atha hainaṃ brahmarandhre brahmasvarūpiṇīmāpnoti । subhagāṃ triguṇitāṃ muktāsubhagāṃ kāmarephendirāṃ samastarūpiṇīmetāni triguṇitāni tadanu kūrcabījaṃ vyomaṣaṣṭhasvarāṃ bindumelanarūpāṃ taddvayaṃ māyādvayaṃ dakṣiṇe kālike cetyabhimukhagatāṃ tadanu bījasaptakamuccārya bṛhadbhānujāyāmuccaret । sa tu śivamayo bhavet । sarvasiddhīśvaro bhavet । gatistasyāstīti । nānyasya gatirastāti । sa tu vāgīśvaraḥ । sa tu nārīśvaraḥ । sa tu deveśvaraḥ । sa tu sarveśvaraḥ । abhinavajaladasaṅkāśā ghanastanī kuṭiladaṃṣṭrā śavāsanā kālikā dhyeyā । trikoṇaṃ pañcakoṇaṃ navakoṇaṃ padmam । tasmin devī sarvāṅge'bhyarcya tadidaṃ sarvāṅgaṃ oṃ kālī kapālinī kullā kurukullā virodhinī vipracittā ugrā ugraprabhā dīptā nīlā ghanā balākā mātrā mudrā'mitā caiva pañcadaśakoṇagāḥ । brāhmī nārāyaṇī māheśvarī kaumārī aparājitā vārāhī nārasiṃhikā cetyaṣṭapatragāḥ । ṣoḍaśasvarabhedena prathamena mantravibhāgaḥ । tanmūlenāvāhanaṃ tenaiva pūjanam । ya evaṃ mantrarājaṃ niyamena vā lakṣamāvartayati sa pāpmānaṃ hanti । sa brahmatvaṃ bhajati । saḥ amṛtatvaṃ bhajati । sa āyurārogyamaiśvaryaṃ bhajati । sadā pañcamakāreṇa pūjayet । sadā gurubhakto bhavet । sadā devabhakto bhavet । dharmiṣṭhatāṃ puṣṭimahatavācaṃ viprā labhante । mantrajāpino hyātmā vidyāprapūrito bhavati । sa jīvanmukto bhavati । sa sarvaśāstraṃ jānāti । sa sarvapuṇyakārī bhavati । sa sarvayajñayājī bhavati । rājāno dāsatāṃ yānti । japtvā sa sarvametaṃ mantrarājaṃ svayaṃ śiva evāhamityaṇimādivibhūtīnāmīśvaraḥ kālikāṃ labhet ॥ āvayoḥ pātrabhūtaḥ san sukṛtī tyaktakalmaṣaḥ । jīvanmuktaḥ sa vijñeyo yasmai labdhā hi dakṣiṇā ॥ daśāṃśaṃ homayettadanu tarpayet । atha haike yajñān kāmānadvaitajñānādīnaniruddhasarasvatīti । atha haiṣaḥ kālikāmanujāpī yaḥ sadā śuddhātmā jñānavairāgyayuktaḥ śāmbhavīdīkṣāsu raktaḥ śāktāsu । yadi vā brahmacārī rātrau nagnaḥ sarvadā madhunā'śakto manasā japapūjādiniyamavān । yoṣitpriyakaro bhagodakena tarpaṇaṃ tenaiva pūjanaṃ kuryāt । sarvadā kālikārūpamātmānaṃ vibhāvayet । sa sarvadā yoṣidāsakto bhavet । sa sarvahatyāṃ tarati tena madhudānena । atha pañcamakāreṇa sarvamāyādividyāṃ paśudhanadhānyaṃ sarveśatvaṃ ca kavitvaṃ ca । nānyaḥ paramaḥ panthā vidyate mokṣāya jñānāya dharmādharmāya । tatsarvaṃ bhūtaṃ bhavyaṃ yatkiñciddṛśyamānaṃ sthāvarajaṅgamaṃ tatsarvaṃ kālikātantre otaṃ protaṃ veda । ya evaṃ manujāpī sa pāpmānaṃ tarati । sa bhrūṇahatyāṃ tarati । so'gamyāgamanaṃ tarati । sa sarvasukhamāpnoti । sa sarvaṃ jānāti । sa sarvasaṃnyāsī bhavati । sa virakto bhavati । sa sarvavedādhyāyī bhavati । sa sarvamantrajāpī bhavati । sa sarvaśāsravettā bhavati । sa sarvajñānakārī bhavati । sa āvayormitrabhūto bhavati । ityāha bhagavān śivaḥ । nirvikalpena manasā sa vandyo bhavati ॥ atha hainām । mūlādhāre smareddivyaṃ trikoṇaṃ tejasāṃ nidhim । śikhā ānīya tasyāgneratha tūrdhvaṃ vyavasthitā ॥ nīlatoyadamadhyasthā vidyullekheva bhāsvarā । nīvāraśūkavattanvī pītā bhāsvatyaṇūpamā ॥ tasyāḥ śikhāyā madhye paramātmā vyavasthitaḥ । sa brahmā sa śivaḥ sendraḥ so'kṣaraḥ paramaḥ svarāṭ ॥ sa eva viṣṇuḥ sa prāṇaḥ sa kālo'gniḥ sa candramāḥ । iti kuṇḍalinīṃ dhyātvā sarvapāpaiḥ pramucyate ॥ mahāpātakebhyaḥ pūto bhūtvā sarvamantrasiddhiṃ kṛtvā bhairavo bhavet । mahākālabhairavo'sya ṛṣiḥ । uṣṇik chandaḥ kālikā devatā । hrīṃ bījaṃ hrūṃ śaktiḥ krīṃ kīlakaṃ aniruddhasarasvatī devatā । kavitve pāṇḍityārthe jape viniyogaḥ । ityevamṛṣicchandodaivataṃ jñātvā mantra sāphalyamaśnute । atharvavidyāṃ prathamamekaṃ dvayaṃ trayaṃ vā nāmadvayasampuṭitaṃ kṛtvā yojayet । gatistasyāstīti । nānyasya gatirastīti । oṃ satyam । oṃ tatsat ॥ atha hainaṃ guruṃ paritoṣyainaṃ mantrarājaṃ gṛhṇīyāt । mantrarājaṃ gurustamapi śiṣyāya satkulīnāya vidyābhaktāya suveṣāṃ striyaṃ spṛṣṭvā svayaṃ niśāyāṃ nirupadravaḥ paripūjya ekākī śivagehe lakṣaṃ tadardhaṃ vā japitvā dadyāt । oṃ oṃ oṃ satyaṃ satyaṃ satyam । nānyaprakāreṇa siddhirbhavati । athāha vai kālikāmanostārāmanostripurāmanoḥ sarvadurgāmanorvā svarūpasiddhirevamiti śivam ॥ ityātharvaṇe saubhāgyakāṇḍe kālikopaniṣat samāptā ।