వా వా᳚స్తి । యావ॑దే॒తత్ । యావ॑దే॒వాస్తి॑ । తదవ॑రుంధే । తస్యై॒తద్వ్ర॒తం । వర్ష॑తి॒ న ధా॑వేత్ ॥ 112 ॥ 1-26-6 అ॒మృతం॒ వా ఆప॑: । అ॒మృత॒స్యానం॑తరిత్యై । నాప్సు మూత్ర॑పురీ॒షంకు॑ర్యాత్ । న నిష్ఠీ॑వేత్ । న వి॒వస॑నస్స్నాయాత్ । గుహ్యో॒ వా ఏ॒షో᳚ఽగ్నిః । ఏ॒తస్యా॒గ్నేరన॑తిదాహాయ । న పు॑ష్కరప॒ర్ణాని॒ హిర॑ణ్యం॒ వాఽధి॒తిష్ఠే᳚త్ । ఏ॒తస్యా॒గ్నేరన॑భ్యారోహాయ । న కూర్మ॒స్యాశ్నీ॑యాత్ । నోద॒కస్యా॒ఘాతు॑కా॒న్యేన॑మోద॒కాని॑ భవంతి । అ॒ఘాతు॑కా॒ ఆప॑: । య ఏ॒తమ॒గ్నించి॑ను॒తే । య ఉ॑చైనమే॒వం వేద॑ ॥ 113 ॥ 1-26-7 ఇ॒మాను॑కం॒ భువ॑నా సీషధేమ । ఇంద్ర॑శ్చ॒ విశ్వే॑ చ దే॒వాః । య॒జ్ఞంచ॑ నస్త॒న్వంచ॑ ప్ర॒జాంచ॑ । ఆ॒ది॒త్యైరింద్ర॑స్స॒హ సీ॑షధాతు । ఆ॒ది॒త్యైరింద్ర॒స్సగ॑ణో మ॒రుద్భి॑: । అ॒స్మాకం॑ భూత్వవి॒తా త॒నూనాం᳚ । ఆప్ల॑వస్వ॒ ప్రప్ల॑వస్వ । ఆం॒డీ భ॑వ జ॒ మా ము॒హుః । సుఖాదీందు॑:ఖని॒ధనాం । ప్రతి॑ముంచస్వ॒ స్వాం పు॒రం ॥ 114 ॥ 1-27-1 మరీ॑చయస్స్వాయంభు॒వాః । యే శ॑రీ॒రాణ్య॑కల్పయన్ । తే తే॑ దే॒హంక॑ల్పయంతు । మా చ॑ తే॒ ఖ్యా స్మ॑ తీరిషత్ । ఉత్తి॑ష్ఠత॒ మా స్వ॑ప్త । అ॒గ్నిమి॑చ్ఛధ్వం॒ భార॑తాః । రాజ్ఞ॒స్సోమ॑స్య తృ॒ప్తాస॑: । సూర్యే॑ణ స॒యుజో॑షసః । యువా॑ సు॒వాసా᳚: । అ॒ష్టాచ॑క్రా॒ నవ॑ద్వారా ॥ 115 ॥ 1-27-2 దే॒వానాం॒ పూర॑యో॒ధ్యా । తస్యాగ్ం॑ హిరణ్మ॑యః కో॒శః । స్వ॒ర్గో లో॒కో జ్యోతి॒షాఽఽవృ॑తః । యో వై తాం᳚ బ్రహ్మ॑ణో వే॒ద । అ॒మృతే॑నాఽఽవృ॒తాం పు॑రీం । తస్మై᳚ బ్రహ్మ చ॑ బ్రహ్మా॒ చ । ఆ॒యుః కీర్తిం॑ ప్ర॒జాంద॑దుః । వి॒భ్రాజ॑మానా॒గ్ం॒ హరి॑ణీం । య॒శసా॑ సంప॒రీవృ॑తాం । పురగ్ం॑ హిరణ్మ॑యీం బ్ర॒హ్మా ॥ 116 ॥ 1-27-3 వి॒వేశా॑ఽప॒రాజి॑తా । పరాఙేత్య॑జ్యామ॒యీ । పరాఙేత్య॑నాశ॒కీ । ఇ॒హ చా॑ముత్ర॑ చాన్వే॒తి । వి॒ద్వాందే॑వాసు॒రాను॑భ॒యాన్ । యత్కు॑మా॒రీ మం॒ద్రయ॑తే । య॒ద్యో॒షద్యత్ప॑తి॒వ్రతా᳚ । అరి॑ష్టం॒ యత్కించ॑ క్రి॒యతే᳚ । అ॒గ్నిస్తదను॑వేధతి । అ॒శృతా॑సశ్శృ॑తాస॒శ్చ ॥ 117 ॥ 1-27-4 య॒జ్వానో॒ యేఽప్య॑య॒జ్వన॑: । స్వ॑ర్యంతో॒ నాపే᳚క్షంతే । ఇంద్ర॑మ॒గ్నించ॑ యే వి॒దుః । సిక॑తా ఇవ స॒మ్యంతి॑ । ర॒శ్మిభి॑స్సము॒దీరి॑తాః । అ॒స్మాల్లో॒కాద॑ముష్మా॒చ్చ । ఋ॒షిభి॑రదాత్పృ॒శ్నిభి॑ । అపే॑త॒ వీత॒ వి చ॑ సర్ప॒తాత॑: । యేఽత్ర॒ స్థ పు॑రా॒ణా యే చ॒ నూత॑నాః । అహో॑భిర॒ద్భిర॒క్తుభి॒ర్వ్య॑క్తం ॥ 118 ॥ 1-27-5 య॒మో ద॑దాత్వవ॒సాన॑మస్మై । నృ ము॑ణంతు నృ పా॒త్వర్య॑: । అ॒కృ॒ష్టా యే చ॒ కృష్ట॑జాః । కు॒మారీ॑షు క॒నీనీ॑షు । జా॒రిణీ॑షు చ॒ యే హి॒తాః । రేత॑: పీతా॒ ఆండ॑పీతాః । అంగా॑రేషు చ॒ యే హు॒తాః । ఉ॒భయా᳚న్ పుత్ర॑పౌత్ర॒కాన్ । యు॒వే॒ఽహం య॒మరాజ॑గాన్ । శ॒తమిన్ను శ॒రద॑: ॥ 119 ॥ 1-27-6 అదో॒ యద్బ్రహ్మ॑ విల॒బం । పి॒తృ॒ణాంచ॑ య॒మస్య॑ చ । వరు॑ణ॒స్యాశ్వి॑నోర॒గ్నేః । మ॒రుతాం᳚చ వి॒హాయ॑సాం । కా॒మ॒ప్ర॒యవ॑ణం మే అస్తు । స హ్యే॑వాస్మి॑ స॒నాత॑నః । ఇతి నాకో బ్రహ్మిశ్రవో॑ రాయో॒ ధనం । పు॒త్రానాపో॑ దే॒వీరి॒హాహి॑తా ॥ 120 ॥ 1-27-7 విశీ᳚ర్ష్ణీం॒ గృధ్ర॑శీర్ష్ణీంచ । అపేతో॑ నిరృ॒తిగ్ం హ॑థః । పరిబాధగ్గ్ శ్వే॑తకు॒క్షం । ని॒జంఘగ్ం॑ శబ॒లోద॑రం । స॒ తాన్వా॒చ్యాయ॑యా స॒హ । అగ్నే॒ నాశ॑య సం॒దృశ॑: । ఈ॒ర్ష్యా॒సూ॒యే బు॑భు॒క్షాం । మ॒న్యుం కృ॒త్యాంచ॑ దీధిరే । రథే॑న కిగ్ంశు॒కావ॑తా । అగ్నే॒ నాశ॑య సం॒దృశ॑: ॥ 121 ॥ 1-28-1 ప॒ర్జన్యా॑య॒ ప్రగా॑యత । ది॒వస్పు॒త్రాయ॑ మీ॒ఢుషే᳚ । స నో॑ య॒వస॑మిచ్ఛతు । ఇ॒దం వచ॑: ప॒ర్జన్యా॑య స్వ॒రాజే᳚ । హృ॒దో అ॒స్త్వంత॑రం॒తద్యు॑యోత । మ॒యో॒భూర్వాతో॑ వి॒శ్వకృ॑ష్టయస్సంత్వ॒స్మే । సు॒పి॒ప్ప॒లా ఓష॑ధీర్దే॒వగో॑పాః । యో గర్భ॒మోష॑ధీనాం । గవాం᳚కృ॒ణోత్యర్వ॑తాం । ప॒ర్జన్య॑: పురు॒షీణాం᳚ ॥ 122 ॥ 1-29-1 పున॑ర్మామైత్త్వింద్రి॒యం । పున॒రాయు॒: పున॒ర్భగ॑: । పున॒ర్బ్రాహ్మ॑ణమైతు మా । పున॒ర్ద్రవి॑ణమైతు మా । యన్మే॒ఽద్య రేత॑: పృథి॒వీమస్కాన్॑ । యదోష॑ధీర॒ప్యస॑ర॒ద్యదాప॑: । ఇ॒దంతత్పున॒రాద॑దే । దీ॒ర్ఘా॒యు॒త్త్వాయ॒ వర్చ॑సే । యన్మే॒ రేత॒: ప్రసి॑చ్యతే । యన్మ॒ ఆజా॑యతే॒ పున॑: । తేన॑ మామ॒మృతం॑కురు । తేన॑ సుప్ర॒జసం॑కురు ॥ 123 ॥ 1-30-1 అ॒ద్భ్యస్తిరో॒ధాఽజా॑యత । తవ॑ వైశ్రవ॒ణస్స॑దా । తిరో॑ధేహి సప॒త్నాన్న॑: । యే అపో॒ఽశ్నంతి॑ కేచ॒న । త్వా॒ష్ట్రీం మా॒యాం వై᳚శ్రవ॒ణః । రథగ్ం॑ సహస్ర॒వంధు॑రం । పు॒రు॒శ్చ॒క్రగ్ం సహ॑స్రాశ్వం । ఆస్థా॒యాయా॑హి నో బ॒లిం । యస్మై॑ భూ॒తాని॑ బ॒లిమావ॑హంతి । ధనం॒గావో॒ హస్తి॒హిర॑ణ్య॒మశ్వాన్॑ ॥ 124 ॥ 1-31-1 అసా॑మ సుమ॒తౌ య॒జ్ఞియ॑స్య । శ్రియం॒ బిభ్ర॒తోఽన్న॑ముఖీం వి॒రాజం᳚ । సు॒ద॒ర్శ॒నే చ॑ క్రోం॒చే చ॑ । మై॒నా॒గే చ॑ మ॒హాగి॑రౌ । స॒తద్వా॒ట్టార॑గమం॒తా । స॒గ్ం॒హార్య॒న్నగ॑రం॒ తవ॑ । ఇతి మంత్రా᳚: । కల్పో॑ఽత ఊ॒ర్ధ్వం । యది॒ బలి॒గ్ం॒ హరే᳚త్ । హి॒ర॒ణ్య॒నా॒భయే॑ వితు॒దయే॑ కౌబే॒రాయా॒యం బ॑లిః ॥ 125 ॥ 1-31-2 సర్వభూతధిపతయే న॑మ ఇ॒తి । అథ బలిగ్ం హృత్వోప॑తిష్ఠే॒త । క్ష॒త్త్రం క్ష॒త్త్రం వై᳚శ్రవ॒ణః । బ్రాహ్మణా॑ వయ॒గ్గ్॒స్మః । నమ॑స్తే అస్తు॒ మా మా॑ హిగ్ంసీః । అస్మాత్ప్రవిశ్యాన్న॑మద్ధీ॒తి । అథ తమగ్నిమా॑దధీ॒త । యస్మిన్నేతత్కర్మ ప్ర॑యుంజీ॒త । తి॒రోధా॒ భూః । తి॒రోధా॒ భువ॑: ॥ 126 ॥ 1-31-3 తి॒రోధా॒స్స్వ॑: । తి॒రోధా॒ భూర్భువ॒స్స్వ॑: । సర్వేషాం లోకానామాధిపత్యే॑ సీదే॒తి । అథ తమగ్ని॑మింధీ॒త । యస్మిన్నేతత్కర్మ ప్ర॑యుంజీ॒త । తి॒రోధా॒ భూస్స్వాహా᳚ । తి॒రోధా॒ భువ॒స్స్వాహా᳚ । తి॒రోధా॒ స్వ॑స్స్వాహా᳚ । తి॒రోధా॒ భూర్భువ॒స్స్వ॑స్స్వాహా᳚ । యస్మిన్నస్య కాలే సర్వా ఆహుతీర్హుతా॑ భవే॒యుః ॥ 127 ॥ 1-31-4 అపి బ్రాహ్మణ॑ముఖీ॒నాః । తస్మిన్నహ్నః కాలే ప్ర॑యుంజీ॒త । పర॑స్సు॒ప్తజ॑నాద్వే॒పి । మాస్మ ప్రమాద్యంత॑మాధ్యా॒పయేత్ । సర్వార్థా᳚: సిద్ధ్యం॒తే । య ఏ॑వం వే॒ద । క్షుధ్యన్నిద॑మజా॒నతాం । సర్వార్థా న॑ సిద్ధ్యం॒తే । యస్తే॑ వి॒ఘాతు॑కో భ్రా॒తా । మమాంతర్హృ॑దయే॒ శ్రితః ॥ 128 ॥ 1-31-5 తస్మా॑ ఇ॒మమగ్ర॒పిండం॑జుహోమి । స మే᳚ఽర్థా॒న్మా వివ॑ధీత్ । మయి॒ స్వాహా᳚ । రా॒జా॒ధి॒రా॒జాయ॑ ప్రసహ్యసా॒హినే᳚ । నమో॑ వ॒యం వై᳚శ్రవ॒ణాయ॑ కుర్మహే । స మే॒ కామా॒న్కామ॒కామా॑య॒ మహ్యం᳚ । కా॒మే॒శ్వ॒రో వై᳚శ్రవ॒ణో ద॑దాతు । కు॒బే॒రాయ॑ వైశ్రవ॒ణాయ॑ । మ॒హా॒రా॒జాయ॒ నమ॑: । కే॒తవో॒ అరు॑ణాసశ్చ । ఋ॒ష॒యో వాత॑రశ॒నాః । ప్ర॒తి॒ష్ఠాగ్ం శ॒తధా॑ హి । స॒మాహి॑తాసో సహస్ర॒ధాయ॑సం । శి॒వా న॒శ్శంత॑మా భవంతు । ది॒వ్యా ఆప॒ ఓష॑ధయః । సు॒మృ॒డీ॒కా సర॑స్వతి । మా తే॒ వ్యో॑మ సం॒దృశి॑ ॥ 129 ॥ 1-31-6 సంవత్సరమేత॑ద్వ్రతం॒చరేత్ । ద్వౌ॑ వా మా॒సౌ । నియమస్స॑మాసే॒న । తస్మిన్నియమ॑విశే॒షాః । త్రిషవణముదకో॑పస్ప॒ర్శీ । చతుర్థకాలపాన॑భక్త॒స్స్యాత్ । అహరహర్వా భైక్ష॑మశ్నీ॒యాత్ । ఔదుంబరీభిః సమిద్భిరగ్నిం॑ పరి॒చరేత్ । పునర్మా మైత్త్వింద్రియమిత్యేతేనాఽను॑వాకే॒న । ఉద్ధృతపరిపూతాభిరద్భిః కార్యం॑కుర్వీ॒త ॥ 130 ॥ 1-32-1 అ॑సంచ॒యవాన్ । అగ్నయే వాయవే॑ సూర్యా॒య । బ్రహ్మణే ప్ర॑జాప॒తయే । చంద్రమసే న॑క్షత్రే॒భ్యః । ఋతుభ్యస్సంవ॑థ్సరా॒య । వరుణాయారుణాయేతి వ్ర॑తహో॒మాః । ప్ర॒వ॒ర్గ్యవ॑దాదే॒శః । అరుణాః కాం᳚డఋ॒షయః । అరణ్యే॑ఽధీయీ॒రన్ । భద్రం కర్ణేభిరితి ద్వే॑ జపి॒త్వా ॥ 131 ॥ 1-32-2 మహానామ్నీభిరుదకగ్ం స॑గ్గ్స్ప॒ర్శ్య । తమాచా᳚ర్యో ద॒ద్యాత్ । శివా నశ్శంతమేత్యోశధీ॑రాల॒భతే । సుమృడీకే॑తి భూ॒మిం । ఏవమ॑పవ॒ర్గే । ధే॑నుర్ద॒క్షిణా । కగ్ంసం వాస॑శ్చ క్షౌ॒మం । అన్య॑ద్వాశు॒క్లం । య॑థాశ॒క్తి వా । ఏవగ్గ్ స్వాధ్యాయ॑ధర్మే॒ణ । అరణ్యే॑ఽధీయీ॒త । తపస్వీ పుణ్యో భవతి తపస్వీ పు॑ణ్యో భ॒వతి ॥ 132 ॥ 1-32-3 భ॒ద్రం కర్ణే॑భిః శృణు॒యామ॑ దేవాః । భ॒ద్రం ప॑శ్యేమా॒క్షభి॒ర్యజ॑త్రాః । స్థి॒రైరంగై᳚స్తుష్టు॒వాగ్ంస॑స్త॒నూభి॑: । వ్యశే॑మ దే॒వహి॑తం॒ యదాయు॑: । స్వ॒స్తి న॒ ఇంద్రో॑ వృ॒ద్ధశ్ర॑వాః । స్వ॒స్తి న॑: పూ॒షా వి॒శ్వవే॑దాః । స్వ॒స్తి న॒స్తార్క్ష్యో॒ అరి॑ష్టనేమిః । స్వ॒స్తి నో॒ బృహ॒స్పతి॑ర్దధాతు ॥ ఓం శాంతి॒: శాంతి॒: శాంతి॑: ॥