हैंహైHaindavamஹிહિં
📍
Font Size:
രുചി കൃതം പിതൃ സ്തോത്രം – 1
രുചിരുവാച ।
നമസ്യേഽഹം പിതൄൻ ഭക്ത്യാ യേ വസന്ത്യധിദേവതാഃ ।
ദേവൈരപി ഹി തർപ്യന്തേ യേ ശ്രാദ്ധേഷു സ്വധോത്തരൈഃ ॥ 1 ॥
നമസ്യേഽഹം പിതൄൻ സ്വർഗേ യേ തർപ്യന്തേ മഹർഷിഭിഃ ।
ശ്രാദ്ധൈർമനോമയൈർഭക്ത്യാ ഭുക്തിമുക്തിമഭീപ്സുഭിഃ ॥ 2 ॥
നമസ്യേഽഹം പിതൄൻ സ്വർഗേ സിദ്ധാഃ സന്തർപയന്തി യാൻ ।
ശ്രാദ്ധേഷു ദിവ്യൈഃ സകലൈരുപഹാരൈരനുത്തമൈഃ ॥ 3 ॥
നമസ്യേഽഹം പിതൄൻ ഭക്ത്യാ യേഽർച്യന്തേ ഗുഹ്യകൈർദിവി ।
തന്മയത്വേന വാഞ്ഛദ്ഭിരൃദ്ധിര്യാത്യന്തികീം പരാം ॥ 4 ॥
നമസ്യേഽഹം പിതൄൻ മർത്യൈരർച്യന്തേ ഭുവി യേ സദാ ।
ശ്രാദ്ധേഷു ശ്രദ്ധയാഭീഷ്ടലോകപുഷ്ടിപ്രദായിനഃ ॥ 5 ॥
നമസ്യേഽഹം പിതൄൻ വിപ്രൈരർച്യന്തേ ഭുവി യേ സദാ ।
വാഞ്ഛിതാഭീഷ്ടലാഭായ പ്രാജാപത്യപ്രദായിനഃ ॥ 6 ॥
നമസ്യേഽഹം പിതൄൻ യേ വൈ തർപ്യന്തേഽരണ്യവാസിഭിഃ ।
വന്യൈഃ ശ്രാദ്ധൈര്യതാഹാരൈസ്തപോനിർധൂതകല്മഷൈഃ ॥ 7 ॥
നമസ്യേഽഹം പിതൄൻ വിപ്രൈർനൈഷ്ഠികൈർധർമചാരിഭിഃ ।
യേ സമ്യതാത്മഭിർനിത്യം സന്തർപ്യന്തേ സമാധിഭിഃ ॥ 8 ॥
നമസ്യേഽഹം പിതൄൻ ശ്രാദ്ധൈ രാജന്യാസ്തർപയന്തി യാൻ ।
കവ്യൈരശേഷൈർവിധിവല്ലോകദ്വയഫലപ്രദാൻ ॥ 9 ॥
നമസ്യേഽഹം പിതൄൻ വൈശ്യൈരർച്യന്തേ ഭുവി യേ സദാ ।
സ്വകർമാഭിരതൈർനിത്യം പുഷ്പധൂപാന്നവാരിഭിഃ ॥ 10 ॥
നമസ്യേഽഹം പിതൄൻ ശ്രാദ്ധേ ശൂദ്രൈരപി ച ഭക്തിതഃ ।
സന്തർപ്യന്തേ ജഗത്കൃത്സ്നം നാമ്നാ ഖ്യാതാഃ സുകാലിനഃ ॥ 11 ॥
നമസ്യേഽഹം പിതൄൻ ശ്രാദ്ധേ പാതാലേ യേ മഹാസുരൈഃ ।
സന്തർപ്യന്തേ സുധാഹാരാസ്ത്യക്തദംഭമദൈഃ സദാ ॥ 12 ॥
നമസ്യേഽഹം പിതൄൻ ശ്രാദ്ധൈരർച്യന്തേ യേ രസാതലേ ।
ഭോഗൈരശേഷൈർവിധിവന്നാഗൈഃ കാമാനഭീപ്സുഭിഃ ॥ 13 ॥
നമസ്യേഽഹം പിതൄൻ ശ്രാദ്ധൈഃ സർപൈഃ സന്തർപിതാൻസദാ ।
തത്രൈവ വിധിവന്മന്ത്രഭോഗസമ്പത്സമന്വിതൈഃ ॥ 14 ॥
പിതൄന്നമസ്യേ നിവസന്തി സാക്ഷാ-
-ദ്യേ ദേവലോകേഽഥ മഹീതലേ വാ ।
തഥാഽന്തരിക്ഷേ ച സുരാരിപൂജ്യാ-
-സ്തേ മേ പ്രതീച്ഛന്തു മനോപനീതം ॥ 15 ॥
പിതൄന്നമസ്യേ പരമാർഥഭൂതാ
യേ വൈ വിമാനേ നിവസന്ത്യമൂർതാഃ ।
യജന്തി യാനസ്തമലൈർമനോഭി-
-ര്യോഗീശ്വരാഃ ക്ലേശവിമുക്തിഹേതൂൻ ॥ 16 ॥
പിതൄന്നമസ്യേ ദിവി യേ ച മൂർതാഃ
സ്വധാഭുജഃ കാമ്യഫലാഭിസന്ധൗ ।
പ്രദാനശക്താഃ സകലേപ്സിതാനാം
വിമുക്തിദാ യേഽനഭിസംഹിതേഷു ॥ 17 ॥
തൃപ്യന്തു തേഽസ്മിൻപിതരഃ സമസ്താ
ഇച്ഛാവതാം യേ പ്രദിശന്തി കാമാൻ ।
സുരത്വമിന്ദ്രത്വമിതോഽധികം വാ
ഗജാശ്വരത്നാനി മഹാഗൃഹാണി ॥ 18 ॥
സോമസ്യ യേ രശ്മിഷു യേഽർകബിംബേ
ശുക്ലേ വിമാനേ ച സദാ വസന്തി ।
തൃപ്യന്തു തേഽസ്മിൻപിതരോഽന്നതോയൈ-
-ര്ഗന്ധാദിനാ പുഷ്ടിമിതോ വ്രജന്തു ॥ 19 ॥
യേഷാം ഹുതേഽഗ്നൗ ഹവിഷാ ച തൃപ്തി-
-ര്യേ ഭുഞ്ജതേ വിപ്രശരീരസംസ്ഥാഃ ।
യേ പിണ്ഡദാനേന മുദം പ്രയാന്തി
തൃപ്യന്തു തേഽസ്മിൻപിതരോഽന്നതോയൈഃ ॥ 20 ॥
യേ ഖഡ്ഗമാംസേന സുരൈരഭീഷ്ടൈഃ
കൃഷ്ണൈസ്തിലൈർദിവ്യ മനോഹരൈശ്ച ।
കാലേന ശാകേന മഹർഷിവര്യൈഃ
സമ്പ്രീണിതാസ്തേ മുദമത്ര യാന്തു ॥ 21 ॥
കവ്യാന്യശേഷാണി ച യാന്യഭീഷ്ടാ-
-ന്യതീവ തേഷാം മമ പൂജിതാനാം ।
തേഷാഞ്ച സാന്നിധ്യമിഹാസ്തു പുഷ്പ-
-ഗന്ധാംബുഭോജ്യേഷു മയാ കൃതേഷു ॥ 22 ॥
ദിനേ ദിനേ യേ പ്രതിഗൃഹ്ണതേഽർചാം
മാസാന്തപൂജ്യാ ഭുവി യേഽഷ്ടകാസു ।
യേ വത്സരാന്തേഽഭ്യുദയേ ച പൂജ്യാഃ
പ്രയാന്തു തേ മേ പിതരോഽത്ര തുഷ്ടിം ॥ 23 ॥
പൂജ്യാ ദ്വിജാനാം കുമുദേന്ദുഭാസോ
യേ ക്ഷത്രിയാണാം ജ്വലനാർകവർണാഃ ।
തഥാ വിശാം യേ കനകാവദാതാ
നീലീപ്രഭാഃ ശൂദ്രജനസ്യ യേ ച ॥ 24 ॥
തേഽസ്മിൻസമസ്താ മമ പുഷ്പഗന്ധ-
-ധൂപാംബുഭോജ്യാദിനിവേദനേന ।
തഥാഽഗ്നിഹോമേന ച യാന്തി തൃപ്തിം
സദാ പിതൃഭ്യഃ പ്രണതോഽസ്മി തേഭ്യഃ ॥ 25 ॥
യേ ദേവപൂർവാണ്യഭിതൃപ്തിഹേതോ-
-രശ്നന്തി കവ്യാനി ശുഭാഹൃതാനി ।
തൃപ്താശ്ച യേ ഭൂതിസൃജോ ഭവന്തി
തൃപ്യന്തു തേഽസ്മിൻപ്രണതോഽസ്മി തേഭ്യഃ ॥ 26 ॥
രക്ഷാംസി ഭൂതാന്യസുരാംസ്തഥോഗ്രാ-
-ന്നിർനാശയന്തു ത്വശിവം പ്രജാനാം ।
ആദ്യാഃ സുരാണാമമരേശപൂജ്യാ-
-സ്തൃപ്യന്തു തേഽസ്മിൻപ്രണതോഽസ്മിതേഭ്യഃ ॥ 27 ॥
അഗ്നിസ്വാത്താ ബർഹിഷദ ആജ്യപാഃ സോമപാസ്തഥാ ।
വ്രജന്തു തൃപ്തിം ശ്രാദ്ധേഽസ്മിൻപിതരസ്തർപിതാ മയാ ॥ 28 ॥
അഗ്നിസ്വാത്താഃ പിതൃഗണാഃ പ്രാചീം രക്ഷന്തു മേ ദിശം ।
തഥാ ബർഹിഷദഃ പാന്തു യാമ്യാം മേ പിതരഃ സദാ ।
പ്രതീചീമാജ്യപാസ്തദ്വദുദീചീമപി സോമപാഃ ॥ 29 ॥
രക്ഷോഭൂതപിശാചേഭ്യസ്തഥൈവാസുരദോഷതഃ ।
സർവതഃ പിതരോ രക്ഷാം കുർവന്തു മമ നിത്യശഃ ॥ 30 ॥
വിശ്വോ വിശ്വഭുഗാരാധ്യോ ധർമോ ധന്യഃ ശുഭാനനഃ ।
ഭൂതിദോ ഭൂതികൃദ്ഭൂതിഃ പിതൄണാം യേ ഗണാ നവ ॥ 31 ॥
കല്യാണഃ കല്യദഃ കർതാ കല്യഃ കല്യതരാശ്രയഃ ।
കല്യതാഹേതുരനഘഃ ഷഡിമേ തേ ഗണാഃ സ്മൃതാഃ ॥ 32 ॥
വരോ വരേണ്യോ വരദസ്തുഷ്ടിദഃ പുഷ്ടിദസ്തഥാ ।
വിശ്വപാതാ തഥാ ധാതാ സപ്തൈതേ ച ഗണാഃ സ്മൃതാഃ ॥ 33 ॥
മഹാന്മഹാത്മാ മഹിതോ മഹിമാവാന്മഹാബലഃ ।
ഗണാഃ പഞ്ച തഥൈവൈതേ പിതൄണാം പാപനാശനാഃ ॥ 34 ॥
സുഖദോ ധനദശ്ചാന്യോ ധർമദോഽന്യശ്ച ഭൂതിദഃ ।
പിതൄണാം കഥ്യതേ ചൈവ തഥാ ഗണചതുഷ്ടയം ॥ 35 ॥
ഏകത്രിംശത്പിതൃഗണാ യൈർവ്യാപ്തമഖിലം ജഗത് ।
ത ഏവാത്ര പിതൃഗണാസ്തുഷ്യന്തു ച മദാഹിതം ॥ 36 ॥
ഇതി ശ്രീ ഗരുഡപുരാണേ ഊനനവതിതമോഽധ്യായേ രുചികൃത പിതൃ സ്തോത്രം ।
Recite with devotion and pure heart
Regular practice brings spiritual benefits