हैंహైHaindavamஹிહિં
📍
Font Size:
രാഘവേന്ദ്ര കവചം
കവചം ശ്രീ രാഘവേന്ദ്രസ്യ യതീന്ദ്രസ്യ മഹാത്മനഃ ।
വക്ഷ്യാമി ഗുരുവര്യസ്യ വാഞ്ഛിതാർഥപ്രദായകം ॥ 1 ॥
ഋഷിരസ്യാപ്പണാചാര്യഃ ഛന്ദോഽനുഷ്ടുപ് പ്രകീർതിതം ।
ദേവതാ ശ്രീരാഘവേന്ദ്ര ഗുരുരിഷ്ടാർഥസിദ്ധയേ ॥ 2 ॥
അഷ്ടോത്തരശതം ജപ്യം ഭക്തിയുക്തേന ചേതസാ ।
ഉദ്യത്പ്രദ്യോതനദ്യോത ധർമകൂർമാസനേ സ്ഥിതം ॥ 3 ॥
ഖദ്യോഖദ്യോതനദ്യോത ധർമകൂർമാസനേ സ്ഥിതം ।
ധൃതകാഷായവസനം തുലസീഹാരവക്ഷസം ॥ 4 ॥
ദോർദണ്ഡവിലസദ്ദണ്ഡ കമണ്ഡലവിരാജിതം ।
അഭയജ്ഞാനമുദ്രാഽക്ഷമാലാലോലകരാംബുജം ॥ 5 ॥
യോഗീന്ദ്രവന്ദ്യപാദാബ്ജം രാഘവേന്ദ്ര ഗുരും ഭജേ ।
ശിരോ രക്ഷതു മേ നിത്യം രാഘവേന്ദ്രോഽഖിലേഷ്ടദഃ ॥ 6 ॥
പാപാദ്രിപാടനേ വജ്രഃ കേശാൻ രക്ഷതു മേ സദാ ।
ക്ഷമാസുരഗണാധീശോ മുഖം രക്ഷതു മേ ഗുരുഃ ॥ 7 ॥
ഹരിസേവാലബ്ധസർവസമ്പത്ഫാലം മമാവതു ।
ദേവസ്വഭാവോഽവതു മേ ദൃശൗ തത്ത്വപ്രദർശകഃ ॥ 8 ॥
ഇഷ്ടപ്രദാനേ കല്പദ്രുഃ ശ്രോത്രേ ശ്രുത്യർഥബോധകഃ ।
ഭവ്യസ്വരൂപോ മേ നാസാം ജിഹ്വാം മേഽവതു ഭവ്യകൃത് ॥ 9 ॥
ആസ്യം രക്ഷതു മേ ദുഃഖതൂലസംഘാഗ്നിചര്യകഃ ।
സുഖധൈര്യാദിസുഗുണോ ഭ്രുവൗ മമ സദാഽവതു ॥ 10 ॥
ഓഷ്ഠൗ രക്ഷതു മേ സർവഗ്രഹനിഗ്രഹശക്തിമാൻ ।
ഉപപ്ലവോദധേസ്സേതുർദന്താൻ രക്ഷതു മേ സദാ ॥ 11 ॥
നിരസ്തദോഷോ മേ പാതു കപോലൗ സർവപാലകഃ ।
നിരവദ്യമഹാവേഷഃ കണ്ഠം മേഽവതു സർവദാ ॥ 12 ॥
കർണമൂലേ തു പ്രത്യർഥിമൂകത്വാകരവാങ്മമ ।
പരവാദിജയേ പാതു ഹസ്തൗ സത്തത്ത്വവാദകൃത് ॥ 13 ॥
കരൗ രക്ഷതു മേ വിദ്വത്പരിജ്ഞേയവിശേഷവാൻ ।
വാഗ്വൈഖരീഭവ്യശേഷജയീ വക്ഷസ്ഥലം മമ ॥ 14 ॥
സതീസന്താനസമ്പത്തിഭക്തിജ്ഞാനാദിവൃദ്ധികൃത് ।
സ്തനൗ രക്ഷതു മേ നിത്യം ശരീരാവദ്യഹാനികൃത് ॥ 15 ॥
പുണ്യവർധനപാദാബ്ജാഭിഷേകജലസഞ്ചയഃ ।
നാഭിം രക്ഷതു മേ പാർശ്വൗ ദ്യുനദീതുല്യസദ്ഗുണഃ ॥ 16 ॥
പൃഷ്ഠം രക്ഷതു മേ നിത്യം താപത്രയവിനാശകൃത് ।
കടിം മേ രക്ഷതു സദാ വന്ദ്യാ സത്പുത്രദായകഃ ॥ 17 ॥
ജഘനം മേഽവതു സദാ വ്യംഗസ്വംഗസമൃദ്ധികൃത് ।
ഗുഹ്യം രക്ഷതു മേ പാപഗ്രഹാരിഷ്ടവിനാശകൃത് ॥ 18 ॥
ഭക്താഘവിധ്വംസകരനിജമൂർതിപ്രദർശകഃ ।
മൂർതിമാൻപാതു മേ രോമം രാഘവേന്ദ്രോ ജഗദ്ഗുരുഃ ॥ 19 ॥
സർവതന്ത്രസ്വതന്ത്രോഽസൗ ജാനുനീ മേ സദാഽവതു ।
ജംഘേ രക്ഷതു മേ നിത്യം ശ്രീമധ്വമതവർധനഃ ॥ 20 ॥
വിജയീന്ദ്രകരാബ്ജോത്ഥസുധീന്ദ്രവരപുത്രകഃ ।
ഗുൽഫൗ ശ്രീരാഘവേന്ദ്രോ മേ യതിരാട് സർവദാഽവതു ॥ । 21 ॥
പാദൗ രക്ഷതു മേ സർവഭയഹാരീ കൃപാനിധിഃ ।
ജ്ഞാനഭക്തിസുപുത്രായുര്യശഃ ശ്രീപുണ്യവർധനഃ ॥ 22 ॥
കരപാദാംഗുലീഃ സർവാ മമാവതു ജഗദ്ഗുരുഃ ।
പ്രതിവാദിജയസ്വാന്തഭേദചിഹ്നാദരോ ഗുരുഃ ॥ 23 ॥
നഖാനവതു മേ സർവാൻ സർവശാസ്ത്രവിശാരദഃ ।
അപരോക്ഷീകൃതശ്രീശഃ പ്രാച്യാം ദിശി സദാഽവതു ॥ 24 ॥
സ ദക്ഷിണേ ചാഽവതു മാം സമുപേക്ഷിതഭാവജഃ ।
അപേക്ഷിതപ്രദാതാ ച പ്രതീച്യാമവതു പ്രഭുഃ ॥ 25 ॥
ദയാദാക്ഷിണ്യവൈരാഗ്യവാക്പാടവമുഖാങ്കിതഃ ।
സദോദീച്യാമവതു മാം ശാപാനുഗ്രഹശക്തിമാൻ ॥ 26 ॥
നിഖിലേന്ദ്രിയദോഷഘ്നോ മഹാനുഗ്രഹകൃദ്ഗുരുഃ ।
അധശ്ചോർധ്വം ചാഽവതു മാമഷ്ടാക്ഷരമനൂദിതം ॥ 27 ॥
ആത്മാത്മീയാഘരാശിഘ്നോ മാം രക്ഷതു വിദിക്ഷു ച ।
ചതുർണാം ച പുമർഥാനാം ദാതാ പ്രാതഃ സദാഽവതു ॥ 28 ॥
സംഗ്രാമേഽവതു മാം നിത്യം തത്ത്വവിത്സർവസൗഖ്യകൃത് ।
മധ്യാഹ്നേഽഗമ്യമഹിമാ മാം രക്ഷതു മഹായശാഃ ॥ 29 ॥
മൃതപോതപ്രാണദാതാ സായാഹ്നേ മാം സദാഽവതു ।
വേദിസ്ഥപുരുഷോജ്ജീവീ നിശീഥേ പാതു മാം ഗുരുഃ ॥ 30 ॥
വഹ്നിസ്ഥമാലികോദ്ധർതാ വഹ്നിതാപാത്സദാഽവതു ।
സമഗ്രടീകാവ്യാഖ്യാതാ ഗുരുർമേ വിഷയേഽവതു ॥ 31 ॥
കാന്താരേഽവതു മാം നിത്യം ഭാട്ട സംഗ്രഹകൃദ്ഗുരുഃ ।
സുധാപരിമലോദ്ധർതാ സ്വച്ഛന്ദസ്തു സദാഽവതു ॥ 32 ॥
രാജചോരവിഷവ്യാധിയാദോവന്യമൃഗാദിഭിഃ ।
അപസ്മാരാപഹർതാ നഃ ശാസ്ത്രവിത്സർവദാഽവതു ॥ 33 ॥
ഗതൗ സർവത്ര മാം പാതൂപനിഷദർഥകൃദ്ഗുരുഃ ।
ഋഗ്വ്യാഖ്യാനകൃദാചാര്യഃ സ്ഥിതൗ രക്ഷതു മാം സദാ ॥ 34 ॥
മന്ത്രാലയനിവാസീ മാം ജാഗ്രത്കാലേ സദാഽവതു ।
ന്യായമുക്താവലീകർതാ സ്വപ്നേ രക്ഷതു മാം സദാ ॥ 35 ॥
മാം പാതു ചന്ദ്രികാവ്യാഖ്യാകർതാ സുപ്തൗ ഹി തത്ത്വകൃത് ।
സുതന്ത്രദീപികാകർതാ മുക്തൗ രക്ഷതു മാം ഗുരുഃ ॥ 36 ॥
ഗീതാർഥസംഗ്രഹകരഃ സദാ രക്ഷതു മാം ഗുരുഃ ।
ശ്രീമധ്വമതദുഗ്ധാബ്ധിചന്ദ്രോഽവതു സദാഽനഘഃ ॥ 37 ॥
ഇതി ശ്രീരാഘവേന്ദ്രസ്യ കവചം പാപനാശനം ।
സർവവ്യാധിഹരം സദ്യഃ പാവനം പുണ്യവർധനം ॥ 38 ॥
യ ഇദം പഠതേ നിത്യം നിയമേന സമാഹിതഃ ।
അദൃഷ്ടിഃ പൂർണദൃഷ്ടിഃ സ്യാദേഡമൂകോഽപി വാക്പതിഃ ॥ 39 ॥
പൂർണായുഃ പൂർണസമ്പത്തിഭക്തിജ്ഞാനാഭിവൃദ്ധികൃത് ।
പീത്വാ വാരി നരോ യേന കവചേനാഭിമന്ത്രിതം ॥ 40 ॥
ജഹാതി കുക്ഷിഗാൻ രോഗാൻ ഗുരുവര്യപ്രസാദതഃ ।
പ്രദക്ഷിണനമസ്കാരാൻ ഗുരോർവൃന്ദാവനസ്യ യഃ ॥ 41 ॥
കരോതി പരയാ ഭക്ത്യാ തദേതത്കവചം പഠൻ ।
പംഗുഃ കൂണിശ്ച പൗഗണ്ഡഃ പൂർണാംഗോ ജായതേ ധ്രുവം ॥ 42 ॥
ശേഷാശ്ച കുഷ്ഠപൂർവാശ്ച നശ്യന്ത്യാമയരാശയഃ ।
അഷ്ടാക്ഷരേണ മന്ത്രേണ സ്തോത്രേണ കവചേന ച ॥ 43 ॥
വൃന്ദാവനേ സന്നിഹിതമഭിഷിച്യ യഥാവിധി ।
യന്ത്രേ മന്ത്രാക്ഷരാണ്യഷ്ടൗ വിലിഖ്യാത്ര പ്രതിഷ്ഠിതം ॥ 44 ॥
ഷോഡശൈരുപചാരൈശ്ച സമ്പൂജ്യ ത്രിജഗദ്ഗുരും ।
അഷ്ടോത്തരശതാഖ്യാഭിരർചയേത്കുസുമാദിഭിഃ ॥ 45 ॥
ഫലൈശ്ച വിവിധൈരേവ ഗുരോരർചാം പ്രകുർവതഃ ।
നാമശ്രവണമാത്രേണ ഗുരുവര്യപ്രസാദതഃ ॥ 46 ॥
ഭൂതപ്രേതപിശാചാദ്യാഃ വിദ്രവന്തി ദിശോ ദശ ।
പഠേദേതത്ത്രികം നിത്യം ഗുരോർവൃന്ദാവനാന്തികേ ॥ 47 ॥
ദീപം സമ്യോജ്യ വിദ്യാവാൻ സഭാസു വിജയീ ഭവേത് ।
രാജചോരമഹാവ്യാഘ്രസർപനക്രാദിപീഡനാത് ॥ 48 ॥
കവചസ്യ പ്രഭാവേണ ഭയം തസ്യ ന ജായതേ ।
സോമസൂര്യോപരാഗാദികാലേ വൃന്ദാവനാന്തികേ ॥ 49 ॥
കവചാദിത്രികം പുണ്യമപ്പണാചാര്യദർശിതം ।
ജപേദ്യഃ സ ധനം പുത്രാൻ ഭാര്യാം ച സുമനോരമാം ॥ 50 ॥
ജ്ഞാനം ഭക്തിം ച വൈരാഗ്യം ഭുക്തിം മുക്തിം ച ശാശ്വതീം ।
സമ്പ്രാപ്യ മോദതേ നിത്യം ഗുരുവര്യപ്രസാദതഃ ॥ 51 ॥
ഇതി ശ്രീമദപ്പണാചാര്യവിരചിതം ശ്രീരാഘവേന്ദ്രകവചം സമ്പൂർണം ।
Recite with devotion and pure heart
Regular practice brings spiritual benefits