അഗസ്ത്യ ഉവാച । അശ്വാനന മഹാബുദ്ധേ സർവശാസ്ത്രവിശാരദ । കഥിതം ലലിതാദേവ്യാശ്ചരിതം പരമാദ്ഭുതം ॥ 1 ॥ പൂർവം പ്രാദുർഭവോ മാതുസ്തതഃ പട്ടാഭിഷേചനം । ഭണ്ഡാസുരവധശ്ചൈവ വിസ്തരേണ ത്വയോദിതഃ ॥ 2 ॥ വർണിതം ശ്രീപുരം ചാപി മഹാവിഭവവിസ്തരം । ശ്രീമത്പഞ്ചദശാക്ഷര്യാഃ മഹിമാ വർണിതസ്തഥാ ॥ 3 ॥ ഷോഢാന്യാസാദയോ ന്യാസാഃ ന്യാസഖണ്ഡേ സമീരിതാഃ । അന്തര്യാഗക്രമശ്ചൈവ ബഹിര്യാഗക്രമസ്തഥാ ॥ 4 ॥ മഹായാഗക്രമശ്ചൈവ പൂജാഖണ്ഡേ പ്രകീർത്തിതാഃ । [സമീരിതഃ] പുരശ്ചരണഖണ്ഡേ തു ജപലക്ഷണമീരിതം ॥ 5 ॥ ഹോമഖണ്ഡേ ത്വയാ പ്രോക്തോ ഹോമദ്രവ്യവിധിക്രമഃ । ചക്രരാജസ്യ വിദ്യായാഃ ശ്രീദേവ്യാ ദേശികാത്മനോഃ ॥ 6 ॥ രഹസ്യഖണ്ഡേ താദാത്മ്യം പരസ്പരമുദീരിതം । സ്തോത്രഖണ്ഡേ ബഹുവിധാഃ സ്തുതയഃ പരികീർത്തിതാഃ ॥ 7 ॥ മന്ത്രിണീദണ്ഡിനീദേവ്യോഃ പ്രോക്തേ നാമസഹസ്രകേ । ന തു ശ്രീലലിതാദേവ്യാഃ പ്രോക്തം നാമസഹസ്രകം ॥ 8 ॥ തത്ര മേ സംശയോ ജാതോ ഹയഗ്രീവ ദയാനിധേ । കിം വാ ത്വയാ വിസ്മൃതം തജ്ജ്ഞാത്വാ വാ സമുപേക്ഷിതം ॥ 9 ॥ മമ വാ യോഗ്യതാ നാസ്തി ശ്രോതും നാമസഹസ്രകം । കിമർഥം ഭവതാ നോക്തം തത്ര മേ കാരണം വദ ॥ 10 ॥ സൂത ഉവാച । ഇതി പൃഷ്ടോ ഹയഗ്രീവോ മുനിനാ കുംഭജന്മനാ । പ്രഹൃഷ്ടോ വചനം പ്രാഹ താപസം കുംഭസംഭവം ॥ 11 ॥ ശ്രീഹയഗ്രീവ ഉവാച । ലോപാമുദ്രാപതേഽഗസ്ത്യ സാവധാനമനാഃ ശൃണു । നാമ്നാം സഹസ്രം യന്നോക്തം കാരണം തദ്വദാമി തേ ॥ 12 ॥ രഹസ്യമിതി മത്വാഹം നോക്തവാംസ്തേ ന ചാന്യഥാ । പുനശ്ച പൃച്ഛതേ ഭക്ത്യാ തസ്മാത്തത്തേ വദാമ്യഹം ॥ 13 ॥ ബ്രൂയാച്ഛിഷ്യായ ഭക്തായ രഹസ്യമപി ദേശികഃ । ഭവതാ ന പ്രദേയം സ്യാദഭക്തായ കദാചന ॥ 14 ॥ ന ശഠായ ന ദുഷ്ടായ നാവിശ്വാസായ കർഹിചിത് । ശ്രീമാതൃഭക്തിയുക്തായ ശ്രീവിദ്യാരാജവേദിനേ ॥ 15 ॥ ഉപാസകായ ശുദ്ധായ ദേയം നാമസഹസ്രകം । യാനി നാമസഹസ്രാണി സദ്യഃ സിദ്ധിപ്രദാനി വൈ ॥ 16 ॥ തന്ത്രേഷു ലലിതാദേവ്യാസ്തേഷു മുഖ്യമിദം മുനേ । ശ്രീവിദ്യൈവ തു മന്ത്രാണാം തത്ര കാദിര്യഥാ പരാ ॥ 17 ॥ പുരാണാം ശ്രീപുരമിവ ശക്തീനാം ലലിതാ തഥാ । ശ്രീവിദ്യോപാസകാനാം ച യഥാ ദേവോ പരഃ ശിവഃ ॥ 18 ॥ തഥാ നാമസഹസ്രേഷു പരമേതത്പ്രകീർത്തിതം । യഥാസ്യ പഠനാദ്ദേവീ പ്രീയതേ ലലിതാംബികാ ॥ 19 ॥ അന്യനാമസഹസ്രസ്യ പാഠാന ന പ്രീയതേ തഥാ । ശ്രീമാതുഃ പ്രീതയേ തസ്മാദനിശം കീർതയേദിദം ॥ 20 ॥ ബില്വപത്രൈശ്ചക്രരാജേ യോഽർചയേല്ലലിതാംബികാം । പദ്മൈർവാ തുലസീപുഷ്പൈരേഭിർനാമസഹസ്രകൈഃ ॥ 21 ॥ [പത്രൈഃ] സദ്യഃ പ്രസാദം കുരുതേ തസ്യ സിംഹാസനേശ്വരീ । ചക്രാധിരാജമഭ്യർച്യ ജപ്ത്വാ പഞ്ചദശാക്ഷരീം ॥ 22 ॥ ജപാന്തേ കീർതയേന്നിത്യമിദം നാമസഹസ്രകം । ജപപൂജാദ്യശക്തശ്ചേത്പഠേന്നാമസഹസ്രകം ॥ 23 ॥ സാങ്ഗാർചനേ സാങ്ഗജപേ യത്ഫലം തദവാപ്നുയാത് । ഉപാസനേ സ്തുതീരന്യാഃ പഠേദഭ്യുദയോ ഹി സഃ ॥ 24 ॥ ഇദം നാമസഹസ്രം തു കീർതയേന്നിത്യകർമവത് । ചക്രരാജാർചനം ദേവ്യാ ജപോ നാമ്നാം ച കീർതനം ॥ 25 ॥ ഭക്തസ്യ കൃത്യമേതാവദന്യദഭ്യുദയം വിദുഃ । ഭക്തസ്യാവശ്യകമിദം നാമസാഹസ്രകീർതനം ॥ 26 ॥ തത്ര ഹേതും പ്രവക്ഷ്യാമി ശൃണു ത്വം കുംഭസംഭവ । പുരാ ശ്രീലലിതാദേവീ ഭക്താനാം ഹിതകാമ്യയാ ॥ 27 ॥ വാഗ്ദേവീർവശിനീമുഖ്യാഃ സമാഹൂയേദമബ്രവീത് । വാഗ്ദേവതാ വശിന്യാദ്യാഃ ശൃണുധ്വം വചനം മമ ॥ 28 ॥ ഭവത്യോ മത്പ്രസാദേന പ്രോല്ലസദ്വാഗ്വിഭൂതയഃ । മദ്ഭക്താനാം വാഗ്വിഭൂതിപ്രദാനേ വിനിയോജിതാഃ ॥ 29 ॥ മച്ചക്രസ്യ രഹസ്യജ്ഞാ മമ നാമപരായണാഃ । മമ സ്തോത്രവിധാനായ തസ്മാദാജ്ഞാപയാമി വഃ ॥ 30 ॥ കുരുധ്വമങ്കിതം സ്തോത്രം മമ നാമസഹസ്രകൈഃ । യേന ഭക്തൈഃ സ്തുതായാ മേ സദ്യഃ പ്രീതിഃ പരാ ഭവേത് ॥ 31 ॥ ഇത്യാജ്ഞപ്താസ്തതോ ദേവ്യഃ ശ്രീദേവ്യാ ലലിതാംബയാ । രഹസ്യൈർനാമഭിർദിവ്യൈശ്ചക്രുഃ സ്തോത്രമനുത്തമം ॥ 32 ॥ രഹസ്യനാമസാഹസ്രമിതി തദ്വിശ്രുതം പരം । തതഃ കദാചിത്സദസി സ്ഥിത്വാ സിംഹാസനേഽംബികാ ॥ 33 ॥ സ്വസേവാവസരം പ്രാദാത്സർവേഷാം കുംഭസംഭവ । സേവാർഥമാഗതാസ്തത്ര ബ്രഹ്മാണീബ്രഹ്മകോടയഃ ॥ 34 ॥ ലക്ഷ്മീനാരായണാനാം ച കോടയഃ സമുപാഗതാഃ । ഗൗരീകോടിസമേതാനാം രുദ്രാണാമപി കോടയഃ ॥ 35 ॥ മന്ത്രിണീദണ്ഡിനീമുഖ്യാഃ സേവാർഥം യഃ സമാഗതാഃ । ശക്തയോ വിവിധാകാരാസ്താസാം സങ്ഖ്യാ ന വിദ്യതേ ॥ 36 ॥ ദിവ്യൗഘാ മാനവൗഘാശ്ച സിദ്ധൗഘാശ്ച സമാഗതാഃ । തത്ര ശ്രീലലിതാദേവീ സർവേഷാം ദർശനം ദദൗ ॥ 37 ॥ തേഷു ദൃഷ്ട്വോപവിഷ്ടേഷു സ്വേ സ്വേ സ്ഥാനേ യഥാക്രമം । തത്ര ശ്രീലലിതാദേവീകടാക്ഷാക്ഷേപചോദിതാഃ ॥ 38 ॥ ഉത്ഥായ വശിനീമുഖ്യാ ബദ്ധാഞ്ജലിപുടാസ്തദാ । അസ്തുവന്നാമസാഹസ്രൈഃ സ്വകൃതൈർലലിതാംബികാം ॥ 39 ॥ ശ്രുത്വാ സ്തവം പ്രസന്നാഭൂല്ലലിതാ പരമേശ്വരീ । തേ സർവേ വിസ്മയം ജഗ്മുര്യേ തത്ര സദസി സ്ഥിതാഃ ॥ 40 ॥ തതഃ പ്രോവാച ലലിതാ സദസ്യാൻ ദേവതാഗണാൻ । ദേവ്യുവാച । മമാജ്ഞയൈവ വാഗ്ദേവ്യശ്ചക്രുഃ സ്തോത്രമനുത്തമം ॥ 41 ॥ അങ്കിതം നാമഭിർദിവ്യൈർമമ പ്രീതിവിധായകൈഃ । തത്പഠധ്വം സദാ യൂയം സ്തോത്രം മത്പ്രീതിവൃദ്ധയേ ॥ 42 ॥ പ്രവർതയധ്വം ഭക്തേഷു മമ നാമസാഹസ്രകം । ഇദം നാമസഹസ്രം മേ യോ ഭക്തഃ പഠതേ സകൃത് ॥ 43 ॥ സ മേ പ്രിയതമോ ജ്ഞേയസ്തസ്മൈ കാമാൻ ദദാമ്യഹം । ശ്രീചക്രേ മാം സമഭ്യർച്യ ജപ്ത്വാ പഞ്ചദശാക്ഷരീം ॥ 44 ॥ പശ്ചാന്നാമസഹസ്രം മേ കീർതയേന്മമ തുഷ്ടയേ । മാമർചയതു വാ മാ വാ വിദ്യാം ജപതു വാ ന വാ ॥ 45 ॥ കീർതയേന്നാമസാഹസ്രമിദം മത്പ്രീതയേ സദാ । മത്പ്രീത്യാ സകലാന്കാമാല്ലഭതേ നാത്ര സംശയഃ ॥ 46 ॥ തസ്മാന്നാമസഹസ്രം മേ കീർതയധ്വം സദാദരാത് । ശ്രീഹയഗ്രീവ ഉവാച । ഇതി ശ്രീലലിതേശാനീ ശാസ്തി ദേവാൻ സഹാനുഗാൻ ॥ 47 ॥ തദാജ്ഞയാ തദാരഭ്യ ബ്രഹ്മവിഷ്ണുമഹേശ്വരാഃ । ശക്തയോ മന്ത്രിണീമുഖ്യാ ഇദം നാമസഹസ്രകം ॥ 48 ॥ പഠന്തി ഭക്ത്യാ സതതം ലലിതാപരിതുഷ്ടയേ । തസ്മാദവശ്യം ഭക്തേന കീർതനീയമിദം മുനേ ॥ 49 ॥ ആവശ്യകത്വേ ഹേതുസ്തേ മയാ പ്രോക്തോ മുനീശ്വര । ഇദാനീം നാമസാഹസ്രം വക്ഷ്യാമി ശ്രദ്ധയാ ശൃണു ॥ 50 ॥ ഇതി ശ്രീബ്രഹ്മാണ്ഡപുരാണേ ഹയഗ്രീവാഗസ്ത്യസംവാദേ ലലിതാസഹസ്രനാമപൂർവഭാഗോ നാമ പ്രഥമോഽധ്യായഃ ॥ അസ്യ ശ്രീലലിതാ ത്രിശതീസ്തോത്ര മഹാമംത്രസ്യ, ഭഗവാന് ഹയഗ്രീവ ഋഷിഃ, അനുഷ്ടുപ് ഛംദഃ, ശ്രീലലിതാമഹാത്രിപുരസുംദരീ ദേവതാ, ഐം ബീജം, സൌഃ ശക്തിഃ, ക്ലീം കീലകം, മമ ചതുർവിധപുരുഷാര്ഥഫലസിദ്ധ്യര്ഥേ ജപേ വിനിയോഗഃ । ഐമിത്യാദിഭിരംഗന്യാസകരന്യാസാഃ കാര്യാഃ । ധ്യാനമ് । അതിമധുരചാപഹസ്താ- -മപരിമിതാമോദബാണസൌഭാഗ്യാമ് । അരുണാമതിശയകരുണാ- -മഭിനവകുലസുംദരീം വംദേ । ശ്രീ ഹയഗ്രീവ ഉവാച । കകാരരൂപാ കല്യാണീ കല്യാണഗുണശാലിനീ । കല്യാണശൈലനിലയാ കമനീയാ കലാവതീ ॥ 1 ॥ കമലാക്ഷീ കല്മഷഘ്നീ കരുണാമൃതസാഗരാ । കദംബകാനനാവാസാ കദംബകുസുമപ്രിയാ ॥ 2 ॥ കംദര്പവിദ്യാ കംദര്പജനകാപാംഗവീക്ഷണാ । കര്പൂരവീടിസൌരഭ്യകല്ലോലിതകകുപ്തടാ ॥ 3 ॥ കലിദോഷഹരാ കംജലോചനാ കമ്രവിഗ്രഹാ । കര്മാദിസാക്ഷിണീ കാരയിത്രീ കര്മഫലപ്രദാ ॥ 4 ॥ ഏകാരരൂപാ ചൈകാക്ഷര്യേകാനേകാക്ഷരാകൃതിഃ । ഏതത്തദിത്യനിര്ദേശ്യാ ചൈകാനംദചിദാകൃതിഃ ॥ 5 ॥ ഏവമിത്യാഗമാബോധ്യാ ചൈകഭക്തിമദര്ചിതാ । ഏകാഗ്രചിത്തനിര്ധ്യാതാ ചൈഷണാരഹിതാദൃതാ ॥ 6 ॥ ഏലാസുഗംധിചികുരാ ചൈനഃകൂടവിനാശിനീ । ഏകഭോഗാ ചൈകരസാ ചൈകൈശ്വര്യപ്രദായിനീ ॥ 7 ॥ ഏകാതപത്രസാമ്രാജ്യപ്രദാ ചൈകാംതപൂജിതാ । ഏധമാനപ്രഭാ ചൈജദനേകജഗദീശ്വരീ ॥ 8 ॥ ഏകവീരാദിസംസേവ്യാ ചൈകപ്രാഭവശാലിനീ । ഈകാരരൂപാ ചേശിത്രീ ചേപ്സിതാര്ഥപ്രദായിനീ ॥ 9 ॥ ഈദൃഗിത്യവിനിര്ദേശ്യാ ചേശ്വരത്വവിധായിനീ । ഈശാനാദിബ്രഹ്മമയീ ചേശിത്വാദ്യഷ്ടസിദ്ധിദാ ॥ 10 ॥ ഈക്ഷിത്രീക്ഷണസൃഷ്ടാംഡകോടിരീശ്വരവല്ലഭാ । ഈഡിതാ ചേശ്വരാര്ധാംഗശരീരേശാധിദേവതാ ॥ 11 ॥ ഈശ്വരപ്രേരണകരീ ചേശതാംഡവസാക്ഷിണീ । ഈശ്വരോത്സംഗനിലയാ ചേതിബാധാവിനാശിനീ ॥ 12 ॥ ഈഹാവിരഹിതാ ചേശശക്തിരീഷത്സ്മിതാനനാ । ലകാരരൂപാ ലലിതാ ലക്ഷ്മീവാണീനിഷേവിതാ ॥ 13 ॥ ലാകിനീ ലലനാരൂപാ ലസദ്ദാഡിമപാടലാ । ലലംതികാലസത്ഫാലാ ലലാടനയനാര്ചിതാ ॥ 14 ॥ ലക്ഷണോജ്ജ്വലദിവ്യാംഗീ ലക്ഷകോട്യംഡനായികാ । ലക്ഷ്യാര്ഥാ ലക്ഷണാഗമ്യാ ലബ്ധകാമാ ലതാതനുഃ ॥ 15 ॥ ലലാമരാജദലികാ ലംബിമുക്താലതാംചിതാ । ലംബോദരപ്രസൂര്ലഭ്യാ ലജ്ജാഢ്യാ ലയവര്ജിതാ ॥ 16 ॥ ഹ്രീം‍കാരരൂപാ ഹ്രീം‍കാരനിലയാ ഹ്രീം‍പദപ്രിയാ । ഹ്രീം‍കാരബീജാ ഹ്രീം‍കാരമംത്രാ ഹ്രീം‍കാരലക്ഷണാ ॥ 17 ॥ ഹ്രീം‍കാരജപസുപ്രീതാ ഹ്രീം‍മതീ ഹ്രീം‍വിഭൂഷണാ । ഹ്രീം‍ശീലാ ഹ്രീം‍പദാരാധ്യാ ഹ്രീം‍ഗര്ഭാ ഹ്രീം‍പദാഭിധാ ॥ 18 ॥ ഹ്രീം‍കാരവാച്യാ ഹ്രീം‍കാരപൂജ്യാ ഹ്രീം‍കാരപീഠികാ । ഹ്രീം‍കാരവേദ്യാ ഹ്രീം‍കാരചിംത്യാ ഹ്രീം ഹ്രീം‍ശരീരിണീ ॥ 19 ॥ ഹകാരരൂപാ ഹലധൃക്പൂജിതാ ഹരിണേക്ഷണാ । ഹരപ്രിയാ ഹരാരാധ്യാ ഹരിബ്രഹ്മേംദ്രവംദിതാ ॥ 20 ॥ ഹയാരൂഢാസേവിതാംഘ്രിര്ഹയമേധസമര്ചിതാ । ഹര്യക്ഷവാഹനാ ഹംസവാഹനാ ഹതദാനവാ ॥ 21 ॥ ഹത്യാദിപാപശമനീ ഹരിദശ്വാദിസേവിതാ । ഹസ്തികുംഭോത്തുംഗകുചാ ഹസ്തികൃത്തിപ്രിയാംഗനാ ॥ 22 ॥ ഹരിദ്രാകുംകുമാദിഗ്ധാ ഹര്യശ്വാദ്യമരാര്ചിതാ । ഹരികേശസഖീ ഹാദിവിദ്യാ ഹാലാമദാലസാ ॥ 23 ॥ സകാരരൂപാ സർവജ്ഞാ സർവേശീ സർവമംഗലാ । സർവകര്ത്രീ സർവഭര്ത്രീ സർവഹംത്രീ സനാതനാ ॥ 24 ॥ സർവാനവദ്യാ സർവാംഗസുംദരീ സർവസാക്ഷിണീ । സർവാത്മികാ സർവസൌഖ്യദാത്രീ സർവവിമോഹിനീ ॥ 25 ॥ സർവാധാരാ സർവഗതാ സർവാവഗുണവര്ജിതാ । സർവാരുണാ സർവമാതാ സർവഭൂഷണഭൂഷിതാ ॥ 26 ॥ കകാരാര്ഥാ കാലഹംത്രീ കാമേശീ കാമിതാര്ഥദാ । കാമസംജീവനീ കല്യാ കഠിനസ്തനമംഡലാ ॥ 27 ॥ കരഭോരൂഃ കലാനാഥമുഖീ കചജിതാംബുദാ । കടാക്ഷസ്യംദികരുണാ കപാലിപ്രാണനായികാ ॥ 28 ॥ കാരുണ്യവിഗ്രഹാ കാംതാ കാംതിധൂതജപാവലിഃ । കലാലാപാ കംബുകംഠീ കരനിര്ജിതപല്ലവാ ॥ 29 ॥ കല്പവല്ലീസമഭുജാ കസ്തൂരീതിലകാംചിതാ । ഹകാരാര്ഥാ ഹംസഗതിര്ഹാടകാഭരണോജ്ജ്വലാ ॥ 30 ॥ ഹാരഹാരികുചാഭോഗാ ഹാകിനീ ഹല്യവര്ജിതാ । ഹരിത്പതിസമാരാധ്യാ ഹഠാത്കാരഹതാസുരാ ॥ 31 ॥ ഹര്ഷപ്രദാ ഹവിര്ഭോക്ത്രീ ഹാര്ദസംതമസാപഹാ । ഹല്ലീസലാസ്യസംതുഷ്ടാ ഹംസമംത്രാര്ഥരൂപിണീ ॥ 32 ॥ ഹാനോപാദാനനിര്മുക്താ ഹര്ഷിണീ ഹരിസോദരീ । ഹാഹാഹൂഹൂമുഖസ്തുത്യാ ഹാനിവൃദ്ധിവിവര്ജിതാ ॥ 33 ॥ ഹയ്യംഗവീനഹൃദയാ ഹരിഗോപാരുണാംശുകാ । ലകാരാഖ്യാ ലതാപൂജ്യാ ലയസ്ഥിത്യുദ്ഭവേശ്വരീ ॥ 34 ॥ ലാസ്യദര്ശനസംതുഷ്ടാ ലാഭാലാഭവിവര്ജിതാ । ലംഘ്യേതരാജ്ഞാ ലാവണ്യശാലിനീ ലഘുസിദ്ധിദാ ॥ 35 ॥ ലാക്ഷാരസസവര്ണാഭാ ലക്ഷ്മണാഗ്രജപൂജിതാ । ലഭ്യേതരാ ലബ്ധഭക്തിസുലഭാ ലാംഗലായുധാ ॥ 36 ॥ ലഗ്നചാമരഹസ്തശ്രീശാരദാപരിവീജിതാ । ലജ്ജാപദസമാരാധ്യാ ലംപടാ ലകുലേശ്വരീ ॥ 37 ॥ ലബ്ധമാനാ ലബ്ധരസാ ലബ്ധസംപത്സമുന്നതിഃ । ഹ്രീം‍കാരിണീ ഹ്രീം‍കാരാദ്യാ ഹ്രീം‍മധ്യാ ഹ്രീം‍ശിഖാമണിഃ ॥ 38 ॥ ഹ്രീം‍കാരകുംഡാഗ്നിശിഖാ ഹ്രീം‍കാരശശിചംദ്രികാ । ഹ്രീം‍കാരഭാസ്കരരുചിര്ഹ്രീം‍കാരാംഭോദചംചലാ ॥ 39 ॥ ഹ്രീം‍കാരകംദാംകുരികാ ഹ്രീം‍കാരൈകപരായണാ । ഹ്രീം‍കാരദീര്ഘികാഹംസീ ഹ്രീം‍കാരോദ്യാനകേകിനീ ॥ 40 ॥ ഹ്രീം‍കാരാരണ്യഹരിണീ ഹ്രീം‍കാരാവാലവല്ലരീ । ഹ്രീം‍കാരപംജരശുകീ ഹ്രീം‍കാരാംഗണദീപികാ ॥ 41 ॥ ഹ്രീം‍കാരകംദരാസിംഹീ ഹ്രീം‍കാരാംഭോജഭൃംഗികാ । ഹ്രീം‍കാരസുമനോമാധ്വീ ഹ്രീം‍കാരതരുമംജരീ ॥ 42 ॥ സകാരാഖ്യാ സമരസാ സകലാഗമസംസ്തുതാ । സർവവേദാംതതാത്പര്യഭൂമിഃ സദസദാശ്രയാ ॥ 43 ॥ സകലാ സച്ചിദാനംദാ സാധ്യാ സദ്ഗതിദായിനീ । സനകാദിമുനിധ്യേയാ സദാശിവകുടുംബിനീ ॥ 44 ॥ സകാലാധിഷ്ഠാനരൂപാ സത്യരൂപാ സമാകൃതിഃ । സർവപ്രപംചനിര്മാത്രീ സമനാധികവര്ജിതാ ॥ 45 ॥ സർവോത്തുംഗാ സംഗഹീനാ സഗുണാ സകലേഷ്ടദാ । കകാരിണീ കാവ്യലോലാ കാമേശ്വരമനോഹരാ ॥ 46 ॥ കാമേശ്വരപ്രാണനാഡീ കാമേശോത്സംഗവാസിനീ । കാമേശ്വരാലിംഗിതാംഗീ കാമേശ്വരസുഖപ്രദാ ॥ 47 ॥ കാമേശ്വരപ്രണയിനീ കാമേശ്വരവിലാസിനീ । കാമേശ്വരതപഃസിദ്ധിഃ കാമേശ്വരമനഃപ്രിയാ ॥ 48 ॥ കാമേശ്വരപ്രാണനാഥാ കാമേശ്വരവിമോഹിനീ । കാമേശ്വരബ്രഹ്മവിദ്യാ കാമേശ്വരഗൃഹേശ്വരീ ॥ 49 ॥ കാമേശ്വരാഹ്ലാദകരീ കാമേശ്വരമഹേശ്വരീ । കാമേശ്വരീ കാമകോടിനിലയാ കാംക്ഷിതാര്ഥദാ ॥ 50 ॥ ലകാരിണീ ലബ്ധരൂപാ ലബ്ധധീര്ലബ്ധവാംഛിതാ । ലബ്ധപാപമനോദൂരാ ലബ്ധാഹംകാരദുര്ഗമാ ॥ 51 ॥ ലബ്ധശക്തിര്ലബ്ധദേഹാ ലബ്ധൈശ്വര്യസമുന്നതിഃ । ലബ്ധവൃദ്ധിര്ലബ്ധലീലാ ലബ്ധയൌവനശാലിനീ ॥ 52 ॥ ലബ്ധാതിശയസർവാംഗസൌംദര്യാ ലബ്ധവിഭ്രമാ । ലബ്ധരാഗാ ലബ്ധപതിര്ലബ്ധനാനാഗമസ്ഥിതിഃ ॥ 53 ॥ ലബ്ധഭോഗാ ലബ്ധസുഖാ ലബ്ധഹര്ഷാഭിപൂരിതാ । ഹ്രീം‍കാരമൂര്തിര്ഹ്രീം‍കാരസൌധശൃംഗകപോതികാ ॥ 54 ॥ ഹ്രീം‍കാരദുഗ്ധാബ്ധിസുധാ ഹ്രീം‍കാരകമലേംദിരാ । ഹ്രീം‍കാരമണിദീപാര്ചിര്ഹ്രീം‍കാരതരുശാരികാ ॥ 55 ॥ ഹ്രീം‍കാരപേടകമണിര്ഹ്രീം‍കാരാദര്ശബിംബിതാ । ഹ്രീം‍കാരകോശാസിലതാ ഹ്രീം‍കാരാസ്ഥാനനര്തകീ ॥ 56 ॥ ഹ്രീം‍കാരശുക്തികാമുക്താമണിര്ഹ്രീം‍കാരബോധിതാ । ഹ്രീം‍കാരമയസൌവര്ണസ്തംഭവിദ്രുമപുത്രികാ ॥ 57 ॥ ഹ്രീം‍കാരവേദോപനിഷദ് ഹ്രീം‍കാരാധ്വരദക്ഷിണാ । ഹ്രീം‍കാരനംദനാരാമനവകല്പകവല്ലരീ ॥ 58 ॥ ഹ്രീം‍കാരഹിമവദ്ഗംഗാ ഹ്രീം‍കാരാര്ണവകൌസ്തുഭാ । ഹ്രീം‍കാരമംത്രസർവസ്വാ ഹ്രീം‍കാരപരസൌഖ്യദാ ॥ 59 ॥ ഉത്തരപീഠികാ (ഫലശൃതിഃ) ഹയഗ്രീവ ഉവാച । ഇത്യേവം തേ മയാഖ്യാതം ദേവ്യാ നാമശതത്രയമ് । രഹസ്യാതിരഹസ്യത്വാദ്ഗോപനീയം ത്വയാ മുനേ ॥ 1 ॥ ശിവവര്ണാനി നാമാനി ശ്രീദേവ്യാ കഥിതാനി ഹി । ശക്ത്യക്ഷരാണി നാമാനി കാമേശകഥിതാനി ച ॥ 2 ॥ ഉഭയാക്ഷരനാമാനി ഹ്യുഭാഭ്യാം കഥിതാനി വൈ । തദന്യൈര്ഗ്രഥിതം സ്തോത്രമേതസ്യ സദൃശം കിമു ॥ 3 ॥ നാനേന സദൃശം സ്തോത്രം ശ്രീദേവീപ്രീതിദായകമ് । ലോകത്രയേഽപി കല്യാണം സംഭവേന്നാത്ര സംശയഃ ॥ 4 ॥ സൂത ഉവാച । ഇതി ഹയമുഖഗീതം സ്തോത്രരാജം നിശമ്യ പ്രഗലിതകലുഷോഽഭൂച്ചിത്തപര്യാപ്തിമേത്യ । നിജഗുരുമഥ നത്വാ കുംഭജന്മാ തദുക്തം പുനരധികരഹസ്യം ജ്ഞാതുമേവം ജഗാദ ॥ 5 ॥ അഗസ്ത്യ ഉവാച । അശ്വാനന മഹാഭാഗ രഹസ്യമപി മേ വദ । ശിവവര്ണാനി കാന്യത്ര ശക്തിവര്ണാനി കാനി ഹി ॥ 6 ॥ ഉഭയോരപി വര്ണാനി കാനി വാ വദ ദേശിക । ഇതി പൃഷ്ടഃ കുംഭജേന ഹയഗ്രീവോഽവദത്പുനഃ ॥ 7 ॥ ഹയഗ്രീവ ഉവാച । തവ ഗോപ്യം കിമസ്തീഹ സാക്ഷാദംബാനുശാസനാത് । ഇദം ത്വതിരഹസ്യം തേ വക്ഷ്യാമി ശൃണു കുംഭജ ॥ 8 ॥ ഏതദ്വിജ്ഞാനമാത്രേണ ശ്രീവിദ്യാ സിദ്ധിദാ ഭവേത് । കത്രയം ഹദ്വയം ചൈവ ശൈവോ ഭാഗഃ പ്രകീര്തിതഃ ॥ 9 ॥ ശക്ത്യക്ഷരാണി ശേഷാണി ഹ്രീംകാര ഉഭയാത്മകഃ । ഏവം വിഭാഗമജ്ഞാത്വാ യേ വിദ്യാജപശാലിനഃ ॥ 10 ॥ ന തേഷാം സിദ്ധിദാ വിദ്യാ കല്പകോടിശതൈരപി । ചതുര്ഭിഃ ശിവചക്രൈശ്ച ശക്തിചക്രൈശ്ച പംചഭിഃ ॥ 11 ॥ നവചക്രൈശ്ച സംസിദ്ധം ശ്രീചക്രം ശിവയോർവപുഃ । ത്രികോണമഷ്ടകോണം ച ദശകോണദ്വയം തഥാ ॥ 12 ॥ ചതുര്ദശാരം ചൈതാനി ശക്തിചക്രാണി പംച ച । ബിംദുശ്ചാഷ്ടദലം പദ്മം പദ്മം ഷോഡശപത്രകമ് ॥ 13 ॥ ചതുരശ്രം ച ചത്വാരി ശിവചക്രാണ്യനുക്രമാത് । ത്രികോണേ ബൈംദവം ശ്ലിഷ്ടം അഷ്ടാരേഽഷ്ടദലാംബുജമ് ॥ 14 ॥ ദശാരയോഃ ഷോഡശാരം ഭൂഗൃഹം ഭുവനാശ്രകേ । ശൈവാനാമപി ശാക്താനാം ചക്രാണാം ച പരസ്പരമ് ॥ 15 ॥ അവിനാഭാവസംബംധം യോ ജാനാതി സ ചക്രവിത് । ത്രികോണരൂപിണീ ശക്തിര്ബിംദുരൂപപരഃ ശിവഃ ॥ 16 ॥ അവിനാഭാവസംബംധം തസ്മാദ്ബിംദുത്രികോണയോഃ । ഏവം വിഭാഗമജ്ഞാത്വാ ശ്രീചക്രം യഃ സമര്ചയേത് ॥ 17 ॥ ന തത്ഫലമവാപ്നോതി ലലിതാംബാ ന തുഷ്യതി । യേ ച ജാനംതി ലോകേഽസ്മിന് ശ്രീവിദ്യാചക്രവേദിനഃ ॥ 18 ॥ സാമന്യവേദിനഃ സർവേ വിശേഷജ്ഞോഽതിദുര്ലഭഃ । സ്വയംവിദ്യാവിശേഷജ്ഞോ വിശേഷജ്ഞം സമര്ചയേത് ॥ 19 ॥ തസ്മൈ ദേയം തതോ ഗ്രാഹ്യമശക്തസ്തസ്യ ദാപയേത് । അംധം തമഃ പ്രവിശംതി യേഽവിദ്യാം സമുപാസതേ ॥ 20 ॥ ഇതി ശ്രുതിരപാഹൈതാനവിദ്യോപാസകാന്പുനഃ । വിദ്യാന്യോപാസകാനേവ നിംദത്യാരുണികീ ശ്രുതിഃ ॥ 21 ॥ അശ്രുതാ സശ്രുതാസശ്ച യജ്വാനോ യേഽപ്യയജ്വനഃ । സ്വര്യംതോ നാപേക്ഷംതേ ഇംദ്രമഗ്നിം ച യേ വിദുഃ ॥ 22 ॥ സികതാ ഇവ സംയംതി രശ്മിഭിഃ സമുദീരിതാഃ । അസ്മാല്ലോകാദമുഷ്മാച്ചേത്യാഹ ചാരണ്യകശ്രുതിഃ ॥ 23 ॥ യസ്യ നോ പശ്ചിമം ജന്മ യദി വാ ശംകരഃ സ്വയമ് । തേനൈവ ലഭ്യതേ വിദ്യാ ശ്രീമത്പംചദശാക്ഷരീ ॥ 24 ॥ ഇതി മംത്രേഷു ബഹുധാ വിദ്യായാ മഹിമോച്യതേ । മോക്ഷൈകഹേതുവിദ്യാ തു ശ്രീവിദ്യാ നാത്ര സംശയഃ ॥ 25 ॥ ന ശില്പാദിജ്ഞാനയുക്തേ വിദ്വച്ഛബ്ധഃ പ്രയുജ്യതേ । മോക്ഷൈകഹേതുവിദ്യാ സാ ശ്രീവിദ്യൈവ ന സംശയഃ ॥ 26 ॥ തസ്മാദ്വിദ്യാവിദേവാത്ര വിദ്വാന്വിദ്വാനിതീര്യതേ । സ്വയം വിദ്യാവിദേ ദദ്യാത്ഖ്യാപയേത്തദ്ഗുണാന്സുധീഃ ॥ 27 ॥ സ്വയംവിദ്യാരഹസ്യജ്ഞോ വിദ്യാമാഹാത്മ്യവേദ്യപി । വിദ്യാവിദം നാര്ചയേച്ചേത്കോ വാ തം പൂജയേജ്ജനഃ ॥ 28 ॥ പ്രസംഗാദിദമുക്തം തേ പ്രകൃതം ശൃണു കുംഭജ । യഃ കീര്തയേത്സകൃദ്ഭക്ത്യാ ദിവ്യനാമശതത്രയമ് ॥ 29 ॥ തസ്യ പുണ്യമഹം വക്ഷ്യേ ശൃണു ത്വം കുംഭസംഭവ । രഹസ്യനാമസാഹസ്രപാഠേ യത്ഫലമീരിതമ് ॥ 30 ॥ തത്ഫലം കോടിഗുണിതമേകനാമജപാദ്ഭവേത് । കാമേശ്വരീകാമേശാഭ്യാം കൃതം നാമശതത്രയമ് ॥ 31 ॥ നാന്യേന തുലയേദേതത് സ്തോത്രേണാന്യകൃതേന ച । ശ്രിയഃ പരംപരാ യസ്യ ഭാവി വാ ചോത്തരോത്തരമ് ॥ 32 ॥ തേനൈവ ലഭ്യതേ ചൈതത്പശ്ചാച്ഛ്രേയഃ പരീക്ഷയേത് । അസ്യാ നാമ്നാം ത്രിശത്യാസ്തു മഹിമാ കേന വര്ണ്യതേ ॥ 33 ॥ യാ സ്വയം ശിവയോർവക്ത്രപദ്മാഭ്യാം പരിനിഃസൃതാ । നിത്യം ഷോഡശസംഖ്യാകാന്വിപ്രാനാദൌ തു ഭോജയേത് ॥ 34 ॥ അഭ്യക്താംസ്തിലതൈലേന സ്നാതാനുഷ്ണേന വാരിണാ । അഭ്യര്ച്യ ഗംധപുഷ്പാദ്യൈഃ കാമേശ്വര്യാദിനാമഭിഃ ॥ 35 ॥ സൂപാപൂപൈഃ ശര്കരാദ്യൈഃ പായസൈഃ ഫലസംയുതൈഃ । വിദ്യാവിദോ വിശേഷേണ ഭോജയേത്ഷോഡശ ദ്വിജാന് ॥ 36 ॥ ഏവം നിത്യാര്ചനം കുര്യാദാദൌ ബ്രാഹ്മണഭോജനമ് । ത്രിശതീനാമഭിഃ പശ്ചാദ്ബ്രാഹ്മണാന്ക്രമശോഽര്ചയേത് ॥ 37 ॥ തൈലാഭ്യംഗാദികം ദത്വാ വിഭവേ സതി ഭക്തിതഃ । ശുക്ലപ്രതിപദാരഭ്യ പൌര്ണമാസ്യവധി ക്രമാത് ॥ 38 ॥ ദിവസേ ദിവസേ വിപ്രാ ഭോജ്യാ വിംശതിസംഖ്യയാ । ദശഭിഃ പംചഭിർവാപി ത്രിഭിരേകേന വാ ദിനൈഃ ॥ 39 ॥ ത്രിംശത്ഷഷ്ടിഃ ശതം വിപ്രാഃ സംഭോജ്യാസ്ത്രിശതം ക്രമാത് । ഏവം യഃ കുരുതേ ഭക്ത്യാ ജന്മമധ്യേ സകൃന്നരഃ ॥ 40 ॥ തസ്യൈവ സഫലം ജന്മ മുക്തിസ്തസ്യ കരേ സ്ഥിരാ । രഹസ്യനാമസാഹസ്രഭോജനേഽപ്യേവമേവ ഹി ॥ 41 ॥ ആദൌ നിത്യബലിം കുര്യാത്പശ്ചാദ്ബ്രാഹ്മണഭോജനമ് । രഹസ്യനാമസാഹസ്രമഹിമാ യോ മയോദിതഃ ॥ 42 ॥ സ ശീകരാണുരത്നൈകനാമ്നോ മഹിമവാരിധേഃ । വാഗ്ദേവീരചിതേ നാമസാഹസ്രേ യദ്യദീരിതമ് ॥ 43 ॥ തത്ഫലം കോടിഗുണിതം നാമ്നോഽപ്യേകസ്യ കീര്തനാത് । ഏതദന്യൈര്ജപൈഃ സ്തോത്രൈരര്ചനൈര്യത്ഫലം ഭവേത് ॥ 44 ॥ തത്ഫലം കോടിഗുണിതം ഭവേന്നാമശതത്രയാത് । വാഗ്ദേവീരചിതേ സ്തോത്രേ താദൃശോ മഹിമാ യദി ॥ 45 ॥ സാക്ഷാത്കാമേശകാമേശീകൃതേഽസ്മിന്ഗൃഹ്യതാമിതി । സകൃത്സംകീര്തനാദേവ നാമ്നാമസ്മിന് ശതത്രയേ ॥ 46 ॥ ഭവേച്ചിത്തസ്യ പര്യാപ്തിര്ന്യൂനമന്യാനപേക്ഷിണീ । ന ജ്ഞാതവ്യമിതോഽപ്യന്യത്ര ജപ്തവ്യം ച കുംഭജ ॥ 47 ॥ യദ്യത്സാധ്യതമം കാര്യം തത്തദര്ഥമിദം ജപേത് । തത്തത്ഫലമവാപ്നോതി പശ്ചാത്കാര്യം പരീക്ഷയേത് ॥ 48 ॥ യേ യേ പ്രയോഗാസ്തംത്രേഷു തൈസ്തൈര്യത്സാധ്യതേ ഫലമ് । തത്സർവം സിധ്യതി ക്ഷിപ്രം നാമത്രിശതകീര്തനാത് ॥ 49 ॥ ആയുഷ്കരം പുഷ്ടികരം പുത്രദം വശ്യകാരകമ് । വിദ്യാപ്രദം കീര്തികരം സുകവിത്വപ്രദായകമ് ॥ 50 ॥ സർവസംപത്പ്രദം സർവഭോഗദം സർവസൌഖ്യദമ് । സർവാഭീഷ്ടപ്രദം ചൈവ ദേവ്യാ നാമശതത്രയമ് ॥ 51 ॥ ഏതജ്ജപപരോ ഭൂയാന്നാന്യദിച്ഛേത്കദാചന । ഏതത്കീര്തനസംതുഷ്ടാ ശ്രീദേവീ ലലിതാംബികാ ॥ 52 ॥ ഭക്തസ്യ യദ്യദിഷ്ടം സ്യാത്തത്തത്പൂരയതേ ധ്രുവമ് । തസ്മാത്കുംഭോദ്ഭവ മുനേ കീര്തയ ത്വമിദം സദാ ॥ 53 ॥ നാപരം കിംചിദപി തേ ബോദ്ധവ്യമവശിഷ്യതേ । ഇതി തേ കഥിതം സ്തോത്രം ലലിതാപ്രീതിദായകമ് ॥ 54 ॥ നാവിദ്യാവേദിനേ ബ്രൂയാന്നാഭക്തായ കദാചന । ന ശഠായ ന ദുഷ്ടായ നാവിശ്വാസായ കര്ഹിചിത് ॥ 56 ॥ യോ ബ്രൂയാത്ത്രിശതീം നാമ്നാം തസ്യാനര്ഥോ മഹാന്ഭവേത് । ഇത്യാജ്ഞാ ശാംകരീ പ്രോക്താ തസ്മാദ്ഗോപ്യമിദം ത്വയാ ॥ 57 ॥ ലലിതാപ്രേരിതേനൈവ മയോക്തം സ്തോത്രമുത്തമമ് । രഹസ്യനാമസാഹസ്രാദപി ഗോപ്യമിദം മുനേ ॥ 58 ॥ സൂത ഉവാച । ഏവമുക്ത്വാ ഹയഗ്രീവഃ കുംഭജം താപസോത്തമമ് । സ്തോത്രേണാനേന ലലിതാം സ്തുത്വാ ത്രിപുരസുംദരീമ് । ആനംദലഹരീമഗ്നമാനസഃ സമവര്തത ॥ 59 ॥ ഇതി ബ്രഹ്മാംഡപുരാണേ ഉത്തരഖംഡേ ഹയഗ്രീവാഗസ്ത്യസംവാദേ ലലിതോപാഖ്യാനേ സ്തോത്രഖംഡേ ശ്രീലലിതാത്രിശതീസ്തോത്രരത്നമ് ।