അസ്യ ശ്രീ ശിവകവച സ്തോത്ര മഹാമന്ത്രസ്യ । ഋഷഭ-യോഗീശ്വര ഋഷിഃ । അനുഷ്ടുപ് ഛന്ദഃ । ശ്രീ-സാംബസദാശിവോ ദേവതാ । ഓം ബീജം । നമഃ ശക്തിഃ । ശിവായേതി കീലകം । സാംബസദാശിവപ്രീത്യർഥേ ജപേ വിനിയോഗഃ ॥ കരന്യാസഃ – ഓം സദാശിവായ അംഗുഷ്ഠാഭ്യാം നമഃ । നം ഗംഗാധരായ തർജനീഭ്യാം നമഃ । മം മൃത്യുഞ്ജയായ മധ്യമാഭ്യാം നമഃ । ശിം ശൂലപാണയേ അനാമികാഭ്യാം നമഃ । വാം പിനാകപാണയേ കനിഷ്ഠികാഭ്യാം നമഃ । യം ഉമാപതയേ കരതലകരപൃഷ്ഠാഭ്യാം നമഃ । ഹൃദയാദി അംഗന്യാസഃ – ഓം സദാശിവായ ഹൃദയായ നമഃ । നം ഗംഗാധരായ ശിരസേ സ്വാഹാ । മം മൃത്യുഞ്ജയായ ശിഖായൈ വഷട് । ശിം ശൂലപാണയേ കവചായ ഹും । വാം പിനാകപാണയേ നേത്രത്രയായ വൗഷട് । യം ഉമാപതയേ അസ്ത്രായ ഫട് । ഭൂർഭുവസ്സുവരോമിതി ദിഗ്ബന്ധഃ ॥ ധ്യാനം – വജ്രദംഷ്ട്രം ത്രിനയനം കാലകണ്ഠ മരിന്ദമം । സഹസ്രകര-മത്യുഗ്രം വന്ദേ ശംഭും ഉമാപതിം ॥ രുദ്രാക്ഷ-കങ്കണ-ലസത്കര-ദണ്ഡയുഗ്മഃ പാലാന്തരാ-ലസിത-ഭസ്മധൃത-ത്രിപുണ്ഡ്രഃ । പഞ്ചാക്ഷരം പരിപഠൻ വരമന്ത്രരാജം ധ്യായൻ സദാ പശുപതിം ശരണം വ്രജേഥാഃ ॥ അതഃ പരം സർവപുരാണ-ഗുഹ്യം നിഃശേഷ-പാപൗഘഹരം പവിത്രം । ജയപ്രദം സർവ-വിപത്പ്രമോചനം വക്ഷ്യാമി ശൈവം കവചം ഹിതായ തേ ॥ പഞ്ചപൂജാ – ലം പൃഥിവ്യാത്മനേ ഗന്ധം സമർപയാമി । ഹം ആകാശാത്മനേ പുഷ്പൈഃ പൂജയാമി । യം വായ്വാത്മനേ ധൂപം ആഘ്രാപയാമി । രം അഗ്ന്യാത്മനേ ദീപം ദർശയാമി । വം അമൃതാത്മനേ അമൃതം മഹാ-നൈവേദ്യം നിവേദയാമി । സം സർവാത്മനേ സർവോപചാര-പൂജാം സമർപയാമി ॥ മന്ത്രഃ ॥ ഋഷഭ ഉവാച – നമസ്കൃത്യ മഹാദേവം വിശ്വ-വ്യാപിന-മീശ്വരം । വക്ഷ്യേ ശിവമയം വർമ സർവരക്ഷാകരം നൃണാം ॥ 1 ॥ ശുചൗ ദേശേ സമാസീനോ യഥാവത്കല്പിതാസനഃ । ജിതേന്ദ്രിയോ ജിതപ്രാണ-ശ്ചിന്തയേച്ഛിവമവ്യയം ॥ 2 ॥ ഹൃത്പുണ്ഡരീകാന്തരസന്നിവിഷ്ടം സ്വതേജസാ വ്യാപ്ത-നഭോഽവകാശം । അതീന്ദ്രിയം സൂക്ഷ്മമനന്തമാദ്യം ധ്യായേത്പരാനന്ദമയം മഹേശം ॥ 3 ॥ ധ്യാനാവധൂതാഖിലകർമബന്ധ- -ശ്ചിരം ചിദാനന്ദനിമഗ്നചേതാഃ । ഷഡക്ഷരന്യാസസമാഹിതാത്മാ ശൈവേന കുര്യാത്കവചേന രക്ഷാം ॥ 4 ॥ മാം പാതു ദേവോഽഖിലദേവതാത്മാ സംസാരകൂപേ പതിതം ഗഭീരേ । തന്നാമ ദിവ്യം വരമന്ത്രമൂലം ധുനോതു മേ സർവമഘം ഹൃദിസ്ഥം ॥ 5 ॥ സർവത്ര മാം രക്ഷതു വിശ്വമൂർതി- -ര്ജ്യോതി-ര്മയാനന്ദഘനശ്ചിദാത്മാ । അണോരണീയാനുരുശക്തിരേകഃ സ ഈശ്വരഃ പാതു ഭയാദശേഷാത് ॥ 6 ॥ യോ ഭൂസ്വരൂപേണ ബിഭർതി വിശ്വം പായാത്സ ഭൂമേർഗിരിശോഽഷ്ടമൂർതിഃ । യോഽപാം സ്വരൂപേണ നൃണാം കരോതി സഞ്ജീവനം സോഽവതു മാം ജലേഭ്യഃ ॥ 7 ॥ കല്പാവസാനേ ഭുവനാനി ദഗ്ധ്വാ സർവാണി യോ നൃത്യതി ഭൂരിലീലഃ । സ കാലരുദ്രോഽവതു മാം ദവാഗ്നേ- -ര്വാത്യാദിഭീതേ-രഖിലാച്ച താപാത് ॥ 8 ॥ പ്രദീപ്ത-വിദ്യുത്കനകാവഭാസോ വിദ്യാവരാഭീതി-കുഠാരപാണിഃ । ചതുർമുഖസ്തത്പുരുഷസ്ത്രിനേത്രഃ പ്രാച്യാം സ്ഥിതോ രക്ഷതു മാമജസ്രം ॥ 9 ॥ കുഠാര ഖേടാങ്കുശപാശശൂല കപാലപാശാക്ഷ ഗുണാന്ദധാനഃ । ചതുർമുഖോ നീല-രുചിസ്ത്രിനേത്രഃ പായാദഘോരോ ദിശി ദക്ഷിണസ്യാം ॥ 10 ॥ കുന്ദേന്ദു-ശംഖ-സ്ഫടികാവഭാസോ വേദാക്ഷമാലാ-വരദാഭയാങ്കഃ । ത്ര്യക്ഷശ്ചതുർവക്ത്ര ഉരുപ്രഭാവഃ സദ്യോഽധിജാതോഽവതു മാം പ്രതീച്യാം ॥ 11 ॥ വരാക്ഷ-മാലാഭയടങ്ക-ഹസ്തഃ സരോജ-കിഞ്ജൽകസമാനവർണഃ । ത്രിലോചന-ശ്ചാരുചതുർമുഖോ മാം പായാദുദീച്യാം ദിശി വാമദേവഃ ॥ 12 ॥ വേദാഭയേഷ്ടാങ്കുശടങ്കപാശ- -കപാലഢക്കാക്ഷര-ശൂലപാണിഃ । സിതദ്യുതിഃ പഞ്ചമുഖോഽവതാന്മാ- -മീശാന ഊർധ്വം പരമപ്രകാശഃ ॥ 13 ॥ മൂർധാനമവ്യാന്മമ ചന്ദ്രമൗലിഃ ഫാലം മമാവ്യാദഥ ഫാലനേത്രഃ । നേത്രേ മമാവ്യാദ്ഭഗനേത്രഹാരീ നാസാം സദാ രക്ഷതു വിശ്വനാഥഃ ॥ 14 ॥ പായാച്ഛ്രുതീ മേ ശ്രുതിഗീതകീർതിഃ കപോലമവ്യാത്സതതം കപാലീ । വക്ത്രം സദാ രക്ഷതു പഞ്ചവക്ത്രോ ജിഹ്വാം സദാ രക്ഷതു വേദജിഹ്വഃ ॥ 15 ॥ കണ്ഠം ഗിരീശോഽവതു നീലകണ്ഠഃ പാണിദ്വയം പാതു പിനാകപാണിഃ । ദോർമൂലമവ്യാന്മമ ധർമബാഹുഃ വക്ഷഃസ്ഥലം ദക്ഷമഖാന്തകോഽവ്യാത് ॥ 16 ॥ മമോദരം പാതു ഗിരീന്ദ്രധന്വാ മധ്യം മമാവ്യാന്മദനാന്തകാരീ । ഹേരംബതാതോ മമ പാതു നാഭിം പായാത്കടിം ധൂർജടിരീശ്വരോ മേ ॥ 17 ॥ ഊരുദ്വയം പാതു കുബേരമിത്രോ ജാനുദ്വയം മേ ജഗദീശ്വരോഽവ്യാത് । ജംഘായുഗം പുംഗവകേതുരവ്യാ- -ത്പാദൗ മമാവ്യാത്സുരവന്ദ്യപാദഃ ॥ 18 ॥ മഹേശ്വരഃ പാതു ദിനാദിയാമേ മാം മധ്യയാമേഽവതു വാമദേവഃ । ത്രിലോചനഃ പാതു തൃതീയയാമേ വൃഷധ്വജഃ പാതു ദിനാന്ത്യയാമേ ॥ 19 ॥ പായാന്നിശാദൗ ശശിശേഖരോ മാം ഗംഗാധരോ രക്ഷതു മാം നിശീഥേ । ഗൗരീപതിഃ പാതു നിശാവസാനേ മൃത്യുഞ്ജയോ രക്ഷതു സർവകാലം ॥ 20 ॥ അന്തഃസ്ഥിതം രക്ഷതു ശങ്കരോ മാം സ്ഥാണുഃ സദാ പാതു ബഹിഃസ്ഥിതം മാം । തദന്തരേ പാതു പതിഃ പശൂനാം സദാശിവോ രക്ഷതു മാം സമന്താത് ॥ 21 ॥ തിഷ്ഠന്ത-മവ്യാദ്ഭുവനൈകനാഥഃ പായാദ്വ്രജന്തം പ്രമഥാധിനാഥഃ । വേദാന്തവേദ്യോഽവതു മാം നിഷണ്ണം മാമവ്യയഃ പാതു ശിവഃ ശയാനം ॥ 22 ॥ മാർഗേഷു മാം രക്ഷതു നീലകണ്ഠഃ ശൈലാദി-ദുർഗേഷു പുരത്രയാരിഃ । അരണ്യവാസാദി-മഹാപ്രവാസേ പായാന്മൃഗവ്യാധ ഉദാരശക്തിഃ ॥ 23 ॥ കല്പാന്ത-കാലോഗ്ര-പടുപ്രകോപഃ സ്ഫുടാട്ട-ഹാസോച്ചലിതാണ്ഡ-കോശഃ । ഘോരാരി-സേനാർണവദുർനിവാര- -മഹാഭയാദ്രക്ഷതു വീരഭദ്രഃ ॥ 24 ॥ പത്ത്യശ്വമാതംഗ-രഥാവരൂധിനീ- -സഹസ്ര-ലക്ഷായുത-കോടിഭീഷണം । അക്ഷൗഹിണീനാം ശതമാതതായിനാം ഛിന്ദ്യാന്മൃഡോ ഘോരകുഠാരധാരയാ ॥ 25 ॥ നിഹന്തു ദസ്യൂൻപ്രലയാനലാർചി- -ര്ജ്വലത്ത്രിശൂലം ത്രിപുരാന്തകസ്യ । ശാർദൂല-സിംഹർക്ഷവൃകാദി-ഹിംസ്രാൻ സന്ത്രാസയത്വീശ-ധനുഃ പിനാകഃ ॥ 26 ॥ ദുസ്സ്വപ്ന ദുശ്ശകുന ദുർഗതി ദൗർമനസ്യ ദുർഭിക്ഷ ദുർവ്യസന ദുസ്സഹ ദുര്യശാംസി । ഉത്പാത-താപ-വിഷഭീതി-മസദ്ഗ്രഹാർതിം വ്യാധീംശ്ച നാശയതു മേ ജഗതാമധീശഃ ॥ 27 ॥ ഓം നമോ ഭഗവതേ സദാശിവായ സകല-തത്ത്വാത്മകായ സർവ-മന്ത്ര-സ്വരൂപായ സർവ-യന്ത്രാധിഷ്ഠിതായ സർവ-തന്ത്ര-സ്വരൂപായ സർവ-തത്ത്വ-വിദൂരായ ബ്രഹ്മ-രുദ്രാവതാരിണേ-നീലകണ്ഠായ പാർവതീ-മനോഹരപ്രിയായ സോമ-സൂര്യാഗ്നി-ലോചനായ ഭസ്മോദ്ധൂലിത-വിഗ്രഹായ മഹാമണി-മുകുട-ധാരണായ മാണിക്യ-ഭൂഷണായ സൃഷ്ടിസ്ഥിതി-പ്രലയകാല-രൗദ്രാവതാരായ ദക്ഷാധ്വര-ധ്വംസകായ മഹാകാല-ഭേദനായ മൂലധാരൈക-നിലയായ തത്വാതീതായ ഗംഗാധരായ സർവ-ദേവാദി-ദേവായ ഷഡാശ്രയായ വേദാന്ത-സാരായ ത്രിവർഗ-സാധനായ അനന്തകോടി-ബ്രഹ്മാണ്ഡ-നായകായ അനന്ത-വാസുകി-തക്ഷക-കർകോടക-ശംഖ-കുലിക-പദ്മ-മഹാപദ്മേതി-അഷ്ട-മഹാ-നാഗ-കുലഭൂഷണായ പ്രണവസ്വരൂപായ ചിദാകാശായ ആകാശ-ദിക്-സ്വരൂപായ ഗ്രഹ-നക്ഷത്ര-മാലിനേ സകലായ കലങ്ക-രഹിതായ സകല-ലോകൈക-കർത്രേ സകല-ലോകൈക-ഭർത്രേ സകല-ലോകൈക-സംഹർത്രേ സകല-ലോകൈക-ഗുരവേ സകല-ലോകൈക-സാക്ഷിണേ സകല-നിഗമഗുഹ്യായ സകല-വേദാന്ത-പാരഗായ സകല-ലോകൈക-വരപ്രദായ സകല-ലോകൈക-ശങ്കരായ സകല-ദുരിതാർതി-ഭഞ്ജനായ സകല-ജഗദഭയങ്കരായ ശശാങ്ക-ശേഖരായ ശാശ്വത-നിജാവാസായ നിരാകാരായ നിരാഭാസായ നിരാമയായ നിർമലായ നിർലോഭായ നിർമദായ നിശ്ചിന്തായ നിരഹങ്കാരായ നിരങ്കുശായ നിഷ്കലങ്കായ നിർഗുണായ നിഷ്കാമായ നിരൂപപ്ലവായ നിരവധ്യായ നിരന്തരായ നിരുപദ്രവായ നിരവദ്യായ നിരന്തരായ നിഷ്കാരണായ നിരാതങ്കായ നിഷ്പ്രപഞ്ചായ നിസ്സംഗായ നിർദ്വന്ദ്വായ നിരാധാരായ നീരാഗായ നിശ്ക്രോധായ നിർലോഭായ നിഷ്പാപായ നിർവികല്പായ നിർഭേദായ നിഷ്ക്രിയായ നിസ്തുലായ നിശ്ശംശയായ നിരഞ്ജനായ നിരുപമ-വിഭവായ നിത്യ-ശുദ്ധ-ബുദ്ധ-മുക്ത-പരിപൂർണ-സച്ചിദാനന്ദാദ്വയായ പരമ-ശാന്ത-സ്വരൂപായ പരമ-ശാന്ത-പ്രകാശായ തേജോരൂപായ തേജോമയായ തേജോഽധിപതയേ ജയ ജയ രുദ്ര മഹാരുദ്ര മഹാ-രൗദ്ര ഭദ്രാവതാര മഹാ-ഭൈരവ കാല-ഭൈരവ കല്പാന്ത-ഭൈരവ കപാല-മാലാധര ഖട്വാംഗ-ചർമ-ഖഡ്ഗ-ധര പാശാങ്കുശ-ഡമരൂശൂല-ചാപ-ബാണ-ഗദാ-ശക്തി-ഭിന്ദി- പാല-തോമര-മുസല-ഭുശുണ്ഡീ-മുദ്ഗര-പാശ-പരിഘ-ശതഘ്നീ-ചക്രാദ്യായുധ-ഭീഷണാകാര സഹസ്ര-മുഖ ദംഷ്ട്രാകരാല-വദന വികടാട്ടഹാസ വിസ്ഫാതിത-ബ്രഹ്മാണ്ഡ-മണ്ഡല-നാഗേന്ദ്രകുണ്ഡല നാഗേന്ദ്രഹാര നാഗേന്ദ്രവലയ നാഗേന്ദ്രചർമധര നാഗേന്ദ്രനികേതന മൃത്യുഞ്ജയ ത്ര്യംബക ത്രിപുരാന്തക വിശ്വരൂപ വിരൂപാക്ഷ വിശ്വേശ്വര വൃഷഭവാഹന വിഷവിഭൂഷണ വിശ്വതോമുഖ സർവതോമുഖ മാം രക്ഷ രക്ഷ ജ്വല ജ്വല പ്രജ്വല പ്രജ്വല മഹാമൃത്യുഭയം ശമയ ശമയ അപമൃത്യുഭയം നാശയ നാശയ രോഗഭയം ഉത്സാദയ ഉത്സാദയ വിഷസർപഭയം ശമയ ശമയ ചോരാൻ മാരയ മാരയ മമ ശത്രൂൻ ഉച്ചാടയ ഉച്ചാടയ ത്രിശൂലേന വിദാരയ വിദാരയ കുഠാരേണ ഭിന്ധി ഭിന്ധി ഖഡ്ഗേന ഛിൻദ്ദി ഛിൻദ്ദി ഖട്വാംഗേന വിപോധയ വിപോധയ മമ പാപം ശോധയ ശോധയ മുസലേന നിഷ്പേഷയ നിഷ്പേഷയ ബാണൈഃ സന്താഡയ സന്താഡയ യക്ഷ രക്ഷാംസി ഭീഷയ ഭീഷയ അശേഷ ഭൂതാൻ വിദ്രാവയ വിദ്രാവയ കൂഷ്മാണ്ഡ-ഭൂത-ബേതാല-മാരീഗണ-ബ്രഹ്മരാക്ഷസ-ഗണാൻ സന്ത്രാസയ സന്ത്രാസയ മമ അഭയം കുരു കുരു നരക-മഹാഭയാൻ മാം ഉദ്ധര ഉദ്ധര വിത്രസ്തം മാം ആശ്വാസയ ആശ്വാസയ അമൃത-കടാക്ഷ-വീക്ഷണേന മാം ആലോകയ ആലോകയ സഞ്ജീവയ സഞ്ജീവയ ക്ഷുത്തൃഷ്ണാർതം മാം ആപ്യായയ ആപ്യായയ ദുഃഖാതുരം മാം ആനന്ദയ ആനന്ദയ ശിവകവചേന മാം ആച്ഛാദയ ആച്ഛാദയ ഹര ഹര ഹര ഹര മൃത്യുഞ്ജയ ത്ര്യംബക സദാശിവ പരമശിവ നമസ്തേ നമസ്തേ നമസ്തേ നമഃ ॥ ഹൃദയാദി ന്യാസഃ – ഓം സദാശിവായ ഹൃദയായ നമഃ । നം ഗംഗാധരായ ശിരസേ സ്വാഹാ । മം മൃത്യുഞ്ജയായ ശിഖായൈ വഷട് । ശിം ശൂലപാണയേ കവചായ ഹും । വാം പിനാകപാണയേ നേത്രത്രയായ വൗഷട് । യം ഉമാപതയേ അസ്ത്രായ ഫട് । ഭൂർഭുവസ്സുവരോമിതി ദിഗ്വിമോകഃ ॥ ധ്യാനം – വജ്രദംഷ്ട്രം ത്രിനയനം കാലകണ്ഠ മരിന്ദമം । സഹസ്രകര-മത്യുഗ്രം വന്ദേ ശംഭും ഉമാപതിം ॥ രുദ്രാക്ഷ-കങ്കണ-ലസത്കര-ദണ്ഡയുഗ്മഃ പാലാന്തരാ-ലസിത-ഭസ്മധൃത-ത്രിപുണ്ഡ്രഃ । പഞ്ചാക്ഷരം പരിപഠൻ വരമന്ത്രരാജം ധ്യായൻ സദാ പശുപതിം ശരണം വ്രജേഥാഃ ॥ അതഃ പരം സർവപുരാണ-ഗുഹ്യം നിഃശേഷ-പാപൗഘഹരം പവിത്രം । ജയപ്രദം സർവ-വിപത്പ്രമോചനം വക്ഷ്യാമി ശൈവം കവചം ഹിതായ തേ ॥ പഞ്ചപൂജാ – ലം പൃഥിവ്യാത്മനേ ഗന്ധം സമർപയാമി । ഹം ആകാശാത്മനേ പുഷ്പൈഃ പൂജയാമി । യം വായ്വാത്മനേ ധൂപം ആഘ്രാപയാമി । രം അഗ്ന്യാത്മനേ ദീപം ദർശയാമി । വം അമൃതാത്മനേ അമൃതം മഹാ-നൈവേദ്യം നിവേദയാമി । സം സർവാത്മനേ സർവോപചാര-പൂജാം സമർപയാമി ॥ ഫലശ്രുതിഃ ॥ ഋഷഭ ഉവാച – ഇത്യേതത്കവചം ശൈവം വരദം വ്യാഹൃതം മയാ । സർവ-ബാധാ-പ്രശമനം രഹസ്യം സർവദേഹിനാം ॥ 1 ॥ യഃ സദാ ധാരയേന്മർത്യഃ ശൈവം കവചമുത്തമം । ന തസ്യ ജായതേ ക്വാപി ഭയം ശംഭോരനുഗ്രഹാത് ॥ 2 ॥ ക്ഷീണായു-ര്മൃത്യുമാപന്നോ മഹാരോഗഹതോഽപി വാ । സദ്യഃ സുഖമവാപ്നോതി ദീർഘമായുശ്ച വിന്ദതി ॥ 3 ॥ സർവദാരിദ്ര്യശമനം സൗമാംഗല്യ-വിവർധനം । യോ ധത്തേ കവചം ശൈവം സ ദേവൈരപി പൂജ്യതേ ॥ 4 ॥ മഹാപാതക-സംഘാതൈർമുച്യതേ ചോപപാതകൈഃ । ദേഹാന്തേ ശിവമാപ്നോതി ശിവ-വർമാനുഭാവതഃ ॥ 5 ॥ ത്വമപി ശ്രദ്ധയാ വത്സ ശൈവം കവചമുത്തമം । ധാരയസ്വ മയാ ദത്തം സദ്യഃ ശ്രേയോ ഹ്യവാപ്സ്യസി ॥ 6 ॥ സൂത ഉവാച – ഇത്യുക്ത്വാ ഋഷഭോ യോഗീ തസ്മൈ പാർഥിവ-സൂനവേ । ദദൗ ശംഖം മഹാരാവം ഖഡ്ഗം ചാരിനിഷൂദനം ॥ 7 ॥ പുനശ്ച ഭസ്മ സമ്മന്ത്ര്യ തദംഗം സർവതോഽസ്പൃശത് । ഗജാനാം ഷട്സഹസ്രസ്യ ദ്വിഗുണം ച ബലം ദദൗ ॥ 8 ॥ ഭസ്മപ്രഭാവാത്സമ്പ്രാപ്യ ബലൈശ്വര്യധൃതിസ്മൃതിഃ । സ രാജപുത്രഃ ശുശുഭേ ശരദർക ഇവ ശ്രിയാ ॥ 9 ॥ തമാഹ പ്രാഞ്ജലിം ഭൂയഃ സ യോഗീ രാജനന്ദനം । ഏഷ ഖഡ്ഗോ മയാ ദത്തസ്തപോമന്ത്രാനുഭാവതഃ ॥ 10 ॥ ശിതധാരമിമം ഖഡ്ഗം യസ്മൈ ദർശയസി സ്ഫുടം । സ സദ്യോ മ്രിയതേ ശത്രുഃ സാക്ഷാന്മൃത്യുരപി സ്വയം ॥ 11 ॥ അസ്യ ശംഖസ്യ നിഹ്രാദം യേ ശൃണ്വന്തി തവാഹിതാഃ । തേ മൂർഛിതാഃ പതിഷ്യന്തി ന്യസ്തശസ്ത്രാ വിചേതനാഃ ॥ 12 ॥ ഖഡ്ഗശംഖാവിമൗ ദിവ്യൗ പരസൈന്യവിനാശിനൗ । ആത്മസൈന്യസ്വപക്ഷാണാം ശൗര്യതേജോവിവർധനൗ ॥ 13 ॥ ഏതയോശ്ച പ്രഭാവേന ശൈവേന കവചേന ച । ദ്വിഷട്സഹസ്രനാഗാനാം ബലേന മഹതാപി ച ॥ 14 ॥ ഭസ്മധാരണസാമർഥ്യാച്ഛത്രുസൈന്യം വിജേഷ്യസി । പ്രാപ്യ സിംഹാസനം പൈത്ര്യം ഗോപ്താസി പൃഥിവീമിമാം ॥ 15 ॥ ഇതി ഭദ്രായുഷം സമ്യഗനുശാസ്യ സമാതൃകം । താഭ്യാം സമ്പൂജിതഃ സോഽഥ യോഗീ സ്വൈരഗതിര്യയൗ ॥ 16 ॥ ഇതി ശ്രീ സ്കാന്ദപുരാണേ തൃതീയേ ബ്രഹ്മോത്തരഖണ്ഡേ ശിവകവചകഥനം നാമ ദ്വാദശോഽധ്യായഃ ॥