അസ്യ ശ്രീസുബ്രഹ്മണ്യഹൃദയസ്തോത്രമഹാമംത്രസ്യ, അഗസ്ത്യോ ഭഗവാന് ഋഷിഃ, അനുഷ്ടുപ്ഛംദഃ, ശ്രീസുബ്രഹ്മണ്യോ ദേവതാ, സൌം ബീജം, സ്വാഹാ ശക്തിഃ, ശ്രീം കീലകം, ശ്രീസുബ്രഹ്മണ്യ പ്രസാദസിദ്ധ്യര്ഥേ ജപേ വിനിയോഗഃ ॥ കരന്യാസഃ – സുബ്രഹ്മണ്യായ അംഗുഷ്ഠാഭ്യാം നമഃ । ഷണ്മുഖായ തര്ജനീഭ്യാം നമഃ । ശക്തിധരായ മധ്യമാഭ്യാം നമഃ । ഷട്കോണസംസ്ഥിതായ അനാമികാഭ്യാം നമഃ । സർവതോമുഖായ കനിഷ്ഠികാഭ്യാം നമഃ । താരകാംതകായ കരതലകരപൃഷ്ഠാഭ്യാം നമഃ ॥ ഹൃദയാദി ന്യാസഃ – സുബ്രഹ്മണ്യായ ഹൃദയായ നമഃ । ഷണ്മുഖായ ശിരസേ സ്വാഹാ । ശക്തിധരായ ശിഖായൈ വഷട് । ഷട്കോണസംസ്ഥിതായ കവചായ ഹുമ് । സർവതോമുഖായ നേത്രത്രയായ വൌഷട് । താരകാംതകായ അസ്ത്രായ ഫട് । ഭൂര്ഭുവസ്സുവരോമിതി ദിഗ്ബംധഃ ॥ ധ്യാനമ് । ഷഡ്വക്ത്രം ശിഖിവാഹനം ത്രിനയനം ചിത്രാംബരാലംകൃതം വജ്രം ശക്തിമസിം ത്രിശൂലമഭയം ഖേടം ധനുശ്ചക്രകമ് । പാശം കുക്കുടമംകുശം ച വരദം ദോര്ഭിര്ദധാനം സദാ ധ്യായാമീപ്സിത സിദ്ധിദം ശിവസുതം ശ്രീദ്വാദശാക്ഷം ഗുഹമ് ॥ ലമിത്യാദി പംചപൂജാം കുര്യാത് । പീഠികാ । സത്യലോകേ സദാനംദേ മുനിഭിഃ പരിവേഷ്ടിതമ് । പപ്രച്ഛുര്മുനയഃ സർവേ ബ്രഹ്മാണം ജഗതാം ഗുരുമ് ॥ 1 ॥ ഭഗവന് സർവലോകേശ സർവജ്ഞ കമലാസന । സദാനംദ ജ്ഞാനമൂര്തേ സർവഭൂതഹിതേ രത ॥ 2 ॥ ബഹുധാ പ്രോക്തമേതസ്യ ഗുഹസ്യ ചരിതം മഹത് । ഹൃദയം ശ്രോതുമിച്ഛാമഃ തസ്യൈവ ക്രൌംചഭേദിനഃ ॥ 3 ॥ ബ്രഹ്മോവാച । ശൃണ്വംതു മുനയഃ സർവേ ഗുഹ്യാദ്ഗുഹ്യതരം മഹത് । സുബ്രഹ്മണ്യസ്യ ഹൃദയം സർവഭൂതഹിതോദയമ് ॥ 4 ॥ സർവാര്ഥസിദ്ധിദം പുണ്യം സർവകാര്യൈക സാധനമ് । ധര്മാര്ഥകാമദം ഗുഹ്യം ധനധാന്യപ്രവര്ധനമ് ॥ 5 ॥ രഹസ്യമേതദ്ദേവാനാം അദേയം യസ്യ കസ്യചിത് । സർവമിത്രകരം ഗോപ്യം തേജോബലസമന്വിതമ് ॥ 6 ॥ പ്രവക്ഷ്യാമി ഹിതാര്ഥം വഃ പരിതുഷ്ടേന ചേതസാ । ഹൃത്പദ്മകര്ണികാമധ്യേ ധ്യായേത്സർവമനോഹരമ് ॥ 7 ॥ അഥ ഹൃദയമ് । സുവര്ണമംഡപം ദിവ്യം രത്നതോരണരാജിതമ് । രത്നസ്തംഭസഹസ്രൈശ്ച ശോഭിതം പരമാദ്ഭുതമ് ॥ 8 ॥ പരമാനംദനിലയം ഭാസ്വത്സൂര്യസമപ്രഭമ് । ദേവദാനവഗംധർവഗരുഡൈര്യക്ഷകിന്നരൈഃ । ॥ 9 ॥ സേവാര്ഥമാഗതൈഃ സിദ്ധൈഃ സാധ്യൈരധ്യുഷിതം സദാ । മഹായോഗീംദ്രസംസേവ്യം മംദാരതരുമംഡിതമ് ॥ 10 ॥ മണിവിദ്രുമവേദീഭിര്മഹതീഭിരുദംചിതമ് । തന്മധ്യേഽനംതരത്ന ശ്രീച്ഛടാമംഡലശോഭിതമ് ॥ 11 ॥ രത്നസിംഹാസനം ദിവ്യം രവികോടിസമപ്രഭമ് । സർവാശ്ചര്യമയം പുണ്യം സർവതഃ സുപരിഷ്കൃതമ് ॥ 12 ॥ തന്മധ്യേഽഷ്ടദലം പദ്മം ഉദ്യദര്കപ്രഭോദയമ് । നിഗമാഗമരോലംബലംബിതം ചിന്മയോദയമ് ॥ 13 ॥ ദിവ്യം തേജോമയം ദിവ്യം ദേവതാഭിര്നമസ്കൃതമ് । ദേദീപ്യമാനം രുചിഭിർവിശാലം സുമനോഹരമ് ॥ 14 ॥ തന്മധ്യേ സർവലോകേശം ധ്യായേത്സർവാംഗസുംദരമ് । അനംതാദിത്യസംകാശം ആശ്രിതാഭീഷ്ടദായകമ് ॥ 15 ॥ അചിംത്യജ്ഞാനവിജ്ഞാനതേജോബലസമന്വിതമ് । സർവായുധധരം ദിവ്യം സർവാശ്ചര്യമയം ഗുഹമ് ॥ 16 ॥ മഹാര്ഹ രത്നഖചിത ഷട്കിരീടവിരാജിതമ് । ശശാംകാര്ധകലാരമ്യ സമുദ്യന്മൌളിഭൂഷണമ് ॥ 17 ॥ മദനോജ്ജ്വലകോദംഡമംഗളഭ്രൂവിരാജിതമ് । വിസ്തീര്ണാരുണപദ്മശ്രീ വിലസദ്ദ്വാദശേക്ഷണമ് ॥ 18 ॥ ചാരുശ്രീവര്ണസംപൂര്ണമുഖശോഭാവിഭാസുരമ് । മണിപ്രഭാസമഗ്രശ്രീസ്ഫുരന്മകരകുംഡലമ് ॥ 19 ॥ ലസദ്ദര്പണദര്പാഢ്യ ഗംഡസ്ഥലവിരാജിതമ് । ദിവ്യകാംചനപുഷ്പശ്രീനാസാപുടവിരാജിതമ് ॥ 20 ॥ മംദഹാസപ്രഭാജാലമധുരാധര ശോഭിതമ് । സർവലക്ഷണലക്ഷ്മീഭൃത്കംബുകംധര സുംദരമ് ॥ 21 ॥ മഹാനര്ഘമഹാരത്നദിവ്യഹാരവിരാജിതമ് । സമഗ്രനാഗകേയൂരസന്നദ്ധഭുജമംഡലമ് ॥ 22 ॥ രത്നകംകണസംഭാസ്വത്കരാഗ്ര ശ്രീമഹോജ്ജ്വലമ് । മഹാമണികവാടാഭവക്ഷഃസ്ഥലവിരാജിതമ് ॥ 23 ॥ അതിഗാംഭീര്യസംഭാവ്യനാഭീനവസരോരുഹമ് । രത്നശ്രീകലിതാബദ്ധലസന്മധ്യപ്രദേശകമ് ॥ 24 ॥ സ്ഫുരത്കനകസംവീതപീതാംബരസമാവൃതമ് । ശൃംഗാരരസസംപൂര്ണ രത്നസ്തംഭോപമോരുകമ് ॥ 25 ॥ സ്വര്ണകാഹലരോചിഷ്ണു ജംഘായുഗളമംഡലമ് । രത്നമംജീരസന്നദ്ധ രമണീയ പദാംബുജമ് ॥ 26 ॥ ഭക്താഭീഷ്ടപ്രദം ദേവം ബ്രഹ്മവിഷ്ണ്വാദിസംസ്തുതമ് । കടാക്ഷൈഃ കരുണാദക്ഷൈസ്തോഷയംതം ജഗത്പതിമ് ॥ 27 ॥ ചിദാനംദജ്ഞാനമൂര്തിം സർവലോകപ്രിയംകരമ് । ശംകരസ്യാത്മജം ദേവം ധ്യായേച്ഛരവണോദ്ഭവമ് ॥ 28 ॥ അനംതാദിത്യചംദ്രാഗ്നി തേജഃ സംപൂര്ണവിഗ്രഹമ് । സർവലോകൈകവരദം സർവവിദ്യാര്ഥതത്ത്വകമ് ॥ 29 ॥ സർവേശ്വരം സർവവിഭും സർവഭൂതഹിതേ രതമ് । ഏവം ധ്യാത്വാ തു ഹൃദയം ഷണ്മുഖസ്യ മഹാത്മനഃ ॥ 30 ॥ സർവാന്കാമാനവാപ്നോതി സമ്യക് ജ്ഞാനം ച വിംദതി । ശുചൌ ദേശേ സമാസീനഃ ശുദ്ധാത്മാ ചരിതാഹ്നികഃ ॥ 31 ॥ പ്രാങ്മുഖോ യതചിത്തശ്ച ജപേദ്ധൃദയമുത്തമമ് । സകൃദേവ മനും ജപ്ത്വാ സംപ്രാപ്നോത്യഖിലം ശുഭമ് ॥ 32 ॥ ഇദം സർവാഘഹരണം മൃത്യുദാരിദ്ര്യനാശനമ് । സർവസംപത്കരം പുണ്യം സർവരോഗനിവാരണമ് ॥ 33 ॥ സർവകാമകരം ദിവ്യം സർവാഭീഷ്ടപ്രദായകമ് । പ്രജാകരം രാജ്യകരം ഭാഗ്യദം ബഹുപുണ്യദമ് ॥ 34 ॥ ഗുഹ്യാദ്ഗുഹ്യതരം ഭൂയോ ദേവാനാമപി ദുര്ലഭമ് । ഇദം തു നാതപസ്കായ നാഭക്തായ കദാചന ॥ 35 ॥ ന ചാശുശ്രൂഷവേ ദേയം ന മദാംധായ കര്ഹിചിത് । സച്ഛിഷ്യായ കുലീനായ സ്കംദഭക്തിരതായ ച ॥ 36 ॥ സതാമഭിമതായേദം ദാതവ്യം ധര്മവര്ധനമ് । യ ഇദം പരമം പുണ്യം നിത്യം ജപതി മാനവഃ । തസ്യ ശ്രീ ഭഗവാന് സ്കംദഃ പ്രസന്നോ ഭവതി ധ്രുവമ് ॥ 37 ॥ ഇതി ശ്രീസ്കാംദപുരാണേ സുബ്രഹ്മണ്യഹൃദയസ്തോത്രമ് ॥