ఓషధీ సూక్తం - కృష్ణ యజుర్వేదం

యా జా॒తా ఓష॑ధయో దే॒వేభ్య॑స్త్రియు॒గం పు॒రా ।

మందా॑మి బ॒భ్రూణా॑మ॒హగ్ం శ॒తం ధామా॑ని స॒ప్త చ॑ ॥ 1

శ॒తం వో॑ అంబ॒ ధామా॑ని స॒హస్ర॑ము॒త వో॒ రుహ॑: ।

అథా॑ శతక్రత్వో యూ॒యమి॒మం మే॑ అగ॒దం కృ॑త ॥ 2

పుష్పా॑వతీః ప్ర॒సూవ॑తీః ఫ॒లినీ॑రఫ॒లా ఉ॒త ।

అశ్వా॑ ఇవ స॒జిత్వ॑రీర్వీ॒రుధః॑ పారయి॒ష్ణవ॑: ॥ 3

ఓష॑ధీ॒రితి॑ మాతర॒స్తద్వో॑ దేవీ॒రుప॑ బ్రువే ।

రపాగ్ం॑సి విఘ్న॒తీరి॑త॒ రప॑శ్చా॒తయ॑మానాః ॥ 4

అ॒శ్వ॒త్థే వో॑ ని॒షద॑నం ప॒ర్ణే వో॑ వస॒తిః కృ॒తా ।

గో॒భాజ॒ ఇత్కిలా॑సథ॒ యత్స॒నవ॑థ॒ పూరు॑షం ॥ 5

యద॒హం వా॒జయ॑న్ని॒మా ఓష॑ధీ॒ర్హస్త॑ ఆద॒ధే ।

ఆ॒త్మా యక్ష్మ॑స్య నశ్యతి పు॒రా జీ॑వ॒గృభో॑ యథా ॥ 6

యదోష॑ధయః సం॒గచ్ఛం॑తే॒ రాజా॑న॒: సమి॑తావివ ।

విప్ర॒: స ఉ॑చ్యతే భి॒షగ్ర॑క్షో॒హాఽమీ॑వ॒చాత॑నః ॥ 7

నిష్కృ॑తి॒ర్నామ॑ వో మా॒తాఽథా॑ యూ॒యగ్ం స్థ॒ సంకృ॑తీః ।

స॒రాః ప॑త॒త్రిణీ᳚: స్థన॒ యదా॒మయ॑తి॒ నిష్కృ॑త ॥ 8

అ॒న్యా వో॑ అ॒న్యామ॑వత్వ॒న్యాఽన్యస్యా॒ ఉపా॑వత ।

తాః సర్వా॒ ఓష॑ధయః సంవిదా॒నా ఇ॒దం మే॒ ప్రావ॑తా॒ వచ॑: ॥ 9

ఉచ్ఛుష్మా॒ ఓష॑ధీనాం॒ గావో॑ గో॒ష్ఠాది॑వేరతే ।

ధనగ్ం॑ సని॒ష్యంతీ॑నామా॒త్మానం॒ తవ॑ పూరుష ॥ 10

అతి॒ విశ్వా᳚: పరి॒ష్ఠాః స్తే॒న ఇ॑వ వ్ర॒జమ॑క్రముః ।

ఓష॑ధయ॒: ప్రాచు॑చ్యవు॒ర్యత్కిం చ॑ త॒నువా॒గ్ం॒ రప॑: ॥ 11

యాస్త॑ ఆత॒స్థురా॒త్మానం॒ యా ఆ॑వివి॒శుః పరు॑: పరుః ।

తాస్తే॒ యక్ష్మం॒ వి బా॑ధంతాము॒గ్రో మ॑ధ్యమ॒శీరి॑వ ॥ 12

సా॒కం య॑క్ష్మ॒ ప్ర ప॑త శ్యే॒నేన॑ కికిదీ॒వినా᳚ ।

సా॒కం వాత॑స్య॒ ధ్రాజ్యా॑ సా॒కం న॑శ్య ని॒హాక॑యా ॥ 13

అ॒శ్వా॒వ॒తీగ్ం సో॑మవ॒తీమూ॒ర్జయం॑తీ॒ ముదో॑జసం ।

ఆ వి॑త్సి॒ సర్వా॒ ఓష॑ధీర॒స్మా అ॑రి॒ష్టతా॑తయే ॥ 14

యాః ఫ॒లినీ॒ర్యా అ॑ఫ॒లా అ॑పు॒ష్పా యాశ్చ॑ పు॒ష్పిణీ᳚: ।

బృహ॒స్పతి॑ ప్రసూతా॒స్తా నో॑ ముంచం॒త్వగ్ంహ॑సః ॥ 15

యా ఓష॑ధయ॒: సోమ॑రాజ్ఞీ॒: ప్రవి॑ష్టాః పృథి॒వీమను॑ ।

తాసాం॒ త్వమ॑స్యుత్త॒మా ప్రణో॑ జీ॒వాత॑వే సువ ॥ 16

అ॒వ॒పతం॑తీరవదంది॒వ ఓష॑ధయ॒: పరి॑ ।

యం జీ॒వమ॒శ్నవా॑మహై॒ న స రి॑ష్యాతి॒ పూరు॑షః ॥ 17

యాశ్చే॒దము॑పశృ॒ణ్వంతి॒ యాశ్చ॑ దూ॒రం పరా॑గతాః ।

ఇ॒హ సం॒గత్య॒ తాః సర్వా॑ అ॒స్మై సం ద॑త్త భేష॒జం ॥ 18

మా వో॑ రిషత్ఖని॒తా యస్మై॑ చా॒హం ఖనా॑మి వః ।

ద్వి॒పచ్చతు॑ష్పద॒స్మాక॒గ్ం॒ సర్వ॑మ॒స్త్వనా॑తురం ॥ 19

ఓష॑ధయ॒: సం వ॑దంతే॒ సోమే॑న స॒హ రాజ్ఞా᳚ ।

యస్మై॑ క॒రోతి॑ బ్రాహ్మ॒ణస్తగ్ం రా॑జన్ పారయామసి ॥ 20

ఓం శాంతి॒: శాంతి॒: శాంతి॑: ।

Recite with devotion and pure heart

Regular practice brings spiritual benefits