हैंహైHaindavamஹிહિં
📍
Font Size:
Sri Lalitha Trishati Stotram
agastya uvāca ।
aśvānana mahābuddhe sarvaśāstraviśārada ।
kathitaṃ lalitādevyāścaritaṃ paramādbhutam ॥ 1 ॥
pūrvaṃ prādurbhavo mātustataḥ paṭṭābhiṣecanam ।
bhaṇḍāsuravadhaścaiva vistareṇa tvayoditaḥ ॥ 2 ॥
varṇitaṃ śrīpuraṃ cāpi mahāvibhavavistaram ।
śrīmatpañcadaśākṣaryāḥ mahimā varṇitastathā ॥ 3 ॥
ṣoḍhānyāsādayo nyāsāḥ nyāsakhaṇḍe samīritāḥ ।
antaryāgakramaścaiva bahiryāgakramastathā ॥ 4 ॥
mahāyāgakramaścaiva pūjākhaṇḍe prakīrtitāḥ ।
puraścaraṇakhaṇḍe tu japalakṣaṇamīritam ॥ 5 ॥
homakhaṇḍe tvayā prokto homadravyavidhikramaḥ ।
cakrarājasya vidyāyāḥ śrīdevyā deśikātmanoḥ ॥ 6 ॥
rahasyakhaṇḍe tādātmyaṃ parasparamudīritam ।
stotrakhaṇḍe bahuvidhāḥ stutayaḥ parikīrtitāḥ ॥ 7 ॥
mantriṇīdaṇḍinīdevyoḥ prokte nāmasahasrake ।
na tu śrīlalitādevyāḥ proktaṃ nāmasahasrakam ॥ 8 ॥
tatra me saṃśayo jāto hayagrīva dayānidhe ।
kiṃ vā tvayā vismṛtaṃ tajjñātvā vā samupekṣitam ॥ 9 ॥
mama vā yogyatā nāsti śrotuṃ nāmasahasrakam ।
kimarthaṃ bhavatā noktaṃ tatra me kāraṇaṃ vada ॥ 10 ॥
sūta uvāca ।
iti pṛṣṭo hayagrīvo muninā kumbhajanmanā ।
prahṛṣṭo vacanaṃ prāha tāpasaṃ kumbhasambhavam ॥ 11 ॥
śrīhayagrīva uvāca ।
lopāmudrāpate'gastya sāvadhānamanāḥ śṛṇu ।
nāmnāṃ sahasraṃ yannoktaṃ kāraṇaṃ tadvadāmi te ॥ 12 ॥
rahasyamiti matvāhaṃ noktavāṃste na cānyathā ।
punaśca pṛcchate bhaktyā tasmāttatte vadāmyaham ॥ 13 ॥
brūyācchiṣyāya bhaktāya rahasyamapi deśikaḥ ।
bhavatā na pradeyaṃ syādabhaktāya kadācana ॥ 14 ॥
na śaṭhāya na duṣṭāya nāviśvāsāya karhicit ।
śrīmātṛbhaktiyuktāya śrīvidyārājavedine ॥ 15 ॥
upāsakāya śuddhāya deyaṃ nāmasahasrakam ।
yāni nāmasahasrāṇi sadyaḥ siddhipradāni vai ॥ 16 ॥
tantreṣu lalitādevyāsteṣu mukhyamidaṃ mune ।
śrīvidyaiva tu mantrāṇāṃ tatra kādiryathā parā ॥ 17 ॥
purāṇāṃ śrīpuramiva śaktīnāṃ lalitā tathā ।
śrīvidyopāsakānāṃ ca yathā devo paraḥ śivaḥ ॥ 18 ॥
tathā nāmasahasreṣu parametatprakīrtitam ।
yathāsya paṭhanāddevī prīyate lalitāmbikā ॥ 19 ॥
anyanāmasahasrasya pāṭhānna prīyate tathā ।
śrīmātuḥ prītaye tasmādaniśaṃ kīrtayedidam ॥ 20 ॥
bilvapatraiścakrarāje yo'rcayellalitāmbikām ।
padmairvā tulasīpuṣpairebhirnāmasahasrakaiḥ ॥ 21 ॥
sadyaḥ prasādaṃ kurute tasya siṃhāsaneśvarī ।
cakrādhirājamabhyarcya japtvā pañcadaśākṣarīm ॥ 22 ॥
japānte kīrtayennityamidaṃ nāmasahasrakam ।
japapūjādyaśaktaścetpaṭhennāmasahasrakam ॥ 23 ॥
sāṅgārcane sāṅgajape yatphalaṃ tadavāpnuyāt ।
upāsane stutīranyāḥ paṭhedabhyudayo hi saḥ ॥ 24 ॥
idaṃ nāmasahasraṃ tu kīrtayennityakarmavat ।
cakrarājārcanaṃ devyā japo nāmnāṃ ca kīrtanam ॥ 25 ॥
bhaktasya kṛtyametāvadanyadabhyudayaṃ viduḥ ।
bhaktasyāvaśyakamidaṃ nāmasāhasrakīrtanam ॥ 26 ॥
tatra hetuṃ pravakṣyāmi śṛṇu tvaṃ kumbhasambhava ।
purā śrīlalitādevī bhaktānāṃ hitakāmyayā ॥ 27 ॥
vāgdevīrvaśinīmukhyāḥ samāhūyedamabravīt ।
vāgdevatā vaśinyādyāḥ śṛṇudhvaṃ vacanaṃ mama ॥ 28 ॥
bhavatyo matprasādena prollasadvāgvibhūtayaḥ ।
madbhaktānāṃ vāgvibhūtipradāne viniyojitāḥ ॥ 29 ॥
maccakrasya rahasyajñā mama nāmaparāyaṇāḥ ।
mama stotravidhānāya tasmādājñāpayāmi vaḥ ॥ 30 ॥
kurudhvamaṅkitaṃ stotraṃ mama nāmasahasrakaiḥ ।
yena bhaktaiḥ stutāyā me sadyaḥ prītiḥ parā bhavet ॥ 31 ॥
ityājñaptāstato devyaḥ śrīdevyā lalitāmbayā ।
rahasyairnāmabhirdivyaiścakruḥ stotramanuttamam ॥ 32 ॥
rahasyanāmasāhasramiti tadviśrutaṃ param ।
tataḥ kadācitsadasi sthitvā siṃhāsane'mbikā ॥ 33 ॥
svasevāvasaraṃ prādātsarveṣāṃ kumbhasambhava ।
sevārthamāgatāstatra brahmāṇībrahmakoṭayaḥ ॥ 34 ॥
lakṣmīnārāyaṇānāṃ ca koṭayaḥ samupāgatāḥ ।
gaurīkoṭisametānāṃ rudrāṇāmapi koṭayaḥ ॥ 35 ॥
mantriṇīdaṇḍinīmukhyāḥ sevārthaṃ yaḥ samāgatāḥ ।
śaktayo vividhākārāstāsāṃ saṅkhyā na vidyate ॥ 36 ॥
divyaughā mānavaughāśca siddhaughāśca samāgatāḥ ।
tatra śrīlalitādevī sarveṣāṃ darśanaṃ dadau ॥ 37 ॥
teṣu dṛṣṭvopaviṣṭeṣu sve sve sthāne yathākramam ।
tatra śrīlalitādevīkaṭākṣākṣepacoditāḥ ॥ 38 ॥
utthāya vaśinīmukhyā baddhāñjalipuṭāstadā ।
astuvannāmasāhasraiḥ svakṛtairlalitāmbikām ॥ 39 ॥
śrutvā stavaṃ prasannābhūllalitā parameśvarī ।
te sarve vismayaṃ jagmurye tatra sadasi sthitāḥ ॥ 40 ॥
tataḥ provāca lalitā sadasyān devatāgaṇān ।
devyuvāca ।
mamājñayaiva vāgdevyaścakruḥ stotramanuttamam ॥ 41 ॥
aṅkitaṃ nāmabhirdivyairmama prītividhāyakaiḥ ।
tatpaṭhadhvaṃ sadā yūyaṃ stotraṃ matprītivṛddhaye ॥ 42 ॥
pravartayadhvaṃ bhakteṣu mama nāmasāhasrakam ।
idaṃ nāmasahasraṃ me yo bhaktaḥ paṭhate sakṛt ॥ 43 ॥
sa me priyatamo jñeyastasmai kāmān dadāmyaham ।
śrīcakre māṃ samabhyarcya japtvā pañcadaśākṣarīm ॥ 44 ॥
paścānnāmasahasraṃ me kīrtayenmama tuṣṭaye ।
māmarcayatu vā mā vā vidyāṃ japatu vā na vā ॥ 45 ॥
kīrtayennāmasāhasramidaṃ matprītaye sadā ।
matprītyā sakalānkāmāṃllabhate nātra saṃśayaḥ ॥ 46 ॥
tasmānnāmasahasraṃ me kīrtayadhvaṃ sadādarāt ।
śrīhayagrīva uvāca ।
iti śrīlaliteśānī śāsti devān sahānugān ॥ 47 ॥
tadājñayā tadārabhya brahmaviṣṇumaheśvarāḥ ।
śaktayo mantriṇīmukhyā idaṃ nāmasahasrakam ॥ 48 ॥
paṭhanti bhaktyā satataṃ lalitāparituṣṭaye ।
tasmādavaśyaṃ bhaktena kīrtanīyamidaṃ mune ॥ 49 ॥
āvaśyakatve hetuste mayā prokto munīśvara ।
idānīṃ nāmasāhasraṃ vakṣyāmi śraddhayā śṛṇu ॥ 50 ॥
iti śrībrahmāṇḍapurāṇe hayagrīvāgastyasaṃvāde lalitāsahasranāmapūrvabhāgo nāma prathamo'dhyāyaḥ ॥
asya śrīlalitā triśatīstotra mahāmaṃtrasya, bhagavān hayagrīva ṛṣiḥ, anuṣṭup chaṃdaḥ, śrīlalitāmahātripurasuṃdarī devatā, aiṃ bījaṃ, sauḥ śaktiḥ, klīṃ kīlakaṃ, mama caturvidhapuruṣārthaphalasiddhyarthe jape viniyogaḥ ।
aimityādibhiraṃganyāsakaranyāsāḥ kāryāḥ ।
dhyānam ।
atimadhuracāpahastā-
-maparimitāmodabāṇasaubhāgyām ।
aruṇāmatiśayakaruṇā-
-mabhinavakulasuṃdarīṃ vaṃde ।
śrī hayagrīva uvāca ।
kakārarūpā kalyāṇī kalyāṇaguṇaśālinī ।
kalyāṇaśailanilayā kamanīyā kalāvatī ॥ 1 ॥
kamalākṣī kalmaṣaghnī karuṇāmṛtasāgarā ।
kadaṃbakānanāvāsā kadaṃbakusumapriyā ॥ 2 ॥
kaṃdarpavidyā kaṃdarpajanakāpāṃgavīkṣaṇā ।
karpūravīṭisaurabhyakallolitakakuptaṭā ॥ 3 ॥
kalidoṣaharā kaṃjalocanā kamravigrahā ।
karmādisākṣiṇī kārayitrī karmaphalapradā ॥ 4 ॥
ekārarūpā caikākṣaryekānekākṣarākṛtiḥ ।
etattadityanirdeśyā caikānaṃdacidākṛtiḥ ॥ 5 ॥
evamityāgamābodhyā caikabhaktimadarcitā ।
ekāgracittanirdhyātā caiṣaṇārahitādṛtā ॥ 6 ॥
elāsugaṃdhicikurā cainaḥkūṭavināśinī ।
ekabhogā caikarasā caikaiśvaryapradāyinī ॥ 7 ॥
ekātapatrasāmrājyapradā caikāṃtapūjitā ।
edhamānaprabhā caijadanekajagadīśvarī ॥ 8 ॥
ekavīrādisaṃsevyā caikaprābhavaśālinī ।
īkārarūpā ceśitrī cepsitārthapradāyinī ॥ 9 ॥
īdṛgityavinirdeśyā ceśvaratvavidhāyinī ।
īśānādibrahmamayī ceśitvādyaṣṭasiddhidā ॥ 10 ॥
īkṣitrīkṣaṇasṛṣṭāṃḍakoṭirīśvaravallabhā ।
īḍitā ceśvarārdhāṃgaśarīreśādhidevatā ॥ 11 ॥
īśvarapreraṇakarī ceśatāṃḍavasākṣiṇī ।
īśvarotsaṃganilayā cetibādhāvināśinī ॥ 12 ॥
īhāvirahitā ceśaśaktirīṣatsmitānanā ।
lakārarūpā lalitā lakṣmīvāṇīniṣevitā ॥ 13 ॥
lākinī lalanārūpā lasaddāḍimapāṭalā ।
lalaṃtikālasatphālā lalāṭanayanārcitā ॥ 14 ॥
lakṣaṇojjvaladivyāṃgī lakṣakoṭyaṃḍanāyikā ।
lakṣyārthā lakṣaṇāgamyā labdhakāmā latātanuḥ ॥ 15 ॥
lalāmarājadalikā laṃbimuktālatāṃcitā ।
laṃbodaraprasūrlabhyā lajjāḍhyā layavarjitā ॥ 16 ॥
hrīṃkārarūpā hrīṃkāranilayā hrīṃpadapriyā ।
hrīṃkārabījā hrīṃkāramaṃtrā hrīṃkāralakṣaṇā ॥ 17 ॥
hrīṃkārajapasuprītā hrīṃmatī hrīṃvibhūṣaṇā ।
hrīṃśīlā hrīṃpadārādhyā hrīṃgarbhā hrīṃpadābhidhā ॥ 18 ॥
hrīṃkāravācyā hrīṃkārapūjyā hrīṃkārapīṭhikā ।
hrīṃkāravedyā hrīṃkāraciṃtyā hrīṃ hrīṃśarīriṇī ॥ 19 ॥
hakārarūpā haladhṛkpūjitā hariṇekṣaṇā ।
harapriyā harārādhyā haribrahmeṃdravaṃditā ॥ 20 ॥
hayārūḍhāsevitāṃghrirhayamedhasamarcitā ।
haryakṣavāhanā haṃsavāhanā hatadānavā ॥ 21 ॥
hatyādipāpaśamanī haridaśvādisevitā ।
hastikuṃbhottuṃgakucā hastikṛttipriyāṃganā ॥ 22 ॥
haridrākuṃkumādigdhā haryaśvādyamarārcitā ।
harikeśasakhī hādividyā hālāmadālasā ॥ 23 ॥
sakārarūpā sarvajñā sarveśī sarvamaṃgalā ।
sarvakartrī sarvabhartrī sarvahaṃtrī sanātanā ॥ 24 ॥
sarvānavadyā sarvāṃgasuṃdarī sarvasākṣiṇī ।
sarvātmikā sarvasaukhyadātrī sarvavimohinī ॥ 25 ॥
sarvādhārā sarvagatā sarvāvaguṇavarjitā ।
sarvāruṇā sarvamātā sarvabhūṣaṇabhūṣitā ॥ 26 ॥
kakārārthā kālahaṃtrī kāmeśī kāmitārthadā ।
kāmasaṃjīvanī kalyā kaṭhinastanamaṃḍalā ॥ 27 ॥
karabhorūḥ kalānāthamukhī kacajitāṃbudā ।
kaṭākṣasyaṃdikaruṇā kapāliprāṇanāyikā ॥ 28 ॥
kāruṇyavigrahā kāṃtā kāṃtidhūtajapāvaliḥ ।
kalālāpā kaṃbukaṃṭhī karanirjitapallavā ॥ 29 ॥
kalpavallīsamabhujā kastūrītilakāṃcitā ।
hakārārthā haṃsagatirhāṭakābharaṇojjvalā ॥ 30 ॥
hārahārikucābhogā hākinī halyavarjitā ।
haritpatisamārādhyā haṭhātkārahatāsurā ॥ 31 ॥
harṣapradā havirbhoktrī hārdasaṃtamasāpahā ।
hallīsalāsyasaṃtuṣṭā haṃsamaṃtrārtharūpiṇī ॥ 32 ॥
hānopādānanirmuktā harṣiṇī harisodarī ।
hāhāhūhūmukhastutyā hānivṛddhivivarjitā ॥ 33 ॥
hayyaṃgavīnahṛdayā harigopāruṇāṃśukā ।
lakārākhyā latāpūjyā layasthityudbhaveśvarī ॥ 34 ॥
lāsyadarśanasaṃtuṣṭā lābhālābhavivarjitā ।
laṃghyetarājñā lāvaṇyaśālinī laghusiddhidā ॥ 35 ॥
lākṣārasasavarṇābhā lakṣmaṇāgrajapūjitā ।
labhyetarā labdhabhaktisulabhā lāṃgalāyudhā ॥ 36 ॥
lagnacāmarahastaśrīśāradāparivījitā ।
lajjāpadasamārādhyā laṃpaṭā lakuleśvarī ॥ 37 ॥
labdhamānā labdharasā labdhasaṃpatsamunnatiḥ ।
hrīṃkāriṇī hrīṃkārādyā hrīṃmadhyā hrīṃśikhāmaṇiḥ ॥ 38 ॥
hrīṃkārakuṃḍāgniśikhā hrīṃkāraśaśicaṃdrikā ।
hrīṃkārabhāskararucirhrīṃkārāṃbhodacaṃcalā ॥ 39 ॥
hrīṃkārakaṃdāṃkurikā hrīṃkāraikaparāyaṇā ।
hrīṃkāradīrghikāhaṃsī hrīṃkārodyānakekinī ॥ 40 ॥
hrīṃkārāraṇyahariṇī hrīṃkārāvālavallarī ।
hrīṃkārapaṃjaraśukī hrīṃkārāṃgaṇadīpikā ॥ 41 ॥
hrīṃkārakaṃdarāsiṃhī hrīṃkārāṃbhojabhṛṃgikā ।
hrīṃkārasumanomādhvī hrīṃkāratarumaṃjarī ॥ 42 ॥
sakārākhyā samarasā sakalāgamasaṃstutā ।
sarvavedāṃtatātparyabhūmiḥ sadasadāśrayā ॥ 43 ॥
sakalā saccidānaṃdā sādhyā sadgatidāyinī ।
sanakādimunidhyeyā sadāśivakuṭuṃbinī ॥ 44 ॥
sakālādhiṣṭhānarūpā satyarūpā samākṛtiḥ ।
sarvaprapaṃcanirmātrī samanādhikavarjitā ॥ 45 ॥
sarvottuṃgā saṃgahīnā saguṇā sakaleṣṭadā ।
kakāriṇī kāvyalolā kāmeśvaramanoharā ॥ 46 ॥
kāmeśvaraprāṇanāḍī kāmeśotsaṃgavāsinī ।
kāmeśvarāliṃgitāṃgī kāmeśvarasukhapradā ॥ 47 ॥
kāmeśvarapraṇayinī kāmeśvaravilāsinī ।
kāmeśvaratapaḥsiddhiḥ kāmeśvaramanaḥpriyā ॥ 48 ॥
kāmeśvaraprāṇanāthā kāmeśvaravimohinī ।
kāmeśvarabrahmavidyā kāmeśvaragṛheśvarī ॥ 49 ॥
kāmeśvarāhlādakarī kāmeśvaramaheśvarī ।
kāmeśvarī kāmakoṭinilayā kāṃkṣitārthadā ॥ 50 ॥
lakāriṇī labdharūpā labdhadhīrlabdhavāṃchitā ।
labdhapāpamanodūrā labdhāhaṃkāradurgamā ॥ 51 ॥
labdhaśaktirlabdhadehā labdhaiśvaryasamunnatiḥ ।
labdhavṛddhirlabdhalīlā labdhayauvanaśālinī ॥ 52 ॥
labdhātiśayasarvāṃgasauṃdaryā labdhavibhramā ।
labdharāgā labdhapatirlabdhanānāgamasthitiḥ ॥ 53 ॥
labdhabhogā labdhasukhā labdhaharṣābhipūritā ।
hrīṃkāramūrtirhrīṃkārasaudhaśṛṃgakapotikā ॥ 54 ॥
hrīṃkāradugdhābdhisudhā hrīṃkārakamaleṃdirā ।
hrīṃkāramaṇidīpārcirhrīṃkārataruśārikā ॥ 55 ॥
hrīṃkārapeṭakamaṇirhrīṃkārādarśabiṃbitā ।
hrīṃkārakośāsilatā hrīṃkārāsthānanartakī ॥ 56 ॥
hrīṃkāraśuktikāmuktāmaṇirhrīṃkārabodhitā ।
hrīṃkāramayasauvarṇastaṃbhavidrumaputrikā ॥ 57 ॥
hrīṃkāravedopaniṣad hrīṃkārādhvaradakṣiṇā ।
hrīṃkāranaṃdanārāmanavakalpakavallarī ॥ 58 ॥
hrīṃkārahimavadgaṃgā hrīṃkārārṇavakaustubhā ।
hrīṃkāramaṃtrasarvasvā hrīṃkāraparasaukhyadā ॥ 59 ॥
॥ uttarapīṭhikā ॥
hayagrīva uvāca ।
ityevaṃ te mayākhyātaṃ devyā nāmaśatatrayam ।
rahasyātirahasyatvādgopanīyaṃ tvayā mune ॥ 1 ॥
śivavarṇāni nāmāni śrīdevyā kathitāni hi ।
śaktyakṣarāṇi nāmāni kāmeśakathitāni ca ॥ 2 ॥
ubhayākṣaranāmāni hyubhābhyāṃ kathitāni vai ।
tadanyairgrathitaṃ stotrametasya sadṛśaṃ kimu ॥ 3 ॥
nānena sadṛśaṃ stotraṃ śrīdevīprītidāyakam ।
lokatraye'pi kalyāṇaṃ saṃbhavennātra saṃśayaḥ ॥ 4 ॥
sūta uvāca ।
iti hayamukhagītaṃ stotrarājaṃ niśamya
pragalitakaluṣo'bhūccittaparyāptimetya ।
nijagurumatha natvā kuṃbhajanmā taduktaṃ
punaradhikarahasyaṃ jñātumevaṃ jagāda ॥ 5 ॥
agastya uvāca ।
aśvānana mahābhāga rahasyamapi me vada ।
śivavarṇāni kānyatra śaktivarṇāni kāni hi ॥ 6 ॥
ubhayorapi varṇāni kāni vā vada deśika ।
iti pṛṣṭaḥ kuṃbhajena hayagrīvo'vadatpunaḥ ॥ 7 ॥
hayagrīva uvāca ।
tava gopyaṃ kimastīha sākṣādaṃbānuśāsanāt ।
idaṃ tvatirahasyaṃ te vakṣyāmi śṛṇu kuṃbhaja ॥ 8 ॥
etadvijñānamātreṇa śrīvidyā siddhidā bhavet ।
katrayaṃ hadvayaṃ caiva śaivo bhāgaḥ prakīrtitaḥ ॥ 9 ॥
śaktyakṣarāṇi śeṣāṇi hrīṃkāra ubhayātmakaḥ ।
evaṃ vibhāgamajñātvā ye vidyājapaśālinaḥ ॥ 10 ॥
na teṣāṃ siddhidā vidyā kalpakoṭiśatairapi ।
caturbhiḥ śivacakraiśca śakticakraiśca paṃcabhiḥ ॥ 11 ॥
navacakraiśca saṃsiddhaṃ śrīcakraṃ śivayorvapuḥ ।
trikoṇamaṣṭakoṇaṃ ca daśakoṇadvayaṃ tathā ॥ 12 ॥
caturdaśāraṃ caitāni śakticakrāṇi paṃca ca ।
biṃduścāṣṭadalaṃ padmaṃ padmaṃ ṣoḍaśapatrakam ॥ 13 ॥
caturaśraṃ ca catvāri śivacakrāṇyanukramāt ।
trikoṇe baiṃdavaṃ śliṣṭaṃ aṣṭāre'ṣṭadalāṃbujam ॥ 14 ॥
daśārayoḥ ṣoḍaśāraṃ bhūgṛhaṃ bhuvanāśrake ।
śaivānāmapi śāktānāṃ cakrāṇāṃ ca parasparam ॥ 15 ॥
avinābhāvasaṃbaṃdhaṃ yo jānāti sa cakravit ।
trikoṇarūpiṇī śaktirbiṃdurūpaparaḥ śivaḥ ॥ 16 ॥
avinābhāvasaṃbaṃdhaṃ tasmādbiṃdutrikoṇayoḥ ।
evaṃ vibhāgamajñātvā śrīcakraṃ yaḥ samarcayet ॥ 17 ॥
na tatphalamavāpnoti lalitāṃbā na tuṣyati ।
ye ca jānaṃti loke'smin śrīvidyācakravedinaḥ ॥ 18 ॥
sāmanyavedinaḥ sarve viśeṣajño'tidurlabhaḥ ।
svayaṃvidyāviśeṣajño viśeṣajñaṃ samarcayet ॥ 19 ॥
tasmai deyaṃ tato grāhyamaśaktastasya dāpayet ।
aṃdhaṃ tamaḥ praviśaṃti ye'vidyāṃ samupāsate ॥ 20 ॥
iti śrutirapāhaitānavidyopāsakānpunaḥ ।
vidyānyopāsakāneva niṃdatyāruṇikī śrutiḥ ॥ 21 ॥
aśrutā saśrutāsaśca yajvāno ye'pyayajvanaḥ ।
svaryaṃto nāpekṣaṃte iṃdramagniṃ ca ye viduḥ ॥ 22 ॥
sikatā iva saṃyaṃti raśmibhiḥ samudīritāḥ ।
asmāllokādamuṣmāccetyāha cāraṇyakaśrutiḥ ॥ 23 ॥
yasya no paścimaṃ janma yadi vā śaṃkaraḥ svayam ।
tenaiva labhyate vidyā śrīmatpaṃcadaśākṣarī ॥ 24 ॥
iti maṃtreṣu bahudhā vidyāyā mahimocyate ।
mokṣaikahetuvidyā tu śrīvidyā nātra saṃśayaḥ ॥ 25 ॥
na śilpādijñānayukte vidvacchabdhaḥ prayujyate ।
mokṣaikahetuvidyā sā śrīvidyaiva na saṃśayaḥ ॥ 26 ॥
tasmādvidyāvidevātra vidvānvidvānitīryate ।
svayaṃ vidyāvide dadyātkhyāpayettadguṇānsudhīḥ ॥ 27 ॥
svayaṃvidyārahasyajño vidyāmāhātmyavedyapi ।
vidyāvidaṃ nārcayeccetko vā taṃ pūjayejjanaḥ ॥ 28 ॥
prasaṃgādidamuktaṃ te prakṛtaṃ śṛṇu kuṃbhaja ।
yaḥ kīrtayetsakṛdbhaktyā divyanāmaśatatrayam ॥ 29 ॥
tasya puṇyamahaṃ vakṣye śṛṇu tvaṃ kuṃbhasaṃbhava ।
rahasyanāmasāhasrapāṭhe yatphalamīritam ॥ 30 ॥
tatphalaṃ koṭiguṇitamekanāmajapādbhavet ।
kāmeśvarīkāmeśābhyāṃ kṛtaṃ nāmaśatatrayam ॥ 31 ॥
nānyena tulayedetat stotreṇānyakṛtena ca ।
śriyaḥ paraṃparā yasya bhāvi vā cottarottaram ॥ 32 ॥
tenaiva labhyate caitatpaścācchreyaḥ parīkṣayet ।
asyā nāmnāṃ triśatyāstu mahimā kena varṇyate ॥ 33 ॥
yā svayaṃ śivayorvaktrapadmābhyāṃ pariniḥsṛtā ।
nityaṃ ṣoḍaśasaṃkhyākānviprānādau tu bhojayet ॥ 34 ॥
abhyaktāṃstilatailena snātānuṣṇena vāriṇā ।
abhyarcya gaṃdhapuṣpādyaiḥ kāmeśvaryādināmabhiḥ ॥ 35 ॥
sūpāpūpaiḥ śarkarādyaiḥ pāyasaiḥ phalasaṃyutaiḥ ।
vidyāvido viśeṣeṇa bhojayetṣoḍaśa dvijān ॥ 36 ॥
evaṃ nityārcanaṃ kuryādādau brāhmaṇabhojanam ।
triśatīnāmabhiḥ paścādbrāhmaṇānkramaśo'rcayet ॥ 37 ॥
tailābhyaṃgādikaṃ datvā vibhave sati bhaktitaḥ ।
śuklapratipadārabhya paurṇamāsyavadhi kramāt ॥ 38 ॥
divase divase viprā bhojyā viṃśatisaṃkhyayā ।
daśabhiḥ paṃcabhirvāpi tribhirekena vā dinaiḥ ॥ 39 ॥
triṃśatṣaṣṭiḥ śataṃ viprāḥ saṃbhojyāstriśataṃ kramāt ।
evaṃ yaḥ kurute bhaktyā janmamadhye sakṛnnaraḥ ॥ 40 ॥
tasyaiva saphalaṃ janma muktistasya kare sthirā ।
rahasyanāmasāhasrabhojane'pyevameva hi ॥ 41 ॥
ādau nityabaliṃ kuryātpaścādbrāhmaṇabhojanam ।
rahasyanāmasāhasramahimā yo mayoditaḥ ॥ 42 ॥
sa śīkarāṇuratnaikanāmno mahimavāridheḥ ।
vāgdevīracite nāmasāhasre yadyadīritam ॥ 43 ॥
tatphalaṃ koṭiguṇitaṃ nāmno'pyekasya kīrtanāt ।
etadanyairjapaiḥ stotrairarcanairyatphalaṃ bhavet ॥ 44 ॥
tatphalaṃ koṭiguṇitaṃ bhavennāmaśatatrayāt ।
vāgdevīracite stotre tādṛśo mahimā yadi ॥ 45 ॥
sākṣātkāmeśakāmeśīkṛte'smingṛhyatāmiti ।
sakṛtsaṃkīrtanādeva nāmnāmasmin śatatraye ॥ 46 ॥
bhaveccittasya paryāptirnyūnamanyānapekṣiṇī ।
na jñātavyamito'pyanyatra japtavyaṃ ca kuṃbhaja ॥ 47 ॥
yadyatsādhyatamaṃ kāryaṃ tattadarthamidaṃ japet ।
tattatphalamavāpnoti paścātkāryaṃ parīkṣayet ॥ 48 ॥
ye ye prayogāstaṃtreṣu taistairyatsādhyate phalam ।
tatsarvaṃ sidhyati kṣipraṃ nāmatriśatakīrtanāt ॥ 49 ॥
āyuṣkaraṃ puṣṭikaraṃ putradaṃ vaśyakārakam ।
vidyāpradaṃ kīrtikaraṃ sukavitvapradāyakam ॥ 50 ॥
sarvasaṃpatpradaṃ sarvabhogadaṃ sarvasaukhyadam ।
sarvābhīṣṭapradaṃ caiva devyā nāmaśatatrayam ॥ 51 ॥
etajjapaparo bhūyānnānyadicchetkadācana ।
etatkīrtanasaṃtuṣṭā śrīdevī lalitāṃbikā ॥ 52 ॥
bhaktasya yadyadiṣṭaṃ syāttattatpūrayate dhruvam ।
tasmātkuṃbhodbhava mune kīrtaya tvamidaṃ sadā ॥ 53 ॥
nāparaṃ kiṃcidapi te boddhavyamavaśiṣyate ।
iti te kathitaṃ stotraṃ lalitāprītidāyakam ॥ 54 ॥
nāvidyāvedine brūyānnābhaktāya kadācana ।
na śaṭhāya na duṣṭāya nāviśvāsāya karhicit ॥ 56 ॥
yo brūyāttriśatīṃ nāmnāṃ tasyānartho mahānbhavet ।
ityājñā śāṃkarī proktā tasmādgopyamidaṃ tvayā ॥ 57 ॥
lalitāpreritenaiva mayoktaṃ stotramuttamam ।
rahasyanāmasāhasrādapi gopyamidaṃ mune ॥ 58 ॥
sūta uvāca ।
evamuktvā hayagrīvaḥ kuṃbhajaṃ tāpasottamam ।
stotreṇānena lalitāṃ stutvā tripurasuṃdarīm ।
ānaṃdalaharīmagnamānasaḥ samavartata ॥ 59 ॥
iti śrī lalitā triśatī stotraratnam ।
Recite with devotion and pure heart
Regular practice brings spiritual benefits