അഗസ്ത്യ ഉവാച – അശ്വാനന മഹാബുദ്ധേ സർവശാസ്ത്രവിശാരദ । കഥിതം ലലിതാദേവ്യാശ്ചരിതം പരമാദ്ഭുതം ॥ 1 ॥ പൂർവം പ്രാദുർഭവോ മാതുസ്തതഃ പട്ടാഭിഷേചനം । ഭണ്ഡാസുരവധശ്ചൈവ വിസ്തരേണ ത്വയോദിതഃ ॥ 2 ॥ വർണിതം ശ്രീപുരം ചാപി മഹാവിഭവവിസ്തരം । ശ്രീമത്പഞ്ചദശാക്ഷര്യാഃ മഹിമാ വർണിതസ്തഥാ ॥ 3 ॥ ഷോഢാന്യാസാദയോ ന്യാസാഃ ന്യാസഖണ്ഡേ സമീരിതാഃ । അന്തര്യാഗക്രമശ്ചൈവ ബഹിര്യാഗക്രമസ്തഥാ ॥ 4 ॥ മഹായാഗക്രമശ്ചൈവ പൂജാഖണ്ഡേ പ്രകീർതിതാഃ । പുരശ്ചരണഖണ്ഡേ തു ജപലക്ഷണമീരിതം ॥ 5 ॥ ഹോമഖണ്ഡേ ത്വയാ പ്രോക്തോ ഹോമദ്രവ്യവിധിക്രമഃ । ചക്രരാജസ്യ വിദ്യായാഃ ശ്രീദേവ്യാ ദേശികാത്മനോഃ ॥ 6 ॥ രഹസ്യഖണ്ഡേ താദാത്മ്യം പരസ്പരമുദീരിതം । സ്തോത്രഖണ്ഡേ ബഹുവിധാഃ സ്തുതയഃ പരികീർതിതാഃ ॥ 7 ॥ മന്ത്രിണീദണ്ഡിനീദേവ്യോഃ പ്രോക്തേ നാമസഹസ്രകേ । ന തു ശ്രീലലിതാദേവ്യാഃ പ്രോക്തം നാമസഹസ്രകം ॥ 8 ॥ തത്ര മേ സംശയോ ജാതോ ഹയഗ്രീവ ദയാനിധേ । കിം വാ ത്വയാ വിസ്മൃതം തജ്ജ്ഞാത്വാ വാ സമുപേക്ഷിതം ॥ 9 ॥ മമ വാ യോഗ്യതാ നാസ്തി ശ്രോതും നാമസഹസ്രകം । കിമർഥം ഭവതാ നോക്തം തത്ര മേ കാരണം വദ ॥ 10 ॥ സൂത ഉവാച – ഇതി പൃഷ്ടോ ഹയഗ്രീവോ മുനിനാ കുംഭജന്മനാ । പ്രഹൃഷ്ടോ വചനം പ്രാഹ താപസം കുംഭസംഭവം ॥ 11 ॥ ശ്രീഹയഗ്രീവ ഉവാച – ലോപാമുദ്രാപതേഽഗസ്ത്യ സാവധാനമനാഃ ശൃണു । നാമ്നാം സഹസ്രം യന്നോക്തം കാരണം തദ്വദാമി തേ ॥ 12 ॥ രഹസ്യമിതി മത്വാഹം നോക്തവാംസ്തേ ന ചാന്യഥാ । പുനശ്ച പൃച്ഛതേ ഭക്ത്യാ തസ്മാത്തത്തേ വദാമ്യഹം ॥ 13 ॥ ബ്രൂയാച്ഛിഷ്യായ ഭക്തായ രഹസ്യമപി ദേശികഃ । ഭവതാ ന പ്രദേയം സ്യാദഭക്തായ കദാചന ॥ 14 ॥ ന ശഠായ ന ദുഷ്ടായ നാവിശ്വാസായ കർഹിചിത് । ശ്രീമാതൃഭക്തിയുക്തായ ശ്രീവിദ്യാരാജവേദിനേ ॥ 15 ॥ ഉപാസകായ ശുദ്ധായ ദേയം നാമസഹസ്രകം । യാനി നാമസഹസ്രാണി സദ്യഃ സിദ്ധിപ്രദാനി വൈ ॥ 16 ॥ തന്ത്രേഷു ലലിതാദേവ്യാസ്തേഷു മുഖ്യമിദം മുനേ । ശ്രീവിദ്യൈവ തു മന്ത്രാണാം തത്ര കാദിര്യഥാ പരാ ॥ 17 ॥ പുരാണാം ശ്രീപുരമിവ ശക്തീനാം ലലിതാ തഥാ । ശ്രീവിദ്യോപാസകാനാം ച യഥാ ദേവോ പരഃ ശിവഃ ॥ 18 ॥ തഥാ നാമസഹസ്രേഷു പരമേതത്പ്രകീർതിതം । യഥാസ്യ പഠനാദ്ദേവീ പ്രീയതേ ലലിതാംബികാ ॥ 19 ॥ അന്യനാമസഹസ്രസ്യ പാഠാന്ന പ്രീയതേ തഥാ । ശ്രീമാതുഃ പ്രീതയേ തസ്മാദനിശം കീർതയേദിദം ॥ 20 ॥ ബില്വപത്രൈശ്ചക്രരാജേ യോഽർചയേല്ലലിതാംബികാം । പദ്മൈർവാ തുലസീപുഷ്പൈരേഭിർനാമസഹസ്രകൈഃ ॥ 21 ॥ സദ്യഃ പ്രസാദം കുരുതേ തസ്യ സിംഹാസനേശ്വരീ । ചക്രാധിരാജമഭ്യർച്യ ജപ്ത്വാ പഞ്ചദശാക്ഷരീം ॥ 22 ॥ ജപാന്തേ കീർതയേന്നിത്യമിദം നാമസഹസ്രകം । ജപപൂജാദ്യശക്തശ്ചേത്പഠേന്നാമസഹസ്രകം ॥ 23 ॥ സാംഗാർചനേ സാംഗജപേ യത്ഫലം തദവാപ്നുയാത് । ഉപാസനേ സ്തുതീരന്യാഃ പഠേദഭ്യുദയോ ഹി സഃ ॥ 24 ॥ ഇദം നാമസഹസ്രം തു കീർതയേന്നിത്യകർമവത് । ചക്രരാജാർചനം ദേവ്യാ ജപോ നാമ്നാം ച കീർതനം ॥ 25 ॥ ഭക്തസ്യ കൃത്യമേതാവദന്യദഭ്യുദയം വിദുഃ । ഭക്തസ്യാവശ്യകമിദം നാമസാഹസ്രകീർതനം ॥ 26 ॥ തത്ര ഹേതും പ്രവക്ഷ്യാമി ശൃണു ത്വം കുംഭസംഭവ । പുരാ ശ്രീലലിതാദേവീ ഭക്താനാം ഹിതകാമ്യയാ ॥ 27 ॥ വാഗ്ദേവീർവശിനീമുഖ്യാഃ സമാഹൂയേദമബ്രവീത് । വാഗ്ദേവതാ വശിന്യാദ്യാഃ ശൃണുധ്വം വചനം മമ ॥ 28 ॥ ഭവത്യോ മത്പ്രസാദേന പ്രോല്ലസദ്വാഗ്വിഭൂതയഃ । മദ്ഭക്താനാം വാഗ്വിഭൂതിപ്രദാനേ വിനിയോജിതാഃ ॥ 29 ॥ മച്ചക്രസ്യ രഹസ്യജ്ഞാ മമ നാമപരായണാഃ । മമ സ്തോത്രവിധാനായ തസ്മാദാജ്ഞാപയാമി വഃ ॥ 30 ॥ കുരുധ്വമങ്കിതം സ്തോത്രം മമ നാമസഹസ്രകൈഃ । യേന ഭക്തൈഃ സ്തുതായാ മേ സദ്യഃ പ്രീതിഃ പരാ ഭവേത് ॥ 31 ॥ ഇത്യാജ്ഞപ്താസ്തതോ ദേവ്യഃ ശ്രീദേവ്യാ ലലിതാംബയാ । രഹസ്യൈർനാമഭിർദിവ്യൈശ്ചക്രുഃ സ്തോത്രമനുത്തമം ॥ 32 ॥ രഹസ്യനാമസാഹസ്രമിതി തദ്വിശ്രുതം പരം । തതഃ കദാചിത്സദസി സ്ഥിത്വാ സിംഹാസനേഽമ്ബികാ ॥ 33 ॥ സ്വസേവാവസരം പ്രാദാത്സർവേഷാം കുംഭസംഭവ । സേവാർഥമാഗതാസ്തത്ര ബ്രഹ്മാണീബ്രഹ്മകോടയഃ ॥ 34 ॥ ലക്ഷ്മീനാരായണാനാം ച കോടയഃ സമുപാഗതാഃ । ഗൗരീകോടിസമേതാനാം രുദ്രാണാമപി കോടയഃ ॥ 35 ॥ മന്ത്രിണീദണ്ഡിനീമുഖ്യാഃ സേവാർഥം യഃ സമാഗതാഃ । ശക്തയോ വിവിധാകാരാസ്താസാം സംഖ്യാ ന വിദ്യതേ ॥ 36 ॥ ദിവ്യൗഘാ മാനവൗഘാശ്ച സിദ്ധൗഘാശ്ച സമാഗതാഃ । തത്ര ശ്രീലലിതാദേവീ സർവേഷാം ദർശനം ദദൗ ॥ 37 ॥ തേഷു ദൃഷ്ട്വോപവിഷ്ടേഷു സ്വേ സ്വേ സ്ഥാനേ യഥാക്രമം । തത്ര ശ്രീലലിതാദേവീകടാക്ഷാക്ഷേപചോദിതാഃ ॥ 38 ॥ ഉത്ഥായ വശിനീമുഖ്യാ ബദ്ധാഞ്ജലിപുടാസ്തദാ । അസ്തുവന്നാമസാഹസ്രൈഃ സ്വകൃതൈർലലിതാംബികാം ॥ 39 ॥ ശ്രുത്വാ സ്തവം പ്രസന്നാഭൂല്ലലിതാ പരമേശ്വരീ । തേ സർവേ വിസ്മയം ജഗ്മുര്യേ തത്ര സദസി സ്ഥിതാഃ ॥ 40 ॥ തതഃ പ്രോവാച ലലിതാ സദസ്യാൻ ദേവതാഗണാൻ । ദേവ്യുവാച – മമാജ്ഞയൈവ വാഗ്ദേവ്യശ്ചക്രുഃ സ്തോത്രമനുത്തമം ॥ 41 ॥ അങ്കിതം നാമഭിർദിവ്യൈർമമ പ്രീതിവിധായകൈഃ । തത്പഠധ്വം സദാ യൂയം സ്തോത്രം മത്പ്രീതിവൃദ്ധയേ ॥ 42 ॥ പ്രവർതയധ്വം ഭക്തേഷു മമ നാമസാഹസ്രകം । ഇദം നാമസഹസ്രം മേ യോ ഭക്തഃ പഠതേ സകൃത് ॥ 43 ॥ സ മേ പ്രിയതമോ ജ്ഞേയസ്തസ്മൈ കാമാൻ ദദാമ്യഹം । ശ്രീചക്രേ മാം സമഭ്യർച്യ ജപ്ത്വാ പഞ്ചദശാക്ഷരീം ॥ 44 ॥ പശ്ചാന്നാമസഹസ്രം മേ കീർതയേന്മമ തുഷ്ടയേ । മാമർചയതു വാ മാ വാ വിദ്യാം ജപതു വാ ന വാ ॥ 45 ॥ കീർതയേന്നാമസാഹസ്രമിദം മത്പ്രീതയേ സദാ । മത്പ്രീത്യാ സകലാൻകാമാംല്ലഭതേ നാത്ര സംശയഃ ॥ 46 ॥ തസ്മാന്നാമസഹസ്രം മേ കീർതയധ്വം സദാദരാത് । ശ്രീഹയഗ്രീവ ഉവാച – ഇതി ശ്രീലലിതേശാനീ ശാസ്തി ദേവാൻ സഹാനുഗാൻ ॥ 47 ॥ തദാജ്ഞയാ തദാരഭ്യ ബ്രഹ്മവിഷ്ണുമഹേശ്വരാഃ । ശക്തയോ മന്ത്രിണീമുഖ്യാ ഇദം നാമസഹസ്രകം ॥ 48 ॥ പഠന്തി ഭക്ത്യാ സതതം ലലിതാപരിതുഷ്ടയേ । തസ്മാദവശ്യം ഭക്തേന കീർതനീയമിദം മുനേ ॥ 49 ॥ ആവശ്യകത്വേ ഹേതുസ്തേ മയാ പ്രോക്തോ മുനീശ്വര । ഇദാനീം നാമസാഹസ്രം വക്ഷ്യാമി ശ്രദ്ധയാ ശൃണു ॥ 50 ॥ ഇതി ശ്രീബ്രഹ്മാണ്ഡപുരാണേ ഹയഗ്രീവാഗസ്ത്യസംവാദേ ലലിതാസഹസ്രനാമപൂർവഭാഗോ നാമ പ്രഥമോഽധ്യായഃ ॥ ഓം അസ്യ ശ്രീ ലലിതാ ദിവ്യ സഹസ്രനാമ സ്തോത്ര മഹാമന്ത്രസ്യ, വശിന്യാദി വാഗ്ദേവതാ ഋഷയഃ, അനുഷ്ടുപ് ഛന്ദഃ, ശ്രീ ലലിതാ പരാഭട്ടാരികാ മഹാ ത്രിപുര സുന്ദരീ ദേവതാ, ഐം ബീജം, ക്ലീം ശക്തിഃ, സൗഃ കീലകം, മമ ധർമാർഥ കാമ മോക്ഷ ചതുർവിധ ഫലപുരുഷാർഥ സിദ്ധ്യർഥേ ലലിതാ ത്രിപുരസുന്ദരീ പരാഭട്ടാരികാ സഹസ്ര നാമ ജപേ വിനിയോഗഃ കരന്യാസഃ – ഐം അംഗുഷ്ടാഭ്യാം നമഃ, ക്ലീം തർജനീഭ്യാം നമഃ, സൗഃ മധ്യമാഭ്യാം നമഃ, സൗഃ അനാമികാഭ്യാം നമഃ, ക്ലീം കനിഷ്ഠികാഭ്യാം നമഃ, ഐം കരതല കരപൃഷ്ഠാഭ്യാം നമഃ അംഗന്യാസഃ – ഐം ഹൃദയായ നമഃ, ക്ലീം ശിരസേ സ്വാഹാ, സൗഃ ശിഖായൈ വഷട്, സൗഃ കവചായ ഹും, ക്ലീം നേത്രത്രയായ വൗഷട്, ഐം അസ്ത്രായഫട്, ഭൂർഭുവസ്സുവരോമിതി ദിഗ്ബന്ധഃ ധ്യാനം – അരുണാം കരുണാ തരംഗിതാക്ഷീം ധൃതപാശാങ്കുശ പുഷ്പബാണചാപാം । അണിമാദിഭി രാവൃതാം മയൂഖൈഃ അഹമിത്യേവ വിഭാവയേ ഭവാനീം ॥ 1 ॥ ധ്യായേത് പദ്മാസനസ്ഥാം വികസിതവദനാം പദ്മ പത്രായതാക്ഷീം ഹേമാഭാം പീതവസ്ത്രാം കരകലിത ലസദ്ധേമപദ്മാം വരാംഗീം । സർവാലങ്കാരയുക്താം സകലമഭയദാം ഭക്തനമ്രാം ഭവാനീം ശ്രീ വിദ്യാം ശാന്തമൂർതിം സകല സുരനുതാം സർവസമ്പത്-പ്രദാത്രീം ॥ 2 ॥ സകുങ്കുമ വിലേപനാ മലികചുംബി കസ്തൂരികാം സമന്ദ ഹസിതേക്ഷണാം സശരചാപ പാശാങ്കുശാം । അശേഷ ജനമോഹിനീ മരുണമാല്യ ഭൂഷോജ്ജ്വലാം ജപാകുസുമ ഭാസുരാം ജപവിധൗ സ്മരേ ദംബികാം ॥ 3 ॥ സിന്ധൂരാരുണ വിഗ്രഹാം ത്രിണയനാം മാണിക്യ മൗലിസ്ഫുര- ത്താരാനായക ശേഖരാം സ്മിതമുഖീ മാപീന വക്ഷോരുഹാം । പാണിഭ്യാ മലിപൂർണ രത്ന ചഷകം രക്തോത്പലം ബിഭ്രതീം സൗമ്യാം രത്നഘടസ്ഥ രക്ത ചരണാം ധ്യായേത്പരാമംബികാം ॥ 4 ॥ ലമിത്യാദി പഞ്ചപൂജാം വിഭാവയേത് ലം പൃഥിവീ തത്ത്വാത്മികായൈ ശ്രീ ലലിതാദേവ്യൈ ഗന്ധം പരികല്പയാമി ഹം ആകാശ തത്ത്വാത്മികായൈ ശ്രീ ലലിതാദേവ്യൈ പുഷ്പം പരികല്പയാമി യം വായു തത്ത്വാത്മികായൈ ശ്രീ ലലിതാദേവ്യൈ ധൂപം പരികല്പയാമി രം വഹ്നി തത്ത്വാത്മികായൈ ശ്രീ ലലിതാദേവ്യൈ ദീപം പരികല്പയാമി വം അമൃത തത്ത്വാത്മികായൈ ശ്രീ ലലിതാദേവ്യൈ അമൃത നൈവേദ്യം പരികല്പയാമി സം സർവ തത്ത്വാത്മികായൈ ശ്രീ ലലിതാദേവ്യൈ താംബൂലാദി സർവോപചാരാൻ പരികല്പയാമി ഗുരുർബ്രഹ്മ ഗുരുർവിഷ്ണുഃ ഗുരുർദേവോ മഹേശ്വരഃ । ഗുരുസ്സാക്ഷാത് പരബ്രഹ്മ തസ്മൈ ശ്രീ ഗുരവേ നമഃ ॥ സ്തോത്രം – ഹരിഃ ഓം ശ്രീമാതാ, ശ്രീമഹാരാജ്ഞീ, ശ്രീമത്-സിംഹാസനേശ്വരീ । ചിദഗ്നി-കുണ്ഡ-സംഭൂതാ, ദേവകാര്യ-സമുദ്യതാ ॥ 1 ॥ ഉദ്യദ്ഭാനു-സഹസ്രാഭാ, ചതുർബാഹു-സമന്വിതാ । രാഗസ്വരൂപ-പാശാഢ്യാ, ക്രോധാകാരാങ്കുശോജ്ജ്വലാ ॥ 2 ॥ മനോരൂപേക്ഷു-കോദണ്ഡാ, പഞ്ചതന്മാത്ര-സായകാ । നിജാരുണ പ്രഭാപൂര മജ്ജദ്-ബ്രഹ്മാണ്ഡമണ്ഡലാ ॥ 3 ॥ ചമ്പകാശോക പുന്നാഗ സൗഗന്ധിക ലസത്കചാ കുരുവിന്ദ മണിശ്രേണീ കനത്കോടീര മണ്ഡിതാ ॥ 4 ॥ അഷ്ടമീ ചന്ദ്ര വിഭ്രാജ ദലികസ്ഥല ശോഭിതാ । മുഖചന്ദ്ര കലങ്കാഭ മൃഗനാഭി വിശേഷകാ ॥ 5 ॥ വദനസ്മര മാംഗല്യ ഗൃഹതോരണ ചില്ലികാ । വക്ത്രലക്ഷ്മീ പരീവാഹ ചലന്മീനാഭ ലോചനാ ॥ 6 ॥ നവചമ്പക പുഷ്പാഭ നാസാദണ്ഡ വിരാജിതാ । താരാകാന്തി തിരസ്കാരി നാസാഭരണ ഭാസുരാ ॥ 7 ॥ കദംബ മഞ്ജരീകൢപ്ത കർണപൂര മനോഹരാ । താടങ്ക യുഗലീഭൂത തപനോഡുപ മണ്ഡലാ ॥ 8 ॥ പദ്മരാഗ ശിലാദർശ പരിഭാവി കപോലഭൂഃ । നവവിദ്രുമ ബിംബശ്രീഃ ന്യക്കാരി രദനച്ഛദാ ॥ 9 ॥ ശുദ്ധ വിദ്യാങ്കുരാകാര ദ്വിജപങ്ക്തി ദ്വയോജ്ജ്വലാ । കർപൂരവീടി കാമോദ സമാകർഷദ്ദിഗന്തരാ ॥ 10 ॥ നിജസല്ലാപ മാധുര്യ വിനിർഭത്സിത കച്ഛപീ । മന്ദസ്മിത പ്രഭാപൂര മജ്ജത്-കാമേശ മാനസാ ॥ 11 ॥ അനാകലിത സാദൃശ്യ ചുബുക ശ്രീ വിരാജിതാ । കാമേശബദ്ധ മാംഗല്യ സൂത്രശോഭിത കന്ഥരാ ॥ 12 ॥ കനകാംഗദ കേയൂര കമനീയ ഭുജാന്വിതാ । രത്നഗ്രൈവേയ ചിന്താക ലോലമുക്താ ഫലാന്വിതാ ॥ 13 ॥ കാമേശ്വര പ്രേമരത്ന മണി പ്രതിപണസ്തനീ। നാഭ്യാലവാല രോമാലി ലതാഫല കുചദ്വയീ ॥ 14 ॥ ലക്ഷ്യരോമലതാ ധാരതാ സമുന്നേയ മധ്യമാ । സ്തനഭാര ദലൻ-മധ്യ പട്ടബന്ധ വലിത്രയാ ॥ 15 ॥ അരുണാരുണ കൗസുംഭ വസ്ത്ര ഭാസ്വത്-കടീതടീ । രത്നകിങ്കിണി കാരമ്യ രശനാദാമ ഭൂഷിതാ ॥ 16 ॥ കാമേശ ജ്ഞാത സൗഭാഗ്യ മാർദവോരു ദ്വയാന്വിതാ । മാണിക്യ മകുടാകാര ജാനുദ്വയ വിരാജിതാ ॥ 17 ॥ ഇന്ദ്രഗോപ പരിക്ഷിപ്ത സ്മര തൂണാഭ ജംഘികാ । ഗൂഢഗുൽഭാ കൂർമപൃഷ്ഠ ജയിഷ്ണു പ്രപദാന്വിതാ ॥ 18 ॥ നഖദീധിതി സഞ്ഛന്ന നമജ്ജന തമോഗുണാ । പദദ്വയ പ്രഭാജാല പരാകൃത സരോരുഹാ ॥ 19 ॥ ശിഞ്ജാന മണിമഞ്ജീര മണ്ഡിത ശ്രീ പദാംബുജാ । മരാലീ മന്ദഗമനാ, മഹാലാവണ്യ ശേവധിഃ ॥ 20 ॥ സർവാരുണാഽനവദ്യാംഗീ സർവാഭരണ ഭൂഷിതാ । ശിവകാമേശ്വരാങ്കസ്ഥാ, ശിവാ, സ്വാധീന വല്ലഭാ ॥ 21 ॥ സുമേരു മധ്യശൃംഗസ്ഥാ, ശ്രീമന്നഗര നായികാ । ചിന്താമണി ഗൃഹാന്തസ്ഥാ, പഞ്ചബ്രഹ്മാസനസ്ഥിതാ ॥ 22 ॥ മഹാപദ്മാടവീ സംസ്ഥാ, കദംബ വനവാസിനീ । സുധാസാഗര മധ്യസ്ഥാ, കാമാക്ഷീ കാമദായിനീ ॥ 23 ॥ ദേവർഷി ഗണസംഘാത സ്തൂയമാനാത്മ വൈഭവാ । ഭണ്ഡാസുര വധോദ്യുക്ത ശക്തിസേനാ സമന്വിതാ ॥ 24 ॥ സമ്പത്കരീ സമാരൂഢ സിന്ധുര വ്രജസേവിതാ । അശ്വാരൂഢാധിഷ്ഠിതാശ്വ കോടികോടി ഭിരാവൃതാ ॥ 25 ॥ ചക്രരാജ രഥാരൂഢ സർവായുധ പരിഷ്കൃതാ । ഗേയചക്ര രഥാരൂഢ മന്ത്രിണീ പരിസേവിതാ ॥ 26 ॥ കിരിചക്ര രഥാരൂഢ ദണ്ഡനാഥാ പുരസ്കൃതാ । ജ്വാലാമാലിനി കാക്ഷിപ്ത വഹ്നിപ്രാകാര മധ്യഗാ ॥ 27 ॥ ഭണ്ഡസൈന്യ വധോദ്യുക്ത ശക്തി വിക്രമഹർഷിതാ । നിത്യാ പരാക്രമാടോപ നിരീക്ഷണ സമുത്സുകാ ॥ 28 ॥ ഭണ്ഡപുത്ര വധോദ്യുക്ത ബാലാവിക്രമ നന്ദിതാ । മന്ത്രിണ്യംബാ വിരചിത വിഷംഗ വധതോഷിതാ ॥ 29 ॥ വിശുക്ര പ്രാണഹരണ വാരാഹീ വീര്യനന്ദിതാ । കാമേശ്വര മുഖാലോക കല്പിത ശ്രീ ഗണേശ്വരാ ॥ 30 ॥ മഹാഗണേശ നിർഭിന്ന വിഘ്നയന്ത്ര പ്രഹർഷിതാ । ഭണ്ഡാസുരേന്ദ്ര നിർമുക്ത ശസ്ത്ര പ്രത്യസ്ത്ര വർഷിണീ ॥ 31 ॥ കരാംഗുലി നഖോത്പന്ന നാരായണ ദശാകൃതിഃ । മഹാപാശുപതാസ്ത്രാഗ്നി നിർദഗ്ധാസുര സൈനികാ ॥ 32 ॥ കാമേശ്വരാസ്ത്ര നിർദഗ്ധ സഭണ്ഡാസുര ശൂന്യകാ । ബ്രഹ്മോപേന്ദ്ര മഹേന്ദ്രാദി ദേവസംസ്തുത വൈഭവാ ॥ 33 ॥ ഹരനേത്രാഗ്നി സന്ദഗ്ധ കാമ സഞ്ജീവനൗഷധിഃ । ശ്രീമദ്വാഗ്ഭവ കൂടൈക സ്വരൂപ മുഖപങ്കജാ ॥ 34 ॥ കണ്ഠാധഃ കടിപര്യന്ത മധ്യകൂട സ്വരൂപിണീ । ശക്തികൂടൈക താപന്ന കട്യഥോഭാഗ ധാരിണീ ॥ 35 ॥ മൂലമന്ത്രാത്മികാ, മൂലകൂട ത്രയ കലേബരാ । കുലാമൃതൈക രസികാ, കുലസങ്കേത പാലിനീ ॥ 36 ॥ കുലാംഗനാ, കുലാന്തഃസ്ഥാ, കൗലിനീ, കുലയോഗിനീ । അകുലാ, സമയാന്തഃസ്ഥാ, സമയാചാര തത്പരാ ॥ 37 ॥ മൂലാധാരൈക നിലയാ, ബ്രഹ്മഗ്രന്ഥി വിഭേദിനീ । മണിപൂരാന്ത രുദിതാ, വിഷ്ണുഗ്രന്ഥി വിഭേദിനീ ॥ 38 ॥ ആജ്ഞാ ചക്രാന്തരാലസ്ഥാ, രുദ്രഗ്രന്ഥി വിഭേദിനീ । സഹസ്രാരാംബുജാ രൂഢാ, സുധാസാരാഭി വർഷിണീ ॥ 39 ॥ തടില്ലതാ സമരുചിഃ, ഷട്-ചക്രോപരി സംസ്ഥിതാ । മഹാശക്തിഃ, കുണ്ഡലിനീ, ബിസതന്തു തനീയസീ ॥ 40 ॥ ഭവാനീ, ഭാവനാഗമ്യാ, ഭവാരണ്യ കുഠാരികാ । ഭദ്രപ്രിയാ, ഭദ്രമൂർതി, ര്ഭക്തസൗഭാഗ്യ ദായിനീ ॥ 41 ॥ ഭക്തിപ്രിയാ, ഭക്തിഗമ്യാ, ഭക്തിവശ്യാ, ഭയാപഹാ । ശാംഭവീ, ശാരദാരാധ്യാ, ശർവാണീ, ശർമദായിനീ ॥ 42 ॥ ശാങ്കരീ, ശ്രീകരീ, സാധ്വീ, ശരച്ചന്ദ്രനിഭാനനാ । ശാതോദരീ, ശാന്തിമതീ, നിരാധാരാ, നിരഞ്ജനാ ॥ 43 ॥ നിർലേപാ, നിർമലാ, നിത്യാ, നിരാകാരാ, നിരാകുലാ । നിർഗുണാ, നിഷ്കലാ, ശാന്താ, നിഷ്കാമാ, നിരുപപ്ലവാ ॥ 44 ॥ നിത്യമുക്താ, നിർവികാരാ, നിഷ്പ്രപഞ്ചാ, നിരാശ്രയാ । നിത്യശുദ്ധാ, നിത്യബുദ്ധാ, നിരവദ്യാ, നിരന്തരാ ॥ 45 ॥ നിഷ്കാരണാ, നിഷ്കലങ്കാ, നിരുപാധി, ര്നിരീശ്വരാ । നീരാഗാ, രാഗമഥനീ, നിർമദാ, മദനാശിനീ ॥ 46 ॥ നിശ്ചിന്താ, നിരഹങ്കാരാ, നിർമോഹാ, മോഹനാശിനീ । നിർമമാ, മമതാഹന്ത്രീ, നിഷ്പാപാ, പാപനാശിനീ ॥ 47 ॥ നിഷ്ക്രോധാ, ക്രോധശമനീ, നിർലോഭാ, ലോഭനാശിനീ । നിഃസംശയാ, സംശയഘ്നീ, നിർഭവാ, ഭവനാശിനീ ॥ 48 ॥ നിർവികല്പാ, നിരാബാധാ, നിർഭേദാ, ഭേദനാശിനീ । നിർനാശാ, മൃത്യുമഥനീ, നിഷ്ക്രിയാ, നിഷ്പരിഗ്രഹാ ॥ 49 ॥ നിസ്തുലാ, നീലചികുരാ, നിരപായാ, നിരത്യയാ । ദുർലഭാ, ദുർഗമാ, ദുർഗാ, ദുഃഖഹന്ത്രീ, സുഖപ്രദാ ॥ 50 ॥ ദുഷ്ടദൂരാ, ദുരാചാര ശമനീ, ദോഷവർജിതാ । സർവജ്ഞാ, സാന്ദ്രകരുണാ, സമാനാധികവർജിതാ ॥ 51 ॥ സർവശക്തിമയീ, സർവമംഗലാ, സദ്ഗതിപ്രദാ । സർവേശ്വരീ, സർവമയീ, സർവമന്ത്ര സ്വരൂപിണീ ॥ 52 ॥ സർവയന്ത്രാത്മികാ, സർവതന്ത്രരൂപാ, മനോന്മനീ । മാഹേശ്വരീ, മഹാദേവീ, മഹാലക്ഷ്മീ, ര്മൃഡപ്രിയാ ॥ 53 ॥ മഹാരൂപാ, മഹാപൂജ്യാ, മഹാപാതക നാശിനീ । മഹാമായാ, മഹാസത്ത്വാ, മഹാശക്തി ര്മഹാരതിഃ ॥ 54 ॥ മഹാഭോഗാ, മഹൈശ്വര്യാ, മഹാവീര്യാ, മഹാബലാ । മഹാബുദ്ധി, ര്മഹാസിദ്ധി, ര്മഹായോഗേശ്വരേശ്വരീ ॥ 55 ॥ മഹാതന്ത്രാ, മഹാമന്ത്രാ, മഹായന്ത്രാ, മഹാസനാ । മഹായാഗ ക്രമാരാധ്യാ, മഹാഭൈരവ പൂജിതാ ॥ 56 ॥ മഹേശ്വര മഹാകല്പ മഹാതാണ്ഡവ സാക്ഷിണീ । മഹാകാമേശ മഹിഷീ, മഹാത്രിപുര സുന്ദരീ ॥ 57 ॥ ചതുഃഷഷ്ട്യുപചാരാഢ്യാ, ചതുഷ്ഷഷ്ടി കലാമയീ । മഹാ ചതുഷ്ഷഷ്ടി കോടി യോഗിനീ ഗണസേവിതാ ॥ 58 ॥ മനുവിദ്യാ, ചന്ദ്രവിദ്യാ, ചന്ദ്രമണ്ഡലമധ്യഗാ । ചാരുരൂപാ, ചാരുഹാസാ, ചാരുചന്ദ്ര കലാധരാ ॥ 59 ॥ ചരാചര ജഗന്നാഥാ, ചക്രരാജ നികേതനാ । പാർവതീ, പദ്മനയനാ, പദ്മരാഗ സമപ്രഭാ ॥ 60 ॥ പഞ്ചപ്രേതാസനാസീനാ, പഞ്ചബ്രഹ്മ സ്വരൂപിണീ । ചിന്മയീ, പരമാനന്ദാ, വിജ്ഞാന ഘനരൂപിണീ ॥ 61 ॥ ധ്യാനധ്യാതൃ ധ്യേയരൂപാ, ധർമാധർമ വിവർജിതാ । വിശ്വരൂപാ, ജാഗരിണീ, സ്വപന്തീ, തൈജസാത്മികാ ॥ 62 ॥ സുപ്താ, പ്രാജ്ഞാത്മികാ, തുര്യാ, സർവാവസ്ഥാ വിവർജിതാ । സൃഷ്ടികർത്രീ, ബ്രഹ്മരൂപാ, ഗോപ്ത്രീ, ഗോവിന്ദരൂപിണീ ॥ 63 ॥ സംഹാരിണീ, രുദ്രരൂപാ, തിരോധാനകരീശ്വരീ । സദാശിവാനുഗ്രഹദാ, പഞ്ചകൃത്യ പരായണാ ॥ 64 ॥ ഭാനുമണ്ഡല മധ്യസ്ഥാ, ഭൈരവീ, ഭഗമാലിനീ । പദ്മാസനാ, ഭഗവതീ, പദ്മനാഭ സഹോദരീ ॥ 65 ॥ ഉന്മേഷ നിമിഷോത്പന്ന വിപന്ന ഭുവനാവലിഃ । സഹസ്രശീർഷവദനാ, സഹസ്രാക്ഷീ, സഹസ്രപാത് ॥ 66 ॥ ആബ്രഹ്മ കീടജനനീ, വർണാശ്രമ വിധായിനീ । നിജാജ്ഞാരൂപനിഗമാ, പുണ്യാപുണ്യ ഫലപ്രദാ ॥ 67 ॥ ശ്രുതി സീമന്ത സിന്ധൂരീകൃത പാദാബ്ജധൂലികാ । സകലാഗമ സന്ദോഹ ശുക്തിസമ്പുട മൗക്തികാ ॥ 68 ॥ പുരുഷാർഥപ്രദാ, പൂർണാ, ഭോഗിനീ, ഭുവനേശ്വരീ । അംബികാ,ഽനാദി നിധനാ, ഹരിബ്രഹ്മേന്ദ്ര സേവിതാ ॥ 69 ॥ നാരായണീ, നാദരൂപാ, നാമരൂപ വിവർജിതാ । ഹ്രീങ്കാരീ, ഹ്രീമതീ, ഹൃദ്യാ, ഹേയോപാദേയ വർജിതാ ॥ 70 ॥ രാജരാജാർചിതാ, രാജ്ഞീ, രമ്യാ, രാജീവലോചനാ । രഞ്ജനീ, രമണീ, രസ്യാ, രണത്കിങ്കിണി മേഖലാ ॥ 71 ॥ രമാ, രാകേന്ദുവദനാ, രതിരൂപാ, രതിപ്രിയാ । രക്ഷാകരീ, രാക്ഷസഘ്നീ, രാമാ, രമണലമ്പടാ ॥ 72 ॥ കാമ്യാ, കാമകലാരൂപാ, കദംബ കുസുമപ്രിയാ । കല്യാണീ, ജഗതീകന്ദാ, കരുണാരസ സാഗരാ ॥ 73 ॥ കലാവതീ, കലാലാപാ, കാന്താ, കാദംബരീപ്രിയാ । വരദാ, വാമനയനാ, വാരുണീമദവിഹ്വലാ ॥ 74 ॥ വിശ്വാധികാ, വേദവേദ്യാ, വിന്ധ്യാചല നിവാസിനീ । വിധാത്രീ, വേദജനനീ, വിഷ്ണുമായാ, വിലാസിനീ ॥ 75 ॥ ക്ഷേത്രസ്വരൂപാ, ക്ഷേത്രേശീ, ക്ഷേത്ര ക്ഷേത്രജ്ഞ പാലിനീ । ക്ഷയവൃദ്ധി വിനിർമുക്താ, ക്ഷേത്രപാല സമർചിതാ ॥ 76 ॥ വിജയാ, വിമലാ, വന്ദ്യാ, വന്ദാരു ജനവത്സലാ । വാഗ്വാദിനീ, വാമകേശീ, വഹ്നിമണ്ഡല വാസിനീ ॥ 77 ॥ ഭക്തിമത്-കല്പലതികാ, പശുപാശ വിമോചനീ । സംഹൃതാശേഷ പാഷണ്ഡാ, സദാചാര പ്രവർതികാ ॥ 78 ॥ താപത്രയാഗ്നി സന്തപ്ത സമാഹ്ലാദന ചന്ദ്രികാ । തരുണീ, താപസാരാധ്യാ, തനുമധ്യാ, തമോഽപഹാ ॥ 79 ॥ ചിതി, സ്തത്പദലക്ഷ്യാർഥാ, ചിദേക രസരൂപിണീ । സ്വാത്മാനന്ദലവീഭൂത ബ്രഹ്മാദ്യാനന്ദ സന്തതിഃ ॥ 80 ॥ പരാ, പ്രത്യക്ചിതീ രൂപാ, പശ്യന്തീ, പരദേവതാ । മധ്യമാ, വൈഖരീരൂപാ, ഭക്തമാനസ ഹംസികാ ॥ 81 ॥ കാമേശ്വര പ്രാണനാഡീ, കൃതജ്ഞാ, കാമപൂജിതാ । ശൃംഗാര രസസമ്പൂർണാ, ജയാ, ജാലന്ധരസ്ഥിതാ ॥ 82 ॥ ഓഡ്യാണ പീഠനിലയാ, ബിന്ദുമണ്ഡല വാസിനീ । രഹോയാഗ ക്രമാരാധ്യാ, രഹസ്തർപണ തർപിതാ ॥ 83 ॥ സദ്യഃ പ്രസാദിനീ, വിശ്വസാക്ഷിണീ, സാക്ഷിവർജിതാ । ഷഡംഗദേവതാ യുക്താ, ഷാഡ്ഗുണ്യ പരിപൂരിതാ ॥ 84 ॥ നിത്യക്ലിന്നാ, നിരുപമാ, നിർവാണ സുഖദായിനീ । നിത്യാ, ഷോഡശികാരൂപാ, ശ്രീകണ്ഠാർധ ശരീരിണീ ॥ 85 ॥ പ്രഭാവതീ, പ്രഭാരൂപാ, പ്രസിദ്ധാ, പരമേശ്വരീ । മൂലപ്രകൃതി രവ്യക്താ, വ്യക്താഽവ്യക്ത സ്വരൂപിണീ ॥ 86 ॥ വ്യാപിനീ, വിവിധാകാരാ, വിദ്യാഽവിദ്യാ സ്വരൂപിണീ । മഹാകാമേശ നയനാ കുമുദാഹ്ലാദ കൗമുദീ ॥ 87 ॥ ഭക്തഹാർദ തമോഭേദ ഭാനുമദ്-ഭാനുസന്തതിഃ । ശിവദൂതീ, ശിവാരാധ്യാ, ശിവമൂർതി, ശ്ശിവങ്കരീ ॥ 88 ॥ ശിവപ്രിയാ, ശിവപരാ, ശിഷ്ടേഷ്ടാ, ശിഷ്ടപൂജിതാ । അപ്രമേയാ, സ്വപ്രകാശാ, മനോവാചാമ ഗോചരാ ॥ 89 ॥ ചിച്ഛക്തി, ശ്ചേതനാരൂപാ, ജഡശക്തി, ര്ജഡാത്മികാ । ഗായത്രീ, വ്യാഹൃതി, സ്സന്ധ്യാ, ദ്വിജബൃന്ദ നിഷേവിതാ ॥ 90 ॥ തത്ത്വാസനാ, തത്ത്വമയീ, പഞ്ചകോശാന്തരസ്ഥിതാ । നിസ്സീമമഹിമാ, നിത്യയൗവനാ, മദശാലിനീ ॥ 91 ॥ മദഘൂർണിത രക്താക്ഷീ, മദപാടല ഗണ്ഡഭൂഃ । ചന്ദന ദ്രവദിഗ്ധാംഗീ, ചാമ്പേയ കുസുമ പ്രിയാ ॥ 92 ॥ കുശലാ, കോമലാകാരാ, കുരുകുല്ലാ, കുലേശ്വരീ । കുലകുണ്ഡാലയാ, കൗല മാർഗതത്പര സേവിതാ ॥ 93 ॥ കുമാര ഗണനാഥാംബാ, തുഷ്ടിഃ, പുഷ്ടി, ര്മതി, ര്ധൃതിഃ । ശാന്തിഃ, സ്വസ്തിമതീ, കാന്തി, ര്നന്ദിനീ, വിഘ്നനാശിനീ ॥ 94 ॥ തേജോവതീ, ത്രിനയനാ, ലോലാക്ഷീ കാമരൂപിണീ । മാലിനീ, ഹംസിനീ, മാതാ, മലയാചല വാസിനീ ॥ 95 ॥ സുമുഖീ, നലിനീ, സുഭ്രൂഃ, ശോഭനാ, സുരനായികാ । കാലകണ്ഠീ, കാന്തിമതീ, ക്ഷോഭിണീ, സൂക്ഷ്മരൂപിണീ ॥ 96 ॥ വജ്രേശ്വരീ, വാമദേവീ, വയോഽവസ്ഥാ വിവർജിതാ । സിദ്ധേശ്വരീ, സിദ്ധവിദ്യാ, സിദ്ധമാതാ, യശസ്വിനീ ॥ 97 ॥ വിശുദ്ധി ചക്രനിലയാ,ഽഽരക്തവർണാ, ത്രിലോചനാ । ഖട്വാംഗാദി പ്രഹരണാ, വദനൈക സമന്വിതാ ॥ 98 ॥ പായസാന്നപ്രിയാ, ത്വക്​സ്ഥാ, പശുലോക ഭയങ്കരീ । അമൃതാദി മഹാശക്തി സംവൃതാ, ഡാകിനീശ്വരീ ॥ 99 ॥ അനാഹതാബ്ജ നിലയാ, ശ്യാമാഭാ, വദനദ്വയാ । ദംഷ്ട്രോജ്ജ്വലാ,ഽക്ഷമാലാധിധരാ, രുധിര സംസ്ഥിതാ ॥ 100 ॥ കാലരാത്ര്യാദി ശക്ത്യോഘവൃതാ, സ്നിഗ്ധൗദനപ്രിയാ । മഹാവീരേന്ദ്ര വരദാ, രാകിണ്യംബാ സ്വരൂപിണീ ॥ 101 ॥ മണിപൂരാബ്ജ നിലയാ, വദനത്രയ സംയുതാ । വജ്രാധികായുധോപേതാ, ഡാമര്യാദിഭി രാവൃതാ ॥ 102 ॥ രക്തവർണാ, മാംസനിഷ്ഠാ, ഗുഡാന്ന പ്രീതമാനസാ । സമസ്ത ഭക്തസുഖദാ, ലാകിന്യംബാ സ്വരൂപിണീ ॥ 103 ॥ സ്വാധിഷ്ഠാനാംബു ജഗതാ, ചതുർവക്ത്ര മനോഹരാ । ശൂലാദ്യായുധ സമ്പന്നാ, പീതവർണാ,ഽതിഗർവിതാ ॥ 104 ॥ മേദോനിഷ്ഠാ, മധുപ്രീതാ, ബന്ദിന്യാദി സമന്വിതാ । ദധ്യന്നാസക്ത ഹൃദയാ, കാകിനീ-രൂപധാരിണീ ॥ 105 ॥ മൂലാ ധാരാംബുജാരൂഢാ, പഞ്ചവക്ത്രാ,ഽസ്ഥിസംസ്ഥിതാ । അങ്കുശാദി പ്രഹരണാ, വരദാദി നിഷേവിതാ ॥ 106 ॥ മുദ്ഗൗദനാസക്ത ചിത്താ, സാകിന്യംബാസ്വരൂപിണീ । ആജ്ഞാ ചക്രാബ്ജനിലയാ, ശുക്ലവർണാ, ഷഡാനനാ ॥ 107 ॥ മജ്ജാസംസ്ഥാ, ഹംസവതീ-മുഖ്യശക്തി-സമന്വിതാ । ഹരിദ്രാന്നൈക രസികാ, ഹാകിനീ-രൂപധാരിണീ ॥ 108 ॥ സഹസ്രദല പദ്മസ്ഥാ, സർവവർണോപ ശോഭിതാ । സർവായുധധരാ, ശുക്ല സംസ്ഥിതാ, സർവതോമുഖീ ॥ 109 ॥ സർവൗദന പ്രീതചിത്താ, യാകിന്യംബാ സ്വരൂപിണീ । സ്വാഹാ, സ്വധാ,ഽമതി, ര്മേധാ, ശ്രുതിഃ, സ്മൃതി, രനുത്തമാ ॥ 110 ॥ പുണ്യകീർതിഃ, പുണ്യലഭ്യാ, പുണ്യശ്രവണ കീർതനാ । പുലോമജാർചിതാ, ബന്ധമോചനീ, ബന്ധുരാലകാ ॥ 111 ॥ വിമർശരൂപിണീ, വിദ്യാ, വിയദാദി ജഗത്പ്രസൂഃ । സർവവ്യാധി പ്രശമനീ, സർവമൃത്യു നിവാരിണീ ॥ 112 ॥ അഗ്രഗണ്യാ,ഽചിന്ത്യരൂപാ, കലികല്മഷ നാശിനീ । കാത്യായിനീ, കാലഹന്ത്രീ, കമലാക്ഷ നിഷേവിതാ ॥ 113 ॥ താംബൂല പൂരിത മുഖീ, ദാഡിമീ കുസുമപ്രഭാ । മൃഗാക്ഷീ, മോഹിനീ, മുഖ്യാ, മൃഡാനീ, മിത്രരൂപിണീ ॥ 114 ॥ നിത്യതൃപ്താ, ഭക്തനിധി, ര്നിയന്ത്രീ, നിഖിലേശ്വരീ । മൈത്ര്യാദി വാസനാലഭ്യാ, മഹാപ്രലയ സാക്ഷിണീ ॥ 115 ॥ പരാശക്തിഃ, പരാനിഷ്ഠാ, പ്രജ്ഞാന ഘനരൂപിണീ । മാധ്വീപാനാലസാ, മത്താ, മാതൃകാ വർണ രൂപിണീ ॥ 116 ॥ മഹാകൈലാസ നിലയാ, മൃണാല മൃദുദോർലതാ । മഹനീയാ, ദയാമൂർതീ, ര്മഹാസാമ്രാജ്യശാലിനീ ॥ 117 ॥ ആത്മവിദ്യാ, മഹാവിദ്യാ, ശ്രീവിദ്യാ, കാമസേവിതാ । ശ്രീഷോഡശാക്ഷരീ വിദ്യാ, ത്രികൂടാ, കാമകോടികാ ॥ 118 ॥ കടാക്ഷകിങ്കരീ ഭൂത കമലാ കോടിസേവിതാ । ശിരഃസ്ഥിതാ, ചന്ദ്രനിഭാ, ഫാലസ്ഥേന്ദ്ര ധനുഃപ്രഭാ ॥ 119 ॥ ഹൃദയസ്ഥാ, രവിപ്രഖ്യാ, ത്രികോണാന്തര ദീപികാ । ദാക്ഷായണീ, ദൈത്യഹന്ത്രീ, ദക്ഷയജ്ഞ വിനാശിനീ ॥ 120 ॥ ദരാന്ദോലിത ദീർഘാക്ഷീ, ദരഹാസോജ്ജ്വലന്മുഖീ । ഗുരുമൂർതി, ര്ഗുണനിധി, ര്ഗോമാതാ, ഗുഹജന്മഭൂഃ ॥ 121 ॥ ദേവേശീ, ദണ്ഡനീതിസ്ഥാ, ദഹരാകാശ രൂപിണീ । പ്രതിപന്മുഖ്യ രാകാന്ത തിഥിമണ്ഡല പൂജിതാ ॥ 122 ॥ കലാത്മികാ, കലാനാഥാ, കാവ്യാലാപ വിനോദിനീ । സചാമര രമാവാണീ സവ്യദക്ഷിണ സേവിതാ ॥ 123 ॥ ആദിശക്തി, രമേയാ,ഽഽത്മാ, പരമാ, പാവനാകൃതിഃ । അനേകകോടി ബ്രഹ്മാണ്ഡ ജനനീ, ദിവ്യവിഗ്രഹാ ॥ 124 ॥ ക്ലീങ്കാരീ, കേവലാ, ഗുഹ്യാ, കൈവല്യ പദദായിനീ । ത്രിപുരാ, ത്രിജഗദ്വന്ദ്യാ, ത്രിമൂർതി, സ്ത്രിദശേശ്വരീ ॥ 125 ॥ ത്ര്യക്ഷരീ, ദിവ്യഗന്ധാഢ്യാ, സിന്ധൂര തിലകാഞ്ചിതാ । ഉമാ, ശൈലേന്ദ്രതനയാ, ഗൗരീ, ഗന്ധർവ സേവിതാ ॥ 126 ॥ വിശ്വഗർഭാ, സ്വർണഗർഭാ,ഽവരദാ വാഗധീശ്വരീ । ധ്യാനഗമ്യാ,ഽപരിച്ഛേദ്യാ, ജ്ഞാനദാ, ജ്ഞാനവിഗ്രഹാ ॥ 127 ॥ സർവവേദാന്ത സംവേദ്യാ, സത്യാനന്ദ സ്വരൂപിണീ । ലോപാമുദ്രാർചിതാ, ലീലാകൢപ്ത ബ്രഹ്മാണ്ഡമണ്ഡലാ ॥ 128 ॥ അദൃശ്യാ, ദൃശ്യരഹിതാ, വിജ്ഞാത്രീ, വേദ്യവർജിതാ । യോഗിനീ, യോഗദാ, യോഗ്യാ, യോഗാനന്ദാ, യുഗന്ധരാ ॥ 129 ॥ ഇച്ഛാശക്തി ജ്ഞാനശക്തി ക്രിയാശക്തി സ്വരൂപിണീ । സർവാധാരാ, സുപ്രതിഷ്ഠാ, സദസദ്-രൂപധാരിണീ ॥ 130 ॥ അഷ്ടമൂർതി, രജാജൈത്രീ, ലോകയാത്രാ വിധായിനീ । ഏകാകിനീ, ഭൂമരൂപാ, നിർദ്വൈതാ, ദ്വൈതവർജിതാ ॥ 131 ॥ അന്നദാ, വസുദാ, വൃദ്ധാ, ബ്രഹ്മാത്മൈക്യ സ്വരൂപിണീ । ബൃഹതീ, ബ്രാഹ്മണീ, ബ്രാഹ്മീ, ബ്രഹ്മാനന്ദാ, ബലിപ്രിയാ ॥ 132 ॥ ഭാഷാരൂപാ, ബൃഹത്സേനാ, ഭാവാഭാവ വിവർജിതാ । സുഖാരാധ്യാ, ശുഭകരീ, ശോഭനാ സുലഭാഗതിഃ ॥ 133 ॥ രാജരാജേശ്വരീ, രാജ്യദായിനീ, രാജ്യവല്ലഭാ । രാജത്-കൃപാ, രാജപീഠ നിവേശിത നിജാശ്രിതാഃ ॥ 134 ॥ രാജ്യലക്ഷ്മീഃ, കോശനാഥാ, ചതുരംഗ ബലേശ്വരീ । സാമ്രാജ്യദായിനീ, സത്യസന്ധാ, സാഗരമേഖലാ ॥ 135 ॥ ദീക്ഷിതാ, ദൈത്യശമനീ, സർവലോക വശങ്കരീ । സർവാർഥദാത്രീ, സാവിത്രീ, സച്ചിദാനന്ദ രൂപിണീ ॥ 136 ॥ ദേശകാലാഽപരിച്ഛിന്നാ, സർവഗാ, സർവമോഹിനീ । സരസ്വതീ, ശാസ്ത്രമയീ, ഗുഹാംബാ, ഗുഹ്യരൂപിണീ ॥ 137 ॥ സർവോപാധി വിനിർമുക്താ, സദാശിവ പതിവ്രതാ । സമ്പ്രദായേശ്വരീ, സാധ്വീ, ഗുരുമണ്ഡല രൂപിണീ ॥ 138 ॥ കുലോത്തീർണാ, ഭഗാരാധ്യാ, മായാ, മധുമതീ, മഹീ । ഗണാംബാ, ഗുഹ്യകാരാധ്യാ, കോമലാംഗീ, ഗുരുപ്രിയാ ॥ 139 ॥ സ്വതന്ത്രാ, സർവതന്ത്രേശീ, ദക്ഷിണാമൂർതി രൂപിണീ । സനകാദി സമാരാധ്യാ, ശിവജ്ഞാന പ്രദായിനീ ॥ 140 ॥ ചിത്കലാ,ഽനന്ദകലികാ, പ്രേമരൂപാ, പ്രിയങ്കരീ । നാമപാരായണ പ്രീതാ, നന്ദിവിദ്യാ, നടേശ്വരീ ॥ 141 ॥ മിഥ്യാ ജഗദധിഷ്ഠാനാ മുക്തിദാ, മുക്തിരൂപിണീ । ലാസ്യപ്രിയാ, ലയകരീ, ലജ്ജാ, രംഭാദി വന്ദിതാ ॥ 142 ॥ ഭവദാവ സുധാവൃഷ്ടിഃ, പാപാരണ്യ ദവാനലാ । ദൗർഭാഗ്യതൂല വാതൂലാ, ജരാധ്വാന്ത രവിപ്രഭാ ॥ 143 ॥ ഭാഗ്യാബ്ധിചന്ദ്രികാ, ഭക്തചിത്തകേകി ഘനാഘനാ । രോഗപർവത ദംഭോലി, ര്മൃത്യുദാരു കുഠാരികാ ॥ 144 ॥ മഹേശ്വരീ, മഹാകാലീ, മഹാഗ്രാസാ, മഹാഽശനാ । അപർണാ, ചണ്ഡികാ, ചണ്ഡമുണ്ഡാഽസുര നിഷൂദിനീ ॥ 145 ॥ ക്ഷരാക്ഷരാത്മികാ, സർവലോകേശീ, വിശ്വധാരിണീ । ത്രിവർഗദാത്രീ, സുഭഗാ, ത്ര്യംബകാ, ത്രിഗുണാത്മികാ ॥ 146 ॥ സ്വർഗാപവർഗദാ, ശുദ്ധാ, ജപാപുഷ്പ നിഭാകൃതിഃ । ഓജോവതീ, ദ്യുതിധരാ, യജ്ഞരൂപാ, പ്രിയവ്രതാ ॥ 147 ॥ ദുരാരാധ്യാ, ദുരാദർഷാ, പാടലീ കുസുമപ്രിയാ । മഹതീ, മേരുനിലയാ, മന്ദാര കുസുമപ്രിയാ ॥ 148 ॥ വീരാരാധ്യാ, വിരാഡ്രൂപാ, വിരജാ, വിശ്വതോമുഖീ । പ്രത്യഗ്രൂപാ, പരാകാശാ, പ്രാണദാ, പ്രാണരൂപിണീ ॥ 149 ॥ മാർതാണ്ഡ ഭൈരവാരാധ്യാ, മന്ത്രിണീ ന്യസ്തരാജ്യധൂഃ । ത്രിപുരേശീ, ജയത്സേനാ, നിസ്ത്രൈഗുണ്യാ, പരാപരാ ॥ 150 ॥ സത്യജ്ഞാനാഽനന്ദരൂപാ, സാമരസ്യ പരായണാ । കപർദിനീ, കലാമാലാ, കാമധുക്,കാമരൂപിണീ ॥ 151 ॥ കലാനിധിഃ, കാവ്യകലാ, രസജ്ഞാ, രസശേവധിഃ । പുഷ്ടാ, പുരാതനാ, പൂജ്യാ, പുഷ്കരാ, പുഷ്കരേക്ഷണാ ॥ 152 ॥ പരഞ്ജ്യോതിഃ, പരന്ധാമ, പരമാണുഃ, പരാത്പരാ । പാശഹസ്താ, പാശഹന്ത്രീ, പരമന്ത്ര വിഭേദിനീ ॥ 153 ॥ മൂർതാ,ഽമൂർതാ,ഽനിത്യതൃപ്താ, മുനി മാനസ ഹംസികാ । സത്യവ്രതാ, സത്യരൂപാ, സർവാന്തര്യാമിനീ, സതീ ॥ 154 ॥ ബ്രഹ്മാണീ, ബ്രഹ്മജനനീ, ബഹുരൂപാ, ബുധാർചിതാ । പ്രസവിത്രീ, പ്രചണ്ഡാഽജ്ഞാ, പ്രതിഷ്ഠാ, പ്രകടാകൃതിഃ ॥ 155 ॥ പ്രാണേശ്വരീ, പ്രാണദാത്രീ, പഞ്ചാശത്-പീഠരൂപിണീ । വിശൃംഖലാ, വിവിക്തസ്ഥാ, വീരമാതാ, വിയത്പ്രസൂഃ ॥ 156 ॥ മുകുന്ദാ, മുക്തി നിലയാ, മൂലവിഗ്രഹ രൂപിണീ । ഭാവജ്ഞാ, ഭവരോഗഘ്നീ ഭവചക്ര പ്രവർതിനീ ॥ 157 ॥ ഛന്ദസ്സാരാ, ശാസ്ത്രസാരാ, മന്ത്രസാരാ, തലോദരീ । ഉദാരകീർതി, രുദ്ദാമവൈഭവാ, വർണരൂപിണീ ॥ 158 ॥ ജന്മമൃത്യു ജരാതപ്ത ജന വിശ്രാന്തി ദായിനീ । സർവോപനിഷ ദുദ്ഘുഷ്ടാ, ശാന്ത്യതീത കലാത്മികാ ॥ 159 ॥ ഗംഭീരാ, ഗഗനാന്തഃസ്ഥാ, ഗർവിതാ, ഗാനലോലുപാ । കല്പനാരഹിതാ, കാഷ്ഠാ, കാന്താ, കാന്താർധ വിഗ്രഹാ ॥ 160 ॥ കാര്യകാരണ നിർമുക്താ, കാമകേലി തരംഗിതാ । കനത്-കനകതാടങ്കാ, ലീലാവിഗ്രഹ ധാരിണീ ॥ 161 ॥ അജാക്ഷയ വിനിർമുക്താ, മുഗ്ധാ ക്ഷിപ്രപ്രസാദിനീ । അന്തർമുഖ സമാരാധ്യാ, ബഹിർമുഖ സുദുർലഭാ ॥ 162 ॥ ത്രയീ, ത്രിവർഗ നിലയാ, ത്രിസ്ഥാ, ത്രിപുരമാലിനീ । നിരാമയാ, നിരാലംബാ, സ്വാത്മാരാമാ, സുധാസൃതിഃ ॥ 163 ॥ സംസാരപങ്ക നിർമഗ്ന സമുദ്ധരണ പണ്ഡിതാ । യജ്ഞപ്രിയാ, യജ്ഞകർത്രീ, യജമാന സ്വരൂപിണീ ॥ 164 ॥ ധർമാധാരാ, ധനാധ്യക്ഷാ, ധനധാന്യ വിവർധിനീ । വിപ്രപ്രിയാ, വിപ്രരൂപാ, വിശ്വഭ്രമണ കാരിണീ ॥ 165 ॥ വിശ്വഗ്രാസാ, വിദ്രുമാഭാ, വൈഷ്ണവീ, വിഷ്ണുരൂപിണീ । അയോനി, ര്യോനിനിലയാ, കൂടസ്ഥാ, കുലരൂപിണീ ॥ 166 ॥ വീരഗോഷ്ഠീപ്രിയാ, വീരാ, നൈഷ്കർമ്യാ, നാദരൂപിണീ । വിജ്ഞാന കലനാ, കല്യാ വിദഗ്ധാ, ബൈന്ദവാസനാ ॥ 167 ॥ തത്ത്വാധികാ, തത്ത്വമയീ, തത്ത്വമർഥ സ്വരൂപിണീ । സാമഗാനപ്രിയാ, സൗമ്യാ, സദാശിവ കുടുംബിനീ ॥ 168 ॥ സവ്യാപസവ്യ മാർഗസ്ഥാ, സർവാപദ്വി നിവാരിണീ । സ്വസ്ഥാ, സ്വഭാവമധുരാ, ധീരാ, ധീര സമർചിതാ ॥ 169 ॥ ചൈതന്യാർഘ്യ സമാരാധ്യാ, ചൈതന്യ കുസുമപ്രിയാ । സദോദിതാ, സദാതുഷ്ടാ, തരുണാദിത്യ പാടലാ ॥ 170 ॥ ദക്ഷിണാ, ദക്ഷിണാരാധ്യാ, ദരസ്മേര മുഖാംബുജാ । കൗലിനീ കേവലാ,ഽനർഘ്യാ കൈവല്യ പദദായിനീ ॥ 171 ॥ സ്തോത്രപ്രിയാ, സ്തുതിമതീ, ശ്രുതിസംസ്തുത വൈഭവാ । മനസ്വിനീ, മാനവതീ, മഹേശീ, മംഗലാകൃതിഃ ॥ 172 ॥ വിശ്വമാതാ, ജഗദ്ധാത്രീ, വിശാലാക്ഷീ, വിരാഗിണീ। പ്രഗൽഭാ, പരമോദാരാ, പരാമോദാ, മനോമയീ ॥ 173 ॥ വ്യോമകേശീ, വിമാനസ്ഥാ, വജ്രിണീ, വാമകേശ്വരീ । പഞ്ചയജ്ഞപ്രിയാ, പഞ്ചപ്രേത മഞ്ചാധിശായിനീ ॥ 174 ॥ പഞ്ചമീ, പഞ്ചഭൂതേശീ, പഞ്ച സംഖ്യോപചാരിണീ । ശാശ്വതീ, ശാശ്വതൈശ്വര്യാ, ശർമദാ, ശംഭുമോഹിനീ ॥ 175 ॥ ധരാ, ധരസുതാ, ധന്യാ, ധർമിണീ, ധർമവർധിനീ । ലോകാതീതാ, ഗുണാതീതാ, സർവാതീതാ, ശമാത്മികാ ॥ 176 ॥ ബന്ധൂക കുസുമ പ്രഖ്യാ, ബാലാ, ലീലാവിനോദിനീ । സുമംഗലീ, സുഖകരീ, സുവേഷാഡ്യാ, സുവാസിനീ ॥ 177 ॥ സുവാസിന്യർചനപ്രീതാ, ശോഭനാ, ശുദ്ധ മാനസാ । ബിന്ദു തർപണ സന്തുഷ്ടാ, പൂർവജാ, ത്രിപുരാംബികാ ॥ 178 ॥ ദശമുദ്രാ സമാരാധ്യാ, ത്രിപുരാ ശ്രീവശങ്കരീ । ജ്ഞാനമുദ്രാ, ജ്ഞാനഗമ്യാ, ജ്ഞാനജ്ഞേയ സ്വരൂപിണീ ॥ 179 ॥ യോനിമുദ്രാ, ത്രിഖണ്ഡേശീ, ത്രിഗുണാംബാ, ത്രികോണഗാ । അനഘാദ്ഭുത ചാരിത്രാ, വാഞ്ഛിതാർഥ പ്രദായിനീ ॥ 180 ॥ അഭ്യാസാതി ശയജ്ഞാതാ, ഷഡധ്വാതീത രൂപിണീ । അവ്യാജ കരുണാമൂർതി, രജ്ഞാനധ്വാന്ത ദീപികാ ॥ 181 ॥ ആബാലഗോപ വിദിതാ, സർവാനുല്ലംഘ്യ ശാസനാ । ശ്രീ ചക്രരാജനിലയാ, ശ്രീമത്ത്രിപുര സുന്ദരീ ॥ 182 ॥ ശ്രീ ശിവാ, ശിവശക്ത്യൈക്യ രൂപിണീ, ലലിതാംബികാ । ഏവം ശ്രീലലിതാദേവ്യാ നാമ്നാം സാഹസ്രകം ജഗുഃ ॥ 183 ॥ ॥ ഇതി ശ്രീ ലലിതാ സഹസ്രനാമ സ്തോത്രം ॥