ಓಂ ಸರ್ವೇ ವೈ ದೇವಾ ದೇವೀಮುಪತಸ್ಥುಃ ಕಾಸಿ ತ್ವ-ಮ್ಮಹಾದೇವೀತಿ ॥ 1 ॥ ಸಾ-ಽಬ್ರವೀದಹ-ಮ್ಬ್ರಹ್ಮಸ್ವರೂಪಿಣೀ । ಮತ್ತಃ ಪ್ರಕೃತಿಪುರುಷಾತ್ಮಕ-ಞ್ಜಗತ್ । ಶೂನ್ಯ-ಞ್ಚಾಶೂನ್ಯ-ಞ್ಚ ॥ 2 ॥ ಅಹಮಾನಂದಾನಾನಂದೌ । ಅಹಂ-ವಿಁಜ್ಞಾನಾವಿಜ್ಞಾನೇ । ಅಹ-ಮ್ಬ್ರಹ್ಮಾಬ್ರಹ್ಮಣಿ ವೇದಿತವ್ಯೇ । ಅಹ-ಮ್ಪಂಚಭೂತಾನ್ಯಪಂಚಭೂತಾನಿ । ಅಹಮಖಿಲ-ಞ್ಜಗತ್ ॥ 3 ॥ ವೇದೋ-ಽಹಮವೇದೋ-ಽಹಂ । ವಿದ್ಯಾ-ಽಹಮವಿದ್ಯಾ-ಽಹಂ । ಅಜಾ-ಽಹಮನಜಾ-ಽಹಂ । ಅಧಶ್ಚೋರ್ಧ್ವ-ಞ್ಚ ತಿರ್ಯಕ್ಚಾಹಂ ॥ 4 ॥ ಅಹಂ ರುದ್ರೇಭಿರ್ವಸುಭಿಶ್ಚರಾಮಿ । ಅಹಮಾದಿತ್ಯೈರುತ ವಿಶ್ವದೇವೈಃ । ಅಹ-ಮ್ಮಿತ್ರಾವರುಣಾವುಭೌ ಬಿಭರ್ಮಿ । ಅಹಮಿಂದ್ರಾಗ್ನೀ ಅಹಮಶ್ವಿನಾವುಭೌ ॥ 5 ॥ ಅಹಂ ಸೋಮ-ನ್ತ್ವಷ್ಟಾರ-ಮ್ಪೂಷಣ-ಮ್ಭಗ-ನ್ದಧಾಮಿ । ಅಹಂ-ವಿಁಷ್ಣುಮುರುಕ್ರಮ-ಮ್ಬ್ರಹ್ಮಾಣಮುತ ಪ್ರಜಾಪತಿ-ನ್ದಧಾಮಿ ॥ 6 ॥ ಅ॒ಹ-ನ್ದ॑ಧಾಮಿ॒ ದ್ರವಿ॑ಣಂ ಹ॒ವಿಷ್ಮ॑ತೇ ಸುಪ್ರಾ॒ವ್ಯೇ॒3 ಯಜ॑ಮಾನಾಯ ಸುನ್ವ॒ತೇ । ಅ॒ಹಂ ರಾಷ್ಟ್ರೀ॑ ಸಂ॒ಗಮ॑ನೀ॒ ವಸೂ॑ನಾ-ಞ್ಚಿಕಿ॒ತುಷೀ॑ ಪ್ರಥ॒ಮಾ ಯ॒ಜ್ಞಿಯಾ॑ನಾಂ । ಅ॒ಹಂ ಸು॑ವೇ ಪಿ॒ತರ॑ಮಸ್ಯ ಮೂ॒ರ್ಧನ್ಮಮ॒ ಯೋನಿ॑ರ॒ಪ್ಸ್ವಂತ-ಸ್ಸ॑ಮು॒ದ್ರೇ । ಯ ಏವಂ-ವೇಁದ । ಸ ದೇವೀಂ ಸಂಪದಮಾಪ್ನೋತಿ ॥ 7 ॥ ತೇ ದೇವಾ ಅಬ್ರುವನ್ ನಮೋ ದೇವ್ಯೈ ಮಹಾದೇವ್ಯೈ ಶಿವಾಯೈ ಸತತ-ನ್ನಮಃ । ನಮಃ ಪ್ರಕೃತ್ಯೈ ಭದ್ರಾಯೈ ನಿಯತಾಃ ಪ್ರಣತಾ-ಸ್ಸ್ಮ ತಾಂ ॥ 8 ॥ ತಾಮ॒ಗ್ನಿವ॑ರ್ಣಾ॒-ನ್ತಪ॑ಸಾ ಜ್ವಲಂ॒ತೀಂ-ವೈಁ॑ರೋಚ॒ನೀ-ಙ್ಕ॑ರ್ಮಫ॒ಲೇಷು॒ ಜುಷ್ಟಾಂ᳚ । ದು॒ರ್ಗಾ-ನ್ದೇ॒ವೀಂ ಶರ॑ಣ-ಮ್ಪ್ರಪ॑ದ್ಯಾಮಹೇ-ಽಸುರಾನ್ನಾಶಯಿತ್ರ್ಯೈ ತೇ ನಮಃ ॥ 9 ॥ (ಋ.ವೇ.8.100.11) ದೇ॒ವೀಂ-ವಾಁಚ॑ಮಜನಯಂತ ದೇ॒ವಾಸ್ತಾಂ-ವಿಁ॒ಶ್ವರೂ॑ಪಾಃ ಪ॒ಶವೋ॑ ವದಂತಿ । ಸಾ ನೋ॑ ಮಂ॒ದ್ರೇಷ॒ಮೂರ್ಜ॒-ನ್ದುಹಾ॑ನಾ ಧೇ॒ನುರ್ವಾಗ॒ಸ್ಮಾನುಪ॒ ಸುಷ್ಟು॒ತೈತು॑ ॥ 10 ॥ ಕಾಲರಾತ್ರೀ-ಮ್ಬ್ರಹ್ಮಸ್ತುತಾಂ-ವೈಁಷ್ಣವೀಂ ಸ್ಕಂದಮಾತರಂ । ಸರಸ್ವತೀಮದಿತಿ-ನ್ದಕ್ಷದುಹಿತರ-ನ್ನಮಾಮಃ ಪಾವನಾಂ ಶಿವಾಂ ॥ 11 ॥ ಮಹಾಲಕ್ಷ್ಮ್ಯೈ ಚ ವಿದ್ಮಹೇ ಸರ್ವಶಕ್ತ್ಯೈ ಚ ಧೀಮಹಿ । ತನ್ನೋ ದೇವೀ ಪ್ರಚೋದಯಾತ್ ॥ 12 ॥ ಅದಿತಿರ್​ಹ್ಯಜನಿಷ್ಟ ದಕ್ಷ ಯಾ ದುಹಿತಾ ತವ । ತಾ-ನ್ದೇವಾ ಅನ್ವಜಾಯಂತ ಭದ್ರಾ ಅಮೃತಬಂಧವಃ ॥ 13 ॥ ಕಾಮೋ ಯೋನಿಃ ಕಮಲಾ ವಜ್ರಪಾಣಿ- ರ್ಗುಹಾ ಹಸಾ ಮಾತರಿಶ್ವಾಭ್ರಮಿಂದ್ರಃ । ಪುನರ್ಗುಹಾ ಸಕಲಾ ಮಾಯಯಾ ಚ ಪುರೂಚ್ಯೈಷಾ ವಿಶ್ವಮಾತಾದಿವಿದ್ಯೋಂ ॥ 14 ॥ ಏಷಾ-ಽಽತ್ಮಶಕ್ತಿಃ । ಏಷಾ ವಿಶ್ವಮೋಹಿನೀ । ಪಾಶಾಂಕುಶಧನುರ್ಬಾಣಧರಾ । ಏಷಾ ಶ್ರೀಮಹಾವಿದ್ಯಾ । ಯ ಏವಂ-ವೇಁದ ಸ ಶೋಕ-ನ್ತರತಿ ॥ 15 ॥ ನಮಸ್ತೇ ಅಸ್ತು ಭಗವತಿ ಮಾತರಸ್ಮಾನ್ಪಾಹಿ ಸರ್ವತಃ ॥ 16 ॥ ಸೈಷಾಷ್ಟೌ ವಸವಃ । ಸೈಷೈಕಾದಶ ರುದ್ರಾಃ । ಸೈಷಾ ದ್ವಾದಶಾದಿತ್ಯಾಃ । ಸೈಷಾ ವಿಶ್ವೇದೇವಾ-ಸ್ಸೋಮಪಾ ಅಸೋಮಪಾಶ್ಚ । ಸೈಷಾ ಯಾತುಧಾನಾ ಅಸುರಾ ರಕ್ಷಾಂಸಿ ಪಿಶಾಚಾ ಯಕ್ಷಾ ಸಿದ್ಧಾಃ । ಸೈಷಾ ಸತ್ತ್ವರಜಸ್ತಮಾಂಸಿ । ಸೈಷಾ ಬ್ರಹ್ಮವಿಷ್ಣುರುದ್ರರೂಪಿಣೀ । ಸೈಷಾ ಪ್ರಜಾಪತೀಂದ್ರಮನವಃ । ಸೈಷಾ ಗ್ರಹನಕ್ಷತ್ರಜ್ಯೋತೀಂಷಿ । ಕಲಾಕಾಷ್ಠಾದಿಕಾಲರೂಪಿಣೀ । ತಾಮಹ-ಮ್ಪ್ರಣೌಮಿ ನಿತ್ಯಂ । ಪಾಪಾಪಹಾರಿಣೀ-ನ್ದೇವೀ-ಮ್ಭುಕ್ತಿಮುಕ್ತಿಪ್ರದಾಯಿನೀಂ । ಅನಂತಾಂ-ವಿಁಜಯಾಂ ಶುದ್ಧಾಂ ಶರಣ್ಯಾಂ ಶಿವದಾಂ ಶಿವಾಂ ॥ 17 ॥ ವಿಯದೀಕಾರಸಂ​ಯುಁಕ್ತಂ-ವೀಁತಿಹೋತ್ರಸಮನ್ವಿತಂ । ಅರ್ಧೇಂದುಲಸಿತ-ನ್ದೇವ್ಯಾ ಬೀಜಂ ಸರ್ವಾರ್ಥಸಾಧಕಂ ॥ 18 ॥ ಏವಮೇಕಾಕ್ಷರ-ಮ್ಬ್ರಹ್ಮ ಯತಯ-ಶ್ಶುದ್ಧಚೇತಸಃ । ಧ್ಯಾಯಂತಿ ಪರಮಾನಂದಮಯಾ ಜ್ಞಾನಾಂಬುರಾಶಯಃ ॥ 19 ॥ ವಾಙ್ಮಾಯಾ ಬ್ರಹ್ಮಸೂಸ್ತಸ್ಮಾ-ಥ್ಷಷ್ಠಂ-ವಁಕ್ತ್ರಸಮನ್ವಿತಂ । ಸೂರ್ಯೋ-ಽವಾಮಶ್ರೋತ್ರಬಿಂದುಸಂ​ಯುಁಕ್ತಷ್ಟಾತ್ತೃತೀಯಕಃ । ನಾರಾಯಣೇನ ಸಮ್ಮಿಶ್ರೋ ವಾಯುಶ್ಚಾಧರಯುಕ್ತತಃ । ವಿಚ್ಚೇ ನವಾರ್ಣಕೋ-ಽರ್ಣ-ಸ್ಸ್ಯಾನ್ಮಹದಾನಂದದಾಯಕಃ ॥ 20 ॥ ಹೃತ್ಪುಂಡರೀಕಮಧ್ಯಸ್ಥಾ-ಮ್ಪ್ರಾತಸ್ಸೂರ್ಯಸಮಪ್ರಭಾಂ । ಪಾಶಾಂಕುಶಧರಾಂ ಸೌಮ್ಯಾಂ-ವಁರದಾಭಯಹಸ್ತಕಾಂ । ತ್ರಿನೇತ್ರಾಂ ರಕ್ತವಸನಾ-ಮ್ಭಕ್ತಕಾಮದುಘಾ-ಮ್ಭಜೇ ॥ 21 ॥ ನಮಾಮಿ ತ್ವಾ-ಮ್ಮಹಾದೇವೀ-ಮ್ಮಹಾಭಯವಿನಾಶಿನೀಂ । ಮಹಾದುರ್ಗಪ್ರಶಮನೀ-ಮ್ಮಹಾಕಾರುಣ್ಯರೂಪಿಣೀಂ ॥ 22 ॥ ಯಸ್ಯಾ-ಸ್ಸ್ವರೂಪ-ಮ್ಬ್ರಹ್ಮಾದಯೋ ನ ಜಾನಂತಿ ತಸ್ಮಾದುಚ್ಯತೇ ಅಜ್ಞೇಯಾ । ಯಸ್ಯಾ ಅಂತೋ ನ ಲಭ್ಯತೇ ತಸ್ಮಾದುಚ್ಯತೇ ಅನಂತಾ । ಯಸ್ಯಾ ಲಕ್ಷ್ಯ-ನ್ನೋಪಲಕ್ಷ್ಯತೇ ತಸ್ಮಾದುಚ್ಯತೇ ಅಲಕ್ಷ್ಯಾ । ಯಸ್ಯಾ ಜನನ-ನ್ನೋಪಲಭ್ಯತೇ ತಸ್ಮಾದುಚ್ಯತೇ ಅಜಾ । ಏಕೈವ ಸರ್ವತ್ರ ವರ್ತತೇ ತಸ್ಮಾದುಚ್ಯತೇ ಏಕಾ । ಏಕೈವ ವಿಶ್ವರೂಪಿಣೀ ತಸ್ಮಾದುಚ್ಯತೇ ನೈಕಾ । ಅತ ಏವೋಚ್ಯತೇ ಅಜ್ಞೇಯಾನಂತಾಲಕ್ಷ್ಯಾಜೈಕಾ ನೈಕೇತಿ ॥ 23 ॥ ಮಂತ್ರಾಣಾ-ಮ್ಮಾತೃಕಾ ದೇವೀ ಶಬ್ದಾನಾ-ಞ್ಜ್ಞಾನರೂಪಿಣೀ । ಜ್ಞಾನಾನಾ-ಞ್ಚಿನ್ಮಯಾತೀತಾ ಶೂನ್ಯಾನಾಂ ಶೂನ್ಯಸಾಕ್ಷಿಣೀ । ಯಸ್ಯಾಃ ಪರತರ-ನ್ನಾಸ್ತಿ ಸೈಷಾ ದುರ್ಗಾ ಪ್ರಕೀರ್ತಿತಾ ॥ 24 ॥ ತಾ-ನ್ದುರ್ಗಾ-ನ್ದುರ್ಗಮಾ-ನ್ದೇವೀ-ನ್ದುರಾಚಾರವಿಘಾತಿನೀಂ । ನಮಾಮಿ ಭವಭೀತೋ-ಽಹಂ ಸಂಸಾರಾರ್ಣವತಾರಿಣೀಂ ॥ 25 ॥ ಇದಮಥರ್ವಶೀರ್​ಷಂ-ಯೋಁ-ಽಧೀತೇ ಸ ಪಂಚಾಥರ್ವಶೀರ್​ಷಜಪಫಲಮಾಪ್ನೋತಿ । ಇದಮಥರ್ವಶೀರ್​ಷಮಜ್ಞಾತ್ವಾ ಯೋ-ಽರ್ಚಾಂ ಸ್ಥಾಪಯತಿ । ಶತಲಕ್ಷ-ಮ್ಪ್ರಜಪ್ತ್ವಾ-ಽಪಿ ಸೋ-ಽರ್ಚಾಸಿದ್ಧಿ-ನ್ನ ವಿಂದತಿ । ಶತಮಷ್ಟೋತ್ತರ-ಞ್ಚಾಸ್ಯ ಪುರಶ್ಚರ್ಯಾವಿಧಿ-ಸ್ಸ್ಮೃತಃ । ದಶವಾರ-ಮ್ಪಠೇದ್ಯಸ್ತು ಸದ್ಯಃ ಪಾಪೈಃ ಪ್ರಮುಚ್ಯತೇ । ಮಹಾದುರ್ಗಾಣಿ ತರತಿ ಮಹಾದೇವ್ಯಾಃ ಪ್ರಸಾದತಃ । 26 ॥ ಸಾಯಮಧೀಯಾನೋ ದಿವಸಕೃತ-ಮ್ಪಾಪ-ನ್ನಾಶಯತಿ । ಪ್ರಾತರಧೀಯಾನೋ ರಾತ್ರಿಕೃತ-ಮ್ಪಾಪ-ನ್ನಾಶಯತಿ । ಸಾಯ-ಮ್ಪ್ರಾತಃ ಪ್ರಯುಂಜಾನೋ ಅಪಾಪೋ ಭವತಿ । ನಿಶೀಥೇ ತುರೀಯಸಂಧ್ಯಾಯಾ-ಞ್ಜಪ್ತ್ವಾ ವಾಕ್ಸಿದ್ಧಿರ್ಭವತಿ । ನೂತನಾಯಾ-ಮ್ಪ್ರತಿಮಾಯಾ-ಞ್ಜಪ್ತ್ವಾ ದೇವತಾಸಾನ್ನಿಧ್ಯ-ಮ್ಭವತಿ । ಪ್ರಾಣಪ್ರತಿಷ್ಠಾಯಾ-ಞ್ಜಪ್ತ್ವಾ ಪ್ರಾಣಾನಾ-ಮ್ಪ್ರತಿಷ್ಠಾ ಭವತಿ । ಭೌಮಾಶ್ವಿನ್ಯಾ-ಮ್ಮಹಾದೇವೀಸನ್ನಿಧೌ ಜಪ್ತ್ವಾ ಮಹಾಮೃತ್ಯು-ನ್ತರತಿ । ಸ ಮಹಾಮೃತ್ಯು-ನ್ತರತಿ । ಯ ಏವಂ-ವೇಁದ । ಇತ್ಯುಪನಿಷತ್ ॥ 27 ॥ ಇತಿ ದೇವ್ಯಥರ್ವಶೀರ್​ಷಂ ।