Sri Lalitha Stavaratnam

vandē gajēndravadanaṃ vāmāṅkārūḍhavallabhāśliṣṭam । kuṅkumaparāgaśōṇaṃ kuvalayinījārakōrakāpīḍam ॥ 1 ॥ sa jayati suvarṇaśailaḥ sakalajagachchakrasaṅghaṭitamūrtiḥ । kāñchananikuñjavāṭī- -kandaladamarīprapañchasaṅgītaḥ ॥ 2 ॥ harihayanairṛtamāruta- -haritāmantēṣvavasthitaṃ tasya । vinumaḥ sānutritayaṃ vidhiharigaurīśaviṣṭapādhāram ॥ 3 ॥ madhyē punarmanōhara- -ratnaruchistabakarañjitadigantam । upari chatuḥśatayōjana- -muttuṅgaṃ śṛṅgapuṅgavamupāsē ॥ 4 ॥ tatra chatuḥśatayōjana- -pariṇāhaṃ dēvaśilpinā rachitam । nānāsālamanōjñaṃ namāmyahaṃ nagaramādividyāyāḥ ॥ 5 ॥ prathamaṃ sahasrapūrvaka- -ṣaṭśatasaṅkhyākayōjanaṃ paritaḥ । valayīkṛtasvagātraṃ varaṇaṃ śaraṇaṃ vrajāmyayōrūpam ॥ 6 ॥ tasyōttarē samīraṇa- -yōjanadūrē taraṅgitachChāyaḥ । ghaṭayatu mudaṃ dvitīyō ghaṇṭāstanasāranirmitaḥ sālaḥ ॥ 7 ॥ ubhayōrantarasīma- -nyuddāmabhramararañjitōdāram । upavanamupāsmahē vaya- -mūrīkṛtamandamārutasyandam ॥ 8 ॥ āliṅgya bhadrakālī- -māsīnastatra hariśilāśyāmām । manasi mahākālō mē viharatu madhupānavibhramannētraḥ ॥ 9 ॥ tārtīyīkō varaṇa- -stasyōttarasīmni vātayōjanataḥ । tāmrēṇa rachitamūrti- -stanutāmāchandratārakaṃ bhadram ॥ 10 ॥ madhyē tayōścha maṇimaya- -pallavaśākhāprasūnapakṣmalitām । kalpānōkahavāṭīṃ kalayē makarandapaṅkilāvālām ॥ 11 ॥ tatra madhumādhavaśrī- -taruṇībhyāṃ taraladṛkchakōrābhyām । āliṅgitō'vatānmā- -maniśaṃ prathamarturāttapuṣpāstraḥ ॥ 12 ॥ namata taduttarabhāgē nākipathōllaṅghiśṛṅgasaṅghātam । sīsākṛtiṃ turīyaṃ sitakiraṇālōkanirmalaṃ sālam ॥ 13 ॥ sāladvayāntarālē saralālikapōtachāṭusubhagāyām । santānavāṭikāyāṃ saktaṃ chētō'stu satatamasmākam ॥ 14 ॥ tatra tapanātirūkṣaḥ sāmrājñīcharaṇasāndritasvāntaḥ । śukraśuchiśrīsahitō grīṣmarturdiśatu kīrtimākalpam ॥ 15 ॥ uttarasīmani tasyō- -nnataśikharōtkampihāṭakapatākaḥ । prakaṭayatu pañchamō naḥ prākāraḥ kuśalamārakūṭamayaḥ ॥ 16 ॥ prākārayōścha madhyē pallavitānyabhṛtapañchamōnmēṣā । harichandanadruvāṭī- -haratādāmūlamasmadanutāpam ॥ 17 ॥ tatra nabhaḥ śrīmukhyai- -staruṇīvargaiḥ samanvitaḥ paritaḥ । vajrāṭṭahāsamukharō vāñChāpūrtiṃ tanōtu varṣartuḥ ॥ 18 ॥ mārutayōjanadūrē mahanīyastasya chōttarē bhāgē । bhadraṃ kṛṣīṣṭa ṣaṣṭhaḥ prākāraḥ pañchalōhadhātumayaḥ ॥ 19 ॥ anayōrmadhyē santata- -maṅkūraddivyakusumagandhāyām । mandāravāṭikāyāṃ mānasamaṅgīkarōtu mē vihṛtim ॥ 20 ॥ tasyāmiṣōrjalakṣmī- -taruṇībhyāṃ śaradṛtuḥ sadā sahitaḥ । abhyarchayan sa jīyā- -dambāmāmōdamēduraiḥ kusumaiḥ ॥ 21 ॥ tasyarṣisaṅkhyayōjana- -dūrē dēdīpyamānaśṛṅgaughaḥ । kaladhautakalitamūrtiḥ kalyāṇaṃ diśatu saptamaḥ sālaḥ ॥ 22 ॥ madhyē tayōrmarutpatha laṅghitaviṭapāgravirutakalakaṇṭhā । śrīpārijātavāṭī śriyamaniśaṃ diśatu śītalōddēśā ॥ 23 ॥ tasyāmatipriyābhyāṃ saha khēlan sahasahasyalakṣmībhyām । sāmantō jhaṣakētō- -rhēmantō bhavatu hēmavṛddhyai naḥ ॥ 24 ॥ uttaratastasya mahā- -nudbhaṭahutabhukśikhāruṇamayūkhaḥ । tapanīyakhaṇḍarachita- -stanutādāyuṣyamaṣṭamō varaṇaḥ ॥ 25 ॥ kādambavipinavāṭī- -manayōrmadhyabhuvi kalpitāvāsām । kalayāmi sūnakōraka- -kandalitāmōdatundilasamīrām ॥ 26 ॥ tasyāmatiśiśirākṛti- -rāsīnastapatapasyalakṣmībhyām । śivamaniśaṃ kurutānmē śiśirartuḥ satataśītaladigantaḥ ॥ 27 ॥ tasyāṃ kadambavāṭyāṃ tatprasavāmōdamilitamadhugandham । saptāvaraṇamanōjñaṃ śaraṇaṃ samupaimi mantriṇīśaraṇam ॥ 28 ॥ tatrālayē viśālē tapanīyārachitataralasōpānē । māṇikyamaṇḍapānta- -rmahitē siṃhāsanē sumaṇikhachitē ॥ 29 ॥ bindutripañchakōṇa- -dvipanṛpavasuvēdadalakurēkhāḍhyē । chakrē sadā niviṣṭāṃ ṣaṣṭhyaṣṭatriṃśadakṣarēśānīm ॥ 30 ॥ tāpiñChamēchakābhāṃ tālīdalaghaṭitakarṇatāṭaṅkām । tāmbūlapūritamukhīṃ tāmrādharabimbadṛṣṭadarahāsām ॥ 31 ॥ kuṅkumapaṅkiladēhāṃ kuvalayajīvātuśāvakavataṃsām । kōkanadaśōṇacharaṇāṃ kōkilanikvāṇakōmalālāpām ॥ 32 ॥ vāmāṅgagalitachūlīṃ vanamālyakadambamālikābharaṇām । muktālalantikāñchita mugdhālikamilitachitrakōdārām ॥ 33 ॥ karavidhṛtakīraśāvaka- -kalaninadavyaktanikhilanigamārthām । vāmakuchasaṅgivīṇāvādana- -saukhyārdhamīlitākṣiyugām ॥ 34 ॥ āpāṭalāṃśukadharā- -mādirasōnmēṣavāsitakaṭākṣām । āmnāyasāragulikā- -mādyāṃ saṅgītamātṛkāṃ vandē ॥ 35 ॥ tasya cha suvarṇasāla- -syōttaratastaruṇakuṅkumachChāyaḥ । śamayatu mama santāpaṃ sālō navamaḥ sa puṣparāgamayaḥ ॥ 36 ॥ anayōrantaravasudhāḥ praṇumaḥ pratyagrapuṣparāgamayīḥ । siṃhāsanēśvarīmanu- -chintananistandrasiddhanīrandhrāḥ ॥ 37 ॥ tatsālōttaradēśē taruṇajapākiraṇadhōraṇīśōṇaḥ । praśamayatu padmarāga- -prākārō mama parābhavaṃ daśamaḥ ॥ 38 ॥ antarabhūkṛtavāsā- -nanayōrapanītachittavaimatyān । chakrēśīpadabhaktāṃ- -śchāraṇavargānaharniśaṃ kalayē ॥ 39 ॥ sāraṅgavāhayōjanadūrē- -'saṅghaṭitakētanastasya । gōmēdakēna rachitō gōpāyatu māṃ samunnataḥ sālaḥ ॥ 40 ॥ vapradvayāntarōrvyāṃ vaṭukairvividhaiścha yōginībṛndaiḥ । satataṃ samarchitāyāḥ saṅkarṣaṇyāḥ praṇaumi charaṇābjam ॥ 41 ॥ tāpasayōjanadūrē tasya samuttuṅga gōpurōpētaḥ । vāñChāpūrtyai bhavatā- -dvajramaṇīnikaranirmitō vapraḥ ॥ 42 ॥ varaṇadvitayāntaratō vāsajuṣō vihitamadhurasāsvādāḥ । rambhādivibudhavēśyā rachayantu mahāntamasmadānandam ॥ 43 ॥ tatra sadā pravahantī taṭinī vajrābhidhā chiraṃ jīyāt । chaṭulōrmijālanṛtya- -tkalahaṃsīkulakalakvaṇitapuṣṭā ॥ 44 ॥ rōdhasi tasyā ruchirē vajrēśī jayati vajrabhūṣāḍhyā । vajrapradānatōṣita- -vajrimukhatridaśavinutachāritrā ॥ 45 ॥ tasyōdīchyāṃ hariti stavakitasuṣamāvalīḍhaviyadantaḥ । vaiḍūryaratnarachitō vaimalyaṃ diśatu chētasō varaṇaḥ ॥ 46 ॥ adhimadhyamētayōḥ puna- -rambācharaṇāvalambitasvāntān । kārkōṭakādināgān kalayāmaḥ kiṃ cha balimukhān danujān ॥ 47 ॥ gandhavahasaṅkhyayōjana- -dūrē gaganōrdhvajāṅghikastasya । vāsavamaṇipraṇītō varaṇō bahalayatu vaiduṣīṃ viśadām ॥ 48 ॥ madhyakṣōṇyāmanayō- -rmahēndranīlātmakāni cha sarāṃsi । śātōdarīsahāyā- -nbhūpālānapi punaḥ punaḥ praṇumaḥ ॥ 49 ॥ āśugayōjanadūrē tasyōrdhvaṃ kāntidhavalitadigantaḥ । muktāvirachitagātrō muhurasmākaṃ mudē bhavatu sālaḥ ॥ 50 ॥ āvṛttyōradhimadhyaṃ pūrvasyāṃ diśi purandaraḥ śrīmān । abhramuviṭādhirūḍhō vibhramamasmākamaniśamātanutāt ॥ 51 ॥ tatkōṇē vyajanasru- -ktōmarapātrasruvānnaśaktidharaḥ । svāhāsvadhāsamētaḥ sukhayatu māṃ havyavāhanaḥ suchiram ॥ 52 ॥ dakṣiṇadigantarālē daṇḍadharō nīlanīradachChāyaḥ । tripurāpadābjabhaktastirayatu mama nikhilamaṃhasāṃ nikaram ॥ 53 ॥ tasyaiva paśchimāyāṃ diśi dalitēndīvaraprabhāśyāmaḥ । khēṭāsiyaṣṭidhārī khēdānapanayatu yātudhānō mē ॥ 54 ॥ tasyā uttaradēśē dhavalāṅgō vipulajhaṣavarārūḍhaḥ । pāśāyudhāttapāṇiḥ pāśī vidalayatu pāśajālāni ॥ 55 ॥ vandē taduttarahari- -tkōṇē vāyuṃ chamūruvaravāham । kōrakitatattvabōdhā- -ngōrakṣapramukhayōginō'pi muhuḥ ॥ 56 ॥ taruṇīriḍāpradhānā- -stisrō vātasya tasya kṛtavāsāḥ । pratyagrakāpiśāyana- -pānaparibhrāntalōchanāḥ kalayē ॥ 57 ॥ tallōkapūrvabhāgē dhanadaṃ dhyāyāmi śēvadhikulēśam । api māṇibhadramukhyā- -nambācharaṇāvalambinō yakṣān ॥ 58 ॥ tasyaiva pūrvasīmani tapanīyārachitagōpurē nagarē । kātyāyanīsahāyaṃ kalayē śītāṃśukhaṇḍachūḍālam ॥ 59 ॥ tatpuraṣōḍaśavaraṇa- -sthalabhājastaruṇachandrachūḍālān । rudrādhyāyē paṭhitā- -nrudrāṇīsahacharānbhajē rudrān ॥ 60 ॥ pavamānasaṅkhyayōjana- -dūrē bālatṛṇmēchakastasya । sālō marakatarachitaḥ sampadamachalāṃ śriyaṃ cha puṣṇātu ॥ 61 ॥ āvṛtiyugmāntaratō haritamaṇīnivahamēchakē dēśē । hāṭakatālīvipinaṃ hālāghaṭaghaṭitaviṭapamākalayē ॥ 62 ॥ tatraiva mantriṇīgṛha- -pariṇāhaṃ taralakētanaṃ sadanam । marakatasaudhamanōjñaṃ dadyādāyūṃṣi daṇḍanāthāyāḥ ॥ 63 ॥ sadanē tatra harinmaṇi- -saṅghaṭitē maṇḍapē śatastambhē । kārtasvaramayapīṭhē kanakamayāmburuhakarṇikāmadhyē ॥ 64 ॥ bindutrikōṇavartula- -ṣaḍasravṛttadvayānvitē chakrē । sañchāriṇī daśōttara- śatārṇamanurājakamalakalahaṃsī ॥ 65 ॥ kōlavadanā kuśēśaya- -nayanā kōkārimaṇḍitaśikhaṇḍā । santaptakāñchanābhā sandhyāruṇachēlasaṃvṛtanitambā ॥ 66 ॥ halamusalaśaṅkhachakrā- -'ṅkuśapāśābhayavarasphuritahastā । kūlaṅkaṣānukampā kuṅkumajambālitastanābhōgā ॥ 67 ॥ dhūrtānāmatidūrā- -vārtāśēṣāvalagnakamanīyā । ārtālīśubhadātrī vārtālī bhavatu vāñChitārthāya ॥ 68 ॥ tasyāḥ paritō dēvīḥ svapnēśyunmattabhairavīmukhyāḥ । praṇamata jambhinyādyāḥ bhairavavargāṃścha hētukapramukhān ॥ 69 ॥ pūrvōktasaṅkhyayōjana- -dūrē pūyāṃśupāṭalastasya । vidrāvayatu madārtiṃ vidrumasālō viśaṅkaṭadvāraḥ ॥ 70 ॥ āvaraṇayōraharniśa- -mantarabhūmauprakāśaśālinyām । āsīnamambujāsana- -mabhinavasindūragauramahamīḍē ॥ 71 ॥ varaṇasya tasya māruta- -yōjanatō vipulagōpuradvāraḥ । sālō nānāratnaiḥ saṅghaṭitāṅgaḥ kṛṣīṣṭa madabhīṣṭam ॥ 72 ॥ antarakakṣyāmanayō- -raviralaśōbhāpichaṇḍilōddēśām । māṇikyamaṇḍapākhyāṃ mahatīmadhihṛdayamaniśamākalayē ॥ 73 ॥ tatra sthitaṃ prasannaṃ taruṇatamālapravālakiraṇābham । karṇāvalambikuṇḍala- -kandalitābhīśukavachitakapōlam ॥ 74 ॥ śōṇādharaṃ śuchismita- -mēṇāṅkavadanamēdhamānakṛpam । mugdhaiṇamadaviśēṣaka- -mudritaniṭilēndurēkhikāruchiram ॥ 75 ॥ nālīkadalasahōdara- -nayanāñchalaghaṭitamanasijākūtam । kamalākaṭhinapayōdhara- -kastūrīghusṛṇapaṅkilōraskam ॥ 76 ॥ chāmpēyagandhikaiśyaṃ śampāsabrahmachārikauśēyam । śrīvatsakaustubhadharaṃ śritajanarakṣādhurīṇacharaṇābjam ॥ 77 ॥ kambusudarśanavilasa- -tkarapadmaṃ kaṇṭhalōlavanamālam । muchukundamōkṣaphaladaṃ mukundamānandakandamavalambē ॥ 78 ॥ tadvaraṇōttarabhāgē tārāpatibimbachumbinijaśṛṅgaḥ । vividhamaṇīgaṇaghaṭitō vitaratu sālō vinirmalāṃ dhiṣaṇām ॥ 79 ॥ prākāradvitayāntara- -kakṣyāṃ pṛthuratnanikarasaṅkīrṇām । namata sahasrastambhaka- -maṇḍapanāmnātiviśrutāṃ bhuvanē ॥ 80 ॥ praṇumastatra bhavānī- -sahacharamīśānamindukhaṇḍadharam । śṛṅgāranāyikāmanu- -śīlanabhājō'pi bhṛṅginandimukhān ॥ 81 ॥ tasyaiṇavāhayōjana- -dūrē vandē manōmayaṃ vapram । aṅkūranmaṇikiraṇā- -mantarakakṣyāṃ cha nirmalāmanayōḥ ॥ 82 ॥ tatraivāmṛtavāpīṃ taralataraṅgāvalīḍhataṭayugmām । muktāmayakalahaṃsī- -mudritakanakāravindasandōhām ॥ 83 ॥ śakrōpalamayabhṛṅgī- -saṅgītōnmēṣaghōṣitadigantām । kāñchanamayāṅgavilasa- -tkāraṇḍavaṣaṇḍatāṇḍavamanōjñām ॥ 84 ॥ kuruvindātmakahallaka- -kōrakasuṣamāsamūhapāṭalitām । kalayē sudhāsvarūpāṃ kandalitāmandakairavāmōdām ॥ 85 ॥ tadvāpikāntarālē taralē maṇipōtasīmni viharantīm । sindūrapāṭalāṅgīṃ sitakiraṇāṅkūrakalpitavataṃsām ॥ 86 ॥ parvēndubimbavadanāṃ pallavaśōṇādharasphuritahāsām । kuṭilakabarīṃ kuraṅgī- -śiśunayanāṃ kuṇḍalasphuritagaṇḍām ॥ 87 ॥ nikaṭasthapōtanilayāḥ śaktīḥ śayavidhṛtahēmaśṛṅgajalaiḥ । pariṣiñchantīṃ parita- -stārāṃ tāruṇyagarvitāṃ vandē ॥ 88 ॥ prāguktasaṅkhyayōjanadūrē praṇamāmi buddhimayasālam । anayōrantarakakṣyā- -maṣṭāpadapuṣṭamēdinīṃ ruchirām ॥ 89 ॥ kādambarīnidhānāṃ kalayāmyānandavāpikāṃ tasyām । śōṇāśmanivahanirmita- -sōpānaśrēṇiśōbhamānataṭīm ॥ 90 ॥ māṇikyataraṇinilayāṃ madhyē tasyā madāruṇakapōlām । amṛtēśītyabhidhānā- -mantaḥ kalayāmi vāruṇīṃ dēvīm ॥ 91 ॥ sauvarṇakēnipātana- -hastāḥ saundaryagarvitā dēvyaḥ । tatpurataḥ sthitibhājō vitarantvasmākamāyuṣō vṛddhim ॥ 92 ॥ tasya pṛṣadaśvayōjana- -dūrē'haṅkārasālamatituṅgam । vandē tayōścha madhyē kakṣyāṃ valamānamalayapavamānām ॥ 93 ॥ vinumō vimarśavāpīṃ sauṣumnasudhāsvarūpiṇīṃ tatra । vēlātilaṅghyavīchī- -kōlāhalabharitakūlavanavāṭīm ॥ 94 ॥ tatraiva salilamadhyē tāpiñChadalaprapañchasuṣamābhām । śyāmalakañchukalasitāṃ śyāmāviṭabimbaḍambaraharāsyām ॥ 95 ॥ ābhugnamasṛṇachillī- -hasitāyugmaśarakārmukavilāsām । mandasmitāñchitamukhīṃ maṇimayatāṭaṅkamaṇḍitakapōlām ॥ 96 ॥ kuruvindataraṇinilayāṃ kulāchalaspardhikuchanamanmadhyām । kuṅkumaviliptagātrīṃ kurukullāṃ manasi kurmahē satatam ॥ 97 ॥ tatsālōttarabhāgē bhānumayaṃ vapramāśrayē dīptam । madhyaṃ cha vipulamanayō- -rmanyē viśrāntamātapōdgāram ॥ 98 ॥ tatra kuruvindapīṭhē tāmarasē kanakakarṇikāghaṭitē । āsīnamaruṇavāsasa- -mamlānaprasavamālikābharaṇam ॥ 99 ॥ chakṣuṣmatīprakāśana- -śaktichChāyāsamārachitakēlim । māṇikyamukuṭaramyaṃ manyē mārtāṇḍabhairavaṃ hṛdayē ॥ 100 ॥ indumayasālamīḍē tasyōttaratastuṣāragirigauram । atyantaśiśiramāruta- -manayōrmadhyaṃ cha chandrikōdgāram ॥ 101 ॥ tatra prakāśamānaṃ tārānikaraiḥ pariṣkṛtōddēśam । amṛtamayakāntikandala- -mantaḥ kalayāmi kundasitamindum ॥ 102 ॥ śṛṅgārasālamīḍē śṛṅgōllasitaṃ taduttarē bhāgē । madhyasthalē tayōrapi mahitāṃ śṛṅgārapūrvikāṃ parikhām ॥ 103 ॥ tatra maṇinausthitābhi- -stapanīyāvirachitāgrahastābhiḥ । śṛṅgāradēvatābhiḥ sahitaṃ parikhādhipaṃ bhajē madanam ॥ 104 ॥ śṛṅgāravaraṇavaryasyōttarataḥ sakalavibudhasaṃsēvyam । chintāmaṇigaṇarachitaṃ chintāṃ dūrīkarōtu mē sadanam ॥ 105 ॥ maṇisadanasālayōradhi- -madhyaṃ daśatālabhūmiruhadīrghaiḥ । parṇaiḥ suvarṇavarṇai- -ryuktāṃ kāṇḍaiścha yōjanōttuṅgaiḥ ॥ 106 ॥ mṛdulaistālīpañchaka- -mānairmilitāṃ cha kēsarakadambaiḥ । santatagalitamaranda- -srōtōniryanmilindasandōhām ॥ 107 ॥ pāṭīrapavanabālaka- -dhāṭīniryatparāgapiñjaritām । kalahaṃsīkulakalakala- -kūlaṅkaṣaninadanichayakamanīyām ॥ 108 ॥ padmāṭavīṃ bhajāmaḥ parimalakallōlapakṣmalōpāntām । [ dēvyarghyapātradhārī tasyāḥ pūrvadiśi daśakalāyuktaḥ । ] valayitamūrtirbhagavā- -nvahniḥ krōśōnnataśchiraṃ pāyāt ॥ 109 ॥ tatrādhārē dēvyāḥ pātrīrūpaḥ prabhākaraḥ śrīmān । dvādaśakalāsamētō dhvāntaṃ mama bahulamāntaraṃ bhindyāt ॥ 110 ॥ tasmin dinēśapātrē taraṅgitāmōdamamṛtamayamarghyam । chandrakalātmakamamṛtaṃ sāndrīkuryādamandamānandam ॥ 111 ॥ amṛtē tasminnabhitō viharantyō vividhamaṇitaraṇibhājaḥ । ṣōḍaśa kalāḥ sudhāṃśōḥ śōkāduttārayantu māmaniśam ॥ 112 ॥ tatraiva vihṛtibhājō dhātṛmukhānāṃ cha kāraṇēśānām । sṛṣṭyādirūpikāstāḥ śamayantvakhilāḥ kalāścha santāpam ॥ 113 ॥ kīnāśavaruṇakinnara- -rājadigantēṣu ratnagēhasya । kalayāmi tānyajasraṃ kalayantvāyuṣyamarghyapātrāṇi ॥ 114 ॥ pātrasthalasya purataḥ padmāramaṇavidhipārvatīśānām । bhavanāni śarmaṇē nō bhavantu bhāsā pradīpitajaganti ॥ 115 ॥ sadanasyānalakōṇē satataṃ praṇamāmi kuṇḍamāgnēyam । tatra sthitaṃ cha vahniṃ taralaśikhājaṭilamambikājanakam ॥ 116 ॥ tasyāsuradiśi tādṛśa- -ratnaparisphuritaparvanavakāḍhyam । chakrātmakaṃ śatāṅgaṃ śatayōjanamunnataṃ bhajē divyam ॥ 117 ॥ tatraiva diśi niṣaṇṇaṃ tapanīyadhvajaparamparāśliṣṭam । rathamaparaṃ cha bhavānyā rachayāmō manasi ratnamayachūḍam ॥ 118 ॥ bhavanasya vāyubhāgē pariṣkṛtō vividhavaijayantībhiḥ । rachayatu mudaṃ rathēndraḥ sachivēśānyāḥ samastavandyāyāḥ ॥ 119 ॥ kurmō'dhihṛdayamaniśaṃ krōḍāsyāyāḥ śatāṅgamūrdhanyam । rudradiśi ratnadhāmnō ruchiraśalākāprapañchakañchukitam ॥ 120 ॥ paritō dēvīdhāmnaḥ praṇītavāsā manusvarūpiṇyaḥ । kurvantu raśmimālā- -kṛtayaḥ kuśalāni dēvatā nikhilāḥ ॥ 121 ॥ prāgdvārasya bhavānī- -dhāmnaḥ pārśvadvayārachitavāsē । mātaṅgīkiṭimukhyau maṇisadanē manasi bhāvayāmi chiram ॥ 122 ॥ yōjanayugalābhōgā tatkrōśapariṇāhayaiva bhittyā cha । chintāmaṇigṛhabhūmi- -rjīyādāmnāyamayachaturdvārā ॥ 123 ॥ dvārē dvārē dhāmnaḥ piṇḍībhūtā navīnabimbābhāḥ । vidadhatu vipulāṃ kīrtiṃ divyā lauhityasiddhyō dēvyaḥ ॥ 124 ॥ maṇisadanasyāntaratō mahanīyē ratnavēdikāmadhyē । bindumayachakramīḍē pīṭhānāmupari virachitāvāsam ॥ 125 ॥ chakrāṇāṃ sakalānāṃ prathamamadhaḥ sīmaphalakavāstavyāḥ । aṇimādisiddhayō mā- -mavantu dēvī prabhāsvarūpiṇyaḥ ॥ 126 ॥ aṇimādisiddhiphalaka- -syōparihariṇāṅkakhaṇḍakṛtachūḍāḥ । bhadraṃ pakṣmalayantu brāhmīpramukhāścha mātarō'smākam ॥ 127 ॥ tasyōpari maṇiphalakē tāruṇyōttuṅgapīnakuchabhārāḥ । saṅkṣōbhiṇīpradhānāḥ bhrānti vidrāvayantu daśa mudrāḥ ॥ 128 ॥ phalakatrayasvarūpē pṛthulē trailōkyamōhanē chakrē । dīvyantu prakaṭākhyā- -stāsāṃ kartrīṃ cha bhagavatī tripurā ॥ 129 ॥ tadupari vipulē dhiṣṇyē taraladṛśastaruṇakōkanadabhāsaḥ । kāmākarṣiṇyādyāḥ kalayē dēvīḥ kalādharaśikhaṇḍāḥ ॥ 130 ॥ sarvāśāparipūrakachakrē- -'smin guptayōginīsēvyāḥ । tripurēśī mama duritaṃ tudyāt kaṇṭhāvalambimaṇihārā ॥ 131 ॥ tasyōpari maṇipīṭhē tāmrāmbhōruhadalaprabhāśōṇāḥ । dhyāyāmyanaṅgakusumā- -pramukhā dēvīścha vidhṛtakūrpāsāḥ ॥ 132 ॥ saṅkṣōbhakārakē'smiṃ- -śchakrē śrītripurasundarī sākṣāt । gōptrī guptatarākhyāḥ gōpāyatu māṃ kṛpārdrayā dṛṣṭyā ॥ 133 ॥ saṅkṣōbhiṇīpradhānāḥ śaktīstasyōrdhvavalayakṛtavāsāḥ । ālōlanīlavēṇī- -rantaḥ kalayāmi yauvanōnmattāḥ ॥ 134 ॥ saubhāgyadāyakē'smiṃ- -śchakrēśī tripuravāsinī jīyāt । śaktīścha sampradāyābhidhāḥ samastāḥ pramōdayantvaniśam ॥ 135 ॥ maṇipīṭhōpari tāsāṃ mahati chaturhastavistṛtē valayē । santatavirachitavāsāḥ śaktīḥ kalayāmi sarvasiddhimukhāḥ ॥ 136 ॥ sarvārthasādhakākhyē chakrē'muṣmin samastaphaladātrī । tripurā śrīrmama kuśalaṃ diśatāduttīrṇayōginīsēvyā ॥ 137 ॥ tāsāṃ nilayasyōpari dhiṣṇyē kausumbhakañchukamanōjñāḥ । sarvājñādyāḥ dēvyaḥ sakalāḥ sampādayantu mama kīrtim ॥ 138 ॥ chakrē samastarakṣā- -karanāmnyasmin samastajanasēvyām । manasi nigarbhāsahitāṃ manyē śrītripuramālinīṃ dēvīm ॥ 139 ॥ sarvajñāsadanasyōpari chakrē vipulē samākalitagēhāḥ । vandē vaśinīmukhyāḥ śaktīḥ sindūrarēṇuruchaḥ ॥ 140 ॥ śrīsarvarōgaharākhya- -chakrē'smiṃstripurapūrvikāṃ siddhām । vandē rahasyanāmnā vēdyābhiḥ śaktibhiḥ sadā sēvyām ॥ 141 ॥ vaśinīgṛhōpariṣṭā- -dviṃśatihastōnnatē mahāpīṭhē । śamayantu śatrubṛndaṃ śastrāṇyastrāṇi chādidampatyōḥ ॥ 142 ॥ śastrasadanōpariṣṭā- -dvalayē valavairiratnasaṅghaṭitē । kāmēśvarīpradhānāḥ kalayē dēvīḥ samastajanavandyāḥ ॥ 143 ॥ chakrē'tra sarvasiddhiprada- -nāmani sarvaphaladātrī । tripurāmbāvatu satataṃ parāpararahasyayōginīsēvyā ॥ 144 ॥ kāmēśvarīgṛhōparivalayē vividhamanusampradāyajñāḥ । chatvārō yuganāthā jayantu mitrēśapūrvakāḥ guravaḥ ॥ 145 ॥ nāthabhavanōpariṣṭā- -nnānāratnachayamēdurē pīṭhē । kāmēśyādyā nityāḥ kalayantu mudaṃ tithisvarūpiṇyaḥ ॥ 146 ॥ nityāsadanasyōpari nirmalamaṇinivahavirachitē dhiṣṇyē । kuśalaṃ ṣaḍaṅgadēvyaḥ kalayantvasmākamuttaralanētrāḥ ॥ 147 ॥ sadanasyōpari tāsāṃ sarvānandamayanāmakē bindau । pañchabrahmākārāṃ mañchaṃ praṇamāmi maṇigaṇākīrṇam ॥ 148 ॥ paritō maṇimañchasya pralambamānā niyantritā pāśaiḥ । māyāmayī javanikā mama duritaṃ haratu mēchakachChāyā ॥ 149 ॥ mañchasyōpari lamba- -nmadanīpunnāgamālikābharitam । harigōpamayavitānaṃ haratādālasyamaniśamasmākam ॥ 150 ॥ paryaṅkasya bhajāmaḥ pādānbimbāmbudēnduhēmaruchaḥ । ajaharirudrēśamayā- -nanalāsuramārutēśakōṇasthān ॥ 151 ॥ phalakaṃ sadāśivamayaṃ praṇaumi sindūrarēṇukiraṇābham । ārabhyāṅgēśīnāṃ sadanātkalitaṃ cha ratnasōpānam ॥ 152 ॥ paṭṭōpadhānagaṇḍaka- -chatuṣṭayasphuritapāṭalāstaraṇam । paryaṅkōpari ghaṭitaṃ pātu chiraṃ haṃsatūlaśayanaṃ naḥ ॥ 153 ॥ tasyōpari nivasantaṃ tāruṇyaśrīniṣēvitaṃ satatam । āvṛntapullahallaka- -marīchikāpuñjamañjulachChāyam ॥ 154 ॥ sindūraśōṇavasanaṃ śītāṃśustabakachumbitakirīṭam । kuṅkumatilakamanōhara- -kuṭilālikahasitakumudabandhuśiśum ॥ 155 ॥ pūrṇēndubimbavadanaṃ phullasarōjātalōchanatritayam । taralāpāṅgataraṅgita- -śapharāṅkanaśāstrasampradāyārtham ॥ 156 ॥ maṇimayakuṇḍalapuṣya- -nmarīchikallōlamāṃsalakapōlam । vidrumasahōdarādhara- -visṛmarasusmitakiśōrasañchāram ॥ 157 ॥ āmōdikusumaśēkhara- -mānīlabhrūlatāyugamanōjñam । vīṭīsaurabhavīchī- -dviguṇitavaktrāravindasaurabhyam ॥ 158 ॥ pāśāṅkuśēkṣuchāpa- -prasavaśarasphuritakōmalakarābjam । kāśmīrapaṅkilāṅgaṃ kāmēśaṃ manasi kurmahē satatam ॥ 159 ॥ tasyāṅkabhuvi niṣaṇṇāṃ taruṇakadambaprasūnakiraṇābhām । śītāṃśukhaṇḍachūḍāṃ sīmantanyastasāndrasindūrām ॥ 160 ॥ kuṅkumalalāmabhāsva- -nniṭilāṃ kuṭilatarachillikāyugalām । nālīkatulyanayanāṃ nāsāñchalanaṭitamauktikābharaṇām ॥ 161 ॥ aṅkuritamandahāsa- -maruṇādharakāntivijitabimbābhām । kastūrīmakarīyuta- -kapōlasaṅkrāntakanakatāṭaṅkām ॥ 162 ॥ karpūrasāndravīṭī- -kabalitavadanāravindakamanīyām । kambusahōdarakaṇṭha- -pralambamānāchChamauktikakalāpām ॥ 163 ॥ kahlāradāmakōmala- -bhujayugalasphuritaratnakēyūrām । karapadmamūlavilasa- -tkāñchanamayakaṭakavalayasandōhām ॥ 164 ॥ pāṇichatuṣṭayavilasa- -tpāśāṅkuśapuṇḍrachāpapuṣpāstrām । kūlaṅkaṣakuchaśikharāṃ kuṅkumakardamitaratnakūrpāsām ॥ 165 ॥ aṇudāyādavalagnā- -mambudaśōbhāsanābhirōmalatām । māṇikyakhachitakāñchī- -marīchikākrāntamāṃsalanitambām ॥ 166 ॥ karabhōrukāṇḍayugalāṃ jaṅghājitakāmajaitratūṇīrām । prapadaparibhūtakūrmāṃ pallavasachChāyapadayugamanōjñām ॥ 167 ॥ kamalabhavakañjalōchana- -kirīṭaratnāṃśurañjitapadābjām । unmastakānukampā- -muttaralāpāṅgapōṣitānaṅgām ॥ 168 ॥ ādimarasāvalambā- -manidaṃ prathamōktivallarīkalikām । ābrahmakīṭajananī- -mantaḥ kalayāmi sundarīmaniśam ॥ 169 ॥ kastu kṣitau paṭīyā- -nvastu stōtuṃ śivāṅkavāstavyam । astu chirantanasukṛtaiḥ prastutakāmyāya tanmama purastāt ॥ 170 ॥ prabhusammitōktigamyaṃ paramaśivōtsaṅgatuṅgaparyaṅkam । tējaḥ kiñchana divyaṃ puratō mē bhavatu puṇḍrakōdaṇḍam ॥ 171 ॥ madhurimabharitaśarāsaṃ makarandasyandimārgaṇōdāram । kairaviṇīviṭachūḍaṃ kaivalyāyāstu kiñchana mahō naḥ ॥ 172 ॥ akṣudramikṣuchāpaṃ parōkṣamavalagnasīmni tryakṣam । kṣapayatu mē kṣēmētara- -mukṣarathaprēmapakṣmalaṃ tējaḥ ॥ 173 ॥ bhṛṅgaruchisaṅgarakarāpāṅgaṃ śṛṅgāratuṅgamaruṇāṅgam । maṅgalamabhaṅguraṃ mē ghaṭayatu gaṅgādharāṅgasaṅgi mahaḥ ॥ 174 ॥ prapadājitakūrmamūrjita- -karuṇaṃ bharmaruchinirmathanadēham । śritavarma marma śambhōḥ kiñchana mama narma śarma nirmātu ॥ 175 ॥ kālakuralālikālima- -kandalavijitāli vidhṛtamaṇivāli । milatu hṛdi pulinajaghanaṃ bahulitagalagaralakēli kimapi mahaḥ ॥ 176 ॥ kuṅkumatilakitaphālā kuruvindachChāyapāṭaladukūlā । karuṇāpayōdhivēlā kāchana chittē chakāstu mē līlā ॥ 177 ॥ puṣpandhayaruchivēṇyaḥ pulinābhōgatrapākaraśrēṇyaḥ । jīyāsurikṣupāṇyaḥ kāśchana kāmārikēlisākṣiṇyaḥ ॥ 178 ॥ tapanīyāṃśukabhāṃsi drākṣāmādhuryanāstikavachāṃsi । katichana śuchaṃ mahāṃsi kṣapayatu kapālitōṣitamanāṃsi ॥ 179 ॥ asitakachamāyatākṣaṃ kusumaśaraṃ kūlamudvahakṛpārdram । ādimarasādhidaivata- -mantaḥ kalayē harāṅkavāsi mahaḥ ॥ 180 ॥ karṇōpāntataraṅgita- -kaṭākṣavispandikaṇṭhadaghnakṛpām । kāmēśvarāṅkanilayāṃ kāmapi vidyāṃ purātanīṃ kalayē ॥ 181 ॥ aravindakāntyaruntuda- -vilōchanadvandvasundaramukhēndu । Chandaḥ kandalamandira- -mantaḥpuramainduśēkharaṃ vandē ॥ 182 ॥ bimbinikurambaḍambara- -viḍambakachChāyamambaravalagnam । kambugalamambudakuchaṃ bimbōkaṃ kamapi chumbatu manō mē ॥ 183 ॥ kamapi kamanīyarūpaṃ kalayāmyantaḥ kadambakusumāḍhyam । champakaruchirasuvēṣaiḥ sampāditakāntyalaṅkṛtadigantam ॥ 184 ॥ śampāruchibhara- -garhāsampādakakāntikavachitadigantam । siddhāntaṃ nigamānāṃ śuddhāntaṃ kimapi śūlinaḥ kalayē ॥ 185 ॥ udyaddinakaraśōṇā- -nutpalabandhustanandhayāpīḍān । karakalitapuṇḍrachāpā- -nkalayē kānapi kapardinaḥ prāṇān ॥ 186 ॥ raśanālasajjaghanayā rasanājīvātuchāpabhāsurayā । ghrāṇāyuṣkaraśarayā ghrātaṃ chittaṃ kayāpi vāsanayā ॥ 187 ॥ sarasijasahayudhvadṛśā śampālatikāsanābhivigrahayā । bhāsā kayāpi chētō nāsāmaṇiśōbhivadanayā bharitam ॥ 188 ॥ navayāvakābhasichayānvitayā gajayānayā dayāparayā । dhṛtayāminīśakalayā dhiyā kayāpi kṣatāmayā hi vayam ॥ 189 ॥ alamalamakusumabāṇai- -rabimbaśōṇairapuṇḍrakōdaṇḍaiḥ । akumudabāndhavachūḍai- -ranyairiha jagati daivataṃ manyaiḥ ॥ 190 ॥ kuvalayasadṛkṣanayanaiḥ kulagirikūṭasthabandhukuchabhāraiḥ । karuṇāspandikaṭākṣaiḥ kavachitachittō'smi katipayaiḥ kutukaiḥ ॥ 191 ॥ natajanasulabhāya namō nālīkasanābhilōchanāya namaḥ । nanditagiriśāya namō mahasē navanīpapāṭalāya namaḥ ॥ 192 ॥ kādambakusumadāmnē kāyachChāyākaṇāyitāryamṇē । sīmnē chirantanagirāṃ bhūmnē kasmaichidādadē praṇatim ॥ 193 ॥ kuṭilakabarībharēbhyaḥ kuṅkumasabrahmachārikiraṇēbhyaḥ । kūlaṅkaṣastanēbhyaḥ kurmaḥ praṇatiṃ kulādrikutukēbhyaḥ ॥ 194 ॥ kōkanadaśōṇacharaṇā- -tkōmalakuralālivijitaśaivālāt । utpalasagandhinayanā- -durarīkurmō na dēvatamānyām ॥ 195 ॥ āpāṭalādharāṇā- -mānīlasnigdhabarbarakachānām । āmnāyajīvanānā- -mākūtānāṃ harasya dāsō'ham ॥ 196 ॥ puṅkhitavilāsahāsa- -sphuritāsu purāhitāṅkanilayāsu । magnaṃ manō madīyaṃ kāsvapi kāmārijīvanāḍīṣu ॥ 197 ॥ lalitā pātu śirō mē lalāṭamambā cha madhumatīrūpā । bhrūyugmaṃ cha bhavānī puṣpaśarā pātu lōchanadvandvam ॥ 198 ॥ pāyānnāsāṃ bālā subhagā dantāṃścha sundarī jihvām । adharōṣṭhamādiśakti- -śchakrēśī pātu mē chiraṃ chibukam ॥ 199 ॥ kāmēśvarī cha karṇau kāmākṣī pātu gaṇḍayōryugalam । śṛṅgāranāyikāvyā- -dvadanaṃ siṃhāsanēśvarī cha galam ॥ 200 ॥ skandaprasūścha pātu skandhau bāhū cha pāṭalāṅgī mē । pāṇī cha padmanilayā pāyādaniśaṃ nakhāvalīrvijayā ॥ 201 ॥ kōdaṇḍinī cha vakṣaḥ kukṣiṃ chāvyāt kulāchalatanūjā । kalyāṇī cha valagnaṃ kaṭiṃ cha pāyātkalādharaśikhaṇḍā ॥ 202 ॥ ūrudvayaṃ cha pāyā- -dumā mṛḍānī cha jānunī rakṣēt । jaṅghē cha ṣōḍaśī mē pāyāt pādau cha pāśasṛṇihastā ॥ 203 ॥ prātaḥ pātu parā māṃ madhyāhnē pātu maṇigṛhādhīśā । śarvāṇyavatu cha sāyaṃ pāyādrātrau cha bhairavī sākṣāt ॥ 204 ॥ bhāryāṃ rakṣatu gaurīṃ pāyāt putrāṃścha bindugṛhapīṭhā । śrīvidyā cha yaśō mē śīlaṃ chāvyāchchiraṃ mahārājñī ॥ 205 ॥ pavanamayi pāvakamayi kṣōṇīmayi gaganamayi kṛpīṭamayi । ravimayi śaśimayi diṅmayi samayamayi prāṇamayi śivē pāhi ॥ 206 ॥ kāli kapālini śūlini bhairavi mātaṅgi pañchami tripurē । vāgdēvi vindhyavāsini bālē bhuvanēśi pālaya chiraṃ mām ॥ 207 ॥ abhinavasindūrābhā- -mamba tvāṃ chintayanti yē hṛdayē । upari nipatanti tēṣā- -mutpalanayanākaṭākṣakallōlāḥ ॥ 208 ॥ vargāṣṭakamilitābhi- -rvaśinīmukhyābhirāvṛtāṃ bhavatīm । chintayatāṃ sitavarṇāṃ vāchō niryāntyayatnatō vadanāt ॥ 209 ॥ kanakaśalākāgaurīṃ karṇavyālōlakuṇḍaladvitayām । prahasitamukhīṃ cha bhavatīṃ dhyāyantō yē ta ēva bhūdhanadāḥ ॥ 210 ॥ śīrṣāmbhōruhamadhyē śītalapīyūṣavarṣiṇīṃ bhavatīm । anudinamanuchintayatā- -māyuṣyaṃ bhavati puṣkalamavanyām ॥ 211 ॥ madhurasmitāṃ madāruṇanayanāṃ mātaṅgakumbhavakṣōjām । chandravataṃsinīṃ tvāṃ savidhē paśyanti sukṛtinaḥ kēchit ॥ 212 ॥ lalitāyāḥ stavaratnaṃ lalitapadābhiḥ praṇītamāryābhiḥ । pratidinamavanau paṭhatāṃ phalāni vaktuṃ pragalbhatē saiva ॥ 213 ॥ sadasadanugrahanigraha- -gṛhītamunivigrahō bhagavān । sarvāsāmupaniṣadāṃ durvāsā jayati dēśikaḥ prathamaḥ ॥ 214 ॥ iti maharṣidurvāsaḥ virachitaṃ śrīlalitāstavaratnam ।

Recite with devotion and pure heart

Regular practice brings spiritual benefits

More stotras of Sri Lalitha: