ശ്രീപാർവതീപുത്ര, മാം പാഹി വല്ലീശ, ത്വത്പാദപംകേജ സേവാരതോഽഹം, ത്വദീയാം നുതിം ദേവഭാഷാഗതാം കര്തുമാരബ്ധവാനസ്മി, സംകല്പസിദ്ധിം കൃതാര്ഥം കുരു ത്വമ് । ഭജേ ത്വാം സദാനംദരൂപം, മഹാനംദദാതാരമാദ്യം, പരേശം, കലത്രോല്ലസത്പാര്ശ്വയുഗ്മം, വരേണ്യം, വിരൂപാക്ഷപുത്രം, സുരാരാധ്യമീശം, രവീംദ്വഗ്നിനേത്രം, ദ്വിഷഡ്ബാഹു സംശോഭിതം, നാരദാഗസ്ത്യകണ്വാത്രിജാബാലിവാല്മീകിവ്യാസാദി സംകീര്തിതം, ദേവരാട്പുത്രികാലിംഗിതാംഗം, വിയദ്വാഹിനീനംദനം, വിഷ്ണുരൂപം, മഹോഗ്രം, ഉദഗ്രം, സുതീക്ഷം, മഹാദേവവക്ത്രാബ്ജഭാനും, പദാംഭോജസേവാ സമായാത ഭക്താളി സംരക്ഷണായത്ത ചിത്തം, ഉമാ ശർവ ഗംഗാഗ്നി ഷട്കൃത്തികാ വിഷ്ണു ബ്രഹ്മേംദ്ര ദിക്പാല സംപൂതസദ്യത്ന നിർവര്തിതോത്കൃഷ്ട സുശ്രീതപോയജ്ഞ സംലബ്ധരൂപം, മയൂരാധിരൂഢം, ഭവാംഭോധിപോതം, ഗുഹം വാരിജാക്ഷം, ഗുരും സർവരൂപം, നതാനാം ശരണ്യം, ബുധാനാം വരേണ്യം, സുവിജ്ഞാനവേദ്യം, പരം, പാരഹീനം, പരാശക്തിപുത്രം, ജഗജ്ജാല നിര്മാണ സംപാലനാഹാര്യകാരം, സുരാണാം വരം, സുസ്ഥിരം, സുംദരാംഗം, സ്വഭാക്താംതരംഗാബ്ജ സംചാരശീലം, സുസൌംദര്യഗാംഭീര്യ സുസ്ഥൈര്യയുക്തം, ദ്വിഷഡ്ബാഹു സംഖ്യായുധ ശ്രേണിരമ്യം, മഹാംതം, മഹാപാപദാവാഗ്നി മേഘം, അമോഘം, പ്രസന്നം, അചിംത്യ പ്രഭാവം, സുപൂജാ സുതൃപ്തം, നമല്ലോക കല്പം, അഖംഡ സ്വരൂപം, സുതേജോമയം, ദിവ്യദേഹം, ഭവധ്വാംതനാശായസൂര്യം, ദരോന്മീലിതാംഭോജനേത്രം, സുരാനീക സംപൂജിതം, ലോകശസ്തം, സുഹസ്താധൃതാനേകശസ്ത്രം, നിരാലംബമാഭാസമാത്രം ശിഖാമധ്യവാസം, പരം ധാമമാദ്യംതഹീനം, സമസ്താഘഹാരം, സദാനംദദം, സർവസംപത്പ്രദം, സർവരോഗാപഹം, ഭക്തകാര്യാര്ഥസംപാദകം, ശക്തിഹസ്തം, സുതാരുണ്യലാവണ്യകാരുണ്യരൂപം, സഹസ്രാര്ക സംകാശ സൌവര്ണഹാരാളി സംശോഭിതം, ഷണ്മുഖം, കുംഡലാനാം വിരാജത്സുകാംത്യം ചിത്തേര്ഗംഡഭാഗൈഃ സുസംശോഭിതം, ഭക്തപാലം, ഭവാനീസുതം, ദേവമീശം, കൃപാവാരികല്ലോല ഭാസ്വത്കടാക്ഷം, ഭജേ ശർവപുത്രം, ഭജേ കാര്തികേയം, ഭജേ പാർവതേയം, ഭജേ പാപനാശം, ഭജേ ബാഹുലേയം, ഭജേ സാധുപാലം, ഭജേ സര്പരൂപം, ഭജേ ഭക്തിലഭ്യം, ഭജേ രത്നഭൂഷം, ഭജേ താരകാരിം, ദരസ്മേരവക്ത്രം, ശിഖിസ്ഥം, സുരൂപം, കടിന്യസ്ത ഹസ്തം, കുമാരം, ഭജേഽഹം മഹാദേവ, സംസാരപംകാബ്ധി സമ്മഗ്നമജ്ഞാനിനം പാപഭൂയിഷ്ഠമാര്ഗേ ചരം പാപശീലം, പവിത്രം കുരു ത്വം പ്രഭോ, ത്വത്കൃപാവീക്ഷണൈര്മാം പ്രസീദ, പ്രസീദ പ്രപന്നാര്തിഹാരായ സംസിദ്ധ, മാം പാഹി വല്ലീശ, ശ്രീദേവസേനേശ, തുഭ്യം നമോ ദേവ, ദേവേശ, സർവേശ, സർവാത്മകം, സർവരൂപം, പരം ത്വാം ഭജേഽഹം ഭജേഽഹം ഭജേഽഹമ് । ഇതി ശ്രീ ഷണ്മുഖ ദംഡകമ് ॥