॥ அத² க³ணேஶபூர்வதாபின்யுபநிஷத் ॥ க³ணேஶம்ʼ ப்ரமதா²தீ⁴ஶம்ʼ நிர்கு³ணம்ʼ ஸகு³ணம்ʼ விபு⁴ம் । யோகி³னோ யத்பத³ம்ʼ யாந்தி தம்ʼ கௌ³ரீநந்த³னம்ʼ ப⁴ஜே ॥ ஓம்ʼ நமோ வரதா³ய விக்⁴னஹர்த்ரே ॥ அதா²தோ ப்³ரஹ்மோபநிஷத³ம்ʼ வ்யாக்²யாஸ்யாம꞉ । ப்³ரஹ்மா தே³வானாம்ʼ ஸவிது꞉ கவீனாம்ருʼஷிர்விப்ராணாம்ʼ மஹிஷோ ம்ருʼகா³ணாம் । தா⁴தா வஸூனாம்ʼ ஸுரபி⁴꞉ ஸ்ருʼஜானாம்ʼ நமோ ப்³ரஹ்மணே(அ)த²ர்வபுத்ராய மீடு⁴ஷே ॥ தா⁴தா தே³வானாம்ʼ ப்ரத²மம்ʼ ஹி சேதோ மனோ வனானீவ மனஸா(அ)கல்பயத்³ய꞉ । நமோ ப்³ரஹ்மணே ப்³ரஹ்மபுத்ராய துப்⁴யம்ʼ ஜ்யேஷ்டா²யாத²ர்வபுத்ராய த⁴ன்வினே ॥ 1 ॥ ஓம்ʼ ப்ரஜாபதி꞉ ப்ரஜா அஸ்ருʼஜத । தா꞉ ஸ்ருʼஷ்டா அப்³ருவன் கத²மந்நாத்³யா அப⁴வன்னிதி । ஸ த்ரேதா⁴ வ்யப⁴ஜத்³பூ⁴ர்பு⁴வ꞉ஸ்வரிதி । ஸ தபோ(அ)தப்யத । ஸ ப்³ரஹ்மா ஸ விஷ்ணு꞉ ஸ ஶிவ꞉ ஸ ப்ரஜாபதி꞉ ஸேந்த்³ர꞉ ஸோ(அ)க்³னி꞉ ஸமப⁴வத் । ஸ தூஷ்ணீம்ʼ மனஸா த்⁴யாயன் கத²மிமே(அ)ந்நாத்³யா꞉ ஸ்யுரிதி । ஸோ(அ)பஶ்யதா³த்மனா(ஆ)த்மானம்ʼ க³ஜரூபத⁴ரம்ʼ தே³வம்ʼ ஶஶிவர்ணம்ʼ சதுர்பு⁴ஜம்ʼ யதோ வா இமானி பூ⁴தானி ஜாயந்தே யதோ வாயந்தி யத்ரைவ யந்தி ச । ததே³தத³க்ஷரம்ʼ பரம்ʼ ப்³ரஹ்ம । ஏதஸ்மாஜ்ஜாயதே ப்ராணோ மன꞉ ஸர்வேந்த்³ரியாணி ச । க²ம்ʼ வாயுராபோ ஜ்யோதி꞉ ப்ருʼதி²வீ விஶ்வஸ்ய தா⁴ரிணீ । புருஷ ஏவேத³ம்ʼ விஶ்வம்ʼ தபோ ப்³ரஹ்ம பராம்ருʼதமிதி ॥ 2 ॥ ஸோ(அ)ஸ்துவத நமோ ப்³ரஹ்மணே நமோ ப்³ராஹ்மணேப்⁴யோ நமோ வேதே³ப்⁴யோ நம ருʼஷிப்⁴யோ நம꞉ குல்யேப்⁴ய꞉ ப்ரகுல்யேப்⁴யோ நம꞉ ஸவித்ரே ப்ரஸவித்ரே நமோ போ⁴ஜ்யாய ப்ரக்ருʼஷ்டாய கபர்தி³னே சக்ராய சக்ரத⁴ராயான்னாயான்னபதயே ஶிவாய ஸதா³ஶிவாய துர்யாய துரீயாய பூ⁴ர்பு⁴வ꞉ஸ்வ꞉பதே ராயஸ்பதே வாஜிபதே கோ³பதே ருʼக்³யஜு꞉ஸாமாத²ர்வாங்கி³ர꞉பதே நமோ ப்³ரஹ்மபுத்ராயேதி ॥ 3 ॥ ஸோ(அ)ப்³ரவீத்³வரதோ³(அ)ஸ்ம்யஹமிதி । ஸ ப்ரஜாபதிரப்³ரவீத்கத²மிமே(அ)ந்நாத்³யா꞉ ஸ்யுரிதி । ஸ ஹோவாச ப்³ரஹ்மபுத்ரஸ்தபஸ்தேபே ஸித்³த⁴க்ஷேத்ரே மஹாயஶா꞉ । ஸ ஸர்வஸ்ய வக்தா ஸர்வஸ்ய ஜ்ஞாதாஸீதி । ஸ ஹோவாச தபஸ்யந்தம்ʼ ஸித்³தா⁴ரண்யே ப்⁴ருʼகு³புத்ரம்ʼ ப்ருʼச்ச²த்⁴வமிதி । தே ப்ரத்யாயயு꞉ । ஸ ஹோவாச கிமேததி³தி । தே ஹோசு꞉ கத²ம்ʼ வயமந்நாத்³யா ப⁴வாம இதி । ஸ தூஷ்ணீம்ʼ மனஸா த்⁴யாயன் கத²மிமே(அ)ந்நாத்³யா꞉ ஸ்யுரிதி । ஸ ஏதமானுஷ்டுப⁴ம்ʼ மந்த்ரராஜமபஶ்யத் । யதி³த³ம்ʼ கிஞ்ச ஸர்வமஸ்ருʼஜத । தஸ்மாத்ஸர்வானுஷ்டுப⁴மித்யாசக்ஷதே யதி³த³ம்ʼ கிஞ்ச । அனுஷ்டுபா⁴ வா இமானி பூ⁴தானி ஜாயந்தே । அனுஷ்டுபா⁴ ஜாதானி ஜீவந்த்யனுஷ்டுப⁴ம்ʼ ப்ரயந்த்யபி⁴ஸம்ʼவிஶந்தி । தஸ்யைஷா ப⁴வதி அனுஷ்டுப்ப்ரத²மா ப⁴வத்யனுஷ்டுபு³த்தமா ப⁴வதி । வாக்³வா அனுஷ்டுப்³வாசைவ ப்ரயந்தி வாசைவோத்³யந்தி । பரமா வா ஏஷா ச²ந்த³ஸாம்ʼ யத³னுஷ்டுப் । ஸர்வமனுஷ்டுப் । ஏதம்ʼ மந்த்ரராஜம்ʼ ய꞉ பஶ்யதி ஸ பஶ்யதி । ஸ பு⁴க்திம்ʼ முக்திம்ʼ ச விந்த³தி । தேன ஸர்வஜ்ஞானம்ʼ ப⁴வதி । ததே³தந்நித³ர்ஶனம்ʼ ப⁴வதி ; ஏகோ தே³வ꞉ ப்ராபகோ யோ வஸூனாம்ʼ ஶ்ரியா ஜுஷ்ட꞉ ஸர்வதோப⁴த்³ர ஏஷ꞉ । மாயாதே³வோ ப³லக³ஹனோ ப்³ரஹ்மாராதீஸ்தம்ʼ தே³வமீடே³ த³க்ஷிணாஸ்யம் ॥ ஆ தூ ந இந்த்³ர க்ஷுமந்தம்ʼ சித்ரம்ʼ க்³ராப⁴ம்ʼ ஸங்க்³ருʼபா⁴ய । மஹாஹஸ்தீ த³க்ஷிணேன ॥ இதி ஸஹஸ்ரக்ருʼத்வஸ்துஷ்டாவ ॥ 4॥ அதா²பஶ்யன்மஹாதே³வம்ʼ ஶ்ரியா ஜுஷ்டம்ʼ மதோ³த்கடம் । ஸனகாதி³மஹாயோகி³வேத³வித்³பி⁴ருபாஸிதம் ॥ த்³ருஹிணாதி³மதே³வேஶஷட்பதா³லிவிராஜிதம் । லஸத்கர்ணம்ʼ மஹாதே³வம்ʼ க³ஜரூபத⁴ரம்ʼ ஶிவம் ॥ ஸ ஹோவாச வரதோ³(அ)ஸ்மீதி । ஸ தூஷ்ணீம்ʼ மனஸா வவ்ரே । ஸ ததே²தி ஹோவாச । ததே³ஷ ஶ்லோக꞉ ; ஸ ஸம்ʼஸ்துதோ தை³வததே³வஸூனு꞉ ஸுதம்ʼ ப்⁴ருʼகோ³ர்வாக்யமுவாச துஷ்ட꞉ । அவேஹி மாம்ʼ பா⁴ர்க³வ வக்ரதுண்ட³மநாத²நாத²ம்ʼ த்ரிகு³ணாத்மகம்ʼ ஶிவம் ॥ அத² தஸ்ய ஷட³ங்கா³னி ப்ராது³ர்ப³பூ⁴வு꞉ । ஸ ஹோவாச ஜபத்⁴வமானுஷ்டுப⁴ம்ʼ மந்த்ரராஜ ஷட்பத³ம்ʼ ஸஷட³க்ஷரம் । இதி யோ ஜபதி ஸ பூ⁴திமான் ப⁴வதீதி யூயமந்நாத்³யா ப⁴வேயுரிதி । ததே³தந்நித³ர்ஶனம் ; க³ணானாம்ʼ த்வா க³ணநாத²ம்ʼ ஸுரேந்த்³ரம்ʼ கவிம்ʼ கவீநாமதிமேத⁴விக்³ரஹம் । ஜ்யேஷ்ட²ராஜம்ʼ வ்ருʼஷப⁴ம்ʼ கேதுமேகம்ʼ ஸா ந꞉ ஶ்ருʼண்வன்னூதிபி⁴꞉ ஸீத³ ஶாஶ்வத் ॥ 5 ॥ தே ஹோசு꞉ கத²மானுஷ்டுப⁴ம்ʼ மந்த்ரராஜமபி⁴ஜானீம இதி । ஸ ஏதமானுஷ்டுப⁴ம்ʼ ஷட்பத³ம்ʼ மந்த்ரராஜ கத²யாஞ்சக்ரே । ஸ ஸாம ப⁴வதி । ருʼக்³வை கா³யத்ரீ யஜுருஷ்ணிக³னுஷ்டுப் ஸாம । ஸ ஆதி³த்யோ ப⁴வதி । ருʼக்³வை வஸுர்யஜூ ருத்³ரா꞉ ஸாமாதி³த்யா இதி । ஸ ஷட்பதோ³ ப⁴வதி । ஸாம வை ஷட்பத³꞉ । ஸஸாக³ராம்ʼ ஸப்தத்³வீபாம்ʼ ஸபர்வதாம்ʼ வஸுந்த⁴ராம்ʼ தத்ஸாம்ன꞉ ப்ரத²மம்ʼ பாத³ம்ʼ ஜானீயாத்³ராயஸ்போஷஸ்ய தா³தேதி । தேன ஸப்தத்³வீபாதி⁴போ ப⁴வதி பூ⁴꞉பதித்வம்ʼ ச க³ச்ச²தி । யக்ஷக³ந்த⁴ர்வாப்ஸரோக³ணஸேவிதமந்தரிக்ஷம்ʼ த்³விதீயம்ʼ பாத³ம்ʼ ஜானீயாந்நிதி⁴தா³தேதி । தேன த⁴னதா³தி³காஷ்டா²பதிர்ப⁴வதி பு⁴வ꞉பதித்வம்ʼ ச க³ச்ச²தி । வஸுருத்³ராதி³த்யை꞉ ஸர்வைர்தே³வை꞉ ஸேவிதம்ʼ தி³வம்ʼ தத்ஸாம்னஸ்த்ருʼதீயம்ʼ பாத³ம்ʼ ஜானீயாத³ன்னதோ³ மத இதி । தேன தே³வாதி⁴பத்யம்ʼ ஸ்வ꞉பதித்வம்ʼ ச க³ச்ச²தி । ருʼக்³யஜு꞉ஸாமாத²ர்வாங்கி³ரோக³ணஸேவிதம்ʼ ப்³ரஹ்மலோகம்ʼ துர்யம்ʼ பாத³ம்ʼ ஜானீயாத்³ரக்ஷோஹண இதி । தேன தே³வாதி⁴பத்யம்ʼ ப்³ரஹ்மாதி⁴பத்யம்ʼ ச க³ச்ச²தி । வாஸுதே³வாதி³சதுர்வ்யூஹஸேவிதம்ʼ விஷ்ணுலோகம்ʼ தத்ஸாம்ன꞉ பஞ்சமம்ʼ பாத³ம்ʼ ஜானீயாத்³ப³லக³ஹன இதி । தேன ஸர்வதே³வாதி⁴பத்யம்ʼ விஷ்ணுலோகாதி⁴பத்யம்ʼ ச க³ச்ச²தி । ப்³ரஹ்மஸ்வரூபம்ʼ நிரஞ்ஜனம்ʼ பரமவ்யோம்னிகம்ʼ தத்ஸாம்ன꞉ ஷஷ்ட²ம்ʼ பாத³ம்ʼ ஜானீயாத் । தேன வக்ரதுண்டா³ய ஹுமிதி யோ ஜானீயாத்ஸோ(அ)ம்ருʼதத்வம்ʼ ச க³ச்ச²தி । ஸத்யலோகாதி⁴பத்யம்ʼ ச க³ச்ச²தி ॥ 6 ॥ ருʼக்³யஜு꞉ஸாமாத²ர்வாஶ்சத்வார꞉ பாதா³ ப⁴வந்தி । ராயஸ்போஷஸ்ய தா³தா சேதி ப்ரத²ம꞉ பாதோ³ ப⁴வதி ருʼக்³வை ப்ரத²ம꞉ பாத³꞉ । நிதி⁴தா³தா(அ)ன்னதோ³ மத இதி த்³விதீய꞉ பாத³꞉ யஜுர்வை த்³விதீய꞉ பாத³꞉ । ரக்ஷோஹணோ வோ ப³லக³ஹன இதி த்ருʼதீய꞉ பாத³꞉ ஸாம வை த்ருʼதீய꞉ பாத³꞉ । வக்ரதுண்டா³ய ஹுமிதி சதுர்த²꞉ பாத³꞉ அத²ர்வஶ்சதுர்த²꞉ பாதோ³(அ)த²ர்வஶ்சதுர்த²꞉ பாத³ இதி ॥ 7॥ இதி க³ணேஶபூர்வதாபின்யுபநிஷத்ஸு ப்ரத²மோபநிஷத் ॥ 1 ॥ ஸ ஹோவாச ப்ரஜாபதிரக்³நிர்வை வேதா³ இத³ம்ʼ ஸர்வம்ʼ விஶ்வானி பூ⁴தானி விராட் ஸ்வராட் ஸம்ராட் தத்ஸாம்ன꞉ ப்ரத²மம்ʼ பாத³ம்ʼ ஜானீயாத் । ருʼக்³யஜு꞉ஸாமாத²ர்வரூப꞉ ஸூர்யோ(அ)ந்தராதி³த்யே ஹிரண்மய꞉ புருஷஸ்தத்ஸாம்னோ த்³விதீயம்ʼ பாத³ம்ʼ ஜானீயாத் । ய ஓஷதீ⁴னாம்ʼ ப்ரப⁴விதா தாராபதி꞉ ஸோமஸ்தத்ஸாம்னஸ்த்ருʼதீயம்ʼ பாத³ம்ʼ ஜானீயாத் । யோ ப்³ரஹ்மா தத்ஸாம்னஶ்சதுர்த²ம்ʼ பாத³ம்ʼ ஜானீயாத் । யோ ஹரிஸ்தத்ஸாம்ன꞉ பஞ்சமம்ʼ பாத³ம்ʼ ஜானீயாத் । ய꞉ ஶிவ꞉ ஸ பரம்ʼ ப்³ரஹ்ம தத்ஸாம்னோ(அ)ந்த்யம்ʼ பாத³ம்ʼ ஜானீயாத் । யோ ஜானீதே ஸோ(அ)ம்ருʼதத்வம்ʼ ச க³ச்ச²தி பரம்ʼ ப்³ரஹ்மைவ ப⁴வதி । தஸ்மாதி³த³மானுஷ்டுப⁴ம்ʼ ஸாம யத்ர க்வசின்னாசஷ்டே । யதி³ தா³துமபேக்ஷதே புத்ராய ஶுஶ்ரூஷவே தா³ஸ்யத்யன்யஸ்மை ஶிஷ்யாய வேதி ॥ 1 ॥ தஸ்ய ஹி ஷட³ங்கா³னி ப⁴வந்தி ; ஓம்ʼ ஹ்ருʼத³யாய நம꞉, ஶிரஸே ஸ்வாஹா, ஶிகா²யை வஷட், கவசாய ஹும் । நேத்ரத்ரயாய வௌஷட், அஸ்த்ராய ப²டி³தி ப்ரத²மம்ʼ ப்ரத²மேன த்³விதீயம்ʼ த்³விதீயேன த்ருʼதீயம்ʼ த்ருʼதீயேன சதுர்த²ம்ʼ சதுர்தே²ன பஞ்சமம்ʼ பஞ்சமேன ஷஷ்ட²ம்ʼ ஷஷ்டே²ன ப்ரத்யக்ஷரமுப⁴யதோ மாயா லக்ஷ்மீஶ்ச ப⁴வதி । மாயா வா ஏஷா வைநாயகீ ஸர்வமித³ம்ʼ ஸ்ருʼஜதி ஸர்வமித³ம்ʼ ரக்ஷதி ஸர்வமித³ம்ʼ ஸம்ʼஹரதி தஸ்மான்மாயாமேதாம்ʼ ஶக்திம்ʼ வேத³ । ஸ ம்ருʼத்யும்ʼ ஜயதி । ஸ பாப்மானம்ʼ தரதி । ஸ மஹதீம்ʼ ஶ்ரியமஶ்னுதே । ஸோ(அ)பி⁴வாதீ³ ஷட்கர்மஸம்ʼஸித்³தோ⁴ ப⁴வத்யம்ருʼதத்வம்ʼ ச க³ச்ச²தி । மீமாம்ʼஸந்தே ப்³ரஹ்மவாதி³னோ ஹ்ரஸ்வா வா தீ³ர்கா⁴ வா ப்லுதா வேதி । யதி³ ஹ்ரஸ்வா ப⁴வதி ஸர்வபாப்மானம்ʼ தரத்யம்ருʼதத்வம்ʼ ச க³ச்ச²தி । யதி³ தீ³ர்கா⁴ ப⁴வதி மஹதீம்ʼ ஶ்ரியமாப்னுயாத³ம்ருʼதத்வம்ʼ ச க³ச்ச²தி । யதி³ ப்லுதா ப⁴வதி ஜ்ஞானவான் ப⁴வத்யம்ருʼதத்வம்ʼ ச க³ச்ச²தி । ததே³தத்³ருʼஷிணோக்தம்ʼ நித³ர்ஶனம் ; ஸ ஈம்ʼ பாஹி ய ருʼஜீஷீ தருத்³ர꞉ ஸ ஶ்ரியம்ʼ லக்ஷ்மீமௌபலாம்பி³காம்ʼ கா³ம் । ஷஷ்டீ²ம்ʼ ச யாமிந்த்³ரஸேனேத்யுத ஆஹுஸ்தாம்ʼ வித்³யாம்ʼ ப்³ரஹ்மயோநிஸ்வரூபாம் ॥ தாமிஹாயுஷே ஶரணம்ʼ ப்ரபத்³யே । க்ஷீரோதா³ர்ணவஶாயினம்ʼ கல்பத்³ருமாத⁴꞉ஸ்தி²தம்ʼ வரத³ம்ʼ வ்யோமரூபிணம்ʼ ப்ரசண்ட³த³ண்ட³தோ³ர்த³ண்ட³ம்ʼ வக்ரதுண்ட³ஸ்வரூபிணம்ʼ பார்ஶ்வாத⁴꞉ஸ்தி²தகாமதே⁴னும்ʼ ஶிவோமாதனயம்ʼ விபு⁴ம் । ருக்மாம்ப³ரனிபா⁴காஶம்ʼ ரக்தவர்ணம்ʼ சதுர்பு⁴ஜம் । கபர்தி³னம்ʼ ஶிவம்ʼ ஶாந்தம்ʼ ப⁴க்தாநாமப⁴யப்ரத³ம் ॥ உன்னதப்ரபதா³ங்கு³ஷ்ட²ம்ʼ கூ³ட⁴கு³ல்ப²ம்ʼ ஸபார்ஷ்ணிகம் । பீனஜங்க⁴ம்ʼ கூ³ட⁴ஜானும்ʼ ஸ்தூ²லோரும்ʼ ப்ரோன்னமத்கடிம் ॥ நிம்னநாபி⁴ம்ʼ கம்பு³கண்ட²ம்ʼ லம்போ³ஷ்ட²ம்ʼ லம்ப³நாஸிகம் । ஸித்³தி⁴பு³த்³த்⁴யுப⁴யாஶ்லிஷ்டம்ʼ ப்ரஸன்னவத³னாம்பு³ஜம் ॥ இதி ஸம்ʼஸர்க³꞉ ॥ 2 ॥ அத² ச²ந்தோ³தை³வதம் । அனுஷ்டுப்ச²ந்தோ³ ப⁴வதி த்³வாத்ரிம்ʼஶத³க்ஷரானுஷ்டுப³ ப⁴வதி । அனுஷ்டுபா⁴ ஸர்வமித³ம்ʼ ஸ்ருʼஷ்டமனுஷ்டுபா⁴ ஸர்வமுபஸம்ʼஹ்ருʼதம் । ஶிவோமாயுத꞉ பரமாத்மா வரதோ³ தே³வதா । தே ஹோசு꞉ கத²ம்ʼ ஶிவோமாயுத இதி । ஸ ஹோவாச ப்⁴ருʼகு³புத்ர꞉ ப்ரக்ருʼதிபுருஷமயோ ஹி ஸ த⁴னத³ இதி ப்ரக்ருʼதிர்மாயா புருஷ꞉ ஶிவ இதி । ஸோ(அ)யம்ʼ விஶ்வாத்மா தே³வதேதி । ததே³தந்நித³ர்ஶனம் ; இந்த்³ரோ மாயாபி⁴꞉ புருஹூத ஈடே³ ஶர்வோ விஶ்வம்ʼ மாயயா ஸ்வித்³த³தா⁴ர । ஸோ(அ)ஜ꞉ ஶேதே மாயயா ஸ்வித்³கு³ஹாயாம்ʼ விஶ்வம்ʼ ந்யஸ்தம்ʼ விஷ்ணுரேகோ விஜஜ்ஞே ॥ ததே³தன்மாயா ஹம்ʼஸமயீ தே³வானாம் ॥ ஸர்வேஷாம்ʼ வா ஏதத்³பூ⁴தாநாமாகாஶ꞉ பராயணம் । ஸர்வாணி ஹ வா இமானி பூ⁴தான்யாகாஶாதே³வ ஜாயந்தே ஜாதானி ஜீவந்த்யாகாஶம்ʼ ப்ரயந்த்யபி⁴ஸம்ʼவிஶந்தி । தஸ்மாதா³காஶபீ³ஜம்ʼ ஶிவோ வித்³யாத் । ததே³தந்நித³ர்ஶனம் ; ஹம்ʼஸ꞉ ஶுசிஷத்³வஸுரந்தரிக்ஷஸத்³தோ⁴தா வேதி³ஷத³திதி²ர்து³ரோணஸத் । ந்ருʼஷத்³வரஸத்³ருʼதஸத்³வ்யோமஸத³ப்³ஜா கோ³ஜா ருʼதஜா அத்³ரிஜா ருʼதம்ʼ ப்³ருʼஹதி³தி ॥ 3 ॥ அதா²தி⁴ஷ்டா²னம் ; மத்⁴யே பி³ந்து³ம்ʼ த்ரிகோணம்ʼ தத³னு ருʼதுக³ணம்ʼ வஸுத³லம்ʼ த்³வாத³ஶாரம்ʼ ஷோட³ஶகர்ணிகேதி । மத்⁴யே பீ³ஜாத்மகம்ʼ தே³வம்ʼ யஜேத் । வாமத³க்ஷிணே ஸித்³தி⁴ர்பு³த்³தி⁴꞉ । அக்³ரே காமது³கா⁴ ஷட்கோணே ஸுமுகா²த³ய꞉ ஷட்³விநாயகா꞉ । வஸுத³லே வக்ரதுண்டா³த்³யஷ்டவிநாயகா꞉ । த்³வாத³ஶாரே ப³டுகோ வாமனோ மஹாத³ஶகமஹோத³ரௌ ஸுப⁴த்³ரோ மாலீ வரோ ராம உமா ஶிவ꞉ ஸ்கந்தோ³ நந்தீ³ । தத்³பா³ஹ்யே(அ)ணிமாதி³ஸித்³த⁴ய꞉ । ஷோட³ஶாரே தி³க்பாலா꞉ ஸாயுதா⁴ இதி ॥ 4 ॥ அத² ப்ரஸார꞉ ; ய ஏதேன சதுர்தீ²ஷு பக்ஷயோருப⁴யோரபி । லக்ஷம்ʼ ஜுஹுயாத³பூபானாம்ʼ தத்க்ஷணாத்³த⁴னதோ³ ப⁴வேத் ॥ ஸித்³தௌ⁴த³னம்ʼ த்ரிமாஸம்ʼ து ஜுஹ்வத³க்³னாவனன்யதீ⁴꞉ । தாவஜ்ஜுஹ்வத்ப்ருʼது²கான்ஹி ஸாக்ஷாத்³வைஶ்ரவணோ ப⁴வேத் ॥ உச்சாடயேத்³விபீ⁴தைஶ்ச மாரயேத்³விஷவ்ருʼக்ஷஜை꞉ । வஶ்யாய பங்கஜைர்வித்³வாந்த⁴னார்தீ² மோத³கைர்ஹுனேத் ॥ ஏவம்ʼ ஜ்ஞாத்வா க்ருʼதகர்மா ப⁴வதி க்ருʼதகர்மா ப⁴வதீதி ॥ 5 ॥ இதி க³ணேஶபூர்வதாபின்யுபநிஷத்ஸு த்³விதீயோபநிஷத் ॥ 2 ॥ அத² ஹோவாச ப்⁴ருʼகு³புத்ரஸ்தந்த்ரம்ʼ விஜிஜ்ஞாஸிதவ்யமிதி । மூலே ஶூன்யம்ʼ விஜானீயாத் । ஶூன்யம்ʼ வை பரம்ʼ ப்³ரஹ்ம । தத்ர ஸதாரம்ʼ ஸமாயம்ʼ ஸாம ந்யஸேத்த்ரிரேக²ம்ʼ ப⁴வதி த்ரயோ ஹீமே லோகாஸ்த்ரயோ ஹீமே வேதா³꞉ । ருʼக்³வை பூ⁴꞉ ஸா மாயா ப⁴வதி । யஜுர்வை பு⁴வ꞉ ஸ ஶிவோ ப⁴வதி । ஸாம வை ஸ்வ꞉ ஸ ஹிரண்யக³ர்போ⁴ ப⁴வதி । ஷட்கோணம்ʼ ப⁴வதி ஷட்³ ஹீமே லோகா꞉ ஷட்³டா⁴ ருʼதவோ ப⁴வந்தி । தத்ர தாரமாயாரமாமாரவிஶ்வேஶத⁴ரணீக்ரமான்ன்யஸேத் । அஷ்டபத்ரம்ʼ ப⁴வத்யஷ்டாக்ஷரா கா³யத்ரீ ப⁴வதி ப்³ரஹ்மகா³யத்ரீம்ʼ ந்யஸேத் । த்³வாத³ஶபத்ர ப⁴வதி த்³வாத³ஶாதி³த்யா ப⁴வந்தி தே ஸ்வரா ப⁴வந்தி । ஸ்வரான் ஜ்ஞாத்வாதி³த்யலோகமஶ்னுதே । ஷோட³ஶபத்ரம்ʼ ப⁴வதி ஷோட³ஶகலோ வை புருஷோ வர்ணோ ஹ வை புருஷ꞉ ஸ லோகாதி⁴ஷ்டி²தோ ப⁴வத்யனுஷ்டுப்³ வை புருஷ꞉ ॥ 1 ॥ ஸ ஹோவாச ப்⁴ருʼகு³புத்ர ஏதமானுஷ்டுப⁴ம்ʼ மந்த்ரராஜம்ʼ ஸாங்க³ம்ʼ ஸப்ரஸ்ருʼதிகம்ʼ ஸமாயம்ʼ ஸாதி⁴ஷ்டா²னம்ʼ ஸதந்த்ரம்ʼ யோ ஜானாதி ஸ பூ⁴திமான் ப⁴வதி ஸோ(அ)ம்ருʼதத்வம்ʼ ச க³ச்ச²தி ஸோ(அ)ம்ருʼதத்வம்ʼ ச க³ச்ச²தீதி ॥ 2 ॥ இதி க³ணேஶபூர்வதாபின்யுபநிஷத்ஸு த்ருʼதீயோபநிஷத் ॥ 3 ॥ இத்யாத²ர்வணீயா க³ணேஶபூர்வதாபின்யுபநிஷத்ஸமாப்தா ॥ ॥ அத² க³ணேஶோத்தரதாபின்யுபநிஷத் ॥ ஓம்ʼ ॥ ஓமித்யேகாக்ஷரம்ʼ ப்³ரஹ்மேத³ம்ʼ ஸர்வம் । தஸ்யோபவ்யாக்²யானம் । ஸர்வம்ʼ பூ⁴தம்ʼ ப⁴வ்யம்ʼ ப⁴விஷ்யதி³தி ஸர்வமோங்கார ஏவ । ஏதச்சான்யச்ச த்ரிகாலாதீதம்ʼ தத³ப்யோங்கார ஏவ । ஸர்வம்ʼ ஹ்யேதத்³க³ணேஶோ(அ)யமாத்மா ப்³ரஹ்மேதி । ஸோ(அ)யமாத்மா சதுஷ்பாத் । ஜாக³ரிதஸ்தா²னோ ப³ஹி꞉ப்ரஜ்ஞ꞉ ஸப்தாங்க³ ஏகோனவிம்ʼஶதிமுக²꞉ ஸ்தூ²லபு⁴க்³வைஶ்வானர꞉ ப்ரத²ம꞉ பாத³꞉ । ஸ்வப்னஸ்தா²னோ(அ)ந்த꞉ப்ரஜ்ஞ꞉ ஸப்தாங்க³ ஏகோனவிம்ʼஶதிமுக²꞉ ப்ரவிவிக்தபு⁴க் தைஜஸோ த்³விதீய꞉ பாத³꞉ । யத்ர ஸுப்தோ ந கஞ்சன காமம்ʼ காமயதே ந கஞ்சன ஸ்வப்னம்ʼ பஶ்யதி தத்ஸுஷுப்தம் । ஸுஷுப்திஸ்தா²ன ஏகீபூ⁴த꞉ ப்ரஜ்ஞானக⁴ன ஏவானந்த³பு⁴க் சேதோமுக²꞉ ப்ராஜ்ஞஸ்த்ருʼதீய꞉ பாத³꞉ । ஏஷ ஸர்வேஶ்வர ஏஷ ஸர்வஜ்ஞ ஏஷோ(அ)ந்தர்யாம்யேஷ யோனி꞉ ஸர்வஸ்ய ப்ரப⁴வாப்யயௌ ஹி பூ⁴தானாம் । நாந்த꞉ப்ரஜ்ஞம்ʼ ந ப³ஹி꞉ப்ரஜ்ஞம்ʼ நோப⁴யத꞉ப்ரஜ்ஞம்ʼ ந ப்ரஜ்ஞம்ʼ நாப்ரஜ்ஞம்ʼ ந ப்ரஜ்ஞானக⁴னமத்³ருʼஷ்ட-மவ்யவஹார்யமக்³ராஹ்யமலக்ஷண-மசிந்த்யமவ்யபதே³ஶ்ய-மைகாத்ம்யப்ரத்யயஸாரம்ʼ ப்ரபஞ்சோபஶமம்ʼ ஶிவமத்³வைதம்ʼ சதுர்த²ம்ʼ மன்யந்தே ஸ க³ணேஶ ஆத்மா விஜ்ஞேய꞉ । ஸதோ³ஜ்ஜ்வலோ வித்³யாதத்கார்யஹீன꞉ ஸ்வாத்மப³ந்த⁴ரஹித꞉ ஸர்வதோ³ஷரஹித ஆனந்த³ரூப꞉ ஸர்வாதி⁴ஷ்டா²ன꞉ ஸன்மாத்ரோ நிரஸ்தாவித்³யாதமோமோஹமேவேதி ஸம்பா⁴வ்யாஹமோம்ʼ தத்ஸத்பரம்ʼ ப்³ரஹ்ம விக்⁴னராஜஶ்சிதா³த்மக꞉ ஸோ(அ)ஹமோம்ʼ தத்³விநாயகம்ʼ பரம்ʼ ஜ்யோதீ ரஸோ(அ)ஹமித்யாத்மானமாதா³ய மனஸா ப்³ரஹ்மணைகீகுர்யாத் । விநாயகோ(அ)ஹமித்யேதத்தத்த்வத꞉ ப்ரவத³ந்தி யே । ந தே ஸம்ʼஸாரிணோ நூனம்ʼ ப்ரமோதோ³ வை ந ஸம்ʼஶய꞉ ॥ இத்யுபநிஷத் । ய ஏவம்ʼ வேத³ ஸ முக்²யோ ப⁴வதீதி யாஜ்ஞவல்க்ய இதி யாஜ்ஞவல்க்ய இதி । ஏததே³வ பரம்ʼ த்⁴யானமேததே³வ பரம்ʼ தப꞉ । விநாயகஸ்ய யஜ்ஜ்ஞானம்ʼ பூஜனம்ʼ ப⁴வமோசனம் ॥ அஶ்வமேத⁴ஸஹஸ்ராணி வாஜபேயஶதானி ச । ஏகஸ்ய த்⁴யானயோக³ஸ்ய கலாம்ʼ நார்ஹந்தி ஷோட³ஶீம் ॥ இதி க³ணேஶோத்தரதாபின்யுபநிஷத்ஸு ப்ரத²மோபநிஷத் ॥ 1 ॥ ஓம்ʼ ॥ ஸ விஷ்ணு꞉ ஸ ஶிவ꞉ ஸ ப்³ரஹ்மா ஸேந்த்³ர꞉ ஸேந்து³꞉ ஸ ஸூர்ய꞉ ஸ வாயு꞉ ஸோ(அ)க்³னி꞉ ஸ ப்³ரஹ்மாயமாத்மனே ஸர்வதே³வாய ஆத்மனே பூ⁴தாய ஆத்மன இதி மன்யந்தே । ஓம்ʼ ஸோ(அ)ஹம்ʼ ஓம்ʼ ஸோ(அ)ஹம்ʼ ஓம்ʼ ஸோ(அ)ஹமிதி । ஓம்ʼ ப்³ரஹ்மன் ஓம்ʼ ப்³ரஹ்மன் ஓம்ʼ ப்³ரஹ்மன்னிதி । ஓம்ʼ ஶிவம்ʼ ஓம்ʼ ஶிவம்ʼ ஓம்ʼ ஶிவமிதி । தம்ʼ க³ணேஶம்ʼ தம்ʼ க³ணேஶமித³ம்ʼ ஶ்ரேஷ்ட²ம் । ஓம்ʼ க³ணானாம்ʼ த்வா க³ணபதி꞉ । ஸப்ரியாணாம்ʼ த்வா ப்ரியபதி꞉ । ஸநிதீ⁴னாம்ʼ த்வா நிதி⁴பதி꞉ । ஓம்ʼ தத்புருஷாய வித்³மஹே வக்ரதுண்டா³ய தீ⁴மஹி । தன்னோ த³ந்தீ ப்ரசோத³யாத் । ஓம்ʼ தத்³க³ணேஶ꞉ । ஓம்ʼ ஸத்³க³ணேஶ꞉ । ஓம்ʼ பரம்ʼ க³ணேஶ꞉ । ஓம்ʼ ப்³ரஹ்ம க³ணேஶ꞉ । க³ணனாகாரோ நாத³꞉ । ஏதத்ஸர்வோ நாத³꞉ । ஸர்வாகாரோ நாத³꞉ । ஏததா³காரோ நாத³꞉ । மஹாந்நாத³꞉ । ஸ க³ணேஶோ மஹான் ப⁴வதி । ஸோ(அ)ணுர்ப⁴வதி । ஸ வந்த்³யோ ப⁴வதி । ஸ முக்²யோ ப⁴வதி । ஸ பூஜ்யோ ப⁴வதி । ரூபவான் ப⁴வதி । அரூபவான் பா⁴வதி । த்³வைதோ ப⁴வதி । அத்³வைதோ ப⁴வதி । ஸ்தா²வரஸ்வரூபவான் ப⁴வதி । ஜங்க³மஸ்வரூபவான் ப⁴வதி । ஸசேதனவிசேதனோ ப⁴வதி । ஸர்வம்ʼ ப⁴வதி । ஸ க³ணேஶோ(அ)வ்யக்தோ யோ(அ)ணுர்ய꞉ ஶ்ரேஷ்ட²꞉ ஸ வை வேக³வத்தர꞉ । அஹ்ரஸ்வாஹ்ரஸ்வஶ்ச । அதிஹ்ரஸ்வாதிஹ்ரஸ்வாதிஹ்ரஸ்வஶ்ச । அஸ்தூ²லாஸ்தூ²லாஸ்தூ²லஶ்ச । ஓம்ʼ ந வாயுர்நாக்³நிர்னாகாஶோ நாப꞉ ப்ருʼதி²வீ ந ச । ந த்³ருʼஶ்யம்ʼ ந த்³ருʼஶ்யம்ʼ ந த்³ருʼஶ்யம் । ந ஶீதம்ʼ நோஷ்ணம்ʼ ந வர்ஷம்ʼ ச । ந பீதம்ʼ ந பீதம்ʼ ந பீதம் । ந ஶ்வேதம்ʼ ந ஶ்வேதம்ʼ ந ஶ்வேதம் । ந ரக்தம்ʼ ந ரக்தம்ʼ ந ரக்தம்ʼ । ந க்ருʼஷ்ணம்ʼ ந க்ருʼஷ்ணம்ʼ ந க்ருʼஷ்ணம் । ந ரூபம்ʼ ந நாம ந கு³ணம் । ந ப்ராப்யம்ʼ க³ணேஶம்ʼ மன்யந்தே । ஸ ஶுத்³த⁴꞉ ஸ ஶுத்³த⁴꞉ ஸ ஶுத்³தோ⁴ க³ணேஶ꞉ । ஸ ப்³ரஹ்ம ஸ ப்³ரஹ்ம ஸ ப்³ரஹ்ம க³ணேஶ꞉ । ஸ ஶிவ꞉ ஸ ஶிவ꞉ ஸ ஶிவோ க³ணேஶ꞉ । இந்த்³ரோ க³ணேஶோ விஷ்ணுர்க³ணேஶ꞉ ஸூர்யோ க³ணேஶ ஏதத்ஸர்வம்ʼ க³ணேஶ꞉ । ஸ நிர்கு³ண꞉ ஸ நிரஹங்கார꞉ ஸ நிர்விகல்ப꞉ ஸ நிரீஹ꞉ ஸ நிராகார ஆனந்த³ரூபஸ்தேஜோரூபமநிர்வாச்யமப்ரமேய꞉ புராதனோ க³ணேஶோ நிக³த்³யதே । ஸ ஆத்³ய꞉ ஸோ(அ)க்ஷர꞉ ஸோ(அ)னந்த꞉ ஸோ(அ)வ்யயோ மஹான்புருஷ꞉ । தச்சு²த்³த⁴ம்ʼ தச்ச²ப³லம்ʼ தத꞉ ப்ரக்ருʼதிமஹத்தத்த்வானி ஜாயந்தே । ததஶ்சாஹங்காராதி³ பஞ்சதன்மாத்ராணி ஜாயந்தே । தத꞉ ப்ருʼத்²வ்யப்தேஜோவாய்வாகாஶ பஞ்சமஹத்³பூ⁴தானி ஜாயந்தே । ப்ருʼதி²வ்யா ஓஷத⁴ய ஓஷதீ⁴ப்⁴யோ(அ)ன்னமந்நாத்³ரேதஸ்தத꞉ புருஷஸ்தத꞉ ஸர்வம்ʼ தத꞉ ஸர்வம்ʼ தத꞉ ஸர்வம்ʼ தத꞉ ஸர்வம்ʼ ஜக³த் । ஸர்வாணி பூ⁴தானி ஜாயந்தே । தே³வா நு ஜாயந்தே । ததஶ்ச ஜீவந்தி । தே³வா நு ஜீவந்தி । யஜ்ஞா நு ஜீவந்தி । ஸர்வம்ʼ ஜீவதி । ஸ க³ணேஶ ஆத்மா விஜ்ஞேய꞉ । இத்யுபநிஷத் । ய ஏவம்ʼ வேத³ ஸ முக்²யோ ப⁴வதீதி யாஜ்ஞவல்க்ய இதி யாஜ்ஞவல்க்ய இதி ॥ இதி க³ணேஶோத்தரதாபின்யுபநிஷத்ஸு த்³விதீயோபநிஷத் ॥ 2 ॥ ஓம்ʼ ॥ க³ணேஶோ வை ப்³ரஹ்ம தத்³வித்³யாத் । யதி³த³ம்ʼ கிஞ்ச ஸர்வம்ʼ பூ⁴தம்ʼ ப⁴வ்யம்ʼ ஜாயமானம்ʼ ச தத்ஸர்வமித்யாசக்ஷதே । அஸ்மான்னாத꞉ பரம்ʼ கிஞ்சித் । யோ வை வேத³ ஸ வேத³ ப்³ரஹ்ம ப்³ரஹ்மைவோபாப்னோதி । தத்ஸர்வமித்யாசக்ஷதே । ப்³ரஹ்மவிஷ்ண்வாதி³க³ணாநாமீஶபூ⁴தமித்யாஹ தத்³க³ணேஶ இதி । தத்பரமித்யாஹ யமேதே நாப்னுவந்தி ப்ருʼதி²வீ ஸுவர்சா யுவதி꞉ ஸஜோஷா꞉ । யத்³வை வாங் நாக்ராமதி மனஸா ஸஹ நாக்³நிர்ன ப்ருʼத்²வீ ந தேஜோ ந வாயுர்ன வ்யோம ந ஜலமித்யாஹ । நேந்த்³ரியம்ʼ ந ஶரீரம்ʼ ந நாம ந ரூபம் । ந ஶுக்லம்ʼ ந ரக்தம்ʼ ந பீதம்ʼ ந க்ருʼஷ்ணமிதி । ந ஜாக்³ரன்ன ஸ்வப்னோ ந ஸுஷுப்திர்ன வை துரீயா । தச்சு²த்³த⁴மப்ராப்யமப்ராப்யம்ʼ ச । அஜ்ஞேயம்ʼ சாஜ்ஞேயம்ʼ ச । விகல்பாஸஹிஷ்ணு தத்ஸஶக்திகம்ʼ க³ஜவக்த்ரம்ʼ க³ஜாகாரம்ʼ ஜக³தே³வாவருந்தே⁴ । தி³வமனந்தஶீர்ஷைர்தி³ஶமனந்தகரைர்வ்யோமானந்த-ஜட²ரைர்மஹீமனந்தபாதை³꞉ ஸ்வதேஜஸா பா³ஹ்யாந்தரீயான்வ்யாப்ய திஷ்ட²தீத்யாஹ । தத்³வை பரம்ʼ ப்³ரஹ்ம க³ணேஶ இத்யாத்மானம்ʼ மன்யந்தே । தத்³வை ஸர்வத꞉ பஶ்யதி ஸ்ம ந கிஞ்சித்³த³த³ர்ஶ । ததோ வை ஸோ(அ)ஹமபூ⁴த் । நைகாகிதா யுக்தேதி கு³ணாந்நிர்மமே । நாமே ரஜ꞉ ஸ வை ப்³ரஹ்மா । முகா²த்ஸத்த்வம்ʼ ஸ வை விஷ்ணு꞉ । நயனாத்தம꞉ ஸ வை ஹர꞉ । ப்³ரஹ்மாணமுபதி³ஶதி ஸ்ம ப்³ரஹ்மன் குரு ஸ்ருʼஷ்டிம் । ப்³ரஹ்மோவாச நாஹம்ʼ வேத்³மி । க³ணேஶ உவாச மத்³தே³ஹே ப்³ரஹ்மாண்டா³ந்தர்க³தம்ʼ விலோகய ததா²விதா⁴மேவ குரு ஸ்ருʼஷ்டிம் । அத² ப்³ரஹ்மா ஜன்மத்³வாரேண ப்³ரஹ்மாண்டா³ந்தர்க³தம்ʼ விலோகயதி ஸ்ம । ஸமுத்³ரான் ஸரித꞉ பர்வதான் வனானி மஹீம்ʼ தி³வம்ʼ பாதாலம்ʼ ச நரான் பஶூன்ம்ருʼகா³ந்நாகா³ன் ஹயான் கோ³வ்ரஜான் ஸூர்யாசந்த்³ரமஸோ நக்ஷத்ராண்யக்³னீன் வாயூந்தி³ஶஸ்ததோ வை ஸ்ருʼஷ்டிமசீகரத் । ததஶ்சாத்மானமிதி மன்யதே ஸ்ம । ந வை மத்த꞉ பரம்ʼ கிஞ்சித³ஹமேவ ஸர்வஸ்யேஶ இதி யாவத்³வத³தி தாவத்க்ரூரா அஜாயேரன் । மஹத்³தே³ஹா ஜிஹ்வயா பு⁴வம்ʼ லிஹானா த³ம்ʼஷ்ட்ராவ்யாப்தாகாஶா மஹச்ச²ப்³தா³ ப்³ரஹ்மாணம்ʼ ஹந்துமுத்³யுக்தா꞉ । தாந்த்³ருʼஷ்ட்வாபி³ப்⁴யத்தத்ஸம்ʼஸ்மார । ததஶ்சாக்³ரே கோடிஸூர்யப்ரதீகாஶமானந்த³ரூபம்ʼ க³ஜவக்த்ரம்ʼ விலோகயதி ஸ்ம । துஷ்டாவாத² க³ணேஶ்வரம் । த்வம்ʼ நிர்மாதா க்ஷ்மாப்⁴ருʼதாம்ʼ ஸரிதாம்ʼ ஸாக³ராணாம்ʼ ஸ்தா²வராணாம்ʼ ஜங்க³மானாம்ʼ ச । த்வத்த꞉ பரதரம்ʼ கிஞ்சின்னைவாஸ்தி ஜக³த꞉ ப்ரபோ⁴ । கர்தா ஸர்வஸ்ய விஶ்வஸ்ய பாதஸம்ʼஹாரகாரக꞉ । ப⁴வானித³ம்ʼ ஜக³த்ஸர்வம்ʼ வ்யாப்யைவ பரிதிஷ்ட²தி ॥ இதி ஸ்துத்வா ப்³ரஹ்மாணம்ʼ தது³வாச ப்³ரஹ்மம்ʼஸ்தபஸ்வ தபஸ்வேத்யுக்த்வா(அ)ந்தர்ஹிதே தஸ்மின் ப்³ரஹ்மா தபஶ்சசார । கியத்ஸ்வதீதேஷ்வனேஹ꞉ஸு தபஸி ஸ்தி²தே ப்³ரஹ்மணி புரோ பூ⁴த்வோவாச । ப்ரஸன்னோ(அ)ஹம்ʼ ப்ரஸன்னோ(அ)ஹம்ʼ வரான் வரய । ஶ்ருத்வைவம்ʼ வசோன்மீல்ய நயனே யாவத்புர꞉ பஶ்யதி தாவத்³க³ணேஶம்ʼ த³த³ர்ஶ । ஸ்தௌதி ஸ்ம । த்வம்ʼ ப்³ரஹ்மா த்வம்ʼ விஷ்ணுஸ்த்வம்ʼ ஹரஸ்த்வம்ʼ ப்ரஜாபதிஸ்த்வமிந்த்³ரஸ்த்வம்ʼ ஸூர்யஸ்த்வம்ʼ ஸோமஸ்த்வம்ʼ க³ணேஶ꞉ । த்வயா வ்யாப்தம்ʼ சராசரம்ʼ த்வத்³ருʼதே ந ஹி கிஞ்சன । ததஶ்ச க³ணேஶ உவாச । த்வம்ʼ சாஹம்ʼ ச ந வை பி⁴ன்னௌ குரு ஸ்ருʼஷ்டிம்ʼ ப்ரஜாபதே । ஶக்திம்ʼ க்³ருʼஹாண மத்³த³த்தாம்ʼ ஜக³த்ஸர்ஜனகர்மணி ॥ ததோ வை க்³ருʼஹீதாயாம்ʼ ஶஸ்த்வா ப்³ரஹ்மண꞉ ஸ்ருʼஷ்டிரஜாயத । ப்³ராஹ்மணோ வை முகா²ஜ்ஜஜ்ஞே பா³ஹ்வோ꞉ க்ஷத்ரமூர்வோர்வைஶ்ய꞉ பத்³ப்⁴யாம்ʼ ஶூத்³ரஶ்சக்ஷுஷோ வை ஸூர்யோ மனஶ்சந்த்³ரமா அக்³நிர்வை முகா²த்ப்ராணாத்³வாயுர்நாபே⁴ர்வ்யோம ஶீர்ஷ்ணோ த்³யௌ꞉ பத்³ப்⁴யாம்ʼ பூ⁴மிர்தி³ஶ꞉ ஶ்ரோத்ராத் । ததா² லோகானகல்பயன்னிதி । ததோ வை ஸத்த்வமுவாச த்வம்ʼ வை விஷ்ணு꞉ பாஹி பாஹி ஜக³த்ஸர்வம் । விஷ்ணுருவாச ந மே ஶக்தி꞉ । ஸோவாச க்³ருʼஹாணேமாம்ʼ வித்³யாம் । ததோ வை ஸத்த்வம்ʼ தாமாதா³ய ஜக³த்பாதி ஸ்ம । ஹரமுவாச குரு ஹர ஸம்ʼஹாரம் । ஜக³த்³த⁴ரணாத்³த⁴ரோ ப⁴வ । ஹரஶ்சாத்மானமித்யவைதி ஸ்ம ந வை மத்பரம்ʼ கிஞ்சித்³விஶ்வஸ்யாதி³ரஹம்ʼ ஹர இதி க³ர்வம்ʼ த³தௌ⁴ யாவத்தாவத்³வ்யாப்தம்ʼ வ்யோம க³ஜவக்த்ரைர்மஹச்ச²ப்³தை³ர்ஹரம்ʼ ஹர்துமுத்³யுக்தை꞉ । ஹரோ வை விலோக்ய ருத³தி ஸ்ம । ரோத³நாத்³ருத்³ரஸஞ்ஜ்ஞ꞉ । ததஸ்தம்ʼ புருஷம்ʼ ஸ்ம்ருʼத்வா துஷ்டாவ த்வம்ʼ ப்³ரஹ்மா த்வம்ʼ கர்தா த்வம்ʼ ப்ரதா⁴னம்ʼ த்வம்ʼ லோகான் ஸ்ருʼஜஸி ரக்ஷஸி ஹரஸி । விஶ்வாதா⁴ரஸ்த்வமனாதா⁴ரோ(அ)னாதே⁴யோ(அ)நிர்தே³ஶ்யோ(அ)ப்ரதர்க்யோ வ்யாப்யேத³ம்ʼ ஸர்வம்ʼ திஷ்ட²ஸீதி ஸ்தவநாத்³விநாயகம்ʼ த³த³ர்ஶ । ததஶ்ச தம்ʼ நநாம । க³ணேஶ உவாச குரு ஹர ஹரணம் । தத்³வை ஸம்ʼஹர்தா(அ)பூ⁴த்³ருத்³ர꞉ । ய ஏவம்ʼ வேத³ ஸ க³ணேஶோ ப⁴வதி । இத்யுபநிஷத் ॥ இதி க³ணேஶோத்தரதாபின்யுபநிஷத்ஸு த்ருʼதீயோபநிஷத் ॥ 3 ॥ ஓம்ʼ ॥ க³ணேஶோ வை ஸத³ஜாயத தத்³வை பரம்ʼ ப்³ரஹ்ம । தத்³விதா³ப்னோதி பரம் । ததே³ஷாப்⁴யுக்தா யத³நாதி³பூ⁴தம்ʼ யத³னந்தரூபம்ʼ யத்³விஜ்ஞானரூபம்ʼ யத்³தே³வா꞉ ஸர்வே ப்³ரஹ்ம ஜ்யேஷ்ட²முபாஸதே ந வை கார்யம்ʼ கரணம்ʼ ந தத்ஸமஶ்சாதி⁴கஶ்ச த்³ருʼஶ்ய꞉ । ஸூர்யோ(அ)ஸ்மாத்³பீ⁴த உதே³தி । வாதோ(அ)ஸ்மாத்³பீ⁴த꞉ பவதே । அக்³நிர்வை பீ⁴தஸ்திஷ்ட²தி । தச்சித்ஸ்வரூபம்ʼ நிர்விகாரமத்³வைதம்ʼ ச । தன்மாயாஶப³லமஜனீத்யாஹ । அனேன யதா² தமஸ்ததஶ்சோமிதி த்⁴வநிரபூ⁴த் । ஸ வை க³ஜாகார꞉ । அநிர்வசனீயா ஸைவ மாயா ஜக³த்³பீ³ஜமித்யாஹ । ஸைவ ப்ரக்ருʼதிரிதி க³ணேஶ இதி ப்ரதா⁴னமிதி ச மாயாஶப³லமிதி ச । ஏதஸ்மாத்³வை மஹத்தத்த்வமஜாயத । தத꞉ கராக்³ரேணாஹங்காரம்ʼ ஸ்ருʼஷ்டவான் । ஸ வை த்ரிவித⁴꞉ ஸாத்த்விகோ ராஜஸஸ்தாமஸஶ்சேதி । ஸாத்த்விகீ ஜ்ஞானஶக்தி꞉ । ராஜஸீ க்ரியாஶக்தி꞉ । தாமஸீ த்³ரவ்யஶக்தி꞉ । தாமஸ்யா꞉ பஞ்சதன்மாத்ரா அஜாயந்த பஞ்சபூ⁴தான்யஜாயந்த । ராஜஸ்யா꞉ பஞ்ச ஜ்ஞானேந்த்³ரியாணி பஞ்ச கர்மேந்த்³ரியாணி பஞ்ச வாயவஶ்சாஜாயந்த । ஸாத்த்விக்யா தி³ஶோ வாயு꞉ ஸூர்யோ வருணோ(அ)ஶ்வினாவிதி ஜ்ஞானேந்த்³ரியதே³வதா அக்³நிரிந்த்³ரோ விஷ்ணு꞉ ப்ரஜாபதிர்மித்ர இதி கர்மேந்த்³ரியதே³வதா꞉ । இத³மாதி³புருஷரூபம் । பரமாத்மன꞉ ஸூக்ஷ்மஶரீரமித³மேவோச்யதே । அத² த்³விதீயம் । பஞ்சதன்மாத்ரா꞉ பஞ்சஸூக்ஷ்மபூ⁴தான்யுபாதா³ய பஞ்சீகரணே க்ருʼதே பஞ்சமஹாபூ⁴தான்யஜாயந்த । அவஶிஷ்டானாம்ʼ பஞ்சபஞ்சாஶானாம்ʼ கல்பாரம்ப⁴ஸமயே பூ⁴தவிபா⁴கே³ சைதன்யப்ரவேஶாத³ஹமித்யபி⁴மான꞉ । தஸ்மாதா³தி³க³ணேஶோ ப⁴வானுச்யதே । ததோ வை பூ⁴தேப்⁴யஶ்சதுர்த³ஶ லோகா அஜாயேரன் । தத³ந்தர்க³தஜீவராஶய꞉ ஸ்தூ²லஶரீரை꞉ ஸஹ விராடி³த்யுச்யதே । இதி த்³விதீயம் । ராஜஸோ ப்³ரஹ்மா ஸாத்த்விகோ விஷ்ணுஸ்தாமஸோ வை ஹர꞉ । த்ரயம்ʼ மிலித்வா பரஸ்பரமுவாச அஹமேவ ஸர்வஸ்யேஶ இதி । ததோ வை பரஸ்பரமஸஹமாநாஶ்சோர்த்⁴வம்ʼ ஜக்³மு꞉ । தத்ர ந கிஞ்சித்³த³த்³ருʼஶு꞉ । ததஶ்சாத⁴꞉ப்ரதே³ஶே த³ஶதி³க்ஷு ப்⁴ரமந்தோ ந கிஞ்சித்பஶ்யந்தி ஸ்ம । ததோ வை த்⁴யானஸ்தி²தா அபூ⁴வன் । ததஶ்ச ஹ்ருʼத்³தே³ஶே மஹாந்தம்ʼ புருஷம்ʼ க³ஜவக்த்ரமஸங்க்²யஶீர்ஷமஸங்க்²யபாத³மனந்தகரம்ʼ தேஜஸா வ்யாப்தாகி²லலோகம்ʼ ப்³ரஹ்மமூர்தா⁴னம்ʼ தி³க்ஶ்ரவணம்ʼ ப்³ரஹ்மாண்ட³க³ண்ட³ம்ʼ சித்³வ்யோமதாலுகம்ʼ ஸத்யஜனனம்ʼ ச ஜக³து³த்பத்த்யபாயோன்மேஷனிமேஷம்ʼ ஸோமார்காக்³னிநேத்ரம்ʼ பர்வதேஶரத³ம்ʼ புண்யாபுண்யோஷ்ட²ம்ʼ க்³ரஹோடு³த³ஶனம்ʼ பா⁴ரதீஜிஹ்வம்ʼ ஶக்ரக்⁴ராணம்ʼ குலகோ³த்ராம்ʼஸம்ʼ ஸோமேன கண்ட²ம்ʼ ஹரஶிரோருஹம்ʼ ஸரின்னத³பு⁴ஜமுரகா³ங்கு³லிகம்ருʼக்ஷநக²ம்ʼ ஶ்ரீஹ்ருʼத்காமாகாஶநாபி⁴கம்ʼ ஸாக³ரோத³ரம்ʼ மஹீகடிதே³ஶம்ʼ ஸ்ருʼஷ்டிலிங்க³கம்ʼ பர்வதேஶோரும்ʼ த³ஸ்ரஜானுகம்ʼ ஜட²ராந்த꞉ஸ்தி²தயக்ஷக³ந்த⁴ர்வரக்ஷ꞉கின்னரமானுஷம்ʼ பாதாலஜங்க⁴கம்ʼ முனிசரணம்ʼ காலாங்கு³ஷ்ட²கம்ʼ தாரகாஜாலலாங்கு³லம்ʼ த்³ருʼஷ்ட்வா ஸ்துவந்தி ஸ்ம । யதோ வா இமானி பூ⁴தானி ஜாயந்தே யதோ(அ)க்³னி꞉ ப்ருʼதி²வ்யப்தேஜோ வாயுர்யத்கராக்³ராத்³ப்³ரஹ்மவிஷ்ணுருத்³ரா அஜாயந்த யதோ வை ஸமுத்³ரா꞉ ஸரித꞉ பர்வதாஶ்ச யதோ வை சராசரமிதி ஸ்தவனாத்ப்ரஸன்னோ பூ⁴த்வோவாசா(அ)ஹம்ʼ ஸர்வஸ்யேஶோ மத்த꞉ ஸர்வாணி பூ⁴தானி மத்த꞉ ஸர்வம்ʼ சராசரம்ʼ ப⁴வந்தோ வை ந மத்³பி⁴ன்னா கு³ணா மே வை ந ஸம்ʼஶய꞉ । கு³ணேஶம்ʼ மாம்ʼ ஹ்ருʼதி³ ஸஞ்சிந்த்ய ராஜஸ த்வம்ʼ ஜக³த்குரு ஸாத்த்விக த்வம்ʼ பாலய தாமஸ த்வம்ʼ ஹரேத்யுக்த்வாந்தர்ஹித꞉ । ஸ வை க³ணேஶ꞉ । ஸர்வாத்மா விஜ்ஞேய꞉ ஸர்வதே³வாத்மா வை ஸ ஏக꞉ । ய ஏவம்ʼ வேத³ ஸ க³ணேஶோ ப⁴வதி । இத்யுபநிஷத் । இதி க³ணேஶோத்தரதாபின்யுபநிஷத்ஸு சதுர்தோ²பநிஷத் ॥ 4 ॥ ஓம்ʼ ॥ தே³வா ஹ வை ருத்³ரமப்³ருவன் கத²மேதஸ்யோபாஸனம் । ஸ ஹோவாச ருத்³ரோ க³ணகோ நிச்ருʼத்³கா³யத்ரீ ஶ்ரீக³ணபதேரேனம்ʼ மந்த்ரராஜமன்யோன்யாபா⁴வாத்ப்ரணவஸ்வரூபஸ்யாஸ்ய பரமாத்மனோ(அ)ங்கா³னி ஜானீதே ஸ ஜானாதி ஸோ(அ)ம்ருʼதத்வம்ʼ ச க³ச்ச²தி । யோ(அ)தீ⁴தே ஸ ஸர்வம்ʼ தரதி । ய ஏனம்ʼ மந்த்ரராஜம்ʼ க³ணபதே꞉ ஸர்வத³ம்ʼ நித்யம்ʼ ஜபதி ஸோ(அ)க்³னிம்ʼ ஸ்தம்ப⁴யதி ஸ உத³கம்ʼ ஸ்தம்ப⁴யதி ஸ வாயும்ʼ ஸ்தம்ப⁴யதி ஸ ஸூர்யம்ʼ ஸ்தம்ப⁴யதி ஸ ஸர்வாந்தே³வான் ஸ்தம்ப⁴யதி ஸ விஷம்ʼ ஸ்தம்ப⁴யதி ஸ ஸர்வோபத்³ரவான் ஸ்தம்ப⁴யதி । இத்யுபநிஷத் । ய ஏனம்ʼ மந்த்ரராஜம்ʼ நித்யமதீ⁴தே ஸ விக்⁴னானாகர்ஷயதி தே³வான்யக்ஷான் ரோகா³ன் க்³ரஹான்மனுஷ்யான் ஸர்வானாகர்ஷயதி । ஸ பூ⁴ர்லோகம்ʼ ஜயதி ஸ பு⁴வர்லோகம்ʼ ஜயதி ஸ ஸ்வர்லோகம்ʼ ஸ மஹர்லோகம்ʼ ஸ ஜனோலோகம்ʼ ஸ தபோலோகம்ʼ ஸ ஸத்யலோகம்ʼ ஸ ஸப்தலோகம்ʼ ஸ ஸர்வலோகம்ʼ ஜயதி । ஸோ(அ)க்³நிஷ்டோமேன யஜதே ஸோ(அ)த்யக்³நிஷ்டோமேன ஸ உக்த்²யேன ஸ ஷோட³ஶீயேன ஸ வாஜபேயேன ஸோ(அ)திராத்ரேண ஸோ(அ)ப்தோர்யாமேண ஸ ஸர்வை꞉ க்ரதுபி⁴ர்யஜதே । ய ஏனம்ʼ மந்த்ரராஜம்ʼ வைக்⁴னராஜம்ʼ நித்யமதீ⁴தே ஸ ருʼசோ(அ)தீ⁴தே ஸ யஜூம்ʼஷ்யதீ⁴தே ஸ ஸாமான்யதீ⁴தே ஸோ(அ)த²ர்வணமதீ⁴தே ஸோ(அ)ங்கி³ரஸமதீ⁴தே ஸ ஶாகா² அதீ⁴தே ஸ புராணான்யதீ⁴தே ஸ கல்பானதீ⁴தே ஸ கா³தா² அதீ⁴தே ஸ நாராஶம்ʼஸீரதீ⁴தே ஸ ப்ரணவமதீ⁴தே । ய ஏனம்ʼ மந்த்ரராஜம்ʼ கா³ணேஶம்ʼ வேத³ ஸ ஸர்வம்ʼ வேத³ ஸ ஸர்வம்ʼ வேத³ । ஸ வேத³ஸம꞉ ஸ முநிஸம꞉ ஸ நாக³ஸம꞉ ஸ ஸூர்யஸம꞉ ஸோ(அ)க்³நிஸம இதி । உபனீதைகாதி⁴கஶதம்ʼ க்³ருʼஹஸ்தை²காதி⁴கஶதம்ʼ வானப்ரஸ்த²காதி⁴கஶதம்ʼ ருத்³ரஜாபகஸமம் । யதீநாமேகாதி⁴கஶதமத²ர்வஶிர꞉ஶிகா²த்⁴யாபகஸமம் । ருத்³ரஜாபகைகாதி⁴கஶதமத²ர்வஶிர꞉ஶிகா²த்⁴யாபகைகாதி⁴கஶதம்ʼ கா³ணேஶதாபனீயோபநிஷத³த்⁴யாபகஸமம் । மந்த்ரராஜஜாபகஸ்ய யத்ர ரவிஸோமௌ ந தபதோ யத்ர வாயுர்நக்ஷத்ராணி ந வாதி பா⁴ந்தி யத்ராக்³நிர்ம்ருʼத்யுர்ன த³ஹதி ப்ரவிஶதி யத்ர மோஹோ ந து³꞉க²ம்ʼ ஸதா³னந்த³ம்ʼ பரானந்த³ம்ʼ ஸமம்ʼ ஶாஶ்வதம்ʼ ஸதா³ஶிவம்ʼ பரம்ʼ ப்³ரஹ்மாதி³வந்தி³தம்ʼ யோகி³த்⁴யேயம்ʼ பரமம்ʼ பத³ம்ʼ சின்மாத்ரம்ʼ ப்³ரஹ்மணஸ்பதிமேகாக்ஷரமேவம்ʼ பரமாத்மானம்ʼ பா³ஹ்யாந்தே லப்³தா⁴ம்ʼஶம்ʼ ஹ்ருʼதி³ ஸமாவேஶ்ய கிஞ்சிஜ்ஜப்த்வா ததோ ந ஜபோ ந மாலா நாஸனம்ʼ ந த்⁴யானாவாஹநாதி³ । ஸ்வயமவதீர்ணோ ஹ்யயமாத்மா ப்³ரஹ்ம ஸோ(அ)ஹமாத்மா சதுஷ்பாத் । ப³ஹி꞉ப்ரஜ்ஞ꞉ ப்ரவிவிக்தபு⁴க் தைஜஸ꞉ । யத்ர ஸுப்தோ ந கஞ்சன காமம்ʼ காமயதே ந கஞ்சன ஸ்வப்னம்ʼ பஶ்யதி தத்ஸுஷுப்தம் । தத்ரைகீபூ⁴த꞉ ப்ரஜ்ஞானக⁴ன ஏவானந்த³பு⁴க் சேதோமுக²꞉ ப்ராஜ்ஞ꞉ । ஏஷ ஸர்வேஶ்வர꞉ ஸர்வாந்தர்யாமீ ஏஷ யோனி꞉ ஸர்வபூ⁴தானாம் । ந ப³ஹி꞉ப்ரஜ்ஞம்ʼ நாந்த꞉ப்ரஜ்ஞம்ʼ நோப⁴யத꞉ப்ரஜ்ஞம்ʼ ந ப்ரஜ்ஞானக⁴னமவ்யபதே³ஶ்யமவ்யவஹார்யமக்³ராஹ்யமலக்ஷணமசிந்த்யமைகாத்ம்யப்ரத்யயஸாரம்ʼ ப்ரபஞ்சோபஶமம்ʼ ஶிவமத்³வைதமேவம்ʼ சதுஷ்பாத³ம்ʼ த்⁴யாயன் ஸ ஏவாத்மா ப⁴வதி । ஸ ஆத்மா விஜ்ஞேய꞉ ஸதோ³ஜ்ஜ்வலோ(அ)வித்³யாதத்கார்யஹீன꞉ ஸ்வாத்மப³ந்த⁴ரஹிதோ த்³வைதரஹிதோ நிரஸ்தாவித்³யாதமோமோஹாஹங்காரப்ரதா⁴னமஹமேவ ஸர்வமிதி ஸம்பா⁴வ்ய விக்⁴னராஜப்³ரஹ்மண்யம்ருʼதே தேஜோமயே பரஞ்ஜ்யோதிர்மயே ஸதா³னந்த³மயே ஸ்வப்ரகாஶே ஸதோ³தி³தே நித்யே ஶுத்³தே⁴ முக்தே ஜ்ஞேஶ்வரே பரே ப்³ரஹ்மணி ரமதே ரமதே ரமதே ரமதே । ய ஏவம்ʼ க³ணேஶதாபனீயோபநிஷத³ம்ʼ வேத³ ஸ ஸம்ʼஸாரம்ʼ தரதி கோ⁴ரம்ʼ தரதி து³꞉க²ம்ʼ தரதி விக்⁴னாம்ʼஸ்தரதி மஹோபஸர்க³ம்ʼ தரதி । ஆனந்தோ³ ப⁴வதி ஸ நித்யோ ப⁴வதி ஸ ஶுத்³தோ⁴ ப⁴வதி ஸ முக்தோ ப⁴வதி ஸ ஸ்வப்ரகாஶோ ப⁴வதி ஸ ஈஶ்வரோ ப⁴வதி ஸ முக்²யோ ப⁴வதி ஸ வைஶ்வானரோ ப⁴வதி ஸ தைஜஸோ ப⁴வதி ஸ ப்ராஜ்ஞோ ப⁴வதி ஸ ஸாக்ஷீ ப⁴வதி ஸ ஏவ ப⁴வதி ஸ ஸர்வோ ப⁴வதி ஸ ஸர்வோ ப⁴வதீதி । இத்யுபநிஷத் । ஓம்ʼ ஸ ஹ நாவவது ॥ இதி க³ணேஶோத்தரதாபின்யுபநிஷத்ஸு பஞ்சமோபநிஷத் ॥ 5 ॥ ஓம்ʼ ॥ அதோ²வாச ப⁴க³வதீ கௌ³ரீ ஹ வை ருத்³ரமேதஸ்ய மந்த்ரராஜஸ்யானுஷ்டா²னவிதி⁴ம்ʼ மே ப்³ரூஹீதி । ஸ ஹோவாச ருத்³ரோ விதி⁴ம்ʼ லப்³தா⁴ம்ʼஶம்ʼ கு³ருதே³வதயோராலப்⁴ய மனஸா புஷ்பம்ʼ நிவேத்³யோபக்ரம்ய பூ⁴தோத்ஸாரணமாஸனப³ந்தா⁴த்³யாத்மரக்ஷாஸுநியமபூ⁴தஶுத்³தி⁴-ப்ராணஸ்தா²பனப்ரணவாவர்தன-மாத்ருʼபூஜனாந்தர்மாத்ருʼகாந்தர்யாகா³தி³ ஸம்பாத்³யாத்ர கேசன ஸமந்த்ரம்ʼ மூலவைதி³ககல்பைருபக்ரமம்ʼ க்³ரஹணஸமர்பணநிவேத³னானி பா³ஹ்யே(அ)ன்யதே²தி மஹார்க்⁴யம்ʼ ஶங்க²ம்ʼ த்ரிபாத்³யோர்க³ந்தா⁴தி³னா பூஜிதயோ꞉ ஸ்தா²ப்ய பாத்ராஸாத³னம்ʼ த³க்ஷிணோபக்ரமேண பாத்³யார்க்⁴யாசமனமது⁴பர்க-புனராசமனநிவேத³னபாத்ராணி ஸம்ʼஸ்தா²ஸு யதோ²பதி³ஷ்டம்ʼ சதுர்த்²யோ꞉ பர்வணி ஸம்ʼஸ்தா²ஸு யதா²விதி⁴ ஸ்தா²ப்ய நிவேத³னே ப்ரக்ஷாலனமேவ ததோ(அ)ர்வாக் பஞ்சாம்ருʼதபாத்ராணி ரிக்தம்ʼ ச மூலேனாலப்⁴ய நிவேதி³ன்யார்க்⁴யோத³கேனாத்மானம்ʼ பாத்ராணி ஸம்பா⁴ரம்ʼ ச ப்ரோக்ஷ்ய பாத்ராதிரிக்தானி மஹார்க்⁴யோத³கேன ஸர்வநிவேத³னம்ʼ கரஶுத்³தி⁴ம்ʼ மூலாஸுநியமம்ʼ யதோ²க்தர்ஷிச்ச²ந்தோ³தை³வதம்ʼ ஸ்ம்ருʼத்வா விநியோக³ஶ்ச நித்யே பூஜாங்கோ³ ஜபோ ஜபாங்கா³ பூஜா ஜப இத்யங்கு³ஷ்ட²வ்யாபகஸ்வாந்தாஷ்டாங்க³த³ண்டி³முண்டி³ந்யாஸாதி³ க்ருʼத்வா முக²மவேக்ஷ்யாத்மானம்ʼ தே³வரூபிணம்ʼ ஸம்பா⁴வ்ய மூர்த்⁴னி புஷ்பம்ʼ த³த்த்வா பீட²ம்ʼ ஸம்பூஜ்யாஸனம்ʼ த³த்த்வா ருʼஷ்யாதி³ க்ருʼத்வா த்⁴யாத்வா ஹ்ருʼத³யாம்போ⁴ஜே யோகி³னோ(அ)த்ர ஜபந்தி । ஸ்வாந்தாம்போ⁴ஜாத்³தே³வமாவாஹ்ய முத்³ராம்ʼ த³ர்ஶயித்வா தே³வஸ்ய ஸகலீகரணாங்கு³ஷ்ட²ஹ்ருʼத³யார்பின்யா ஸ்வாந்தே முத்³ராம்ʼ நிவேத்³ய பாத்ராணி ச மூலேன த³த்த்வா ரிக்தே பஞ்சாம்ருʼதம்ʼ ஸம்ʼயோஜ்ய தேன பஞ்சவாரம்ʼ ஸக்ருʼத்³வா(அ)பி⁴ஷிச்ய நித்யேன ஸந்தர்ப்ய கல்பஸ்தவநாதி³புருஷஸூக்த-ருத்³ராத்⁴யாயகோ⁴ஷஶாந்த்யாதி³னா மூலேன சாபி⁴ஷிச்ய ஸர்வபூஜாம்ʼ நிவேத்³ய தீ³பம்ʼ த்ரிர்ப்⁴ராம்ய ஸவ்யேனாப்லாவ்ய மஹாநைவேத்³யபீடா²வரணான்யுபஸம்ʼஹ்ருʼத்ய த³ர்ஶயேத் । தாம்பூ³லாந்தே கிஞ்சின்மூலமாவர்த்ய புனர்தூ⁴பாதி³த்ரயப⁴க்ஷ்யாதி³ நிவேத்³ய முத்³ரா꞉ ஸர்வோபசாரஸ்ய த³ர்ஶயித்வா நிவேத³னமித³மாஸனம்ʼ நம꞉ பாத்³யே ஏஷோ(அ)ர்க்⁴ய꞉ ஸ்வாஹேதி த³க்ஷிணகரே(அ)ர்க்⁴யே இத³ம்ʼ ஸ்வதே⁴தி புரஸ்த்ரிகே முகே² நம இதி ஸ்னானேஷ்வேஷ க³ந்தோ⁴ நமோ(அ)க்ஷதேஷு ஓம்ʼ புஷ்பாணி நம꞉ புஷ்பேஷ்வேஷ தூ⁴போ தீ³போ நமோ தூ⁴பதீ³பயோ꞉ ஸமர்பயாமீதி நைவேத்³யப²லதாம்பூ³லேஷு நிவேத³யாமி நமோ ஹிரண்யே ஏஷ புஷ்பாஞ்ஜலிர்னம இதி மாலாயாமிதி பரமம்ʼ ரஹஸ்யமப்ரகாஶ்யம்ʼ பீ³ஜம்ʼ ய ஏவம்ʼ வேத³ ஸ ஸர்வம்ʼ வேத³ ஸ ஸர்வம்ʼ வேத³ । வர்ணார்த²ம்ʼ லப்³தா⁴ம்ʼஶேன மந்த்ரார்தே²ன ச பீடா²வரணதே³வதாவதா⁴னேன வா ஜபதி ஸ ஜபதி । முக்²யம்ʼ லப்³தா⁴ம்ʼஶமாஸனம்ʼ ம்ருʼது³லம்ʼ பு⁴க்தரிக்தவாஸ꞉கௌஸும்ப⁴மாஞ்ஜிஷ்ட²-ரக்தகம்ப³லசித்ரம்ருʼக³வ்யாக்⁴ராஜினம்ʼ வா யதோ²க்தமுக்தான்யதரை-ராஸனாந்தரயோஜனாஸ்ப²டிககமல-ப⁴த்³ராக்ஷமணிமுக்தாப்ரவாலருத்³ராக்ஷ- குஶக்³ரந்தி²ஷு வா ஜபதி ஸ ஜபதி । குஶமயீ நித்யாக்ஷாலனம்ʼ சந்த³னாலேபோ தூ⁴பேநாபி⁴மந்த்ர்ய ப்ருʼத²க³பி⁴மந்த்ரணம்ʼ ஸத்³யோஜாதை꞉ பஞ்சபி⁴꞉ ப்ராணஸ்தா²பனஜீவனதர்பணகு³ப்தானி ச ஸ்வமூலே கு³ஹ்யம்ʼ வாமேன ஸ்ப்ருʼஶேன்ன த³ர்ஶயேத் । ஏவம்ʼ ஶ்ராவணே பவித்ரேண மதௌ⁴ த³மனேன ஜபமாலயா மஹானவம்யாம்ʼ தாபஸ்யாம்ʼ சதுர்த்²யாம்ʼ திலலட்³டு³கை꞉ ஸப்தம்யாம்ʼ ஶீதலசந்த³னேன ஶிவராத்ர்யாம்ʼ பி³ல்வத³லமாலயா(அ)ன்யஸ்மின்பர்வணி மஹத்யார்சயந்தி தே(அ)ர்சயந்தி । மோத³கப்ருʼது²கலாஜஸக்துரம்பா⁴ப²லேக்ஷுநாரீகேலாபூபானன்யானி ச யதோ²பதி³ஷ்டமாஹுதிபி⁴ர்ஜுஹோதி । ஜபஶ்ச ப்ராக்ப்ரவணே ஹோமோ(அ)ன்யதோ²பாஸ்ய꞉ । ஏவம்ʼ ய꞉ கரோதி ஸோ(அ)ம்ருʼதத்வம்ʼ விந்த³தி ஸ ப்ரதிஷ்டா²ம்ʼ ப்ராப்னோதி முக்திம்ʼ விந்த³தி பு⁴க்திம்ʼ பு⁴னக்தி வாசம்ʼ வத³தி யஶோ லப⁴தே । இத³ம்ʼ ரஹஸ்யம்ʼ யோ ஜானாதி ஸ ஜானாதி யோ(அ)தீ⁴தே ஸோ(அ)தீ⁴தே ஸ ஆனந்தோ³ ப⁴வதி ஸ நித்யோ ப⁴வதி ஸ விஶுத்³தோ⁴ ப⁴வதி ஸ முக்தோ ப⁴வதி ஸ ப்ரகாஶோ ப⁴வதி ஸ த³யாவான்ப⁴வதி ஜ்ஞானவான்ப⁴வத்யானந்த³வான்ப⁴வதி விஜ்ஞானவான்ப⁴வதி விஜ்ஞானானந்தோ³ ப⁴வதி ஸோ(அ)ம்ருʼதத்வம்ʼ ப⁴வத்யம்ருʼதத்வம்ʼ ப⁴வதீதி । ஓம்ʼ ஸஹ நாவவத்விதி ஶாந்தி꞉ ॥ இதி க³ணேஶோத்தரதாபின்யுபநிஷத்ஸு ஷஷ்டோ²பநிஷத் ॥ 6 ॥ இத்யாத²ர்வணீயா க³ணேஶதாபின்யுபநிஷத்ஸமாப்தா ।