हैंహైHaindavamஹிહિં
📍
Font Size:
மணித்³வீப வர்ணன
(ஶ்ரீதே³வீபா⁴க³வதம்ʼ, த்³வாத³ஶ ஸ்கந்த⁴ம்ʼ, த³ஶமோ(அ)த்⁴யாய꞉, , மணித்³வீப வர்ணன - 1)
வ்யாஸ உவாச –
ப்³ரஹ்மலோகாதூ³ர்த்⁴வபா⁴கே³ ஸர்வலோகோ(அ)ஸ்தி ய꞉ ஶ்ருத꞉ ।
மணித்³வீப꞉ ஸ ஏவாஸ்தி யத்ர தே³வீ விராஜதே ॥ 1 ॥
ஸர்வஸ்மாத³தி⁴கோ யஸ்மாத்ஸர்வலோகஸ்தத꞉ ஸ்ம்ருʼத꞉ ।
புரா பராம்ப³யைவாயம்ʼ கல்பிதோ மனஸேச்ச²யா ॥ 2 ॥
ஸர்வாதௌ³ நிஜவாஸார்த²ம்ʼ ப்ரக்ருʼத்யா மூலபூ⁴தயா ।
கைலாஸாத³தி⁴கோ லோகோ வைகுண்டா²த³பி சோத்தம꞉ ॥ 3 ॥
கோ³லோகாத³பி ஸர்வஸ்மாத்ஸர்வலோகோ(அ)தி⁴க꞉ ஸ்ம்ருʼத꞉ ।
நைதத்ஸமம்ʼ த்ரிலோக்யாம்ʼ து ஸுந்த³ரம்ʼ வித்³யதே க்வசித் ॥ 4 ॥
ச²த்ரீபூ⁴தம்ʼ த்ரிஜக³தோ ப⁴வஸந்தாபநாஶகம் ।
சா²யாபூ⁴தம்ʼ ததே³வாஸ்தி ப்³ரஹ்மாண்டா³னாம்ʼ து ஸத்தம ॥ 5 ॥
ப³ஹுயோஜனவிஸ்தீர்ணோ க³ம்பீ⁴ரஸ்தாவதே³வ ஹி ।
மணித்³வீபஸ்ய பரிதோ வர்ததே து ஸுதோ⁴த³தி⁴꞉ ॥ 6 ॥
மருத்ஸங்க⁴ட்டனோத்கீர்ணதரங்க³ ஶதஸங்குல꞉ ।
ரத்னாச்ச²வாலுகாயுக்தோ ஜ²ஷஶங்க²ஸமாகுல꞉ ॥ 7 ॥
வீசிஸங்க⁴ர்ஷஸஞ்ஜாதலஹரீகணஶீதல꞉ ।
நானாத்⁴வஜஸமாயுக்தா நானாபோதக³தாக³தை꞉ ॥ 8 ॥
விராஜமான꞉ பரிதஸ்தீரரத்னத்³ருமோ மஹான் ।
தது³த்தரமயோதா⁴துநிர்மிதோ க³க³னே தத꞉ ॥ 9 ॥
ஸப்தயோஜனவிஸ்தீர்ண꞉ ப்ராகாரோ வர்ததே மஹான் ।
நாநாஶஸ்த்ரப்ரஹரணா நானாயுத்³த⁴விஶாரதா³꞉ ॥ 10 ॥
ரக்ஷகா நிவஸந்த்யத்ர மோத³மானா꞉ ஸமந்தத꞉ ।
சதுர்த்³வாரஸமாயுக்தோ த்³வாரபாலஶதான்வித꞉ ॥ 11 ॥
நாநாக³ணை꞉ பரிவ்ருʼதோ தே³வீப⁴க்தியுதைர்ந்ருʼப ।
த³ர்ஶனார்த²ம்ʼ ஸமாயாந்தி யே தே³வா ஜக³தீ³ஶிது꞉ ॥ 12 ॥
தேஷாம்ʼ க³ணா வஸந்த்யத்ர வாஹனானி ச தத்ர ஹி ।
விமானஶதஸங்க⁴ர்ஷக⁴ண்டாஸ்வனஸமாகுல꞉ ॥ 13 ॥
ஹயஹேஷாகு²ராகா⁴தப³தி⁴ரீக்ருʼததி³ம்ʼமுக²꞉ ।
க³ணை꞉ கிலகிலாராவைர்வேத்ரஹஸ்தைஶ்ச தாடி³தா꞉ ॥ 14 ॥
ஸேவகா தே³வஸங்கா³னாம்ʼ ப்⁴ராஜந்தே தத்ர பூ⁴மிப ।
தஸ்மிங்கோலாஹலே ராஜன்னஶப்³த³꞉ கேனசித்க்வசித் ॥ 15 ॥
கஸ்யசிச்ச்²ரூயதே(அ)த்யந்தம்ʼ நானாத்⁴வநிஸமாகுலே ।
பதே³ பதே³ மிஷ்டவாரிபரிபூர்ணஸரான்ஸி ச ॥ 16 ॥
வாடிகா விவிதா⁴ ராஜன் ரத்னத்³ருமவிராஜிதா꞉ ।
தது³த்தரம்ʼ மஹாஸாரதா⁴துநிர்மிதமண்ட³ல꞉ ॥ 17 ॥
ஸாலோ(அ)பரோ மஹானஸ்தி க³க³னஸ்பர்ஶி யச்சி²ர꞉ ।
தேஜஸா ஸ்யாச்ச²தகு³ண꞉ பூர்வஸாலாத³யம்ʼ பர꞉ ॥ 18 ॥
கோ³புரத்³வாரஸஹிதோ ப³ஹுவ்ருʼக்ஷஸமன்வித꞉ ।
யா வ்ருʼக்ஷஜாதய꞉ ஸந்தி ஸர்வாஸ்தாஸ்தத்ர ஸந்தி ச ॥ 19 ॥
நிரந்தரம்ʼ புஷ்பயுதா꞉ ஸதா³ ப²லஸமன்விதா꞉ ।
நவபல்லவஸம்ʼயுக்தா꞉ பரஸௌரப⁴ஸங்குலா꞉ ॥ 20 ॥
பனஸா ப³குலா லோத்⁴ரா꞉ கர்ணிகாராஶ்ச ஶிம்ʼஶபா꞉ ।
தே³வதா³ருகாஞ்சனாரா ஆம்ராஶ்சைவ ஸுமேரவ꞉ ॥ 21 ॥
லிகுசா ஹிங்கு³லாஶ்சைலா லவங்கா³꞉ கட்ப²லாஸ்ததா² ।
பாடலா முசுகுந்தா³ஶ்ச ப²லின்யோ ஜக⁴னேப²லா꞉ ॥ 22 ॥
தாலாஸ்தமாலா꞉ ஸாலாஶ்ச கங்கோலா நாக³ப⁴த்³ரகா꞉ ।
புந்நாகா³꞉ பீலவ꞉ ஸால்வகா வை கர்பூரஶாகி²ன꞉ ॥ 23 ॥
அஶ்வகர்ணா ஹஸ்திகர்ணாஸ்தாலபர்ணாஶ்ச தா³டி³மா꞉ ।
க³ணிகா ப³ந்து⁴ஜீவாஶ்ச ஜம்பீ³ராஶ்ச குரண்ட³கா꞉ ॥ 24 ॥
சாம்பேயா ப³ந்து⁴ஜீவாஶ்ச ததா² வை கனகத்³ருமா꞉ ।
காலாகு³ருத்³ருமாஶ்சைவ ததா² சந்த³னபாத³பா꞉ ॥ 25 ॥
க²ர்ஜூரா யூதி²காஸ்தாலபர்ண்யஶ்சைவ ததே²க்ஷவ꞉ ।
க்ஷீரவ்ருʼக்ஷாஶ்ச க²தி³ராஶ்சிஞ்சாப⁴ல்லாதகாஸ்ததா² ॥ 26 ॥
ருசகா꞉ குடஜா வ்ருʼக்ஷா பி³ல்வவ்ருʼக்ஷாஸ்ததை²வ ச ।
துலஸீனாம்ʼ வனான்யேவம்ʼ மல்லிகானாம்ʼ ததை²வ ச ॥ 27 ॥
இத்யாதி³தருஜாதீனாம்ʼ வனான்யுபவனானி ச ।
நானாவாபீஶதைர்யுக்தான்யேவம்ʼ ஸந்தி த⁴ராதி⁴ப ॥ 28 ॥
கோகிலாராவஸம்ʼயுக்தா கு³ன்ஜத்³ப்⁴ரமரபூ⁴ஷிதா꞉ ।
நிர்யாஸஸ்ராவிண꞉ ஸர்வே ஸ்னிக்³த⁴ச்சா²யாஸ்தரூத்தமா꞉ ॥ 29 ॥
நானாருʼதுப⁴வா வ்ருʼக்ஷா நானாபக்ஷிஸமாகுலா꞉ ।
நானாரஸஸ்ராவிணீபி⁴ர்நதீ³பி⁴ரதிஶோபி⁴தா꞉ ॥ 30 ॥
பாராவதஶுகவ்ராதஸாரிகாபக்ஷமாருதை꞉ ।
ஹம்ʼஸபக்ஷஸமுத்³பூ⁴த வாதவ்ராதைஶ்சலத்³த்³ருமம் ॥ 31 ॥
ஸுக³ந்த⁴க்³ராஹிபவனபூரிதம்ʼ தத்³வனோத்தமம் ।
ஸஹிதம்ʼ ஹரிணீயூதை²ர்தா⁴வமானைரிதஸ்தத꞉ ॥ 32 ॥
ந்ருʼத்யத்³ப³ர்ஹிகத³ம்ப³ஸ்ய கேகாராவை꞉ ஸுக²ப்ரதை³꞉ ।
நாதி³தம்ʼ தத்³வனம்ʼ தி³வ்யம்ʼ மது⁴ஸ்ராவி ஸமந்தத꞉ ॥ 33 ॥
காம்ʼஸ்யஸாலாது³த்தரே து தாம்ரஸால꞉ ப்ரகீர்தித꞉ ।
சதுரஸ்ரஸமாகார உன்னத்யா ஸப்தயோஜன꞉ ॥ 34 ॥
த்³வயோஸ்து ஸாலயோர்மத்⁴யே ஸம்ப்ரோக்தா கல்பவாடிகா ।
யேஷாம்ʼ தரூணாம்ʼ புஷ்பாணி காஞ்சநாபா⁴னி பூ⁴மிப ॥ 35 ॥
பத்ராணி காஞ்சநாபா⁴னி ரத்னபீ³ஜப²லானி ச ।
த³ஶயோஜனக³ந்தோ⁴ ஹி ப்ரஸர்பதி ஸமந்தத꞉ ॥ 36 ॥
தத்³வனம்ʼ ரக்ஷிதம்ʼ ராஜன்வஸந்தேனர்துனாநிஶம் ।
புஷ்பஸிம்ʼஹாஸனாஸீன꞉ புஷ்பச்ச²த்ரவிராஜித꞉ ॥ 37 ॥
புஷ்பபூ⁴ஷாபூ⁴ஷிதஶ்ச புஷ்பாஸவவிகூ⁴ர்ணித꞉ ।
மது⁴ஶ்ரீர்மாத⁴வஶ்ரீஶ்ச த்³வே பா⁴ர்யே தஸ்ய ஸம்மதே ॥ 38 ॥
க்ரீட³த꞉ ஸ்மேரவத³னே ஸுமஸ்தப³ககந்து³கை꞉ ।
அதீவ ரம்யம்ʼ விபினம்ʼ மது⁴ஸ்ராவி ஸமந்தத꞉ ॥ 39 ॥
த³ஶயோஜனபர்யந்தம்ʼ குஸுமாமோத³வாயுனா ।
பூரிதம்ʼ தி³வ்யக³ந்த⁴ர்வை꞉ ஸாங்க³னைர்கா³னலோலுபை꞉ ॥ 40 ॥
ஶோபி⁴தம்ʼ தத்³வனம்ʼ தி³வ்யம்ʼ மத்தகோகிலநாதி³தம் ।
வஸந்தலக்ஷ்மீஸம்ʼயுக்தம்ʼ காமிகாமப்ரவர்த⁴னம் ॥ 41 ॥
தாம்ரஸாலாது³த்தரத்ர ஸீஸஸால꞉ ப்ரகீர்தித꞉ ।
ஸமுச்ச்²ராய꞉ ஸ்ம்ருʼதோ(அ)ப்யஸ்ய ஸப்தயோஜனஸங்க்²யயா ॥ 42 ॥
ஸந்தானவாடிகாமத்⁴யே ஸாலயோஸ்து த்³வயோர்ந்ருʼப ।
த³ஶயோஜனக³ந்த⁴ஸ்து ப்ரஸூனானாம்ʼ ஸமந்தத꞉ ॥ 43 ॥
ஹிரண்யாபா⁴னி குஸுமான்யுத்பு²ல்லானி நிரந்தரம் ।
அம்ருʼதத்³ரவஸம்ʼயுக்தப²லானி மது⁴ராணி ச ॥ 44 ॥
க்³ரீஷ்மர்துர்நாயகஸ்தஸ்யா வாடிகாயா ந்ருʼபோத்தம ।
ஶுக்ரஶ்ரீஶ்ச ஶுசிஶ்ரீஶ்ச த்³வே பா⁴ர்யே தஸ்ய ஸம்மதே ॥ 45 ॥
ஸந்தாபத்ரஸ்தலோகாஸ்து வ்ருʼக்ஷமூலேஷு ஸம்ʼஸ்தி²தா꞉ ।
நானாஸித்³தை⁴꞉ பரிவ்ருʼதோ நாநாதே³வை꞉ ஸமன்வித꞉ ॥ 46 ॥
விலாஸினீனாம்ʼ ப்³ருʼந்தை³ஸ்து சந்த³னத்³ரவபங்கிலை꞉ ।
புஷ்பமாலாபூ⁴ஷிதைஸ்து தாலவ்ருʼந்தகராம்பு³ஜை꞉ ॥ 47 ॥
[பாட²பே⁴த³꞉- ப்ராகார꞉]
ப்ரகார꞉ ஶோபி⁴தோ ஏஜச்சீ²தலாம்பு³நிஷேவிபி⁴꞉ ।
ஸீஸஸாலாது³த்தரத்ராப்யாரகூடமய꞉ ஶுப⁴꞉ ॥ 48 ॥
ப்ராகாரோ வர்ததே ராஜன்முநியோஜனதை³ர்க்⁴யவான் ।
ஹரிசந்த³னவ்ருʼக்ஷாணாம்ʼ வாடீ மத்⁴யே தயோ꞉ ஸ்ம்ருʼதா ॥ 49 ॥
ஸாலயோரதி⁴நாத²ஸ்து வர்ஷர்துர்மேக⁴வாஹன꞉ ।
வித்³யுத்பிங்க³லநேத்ரஶ்ச ஜீமூதகவச꞉ ஸ்ம்ருʼத꞉ ॥ 50 ॥
வஜ்ரநிர்கோ⁴ஷமுக²ரஶ்சேந்த்³ரத⁴ன்வா ஸமந்தத꞉ ।
ஸஹஸ்ரஶோ வாரிதா⁴ரா முஞ்சன்னாஸ்தே க³ணாவ்ருʼத꞉ ॥ 51 ॥
நப⁴꞉ ஶ்ரீஶ்ச நப⁴ஸ்யஶ்ரீ꞉ ஸ்வரஸ்யா ரஸ்யமாலினீ ।
அம்பா³ து³லா நிரத்நிஶ்சாப்⁴ரமந்தீ மேக⁴யந்திகா ॥ 52 ॥
வர்ஷயந்தீ சிபு³ணிகா வாரிதா⁴ரா ச ஸம்மதா꞉ ।
வர்ஷர்தோர்த்³வாத³ஶ ப்ரோக்தா꞉ ஶக்தயோ மத³விஹ்வலா꞉ ॥ 53 ॥
நவபல்லவவ்ருʼக்ஷாஶ்ச நவீனலதிகான்விதா꞉ ।
ஹரிதானி த்ருʼணான்யேவ வேஷ்டிதா யைர்த⁴ரா(அ)கி²லா ॥ 54 ॥
நதீ³னத³ப்ரவாஹாஶ்ச ப்ரவஹந்தி ச வேக³த꞉ ।
ஸராம்ʼஸி கலுஷாம்பூ³னி ராகி³சித்தஸமானி ச ॥ 55 ॥
வஸந்தி தே³வா꞉ ஸித்³தா⁴ஶ்ச யே தே³வீகர்மகாரிண꞉ ।
வாபீகூபதடா³கா³ஶ்ச யே தே³வ்யர்த²ம்ʼ ஸமர்பிதா꞉ ॥ 56 ॥
தே க³ணா நிவஸந்த்யத்ர ஸவிலாஸாஶ்ச ஸாங்க³னா꞉ ।
ஆரகூடமயாத³க்³ரே ஸப்தயோஜனதை³ர்க்⁴யவான் ॥ 57 ॥
பஞ்சலோஹாத்மக꞉ ஸாலோ மத்⁴யே மந்தா³ரவாடிகா ।
நானாபுஷ்பலதாகீர்ணா நானாபல்லவஶோபி⁴தா ॥ 58 ॥
அதி⁴ஷ்டா²தா(அ)த்ர ஸம்ப்ரோக்த꞉ ஶரத்³ருʼதுரநாமய꞉ ।
இஷலக்ஷ்மீரூர்ஜலக்ஷ்மீர்த்³வே பா⁴ர்யே தஸ்ய ஸம்மதே ॥ 59 ॥
நானாஸித்³தா⁴ வஸந்த்யத்ர ஸாங்க³னா꞉ ஸபரிச்ச²தா³꞉ ।
பஞ்சலோஹமயாத³க்³ரே ஸப்தயோஜனதை³ர்க்⁴யவான் ॥ 60 ॥
தீ³ப்யமானோ மஹாஶ்ருʼங்கை³ர்வர்ததே ரௌப்யஸாலக꞉ ।
பாரிஜாதாடவீமத்⁴யே ப்ரஸூனஸ்தப³கான்விதா ॥ 61 ॥
த³ஶயோஜனக³ந்தீ⁴னி குஸுமானி ஸமந்தத꞉ ।
மோத³யந்தி க³ணான்ஸர்வான்யே தே³வீகர்மகாரிண꞉ ॥ 62 ॥
தத்ராதி⁴நாத²꞉ ஸம்ப்ரோக்தோ ஹேமந்தர்துர்மஹோஜ்ஜ்வல꞉ ।
ஸக³ண꞉ ஸாயுத⁴꞉ ஸர்வான் ராகி³ணோ ரஞ்ஜயன்னப꞉ ॥ 63 ॥
ஸஹஶ்ரீஶ்ச ஸஹஸ்யஶ்ரீர்த்³வே பா⁴ர்யே தஸ்ய ஸம்மதே ।
வஸந்தி தத்ர ஸித்³தா⁴ஶ்ச யே தே³வீவ்ரதகாரிண꞉ ॥ 64 ॥
ரௌப்யஸாலமயாத³க்³ரே ஸப்தயோஜனதை³ர்க்⁴யவான் ।
ஸௌவர்ணஸால꞉ ஸம்ப்ரோக்தஸ்தப்தஹாடககல்பித꞉ ॥ 65 ॥
மத்⁴யே கத³ம்ப³வாடீ து புஷ்பபல்லவஶோபி⁴தா ।
கத³ம்ப³மதி³ராதா⁴ரா꞉ ப்ரவர்தந்தே ஸஹஸ்ரஶ꞉ ॥ 66 ॥
யாபி⁴ர்னிபீதபீதாபி⁴ர்நிஜானந்தோ³(அ)னுபூ⁴யதே ।
தத்ராதி⁴நாத²꞉ ஸம்ப்ரோக்த꞉ ஶைஶிரர்துர்மஹோத³ய꞉ ॥ 67 ॥
தப꞉ஶ்ரீஶ்ச தபஸ்யஶ்ரீர்த்³வே பா⁴ர்யே தஸ்ய ஸம்மதே ।
மோத³மான꞉ ஸஹைதாப்⁴யாம்ʼ வர்ததே ஶிஶிராக்ருʼதி꞉ ॥ 68 ॥
நானாவிலாஸஸம்ʼயுக்தோ நாநாக³ணஸமாவ்ருʼத꞉ ।
நிவஸந்தி மஹாஸித்³தா⁴ யே தே³வீதா³னகாரிண꞉ ॥ 69 ॥
நாநாபோ⁴க³ஸமுத்பன்னமஹானந்த³ஸமன்விதா꞉ ।
ஸாங்க³னா꞉ பரிவாரைஸ்து ஸங்க⁴ஶ꞉ பரிவாரிதா꞉ ॥ 70 ॥
ஸ்வர்ணஸாலமயாத³க்³ரே முநியோஜனதை³ர்க்⁴யவான் ।
புஷ்பராக³மய꞉ ஸால꞉ குங்குமாருணவிக்³ரஹ꞉ ॥ 71 ॥
புஷ்பராக³மயீ பூ⁴மிர்வனான்யுபவனானி ச ।
ரத்னவ்ருʼக்ஷாலவாலாஶ்ச புஷ்பராக³மயா꞉ ஸ்ம்ருʼதா꞉ ॥ 72 ॥
ப்ராகாரோ யஸ்ய ரத்னஸ்ய தத்³ரத்னரசிதா த்³ருமா꞉ ।
வனபூ⁴꞉ பக்ஷினஶ்சைவ ரத்னவர்ணஜலானி ச ॥ 73 ॥
மண்ட³பா மண்ட³பஸ்தம்பா⁴꞉ ஸரான்ஸி கமலானி ச ।
ப்ராகாரே தத்ர யத்³யத்ஸ்யாத்தத்ஸர்வம்ʼ தத்ஸமம்ʼ ப⁴வேத் ॥ 74 ॥
பரிபா⁴ஷேயமுத்³தி³ஷ்டா ரத்னஸாலாதி³ஷு ப்ரபோ⁴ ।
தேஜஸா ஸ்யால்லக்ஷகு³ண꞉ பூர்வஸாலாத்பரோ ந்ருʼப ॥ 75 ॥
தி³க்பாலா நிவஸந்த்யத்ர ப்ரதிப்³ரஹ்மான்ட³வர்தினாம் ।
தி³க்பாலானாம்ʼ ஸமஷ்ட்யாத்மரூபா꞉ ஸ்பூ²ர்ஜத்³வராயுதா⁴꞉ ॥ 76 ॥
பூர்வாஶாயாம்ʼ ஸமுத்துங்க³ஶ்ருʼங்கா³ பூரமராவதீ ।
நானோபவனஸம்ʼயுக்தா மஹேந்த்³ரஸ்தத்ர ராஜதே ॥ 77 ॥
ஸ்வர்க³ஶோபா⁴ ச யா ஸ்வர்கே³ யாவதீ ஸ்யாத்ததோ(அ)தி⁴கா ।
ஸமஷ்டிஶதநேத்ரஸ்ய ஸஹஸ்ரகு³ணத꞉ ஸ்ம்ருʼதா ॥ 78 ॥
ஐராவதஸமாரூடோ⁴ வஜ்ரஹஸ்த꞉ ப்ரதாபவான் ।
தே³வஸேனாபரிவ்ருʼதோ ராஜதே(அ)த்ர ஶதக்ரது꞉ ॥ 79 ॥
தே³வாங்க³நாக³ணயுதா ஶசீ தத்ர விராஜதே ।
வஹ்னிகோணே வஹ்னிபுரீ வஹ்னிபூ꞉ ஸத்³ருʼஶீ ந்ருʼப ॥ 80 ॥
ஸ்வாஹாஸ்வதா⁴ஸமாயுக்தோ வஹ்நிஸ்தத்ர விராஜதே ।
நிஜவாஹனபூ⁴ஷாட்⁴யோ நிஜதே³வக³ணைர்வ்ருʼத꞉ ॥ 81 ॥
யாம்யாஶாயாம்ʼ யமபுரீ தத்ர த³ண்ட³த⁴ரோ மஹான் ।
ஸ்வப⁴டைர்வேஷ்டிதோ ராஜன் சித்ரகு³ப்தபுரோக³மை꞉ ॥ 82 ॥
நிஜஶக்தியுதோ பா⁴ஸ்வத்தனயோ(அ)ஸ்தி யமோ மஹான் ।
நைர்ருʼத்யாம்ʼ தி³ஶி ராக்ஷஸ்யாம்ʼ ராக்ஷஸை꞉ பரிவாரித꞉ ॥ 83 ॥
க²ட்³க³தா⁴ரீ ஸ்பு²ரன்னாஸ்தே நிர்ருʼதிர்நிஜஶக்தியுக் ।
வாருண்யாம்ʼ வருணோ ராஜா பாஶதா⁴ரீ ப்ரதாபவான் ॥ 84 ॥
மஹாஜ²ஶஸமாரூடோ⁴ வாருணீமது⁴விஹ்வல꞉ ।
நிஜஶக்திஸமாயுக்தோ நிஜயாதோ³க³ணான்வித꞉ ॥ 85 ॥
ஸமாஸ்தே வாருணே லோகே வருணாநீரதாகுல꞉ ।
வாயுகோணே வாயுலோகோ வாயுஸ்தத்ராதி⁴திஷ்ட²தி ॥ 86 ॥
வாயுஸாத⁴னஸம்ʼஸித்³த⁴யோகி³பி⁴꞉ பரிவாரித꞉ ।
த்⁴வஜஹஸ்தோ விஶாலாக்ஷோ ம்ருʼக³வாஹனஸம்ʼஸ்தி²த꞉ ॥ 87 ॥
மருத்³க³ணை꞉ பரிவ்ருʼதோ நிஜஶக்திஸமன்வித꞉ ।
உத்தரஸ்யாம்ʼ தி³ஶி மஹான்யக்ஷலோகோ(அ)ஸ்தி பூ⁴மிப ॥ 88 ॥
யக்ஷாதி⁴ராஜஸ்தத்ரா(ஆ)ஸ்தே வ்ருʼத்³தி⁴ருʼத்³த்⁴யாதி³ஶக்திபி⁴꞉ ।
நவபி⁴ர்நிதி⁴பி⁴ர்யுக்தஸ்துந்தி³லோ த⁴னநாயக꞉ ॥ 89 ॥
மணிப⁴த்³ர꞉ பூர்ணப⁴த்³ரோ மணிமான்மணிகந்த⁴ர꞉ ।
மணிபூ⁴ஷோ மணிஸ்ரக்³வீ மணிகார்முகதா⁴ரக꞉ ॥ 90 ॥
இத்யாதி³யக்ஷஸேனானீஸஹிதோ நிஜஶக்தியுக் ।
ஈஶானகோணே ஸம்ப்ரோக்தோ ருத்³ரலோகோ மஹத்தர꞉ ॥ 91 ॥
அனர்க்⁴யரத்நக²சிதோ யத்ர ருத்³ரோ(அ)தி⁴தை³வதம் ।
மன்யுமாந்தீ³ப்தநயனோ ப³த்³த⁴ப்ருʼஷ்ட²மஹேஷுதி⁴꞉ ॥ 92 ॥
ஸ்பூ²ர்ஜத்³த⁴னுர்வாமஹஸ்தோ(அ)தி⁴ஜ்யத⁴ன்வபி⁴ராவ்ருʼத꞉ ।
ஸ்வஸமானைரஸங்க்²யாதருத்³ரை꞉ ஶூலவராயுதை⁴꞉ ॥ 93 ॥
விக்ருʼதாஸ்யை꞉ கராலாஸ்யைர்வமத்³வஹ்னிபி⁴ராஸ்யத꞉ ।
த³ஶஹஸ்தை꞉ ஶதகரை꞉ ஸஹஸ்ரபு⁴ஜஸம்ʼயுதை꞉ ॥ 94 ॥
த³ஶபாதை³ர்த³ஶக்³ரீவைஸ்த்ரிநேத்ரைருக்³ரமூர்திபி⁴꞉ ।
அந்தரிக்ஷசரா யே ச யே ச பூ⁴மிசரா꞉ ஸ்ம்ருʼதா꞉ ॥ 95 ॥
ருத்³ராத்⁴யாயே ஸ்ம்ருʼதா ருத்³ராஸ்தை꞉ ஸர்வைஶ்ச ஸமாவ்ருʼத꞉ ।
ருத்³ராணீகோடிஸஹிதோ ப⁴த்³ரகால்யாதி³மாத்ருʼபி⁴꞉ ॥ 96 ॥
நாநாஶக்திஸமாவிஷ்டடா³மர்யாதி³க³ணாவ்ருʼத꞉ ।
வீரப⁴த்³ராதி³ஸஹிதோ ருத்³ரோ ராஜன்விராஜதே ॥ 97 ॥
முண்ட³மாலாத⁴ரோ நாக³வலயோ நாக³கந்த⁴ர꞉ ।
வ்யாக்⁴ரசர்மபரீதா⁴னோ க³ஜசர்மோத்தரீயக꞉ ॥ 98 ॥
சிதாப⁴ஸ்மாங்க³லிப்தாங்க³꞉ ப்ரமதா²தி³க³ணாவ்ருʼத꞉ ।
நினத³ட்³ட³மருத்⁴வானைர்ப³தி⁴ரீக்ருʼததி³ம்ʼமுக²꞉ ॥ 99 ॥
அட்டஹாஸாஸ்போ²டஶப்³தை³꞉ ஸந்த்ராஸிதனப⁴ஸ்தல꞉ ।
பூ⁴தஸங்க⁴ஸமாவிஷ்டோ பூ⁴தாவாஸோ மஹேஶ்வர꞉ ॥ 100 ॥
ஈஶானதி³க்பதி꞉ ஸோ(அ)யம்ʼ நாம்னா சேஶான ஏவ ச ॥ 101 ॥
இதி ஶ்ரீதே³வீபா⁴க³வதே மஹாபுராணே த்³வாத³ஶஸ்கந்தே⁴ மணித்³வீபவர்ணனம்ʼ நாம த³ஶமோ(அ)த்⁴யாய꞉ ॥
(ஶ்ரீதே³வீபா⁴க³வதம்ʼ, த்³வாத³ஶ ஸ்கந்த⁴ம்ʼ, ஏகாத³ஶோ(அ)த்⁴யாய꞉, மணித்³வீப வர்ணன - 2)
வ்யாஸ உவாச –
புஷ்பராக³மயாத³க்³ரே குங்குமாருணவிக்³ரஹ꞉ ।
பத்³மராக³மய꞉ ஸாலோ மத்⁴யே பூ⁴ஶ்சைவதாத்³ருʼஶீ ॥ 1 ॥
த³ஶயோஜனவாந்தை³ர்க்⁴யே கோ³புரத்³வாரஸம்ʼயுத꞉ ।
தன்மணிஸ்தம்ப⁴ஸம்ʼயுக்தா மண்ட³பா꞉ ஶதஶோ ந்ருʼப ॥ 2 ॥
மத்⁴யே பு⁴விஸமாஸீநாஶ்சது꞉ஷஷ்டிமிதா꞉ கலா꞉ ।
நானாயுத⁴த⁴ராவீரா ரத்னபூ⁴ஷணபூ⁴ஷிதா꞉ ॥ 3 ॥
ப்ரத்யேகலோகஸ்தாஸாம்ʼ து தத்தல்லோகஸ்யநாயகா꞉ ।
ஸமந்தாத்பத்³மராக³ஸ்ய பரிவார்யஸ்தி²தா꞉ ஸதா³ ॥ 4 ॥
ஸ்வஸ்வலோகஜனைர்ஜுஷ்டா꞉ ஸ்வஸ்வவாஹனஹேதிபி⁴꞉ ।
தாஸாம்ʼ நாமானி வக்ஷ்யாமி ஶ்ருʼணு த்வம்ʼ ஜனமேஜய ॥ 5 ॥
பிங்க³லாக்ஷீ விஶாலாக்ஷீ ஸம்ருʼத்³தி⁴ வ்ருʼத்³தி⁴ரேவ ச ।
ஶ்ரத்³தா⁴ ஸ்வாஹா ஸ்வதா⁴பி⁴க்²யா மாயா ஸஞ்ஜ்ஞா வஸுந்த⁴ரா ॥ 6 ॥
த்ரிலோகதா⁴த்ரீ ஸாவித்ரீ கா³யத்ரீ த்ரித³ஶேஶ்வரீ ।
ஸுரூபா ப³ஹுரூபா ச ஸ்கந்த³மாதா(அ)ச்யுதப்ரியா ॥ 7 ॥
விமலா சாமலா தத்³வத³ருணீ புனராருணீ ।
ப்ரக்ருʼதிர்விக்ருʼதி꞉ ஸ்ருʼஷ்டி꞉ ஸ்தி²தி꞉ ஸம்ʼஹ்ருʼதிரேவ ச ॥ 8 ॥
ஸந்த்⁴யாமாதா ஸதீ ஹம்ʼஸீ மர்தி³கா வஜ்ரிகா பரா ।
தே³வமாதா ப⁴க³வதீ தே³வகீ கமலாஸனா ॥ 9 ॥
த்ரிமுகீ² ஸப்தமுக்²யன்யா ஸுராஸுரவிமர்தி³னீ ।
லம்போ³ஷ்டீ சோர்த்⁴வகேஶீ ச ப³ஹுஶீர்ஷா வ்ருʼகோத³ரீ ॥ 10 ॥
ரத²ரேகா²ஹ்வயா பஶ்சாச்ச²ஶிரேகா² ததா² பரா ।
க³க³னவேகா³ பவனவேகா³ சைவ தத꞉ பரம் ॥ 11 ॥
அக்³ரே பு⁴வனபாலா ஸ்யாத்தத்பஶ்சான்மத³னாதுரா ।
அனங்கா³னங்க³மத²னா ததை²வானங்க³மேக²லா ॥ 12 ॥
அனங்க³குஸுமா பஶ்சாத்³விஶ்வரூபா ஸுராதி³கா ।
க்ஷயங்கரீ ப⁴வேச்ச²க்தி ரக்ஷோப்⁴யா ச தத꞉ பரம் ॥ 13 ॥
ஸத்யவாதி³ன்யத² ப்ரோக்தா ப³ஹுரூபா ஶுசிவ்ரதா ।
உதா³ராக்²யா ச வாகீ³ஶீ சதுஷ்ஷஷ்டிமிதா꞉ ஸ்ம்ருʼதா꞉ ॥ 14 ॥
ஜ்வலஜ்ஜிஹ்வானனா꞉ ஸர்வாவமந்த்யோ வஹ்னிமுல்ப³ணம் ।
ஜலம்ʼ பிபா³ம꞉ ஸகலம்ʼ ஸம்ʼஹராமோவிபா⁴வஸும் ॥ 15 ॥
பவனம்ʼ ஸ்தம்ப⁴யாமோத்³ய ப⁴க்ஷயாமோ(அ)கி²லம்ʼ ஜக³த் ।
இதி வாசம்ʼ ஸங்கி³ரதே க்ரோத⁴ ஸம்ʼரக்தலோசனா꞉ ॥ 16 ॥
சாபபா³ணத⁴ரா꞉ ஸர்வாயுத்³தா⁴யைவோத்ஸுகா꞉ ஸதா³ ।
த³ம்ʼஷ்ட்ரா கடகடாராவைர்ப³தி⁴ரீக்ருʼத தி³ங்முகா²꞉ ॥ 17 ॥
பிங்கோ³ர்த்⁴வகேஶ்ய꞉ ஸம்ப்ரோக்தாஶ்சாபபா³ணகரா꞉ ஸதா³ ।
ஶதாக்ஷௌஹிணிகா ஸேனாப்யேகைகஸ்யா꞉ ப்ரகீர்திதா ॥ 18 ॥
ஏகைக ஶக்தே꞉ ஸாமர்த்²யம்ʼ லக்ஷப்³ரஹ்மாண்ட³நாஶனே ।
ஶதாக்ஷௌஹிணிகாஸேனா தாத்³ருʼஶீ ந்ருʼப ஸத்தம ॥ 19 ॥
கிம்ʼ ந குர்யாஜ்ஜக³த்யஸ்மின்னஶக்யம்ʼ வக்துமேவ தத் ।
ஸர்வாபி யுத்³த⁴ஸாமக்³ரீ தஸ்மின்ஸாலே ஸ்தி²தா முனே ॥ 20 ॥
ரதா²னாம்ʼ க³ணனா நாஸ்தி ஹயானாம்ʼ கரிணாம்ʼ ததா² ॥
ஶஸ்த்ராணாம்ʼ க³ணனா தத்³வத்³க³ணானாம்ʼ க³ணனா ததா² ॥ 21 ॥
பத்³மராக³மயாத³க்³ரே கோ³மேத³மணிநிர்மித꞉ ।
த³ஶயோஜனதை³ர்க்⁴யேண ப்ராகாரோ வர்ததே மஹான் ॥ 22 ॥
பா⁴ஸ்வஜ்ஜபாப்ரஸூநாபோ⁴ மத்⁴யபூ⁴ஸ்தஸ்ய தாத்³ருʼஶீ ।
கோ³மேத³கல்பிதான்யேவ தத்³வாஸி ஸத³னானி ச ॥ 23 ॥
பக்ஷிண꞉ ஸ்தம்ப⁴வர்யாஶ்ச வ்ருʼக்ஷாவாப்ய꞉ ஸராம்ʼஸி ச ।
கோ³மேத³கல்பிதா ஏவ குங்குமாருணவிக்³ரஹா꞉ ॥ 24 ॥
தன்மத்⁴யஸ்தா² மஹாதே³வ்யோ த்³வாத்ரிம்ʼஶச்ச²க்தய꞉ ஸ்ம்ருʼதா꞉ ।
நானா ஶஸ்த்ரப்ரஹரணா கோ³மேத³மணிபூ⁴ஷிதா꞉ ॥ 25 ॥
ப்ரத்யேக லோக வாஸின்ய꞉ பரிவார்ய ஸமந்தத꞉ ।
கோ³மேத³ஸாலே ஸன்னத்³தா⁴ பிஶாசவத³னா ந்ருʼப ॥ 26 ॥
ஸ்வர்லோகவாஸிபி⁴ர்நித்யம்ʼ பூஜிதாஶ்சக்ரபா³ஹவ꞉ ।
க்ரோத⁴ரக்தேக்ஷணா பி⁴ந்தி⁴ பச ச்சி²ந்தி⁴ த³ஹேதி ச ॥ 27 ॥
வத³ந்தி ஸததம்ʼ வாசம்ʼ யுத்³தோ⁴த்ஸுகஹ்ருʼத³ந்தரா꞉ ।
ஏகைகஸ்யா மஹாஶக்தேர்த³ஶாக்ஷௌஹிணிகா மதா ॥ 28 ॥
ஸேனா தத்ராப்யேகஶக்திர்லக்ஷப்³ரஹ்மாண்ட³நாஶினீ ।
தாத்³ருʼஶீனாம்ʼ மஹாஸேனா வர்ணனீயா கத²ம்ʼ ந்ருʼப ॥ 29 ॥
ரதா²னாம்ʼ நைவ க³ணானா வாஹனானாம்ʼ ததை²வ ச ।
ஸர்வயுத்³த⁴ஸமாரம்ப⁴ஸ்தத்ர தே³வ்யா விராஜதே ॥ 30 ॥
தாஸாம்ʼ நாமானி வக்ஷ்யாமி பாபநாஶகராணி ச ।
வித்³யா ஹ்ரீ புஷ்ட ய꞉ ப்ரஜ்ஞா ஸினீவாலீ குஹூஸ்ததா² ॥ 31 ॥
ருத்³ராவீர்யா ப்ரபா⁴னந்தா³ போஷிணீ ருʼத்³தி⁴தா³ ஶுபா⁴ ।
காலராத்ரிர்மஹாராத்ரிர்ப⁴த்³ரகாலீ கபர்தி³னீ ॥ 32 ॥
விக்ருʼதிர்த³ண்டி³முண்டி³ன்யௌ ஸேந்து³க²ண்டா³ ஶிக²ண்டி³னீ ।
நிஶும்ப⁴ஶும்ப⁴மதி²னீ மஹிஷாஸுரமர்தி³னீ ॥ 33 ॥
இந்த்³ராணீ சைவ ருத்³ராணீ ஶங்கரார்த⁴ஶரீரிணீ ।
நாரீ நாராயணீ சைவ த்ரிஶூலின்யபி பாலினீ ॥ 34 ॥
அம்பி³காஹ்லாதி³னீ பஶ்சாதி³த்யேவம்ʼ ஶக்தய꞉ ஸ்ம்ருʼதா꞉ ।
யத்³யேதா꞉ குபிதா தே³வ்யஸ்ததா³ ப்³ரஹ்மாண்ட³நாஶனம் ॥ 35 ॥
பராஜயோ ந சைதாஸாம்ʼ கதா³சித்க்வசித³ஸ்தி ஹி ।
கோ³மேத³கமயாத³க்³ரே ஸத்³வஜ்ரமணிநிர்மித꞉ ॥ 36 ॥
த³ஶயோஜன துங்கோ³(அ)ஸௌ கோ³புரத்³வாரஸம்ʼயுத꞉ ।
கபாடஶ்ருʼங்க²லாப³த்³தோ⁴ நவவ்ருʼக்ஷ ஸமுஜ்ஜ்வல꞉ ॥ 37 ॥
ஸாலஸ்தன்மத்⁴யபூ⁴ம்யாதி³ ஸர்வம்ʼ ஹீரமயம்ʼ ஸ்ம்ருʼதம் ।
க்³ருʼஹாணிவீத²யோ ரத்²யா மஹாமார்கா³ம்ʼ க³ணானி ச ॥ 38 ॥
வ்ருʼக்ஷாலவால தரவ꞉ ஸாரங்கா³ அபி தாத்³ருʼஶா꞉ ।
தீ³ர்கி⁴காஶ்ரேணயோவாப்யஸ்தடா³கா³꞉ கூப ஸம்ʼயுதா꞉ ॥ 39 ॥
தத்ர ஶ்ரீபு⁴வனேஶ்வர்யா வஸந்தி பரிசாரிகா꞉ ।
ஏகைகா லக்ஷதா³ஸீபி⁴꞉ ஸேவிதா மத³க³ர்விதா꞉ ॥ 40 ॥
தாலவ்ருʼந்தத⁴ரா꞉ காஶ்சிச்சஷகாட்⁴ய கராம்பு³ஜா꞉ ।
காஶ்சித்தாம்பூ³லபாத்ராணி தா⁴ரயந்த்யோ(அ)திக³ர்விதா꞉ ॥ 41 ॥
காஶ்சித்தச்ச²த்ரதா⁴ரிண்யஶ்சாமராணாம்ʼ விதா⁴ரிகா꞉ ।
நானா வஸ்த்ரத⁴ரா꞉ காஶ்சித்காஶ்சித்புஷ்ப கராம்பு³ஜா꞉ ॥ 42 ॥
நாநாத³ர்ஶகரா꞉ காஶ்சித்காஶ்சித்குங்குமலேபனம் ।
தா⁴ரயந்த்ய꞉ கஜ்ஜலம்ʼ ச ஸிந்தூ³ர சஷகம்ʼ பரா꞉ ॥ 43 ॥
காஶ்சிச்சித்ரக நிர்மாத்ர்ய꞉ பாத³ ஸம்ʼவாஹனே ரதா꞉ ।
காஶ்சித்து பூ⁴ஷாகாரிண்யோ நானா பூ⁴ஷாத⁴ரா꞉ பரா꞉ ॥ 44 ॥
புஷ்பபூ⁴ஷண நிர்மாத்ர்ய꞉ புஷ்பஶ்ருʼங்கா³ரகாரிகா꞉ ।
நானா விலாஸசதுரா ப³ஹ்வ்ய ஏவம்ʼ விதா⁴꞉ பரா꞉ ॥ 45 ॥
நிப³த்³த⁴ பரிதா⁴னீயா யுவத்ய꞉ ஸகலா அபி ।
தே³வீ க்ருʼபா லேஶவஶாத்துச்சீ²க்ருʼத ஜக³த்த்ரயா꞉ ॥ 46 ॥
ஏதா தூ³த்ய꞉ ஸ்ம்ருʼதா தே³வ்ய꞉ ஶ்ருʼங்கா³ரமத³க³ர்விதா꞉ ।
தாஸாம்ʼ நாமானி வக்ஷ்யாமி ஶ்ருʼணு மே ந்ருʼபஸத்தம ॥ 47 ॥
அனங்க³ரூபா ப்ரத²மாப்யனங்க³மத³னா பரா ।
த்ருʼதீயாது தத꞉ ப்ரோக்தா ஸுந்த³ரீ மத³னாதுரா ॥ 48 ॥
ததோ பு⁴வனவேகா³ஸ்யாத்ததா² பு⁴வனபாலிகா ।
ஸ்யாத்ஸர்வஶிஶிரானங்க³வேத³னானங்க³மேக²லா ॥ 49 ॥
வித்³யுத்³தா³மஸமானாங்க்³ய꞉ க்வணத்காஞ்சீகு³ணான்விதா꞉ ।
ரணன்மஞ்ஜீரசரணா ப³ஹிரந்தரிதஸ்தத꞉ ॥ 50 ॥
தா⁴வமானாஸ்து ஶோப⁴ந்தே ஸர்வா வித்³யுல்லதோபமா꞉ ।
குஶலா꞉ ஸர்வகார்யேஷு வேத்ரஹஸ்தா꞉ ஸமந்தத꞉ ॥ 51 ॥
அஷ்டதி³க்ஷுததை²தாஸாம்ʼ ப்ராகாராத்³ப³ஹிரேவ ச ।
ஸத³னானி விராஜந்தே நானா வாஹனஹேதிபி⁴꞉ ॥ 52 ॥
வஜ்ரஸாலாத³க்³ரபா⁴கே³ ஸாலோ வைதூ³ர்யநிர்மித꞉ ।
த³ஶயோஜனதுங்கோ³(அ)ஸௌ கோ³புரத்³வாரபூ⁴ஷித꞉ ॥ 53 ॥
வைதூ³ர்யபூ⁴மி꞉ ஸர்வாபிக்³ருʼஹாணி விவிதா⁴னி ச ।
வீத்²யோ ரத்²யா மஹாமார்கா³꞉ ஸர்வே வேதூ³ர்யநிர்மிதா꞉ ॥ 54 ॥
வாபீ கூப தடா³கா³ஶ்ச ஸ்ரவந்தீனாம்ʼ தடானி ச ।
வாலுகா சைவ ஸர்வா(அ)பி வைதூ³ர்யமணிநிர்மிதா ॥ 55 ॥
தத்ராஷ்டதி³க்ஷுபரிதோ ப்³ராஹ்ம்யாதீ³னாம்ʼ ச மண்ட³லம் ।
நிஜைர்க³ணை꞉ பரிவ்ருʼதம்ʼ ப்⁴ராஜதே ந்ருʼபஸத்தம ॥ 56 ॥
ப்ரதிப்³ரஹ்மாண்ட³மாத்ருʼணாம்ʼ தா꞉ ஸமஷ்டய ஈரிதா꞉ ।
ப்³ராஹ்மீ மாஹேஶ்வரீ சைவ கௌமாரீ வைஷ்ணவீ ததா² ॥57 ॥
வாராஹீ ச ததே²ந்த்³ராணீ சாமுண்டா³꞉ ஸப்தமாதர꞉ ।
அஷ்டமீ து மஹாலக்ஷ்மீர்நாம்னா ப்ரோக்தாஸ்து மாதர꞉ ॥ 58 ॥
ப்³ரஹ்மருத்³ராதி³தே³வானாம்ʼ ஸமாகாரா ஸ்துதா꞉ ஸ்ம்ருʼதா꞉ ।
ஜக³த்கல்யாணகாரிண்ய꞉ ஸ்வஸ்வஸேனாஸமாவ்ருʼதா꞉ ॥ 59 ॥
தத்ஸாலஸ்ய சதுர்த்³வார்ஷு வாஹனானி மஹேஶிது꞉ ।
ஸஜ்ஜானி ந்ருʼபதே ஸந்தி ஸாலங்காராணி நித்யஶ꞉ ॥ 60 ॥
த³ந்தின꞉ கோடிஶோ வாஹா꞉ கோடிஶ꞉ ஶிபி³காஸ்ததா² ।
ஹம்ʼஸா꞉ ஸிம்ʼஹாஶ்ச க³ருடா³ மயூரா வ்ருʼஷபா⁴ஸ்ததா² ॥ 61 ॥
தைர்யுக்தா꞉ ஸ்யந்த³னாஸ்தத்³வத்கோடிஶோ ந்ருʼபநந்த³ன ।
பார்ஷ்ணிக்³ராஹஸமாயுக்தா த்⁴வஜைராகாஶசும்பி³ன꞉ ॥ 62 ॥
கோடிஶஸ்து விமானானி நானா சிஹ்னான்விதானி ச ।
நானா வாதி³த்ரயுக்தானி மஹாத்⁴வஜயுதானி ச ॥ 63 ॥
வைதூ³ர்யமணி ஸாலஸ்யாப்யக்³ரே ஸால꞉ பர꞉ ஸ்ம்ருʼத꞉ ।
த³ஶயோஜன துங்கோ³(அ)ஸாவிந்த்³ரநீலாஶ்மநிர்மித꞉ ॥ 64 ॥
தன்மத்⁴ய பூ⁴ஸ்ததா² வீத்²யோ மஹாமார்கா³ க்³ருʼஹாணி ச ।
வாபீ கூப தடா³கா³ஶ்ச ஸர்வே தன்மணிநிர்மிதா꞉ ॥ 65 ॥
தத்ர பத்³ம து ஸம்ப்ரோக்தம்ʼ ப³ஹுயோஜன விஸ்த்ருʼதம் ।
ஷோட³ஶாரம்ʼ தீ³ப்யமானம்ʼ ஸுத³ர்ஶனமிவாபரம் ॥ 66 ॥
தத்ர ஷோட³ஶஶக்தீனாம்ʼ ஸ்தா²னானி விவிதா⁴னி ச ।
ஸர்வோபஸ்கரயுக்தானி ஸம்ருʼத்³தா⁴னி வஸந்தி ஹி ॥ 67 ॥
தாஸாம்ʼ நாமானி வக்ஷ்யாமி ஶ்ருʼணு மே ந்ருʼபஸத்தம ।
கராலீ விகராலீ ச ததோ²மா ச ஸரஸ்வதீ ॥ 68 ॥
ஶ்ரீ து³ர்கோ³ஷா ததா² லக்ஷ்மீ꞉ ஶ்ருதிஶ்சைவ ஸ்ம்ருʼதிர்த்⁴ருʼதி꞉ ।
ஶ்ரத்³தா⁴ மேதா⁴ மதி꞉ காந்திரார்யா ஷோட³ஶஶக்தய꞉ ॥ 69 ॥
நீலஜீமூதஸங்காஶா꞉ கரவால கராம்பு³ஜா꞉ ।
ஸமா꞉ கே²டகதா⁴ரிண்யோ யுத்³தோ⁴பக்ராந்த மானஸா꞉ ॥ 70 ॥
ஸேனான்ய꞉ ஸகலா ஏதா꞉ ஶ்ரீதே³வ்யா ஜக³தீ³ஶிது꞉ ।
ப்ரதிப்³ரஹ்மாண்ட³ஸம்ʼஸ்தா²னாம்ʼ ஶக்தீனாம்ʼ நாயிகா꞉ ஸ்ம்ருʼதா꞉ ॥ 71 ॥
ப்³ரஹ்மாண்ட³க்ஷோப⁴காரிண்யோ தே³வீ ஶக்த்யுபப்³ருʼம்ʼஹிதா꞉ ।
நானா ரத²ஸமாரூடா⁴ நானா ஶக்திபி⁴ரன்விதா꞉ ॥ 72 ॥
ஏதத்பராக்ரமம்ʼ வக்தும்ʼ ஸஹஸ்ராஸ்யோ(அ)பி ந க்ஷம꞉ ।
இந்த்³ரநீலமஹாஸாலாத³க்³ரே து ப³ஹுவிஸ்த்ருʼத꞉ ॥ 73 ॥
முக்தாப்ராகார உதி³தோ த³ஶயோஜன தை³ர்க்⁴யவான் ।
மத்⁴யபூ⁴꞉ பூர்வவத்ப்ரோக்தா தன்மத்⁴யே(அ)ஷ்டத³லாம்பு³ஜம் ॥ 74 ॥
முக்தாமணிக³ணாகீர்ணம்ʼ விஸ்த்ருʼதம்ʼ து ஸகேஸரம் ।
தத்ர தே³வீஸமாகாரா தே³வ்யாயுத⁴த⁴ரா꞉ ஸதா³ ॥ 75 ॥
ஸம்ப்ரோக்தா அஷ்டமந்த்ரிண்யோ ஜக³த்³வார்தாப்ரபோ³தி⁴கா꞉ ।
தே³வீஸமானபோ⁴கா³ஸ்தா இங்கி³தஜ்ஞாஸ்துபண்டி³தா꞉ ॥ 76 ॥
குஶலா꞉ ஸர்வகார்யேஷு ஸ்வாமிகார்யபராயணா꞉ ।
தே³வ்யபி⁴ப்ராய போ³த்⁴யஸ்தாஶ்சதுரா அதிஸுந்த³ரா꞉ ॥ 77 ॥
நானா ஶக்திஸமாயுக்தா꞉ ப்ரதிப்³ரஹ்மாண்ட³வர்தினாம் ।
ப்ராணினாம்ʼ தா꞉ ஸமாசாரம்ʼ ஜ்ஞானஶக்த்யாவித³ந்தி ச ॥ 78 ॥
தாஸாம்ʼ நாமானி வக்ஷ்யாமி மத்த꞉ ஶ்ருʼணு ந்ருʼபோத்தம ।
அனங்க³குஸுமா ப்ரோக்தாப்யனங்க³குஸுமாதுரா ॥ 79 ॥
அனங்க³மத³னா தத்³வத³னங்க³மத³னாதுரா ।
பு⁴வனபாலா க³க³னவேகா³ சைவ தத꞉ பரம் ॥ 80 ॥
ஶஶிரேகா² ச க³க³னரேகா² சைவ தத꞉ பரம் ।
பாஶாங்குஶவராபீ⁴தித⁴ரா அருணவிக்³ரஹா꞉ ॥ 81 ॥
விஶ்வஸம்ப³ந்தி⁴னீம்ʼ வார்தாம்ʼ போ³த⁴யந்தி ப்ரதிக்ஷணம் ।
முக்தாஸாலாத³க்³ரபா⁴கே³ மஹாமாரகதோ பர꞉ ॥ 82 ॥
ஸாலோத்தம꞉ ஸமுத்³தி³ஷ்டோ த³ஶயோஜன தை³ர்க்⁴யவான் ।
நானா ஸௌபா⁴க்³யஸம்ʼயுக்தோ நானா போ⁴க³ஸமன்வித꞉ ॥ 83 ॥
மத்⁴யபூ⁴ஸ்தாத்³ருʼஶீ ப்ரோக்தா ஸத³னானி ததை²வ ச ।
ஷட்கோணமத்ரவிஸ்தீர்ணம்ʼ கோணஸ்தா² தே³வதா꞉ ஶ்ருʼணு꞉ ॥ 84 ॥
பூர்வகோணே சதுர்வக்த்ரோ கா³யத்ரீ ஸஹிதோ விதி⁴꞉ ।
குண்டி³காக்ஷகு³ணாபீ⁴தி த³ண்டா³யுத⁴த⁴ர꞉ பர꞉ ॥ 85 ॥
ததா³யுத⁴த⁴ரா தே³வீ கா³யத்ரீ பரதே³வதா ।
வேதா³꞉ ஸர்வே மூர்திமந்த꞉ ஶாஸ்த்ராணி விவிதா⁴னி ச ॥ 86 ॥
ஸ்ம்ருʼதயஶ்ச புராணானி மூர்திமந்தி வஸந்தி ஹி ।
யே ப்³ரஹ்மவிக்³ரஹா꞉ ஸந்தி கா³யத்ரீவிக்³ரஹாஶ்ச யே ॥ 87 ॥
வ்யாஹ்ருʼதீனாம்ʼ விக்³ரஹாஶ்ச தே நித்யம்ʼ தத்ர ஸந்தி ஹி ।
ரக்ஷ꞉ கோணே ஶங்க²சக்ரக³தா³ம்பு³ஜ கராம்பு³ஜா ॥ 88 ॥
ஸாவித்ரீ வர்ததே தத்ர மஹாவிஷ்ணுஶ்ச தாத்³ருʼஶ꞉ ।
யே விஷ்ணுவிக்³ரஹா꞉ ஸந்தி மத்ஸ்யகூர்மாத³யோகி²லா꞉ ॥ 89 ॥
ஸாவித்ரீ விக்³ரஹா யே ச தே ஸர்வே தத்ர ஸந்தி ஹி ।
வாயுகோணே பரஶ்வக்ஷமாலாப⁴யவரான்வித꞉ ॥ 90 ॥
மஹாருத்³ரோ வர்ததே(அ)த்ர ஸரஸ்வத்யபி தாத்³ருʼஶீ ।
யே யே து ருத்³ரபே⁴தா³꞉ ஸ்யுர்த³க்ஷிணாஸ்யாத³யோ ந்ருʼப ॥ 91 ॥
கௌ³ரீ பே⁴தா³ஶ்ச யே ஸர்வே தே தத்ர நிவஸந்தி ஹி ।
சது꞉ஷஷ்ட்யாக³மா யே ச யே சான்யேப்யாக³மா꞉ ஸ்ம்ருʼதா꞉ ॥ 92 ॥
தே ஸர்வே மூர்திமந்தஶ்ச தத்ர வை நிவஸந்தி ஹி ।
அக்³னிகோணே ரத்னகும்ப⁴ம்ʼ ததா² மணிகரண்ட³கம் ॥ 93 ॥
த³தா⁴னோ நிஜஹஸ்தாப்⁴யாம்ʼ குபே³ரோ த⁴னதா³யக꞉ ।
நானா வீதீ² ஸமாயுக்தோ மஹாலக்ஷ்மீஸமன்வித꞉ ॥ 94 ॥
தே³வ்யா நிதி⁴பதிஸ்த்வாஸ்தே ஸ்வகு³ணை꞉ பரிவேஷ்டித꞉ ।
வாருணே து மஹாகோணே மத³னோ ரதிஸம்ʼயுத꞉ ॥ 95 ॥
பாஶாங்குஶத⁴னுர்பா³ணத⁴ரோ நித்யம்ʼ விராஜதே ।
ஶ்ருʼங்கா³ரமூர்திமந்தஸ்து தத்ர ஸந்நிஹிதா꞉ ஸதா³ ॥ 96 ॥
ஈஶானகோணே விக்⁴னேஶோ நித்யம்ʼ புஷ்டிஸமன்வித꞉ ।
பாஶாங்குஶத⁴ரோ வீரோ விக்⁴னஹர்தா விராஜதே ॥ 97 ॥
விபூ⁴தயோ க³ணேஶஸ்ய யாயா꞉ ஸந்தி ந்ருʼபோத்தம ।
தா꞉ ஸர்வா நிவஸந்த்யத்ர மஹைஶ்வர்யஸமன்விதா꞉ ॥ 98 ॥
ப்ரதிப்³ரஹ்மாண்ட³ஸம்ʼஸ்தா²னாம்ʼ ப்³ரஹ்மாதீ³னாம்ʼ ஸமஷ்டய꞉ ।
ஏதே ப்³ரஹ்மாத³ய꞉ ப்ரோக்தா꞉ ஸேவந்தே ஜக³தீ³ஶ்வரீம் ॥ 99 ॥
மஹாமாரகதஸ்யாக்³ரே ஶதயோஜன தை³ர்க்⁴யவான் ।
ப்ரவாலஶாலோஸ்த்யபர꞉ குங்குமாருணவிக்³ரஹ꞉ ॥ 100 ॥
மத்⁴யபூ⁴ஸ்தாத்³ருʼஶீ ப்ரோக்தா ஸத³னானி ச பூர்வவத் ।
தன்மத்⁴யே பஞ்சபூ⁴தானாம்ʼ ஸ்வாமின்ய꞉ பஞ்ச ஸந்தி ச ॥ 101 ॥
ஹ்ருʼல்லேகா² க³க³னா ரக்தா சதுர்தீ² து கராலிகா ।
மஹோச்சு²ஷ்மா பஞ்சமீ ச பஞ்சபூ⁴தஸமப்ரபா⁴꞉ ॥ 102 ॥
பாஶாங்குஶவராபீ⁴திதா⁴ரிண்யோமிதபூ⁴ஷணா꞉ ।
தே³வீ ஸமானவேஷாட்⁴யா நவயௌவநக³ர்விதா꞉ ॥ 103 ॥
ப்ரவாலஶாலாத³க்³ரே து நவரத்ன விநிர்மித꞉ ।
ப³ஹுயோஜனவிஸ்தீர்ணோ மஹாஶாலோ(அ)ஸ்தி பூ⁴மிப ॥ 104 ॥
தத்ர சாம்னாயதே³வீனாம்ʼ ஸத³னானி ப³ஹூன்யபி ।
நவரத்னமயான்யேவ தடா³கா³ஶ்ச ஸராம்ʼஸி ச ॥ 105 ॥
ஶ்ரீதே³வ்யா யே(அ)வதாரா꞉ ஸ்யுஸ்தே தத்ர நிவஸந்தி ஹி ।
மஹாவித்³யா மஹாபே⁴தா³꞉ ஸந்தி தத்ரைவ பூ⁴மிப ॥ 106 ॥
நிஜாவரணதே³வீபி⁴ர்நிஜபூ⁴ஷணவாஹனை꞉ ।
ஸர்வதே³வ்யோ விராஜந்தே கோடிஸூர்யஸமப்ரபா⁴꞉ ॥ 107 ॥
ஸப்தகோடி மஹாமந்த்ரதே³வதா꞉ ஸந்தி தத்ர ஹி ।
நவரத்னமயாத³க்³ரே சிந்தாமணிக்³ருʼஹம்ʼ மஹத் ॥ 108 ॥
தத்ர த்யம்ʼ வஸ்து மாத்ரம்ʼ து சிந்தாமணி விநிர்மிதம் ।
ஸூர்யோத்³கா³ரோபலைஸ்தத்³வச்சந்த்³ரோத்³கா³ரோபலைஸ்ததா² ॥ 109 ॥
வித்³யுத்ப்ரபோ⁴பலை꞉ ஸ்தம்பா⁴꞉ கல்பிதாஸ்து ஸஹஸ்ரஶ꞉ ।
யேஷாம்ʼ ப்ரபா⁴பி⁴ரந்தஸ்த²ம்ʼ வஸ்து கிஞ்சின்ன த்³ருʼஶ்யதே ॥ 110 ॥
இதி ஶ்ரீதே³வீபா⁴க³வதே மஹாபுராணே த்³வாத³ஶஸ்கந்தே⁴ ஏகாத³ஶோ(அ)த்⁴யாய꞉ ।
(ஶ்ரீதே³வீபா⁴க³வதம்ʼ, த்³வாத³ஶ ஸ்கந்த⁴ம்ʼ, த்³வாத³ஶோ(அ)த்⁴யாய꞉, மணித்³வீப வர்ணன - 3)
வ்யாஸ உவாச –
ததே³வ தே³வீஸத³னம்ʼ மத்⁴யபா⁴கே³ விராஜதே ।
ஸஹஸ்ர ஸ்தம்ப⁴ஸம்ʼயுக்தாஶ்சத்வாரஸ்தேஷு மண்ட³பா꞉ ॥ 1 ॥
ஶ்ருʼங்கா³ரமண்ட³பஶ்சைகோ முக்திமண்ட³ப ஏவ ச ।
ஜ்ஞானமண்ட³ப ஸஞ்ஜ்ஞஸ்து த்ருʼதீய꞉ பரிகீர்தித꞉ ॥ 2 ॥
ஏகாந்தமண்ட³பஶ்சைவ சதுர்த²꞉ பரிகீர்தித꞉ ।
நானா விதானஸம்ʼயுக்தா நானா தூ⁴பைஸ்து தூ⁴பிதா꞉ ॥ 3 ॥
கோடிஸூர்யஸமா꞉ காந்த்யா ப்⁴ராஞ்ஜந்தே மண்ட³பா꞉ ஶுபா⁴꞉ ।
தன்மண்ட³பானாம்ʼ பரித꞉ காஶ்மீரவனிகா ஸ்ம்ருʼதா ॥ 4 ॥
மல்லிகாகுந்த³வனிகா யத்ர புஷ்கலகா꞉ ஸ்தி²தா꞉ ।
அஸங்க்²யாதா ம்ருʼக³மதை³꞉ பூரிதாஸ்தத்ஸ்ரவா ந்ருʼப ॥ 5 ॥
மஹாபத்³மாடவீ தத்³வத்³ரத்னஸோபானநிர்மிதா ।
ஸுதா⁴ரஸேனஸம்பூர்ணா கு³ஞ்ஜன்மத்தமது⁴வ்ரதா ॥ 6 ॥
ஹம்ʼஸகாரண்ட³வாகீர்ணா க³ந்த⁴பூரித தி³க்தடா ।
வனிகானாம்ʼ ஸுக³ந்தை⁴ஸ்து மணித்³வீபம்ʼ ஸுவாஸிதம் ॥ 7 ॥
ஶ்ருʼங்கா³ரமண்ட³பே தே³வ்யோ கா³யந்தி விவிதை⁴꞉ ஸ்வரை꞉ ।
ஸபா⁴ஸதோ³ தே³வவஶா மத்⁴யே ஶ்ரீஜக³த³ம்பி³கா ॥ 8 ॥
முக்திமண்ட³பமத்⁴யே து மோசயத்யநிஶம்ʼ ஶிவா ।
ஜ்ஞானோபதே³ஶம்ʼ குருதே த்ருʼதீயே ந்ருʼப மண்ட³பே ॥ 9 ॥
சதுர்த²மண்ட³பே சைவ ஜக³த்³ரக்ஷா விசிந்தனம் ।
மந்த்ரிணீ ஸஹிதா நித்யம்ʼ கரோதி ஜக³த³ம்பி³கா ॥ 10 ॥
சிந்தாமணிக்³ருʼஹே ராஜஞ்ச²க்தி தத்த்வாத்மகை꞉ பரை꞉ ।
ஸோபானைர்த³ஶபி⁴ர்யுக்தோ மஞ்சகோப்யதி⁴ராஜதே ॥ 11 ॥
ப்³ரஹ்மா விஷ்ணுஶ்ச ருத்³ரஶ்ச ஈஶ்வரஶ்ச ஸதா³ஶிவ꞉ ।
ஏதே மஞ்சகு²ரா꞉ ப்ரோக்தா꞉ ப²லகஸ்து ஸதா³ஶிவ꞉ ॥ 12 ॥
தஸ்யோபரி மஹாதே³வோ பு⁴வனேஶோ விராஜதே ।
யா தே³வீ நிஜலீலார்த²ம்ʼ த்³விதா⁴பூ⁴தா ப³பூ⁴வஹ ॥ 13 ॥
ஸ்ருʼஷ்ட்யாதௌ³ து ஸ ஏவாயம்ʼ தத³ர்தா⁴ங்கோ³ மஹேஶ்வர꞉ ।
கந்த³ர்ப த³ர்பநாஶோத்³யத்கோடி கந்த³ர்பஸுந்த³ர꞉ ॥ 14 ॥
பஞ்சவக்த்ரஸ்த்ரிநேத்ரஶ்ச மணிபூ⁴ஷண பூ⁴ஷித꞉ ।
ஹரிணாபீ⁴திபரஶூன்வரம்ʼ ச நிஜபா³ஹுபி⁴꞉ ॥ 15 ॥
த³தா⁴ன꞉ ஷோட³ஶாப்³தோ³(அ)ஸௌ தே³வ꞉ ஸர்வேஶ்வரோ மஹான் ।
கோடிஸூர்ய ப்ரதீகாஶஶ்சந்த்³ரகோடி ஸுஶீதல꞉ ॥ 16 ॥
ஶுத்³த⁴ஸ்ப²டிக ஸங்காஶஸ்த்ரிநேத்ர꞉ ஶீதல த்³யுதி꞉ ।
வாமாங்கே ஸந்நிஷண்ணா(அ)ஸ்ய தே³வீ ஶ்ரீபு⁴வனேஶ்வரீ ॥ 17 ॥
நவரத்னக³ணாகீர்ண காஞ்சீதா³ம விராஜிதா ।
தப்தகாஞ்சனஸன்னத்³த⁴ வைதூ³ர்யாங்க³த³பூ⁴ஷணா ॥ 18 ॥
கனச்ச்²ரீசக்ரதாடங்க விடங்க வத³னாம்பு³ஜா ।
லலாடகாந்தி விப⁴வ விஜிதார்த⁴ஸுதா⁴கரா ॥ 19 ॥
பி³ம்ப³காந்தி திரஸ்காரிரத³ச்ச²த³ விராஜிதா ।
லஸத்குங்குமகஸ்தூரீதிலகோத்³பா⁴ஸிதானனா ॥ 20 ॥
தி³வ்ய சூடா³மணி ஸ்பா²ர சஞ்சச்சந்த்³ரகஸூர்யகா ।
உத்³யத்கவிஸமஸ்வச்ச² நாஸாப⁴ரண பா⁴ஸுரா ॥ 21 ॥
சிந்தாகலம்பி³தஸ்வச்ச² முக்தாகு³ச்ச² விராஜிதா ।
பாடீர பங்க கர்பூர குங்குமாலங்க்ருʼத ஸ்தனீ ॥ 22 ॥
விசித்ர விவிதா⁴ கல்பா கம்பு³ஸங்காஶ கந்த⁴ரா ।
தா³டி³மீப²லபீ³ஜாப⁴ த³ந்தபங்க்தி விராஜிதா ॥ 23 ॥
அனர்க்⁴ய ரத்னக⁴டித முகுடாஞ்சித மஸ்தகா ।
மத்தாலிமாலாவிலஸத³லகாட்⁴ய முகா²ம்பு³ஜா ॥ 24 ॥
கலங்ககார்ஶ்யநிர்முக்த ஶரச்சந்த்³ரனிபா⁴னனா ।
ஜாஹ்னவீஸலிலாவர்த ஶோபி⁴நாபி⁴விபூ⁴ஷிதா ॥ 25 ॥
மாணிக்ய ஶகலாப³த்³த⁴ முத்³ரிகாங்கு³லிபூ⁴ஷிதா ।
புண்ட³ரீகத³லாகார நயனத்ரயஸுந்த³ரீ ॥ 26 ॥
கல்பிதாச்ச² மஹாராக³ பத்³மராகோ³ஜ்ஜ்வலப்ரபா⁴ ।
ரத்னகிங்கிணிகாயுக்த ரத்னகங்கணஶோபி⁴தா ॥ 27 ॥
மணிமுக்தாஸராபார லஸத்பத³கஸந்ததி꞉ ।
ரத்னாங்கு³லிப்ரவிதத ப்ரபா⁴ஜாலலஸத்கரா ॥ 28 ॥
கஞ்சுகீகு³ம்பி²தாபார நானா ரத்னததித்³யுதி꞉ ।
மல்லிகாமோதி³ த⁴ம்மில்ல மல்லிகாலிஸராவ்ருʼதா ॥ 29 ॥
ஸுவ்ருʼத்தனிபி³டோ³த்துங்க³ குசபா⁴ராலஸா ஶிவா ।
வரபாஶாங்குஶாபீ⁴தி லஸத்³பா³ஹு சதுஷ்டயா ॥ 30 ॥
ஸர்வஶ்ருʼங்கா³ரவேஷாட்⁴யா ஸுகுமாராங்க³வல்லரீ ।
ஸௌந்த³ர்யதா⁴ராஸர்வஸ்வா நிர்வ்யாஜகருணாமயீ ॥ 31 ॥
நிஜஸம்ʼலாபமாது⁴ர்ய விநிர்ப⁴ர்த்ஸிதகச்ச²பீ ।
கோடிகோடிரவீந்தூ³னாம்ʼ காந்திம்ʼ யா பி³ப்⁴ரதீ பரா ॥ 32 ॥
நானா ஸகீ²பி⁴ர்தா³ஸீபி⁴ஸ்ததா² தே³வாங்க³நாதி³பி⁴꞉ ।
ஸர்வாபி⁴ர்தே³வதாபி⁴ஸ்து ஸமந்தாத்பரிவேஷ்டிதா ॥ 33 ॥
இச்சா²ஶக்த்யா ஜ்ஞானஶக்த்யா க்ரியாஶக்த்யா ஸமன்விதா ।
லஜ்ஜா துஷ்டிஸ்ததா² புஷ்டி꞉ கீர்தி꞉ காந்தி꞉ க்ஷமா த³யா ॥ 34 ॥
பு³த்³தி⁴ர்மேதா⁴ஸ்ம்ருʼதிர்லக்ஷ்மீர்மூர்திமத்யோங்க³னா꞉ ஸ்ம்ருʼதா꞉ ।
ஜயா ச விஜயா சைவாப்யஜிதா சாபராஜிதா ॥ 35 ॥
நித்யா விலாஸினீ தோ³க்³த்⁴ரீ த்வகோ⁴ரா மங்க³லா நவா ।
பீட²ஶக்தய ஏதாஸ்து ஸேவந்தே யாம்ʼ பராம்பி³காம் ॥ 36 ॥
யஸ்யாஸ்து பார்ஶ்வபா⁴கே³ஸ்தோநிதீ⁴தௌ ஶங்க²பத்³மகௌ ।
நவரத்ன வஹானத்³யஸ்ததா² வை காஞ்சனஸ்ரவா꞉ ॥ 37 ॥
ஸப்ததா⁴துவஹானத்³யோ நிதி⁴ப்⁴யாம்ʼ து விநிர்க³தா꞉ ।
ஸுதா⁴ஸிந்த்⁴வந்தகா³மின்யஸ்தா꞉ ஸர்வா ந்ருʼபஸத்தம ॥ 38 ॥
ஸா தே³வீ பு⁴வனேஶானீ தத்³வாமாங்கே விராஜதே ।
ஸர்வேஶ த்வம்ʼ மஹேஶஸ்ய யத்ஸங்கா³ தே³வ நான்யதா² ॥ 39 ॥
சிந்தாமணி க்³ருʼஹஸ்யா(அ)ஸ்ய ப்ரமாணம்ʼ ஶ்ருʼணு பூ⁴மிப ।
ஸஹஸ்ரயோஜனாயாமம்ʼ மஹாந்தஸ்தத்ப்ரசக்ஷதே ॥ 40 ॥
தது³த்தரே மஹாஶாலா꞉ பூர்வஸ்மாத்³ த்³விகு³ணா꞉ ஸ்ம்ருʼதா꞉ ।
அந்தரிக்ஷக³தம்ʼ த்வேதந்நிராதா⁴ரம்ʼ விராஜதே ॥ 41 ॥
ஸங்கோசஶ்ச விகாஶஶ்ச ஜாயதே(அ)ஸ்ய நிரந்தரம் ।
படவத்கார்யவஶத꞉ ப்ரலயே ஸர்ஜனே ததா² ॥ 42 ॥
ஶாலானாம்ʼ சைவ ஸர்வேஷாம்ʼ ஸர்வகாந்திபராவதி⁴ ।
சிந்தாமணிக்³ருʼஹம்ʼ ப்ரோக்தம்ʼ யத்ர தே³வீ மஹோமயீ ॥ 43 ॥
யேயே உபாஸகா꞉ ஸந்தி ப்ரதிப்³ரஹ்மாண்ட³வர்தின꞉ ।
தே³வேஷு நாக³லோகேஷு மனுஷ்யேஷ்விதரேஷு ச ॥ 44 ॥
ஶ்ரீதே³வ்யாஸ்தே ச ஸர்வேபி வ்ரஜந்த்யத்ரைவ பூ⁴மிப ।
தே³வீக்ஷேத்ரே யே த்யஜந்தி ப்ராணாந்தே³வ்யர்சனே ரதா꞉ ॥ 45 ॥
தே ஸர்வே யாந்தி தத்ரைவ யத்ர தே³வீ மஹோத்ஸவா ।
க்⁴ருʼதகுல்யா து³க்³த⁴குல்யா த³தி⁴குல்யா மது⁴ஸ்ரவா꞉ ॥ 46 ॥
ஸ்யந்த³ந்தி ஸரித꞉ ஸர்வாஸ்ததா²ம்ருʼதவஹா꞉ பரா꞉ ।
த்³ராக்ஷாரஸவஹா꞉ காஶ்சிஜ்ஜம்பூ³ரஸவஹா꞉ பரா꞉ ॥ 47 ॥
ஆம்ரேக்ஷுரஸவாஹின்யோ நத்³யஸ்தாஸ்து ஸஹஸ்ரஶ꞉ ।
மனோரத²ப²லாவ்ருʼக்ஷாவாப்ய꞉ கூபாஸ்ததை²வ ச ॥ 48 ॥
யதே²ஷ்டபானப²லதா³ன ந்யூனம்ʼ கிஞ்சித³ஸ்தி ஹி ।
ந ரோக³பலிதம்ʼ வாபி ஜரா வாபி கதா³சன ॥ 49 ॥
ந சிந்தா ந ச மாத்ஸர்யம்ʼ காமக்ரோதா⁴தி³கம்ʼ ததா² ।
ஸர்வே யுவான꞉ ஸஸ்த்ரீகா꞉ ஸஹஸ்ராதி³த்யவர்சஸ꞉ ॥ 50 ॥
ப⁴ஜந்தி ஸததம்ʼ தே³வீம்ʼ தத்ர ஶ்ரீபு⁴வனேஶ்வரீம் ।
கேசித்ஸலோகதாபன்னா꞉ கேசித்ஸாமீப்யதாம்ʼ க³தா꞉ ॥ 51 ॥
ஸரூபதாம்ʼ க³தா꞉ கேசித்ஸார்ஷ்டிதாம்ʼ ச பரேக³தா꞉ ।
யாயாஸ்து தே³வதாஸ்தத்ர ப்ரதிப்³ரஹ்மாண்ட³வர்தினாம் ॥ 52 ॥
ஸமஷ்டய꞉ ஸ்தி²தாஸ்தாஸ்து ஸேவந்தே ஜக³தீ³ஶ்வரீம் ।
ஸப்தகோடிமஹாமந்த்ரா மூர்திமந்த உபாஸதே ॥ 53 ॥
மஹாவித்³யாஶ்ச ஸகலா꞉ ஸாம்யாவஸ்தா²த்மிகாம்ʼ ஶிவாம் ।
காரணப்³ரஹ்மரூபாம்ʼ தாம்ʼ மாயா ஶப³லவிக்³ரஹாம் ॥ 54 ॥
இத்த²ம்ʼ ராஜன்மயா ப்ரோக்தம்ʼ மணித்³வீபம்ʼ மஹத்தரம் ।
ந ஸூர்யசந்த்³ரௌ நோ வித்³யுத்கோடயோக்³நிஸ்ததை²வ ச ॥ 55 ॥
ஏதஸ்ய பா⁴ஸா கோட்யம்ʼஶ கோட்யம்ʼஶோ நாபி தே ஸமா꞉ ।
க்வசித்³வித்³ருமஸங்காஶம்ʼ க்வசின்மரகதச்ச²வி ॥ 56 ॥
வித்³யுத்³பா⁴னுஸமச்சா²யம்ʼ மத்⁴யஸூர்யஸமம்ʼ க்வசித் ।
வித்³யுத்கோடிமஹாதா⁴ரா ஸாரகாந்திததம்ʼ க்வசித் ॥ 57 ॥
க்வசித்ஸிந்தூ³ர நீலேந்த்³ரம்ʼ மாணிக்ய ஸத்³ருʼஶச்ச²வி ।
ஹீரஸார மஹாக³ர்ப⁴ த⁴க³த்³த⁴கி³த தி³க்தடம் ॥ 58 ॥
காந்த்யா தா³வானலஸமம்ʼ தப்தகாஞ்சன ஸன்னிப⁴ம் ।
க்வசிச்சந்த்³ரோபலோத்³கா³ரம்ʼ ஸூர்யோத்³கா³ரம்ʼ ச குத்ர சித் ॥ 59 ॥
ரத்னஶ்ருʼங்கி³ ஸமாயுக்தம்ʼ ரத்னப்ராகார கோ³புரம் ।
ரத்னபத்ரை ரத்னப²லைர்வ்ருʼக்ஷைஶ்ச பரிமண்டி³தம் ॥ 60 ॥
ந்ருʼத்யன்மயூரஸங்கை⁴ஶ்ச கபோதரணிதோஜ்ஜ்வலம் ।
கோகிலாகாகலீலாபை꞉ ஶுகலாபைஶ்ச ஶோபி⁴தம் ॥ 61 ॥
ஸுரம்ய ரமணீயாம்பு³ லக்ஷாவதி⁴ ஸரோவ்ருʼதம் ।
தன்மத்⁴யபா⁴க³ விலஸத்³விகசத்³ரத்ன பங்கஜை꞉ ॥ 62 ॥
ஸுக³ந்தி⁴பி⁴꞉ ஸமந்தாத்து வாஸிதம்ʼ ஶதயோஜனம் ।
மந்த³மாருத ஸம்பி⁴ன்ன சலத்³த்³ரும ஸமாகுலம் ॥ 63 ॥
சிந்தாமணி ஸமூஹானாம்ʼ ஜ்யோதிஷா விததாம்ப³ரம் ।
ரத்னப்ரபா⁴பி⁴ரபி⁴தோ த⁴க³த்³த⁴கி³த தி³க்தடம் ॥ 64 ॥
வ்ருʼக்ஷவ்ராத மஹாக³ந்த⁴வாதவ்ராத ஸுபூரிதம் ।
தூ⁴பதூ⁴பாயிதம்ʼ ராஜன்மணிதீ³பாயுதோஜ்ஜ்வலம் ॥ 65 ॥
மணிஜாலக ஸச்சி²த்³ர தரலோத³ரகாந்திபி⁴꞉ ।
தி³ங்மோஹஜனகம்ʼ சைதத்³த³ர்பணோத³ர ஸம்ʼயுதம் ॥ 66 ॥
ஐஶ்வர்யஸ்ய ஸமக்³ரஸ்ய ஶ்ருʼங்கா³ரஸ்யாகி²லஸ்ய ச ।
ஸர்வஜ்ஞதாயா꞉ ஸர்வாயாஸ்தேஜஸஶ்சாகி²லஸ்ய ச ॥ 67 ॥
பராக்ரமஸ்ய ஸர்வஸ்ய ஸர்வோத்தமகு³ணஸ்ய ச ।
ஸகலா யா த³யாயாஶ்ச ஸமாப்திரிஹ பூ⁴பதே ॥ 68 ॥
ராஜ்ஞ ஆனந்த³மாரப்⁴ய ப்³ரஹ்மலோகாந்த பூ⁴மிஷு ।
ஆனந்தா³ யே ஸ்தி²தா꞉ ஸர்வே தே(அ)த்ரைவாந்தர்ப⁴வந்தி ஹி ॥ 69 ॥
இதி தே வர்ணிதம்ʼ ராஜன்மணித்³வீபம்ʼ மஹத்தரம் ।
மஹாதே³வ்யா꞉ பரம்ʼஸ்தா²னம்ʼ ஸர்வலோகோத்தமோத்தமம் ॥ 70 ॥
ஏதஸ்ய ஸ்மரணாத்ஸத்³ய꞉ ஸர்வபாபம்ʼ வினஶ்யதி ।
ப்ராணோத்க்ரமணஸந்தௌ⁴ து ஸ்ம்ருʼத்வா தத்ரைவ க³ச்ச²தி ॥ 71 ॥
அத்⁴யாய பஞ்சகம்ʼ த்வேதத்படே²ந்நித்யம்ʼ ஸமாஹித꞉ ।
பூ⁴தப்ரேதபிஶாசாதி³ பா³தா⁴ தத்ர ப⁴வேன்ன ஹி ॥ 72 ॥
நவீன க்³ருʼஹ நிர்மாணே வாஸ்துயாகே³ ததை²வ ச ।
படி²தவ்யம்ʼ ப்ரயத்னேன கல்யாணம்ʼ தேன ஜாயதே ॥ 73 ॥
॥ இதி ஶ்ரீதே³வீபா⁴க³வதே மஹாபுராணே த்³வாத³ஶஸ்கந்தே⁴ த்³வாத³ஶோத்⁴யாய꞉ ॥
Recite with devotion and pure heart
Regular practice brings spiritual benefits