ശ്രീ രാമചന്ദ്രാഷ്ടകം

സുഗ്രീവമിത്രം പരമം പവിത്രം

സീതാകലത്രം നവമേഘഗാത്രം ।

കാരുണ്യപാത്രം ശതപത്രനേത്രം

ശ്രീരാമചന്ദ്രം സതതം നമാമി ॥ 1 ॥

സംസാരസാരം നിഗമപ്രചാരം

ധർമാവതാരം ഹൃതഭൂമിഭാരം ।

സദാഽവികാരം സുഖസിന്ധുസാരം

ശ്രീരാമചന്ദ്രം സതതം നമാമി ॥ 2 ॥

ലക്ഷ്മീവിലാസം ജഗതാം നിവാസം

ലങ്കാവിനാശം ഭുവനപ്രകാശം ।

ഭൂദേവവാസം ശരദിന്ദുഹാസം

ശ്രീരാമചന്ദ്രം സതതം നമാമി ॥ 3 ॥

മന്ദാരമാലം വചനേ രസാലം

ഗുണൈർവിശാലം ഹതസപ്തതാലം ।

ക്രവ്യാദകാലം സുരലോകപാലം

ശ്രീരാമചന്ദ്രം സതതം നമാമി ॥ 4 ॥

വേദാന്തഗാനം സകലൈസ്സമാനം

ഹൃതാരിമാനം ത്രിദശപ്രധാനം ।

ഗജേന്ദ്രയാനം വിഗതാവസാനം

ശ്രീരാമചന്ദ്രം സതതം നമാമി ॥ 5 ॥

ശ്യാമാഭിരാമം നയനാഭിരാമം

ഗുണാഭിരാമം വചനാഭിരാമം ।

വിശ്വപ്രണാമം കൃതഭക്തകാമം

ശ്രീരാമചന്ദ്രം സതതം നമാമി ॥ 6 ॥

ലീലാശരീരം രണരംഗധീരം

വിശ്വൈകസാരം രഘുവംശഹാരം ।

ഗംഭീരവാദം ജിതസർവവാദം

ശ്രീരാമചന്ദ്രം സതതം നമാമി ॥ 7 ॥

ഖലേ കൃതാന്തം സ്വജനേ വിനീതം

സാമോപഗീതം മനസാ പ്രതീതം ।

രാഗേണ ഗീതം വചനാദതീതം

ശ്രീരാമചന്ദ്രം സതതം നമാമി ॥ 8 ॥

ശ്രീരാമചന്ദ്രസ്യ വരാഷ്ടകം ത്വാം

മയേരിതം ദേവി മനോഹരം യേ ।

പഠന്തി ശൃണ്വന്തി ഗൃണന്തി ഭക്ത്യാ

തേ സ്വീയകാമാൻ പ്രലഭന്തി നിത്യം ॥ 9 ॥

ഇതി ശ്രീരാമചന്ദ്രാഷ്ടകം ।

Recite with devotion and pure heart

Regular practice brings spiritual benefits