हैंహైHaindavamஹிહિં
📍
Font Size:
ശ്രീ രാമ സ്തവരാജ സ്തോത്രം
അസ്യ ശ്രീരാമചന്ദ്ര സ്തവരാജസ്തോത്രമന്ത്രസ്യ സനത്കുമാരഋഷിഃ । ശ്രീരാമോ ദേവതാ । അനുഷ്ടുപ് ഛന്ദഃ । സീതാ ബീജം । ഹനുമാൻ ശക്തിഃ । ശ്രീരാമപ്രീത്യർഥേ ജപേ വിനിയോഗഃ ॥
സൂത ഉവാച ।
സർവശാസ്ത്രാർഥതത്ത്വജ്ഞം വ്യാസം സത്യവതീസുതം ।
ധർമപുത്രഃ പ്രഹൃഷ്ടാത്മാ പ്രത്യുവാച മുനീശ്വരം ॥ 1 ॥
യുധിഷ്ഠിര ഉവാച ।
ഭഗവന്യോഗിനാം ശ്രേഷ്ഠ സർവശാസ്ത്രവിശാരദ ।
കിം തത്ത്വം കിം പരം ജാപ്യം കിം ധ്യാനം മുക്തിസാധനം ॥ 2 ॥
ശ്രോതുമിച്ഛാമി തത്സർവം ബ്രൂഹി മേ മുനിസത്തമ ॥ 3 ॥
വേദവ്യാസ ഉവാച ।
ധർമരാജ മഹാഭാഗ ശൃണു വക്ഷ്യാമി തത്ത്വതഃ ॥ 4 ॥
യത്പരം യദ്ഗുണാതീതം യജ്ജ്യോതിരമലം ശിവം ।
തദേവ പരമം തത്ത്വം കൈവല്യപദകാരണം ॥ 5 ॥
ശ്രീരാമേതി പരം ജാപ്യം താരകം ബ്രഹ്മസഞ്ജ്ഞകം ।
ബ്രഹ്മഹത്യാദിപാപഘ്നമിതി വേദവിദോ വിദുഃ ॥ 6 ॥
ശ്രീരാമ രാമേതി ജനാ യേ ജപന്തി ച സർവദാ ।
തേഷാം ഭുക്തിശ്ച മുക്തിശ്ച ഭവിഷ്യതി ന സംശയഃ ॥ 7 ॥
സ്തവരാജം പുരാ പ്രോക്തം നാരദേന ച ധീമതാ ।
തത്സർവം സമ്പ്രവക്ഷ്യാമി ഹരിധ്യാനപുരഃസരം ॥ 8 ॥
താപത്രയാഗ്നിശമനം സർവാഘൗഘനികൃന്തനം ।
ദാരിദ്ര്യദുഃഖശമനം സർവസമ്പത്കരം ശിവം ॥ 9 ॥
വിജ്ഞാനഫലദം ദിവ്യം മോക്ഷൈകഫലസാധനം ।
നമസ്കൃത്യ പ്രവക്ഷ്യാമി രാമം കൃഷ്ണം ജഗന്മയം ॥ 10 ॥
അയോധ്യാനഗരേ രമ്യേ രത്നമണ്ഡപമധ്യഗേ ।
സ്മരേത്കല്പതരോർമൂലേ രത്നസിംഹാസനം ശുഭം ॥ 11 ॥
തന്മധ്യേഽഷ്ടദലം പദ്മം നാനാരത്നൈശ്ച വേഷ്ടിതം ।
സ്മരേന്മധ്യേ ദാശരഥിം സഹസ്രാദിത്യതേജസം ॥ 12 ॥
പിതുരങ്കഗതം രാമമിന്ദ്രനീലമണിപ്രഭം ।
കോമലാംഗം വിശാലാക്ഷം വിദ്യുദ്വർണാംബരാവൃതം ॥ 13 ॥
ഭാനുകോടിപ്രതീകാശ കിരീടേന വിരാജിതം ।
രത്നഗ്രൈവേയകേയൂരരത്നകുണ്ഡലമണ്ഡിതം ॥ 14 ॥
രത്നകങ്കണമഞ്ജീരകടിസൂത്രൈരലങ്കൃതം ।
ശ്രീവത്സകൗസ്തുഭോരസ്കം മുക്താഹാരോപശോഭിതം ॥ 15 ॥
ദിവ്യരത്നസമായുക്തമുദ്രികാഭിരലങ്കൃതം ।
രാഘവം ദ്വിഭുജം ബാലം രാമമീഷത്സ്മിതാനനം ॥ 16 ॥
തുലസീകുന്ദമന്ദാരപുഷ്പമാല്യൈരലങ്കൃതം ।
കർപൂരാഗുരുകസ്തൂരീദിവ്യഗന്ധാനുലേപനം ॥ 17 ॥
യോഗശാസ്ത്രേഷ്വഭിരതം യോഗേശം യോഗദായകം ।
സദാ ഭരതസൗമിത്രിശത്രുഘ്നൈരുപശോഭിതം ॥ 18 ॥
വിദ്യാധരസുരാധീശസിദ്ധഗന്ധർവകിന്നരൈഃ ।
യോഗീന്ദ്രൈർനാരദാദ്യൈശ്ച സ്തൂയമാനമഹർനിശം ॥ 19 ॥
വിശ്വാമിത്രവസിഷ്ഠാദിമുനിഭിഃ പരിസേവിതം ।
സനകാദിമുനിശ്രേഷ്ഠൈര്യോഗിവൃന്ദൈശ്ച സേവിതം ॥ 20 ॥
രാമം രഘുവരം വീരം ധനുർവേദവിശാരദം ।
മംഗലായതനം ദേവം രാമം രാജീവലോചനം ॥ 21 ॥
സർവശാസ്ത്രാർഥതത്ത്വജ്ഞമാനന്ദകരസുന്ദരം ।
കൗസല്യാനന്ദനം രാമം ധനുർബാണധരം ഹരിം ॥ 22 ॥
ഏവം സഞ്ചിന്തയന്വിഷ്ണും യജ്ജ്യോതിരമലം വിഭും ।
പ്രഹൃഷ്ടമാനസോ ഭൂത്വാ മുനിവര്യഃ സ നാരദഃ ॥ 23 ॥
സർവലോകഹിതാർഥായ തുഷ്ടാവ രഘുനന്ദനം ।
കൃതാഞ്ജലിപുടോ ഭൂത്വാ ചിന്തയന്നദ്ഭുതം ഹരിം ॥ 24 ॥
യദേകം യത്പരം നിത്യം യദനന്തം ചിദാത്മകം ।
യദേകം വ്യാപകം ലോകേ തദ്രൂപം ചിന്തയാമ്യഹം ॥ 25 ॥
വിജ്ഞാനഹേതും വിമലായതാക്ഷം
പ്രജ്ഞാനരൂപം സ്വസുഖൈകഹേതും ।
ശ്രീരാമചന്ദ്രം ഹരിമാദിദേവം
പരാത്പരം രാമമഹം ഭജാമി ॥ 26 ॥
കവിം പുരാണം പുരുഷം പുരസ്താ-
-ത്സനാതനം യോഗിനമീശിതാരം ।
അണോരണീയാംസമനന്തവീര്യം
പ്രാണേശ്വരം രാമമസൗ ദദർശ ॥ 27 ॥
നാരദ ഉവാച ।
നാരായണം ജഗന്നാഥമഭിരാമം ജഗത്പതിം ।
കവിം പുരാണം വാഗീശം രാമം ദശരഥാത്മജം ॥ 28 ॥
രാജരാജം രഘുവരം കൗസല്യാനന്ദവർധനം ।
ഭർഗം വരേണ്യം വിശ്വേശം രഘുനാഥം ജഗദ്ഗുരും ॥ 29 ॥
സത്യം സത്യപ്രിയം ശ്രേഷ്ഠം ജാനകീവല്ലഭം വിഭും ।
സൗമിത്രിപൂർവജം ശാന്തം കാമദം കമലേക്ഷണം ॥ 30 ॥
ആദിത്യം രവിമീശാനം ഘൃണിം സൂര്യമനാമയം ।
ആനന്ദരൂപിണം സൗമ്യം രാഘവം കരുണാമയം ॥ 31 ॥
ജാമദഗ്നിം തപോമൂർതിം രാമം പരശുധാരിണം ।
വാക്പതിം വരദം വാച്യം ശ്രീപതിം പക്ഷിവാഹനം ॥ 32 ॥
ശ്രീശാർങ്ഗധാരിണം രാമം ചിന്മയാനന്ദവിഗ്രഹം ।
ഹലധൃഗ്വിഷ്ണുമീശാനം ബലരാമം കൃപാനിധിം ॥ 33 ॥
ശ്രീവല്ലഭം കൃപാനാഥം ജഗന്മോഹനമച്യുതം ।
മത്സ്യകൂർമവരാഹാദിരൂപധാരിണമവ്യയം ॥ 34 ॥
വാസുദേവം ജഗദ്യോനിമനാദിനിധനം ഹരിം ।
ഗോവിന്ദം ഗോപതിം വിഷ്ണും ഗോപീജനമനോഹരം ॥ 35 ॥
ഗോഗോപാലപരീവാരം ഗോപകന്യാസമാവൃതം ।
വിദ്യുത്പുഞ്ജപ്രതീകാശം രാമം കൃഷ്ണം ജഗന്മയം ॥ 36 ॥
ഗോഗോപികാസമാകീർണം വേണുവാദനതത്പരം ।
കാമരൂപം കലാവന്തം കാമിനീകാമദം വിഭും ॥ 37 ॥
മന്മഥം മഥുരാനാഥം മാധവം മകരധ്വജം ।
ശ്രീധരം ശ്രീകരം ശ്രീശം ശ്രീനിവാസം പരാത്പരം ॥ 38 ॥
ഭൂതേശം ഭൂപതിം ഭദ്രം വിഭൂതിം ഭൂമിഭൂഷണം ।
സർവദുഃഖഹരം വീരം ദുഷ്ടദാനവവൈരിണം ॥ 39 ॥
ശ്രീനൃസിംഹം മഹാബാഹും മഹാന്തം ദീപ്തതേജസം ।
ചിദാനന്ദമയം നിത്യം പ്രണവം ജ്യോതിരൂപിണം ॥ 40 ॥
ആദിത്യമണ്ഡലഗതം നിശ്ചിതാർഥസ്വരൂപിണം ।
ഭക്തിപ്രിയം പദ്മനേത്രം ഭക്താനാമീപ്സിതപ്രദം ॥ 41 ॥
കൗസല്യേയം കലാമൂർതിം കാകുത്സ്ഥം കമലാപ്രിയം ।
സിംഹാസനേ സമാസീനം നിത്യവ്രതമകല്മഷം ॥ 42 ॥
വിശ്വാമിത്രപ്രിയം ദാന്തം സ്വദാരനിയതവ്രതം ।
യജ്ഞേശം യജ്ഞപുരുഷം യജ്ഞപാലനതത്പരം ॥ 43 ॥
സത്യസന്ധം ജിതക്രോധം ശരണാഗതവത്സലം ।
സർവക്ലേശാപഹരണം വിഭീഷണവരപ്രദം ॥ 44 ॥
ദശഗ്രീവഹരം രൗദ്രം കേശവം കേശിമർദനം ।
വാലിപ്രമഥനം വീരം സുഗ്രീവേപ്സിതരാജ്യദം ॥ 45 ॥
നരവാനരദേവൈശ്ചസേവിതം ഹനുമത്പ്രിയം ।
ശുദ്ധം സൂക്ഷ്മം പരം ശാന്തം താരകം ബ്രഹ്മരൂപിണം ॥ 46 ॥
സർവഭൂതാത്മഭൂതസ്ഥം സർവാധാരം സനാതനം ।
സർവകാരണകർതാരം നിദാനം പ്രകൃതേഃ പരം ॥ 47 ॥
നിരാമയം നിരാഭാസം നിരവദ്യം നിരഞ്ജനം ।
നിത്യാനന്ദം നിരാകാരമദ്വൈതം തമസഃ പരം ॥ 48 ॥
പരാത്പരതരം തത്ത്വം സത്യാനന്ദം ചിദാത്മകം ।
മനസാ ശിരസാ നിത്യം പ്രണമാമി രഘൂത്തമം ॥ 49 ॥
സൂര്യമണ്ഡലമധ്യസ്ഥം രാമം സീതാസമന്വിതം ।
നമാമി പുണ്ഡരീകാക്ഷമമേയം ഗുരുതത്പരം ॥ 50 ॥
നമോഽസ്തു വാസുദേവായ ജ്യോതിഷാം പതയേ നമഃ ।
നമോഽസ്തു രാമദേവായ ജഗദാനന്ദരൂപിണേ ॥ 51 ॥
നമോ വേദാന്തനിഷ്ഠായ യോഗിനേ ബ്രഹ്മവാദിനേ ।
മായാമയനിരാസായ പ്രപന്നജനസേവിനേ ॥ 52 ॥
വന്ദാമഹേ മഹേശാനചണ്ഡകോദണ്ഡഖണ്ഡനം ।
ജാനകീഹൃദയാനന്ദവർധനം രഘുനന്ദനം ॥ 53 ॥
ഉത്ഫുല്ലാമലകോമലോത്പലദലശ്യാമായ രാമായ തേ-
-ഽകാമായ പ്രമദാമനോഹരഗുണഗ്രാമായ രാമാത്മനേ ।
യോഗാരൂഢമുനീന്ദ്രമാനസസരോഹംസായ സംസാരവി-
-ധ്വംസായ സ്ഫുരദോജസേ രഘുകുലോത്തംസായ പുംസേ നമഃ ॥ 54 ॥
ഭവോദ്ഭവം വേദവിദാം വരിഷ്ഠ-
-മാദിത്യചന്ദ്രാനലസുപ്രഭാവം ।
സർവാത്മകം സർവഗതസ്വരൂപം
നമാമി രാമം തമസഃ പരസ്താത് ॥ 55 ॥
നിരഞ്ജനം നിഷ്പ്രതിമം നിരീഹം
നിരാശ്രയം നിഷ്കലമപ്രപഞ്ചം ।
നിത്യം ധ്രുവം നിർവിഷയസ്വരൂപം
നിരന്തരം രാമമഹം ഭജാമി ॥ 56 ॥
ഭവാബ്ധിപോതം ഭരതാഗ്രജം തം
ഭക്തിപ്രിയം ഭാനുകുലപ്രദീപം ।
ഭൂതത്രിനാഥം ഭുവനാധിപം തം
ഭജാമി രാമം ഭവരോഗവൈദ്യം ॥ 57 ॥
സർവാധിപത്യം സമരാംഗധീരം
സത്യം ചിദാനന്ദമയസ്വരൂപം ।
സത്യം ശിവം ശാന്തിമയം ശരണ്യം
സനാതനം രാമമഹം ഭജാമി ॥ 58 ॥
കാര്യക്രിയാകാരണമപ്രമേയം
കവിം പുരാണം കമലായതാക്ഷം ।
കുമാരവേദ്യം കരുണാമയം തം
കല്പദ്രുമം രാമമഹം ഭജാമി ॥ 59 ॥
ത്രൈലോക്യനാഥം സരസീരുഹാക്ഷം
ദയാനിധിം ദ്വന്ദ്വവിനാശഹേതും ।
മഹാബലം വേദനിധിം സുരേശം
സനാതനം രാമമഹം ഭജാമി ॥ 60 ॥
വേദാന്തവേദ്യം കവിമീശിതാര-
-മനാദിമധ്യാന്തമചിന്ത്യമാദ്യം ।
അഗോചരം നിർമലമേകരൂപം
നമാമി രാമം തമസഃ പരസ്താത് ॥ 61 ॥
അശേഷവേദാത്മകമാദിസഞ്ജ്ഞ-
-മജം ഹരിം വിഷ്ണുമനന്തമാദ്യം ।
അപാരസംവിത്സുഖമേകരൂപം
പരാത്പരം രാമമഹം ഭജാമി ॥ 62 ॥
തത്ത്വസ്വരൂപം പുരുഷം പുരാണം
സ്വതേജസാ പൂരിതവിശ്വമേകം ।
രാജാധിരാജം രവിമണ്ഡലസ്ഥം
വിശ്വേശ്വരം രാമമഹം ഭജാമി ॥ 63 ॥
ലോകാഭിരാമം രഘുവംശനാഥം
ഹരിം ചിദാനന്ദമയം മുകുന്ദം ।
അശേഷവിദ്യാധിപതിം കവീന്ദ്രം
നമാമി രാമം തമസഃ പരസ്താത് ॥ 64 ॥
യോഗീന്ദ്രസംഘൈശ്ച സുസേവ്യമാനം
നാരായണം നിർമലമാദിദേവം ।
നതോഽസ്മി നിത്യം ജഗദേകനാഥ-
-മാദിത്യവർണം തമസഃ പരസ്താത് ॥ 65 ॥
വിഭൂതിദം വിശ്വസൃജം വിരാമം
രാജേന്ദ്രമീശം രഘുവംശനാഥം ।
അചിന്ത്യമവ്യക്തമനന്തമൂർതിം
ജ്യോതിർമയം രാമമഹം ഭജാമി ॥ 66 ॥
അശേഷസംസാരവിഹാരഹീന-
-മാദിത്യഗം പൂർണസുഖാഭിരാമം ।
സമസ്തസാക്ഷിം തമസഃ പരസ്താ-
-ന്നാരായണം വിഷ്ണുമഹം ഭജാമി ॥ 67 ॥
മുനീന്ദ്രഗുഹ്യം പരിപൂർണകാമം
കലാനിധിം കല്മഷനാശഹേതും ।
പരാത്പരം യത്പരമം പവിത്രം
നമാമി രാമം മഹതോ മഹാന്തം ॥ 68 ॥
ബ്രഹ്മാ വിഷ്ണുശ്ച രുദ്രശ്ച ദേവേന്ദ്രോ ദേവതാസ്തഥാ ।
ആദിത്യാദിഗ്രഹാശ്ചൈവ ത്വമേവ രഘുനന്ദന ॥ 69 ॥
താപസാ ഋഷയഃ സിദ്ധാഃ സാധ്യാശ്ച മരുതസ്തഥാ ।
വിപ്രാ വേദാസ്തഥാ യജ്ഞാഃ പുരാണം ധർമസംഹിതാഃ ॥ 70 ॥
വർണാശ്രമാസ്തഥാ ധർമാ വർണധർമാസ്തഥൈവ ച ।
യക്ഷരാക്ഷസഗന്ധർവാദിക്പാലാ ദിഗ്ഗജാദയഃ ॥ 71 ॥
സനകാദിമുനിശ്രേഷ്ഠാസ്ത്വമേവ രഘുപുംഗവ ।
വസവോഽഷ്ടൗ ത്രയഃ കാലാ രുദ്രാ ഏകാദശ സ്മൃതാഃ ॥ 72 ॥
താരകാഃ ദശ ദിക് ചൈവ ത്വമേവ രഘുനന്ദന ।
സപ്തദ്വീപാഃ സമുദ്രാശ്ച നഗാഃ നദ്യസ്തഥാ ദ്രുമാഃ ॥ 73 ॥
സ്ഥാവരാഃ ജംഗമാശ്ചൈവ ത്വമേവ രഘുനായക ।
ദേവതിര്യങ്മനുഷ്യാണാം ദാനവാനാം തഥൈവ ച ॥ 74 ॥
മാതാ പിതാ തഥാ ഭ്രാതാ ത്വമേവ രഘുവല്ലഭ ।
സർവേഷാം ത്വം പരം ബ്രഹ്മ ത്വന്മയം സർവമേവ ഹി ॥ 75 ॥
ത്വമക്ഷരം പരം ജ്യോതിസ്ത്വമേവ പുരുഷോത്തമ ।
ത്വമേവ താരകം ബ്രഹ്മ ത്വത്തോഽന്യന്നൈവ കിഞ്ചന ॥ 76 ॥
ശാന്തം സർവഗതം സൂക്ഷ്മം പരം ബ്രഹ്മ സനാതനം ।
രാജീവലോചനം രാമം പ്രണമാമി ജഗത്പതിം ॥ 77 ॥
വ്യാസ ഉവാച ।
തതഃ പ്രസന്നഃ ശ്രീരാമഃ പ്രോവാച മുനിപുംഗവം ।
തുഷ്ടോഽസ്മി മുനിശാർദൂല വൃണീഷ്വ വരമുത്തമം ॥ 78 ॥
നാരദ ഉവാച ।
യദി തുഷ്ടോഽസി സർവജ്ഞ ശ്രീരാമ കരുണാനിധേ ।
ത്വന്മൂർതിദർശനേനൈവ കൃതാർഥോഽഹം ച സർവദാ ॥ 79 ॥
ധന്യോഽഹം കൃതകൃത്യോഽഹം പുണ്യോഽഹം പുരുഷോത്തമ ।
അദ്യ മേ സഫലം ജന്മ ജീവിതം സഫലം ച മേ ॥ 80 ॥
അദ്യ മേ സഫലം ജ്ഞാനമദ്യ മേ സഫലം തപഃ ।
അദ്യ മേ സഫലം കർമ ത്വത്പാദാംഭോജദർശനാത് ॥ 81 ॥
അദ്യ മേ സഫലം സർവം ത്വന്നാമസ്മരണം തഥാ ।
ത്വത്പാദാംഭോരുഹദ്വന്ദ്വസദ്ഭക്തിം ദേഹി രാഘവ ॥ 82
തതഃ പരമസമ്പ്രീതഃ സ രാമഃ പ്രാഹ നാരദം ।
മേഘഗംഭീരയാ വാചാ ധന്വീ വീജിതമന്മഥഃ ॥ 83 ॥
ശ്രീരാമ ഉവാച ।
മുനിവര്യ മഹാഭാഗ മുനേ ത്വിഷ്ടം ദദാമി തേ ।
യത്ത്വയാ ചേപ്സിതം സർവം മനസാ തദ്ഭവിഷ്യതി ॥ 84 ॥
നാരദ ഉവാച ।
വരം ന യാചേ രഘുനാഥ യുഷ്മ-
-ത്പദാബ്ജഭക്തിഃ സതതം മമാസ്തു ।
ഇദം പ്രിയം നാഥ വരം പ്രയാച്ഛ
പുനഃ പുനസ്ത്വാമിദമേവ യാചേ ॥ 85 ॥
വ്യാസ ഉവാച ।
ഇത്യേവമീഡിതോ രാമഃ പ്രാദാത്തസ്മൈ വരാന്തരം ।
വീരോ രാമോ മഹാതേജാഃ സച്ചിദാനന്ദവിഗ്രഹഃ ॥ 86 ॥
അദ്വൈതമമലം ജ്ഞാനം സ്വനാമസ്മരണം തഥാ ।
അന്തർദധൗ ജഗന്നാഥഃ പുരതസ്തസ്യ രാഘവഃ ॥ 87 ॥
ഇതി ശ്രീരഘുനാഥസ്യ സ്തവരാജമനുത്തമം ।
സർവസൗഭാഗ്യസമ്പത്തിദായകം മുക്തിദം ശുഭം ॥ 88 ॥
കഥിതം ബ്രഹ്മപുത്രേണ വേദാനാം സാരമുത്തമം ।
ഗുഹ്യാദ്ഗുഹ്യതമം ദിവ്യം തവ സ്നേഹാത്പ്രകീർതിതം ॥ 89 ॥
യഃ പഠേച്ഛൃണുയാദ്വാപി ത്രിസന്ധ്യം ശ്രദ്ധയാന്വിതഃ ।
ബ്രഹ്മഹത്യാദിപാപാനി തത്സമാനി ബഹൂനി ച ॥ 90 ॥
സ്വർണസ്തേയം സുരാപാനം ഗുരുതല്പഗതിസ്തഥാ ।
ഗോവധാദ്യുപപാപാനി അനൃതാത്സംഭവാനി ച ॥ 91 ॥
സർവൈഃ പ്രമുച്യതേ പാപൈഃ കല്പായുതശതോദ്ഭവൈഃ ।
മാനസം വാചികം പാപം കർമണാ സമുപാർജിതം ॥ 92 ॥
ശ്രീരാമസ്മരണേനൈവ തത്ക്ഷണാന്നശ്യതി ധ്രുവം ।
ഇദം സത്യമിദം സത്യം സത്യമേതദിഹോച്യതേ ॥ 93 ॥
രാമം സത്യം പരം ബ്രഹ്മ രാമാത്കിഞ്ചിന്ന വിദ്യതേ ।
തസ്മാദ്രാമസ്വരൂപം ഹി സത്യം സത്യമിദം ജഗത് ॥ 94 ॥
ശ്രീരാമചന്ദ്ര രഘുപുംഗവ രാജവര്യ
രജേന്ദ്ര രാമ രഘുനായക രാഘവേശ ।
രാജാധിരാജ രഘുനന്ദന രാമചന്ദ്ര
ദാസോഽഹമദ്യ ഭവതഃ ശരണാഗതോഽസ്മി ॥ 95 ॥
വൈദേഹീസഹിതം സുരദ്രുമതലേ ഹൈമേ മഹാമണ്ഡപേ
മധ്യേ പുഷ്പകമാസനേ മണിമയേ വീരാസനേ സംസ്ഥിതം ।
അഗ്രേ വാചയതി പ്രഭഞ്ജനസുതേ തത്ത്വം മുനിഭ്യഃ പരം
വ്യാഖ്യാതം ഭരതാദിഭിഃ പരിവൃതം രാമം ഭജേ ശ്യാമലം ॥ 96 ॥
രാമം രത്നകിരീടകുണ്ഡലയുതം കേയൂരഹാരാന്വിതം
സീതാലങ്കൃതവാമഭാഗമമലം സിംഹാസനസ്ഥം വിഭും ।
സുഗ്രീവാദിഹരീശ്വരൈഃ സുരഗണൈഃ സംസേവ്യമാനം സദാ
വിശ്വാമിത്രപരാശരാദിമുനിഭിഃ സംസ്തൂയമാനം പ്രഭും ॥ 97 ॥
സകലഗുണനിധാനം യോഗിഭിഃ സ്തൂയമാനം
ഭുജവിജിതസമാനം രാക്ഷസേന്ദ്രാദിമാനം ।
മഹിതനൃപഭയാനം സീതയാ ശോഭമാനം
സ്മര ഹൃദയ വിമാനം ബ്രഹ്മ രാമാഭിധാനം ॥ 98 ॥
രഘുവര തവ മൂർതിർമാമകേ മാനസാബ്ജേ
നരകഗതിഹരം തേ നാമധേയം മുഖേ മേ ।
അനിശമതുലഭക്ത്യാ മസ്തകം ത്വത്പദാബ്ജേ
ഭവജലനിധിമഗ്നം രക്ഷ മാമാർതബന്ധോ ॥ 99 ॥
രാമരത്നമഹം വന്ദേ ചിത്രകൂടപതിം ഹരിം ।
കൗസല്യാഭക്തിസംഭൂതം ജാനകീകണ്ഠഭൂഷണം ॥ 100 ॥
ഇതി ശ്രീസനത്കുമാരസംഹിതായാം നാരദോക്തം ശ്രീരാമസ്തവരാജസ്തോത്രം സമ്പൂർണം ।
Recite with devotion and pure heart
Regular practice brings spiritual benefits