asya śrī ādityakavacastōtramahāmantrasya agastyō bhagavānr̥ṣiḥ anuṣṭupchandaḥ ādityō dēvatā śrīṁ bījaṁ ṇīṁ śaktiḥ sūṁ kīlakaṁ mama ādityaprasādasiddhyarthē japē viniyōgaḥ । dhyānam – japākusumasaṅkāśaṁ dvibhujaṁ padmahastakam sindūrāmbaramālyaṁ ca raktagandhānulēpanam māṇikyaratnakhacitasarvābharaṇabhūṣitam saptāśvarathavāhaṁ tu mēruṁ caiva pradakṣiṇam ॥ 1 ॥ dēvāsuravarairvandyaṁ ghr̥ṇibhiḥ parisēvitam । dhyāyēt paṭhēt suvarṇābhaṁ sūryasya kavacaṁ mudā ॥ 2 ॥ atha kavacaṁ – ghr̥ṇiḥ pātu śirōdēśē sūryaḥ pātu lalāṭakam । ādityō lōcanē pātu śrutī pātu divākaraḥ ॥ 3 ॥ ghrāṇaṁ pātu sadā bhānuḥ mukhaṁ pātu sadā raviḥ । jihvāṁ pātu jagannētraḥ kaṇṭhaṁ pātu vibhāvasuḥ ॥ 4 ॥ skandhau grahapatiḥ pātu bhujau pātu prabhākaraḥ । karāvabjakaraḥ pātu hr̥dayaṁ pātu nabhōmaṇiḥ ॥ 5 ॥ dvādaśātmā kaṭiṁ pātu savitā pātu sakthinī । ūrū pātu suraśrēṣṭhō jānunī pātu bhāskaraḥ ॥ 6 ॥ jaṅghē mē pātu mārtāṇḍō gulphau pātu tviṣāṁ patiḥ । pādau dinamaṇiḥ pātu pātu mitrō:’khilaṁ vapuḥ ॥ 7 ॥ ādityakavacaṁ puṇyamabhēdyaṁ vajrasannibham । sarvarōgabhayādibhyō mucyatē nātra saṁśayaḥ ॥ 8 ॥ saṁvatsaramupāsitvā sāmrājyapadavīṁ labhēt । aśēṣarōgaśāntyarthaṁ dhyāyēdādityamaṇḍalam ॥ 9 ॥ āditya maṇḍala stutiḥ – anēkaratnasamyuktaṁ svarṇamāṇikyabhūṣaṇam । kalpavr̥kṣasamākīrṇaṁ kadambakusumapriyam ॥ 10 ॥ sindūravarṇāya sumaṇḍalāya suvarṇaratnābharaṇāya tubhyam । padmādinētrē ca supaṅkajāya brahmēndra-nārāyaṇa-śaṅkarāya ॥ 11 ॥ saṁraktacūrṇaṁ sasuvarṇatōyaṁ sakuṅkumābhaṁ sakuśaṁ sapuṣpam । pradattamādāya ca hēmapātrē praśastanādaṁ bhagavan prasīda ॥ 12 ॥ iti śrī āditya kavacam ।